Ko Te Kau Fai Faka Mafola ʼo Te Puleʼaga

ʼI Initia—Ko He “Logo Tahi Logola Tonatou Kehekehe”

“TE LOGO tahi logola tonatou kehekehe” ʼe ko he ʼu palalau ʼiloa neʼe fakaʼaogaʼi moʼo fakamahino ia te lagolago ʼa te hahaʼi ʼaē ʼi Initia ki te puleʼaga. ʼE mole ko he meʼa faigafua ʼi te fenua lahi ʼaia, ke logo tahi he hahaʼi ʼe kehekehe tanatou ʼu agaʼi fenua, mo tanatou ʼu lea, mo tanatou ʼu lotu, mo tonatou ʼu lanu, mo tonatou ʼu faʼahiga teuteu pea mo tanatou ʼu meʼa kai. Kae ʼe maʼu te logo tahi ʼaia ʼi te ʼu pilō ʼo te Sosiete Watch Tower ʼo Initia, logola ko te toko 340 tupu ʼaē ʼe maʼuʼuli ai pea mo gāue ai, pea ʼe nātou ʼōmai mai te ʼu puleʼaga kehekehe mo te ʼu telituale kehekehe, pea ʼe nātou lea kehekehe.

• Tou talanoa muʼa kia Rajrani—ko te fafine kei finemui mai te puleʼaga ʼo Punjab, ʼi te potu uesite noleto ʼo Initia. ʼI te kei ako ʼa Rajrani, neʼe kamata ako e tona kaugā ako ia te Tohi-Tapu mo te kau Fakamoʼoni ʼa Sehova. Neʼe faigaʼi e te kiʼi finemui ʼaia ke ako mo Rajrani ia te Tohi-Tapu. Neʼe mole faʼa poto lelei tona kaugā ako ʼi te lea Fakapilitānia pea neʼe mole heʼeki maʼu ʼi te temi ʼaia ia Te Tule Leʼo ʼi te lea faka Punjabi, koia neʼe ina kole ai kia Rajrani ke tokoni age ʼo fakaliliu maʼa ia te ʼu meʼa ʼaē ʼe tuʼu ʼi te nusipepa. Ko te ʼu meʼa ʼaē neʼe lau e Rajrani ʼi Te Tule Leʼo neʼe malave mālohi ki tona loto, pea logola te fakafeagai ʼo tana ʼu mātuʼa, kae neʼe tuputupu ʼo aʼu ki tana foaki tona maʼuli kia Sehova ʼAtua. ʼI tana gāue ʼi te temi nei ʼi te Petele ʼo Initia, ʼe ina fai te meʼa ʼaē neʼe tupu ai tana mahino ki te moʼoni. ʼE ina fakaliliu te ʼu tohi faka Kilisitiano ki te lea faka Punjabi!

• Tou toe vakaʼi age mo Bijoe, ʼaē ʼe haʼu mai te tahi potu ʼo Initia—ko te puleʼaga ʼo te potu-uesite ʼo Kerala. Neʼe kapu ia Bijoe mai te faleako ʼuhi ko tana mole kau ki te ʼu toʼotoʼoga faka puleʼaga. Neʼe hoko ai te fakamāu loaloaga neʼe iku ki te mālo lahi ʼa te tauhi maʼa, pea neʼe toe feala ai kia Bijoe ke toe liliu ʼo ako.a Tahi ʼaē meʼa, neʼe tali ia ia ʼi te univelesitē. Kae neʼe vevele tona leʼo ʼo loto ʼuhi ko te ʼu aga heʼeʼaoga ʼaē neʼe sio kiai ʼi te univelesitē, koia neʼe ina tuku ai pe tana ako ʼi taʼu pe ʼaia. Kua hili nei taʼu e hogofulu ki tana nofo ʼi te Petele, pea ʼe fua lelei age tana kau ki te famili lanu kehekehe pea mo logo tahi ʼo te Petele, he neʼe mole feala hana maʼu te faʼahi ʼaia mo kanapaula neʼe hoko atu tana ako.

• ʼE taʼu 70 tupu ia Norma pea mo Lily pea ko te ʼu fafine vitua talu mai fualoa. Kua taʼu 40 tupu tanā selevisi pionie. Kua taʼu 20 te gāue ʼa Lily ʼi te Petele ʼi te fakaliliu ʼo te lea faka Tamil. Neʼe hū ia Norma ki te Petele kua hili nei kiai taʼu e 13 ʼi te ʼosi mate ʼo tona ʼohoana. ʼE nā tuku he faʼifaʼitaki lelei heʼe nā gāue fakapotopoto, pea ʼe nā tuku mo he faʼifaʼitaki lelei ki te famili katoa ʼo te Petele. ʼE nā leleiʼia te tali kāiga ki te hahaʼi ʼaē ʼe ʼōmai ʼo ʼaʼahi te Petele, pea mo tanā fakakaugā mo te kau tūpulaga ʼo te famili, ʼo nā fakamatala te ʼu taʼu ʼo tonā maʼuli faka Kilisitiano. Pea ʼe toe leleiʼia pe foki e te kau tūpulaga te fakaafe ʼo nāua ki tonatou ʼu kogafale pea mo tokoni age kia nāua. ʼE ko he ʼu faʼifaʼitaki lelei!

Ko te kau gāue ʼaia, kua nātou tekeʼi te ʼu fihifihia ʼaē ʼe tupu ai te ʼu agamālohi pea mo te mole felogoi ʼi te ʼu koga meʼa, pea ʼe nātou gāue fiafia fakatahi ʼi te famili logo tahi ʼo te Petele ʼo Initia, moʼo tauhi ki te hahaʼi.—Pesalemo 133:1.

[Kiʼi nota]

[Haʼuʼaga ʼo te paki pasina 8]

Background: Mountain High Maps® Copyright © 1997 Digital Wisdom, Inc.