Ko Te Tagata Neʼe Akoʼi
“HEʼE koutou sisio ki tokotou pāuʼi, ʼu tēhina: ʼe mole lahi he kau popoto ʼi te kakano neʼe pāuʼi, peʼe ko he kau mālohi, peʼe ko he ʼu hahaʼi ʼaliki.” (1 Kolonito 1:26). Ohage ko tona fakahā ʼi te ʼu palalau ʼaia, ʼe ko he meʼa fakatupu tuʼutāmaki ʼaē ko te pipiki ki te poto faka malamanei peʼe ko he maʼu ʼo he tuʼulaga lelei. Ko te ʼu meʼa ʼaia ʼe feala pe ko he ʼu meʼa ʼe nātou tāʼofi he tahi ke ʼaua naʼa na tali te logo lelei. — Tāʼaga Lea 16:5; Maleko 10:25.
Logope la te meʼa ʼaia, ʼi te temi ʼo Paulo ko ʼihi kau popoto fakatagata neʼe nātou tali te moʼoni, pea ko Paulo totonu neʼe kau ia nātou ʼaia. ʼI te lelei ʼo tana ako pea mo tona haʼuʼaga ʼaē mai te famili ʼe tuʼulaga lelei, ko Paulo neʼe ko te tagata faka mafola evaselio mālohi. Neʼe ina fakahā ʼaki ai, ko ʼihi ʼe maʼu tuʼulaga ʼi te malamanei ʼe feala pe tanatou tauhi kia Sehova mo kapau ko tonatou loto ʼe totonu. ʼE feala ai hanatou fakaʼaoga tonatou ʼu faiva ki te gāue ʼa Sehova. — Luka 16:9.
Neʼe tupu ʼi Talesi
Ko Paulo neʼe tupu ʼi Talesi, ohage ko tana fakahā ki muli age “neʼe ko he kolo ʼiloa”. (Gāue 21:39.) ʼE mahalo pe ko te kolo ʼaia neʼe ina maʼu ai te poto ʼo te ʼu lea — tāfito te lea faka keleka — ʼaē neʼe maʼuhiga tāfito ki tana gāue faka misionea. ʼI tana maʼuli ʼaē ʼi Talesi neʼe mole gata ʼaki pe tana akoʼi ʼo te maʼuli faka sutea kae ʼo feiā aipe foki ki te agaʼi fenua ʼa te kau Senetile, ʼaē neʼe ko he meʼa ia neʼe ʼaoga kia ia ki muli age ʼi tona ʼuhiga ʼapositolo ki te ʼu puleʼaga. Neʼe ina ʼiloʼi ai te faʼahiga fakaʼaveʼave ʼo te moʼoni ke feala ai hanatou mahino (1 Kolonito 9:21). ʼO hage la ko tana akonaki neʼe ina fai ki te kau Athéniens ʼaē ʼe talanoa ki ai ia Gāue kapite 17. ʼI te temi ʼaia, neʼe ina fakaʼaoga fakapotopoto te ʼu manatu ʼo te lotu faka athénien feiā aipe mo te ʼu talanoa ʼo tanatou tagata fai tuketuke ʼo feala ai hana fakahā te moʼoni.
Ko he tagata Loma
Ko Paulo neʼe ʼi ai tona tahi faigamalie ʼi te malamanei. Ko Paulo neʼe ko te tagata Loma, pea neʼe ina fakaʼaogaʼi te faʼahi ʼaia ki te faka mafola ʼo te logo lelei. ʼI Filipe, ko ia pea mo tona kaugā fagona gāue neʼe lalava nāua pea neʼe faka pilisoniʼi nāua kae neʼe mole heʼeki fakamāuʼi. Pea ko te fakahoko ʼo he meʼa feiā ki he tagata Loma, neʼe ko he meʼa ia ʼe fakafeagai ki te lao; pea neʼe ko te faʼahi neʼe fakatokagaʼi age e Paulo ki te kau pule, ʼo nātou fakagafua ai leva ia nāua ke nā nonofo, ʼo nā fakamālohiʼi ai te ʼu kokelekasio ʼi muʼa ʼo tanā mavae ki he tahi koga meʼa. — Gāue 16:37-40.
Ki muli age, ʼi tana tuʼu ia muʼa ʼo te kovana ko Festus, ko Paulo neʼe ina fakaʼaoga tona ʼuhiga tagata Loma ʼo tagi kia Sesale. Koia, neʼe ina tauʼi moʼo hāofaki te logo lelei ia muʼa ʼo te tuʼi māʼoluga ʼo te puleʼaga loma. — Gāue 25:11, 12; Filipe 1:7.
Ko te ako ʼaē neʼe fai kia Paulo neʼe ʼi ai tona ʼaoga lahi kia ia ki muli age leva. Neʼe akoʼi age te faʼu ʼo te fale lā, e tana tāmai. ʼAki te meʼa ʼaia neʼe feala ai tana maʼuli ʼi te minisitelio ʼi te temi ʼaē neʼe hoge falā ai (Gāue 18:1-3). Neʼe toe lelei foki tana ako ʼi te fahaʼi faka lotu. Neʼe akoʼi ia ia ohage ko “he Faliseo, foha ʼo te kau Faliseo”. (Gāue 23:6.) ʼIo, neʼe akoʼi e Kamaliele, ko he tagata faiako ʼiloa ʼi te kau faiako faka sutea (Gāue 22:3). Ko te faʼahiga ako ʼaia, ʼaē ʼe feala pe ke fakatatau ki te ʼu fale ako lalahi ʼo te temi nei, ʼe fakahā ʼaki ai ko tona famili neʼe maʼu koloā.
Ko te manatu ʼaʼana
ʼAki te ako neʼe maʼu e Paulo, neʼe feala pe ke ina maʼu ai hona maʼuli fīmālie ʼi te lotu faka sutea. Kae, ʼi tana leva tali ia Sesu ko te Mesia, ko te fakatuʼutuʼu ʼa Paulo neʼe fetogi ai leva. ʼI tana faitohi ʼaē ki te hahaʼi ʼo Filipe, neʼe ina fakahā tona ʼu faigamalie ʼāfea ʼi te malamanei ʼo ʼui maʼana: “Ko te ʼu meʼa fuli ʼaē neʼe hage kia ʼau ko he ʼu koloā, neʼe ʼau faka ʼuhiga ko he ʼu meʼa puli noa pe ia ʼuhi ko Kilisito. ʼIo, ʼe moʼoni, ʼe ʼau faka ʼuhiga ko te ʼu meʼa fuli ʼe puli noa ʼuhi ko te ʼuhiga māʼoluga ʼaē ʼo te mālama ʼo Kilisito Sesu, toku ʼAliki.” — Filipe 3:7, 8.
Ko te tagata ʼaia neʼe akoʼi neʼe mole fakahemala ia ʼo manatu ki te ʼu lelei ʼaē neʼe feala ke ina maʼu ʼaki tana ako fakamālama; neʼe mole heʼeki ina fakaʼaoga “tona poto lahi ʼaia” moʼo fia poto ki niʼihi (Gāue 26:24; 1 Kolonito 2:1-4). Kailoa ia, neʼe ina tuku aipe tana falala kia Sehova ʼAtua, koia ʼaē neʼe palalau ai ki tana ʼu fakaʼamu ʼāfea, ʼo ʼui maʼana: “ ʼO galo kia te ʼau te ʼu meʼa ʼaē ʼi muli kae ʼau haga ki te ʼu meʼa ʼaē ʼe ʼi muʼa, neʼe ʼau faiga taku lele ki te totogi ʼo te pāuʼi ʼa te ʼAtua, pāuʼi ki selo, ʼaki ia Kilisito Sesu.” (Filipe 3:13, 14). Neʼe maʼuhiga te ʼu meʼa fakalaumālie kia Paulo.
Kae, ko Paulo neʼe ina fakaʼaogaʼi te poto ʼaē neʼe ina maʼu ʼi tana ako ʼāfea ki te gāue ʼa Sehova. ʼI tana ʼui ʼaē ki te kau Sutea: “ ʼE ʼau fakamoʼoni kia nātou ʼe nātou tauhi fakamalotoloto ki te ʼAtua”, neʼe talanoa ki ai he neʼe feiā tana tauhi ʼāfea ki te ʼAtua (Loma 10:2). ʼI tona ʼuhiga ʼāfea ʼaē neʼe ko te Faliseo, ʼe mahino ia neʼe tauhi fakamalotoloto ki te ʼAtua feiā aipe ki te ʼu tohi taputapu. ʼI tana leva tafoki ki te tui faka kilisitiano, ko tana tauhi neʼe lagolago e te mālama totonu, pea neʼe feala ke ina fakaʼaogaʼi tona poto ako ki te ʼu fakatonutonu faitotonu. Ohage la, ʼi te tohi ʼo Hepeleo neʼe ina fakaʼaoga tona mālama loloto ʼo ʼuhiga mo te hisitolia ʼo te kau Iselaele pea mo te tauhi ki te fale lotu moʼo fakahā te māʼoluga ʼo te tuʼu faka kilisitiano.
ʼI te temi nei ko ʼihi ʼe nātou popoto ʼi te fahaʼi fakamālama pea ʼe nātou fakaʼaoga ki te logo lelei. Ko te hahaʼi maʼu pepa kehekehe ʼi te ako, feiā aipe mo te hahaʼi ʼo te faʼahiga tuʼulaga gāue kehekehe neʼe nātou tali te moʼoni pea mo nātou fakaʼaoga tanatou ʼu ako ʼaia, ki te gāue kia Sehova. Kae logope tanatou ʼu ako fakamālama, ʼe mole galo ki te kau kilisitiano ko te faʼahi maʼuhiga ʼi tanatou faiva ko te ʼu meʼa fakalaumālie. Ko te ʼu meʼa ʼaia, ʼe ko te ʼu “meʼa maʼuhiga age ia” koteʼuhi ʼe feala ai ke nātou taki tatou ki te maʼuli heʼegata. — Filipe 1:10.