Ko Te Maʼuli ʼo Te Kau Faka Mafola ʼo Te Puleʼaga

Ko Te Moʼoni ʼo Te Tohi-Tapu ʼe Ina Faka ʼĀteaina Te Taupoʼou ʼi Polivia

TOKOLAHI te hahaʼi fakamalotoloto neʼe nātou feholaki ʼi te lotu hāla, ʼi tanatou ʼiloʼi te moʼoni ʼo te Tohi-Tapu, pea mo nātou liliu ʼo tauhi kia Sehova, ko te ʼAtua moʼoni. Ko te meʼa ʼaia neʼe hoko ʼi Polivia ki te toko 7 600 tupu hahaʼi ʼo kau ai mo te taupoʼou.

ʼI tona taʼu 9, ko M... neʼe hoki felāveʼi ai mo te tahi ʼe ko te Fakamoʼoni ʼa Sehova. ʼI te tukituki ʼa te kau Fakamoʼoni ʼa Sehova ki tona matapā, neʼe ko ia ʼaē neʼe ina tali nātou, pea ko tana hoki logoe ki te huafa ʼo te ʼAtua. Ko te huafa ʼaia neʼe maʼu ʼi tona ʼatamai ia taʼu ʼe fualoa.

ʼUhi ko ia tokotahi ko te tamasiʼi fafine ʼo te famili, neʼe fakatuʼutuʼu, ʼe taupoʼou anai ia. “ ʼE ko he meʼa lelei neʼe ʼau logoʼi ʼi taku ʼiloʼi ʼaē ka ʼau gāue ki te ʼAtua — ko taku foki manatu ʼaia”, ko te ʼui ʼaia ʼa M... Kae ʼi tana sio leva ʼaē ki te maʼuli heʼefaitotonu mo fakapalatahi ʼaē ʼi te fale taupoʼou, ko tona fiafia neʼe puli ai ʼosi. ʼE ina ʼui fēnei: “ ʼE mahalo ia ʼe mole galo anai ia ʼau te ʼu meʼa fakaloto mamahi ʼaupito fakasino pea mo fakalaumālie, ʼaē neʼe ʼau manatu ai leva ko te ʼAtua ʼe mole ʼofa kae ʼe ko he ʼAtua ʼe mole loto manavaʼofa.”

ʼE ina toe ʼui fēnei: “ ʼO aʼu ki te temi ʼaē kua fakanofo taupoʼou ai ʼau, neʼe mole ʼau maʼu pe la te huafa ʼo te ʼAtua ʼi te Tohi-Tapu. Ko te higoa pe neʼe ʼau maʼu ko ‘Yahweh’, pea neʼe ko he meʼa neʼe fakatupu lotomamahi kia ʼau. ʼI te tahi ʼaho neʼe ʼau ʼalu ʼosi ʼo kumi ia nātou ʼaē ʼe nātou palalau kia Sehova, kae neʼe mole ʼau maʼu pe la ia nātou ʼaia.”

“Hili ʼaia te ʼu taʼu, pea ko taku liliu mai ʼi te tahi ʼaho ki toku ʼapi, neʼe ʼau sio ki te fakaʼiloga, ‘Fale ʼo te Puleʼaga ʼa te kau Fakamoʼoni ʼa Sehova’. Neʼe ʼau fia ʼui age kia nātou ko te kau polofeta loi, kae neʼe mole ʼau maʼu he tahi ʼi te fale. Neʼe ʼau toe liliu ki ai ʼi te ʼahotapu. Kua kamata foki te fono, pea tokolahi neʼe nātou ʼofolele ʼi tanatou sio kia ʼau ʼi te fono ʼuhi he ko toku teu. ʼI te ʼosi ʼo te fono, neʼe ʼau fia ʼalu fakavilivili ki tuʼa. Kae, neʼe ʼi ai leva te fafine neʼe haʼu ʼo fakamālo mai kia ʼau, pea neʼe ʼau fehuʼi age, ‘koteā te tupuʼaga ʼaē ʼo takotou fasituʼu ai ki te Taputapu ʼo kotou toʼo tona huafa?’ Neʼe iku te fehuʼi ki te felogoi faka tohi-tapu, pea neʼe ʼau fai te ʼu fakatuʼutuʼu ke haʼu ia ia ke ma felogoi ʼi toku ʼapi. Neʼe kapu ia e taku ʼu matuʼa. Kae, neʼe ma toe felāveʼi ia māhina e lua ki muli age, pea neʼe ina fakaafe ʼau ke ma ʼolo ki tona ʼapi ʼo ako ai te Tohi-Tapu. Neʼe ʼau ōfo ʼaupito ʼi tana ʼu fakamatala, pea mo tana ʼui mai ʼaē ʼe tonu ke fakaʼaoga e te kau kilisitiano te huafa ʼo te ʼAtua. Ko te ako ʼaia neʼe ina foaki mai te lotomālohi ʼaē ke ʼau tuku fuli ai te ʼu meʼa kovi ʼaē neʼe akoʼi mai ʼi taku ako taupoʼou.

“ ʼE lahi te ʼu meʼa ʼe ʼau manatuʼi ʼo ʼuhiga mo toku maʼuli ʼaē ʼi te fale taupoʼou. Ohage la, ʼi te tahi ʼaho neʼe ʼau fia fai ki haku meʼa kai ke lahi. Pea neʼe ʼau faitohi pea mo kole ki taku ʼu mātuʼa ke nā momoli mai haku meʼa kai, kae neʼe mole ʼau ʼiloʼi ʼau ko te ʼu tohi ʼe lau ʼi te fale taupoʼou. Hoko leva ki te temi kai, neʼe lahi ʼaupito te pane ʼaē neʼe tuku mai kia ʼau pea mo te ʼu meʼa neʼe fakalāilāiʼi, pea mo nātou fakakinauʼi ʼau ke ʼau kai fuli. Kua lahi fau leva taku meʼa kai. Neʼe ʼau fakahā foki ki taku ʼu kaumeʼa te kua lahi ʼaupito ʼo te ʼu meʼa kai, pea neʼe ʼui mai e te tahi taupoʼou ke ʼau fakaeveeveʼi te moʼi pane ʼaē ʼe mole kei ʼau makai pea ke ʼau liaki ki lalo. ʼI taku ʼosi fai ʼo te meʼa ʼaia, neʼe haʼu aipe te taupoʼou ʼo lī ʼau ki te kele, ʼo ina fakatotonu mai ke ʼau ʼepo te ʼu eveʼi pane ʼaē ʼi te kele ʼo aʼu ki tona ʼosi. Neʼe laulahi ʼaupito foki te faʼahi ʼaē neʼe mātou nonofo ai. ʼI taku lolotoga fai te fakatotonu, neʼe ʼau logo ki te ʼu kakata pea mo te ʼu manukinuki — neʼe mole nātou fakahā pe he loto manavaʼofa ʼi te temi ʼaia.

“Kua feala ʼi te temi nei ke ʼau ʼiloʼi ʼe ko he meʼa taulekaleka he ʼāteaina mai te ʼu meʼa fuli ʼaia. ʼE tou ʼiloʼi ko he ʼāteaina feiā ʼe pipiki ki te ʼu sakilifisio. ʼUluaki, ko taku tāmai neʼe ina kapu ʼau. Kae, ia muʼa ʼo taku mavae ʼi te fale taupoʼou, neʼe ʼau maʼu te pilivilesio ʼaē ko te tokoniʼi ʼihi ʼu taupoʼou kei finemui ke nātou ʼiloʼi te moʼoni. ʼE ʼau fiafia heʼe ia nātou ʼaia kua liliu ʼihi ʼo foaki tonatou maʼuli kia Sehova ʼAtua!

“ ʼI taku mavae mai te fale taupoʼou, neʼe mole mahino taku tāmai ki te tupuʼaga ʼaē ʼo taku mole fia maʼu he toe totogi feiā aipe mo te temi ʼaē ʼe fakaʼaoga ki ai. Kae, neʼe ʼau fia fakaʼaoga tāfito toku temi ki te gāue ʼa te ʼAtua. ʼI te temi nei ʼe ʼau pionie katoa, ʼe mole lahi taku falā kae ko toku maʼuli neʼe fakapale ʼaupito ia. Pea ʼe ʼau fiafia lahi heʼe ko taku faʼe mo toku ʼu tokolua kua nātou fakatahi mo ʼau ʼo tauhi kia Sehova.”

ʼIo, ko te moʼoni ʼo te Tohi-Tapu ʼe ina hāofaki mai te ʼu faʼahiga meʼa ʼo te lotu hāla ʼaenī, pea ʼe ina foaki te fiafia pea mo te fīmālie heʼegata. — Soane 8:32.