Koutou Mamata Ki Te Meʼa ʼAē Neʼe Fai e Sehova Maʼa Tatou!
“NEʼE mātou tau faikole ki he meʼa feiā”, ko te ʼui ʼaia ʼa te tagata. Ko te tahi leva tagata neʼe ʼala ʼi te uhu fuli ʼi te hola fā ʼo faikole. Koteā tona tupuʼaga? “Neʼe ʼau faikole ʼi te uhu fuli koteʼuhi ke hoko mai he ʼaho ʼe mātou ʼāteaina ai ke mātou tauhi faʼifaʼitaliha kia Sehova.” ʼI sanualio ʼo te taʼu 1992, ʼi te felāveʼi ʼaē ʼa te kau Fakamoʼoni ʼa Sehova ʼo Etiopea ki te kolo ʼo Addis-Abeba ʼo ʼuhiga mo tanatou fakatahi faka tisitilike ʼaē ko te “Kau kaumeʼa moʼoni ʼa te ʼāteaina”, neʼe mahino ia ko te faʼahiga faikole ʼaē neʼe fai ʼaki he agavaivai pea mo fai fakamalotoloto, ʼe tali ia.
Ko te fakatahi ʼaia neʼe hoko ʼi Etiopea neʼe ko he fakaʼiloga ia ʼo te ʼu fetogi ʼe lolotoga fai nei ʼi Afelika. ʼI te ʼu taʼu ʼaenī kua hili ʼatu, neʼe fakafiafia te hahaʼi ʼa Sehova ʼi te tuku age te ʼāteaina faka puleʼaga ki tanatou gāue ʼi te ʼu fenua e 13 ʼaē neʼe tapuʼi ai. ʼI Etiopea, ʼi te ʼaho 11 ʼo te taʼu 1991 neʼe laga te tapuʼi ʼo tanatou gaūe talu mai taʼu e 34. Neʼe hoko ai leva te fakagafua faka puleʼaga ʼo tanatou gāue. Ko te kau Fakamoʼoni ʼa Sehova neʼe nātou foimo fai te fakatuʼutuʼu ke hoko he fakatahi faka malamanei. Kae, ko te mamata ʼaē ki te toko 7 573 hahaʼi ʼaē neʼe fakatahi ki te malaʼe faigaoi ʼo te kolo ʼo Addis-Abeba neʼe fakalaka ia ʼi te manatu ʼa te tokolahi. Ki te tokolahi ia nātou neʼe kau ki te fakatahi ʼaia, neʼe hage ia ko he misi. Neʼe nātou felauʼaki pe ʼo ʼui maʼa nātou: “Tēhina, koutou sio ki te meʼa ʼaē neʼe fai e Sehova maʼa tatou!” — Vakaʼi ia Pesalemo 66:1-5; 126:1.
Ko tanatou nofo ʼaia ʼi te tapuʼi lolotoga taʼu e 34 neʼe tupu ai te ʼu fihifihia neʼe ʼamanaki ki ai. Tokolahi neʼe mole nātou ʼiloʼi te ʼu hiva taulekaleka ʼo te ʼu katiko ʼo te Puleʼaga. ʼE feafeaʼi anai hanatou akoʼi te ʼu katiko ʼaia ʼi muʼa ʼo te fakatahi? Ko te ʼu katiko ʼe fagofulu, ʼo fakapipiki kiai mo te ʼu katiko e 17 ʼe fakaʼaogaʼi anai ʼi te fakatahi, neʼe fakaliliu ki te lea amharique. Neʼe fakatuʼutuʼu te kau hiva ke puke te ʼu katiko ʼaia ʼi te fime puke leʼo. Ko te ʼu kokelekasio fuli ʼo te kolo muʼa neʼe nātou maʼu te ʼu foʼi fime feiā, pea ko te ʼu kokelekasio fuli ʼe nātou toʼo minuta e 30 ʼi muʼa ʼo te kamata ʼo te fono pea mokā ʼosi te fono moʼo akoako ʼo te ʼu katiko ʼaia. Koteā tona fua? Ko te fakatahi ʼaē neʼe fai ki te malaʼe faigaoi ʼaia neʼe fai ʼaki te ʼu hiva neʼe toʼo fakafiafia pea ʼaki te loto katoa.
ʼUhi ko te ʼu maveuveu ʼi te potu hahake ʼo te fenua, ko te ala ʼaē ʼe ʼalu mai Diredawa ki te kolo muʼa neʼe motuhi feiā ai mo te ala ʼo Harar. Ko te fealagia pe e tahi ʼaē ki te faka aʼu ki te kolo muʼa neʼe ko te folau vakalele. Koteʼuhi neʼe mole hanatou falā ke nātou totogi tanatou folau, kae ʼaki pe tanatou loto faiga ʼaē ke nātou kau ki te fakatahi ʼaia, ko te ʼu tēhina e valu ʼi Harar neʼe nātou ʼolo ki te nofoʼaga solia pea nātou faka ʼui he fealagia ke nātou heheka ʼi te vakalele solia. Ko he meʼa fakaofoofo, ko tanatou kole neʼe tali, ʼo nātou folau noa ai ki te fatahi!
ʼI te tali ʼaē ʼo tanatou ʼu faikole, neʼe maligi te ʼu loʼimata ʼa te ʼu tēhina ʼo Etiopea ʼi tanatou loto fiafia, ia nātou ʼaē ʼi muʼa atu ia taʼu e 30 neʼe nātou katakiʼi aipe te ʼu mamahi pea mo te ʼu fakataga feiā aipe ki te matematehi ʼo tonatou ʼu kaumeʼa ʼuhi pe ko tanatou tui. Neʼe ʼui fēnei e te tēhina neʼe kau ʼi te fakatahi: “Neʼe kamata pe taku tagi ʼi te kamataʼaga ʼo te fakatahi.” Neʼe fēnei te ʼui ʼa te tahi: “Ka na pau la neʼe ia koutou te fealagia ʼaē ko te sio ʼi te ʼu loto, neʼe feala ai hakotou sio ki taku fiafia.” Ei, neʼe ko he meʼa fakatalakitupua ʼaē neʼe fai e Sehova ki te kau Fakamoʼoni ʼaia neʼe agatonu! — Pesalemo 66:16, 19.
Ko he ʼāteaina lahi ʼaupito ʼi te potu hihifo pea mo te potu loto ʼo Afelika
Ko Bénin ko te tahi fenua ʼaia neʼe hoki fakagafua te gāue ʼa te hahaʼi ʼa Sehova. Koteā te manatu ʼa te kau Fakamoʼoni ʼo ʼuhiga mo te fahaʼi ʼaia? Ko te tēhina neʼe ina fai te akonaki ʼi te fakatahi faka kilisitiano ʼi ai neʼe fēnei tana fakamoʼoni: “Ko te ʼāteaina ki te tauhi ʼi te fenua ʼaenī ʼe ko he meʼa ʼofa moʼoni ia mai ia Sehova.” ʼIo, ko te kau kaugana ʼa Sehova ʼe nātou loto fakafetaʼi ʼaupito ki tanatou ʼāteaina ki tanatou tauhi ʼo feala ai hanatou fakatahi faʼifaʼitaliha pea mo palalau ki te hahaʼi ʼe nātou feōvi ʼo ʼuhiga mo te Puleʼaga ʼa Sehova — ko he tokolahi ia tatou ʼe tou fakafiafia ki te ʼu ʼāteaina ʼaia.
ʼE feafeaʼi anai hanatou fakahā tanatou fiafia? Ko te tēhina fai akonaki neʼe kua tou palalau ki ai ʼi muʼa atu neʼe ina fakahā te fealagia e tahi ʼi tana ʼui ʼaenī: “Ko tatatou kau ʼaē ki te gāue faka mafola — tāfito te fagonogono ʼi te ʼu ʼapi — ko te fakahā ʼaia ʼo tatatou fiafia ʼi te ʼāteaina ʼaia.” ʼI Bénin ʼe lagi neʼe hoko pe te meʼa ʼaia. Tou fakatokagaʼi age muʼa te kūtuga pionie. Lolotoga te māhina ʼo sanualio ʼo te taʼu 1990, ko te māhina ʼaia neʼe lagaʼi ai te tapuʼi ko tana fualoa ko te taʼu e 14, ko te kau faka mafola e 77 neʼe nātou kau ki te gāue kātoa. Hili ʼaia taʼu e lua neʼe faka au te kūtuga ʼaia ʼe pionie katoa ki te 244!
ʼE mole faka ʼuhiga leva ko te kau Fakamoʼoni ʼi Bénin neʼe mole nātou gāue ʼi muʼa ʼo te lagaʼi ʼo te tapuʼi. ʼAki te faʼa kātaki ʼa te kau Fakamoʼoni ʼi ai, neʼe ʼi ai te fakaʼiloga ʼi te pule solia neʼe hinoʼi ki te koga meʼa ʼaē neʼe ʼave ki ai pea neʼe faka pilisoniʼi ai te kau Fakamoʼoni ʼa Sehova. ʼUhi ʼaē ko tanatou fia tauhi ʼaē kia Sehova neʼe tau iku ki te puke ʼo nātou, ko te pule ʼaia neʼe ina tau felāveʼi mo nātou. Ko te ʼu lakaga ʼaia neʼe tau fakamanatu age te ʼu talanoa taulekaleka faka tohi-tapu neʼe tau hoko mo nātou ʼi muʼa ʼo tanatou fakafiafia ki te ʼāteaina ʼaē neʼe tuku age e te Puleʼaga.
Koia, ko tanatou tui mālohi neʼe fakatupu ia ia te loto hālofia ʼi te fahaʼi fakalaumālie. Neʼe ina ʼaʼahi te ʼu ʼēkelesia kehekehe pea mo te ʼu kautahi kehekehe kae neʼe mole nātou fakafimālieʼi tona loto. ʼI te hoki lagaʼi ʼo te tapuʼi ʼaē ʼi te māhina ʼo sanualio ʼo te taʼu 1990, neʼe feala ai leva tana talanoa faʼifaʼitaliha ki te Tohi-Tapu mo te kau Fakamoʼoni ʼa Sehova pea neʼe ina maʼu ai te ʼu meʼa fakalaumālie ʼaē ʼe ʼaoga kia ia. ʼI te temi nei, kua papitema pea ʼe gāue pionie. Pea tahi foki ʼaē meʼa, ko tana fetogi ʼe fakamanatu ki te ʼu tēhina ʼo Bénin te meʼa ʼaē neʼe hoko kia Saulo ʼo Talise: “Ko ia ʼaē neʼe na fakatagaʼi tatou ʼi te lakaga ʼaē kua fagonogono nei ki te logo lelei ʼo ʼuhiga mo te tui.” — Kalate 1:23.
ʼI tesepeli ʼo te taʼu 1991, ʼi Nisele, ko te tahi koga fenua ʼo Afelika ʼo te potu hahake, neʼe ina lagaʼi te tapuʼi ʼaē neʼe fai ki te kau Fakamoʼoni ʼa Sehova pea mo ina tuku te fakagafua faka puleʼaga ki tanatou gāue. Ko he meʼa fakafiafia kia nātou ʼaē ʼo te fenua ʼaia. Koʼeni te fakamatala neʼe maʼu mai te filiale ʼo Niselia ʼaē ʼe tokaga ki te fenua ʼaia ko Nisele, ko he fakamatala ʼo ʼuhiga mo te fakatahi neʼe hoko ʼi te fenua ʼaia: “ ʼI te ʼosi tala ifo pe ʼo te ʼu kupu tāfito ʼo te fakatahi ʼaē neʼe hoko ʼi te feliaono, neʼe fakahā leva ki te ʼu tēhina ia te fakagafua faka puleʼaga neʼe kua tuku ifo ki Nisele. Neʼe nātou fiafia ʼaupito pea neʼe fualoa tanatou pasipasi. ʼI te hili ʼaia ʼo te fakatahi, ko te ʼu tēhina neʼe ʼiloga tanatou fiafia ʼi ʼonatou fofoga, pea neʼe nātou feʼalofaʼaki pea neʼe nātou fakafiafia ʼuhi ko te logo lelei ʼaia.” ʼE feala hatatou fakakaukauʼi ki te meʼa ʼaē neʼe hoko pea mo tou fakafiafia mo nātou.
ʼE feafeaʼi anai koa he fakaʼaogaʼi e te ʼu tēhina tanatou ʼāteaina ʼaia neʼe hoki nātou maʼue? Neʼe mole lotolotolua te tuagaʼane ʼe pionie ʼi Nisele ki te tali ki te fehuʼi ʼaia. Neʼe ina tohi fēnei: “ ʼE ʼiloga ʼi te ʼu meʼa ʼaē ʼe hoko ko nātou ʼaē ka mavae anai mai Papiloni Lahi ʼi muʼa ʼo te temi fakaʼosi ʼe nātou hahaʼi. Moʼo fakamoʼoni te fahaʼi ʼaia, neʼe feala haku fai ʼaku ʼu ʼaʼahi e 80 ki te 85 ʼi te māhina fuli pea ʼau taki te ʼu ako faka tohi-tapu e 13 peʼe 14, kae ʼuhi ko te fahaʼi ʼaia neʼe ʼau tuku ki ʼihi kau faka mafola ia nātou ʼaē neʼe ʼomai ʼo kole mai kia te ʼau.” Neʼe toe ʼui fēnei e te tuagaʼane agatonu ʼaia: “ ʼUhi ko toku mahamahaki, ʼe mole feala ke ʼau fai te meʼa ʼaē ʼe ʼau loto ki ai ʼi te gāue faka mafola, kae ʼe feala pe ki te hahaʼi fuli ke nātou fai te meʼa ʼaia.”
ʼI Rwanda ʼi Afelika ʼo te potu loto, ko te ʼaluʼaga ʼo te maʼuli ʼo te kau Fakamoʼoni ʼa Sehova neʼe toe fetogi mo ia. ʼI te māhina ʼo ʼapelili ʼo te taʼu 1992, neʼe fakahā ki te ʼu tēhina ʼaia kua tuku kia nātou te fakagafua faka puleʼaga. Ko te fakagafua ʼaia neʼe to tonu mo te vāhaʼa ʼo te ʼaho ʼo te Fakamanatu, pea ko te kau fai faka mafola e 1 526 ʼi Rwanda neʼe nātou puna’maʼuli ki te hahaʼi e 6 228 neʼe kau ki te fono ʼo te ʼaho ʼaia. ʼE fakahā anai koa e te ʼu tēhina ʼaia tanatou fiafia pea mo tanatou leleiʼia ʼo tanatou ʼāteaina ʼi hanatou hikihiki anai tanatou gāue fai faka mafola? Ko he meʼa ia ʼe hoko! ʼI te māhina pe ʼaia ʼo ʼapelili, takitahi te tagata fai faka mafola ʼo te ʼu kokelekasio neʼe gāue hola e 27,7 ʼi tana gāue faka mafola pea takitahi tana ʼaʼahi e 17 pea mo takitahi mo te ako faka tohi-tapu e 2,4. Pea ʼe fakafuafua pe ko te 40 ki te 100 ia nātou ʼaia neʼe nātou kau ki te gāue fai faka mafola katoa.
Fakagafua faka puleʼaga ʼa tanatou gāue ʼi te potu toga ʼo Afelika
ʼI Afelika ʼo te potu toga, ko te ʼāteaina foʼou neʼe hoko ki te ʼu fenua taulekaleka ʼaē ko te Mosapike pea mo te Agola. ʼI Mosapike ko te fakagafua faka puleʼaga neʼe hoko ʼi te māhina ʼo fepualio ʼo te taʼu 1991. ʼUhi ko te faʼahiga maʼuli ʼi ai ʼe faigafua, ko te Watch Tower and Tract Society neʼe ina fekauʼi te ʼu misionea ke ʼolo ki te fenua ʼaia, ʼaē neʼe maumauʼi ʼi te taʼu sivile. Neʼe ko he kele maʼuli lelei ʼaē neʼe maʼu e te kau misionea. Neʼe lahi te tufa ʼo te ʼu tohi faka tohi-tapu — tāfito te tohi ʼaē ko te Les jeunes sʼinterrogent: réponses pratiques. Ko te tuagaʼane misionea neʼe ina tufa te ʼu tohi e 50 lolotoga ʼaia hola e lua vaelua.
Ko te hahaʼi ʼaē ʼe nātou fia kumi te faʼahi ʼaia neʼe nātou tali fakavilivili. Ko te tēhina misionea neʼe ina ʼaʼahi te ʼapi neʼe tuku age e te Sosiete, pea neʼe ko te tagata solia ʼaē ʼe nofo ʼi te ʼapi ʼaia. Neʼe lelei te fai palalau ʼaē neʼe hoko mo te tagata ʼaia pea mo tona ʼu kaumeʼa e lua. ʼI te tahi ʼaʼahi, ko te tahi fai palalau neʼe fua lelei, neʼe hoko mo te tagata pe ʼaia mo te foʼi toko nima. Ko nātou ʼaia neʼe nātou tali te fakaafe ke nātou kau ki te fono ʼaē ʼo te akonaki pea mo te ako Te Tule Leʼo — pea ko te ʼu meʼa fuli ʼaia neʼe hoko ia ʼaho pe e fā.
ʼI Agola ko te kau Fakamoʼoni neʼe nātou fiafia ki te ʼāteaina ʼaia ʼe tuputupu ʼo aʼu ki te fakagafua ʼo tanatou gāue ʼi te māhina ʼo ʼapelili ʼo te taʼu 1992. Neʼe feafeaʼi tanatou fakaʼaogaʼi tanatou ʼāteaina lahi ʼaia? Neʼe nātou kau ki te gāue faka mafola! ʼE lagi ko te toko 17 000 kau faka mafola ʼi Agola, pea ko te kau faka mafola ʼaia ʼe teitei pe ke nātou taki te ʼu ako faka tohi-tapu e 60 000. Ko he fakaʼamu ia ki he tuputupu ʼo te ʼu ʼaho ka haʼu!
Ko te kau tūpulaga ʼe nātou kau ki te fai faka mafola
ʼI te ʼu fenua ʼaē neʼe hoki fakagafua ai te gāue fai faka mafola, ko te kau tūpulaga feiā mo nātou ʼaē mole heʼeki papitema ʼe nātou fakahā tanatou loto fakafetaʼi ʼi tanatou gāue ʼaia ʼi te minisitelio. ʼI te Lepupilika Cap-Vert, ʼaē neʼe hoki tuku te fakagafua faka puleʼaga ki te kau Fakamoʼoni ʼa Sehova ʼi te māhina ʼo novepeli ʼo te taʼu 1990, ko te taʼahine ʼe taʼu 17 neʼe ina fakahā ia muʼa ʼo te kaugamalie tana tui pea neʼe papitema ʼi te fakatahi. Hili ʼaia ʼo tana papitema, ko te tagata mamata neʼe sio ki te ʼu hahaʼi neʼe nātou takatakai ia ia. Neʼe haʼu ʼo ʼalofa age ki ai pea mo ina fehuʼi age pe ko ai te ʼu hahaʼi ʼaē neʼe nofo mo ia. Neʼe fēnei tana tali: “ ʼIo, ko taku ʼu kau ako faka tohi-tapu.” Neʼe ina fai tana ʼu ako faka tohi-tapu e fitu, pea neʼe nātou ʼomai ki ai ʼo nātou ʼalofa age ki ai ʼo ʼuhiga mo tana papitema. Neʼe kua ina faka ʼui ke gāue pionie vaeluaʼi temi pea ʼe fakatuʼutuʼu nei ke liliu ko he pionie katoa.
ʼI Agola, neʼe fehuʼi age ki te kiʼi taʼahine ʼe taʼu hogofulu pe ʼe faka mafola. Neʼe fēnei tana tali: “Ei.” ʼE ʼi ai ʼāpe hana ʼu ako faka tohi-tapu? “Ei foki.” Ko te toko fia? “Ko te toko fitu”, ko te tali ʼaia ʼa te kiʼi taʼahine ʼaē ʼe tau hogofulu.
ʼE tou lau ʼi te tohi ʼa Gāue te ʼaluʼaga ʼaē neʼe kua kaku ki ai te ʼuluaki sēkulō: “Ko te kokelekasio, ʼi Sutea katoa, ʼi Kalilea pea mo Samalia neʼe ina maʼu te temi fīmālie, pea neʼe mālohi; pea, neʼe nātou haʼele ʼaki te manavasiʼi kia Sehova pea mo te fakapelepele mai te laumālie maʼoniʼoni, ʼaē neʼe feala ai ke nātou tuputupu ai.” (Gāue 9:31). ʼE tou faikole ʼo ʼuhiga mo totatou ʼu tēhina ʼi Afelika, ke tau mo nātou he temi ʼo te fīmālie. ʼE tou fakafiafia mo nātou ki te temi ʼaē ʼe lolotoga laga ai nātou pea mo tou faikole ke tuku e te laumālie ʼo Sehova he fealagia kia nātou ke nātou fakaʼaoga te ʼu faigamalie ʼo tanatou ʼāteaina ʼi te faka mafola ʼo te logo lelei pea ke hoko atu tanatou tuputupu.
[Mape ʼo te pasina 24]
(Vakaʼi te nusipepa)
Ko te ʼu fenua ʼaē neʼe hoko ai te fakagafua ki te kau Fakamoʼoni ʼa Sehova pea neʼe lagaʼi ai te ʼu tapuʼi
1. Kamipia, ʼi tesepeli 1989
2. Bénin, ʼi sanualio 1990
3. Lepupilika Cap-Vert, ʼi novepeli 1990
4. Mosapike, ʼi fepualio 1991
5. Kana, ʼi novepeli 1991
6. Etiopea, ʼi novepeli 1991
7. Kogo, ʼi novepeli 1991
8. Nisele, ʼi tesepeli 1991
9. Toko, ʼi tesepeli 1991
10. Tchad, ʼi sanualio 1992
11. Kenia, ʼi malesio 1992
12. Agola, ʼi ʼapelili 1992
13. Rwanda, ʼi ʼapelili 1992
[Paki ʼo te pasina 23]
ʼI Bénin, ko te tagata fai faka mafola neʼe ina tala te ʼu palalau ʼaē ʼa Mateo 24:14 ʼo ina fakaʼaogaʼi te lali.
[Paki ʼo te pasina 25]
ʼI te ʼu fenua ʼo Afelika ʼe tokolahi, ko te kau kilisitiano moʼoni neʼe nātou fakaʼaogaʼi fakalelei tanatou ʼāteina foʼou.
[Paki ʼo te pasina 26]
Ko te kau Fakamoʼoni foʼou neʼe nātou fakahā tanatou voto kia Sehova ʼi te papitema ʼi te vai.