Ko Tatou Ko Te Hahaʼi Tui
ʼE Fakahā Te Logo Fakaloto Fīmālie ʼi Italia
KO SEHOVA ʼe ko “te Atua o te u fakafimalie.” ʼI tanatou ako ʼaē ke nātou mulimuli ki tana faʼifaʼitaki, ʼe feala ai ki tana ʼu kaugana ke “mafai te fakafimalie o natou e mamahi.” (2 Kolonito 1:3, 4; Efeso 5:1) ʼE ko te fakatuʼutuʼu tāfito ʼaia ʼo te gāue fai faka mafola ʼaē ʼe fakahoko e te kau Fakamoʼoni ʼa Sehova.
ʼE Tokoni Ki He Fafine Neʼe Nofo ʼi Te Faigataʼaʼia
ʼI te ʼu taʼu ʼaenī, ʼuhi ko te masiva, mo te tau, pea mo te fia maʼuli fīmālie ʼa te hahaʼi, ko te tokolahi ʼaupito kua nātou feholaki ki te ʼu fenua ʼaē ʼe maʼu meʼa. Kae ʼe mole faigafua tanatou fakamāmāhani mo te ʼu meʼa foʼou ʼaia. Ko Manjola neʼe maʼuli mo te kau Alepania ʼi Borgomanero. Neʼe nofo fakafūfū ʼi Italia, koia neʼe mataku ai ʼi te palalau mo Wanda, ko te Fakamoʼoni ʼa Sehova. Kae neʼe fakatuʼutuʼu e Wanda pea mo Manjola he ʼaho ke nā fai palalau ai, pea neʼe ina fakahā tana fia ako moʼoni te Folafola ʼa te ʼAtua, logope la tana mole faʼa mahino ki te lea. Kae hili tana ʼu ʼaʼahi ki ai, ʼi te tahi ʼaho neʼe mole kei maʼu e Wanda he tahi ʼi te ʼapi. Koteā ʼaē neʼe hoko? Neʼe fakahā age kia Wanda neʼe nātou feholaki fuli he neʼe kumi e te kau polisi te tahi ia nātou—te tama ʼaē ʼe fakatahi mo Manjola—he neʼe fai fakapō.
Hili kiai māhina e fā, pea toe felāveʼi ia Wanda pea mo Manjola. ʼE manatuʼi fēnei e Wanda: “Neʼe mata mahaki pea mo sino kovi, neʼe tau moʼoni mo ni ʼu faigataʼaʼia.” Neʼe fakamahino e Manjola, neʼe pilisoniʼi te tama ʼaē neʼe nā fakatahi, pea neʼe lotomamahi ʼaupito he neʼe mole tokoni ki ai tona ʼu kaumeʼa. Neʼe mole kei ina ʼiloʼi pe koteā te meʼa ʼaē ke ina fai, pea neʼe faikole ki te ʼAtua ke tokoni age kia ia. Pea neʼe ina manatuʼi ia Wanda, ʼaē neʼe palalau age ʼo ʼuhiga mo te Tohi-Tapu. Neʼe fiafia ʼaupito ia Manjola ʼi tana toe sio ki ai!
Neʼe toe kamata ai tana ako Tohi-Tapu, pea neʼe kamata ʼalu ia Manjola ki te ʼu fono. Ki muli age neʼe ʼavage kia ia e te puleʼaga te pepa ʼaē ʼe ina fakagafua ke nofo ʼi Italia. Hili te taʼu katoa, pea papitema ia Manjola. ʼI tana maʼu te fakaloto fīmālie mai te ʼu fakapapau ʼo te ʼAtua, neʼe toe liliu ki Alepania ʼo vaevae te logo fakaloto fīmālie ʼo te Tohi-Tapu ki te hahaʼi ʼo tona fenua.
ʼE Faka Mafola Ki Te ʼu Hahaʼi ʼi Te Nofoʼaga
ʼE lahi te ʼu kokelekasio ʼi Italia neʼe nātou fakatuʼutuʼu ke nātou faka mafola ki te hahaʼi ʼaē neʼe feholaki mai te tahi ʼu fenua ohage ko Manjola. Ohage la, ko te kokelekasio ʼi Florence neʼe nātou fakatuʼutuʼu ke nātou ʼolo ʼo faka mafola ʼi te nofoʼaga ʼo te hahaʼi ʼaē neʼe feholaki mai te tahi ʼu fenua. Ko te hahaʼi ʼo te nofoʼaga ʼaia neʼe nātou tau mo te ʼu faigataʼaʼia kehekehe, pea ko te tokolahi neʼe ʼōmai mai Eulopa Esite, mo Masetonia, pea mo Kosovo. Ko ʼihi neʼe ko te ʼu hahaʼi toloke pea mo ʼinu kava. Ko te tokolahi neʼe nātou kaihaʼa ke maʼu hanatou meʼa moʼo taupau maʼuli.
Neʼe ko he meʼa faigataʼa te faka mafola ia te logo fakaloto fīmālie ʼo te Tohi-Tapu ki te hahaʼi ʼaia. Kae ko Paola ʼaē ʼe pionie katoa, neʼe fai palalau mo te fafine Masetonia ko Jaklina. Hili tanā ʼu fai palalau, neʼe fakaloto mālohiʼi e Jaklina ia Susanna, tona kaumeʼa, ke ina ako te Tohi-Tapu. Pea neʼe palalau ia Susanna mo tona tahi ʼu kāiga. Mole fualoa, pea ko te toko nima ʼo te famili neʼe nātou ako te Tohi-Tapu, mo ʼolo ki te ʼu fono, pea mo nātou maʼuliʼi te ʼu meʼa ʼaē neʼe nātou ako. Logope la tonatou ʼu fihifihia, kae neʼe nātou maʼu te fakaloto fīmālie mai ia Sehova pea mo tana Folafola.
ʼE Tali e Te Taupoʼou Te Fakaloto Fīmālie Mai Ia Sehova
ʼI te kolo ʼo Formia, ko te tuagaʼane pionie katoa ko Assunta, neʼe palalau ki te fafine neʼe haʼele kinakina. Ko te fafine ʼaia neʼe ko te taupoʼou neʼe kau ki te kautahi lotu ʼaē ʼe tokoni ki te kau mahaki, pea mo te kau māʼimoa ʼaē ʼe nonofo ʼi te ʼu lopitali pea mo tonatou ʼu ʼapi.
Neʼe ʼui fēnei e Assunta ki te taupoʼou: “ ʼE ke mahaki mo koe? ʼE ko he meʼa fakaʼofaʼofa, heʼe tou tau fuli mo ni ʼu fihifihia.” Neʼe tagi te taupoʼou ʼi tana logo ki te ʼu palalau ʼaia pea ina fakamahino age ʼe mahaki kovi. Neʼe fakaloto mālohiʼi ia ia e Assunta, ʼo ina ʼui age ko te ʼAtua ʼo te Tohi-Tapu ʼe feala ke ina fakaloto fīmālie ia ia. Neʼe tali e te taupoʼou te ʼu tohi faka Tohi-Tapu ʼaē neʼe foaki age e Assunta.
ʼI tanā fai palalau ki muli age, ko te taupoʼou ʼaē ʼe higoa ko Palmira, neʼe ina fakahā age te meʼa ʼaē neʼe lotomamahi tāfito ai. Neʼe nofo fualoa ʼi te kautahi ʼe takitaki e te kau taupoʼou. Pea neʼe tonu leva ke mavae faka temi ʼuhi ko tana mahaki, kae neʼe mole tali ke toe liliu age kiai. Kae kia Palmira, neʼe mole feala ke ina līaki te ʼAtua ʼuhi ko tana ʼu fakapapau faka taupoʼou. Neʼe ʼalu Palmira ki te ʼu hahaʼi fai faitoʼo ke ʼavage hona “faitoʼo,” kae neʼe lotomamahi ʼi te ʼu faitoʼo ʼaē neʼe fai age ki ai. Neʼe tali e Palmira ke ina ako te Tohi-Tapu, pea neʼe ʼalu ki te ʼu fono ʼo taʼu katoa. Pea neʼe ʼalu leva ki te tahi koga meʼa, pea neʼe mole kei felāveʼi mo te kau Fakamoʼoni ʼa Sehova. Hili taʼu e lua, pea toe maʼu ia ia e Assunta. Neʼe fakafeagai lahi te famili ʼo Palmira pea mo te kau takitaki lotu kia ia. Kae neʼe ina toe fai tana ako Tohi-Tapu, pea tuputupu ʼi te faʼahi fakalaumālie, pea mo papitema ʼo liliu ko he Fakamoʼoni ʼa Sehova.
Ei, ko te tokolahi neʼe fakaloto mālohiʼi e ‘te logo ʼa te ʼAtua ʼaē ʼe ina foaki te fakafimālie.’ (Loma 15:4, 5) Koia, ʼe faiga mālohi te kau Fakamoʼoni ʼa Sehova ʼo Italia ke nātou haga mulimuli ki te faʼifaʼitaki ʼo te ʼAtua, ʼo nātou fakahā ki te hahaʼi tana logo taulekaleka pea mo fakaloto fīmālie.