Te Logo Lelei ʼo Te Puleʼaga—Koteā Te Logo ʼAia?
ʼI te taʼu ʼaenī kua ʼosi ʼi te ʼu fenua e 235 ʼi te malamanei, ko te hahaʼi tūpulaga, mo matutuʼa ʼe toko 6 035 564 neʼe nātou fai te ʼu hola e 1 171 270 425 moʼo tala te logo lelei ʼo te Puleʼaga ki ʼihi. ʼO mole gata pe ʼi tanatou fai faka mafola, neʼe nātou toe tuku mo te ʼu tohi e 700 miliona ki te hahaʼi moʼo fakahā pea mo fakamahinohino te logo lelei ʼo te puleʼaga ʼaia. Neʼe nātou toe tufa mo te ʼu foʼi fime pukeleʼo pea mo te ʼu fime viteo ʼe lauʼi afe moʼo fakahā te logo lelei ʼaia. Koteā te “logo” ʼaia?
“KO TE logo” ʼaia ʼe ko te logo lelei ʼo te Puleʼaga ʼo te ʼAtua. Neʼe mole heʼeki faka mafola feiā “te Logolelei . . . o te Puleaga” ʼi te kele katoa ohage ko tona fai ʼi te temi nei.—Mateo 24:14.
Ko te faka mafola ʼaia pea mo te faiako ʼaia ʼi te malamanei, ʼe fai ʼaki he lotolelei e te kau Kilisitiano. ʼI te manatu ʼa te tokolahi, lagi ʼe mole nātou lavaʼi te gāue ʼaia. Koteā te ʼui ʼo ʼuhiga mo tonatou lototoʼa pea mo te fua lelei ʼo tanatou gāue? Ko te mālohi ʼo te logo lelei ʼo te Puleʼaga ʼe ko he koga maʼuhiga ʼaia, koteʼuhi ʼe ko he ʼu logo ʼo ʼuhiga mo te ʼu tapuakina ʼaē ka maʼu anai e te malamanei. Ko te ʼu tapuakina ʼaia ʼe loto fuli te hahaʼi kiai—te fiafia, te pulihi ʼo te ʼu fihifihia faka ekonomika, he puleʼaga lelei, te tokalelei pea mo te fīmālie, pea ko te tahi meʼa ʼe mole faka tui kiai ia te tokolahi—ko te maʼuli heʼegata! ʼIo ʼe ko he logo lelei ki te hahaʼi ʼaē ʼe nātou kumi te ʼuhiga mo te fakatuʼutuʼu ʼo te maʼuli. Ei ʼe koutou lava maʼu te ʼu tapuakina fuli ʼaia mo kapau ʼe koutou tali lelei ia te faka mafola ʼo te logo lelei ʼo te Puleʼaga.
Koteā Te Puleʼaga?
Koteā te puleʼaga ʼaē ʼe ʼui ʼe ko he logo lelei? ʼE ko te Puleʼaga ʼaē neʼe akoʼi ki te toko lauʼi miliona hahaʼi ke nātou faikole kiai ʼo nātou ʼui fēnei: “Ko tamatou Tamai e i Selo, ke tapuha tou Huafa; ke aumai tau pule, ke fai tou finegalo i te kelekele o hage ko Selo.”—Mateo 6:9, 10.
Kua hili ia sēkulō e 25 neʼe talanoa te polofeta Hepeleo ko Taniela kiai ʼi tana faitohi ʼaenī: “Ko te ʼAtua ʼo te lagi ʼe ina fakatuʼu anai he puleʼaga ʼe mole pulihi anai ʼi he temi. Pea ko te puleʼaga ʼaia ʼe mole tuku anai ki he tahi hahaʼi. ʼE ina laliki anai pea mo fakagata anai te ʼu puleʼaga fuli ʼaia, pea ko ia totonu ʼe tuʼu anai ʼo aʼu ki he ʼu temi ʼe mole ʼiloʼi honatou gataʼaga.”—Taniela 2: 44.
Koia ko te logo lelei ʼe ko te Puleʼaga, ʼaē ka fakaʼaogaʼi e te ʼAtua moʼo fakaʼauha te kau agakovi fuli, pea ʼe pule anai ki te kele katoa ʼaki te tokalelei. ʼE ina fakahoko anai te fakatuʼutuʼu ʼuluaki ʼaē neʼe fai e te ʼAtua maʼa te tagata pea mo te kele.—Senesi 1:28.
“Kua Fakaovi Mai Te Puleaga o Selo”
Kua hili ia teitei taʼu e 2 000 kiai, neʼe ʼuluaki tala te logo lelei ʼo te Puleʼaga e te tagata neʼe ina foaki tona maʼuli ki te ʼAtua, pea neʼe tokagaʼi ia ia ʼuhi ko tona agaaga pea mo tona ʼuhiga. Ko te tagata ʼaia neʼe ko Soane Patita, foha ʼo te pelepitelo Sutea ko Sakalia pea ko tona ʼohoana ko Elisapeta. Neʼe kofuʼi e Soane te kofu fulufuluʼi kamelo, pea neʼe noʼo tona koga loto ʼaki te kiliʼi pipi, ohage ko te polofeta ko Eliseo, ʼaē neʼe ina fakatātā ia ia. Kae neʼe ko te logo ʼaē neʼe ina faka mafola ʼaē neʼe fia logo kiai te tokolahi. Neʼe ina ʼui fēnei: “Koutou tafoki, he kua fakaovi mai te Puleaga o Selo.”—Mateo 3:1-6.
Neʼe ko te kau Sutea ʼaē neʼe fagono kia Soane, ʼaē neʼe nātou ʼui ʼe ko nātou te kau atolasio ʼo te ʼAtua moʼoni ko Sehova. ʼI tonatou ʼuhiga puleʼaga, neʼe foaki age te fuakava ʼo te Lao ʼaki ia Moisese ia taʼu e 1 500 ki muʼa atu. Neʼe kei tuʼu pe te fale lotu matalelei ʼi Selusalemi, ʼaē neʼe fai ai te ʼu sakilifisio ʼo mulimuli ki tona fakatotonu e te Lao. ʼI te manatu ʼa te kau Sutea ko tanatou tauhi neʼe leleiʼia e te ʼAtua.
Kae ʼi tanatou fakalogo ia Soane, neʼe mahino ki ʼihi ko tanatou lotu neʼe mole ʼalutahi mo te meʼa ʼaē neʼe akonakiʼi age kia nātou. Neʼe kua fio te ʼu akonaki faka lotu ʼa te kau Sutea mo te ʼu agaʼi fenua ʼa te kau Keleka pea mo tanatou ʼu filosofia. Ko te lao ʼaē neʼe foaki age e te ʼAtua kia Moisese neʼe kua fetogi ia pea mo fakanoaʼi, ʼuhi ko te ʼu akonaki pea mo te ʼu talatisio fakatagata. (Mateo 15:6) ʼI tanatou hēʼia ʼuhi ko te loto fefeka pea mo te agakovi ʼo tanatou kau takitaki lotu, ko te tokolahi neʼe mole kei nātou fai te tauhi ʼaē ʼe leleiʼia e te ʼAtua. (Sakapo 1:27) Neʼe tonu ke nātou fakahemala mai tanatou ʼu agahala ki te ʼAtua pea mo te fuakava ʼo te Lao.
ʼI te temi ʼaia, neʼe tokolahi te kau Sutea neʼe nātou fakatalitali ki te haʼu ʼa te Mesia peʼe ko te Kilisito ʼaē neʼe fakapapauʼi age, pea neʼe nātou feʼekeʼaki ʼo ʼuhiga mo Soane: “Naʼa e ko ia ape, ia te Mesia?” Kae neʼe tala age e Soane ʼe mole ko ia te Mesia, pea neʼe ina taki ia nātou ki te tahi age tagata, ʼo ina ʼui fēnei ʼo ʼuhiga mo ia ʼaia: “E mole tuha mo au ke au vetevete te u haʼi o ona taka.” (Luka 3:15, 16) ʼI tana fakahā age ia Sesu ki tana ʼu tisipulo, neʼe ʼui fēnei e Soane: “Koeni te Akeno o te Atua e ina too te agahala a te malama-nei.”—Soane 1:29.
Neʼe ko he logo lelei, he neʼe fakahā e Soane ki te hahaʼi fuli ia te ala ʼaē ʼe ina taki ki te maʼuli pea mo te fiafia—ko Sesu ia ia ʼaē “e ina too te agahala a te malama-nei.” ʼI tonatou ʼuhiga hōloga ʼo Atama mo Eva, neʼe tupu te hahaʼi fuli ʼi te tūʼa ʼo te agahala pea mo te mate. ʼE fakamahino fēnei ia Loma 5:19: “Aki te talagataa a te tagata e tahi [ia Atama] nee fakanofo te tokolahi o agahala; pea e feiape, aki te fakalogo a te tagata e tahi [ia Sesu], e fakanofo anai te tokolahi o agatonu.” Ko Sesu, ohage ko he akeno ʼe sakilifisioʼi, neʼe tonu ke ina “too te agahala” pea mo fetogi te maʼuli fakaʼofaʼofa ʼo te tagata. ʼE fakamahino fēnei e te Tohi-Tapu: “Ko te u totogi o te agahala e ko te mate, kae ko te meaofa o te Atua e ko te mauli heegata ia Kilisito Sesu totatou Aliki.”—Loma 6:23.
ʼI tona ʼuhiga tagata haohaoa—te tagata ʼaē ʼe lahi tokotahi ʼo te ʼu temi fuli—neʼe hoko atu e Sesu te faka mafola ʼo te logo lelei. ʼE fakamatala fēnei ʼi te Tohi-Tapu ia Maleko 1:14, 15, MN: “Pea ʼi te ʼosi atu pe ʼo te puke ʼo Soane pea ʼalu ai leva ia Sesu ki Kalilea, ʼo ina faka mafola ai te logo lelei ʼa te ʼAtua ʼo ʼui maʼana: ‘Ko te temi ʼaē neʼe fakakatofa kua iku, pea ko te puleʼaga ʼo te ʼAtua kua fakaōvi mai. Koutou fakahemala, pea mo koutou tui ki te logo lelei.’ ”
Ko te hahaʼi ʼaē neʼe nātou tali te logo ʼa Sesu pea mo haga tui ki te logo lelei ʼaia, neʼe tapuakina ʼaupito ia nātou ʼaia. ʼE ʼui fēnei ia Soane 1:12: “Kia natou nee natou tali ia [Sesu], kia natou e tui ki tona huafa, nee ina foaki kia natou te malohi ki tonatou fakahoko ko te u fanau a te Atua.” Neʼe foaki age kia nātou ia te fakapale ʼo te maʼuli heʼegata heʼe ko te ʼu fānau, peʼe ko te ʼu foha ʼo te ʼAtua.—1 Soane 2:25.
Kae ko te pilivilesio ʼo te maʼu ʼo te ʼu tapuakina ʼo te Puleʼaga neʼe mole faka tuʼakoi pe ki te hahaʼi ʼo te ʼuluaki sēkulō. Ohage ko tona tala atu ʼi te kamataʼaga ʼo te alatike, ʼe lolotoga faka mafola nei pea mo akoʼi te logo lelei ʼo te Puleʼaga ʼo te ʼAtua ʼi te kele katoa. Koia ʼe kei koutou maʼu te ʼu tapuakina ʼo te Puleʼaga. Koteā ʼaē ʼe tonu ke koutou fai ke koutou maʼu te ʼu tapuakina ʼaia? ʼE fakamahino anai te faʼahi ʼaia e te alatike ʼaē ka hoa mai.