Koteā Takotou Manatu ʼo ʼUhiga Mo Koutou?
NEʼE ko he tagata fialahi. Neʼe foaki kia ia he tuʼulaga māʼoluga ʼi te puleʼaga, pea neʼe fiafia ʼi tona vikiʼi pea mo tona fakaʼapaʼapaʼi e te hahaʼi. Kae neʼe tupu tona toe ʼita lahi he neʼe mole fia fakaʼapaʼapa te tahi ofisie kia ia. ʼI tana lagavaka ki ai, neʼe fonofono te minisi fialahi ʼaia ke ina matematehi ʼi te puleʼaga te hahaʼi fuli ʼaē ʼe fenua tahi mo te ofisie ʼaē neʼe ʼita ki ai. Neʼe kovi te fialahi ʼa te tagata ʼaia.
Ko te tagata ʼaē neʼe fonofono ki te fakapō ʼaia neʼe ko Amane, te minisi ʼi te fale hau ʼo Asuelusi, te Hau ʼo Pelesia. Pea koteā te tupuʼaga ʼo tana agakovi feiā? ʼE tupu ko te tagata Sutea neʼe higoa ko Maletokeo. Neʼe kovi te fia fai fakapō ʼa Amane, ʼo hā ʼaki mai te faka tuʼutāmaki ʼo te fialahi pea mo tona ʼu fua kovi. ʼI tana fialahi ʼaia, neʼe hoko ai te faigataʼaʼia ki ʼihi pea neʼe toe lainoa ai mo ia ia muʼa ʼo te hahaʼi pea neʼe fakaʼosi ʼaki tana mate.—Esitele 3:1-9; 5:8-14; 6:4-10; 7:1-10.
ʼE Feala Ke Fialahi Mo Te Kau Atolasio Moʼoni
ʼE fakamaʼua mai e Sehova ke tou ‘haʼele mo ia ʼi te agavaivai.’ (Mikea 6:8) ʼE maʼu ʼi te Tohi-Tapu te ʼu fakamatala kehekehe ʼo te ʼu hahaʼi neʼe mole nātou agavaivai. Neʼe tupu ʼaki ai tonatou ʼu fihifihia pea mo nātou lotomamahi ai. Tou vakaʼi he ʼu faʼifaʼitaki, ʼe tokoni mai anai kia tatou ke tou mahino ʼe ko he agavale pea mo fakatupu tuʼutāmaki te ʼu manatu ʼaē ʼe mole fakapotopoto.
Neʼe mole kei manatu fakapotopoto ia Sonasi, te polofeta ʼa te ʼAtua, pea neʼe faiga ai ke hola ʼi te fakatotonu age e te ʼAtua ke ʼalu ʼo tala ki te hahaʼi agakovi ʼo Ninive, te fakamāu ʼaē ka fakahoko e Sehova kia nātou. (Sonasi 1:1-3) Ki muli age, neʼe ʼita Sonasi ʼi te fua lelei ʼo tana gāue faka mafola, he neʼe fakahemala te kau Ninive. Neʼe manatu pe ki tona matagafua faka polofeta, kae mole faʼa maʼuhiga kia ia te maʼuli ʼo te lauʼi afe kau Ninive. (Sonasi 4:1-3) Kapau ʼe tou tokakaga fau ki totatou ʼuhiga, pea ʼe faigataʼa anai hatatou mole fakapalatahi pea mo hatatou mahino lelei ki te hahaʼi pea mo te ʼu meʼa ʼaē ʼe hoko.
Tou toe vakaʼi mo Usia, ʼaē neʼe ko he hau lelei ʼo Suta. ʼI tana mole kei manatu fakapotopoto, neʼe agapauʼu ʼo faiga ke ina fai te ʼu gāue ʼa te kau pelepitelo. ʼUhi ko tana fialahi ʼaia, neʼe mahaki ai pea neʼe līʼakina ia ia e te ʼAtua.—2 Fakamatala 26:3, 16-21.
Neʼe meihiʼi pe ke tō te kau ʼapositolo ʼa Sesu ki te hele ʼo te fialahi. Neʼe nātou loto ke faka kolōliaʼi nātou pea ke nātou puleʼi ʼihi. ʼI te hoko mai ʼo te ʼaʼahi lahi, neʼe nātou līaki ia Sesu kae nātou feholaki. (Mateo 18:1; 20:20-28; 26:56; Maleko 9:33, 34; Luka 22:24) ʼI tanatou fialahi pea mo tanatou fia maʼuhiga fau, neʼe meihiʼi pe ke mole nātou tokagaʼi te fakatuʼutuʼu ʼa Sehova pea mo te gāue ʼaē neʼe tonu ke nātou fai ʼo ʼuhiga mo tona finegalo.
Te ʼu Fua Kovi ʼo Tatatou Tokaga Fau Kia Tatou
Kapau ʼe kita fialahi, pea ʼe feala ke fua kovi ai ki takita ʼu felogoi mo ʼihi. Ohage la, ʼe lagi tou heheka ʼi he faʼahi pea mo tou fakatokagaʼi he toko lua ʼe nā fai fanafana pea nā kakata. Kapau ʼe tou tokagaʼi fau totatou ʼuhiga, pea ʼe lagi tou manatu hala anai ʼe nā vāʼi tatou heʼe nā fai fanafana. ʼO tou mahalohalo kovi anai ki tanā fanafana, pea mo tanā kakata. ʼO lagi tou ʼita ai pea mole tou toe fia palalau age kia nāua. Koia, kapau ʼe tou tokagaʼi fau totatou ʼuhiga, pea ʼe feala ke tou mahino hala ai pea mo fua kovi ai ki tatatou ʼu felogoi mo totatou ʼu kaumeʼa, mo te famili, pea mo ʼihi age.
Ko nātou ʼaē ʼe nātou tokagaʼi fau tonatou ʼuhiga, ʼe nātou liliu ko he ʼu hahaʼi laupisi, heʼe nātou vikiʼi tuʼumaʼu tonatou poto, tanatou ʼu gāue, pe ko tonatou ʼu koloā. Pea ka tou fai palalau mo nātou, pea ʼe ko nātou pe ʼaē ʼe palalau, ʼo nātou vikiʼi tuʼumaʼu pe nātou. ʼO hā ʼaki mai ai tanatou mole ʼofa moʼoni pea ʼe fakatupu ʼita. Pea ʼi te agamāhani, ko te hahaʼi fialahi ʼe nātou fia muʼamuʼa tuʼumaʼu.—1 Kolonito 13:4.
ʼI totatou ʼuhiga kau Fakamoʼoni ʼa Sehova, ʼe feala ke fakalainoaʼi tatou e te hahaʼi pea mo nātou fakafisi ki tatatou minisitelio. ʼE tonu ke tou manatuʼi ko te fakafeagai ʼaia ʼe mole fai kia tatou, kae kia Sehova, te Matapuna ʼo te logo ʼaē ʼe tou tala. Kae kapau ʼe tou fia maʼuhiga fau, pea ʼe feala ke ʼi ai hona ʼu fua kovi. ʼI he ʼu taʼu ki muʼa atu, neʼe leakoviʼi te tēhina e te tagata ʼi tana fai faka mafola, pea neʼe toe leakovi mo ia ki te tagata. (Efeso 4:29) ʼI te hoko ʼo te meʼa ʼaia, neʼe mole toe kau ai te tēhina ki te fai faka mafola ʼi te ʼu ʼapi. Ei, kapau ʼe tou fialahi pea ʼe feala ke puli ai totatou loto lolomi mokā fai mai he meʼa ʼe kovi kia tatou ʼi te fai faka mafola. Tou faiga ke mole hoko he meʼa feiā. Kae ʼaki he agavaivai tou kole kia Sehova ke tokoni mai kia tatou, ke tou manatuʼi ʼe ko he meʼa maʼuhiga te pilivilesio ʼo te minisitelio faka Kilisitiano.—2 Kolonito 4:1, 7; 10:4, 5.
Tahi ʼaē meʼa, kapau ʼe tou faka maʼuhigaʼi fau tatou, pea ʼe lagi tou fakafisi anai ki te ʼu tokoni ʼaē ʼe ʼaoga kia tatou. Kua hili kiai ni ʼu taʼu, ʼi te kolo ʼo Amelika Centrale, neʼe fai e te tūpulaga tana akonaki ʼi te Ako ʼo te Minisitelio Faka Teokalatike ʼi te kokelekasio. Neʼe mole fakameʼameʼa te tēhina taupau ʼo te ako ʼi tana fai tokoni age ki ai, pea neʼe ʼita ai te tūpulaga, ʼo ina peʼehi ki lalo tana Tohi-Tapu pea mavae ʼi te Fale ʼo te Puleʼaga, ʼo ina fakatotonu ʼe mole toe liliu mai anai. Kae hili kiai ni ʼu ʼaho, neʼe ina lolomi tona fialahi, pea neʼe fakatokatoka mo te tēhina taupau ʼo te ako, pea neʼe ina tali ʼaki he agavaivai tana ʼu tokoni. ʼAki te temi, neʼe tuputupu te tūpulaga ʼaia ʼo liliu ko he Kilisitiano fakapotopoto.
Kapau ʼe mole tou agavaivai kae tou tokagaʼi fau totatou ʼuhiga, pea ʼe fua kovi anai ki tatatou ʼu felogoi mo te ʼAtua. ʼE fakatokaga fēnei mai ia Tāʼaga Lea 16:5: “Ko ʼaē ʼe loto fialahi ʼe ko he meʼa fakalialia ia kia Sehova.”
Ke Kita Manatu Fakapotopoto ʼo ʼUhiga Mo Kita
ʼE hā ʼaki mai, ʼe mole tonu ke tou tokagaʼi fau totatou ʼuhiga. ʼE mole tou fia ʼui ʼe mole tonu ke tou tokakaga fakalelei ki te ʼu meʼa ʼaē ʼe tou fai pea mo tatatou ʼu palalau. ʼE fakahā mai e te Tohi-Tapu, ko te ʼu tagata taupau, mo te kau tagata faifekau faka minisitelio —ʼo feiā mo nātou fuli ʼo te kokelekasio— ʼe tonu ke nātou tokakaga fakalelei ki tanatou ʼu gāue. (1 Timoteo 3:4, 8, 11; Tito 2:2) ʼE lava feafeaʼi ki he Kilisitiano ke ina maʼu he manatu ʼe fakapotopoto, mo agavaivai, pea mo lelei?
ʼE foaki mai e te Tohi-Tapu he ʼu faʼifaʼitaki fakaloto mālohi ʼo te ʼu hahaʼi neʼe mole nātou tokagaʼi fau tonatou ʼuhiga. Ko Sesu Kilisito te faʼifaʼitaki lahi ʼo te agavaivai. Moʼo fakahoko te finegalo ʼo tana Tāmai pea mo foaki te maʼuli ki te malamanei, neʼe lotolelei e te ʼAlo ʼo te ʼAtua ke mavae ʼi tona tuʼulaga faka kolōlia ʼaē ʼi selo kae liliu ko he tagata ʼi te kele. Logope la tona leakoviʼi, mo tona gaohi koviʼi, pea mo te mate fakalainoa ʼaē neʼe hoko kia te ia, kae neʼe loto lolomi pea neʼe ina taupau tona ʼalikisia. (Mateo 20:28; Filipe 2:5-8; 1 Petelo 2:23, 24) Koteā ʼaē neʼe tokoni kia Sesu ke ina fai te faʼahi ʼaia? Neʼe falala katoa kia Sehova pea neʼe lotomālohi ke ina fakahoko te finegalo ʼo te ʼAtua. Neʼe ako fakalelei e Sesu te Folafola ʼa te ʼAtua, mo faikole fakamalotoloto, pea mo faiva ʼi te fai faka mafola. (Mateo 4:1-10; 26:36-44; Luka 8:1; Soane 4:34; 8:28; Hepeleo 5:7) Kapau ʼe tou mulimuli ki te faʼifaʼitaki ʼa Sesu pea ʼe tokoni mai anai ke tou maʼu pea mo taupau he manatu fakapotopoto ʼo ʼuhiga mo kita.—1 Petelo 2:21.
Tou toe vakaʼi mo te faʼifaʼitaki lelei ʼo Sonatane, te foha ʼo te Hau ko Saulo. Neʼe talagataʼa tana tāmai, pea neʼe mole feala ai kia Sonatane ke hoa kia Saulo, ʼi te tuʼulaga hau. (1 Samuele 15:10-29) Neʼe ʼita koa Sonatane ki te faʼahi ʼaia? Neʼe maheka koa kia Tavite, te tūpulaga ʼaē ka ina toʼo tona tuʼulaga hau? Logope la neʼe matuʼa age ia Sonatane ia Tavite pea mo māhani age ʼi te ʼu meʼa ʼo te maʼuli, kae neʼe agavaivai ʼo mulimuli ki te fakatuʼutuʼu ʼa Sehova pea mo nofo agatonu ʼo lagolago kia Tavite. (1 Samuele 23:16-18) Ko tatatou mahino lelei ki te finegalo ʼo te ʼAtua pea mo tatatou fia fakalogo ki ai, ʼe tokoni mai anai ke ‘ ʼaua naʼa lahi fau te fakafuafua ʼo tatou ʼo fakalaka ʼi te fua māhani.’—Loma 12:3.
Neʼe akoʼi mai e Sesu te maʼuhiga ʼaē ke tou fia mālalo pea mo fia agavaivai. Neʼe ina fai te lea fakatātā ʼo ʼuhiga mo te faʼahi ʼaia, ʼo ina ʼui ka fakaafe tana ʼu tisipulo ki he fai ʼohoana, pea ʼe mole tonu ke nātou heheka ʼi “te uluaki hekaʼaga,” heʼe feala ke haʼu he tahi ʼe maʼuhiga age ia nātou pea nātou lainoa mokā fakatotonu age ke nātou ʼolo ʼo heheka i te hekaʼaga muli. Neʼe fakahā lelei mai e Sesu pe koteā te manatu ʼaē ʼe tonu ke tou tāʼofi, he neʼe ina ʼui fēnei: “Koteuhi ko he tahipe e ina hikihiki ake iaʼia, e fakavaivai ifo anai ia. Pea ko ae e fakavaivaiʼifo, e hikihiki anai ia.” (Luka 14:7-11) ʼE lelei hatatou manatuʼi te tokoni ʼaē neʼe fai e Sesu, pea ke tou ‘teu te agavaivai.’—Kolose 3:12; 1 Kolonito 1:31.
Te ʼu Tapuakina Mokā Tou Agavaivai
ʼE feala ke fiafia moʼoni te ʼu kaugana ʼa Sehova ʼi tanatou minisitelio mokā nātou fia mālalo pea mo agavaivai. ʼE kita fia palalau mo te ʼu tagata ʼāfea mo kapau ʼe nātou ‘gaohi fakaleleiʼi te faga ōvi’ ʼaki he agavaivai. (Gaue 20:28, 29) Kapau ʼe nātou fai te faʼahi ʼaia, pea ʼe faigafua anai kia nātou fuli ʼo te kokelekasio ke nātou palalau mo nātou pea mo kumi tokoni kia nātou. ʼE feala ai anai ke felogoi lelei te kokelekasio ʼi te ʼofa, mo te loto māfana, pea mo te loto falala.
ʼE feala ke tou maʼu he ʼu kaumeʼa moʼoni mo kapau ʼe mole tou tokagaʼi fau totatou ʼuhiga. Kapau ʼe tou agavaivai, pea ʼe mole tou kumi anai ke tou lahi age ʼi ʼihi, pea mo faiga ke tou fakahāhā ki te hahaʼi te ʼu meʼa ʼaē ʼe tou fai peʼe ko tatatou ʼu koloā. Ko te kalitate fakaʼatua ʼaia ʼe tokoni mai anai ke tou tokagaʼi te hahaʼi, pea ʼe faigafua ai anai hatatou fakaloto fīmālie pea mo tokoni kia nātou ʼaē ʼe ʼaoga kiai. (Filipe 2:3, 4) Ka sio te hahaʼi ʼe tou ʼofa kia nātou pea mo tou manavaʼofa, pea ʼi te agamāhani ʼe nātou agalelei mai kia tatou. Pea ko tatatou tokagaʼi te hahaʼi, ʼe liliu ko he tafitoʼaga ʼo he ʼu felogoi fakakaumeʼa mālohi. ʼE ko he tapuakina lahi tatatou mole tokaga fau ki totatou ʼuhiga!—Loma 12:10.
Tahi ʼaē meʼa, kapau ʼe tou agavaivai pea ʼe faigafua hatatou tali tatatou hala mo kapau neʼe tou fakamamahiʼi he tahi. (Mateo 5:23, 24) ʼE tou felogoi lelei ai, heʼe tou lava fakatokatoka pea mo tou fefakaʼapaʼapaʼaki. Kapau ʼe agavaivai pea mo fia mālalo te ʼu tēhina ohage ko te kau tagata ʼāfea, pea ʼe feala anai ke nātou fai he ʼu meʼa lelei maʼa te hahaʼi. (Tāʼaga Lea 3:27; Mateo 11:29) Ko he tahi ʼe agavaivai ʼe faigafua anai hana fakamolemole age kia nātou ʼaē neʼe agahala kia ia. (Mateo 6:12-15) ʼE mole ina lamalama anai te ʼu kiʼi hala fuli pe, pea ʼe falala anai ko Sehova ʼe ina fakatonutonuʼi anai te ʼu faʼahi ʼaē ʼe faigataʼa tona fakatonutonuʼi.—Pesalemo 37:5; Tāʼaga Lea 3:5, 6.
Ko te tapuakina lahi ʼaē ʼe tou maʼu mokā tou fia mālalo pea mo agavaivai, ʼe ko te ʼofa ʼo Sehova kia tatou. “ ʼE fakafehagai te Atua kia natou fialahi, kae e ina foaki tona [“ ʼofa makehe,” MN] kia natou agavaivai.” (1 Petelo 5:5) ʼAua naʼa tou manatu ʼi he ʼaho ʼe tou lelei age ʼi ʼihi. Kae tou tali ʼaki he agavaivai totatou tuʼulaga ʼi te ʼu meʼa ʼaē ʼe fakatuʼutuʼu e Sehova. ʼE maʼu anai he ʼu tapuakina lahi e te hahaʼi fuli ʼaē ka nātou mulimuli ki te fakamaʼua mai e te ʼAtua ‘ke tou haʼele mo ia ʼi te agavaivai.’
[Paki ʼo te pasina 22]
Neʼe agavaivai Sonatane ʼo lagolago kia Tavite