Te ʼu Tapuakina ʼo Te Puleʼaga—ʼE Koutou Lava Maʼu
KO TE ʼapositolo ko Paulo neʼe poto ʼi ʼihi lea ʼo tona temi. ʼE feala ke tou ʼui neʼe ako ʼi te univelesitē ohage ko te temi nei. Neʼe ina maʼu te ʼu fealagia fuli pea mo te ʼu fakagafua fuli ʼo he tagata Loma. (Gaue 21:37-40; 22:3, 28) ʼAki te ʼu fealagia ʼaia, neʼe feala ke liliu ko he tagata koloaʼia pea mo ʼiloa. Kae neʼe ina ʼui fēnei: “Ko te u mea aia kia te au nee ko oku fakakoloa, nee au lau ko te u mea aia e ko mea alunoa uhi ko Kilisito . . . o au lau ko meafuape aia e ko te otaota, koteuhi ke au mau ia Kilisito.” (Filipe 3:7, 8) He koʼe neʼe fai e Paulo te ʼu palalau ʼaia?
Neʼe higoa ia Paulo ki muʼa atu ko Saulo ʼo Talesi pea neʼe ina fakatagaʼi te hahaʼi ʼaē neʼe kau ʼi “te Ala,” kae ʼi te ʼosi hā age ʼa Sesu ʼi tona ʼosi fakatuʼuake pea mo faka kolōliaʼi, neʼe liliu ai ko te tagata tui. (Gaue 9:1-19) Maʼa Paulo, ko te meʼa ʼaē neʼe hoko ʼi te ala ʼo Tamaso, neʼe ko he fakamoʼoni ko Sesu neʼe ko te Mesia, peʼe ko te Kilisito, ʼaē neʼe fakapapauʼi age, ko te pule ʼaē ka ʼafio ʼi te ka haʼu ʼi te Puleʼaga ʼaē neʼe fakapapauʼi mai. Neʼe toe hoko mo te fetogi fakatalakitupua ki te maʼuli ʼo Paulo, ohage ko tona hā ʼi tana ʼu palalau mālohi ʼaē ʼe tuʼu ʼi ʼoluga. Koia neʼe fakahemala ia Paulo ʼaki he loto fakamalotoloto pea mo he loto katoa.—Kalate 1:13-16.
ʼI te Tohi-Tapu, ko te kupu “fakahemala” ʼe tautau fakaliliu ʼaki te kupu faka Keleka ko tona faka ʼuhiga totonu ko te “ ʼiloʼi age ki ʼamuli,” ʼaē ʼe mole tatau mo te “ ʼiloʼi fakatomuʼa.” Koia ko te fakahemala ʼe ko he fetogi ʼo te fakakaukau, te aga, peʼe ko te ʼu fakatuʼutuʼu, ko te fakafisi ki he ʼu faʼahiga aga ʼāfea neʼe mole lelei. (Gaue 3:19; Apokalipesi 2:5) ʼO ʼuhiga mo Paulo, ko te meʼa fakatalakitupua ʼaē neʼe hoko kia ia ʼi te ala ʼo Tamaso, neʼe ōfo ai tona loto kae neʼe mole gata ai pe ohage ko he meʼa faka lotu. Neʼe mahino kia ia ʼi te temi ʼaia te ʼalunoa ʼo tona faʼahiga maʼuli ʼāfea, tana mole heʼeki mahino kia Kilisito. Neʼe toe mahino kia ia ʼe tonu ke ina fetogi tona maʼuli ke feala hana maʼu te ʼu fua lelei ʼo te ʼatamai mālama foʼou ʼo ʼuhiga mo Kilisito.—Loma 2:4; Efeso 4:24.
Ko Te Fetogi ʼe Kita Maʼu Ai Te ʼu Tapuakina
Ki muʼa atu, ko te ʼu meʼa tāfito ʼaē neʼe ako e Paulo ʼo ʼuhiga mo te ʼAtua, neʼe ina ʼiloʼi mai te magaʼi lotu ʼa te kau Faliseo, he neʼe kau ai. Ko tanatou ʼu akonaki neʼe lahi ai te ʼu filosofia pea mo te ʼu talatisio fakatagata. Ko te faʼafai pea mo te ʼu faiga ʼa Paulo neʼe mole lelei, ʼuhi ko te ʼu fakapalatahi faka lotu. Logola tana manatu ʼaē neʼe tauhi ki te ʼAtua, kae neʼe lolotoga fakafeagai ia kia te ia.—Filipe 3:5, 6.
ʼI tana kua maʼu te ʼatamai mālama ʼo ʼuhiga mo Kilisito pea mo tona tuʼulaga ʼi te fakatuʼutuʼu ʼa te ʼAtua, neʼe ʼiloʼi ai e Paulo ʼe tonu ke ina filifili: ʼE hoko atu anai koa tana nofo Faliseo pea mo maʼu tuʼulaga pea mo tona faka maʼuhigaʼi, peʼe tonu koa ke ina fetogi tona maʼuli pea mo kamata fai te meʼa ʼaē ʼe lelei ke feala hana maʼu te ʼofa ʼo te ʼAtua? Meʼa lelei foki, he neʼe fili e Paulo te meʼa ʼaē ʼe lelei, koia la ʼaē neʼe ina ʼui fēnei ai: “E mole au ufiufi i te [“logo lelei,” MN ], he ko te Mafimafi o te Atua ki te fakamauli o te hahai tui fuape, uluaki ki te sutea, pea ki te keleka.” (Loma 1:16) Neʼe liliu ia Paulo ko te tagata faka mafola faʼafai ʼo te logo lelei ʼo ʼuhiga mo Kilisito pea mo te Puleʼaga.
Hili kiai te ʼu taʼu, neʼe ʼui fēnei e Paulo ki tona ʼu kaugā fagona Kilisitiano: “E mole au lau e kuʼau puke ia, kae ko taku hoha aeni, e au galoi ia mea kua to ki muli, kae ke au hagatahi kia mea e tuu mai mua. E au lele ki te gataʼaga, ki te fakapale o oluga e paui mai ai te Atua ke tou tali ia Kilisito Sesu.” (Filipe 3:13, 14) Neʼe fua lelei te logo lelei kia Paulo koteʼuhi neʼe ina tali ke ina līaki te maʼuli ʼaē neʼe ina fakamamaʼo ia ia mai te ʼAtua, kae ʼaki tona loto katoa neʼe ina fai te ʼu meʼa ʼaē ʼe ʼalutahi mo te fakatuʼutuʼu ʼa te ʼAtua.
Koteā Anai ʼe Tonu Ke Koutou Fai?
Lagi mole heʼeki faʼa fualoa takotou logo ki te logo lelei. ʼE koutou fia fai koa ki te ʼamanaki ʼaē ki he maʼuli heʼegata ʼi he palatiso haohaoa? ʼE mahino ʼe ko he meʼa ʼe koutou loto kiai, koteʼuhi neʼe fakatupu tatou ʼaki te fia maʼuli fiafia ʼi te tokalelei pea mo te fīmālie. ʼE fakahā mai e te Tohi-Tapu, neʼe tuku e te ʼAtua “te ʼu temi heʼegata” ki totatou loto. (Tagata Tānaki 3:11) Koia ʼe mole tou punamaʼuli ai ki tatatou ʼamanaki ki te temi ʼaia ka lava maʼuli heʼegata ai te hahaʼi ʼi te tokalelei pea mo te fiafia. Pea ʼe ko te logo lelei ʼaia ʼaē ʼe foaki mai e te Puleʼaga.
Kae ke hoko te ʼamanaki ʼaia, ʼe tonu ke koutou kumikumi pea mo ako pe koteā ʼaē ʼe talanoa kiai te logo lelei. Neʼe fai e Paulo te tokoni ʼaenī: “Ke koutou iloi, pe kotea te finegalo o te Atua, te mea e lelei mo taau mo ia pea mo te mea ae e katoa.” (Loma 12:2) Koia ohage ko Paulo, ʼi takotou ʼosi mālama pea mo mahino ki te moʼoni, ʼe tonu ke koutou fili.
Tahi ʼaē meʼa, lagi ʼe ʼi ai hakotou faʼahiga sio ki tokotou ka haʼu. Koutou manatuʼi ia Saulo, ʼi tana manatu neʼe ina fai te finegalo ʼo te ʼAtua ʼi muʼa ʼo tana liliu ko te ʼapositolo ko Paulo. Kae ʼe lelei age hatatou fakakaukauʼi lelei ia te faʼahi ʼaia, ʼi hatatou fakatalitali ke fai mai he fakamahino faka milakulo e te ʼAtua. Koutou fai te ʼu fehuʼi ʼaenī: ‘ ʼE ʼau fia ʼiloʼi moʼoni koa te finegalo ʼo te ʼAtua ʼo ʼuhiga mo te malamanei pea mo te kele? Koteā te fakamoʼoni ʼe ʼau lava maʼu moʼo fakahā ʼe moʼoni te ʼu akonaki ʼaē ʼe ʼau faka tui kiai? ʼE moʼoni koa te meʼa ʼaē ʼe ʼau tui kiai, mo kapau ʼe ʼau sivi ʼaki te mālama ʼo te Folafola ʼa te ʼAtua ia te Tohi-Tapu?’ ʼAua naʼa koutou faka ʼuhiga ʼe pulinoa tokotou temi mo kapau ʼe koutou fai te sivi ʼaia ʼo ʼuhiga mo te ʼu akonaki faka lotu ʼaē ʼe koutou tui kiai. ʼI tona fakahagatonu ʼe tonu ke koutou fai feiā koteʼuhi ʼe fakaloto mālohiʼi fēnei tatou e te Tohi-Tapu: “Koutou sivi te meafuape: koutou taofi te lelei.” (1 Tesalonika 5:21) ʼI takotou manatu, ʼe mole koa la maʼuhiga tāfito age te manatu ʼa te ʼAtua?—Soane 17:3; 1 Timoteo 2:3, 4.
ʼE lagi fakapapauʼi mai e te kau takitaki lotu ia he maʼuli heʼegata ki te ka haʼu. Kae kapau ʼe mole fakatafito te fakapapau ʼo te ʼu akonaki ʼaia ki te Tohi-Tapu, pea ʼe mole tou maʼu anai te ʼu tapuakina ʼo te Puleʼaga ʼo te ʼAtua. Neʼe fai e Sesu te fakatokaga mālohi ʼi te Akonaki ʼiloa ʼaē neʼe ina fai ʼi te Moʼuga, ʼo ina ʼui fēnei: “E mole ko natou fuape ae e lea mai kia te au: ‘Aliki, Aliki!’ e hu anai ki te Puleaga o Selo, kae ko ia ae e ina fai te finegalo o taku Tamai e i Selo.”—Mateo 7:21.
Koutou fakatokagaʼi ʼe faka maʼuhigaʼi e Sesu te fai ʼo te finegalo ʼo tana Tāmai ohage ko he maʼua ke kita fai, mo kapau ʼe kita fia maʼu te ʼu tapuakina ʼo te Puleʼaga ʼo te ʼAtua. Ko tona faka ʼuhiga, ʼe lava fakafisi te ʼAtua ki te faʼahiga tauhi ʼaē ʼe hage ʼe fai age kia te ia. Koia neʼe toe ʼui fēnei e Sesu: “Tokolahi ʼe nātou ʼui mai anai kia te ʼau ʼi te ʼaho ʼaia: ‘ ʼAliki, ʼAliki, neʼe mole koa la mātou lea faka polofeta ʼaki tou huafa, pea mo kapu te ʼu temonio ʼaki tou huafa, pea mo fai te ʼu gāue mālohi ʼaki tou huafa?’ Kaʼe hoki ʼau fakahā age anai leva kia nātou: Neʼe heʼeki ʼau ʼiloʼi ʼau ia koutou! Koutou fakamamaʼo atu ia te ʼau, ia koutou ʼaē ʼe gāue ohage ko he ʼu tagata ʼe nātou manuki ki te lao.” (Mateo 7:22, 23, MN ) ʼE mahino papau ia, ʼe maʼuhiga tāfito ke tou ʼiloʼi papau pe koteā moʼoni te logo lelei ʼo te Puleʼaga, pea ke tou mulimuli ki te ʼu fakatuʼutuʼu ʼo te puleʼaga ʼaia.—Mateo 7:24, 25.
ʼE Nātou Lava Tokoni Atu
Kua taʼu 100 tupu te faka mafola ʼo te logo lelei ʼo te Puleʼaga ʼo te ʼAtua e te kau Fakamoʼoni ʼa Sehova. ʼAki te ʼu tohi pea mo te ʼu fai palalau, neʼe nātou tokoni ki te hahaʼi ʼi te malamanei katoa ke nātou ʼiloʼi pe koteā te Puleʼaga, te ʼu tapuakina ʼaē ka ina foaki mai, pea mo te ʼu meʼa ʼaē ke tou fai ke tou maʼu ai te ʼu tapuakina ʼaia.
ʼE mātou fakaloto mālohiʼi koutou ke koutou tali te logo ʼaē ʼe faka mafola e te kau Fakamoʼoni ʼa Sehova. Kapau ʼe koutou tali pea mo mulimuli ki te logo lelei ʼaia, pea ʼe koutou lava maʼu te ʼu tapuakina lahi, ʼi te temi nei pea mo te temi ka haʼu mokā puleʼi anai e te Puleʼaga ʼo te ʼAtua ia te kele katoa.—1 Timoteo 4:8.
Koutou gāue nei, ki te ʼu tapuakina ʼo te Puleʼaga ʼo te ʼAtua ʼaē kua ōvi mai!
[Paki ʼo te pasina 7]
ʼAki te ʼu tohi pea mo te ʼu fai palalau, ʼe faka mafola e te kau Fakamoʼoni ʼa Sehova te logo lelei ʼo te Puleʼaga ʼo te ʼAtua