ʼE Koutou Leleiʼia Koa Te Gāue ʼAia?

KAPAU kua koutou papitema, ʼe mahino ia ko tokotou ʼofa ʼaē ki te ʼAtua ʼe ina uga koutou ke koutou fai ia tona finegalo. Tahi ʼaē meʼa, ʼe tonu ke liliu te minisitelio ko hokotou vokasio. Tou manatuʼi neʼe fekauʼi e Sesu Kilisito tana kau tisipulo fuli ke nātou ʼolo ʼo fai ni ʼu tisipulo. (Mateo 28:19, 20) ʼIo lagi ʼe koutou gāue nei moʼo taupau tokotou maʼuli fakasino. Kae ʼi tokotou ʼuhiga tisipulo ʼa Sesu pea mo Fakamoʼoni ʼa Sehova, ko te meʼa ʼaē ʼe maʼuhiga ʼuluaki, ko tokotou ʼuhiga minisi Kilisitiano—ko he tahi ʼe ina fakamuʼamuʼa te faka mafola ʼo te Puleʼaga ʼi tona maʼuli.—Mateo 24:14.

Lagi ko tokotou taʼu 18 peʼe 20. Neʼe lagi lahi he ʼu tokoni neʼe fai atu ʼo ʼuhiga mo te fakatuʼutuʼu ʼaē ka koutou fai ʼi tokotou maʼuli. Mokā koutou fakakaukauʼi te ʼu meʼa ʼaē ʼe feala ke koutou fai, ʼe mahino ia ʼe koutou tokagaʼi tāfito anai te meʼa ʼaē ʼe koutou leleiʼia.

Koia koutou fakatokagaʼi pe koteā ʼaē neʼe ʼui e Jørgen ʼi Danemark ʼo ʼuhiga mo te meʼa ʼaē neʼe ina fakatuʼutuʼu ke ina fai. ʼE faka ʼuhiga e Jørgen te gāue ʼaē neʼe ina fili ohage “ko he faʼahiga maʼuli lelei moʼo faka maʼuhigaʼi te gāue ʼaē ʼe ʼaoga ʼaupito.” ʼE ʼui fēnei e te fafine ko Eva e taʼu 31 ʼi Heleni: “Mokā ʼe ʼau fakatatau toku maʼuli mo te maʼuli ʼo toku taʼiake, ʼe ʼau ʼui tuʼumaʼu pe, ko te maʼuli ʼaē neʼe ʼau fili, ʼe lahi age tona ʼu tapuakina, mo maʼuhiga age, pea mo fakafiafia ʼaupito.” Ko te gāue fea ʼaē ʼe maʼu ai te fiafia ʼaia? ʼE lava feafeaʼi hakotou fakahoko te faʼahiga gāue ʼaia?

ʼE Takitaki Koa Koutou e Te ʼAtua?

ʼE ko he meʼa faigataʼa te fili ʼo he gāue. ʼE lagi loto anai e ʼihi ke fakahā fakahagatonu age e te ʼAtua te meʼa ʼaē ʼe ina loto ke nātou fai.

ʼI te temi ʼaē neʼe nofo ai ia Moisese ʼi Matiane, neʼe takitaki ia ia e Sehova ke toe liliu ki Esipito pea ke ina hāofaki te kau Iselaele mai tanatou nofo popūla. (Ekesote 3:1-10) Neʼe hā te ʼaselo ʼa te ʼAtua kia Seteone, ʼo ina hinoʼi ia ia ke ina hāofaki Iselaele mai te mamahi. (Kau Fakamāu 6:11-14) Neʼe tauhi manu ia Tavite ʼi te temi ʼaē neʼe fekauʼi ai e te ʼAtua ia Samuele ke ina fakanofo ia ia ko te hau ʼo Iselaele ki muli age. (1 Samuele 16:1-13) ʼE mole takitaki feiā ia tatou ʼi te temi nei. Kae ʼe tonu ke tou fakafuafua lelei te ʼu gāue pea mo fakatuʼutuʼu lelei peʼe feafeaʼi hatatou fakaʼaogaʼi ia te ʼu fealagia ʼaē ʼe foaki mai e te ʼAtua.

Neʼe avahi e Sehova he “matapā lahi ki te gāue” maʼa te kau Kilisitiano ia ʼaho nei. (1 Kolonito 16:9) ʼO feafeaʼi? ʼI te ʼu taʼu e hogofulu ʼaenī kua hili, neʼe tuputupu te kau fai faka mafola ʼo te Puleʼaga ʼaē neʼe toko 2 125 000, ʼo liliu ko te toko 6 000 000 tupu ʼi te kele katoa. Ko ai koa ʼaē ʼe tokoni ki te faʼu ʼo te ʼu Tohi-Tapu, te ʼu tohi, te ʼu kaupepa lalahi, te ʼu nusipepa, pea mo te ʼu kiʼi pepa lotu ʼaē ʼe ʼaoga ki te meʼa fakalaumālie pea mo te gāue faka malamanei ʼo te faka mafola ʼo te logo lelei? Ko te pilivilesio maʼuhiga ʼaia ʼe fakahoko e te hahaʼi ʼo te famili ʼo te Petele ʼi te malamanei.

Ko Te Maʼuli ʼe Tapuakina

Ko te kupu Petele ko tona faka ʼuhiga ko te “Fale ʼo te ʼAtua,” pea ko te ʼu Petele ʼe ko he ʼu nofoʼaga ʼo te kau Kilisitiano ʼaē ʼe nātou gāue ai ʼaki he lotolelei. (Senesi 28:19, kiʼi nota ʼi te lalo pasina) Ko te ʼu famili ʼo te ʼu Petele ia ʼaho nei, ʼe feala ke fakatatau ki he ʼu ‘ ʼapi neʼe laga ʼaki te poto’ pea ʼe fakatafito ki te ʼofa ʼaē kia Sehova.—Tāʼaga Lea 24:3.

Koteā ʼaē ʼe feala ke ʼui ʼo ʼuhiga mo te maʼuli faka famili ʼaē ʼi te Petele? ʼE ʼui fēnei e te tuagaʼane ʼe taʼu 25, ʼe gāue ʼi te Petele ʼo Estonia: “ ʼE hage kia ʼau, ʼe ʼau nofo tuʼumaʼu mo te ʼu kaumeʼa ʼo Sehova. ʼE ko te meʼa ʼaia ʼe kei maʼuhiga ʼaupito maʼa ʼaku ʼi te Petele.”—Pesalemo 15:1, 2.

ʼI te malamanei katoa ʼe ko te toko 19 500 ʼe nātou maʼu te pilivilesio ʼaē ko te gāue ʼi te Petele. (Pesalemo 110:3) ʼI Amelika, ko te 46 ʼi te teau ʼo nātou ʼo te Petele, ʼe nātou taʼu 19 pea mo taʼu 29. Ohage ko Isaia, neʼe nātou ʼui fēnei: “Koʼeni ʼau! Fekauʼi ʼau.” (Isaia 6:8) Ko Isaia—ʼaē neʼe kua foaki tona maʼuli maʼa Sehova—neʼe ina tali lelei he tahi ʼu pilivilesio. ʼE lagi tonu anai ke kita sakilifisioʼi he ʼu meʼa ʼe kita leleiʼia. Ko nātou ʼaē ʼe gāue ʼi te Petele, ʼe nātou mavae ʼi tonatou fenua pea mo tonatou ʼu famili, te faʼe, te tāmai, te tēhina, te tokolua pea mo te ʼu kaumeʼa. ʼE nātou fai te ʼu sakilifisio ʼaia ʼaki he lotolelei “ ʼuhi ko te logo lelei.”—Maleko 10:29, 30, MN.

Pea ʼe lahi te ʼu tapuakina fakalaumālie ʼaē ʼe kita maʼu ʼi te Petele! ʼE ʼui fēnei e te tūpulaga ʼi te Petele ʼi Lusia: “Kapau ʼe tou maʼuli faka sakilifisio, pea ʼe lahi te ʼu meʼa ʼe kita ako ai, ʼe tokoni mai anai kia tatou ʼi te mālama foʼou. Kia ʼau ʼe lahi age te ʼu tapuakina ʼa Sehova ʼi te ʼu sakilifisio ʼaē neʼe ʼau fai.”—Malakia 3:10.

Te Maʼuli ʼi Te Petele

E feafeaʼi te maʼuli ʼi te Petele? ʼE ʼui e te ʼu famili ʼo te Petele, ʼe ko he maʼuli maʼa mo lelei, pea mo fakafiafia. Ko Jens ʼe taʼu 43, pea ʼe ina leleiʼia te gāue ʼi te Petele. Koteā tona tupuʼaga? ʼE ina ʼui fēnei: “Koteʼuhi ʼe mātou kau fuli ki te fakatuʼutuʼu lahi moʼo fakahoko te gāue maʼuhiga. ʼE ʼau logoʼi ʼi toku loto ia te ʼaoga pea mo te maʼuhiga ʼo te gāue ʼa Sehova.”

Mai te Mōnite ki te Moeaki, ʼe kamata te ʼaho ʼi te Petele ʼaki te lau ʼo te koga tohi ʼo te ʼaho. ʼE ko he fai palalau ki te Tohi-Tapu, ʼe takitaki e te tagata ʼāfea kua fakapotopoto. ʼI te ʼu Mōnite afiafi ʼe fai hola katoa te ako faka famili ʼo te Tohi-Tapu ʼaki Te Tule Leʼo, pea ʼe tautau fai te akonaki ʼe fakatafito ki he kupu tāfito ʼo te Tohi-Tapu ʼe ʼaoga lelei ki te famili ʼo te Petele.

E feafeaʼi ki he tahi ʼe hoki hū mai ki te Petele? Moʼo fakahū he tahi ki te Petele, ʼe fai te ʼu akonaki e te ʼu tēhina fakapotopoto ʼo te Petele, moʼo fakahāhā te ʼu faʼahi kehekehe ʼo te gāue ʼi te Petele. ʼI te ʼuluaki taʼu, lolotoga te ʼu vāhaʼa, ʼe kau ia ia ʼaē neʼe hoki hū ki te Petele ki te ako neʼe fakatuʼutuʼu ʼi te vāhaʼa fuli moʼo fakalahi tana mahino ki te Tohi-Tapu. ʼE toe fakamaʼua ki te kau Petelite foʼou ke nātou mulimuli ki te polokalama lau ʼo te Tohi-Tapu. ʼI tonatou ʼuluaki taʼu ʼi te Petele, ʼe nātou lau katoa te Tohi-Tapu.

Koteā te fua ʼo te ako katoa ʼaia? ʼE tali fēnei e Joshua ʼe taʼu 33, pea ʼe gāue ʼi te Petele ʼi Hong Kong: “Neʼe fakaloloto moʼoni e te Petele toku loto fakafetaʼi ʼaē kia Sehova. ʼE ʼau lava fakakaugā mo te ʼu tēhina kua fakapotopoto, kua fualoa ʼaupito tanatou gāue maʼa Sehova. ʼE ʼau fiafia tāfito ʼi te ʼu polokalama fakalaumālie, ohage ko te lau ʼo te koga tohi ʼo te uhu, te ako ʼo Te Tule Leʼo pea mo te tahi ʼu meʼa. Pea tahi ʼaē meʼa, ʼe ʼau leleiʼia te faʼahiga fakatuʼutuʼu ʼo te ʼu gāue pea mo te faka faigafua ʼo tomatou maʼuli. ʼE ko he faʼahi ʼe ina fakamaʼamaʼa ʼau mai te tuʼania ki he ʼu meʼa ʼe mole ʼaoga moʼoni. Tahi ʼaē meʼa, ʼe ʼau ako ai peʼe feafeaʼi haku fakahoko he ʼu meʼa ʼaki he aga faka Kilisitiano, pea neʼe ʼau sio ʼe fua lelei tuʼumaʼu pe kia ʼau.”

Ko nātou ʼaē ʼe gāue ʼi te Petele, ʼe nātou fakaʼaogaʼi tāfito tonatou temi pea mo tonatou ʼu faiga moʼo fai te ʼu gāue ʼaē neʼe nātou tali lelei ke nātou fai. Ko tona faka ʼuhiga, ʼe nātou fakaʼaogaʼi tonatou mālohi fakasino pea mo tonatou ʼatamai moʼo fakahoko te ʼu gāue ʼaē neʼe tuku age kia nātou ʼi te Petele. Pea ʼe lahi te ʼu gāue. Ko ʼihi ʼe nātou fakahaʼele te ʼu masini tā tohi, peʼe gāue ʼi te fakapipiki ʼo te ʼu tohi, mo te faʼu ʼo te ʼu tohi, ʼaē ʼe momoli leva ki te ʼu kokelekasio. Ko ʼihi ʼe nātou gāue ʼi te fale kuka, ʼi te fale kai, peʼe ʼi te fale fō. ʼI te ʼu gāue ʼaia, ʼe ʼi ai te fakamaʼa, te gāue kele, te gāue laga fale, pea mo ʼihi ʼatu gāue. Ko ʼihi ʼe nātou vakavakaʼi te ʼu meʼa ʼaē ʼe ʼaoga ki te fale ʼo te Petele. Ko ʼihi ʼe ko he ʼu tōketā peʼe ko he ʼu afilimie, pea ko ʼihi ʼe nātou gāue ʼi te ʼu pilō. Ko te ʼu gāue fuli ʼaē ʼi te Petele ʼe ko he ʼu gāue fakafiafia pea ʼe kita maʼu ai he ʼu tapuakina taulekaleka. Ko te gāue ʼaē ʼe fai ʼi te Petele ʼe fakafiafia tāfito koteʼuhi ʼe lagolago ki te ʼu meʼa ʼo te Puleʼaga, pea ʼe fai ʼaki te ʼofa ʼaē ki te ʼAtua.

Neʼe hinoʼi te ʼu tēhina pea mo te ʼu tuagaʼane ʼo te famili ʼo te Petele ki te ʼu kokelekasio, pea ʼe nātou sio ai ki te ʼu fua lelei ʼo tanatou gāue. ʼE nātou kau ki te ʼu fono ʼo te kokelekasio pea mo fai faka mafola. Pea ʼe fakatuputupu ai e te ʼu tēhina ʼo te famili ʼo te Petele te ʼu noʼo mālohi mo tonatou ʼu tēhina pea mo tuagaʼane ʼo tonatou ʼu kokelekasio.—Maleko 10:29, 30.

ʼE ʼui fēnei e te tuagaʼane ko Rita ʼi te Petele ʼi Pilitania: “ ʼE ʼau loto fakafetaʼi lahi ki te kokelekasio! Mokā ʼau kau ki te ʼu fono pea mo te minisitelio, ʼe ko he meʼa fakaloto mālohi ʼaupito ki taku tui taku sio ʼaē ʼe kau kiai te ʼu tēhina, te ʼu tuagaʼane, te ʼu tamaliki, pea mo te kau matuʼa! Logola te ʼu fihifihia, kae ʼe nātou kau pe ki te ʼu fono pea mo te minisitelio. ʼE tokoni te faʼahi ʼaia kia ʼau ke toe ʼāsili age taku faʼafai ʼi taku gāue ʼi te Petele.”

ʼE mole faka tuʼakoi pe te maʼuli ʼaē ʼi te Petele ki te gāue, te ʼu fono, te gāue fai faka mafola, pea mo te ako. ʼE toe ʼi ai pe foki mo te ʼu temi mālōlō ʼo te famili. ʼI ʼihi temi, ʼe ʼi ai te ʼu polokalama fakafiafia pea mo te “Fakafiafia Faka Famili,” ʼaē ko he ʼu faigamālie ke nātou ʼiloʼi ai te ʼu faiva ʼo te tokolahi, pea mo ako he ʼu meʼa fakaloto mālohi ʼo ʼuhiga mo te maʼuli ʼo ʼihi ʼi te Petele. Tahi ʼaē meʼa fakafiafia, heʼe ʼi te famili ʼo te Petele ʼe nātou maʼu te ʼu temi lelei pea mo fakaloto mālohi ke nātou fefakaafeʼaki. ʼE ʼi ai te tahi ʼu faʼahiga mālōlō, ohage la ko tanatou ʼolo ʼo lautohi ʼi te ʼu tukuʼaga tohi pea mo fai ai he ʼu kumi takitokotahi. Pea tahi ʼaē meʼa, ke ʼaua naʼa galo mo te ʼu fai palalau fakafiafia ʼaē ʼe nātou fai ʼi te ʼu temi kai.

ʼE ʼui fēnei e Tom ʼaē ʼe gāue ʼi te Petele ʼo Estonia: “ ʼE tuʼu ōvi te Petele ki te matatai, pea ʼe ʼi ai mo te vao matuʼa ʼe ʼau ʼalu ʼo haʼele ai mo toku ʼohoana. ʼI ʼihi temi ʼe ʼau fai te gaoʼi ʼaē ko te golf, pea mo te tennis mo toku ʼu kaumeʼa ʼo te kokelekasio pea mo te Petele. Pea kapau ʼe lāulelei te lagi, ʼe mātou ʼolo ʼo ʼaka lelue.”

E Feafeaʼi Hakotou Hū Ki Te Petele?

ʼE moʼoni, ʼuluaki ko te Petele ʼe ko he koga meʼa ʼe fai ai e te kau Kilisitiano fakapotopoto tanatou tauhi taputapu kia Sehova, pea mo gāue maʼa tonatou ʼu kaugā fagona ʼi te malamanei. Ko nātou ʼaē ʼe fia hū ki te famili ʼo te Petele, ʼe ʼi ai te ʼu maʼua ʼe tonu ke nātou mulimuli kiai. E feafeaʼi hakotou hū ki te Petele?

Ohage ko Timoteo, ʼaē neʼe gāue mo te ʼapositolo ko Paulo, ko nātou ʼaē ʼe hū ki te Petele ʼe tonu ke lelei tonatou matagafua ʼi te kokelekasio. (1 Timoteo 1:1) Ko Timoteo “nee lau tona lelei e te u tehina i Lisitala mo Ikoniume.” (Gaue 16:2) Logola neʼe kei veliveli, kae neʼe ʼiloʼi e Timoteo te Tohi-Tapu pea neʼe mālama lelei ki te moʼoni. (2 Timoteo 3:14, 15) ʼO toe feiā pe, ʼe tonu kia nātou ʼaē ʼe hū ki te Petele, ke nātou maʼu he ʼatamai mālama ʼo ʼuhiga mo te Tohi-Tapu.

ʼE tonu ki te famili ʼo te Petele ke maʼuli faka sakilifisio. Neʼe ʼiloga te faʼahi ʼaia ʼi te maʼuli faka sakilifisio ʼa Timoteo pea mo tana fakamuʼamuʼa ʼaki he lotolelei ia te ʼu gāue ʼo te Puleʼaga ʼi te ʼu meʼa ʼaē neʼe loto kiai, ʼo feala ai ke ʼui fēnei e Paulo ʼo ʼuhiga mo ia: “E mole au mau he tahi e hage ko ia, e tatau oma loto, pea e tokaga mooni anai kia mea o uhiga mo koutou. He ko natou fuli e natou tahi faiga ki onatou lelei, e mole faiga natou ki te u lelei o Kilisito Sesu. Kae e koutou iloi tona mooni, pea, o hage pe he fanau e tauhi ki tana tamai, nee fakatahi ia mo au o kaugana ki te [logo lelei].”—Filipe 2:20-22.

ʼE fakamaʼua ki te gāue ʼaē ʼi te Petele he ʼu tagata pea mo he ʼu fafine kua fakapotopoto ʼi te faʼahi fakalaumālie. Ko te ʼu fakatuʼutuʼu ʼaē ʼe fai maʼa te ʼu tēhina ʼo te Petele, ʼe ina faka fealagia kia nātou ke nātou tuputupu ʼi te faʼahi fakalaumālie ʼaki te ako ʼo te Tohi-Tapu, te ʼolo tuʼumaʼu ki te ʼu fono pea mo te fai faka mafola, pea mo te fakakaugā mo te kau Kilisitiano kua fakapotopoto. Koia ʼe tokoni kia nātou ʼaē ʼi te Petele ke nātou muliʼi te tokoni ʼaenī ʼa Paulo: “Koutou mauli [mo Kilisito Sesu]; nee fakatauaka mo lagaʼi ake koutou ia te ia, pea nee fakamalohiʼi koutou i te tui o hage ko toutou fakaʼakoi, koutou fonu i te fakafetai.”—Kolose 2:6, 7.

ʼI te lahi ʼaupito ʼo te ʼu gāue ʼi te Petele, ko nātou ʼaē ʼe nātou tali te pilivilesio ʼaia, ʼe tonu ke nātou mālolohi ʼi te faʼahi fakasino pea mo nātou haohaoa. Kapau ʼe koutou fakahoko te ʼu maʼua ʼaē neʼe mātou fakahā atu, mo koutou taʼu 19 peʼe koutou matuʼa age, mo kua koutou papitema kua hili kiai he taʼu katoa, pea ʼe mātou fakaloto mālohiʼi atu koutou ke koutou fakakaukauʼi te gāue ʼo te Petele.

ʼE Tou Kau Fuli Kiai

ʼE mahino papau ia ʼi totatou ʼuhiga Kilisitiano, ʼe tou fia fakamuʼamuʼa te ʼu meʼa ʼo te Puleʼaga ʼi totatou maʼuli pea mo tou tauhi kia Sehova ʼaki totatou nefesi katoa. (Mateo 6:33; Kolose 3:23) ʼE toe feala pe foki ke tou fakaloto mālohiʼi ia nātou ʼaē ʼe gāue ʼi te Petele ke nātou hoko atu tanatou gāue taputapu. Pea tāfito, ki te ʼu tēhina tūpulaga ʼaē ʼe nātou fia hū ki te Petele, ʼe fakaloto mālohiʼi nātou ke nātou fakahoko te pilivilesio manuʼia ʼaia.

Ko te gāue ʼi te Petele ʼe ko he faʼahiga maʼuli lelei ʼi te faʼahi fakalaumālie, pea ʼe feala ke lelei ʼaupito te gāue ʼaia maʼa koutou. ʼE ko te manatu ʼaia ʼa Nick, ʼaē neʼe kamata gāue ʼi te Petele ʼi tona taʼu 20. Hili kiai taʼu e hogofulu, ʼe ina ʼui fēnei: “ ʼE ʼau faikole tuʼumaʼu kia Sehova moʼo fakamālo ki tona ʼofa makehe. Koteā he tahi age meʼa ke ʼau kole ki ai? ʼI henī, ʼe mātou fakakaugā mo te kau Kilisitiano agatonu, ʼe nātou tauhi fakamalotoloto kia Sehova.”

[Talanoa ʼo te pasina 22]

KOTEĀ ʼAĒ ʼE LAVA FAI E TE KAU TAGATA ʼAFEA PEA MO TE ʼU MĀTUʼA?

ʼE tonu ke fakaloto mālohi e te kau tagata ʼāfea pea mo te ʼu tagata taupau feʼoloʼaki te ʼu tamaliki tagata ke nātou fai hanatou kole ki te Petele. Mole heʼeki faʼa fualoa, neʼe fakafehuʼi ia nātou ʼaē kei tūpulaga ʼi te Famili ʼo te Petele, pea neʼe ko te toko 34 ʼi te teau ia nātou ʼaia, neʼe nātou fakahā neʼe ʼuluaki fakaloto mālohiʼi nātou e te ʼu tagata taupau Kilisitiano ke nātou fakatuʼutuʼu ke nātou gāue ʼi te Petele. Ei, lagi neʼe lotomamahi tonatou ʼu kokelekasio ʼi tanatou pupuli. Kae ke tou manatuʼi, logola neʼe fua lelei te aga ʼa Timoteo ki te kau tūpulaga ʼo Lisitala pea mo Ikoniume, kae neʼe tuku ia ia e te kau tagata ʼāfea ke ʼalu ʼo gāue mo Paulo. Neʼe mole nātou manatu, ʼe mole haʼele lelei anai te kokelekasio heʼe kua ʼalu ia Timoteo ʼo kaugā gāue mo Paulo.—1 Timoteo 4:14.

ʼE tonu tāfito ki te ʼu mātuʼa Kilisitiano ke nātou fakaloto mālohiʼi tanatou ʼu fānau ki te faʼahi ʼaia. ʼI te fakafehuʼi ʼaē neʼe tou talanoa kiai, ko te toko 40 ʼi te teau neʼe nātou ʼui ko tanatou ʼu mātuʼa ʼaē neʼe nātou fakaloto mālohiʼi ia nātou ke nātou hū ki te Petele. Ko te tuagaʼane kua gāue lolotoga ni ʼu taʼu ʼi te Petele, neʼe ina ʼui fēnei: “Ko te maʼuli ʼo taku ʼu mātuʼa ʼi te tauhi ʼaē kia Sehova neʼe ko he tupuʼaga mālohi ʼaia ke ʼau fia hū ki te Petele. ʼI taku sio ki tanā faʼifaʼitaki ʼi te minisitelio temi katoa, neʼe ʼau mahino ai ʼe ko te faʼahiga maʼuli pe ʼaia e tahi ʼe lelei ke ʼau filifili.”

[Talanoa ʼo te pasina 24]

ʼE NĀTOU LELEIʼIA TANATOU GĀUE ʼI TE PETELE

“ ʼE ʼau leleiʼia taku gāue ʼi te Petele. ʼE ko he meʼa fakafiafia taku ʼiloʼi ʼaē ʼe ʼau tauhi kia Sehova ʼi te ʼaho katoa, ʼo feiā mo te ʼapogipogi ake, ʼo fai hoholo atu. ʼE ʼau maʼu ai he leʼo ʼo loto ʼe lelei pea ʼe ʼau fakafonu ai toku ʼatamai ʼaki he ʼu manatu lelei.”

Ko te Petele ʼe ko he koga meʼa ʼe koutou lava foaki katoa ai tokotou temi pea mo tokotou mālohi ki te tauhi ʼa Sehova, ʼaki he loto faʼafai. ʼE koutou maʼu ai te fiafia. Pea ʼe toe feala ai foki ke kehe takotou sio ʼaē ki te kautahi ʼa Sehova. ʼE koutou ōvi ʼaupito ai ki te kautahi ʼaia, pea ʼe koutou fiafia ai.”

“ ʼE ko he meʼa lelei ʼaupito taku filifili ke ʼau gāue ʼi te Petele. ʼI henī ʼe kita ako tuʼumaʼu. Pea ko te ako ʼaē ʼe fai ʼi henī, ʼe mole fai maʼa kita totonu pe, kae ʼe fai maʼa Sehova. Pea ʼe ʼi ai anai he ʼu fua ʼo taku gāue.”

“ ʼE ʼau fiafia pea mo tokalelei ʼi taku fakaʼaogaʼi toku ʼu faiva ʼi te Petele, koteʼuhi ʼe fakaʼaogaʼi maʼa Sehova pea mo te ʼu tēhina.”

“ ʼI taku gāue ʼāfea neʼe mole ʼau fīmālie moʼoni pea mo fiafia. Lolotoga ni ʼu taʼu neʼe ʼau fakaʼamu ke ʼau gāue mo toku ʼu tēhina mo tuagaʼane, pea mo gāue maʼa nātou. Ko te tupuʼaga la ʼaia ʼo taku haʼu ki te Petele. ʼE ʼau fiafia ʼi taku ʼiloʼi ʼaē ko taku ʼu faiga katoa ʼe fua lelei anai ki ʼihi ʼi te faʼahi fakalaumālie, pea mo fakavikiviki anai kia Sehova.”