Ke Tou Faka Maʼuhigaʼi Te “Fale ʼo Te ʼAtua”
“NEʼE ʼau kole kia Sehova te meʼa e tahi—Ko te meʼa ʼaē ʼe ʼau faigaʼi anai, [ke ʼau] nofo ʼi te fale ʼo Sehova ʼi te ʼaho fuli pe ʼo toku maʼuli, ke ʼau sio mata ki te matalelei ʼo Sehova pea mo faka maʼuhigaʼi ʼaki he loto fakafetaʼi tona fale lotu.”—Pesalemo 27:4.
Ko te Hau ko Tavite neʼe ina leleiʼia te fale lotu ʼo Sehova. ʼE koutou logoʼi koa mo koutou te fiafia ʼaia ʼo ʼuhiga mo te ʼu fale ʼo te tauhi moʼoni ia ʼaho nei? Ko te ʼu Petele e 95 tupu ʼo te Sosiete Watch Tower ʼe nātou kau ki te ʼu meʼa ʼaē ʼe pipiki ki te tauhi kia Sehova ʼi totatou temi.
ʼE fakamatala e Helga ʼaē neʼe kamata gāue ʼi te Petele ʼo Siamani ʼi te taʼu 1948, “ ʼI taku fakasiosio ʼaē ki te ʼu taʼu kua ʼosi ʼo taku gāue ʼaē ʼi te Petele, ʼe ʼau fonu ʼi te fakafetaʼi pea mo te loto fiafia pea neʼe tuputupu ʼi te ʼu taʼu fuli pe.” Ko Helga ʼe kau ki te ʼu 13 828 kaugāue ʼo te malamanei katoa ʼaē ʼe gāue fiafia ʼi te ʼu Petele, ʼaē neʼe nātou ‘sio mata ki te matalelei ʼo Sehova ʼi te taʼu selevisi 1993. Koteā koa te faka ʼuhiga moʼoni ʼo te higoa ʼaē ko te Petele? ʼE lava feafeaʼi ki te kau Fakamoʼoni ʼa Sehova takitokotahi, hanatou faka maʼuhigaʼi te fakatuʼutuʼu ʼaia peʼe nātou gāue ki te ʼAtua ʼi he Petele peʼe kailoa?
Ko He Higoa ʼe Ina Fakamaʼua He Pipiki ʼĀteaina Ki Ai
Ko te kupu ʼaē ko te “Petele” ʼe ko he higoa ia ʼe tāu, koteʼuhi ʼi te faka Hepeleo ko te faka ʼuhiga ʼo Behth-ʼElʹ ko te “Fale ʼo te ʼAtua.” (Senesi 28:19, vakaʼi Les Saintes Ecritures—Traduction du monde nouveau, tā fakapilitānia, te nota ʼi te lalo pasina). ʼIo, ko te Petele ʼe hage ko he fale ʼe tokalelei ai meʼa fuli, peʼe ‘ko he loto fale neʼe laga ʼaki te fakapotopoto,’ ʼo tou fakatokagaʼi ai tāfito te ʼAtua pea mo tona finegalo. (Tāʼaga Lea 24:3) ʼE ʼui fakafiafia e Herta “ ʼE hage pe ko hakita maʼuli ʼi he loto famili. ʼI te ʼaho fuli pe ʼe ʼi ai tamatou polokalama neʼe teuteuʼi lelei.” Neʼe gāue ʼi te Petele pe ʼaē neʼe gāue ai Helga ia taʼu e 45 tupu. Ko te takitokotahi ʼo te toe famili ʼaia, ʼe ʼi ai tana gāue pea mo tona tuʼulaga, ke feala ai hana loto fiafia pea mo fīmālie. ʼO mulimuli ki te higoa ʼaē ko te Petele, ko te tokalelei pea mo te maui mālie ʼe hā ʼi ʼona faʼahi fuli pe. Ko te faʼahi ʼaia ʼe lagolago ki te tokalelei, pea mo ina faka fealagia te haʼele lelei ʼo te faka mafola ʼo te logo lelei ʼo te Puleʼaga, mo ina foaki he tupuʼaga mālohi ki te ʼu kokelekasio ke maʼuhiga kia nātou te “Fale ʼo te ʼAtua.”—1 Kolonito 14:33, 40.
He koʼe koa ʼe ʼaoga te ʼu fakatuʼutuʼu ʼaia? Ohage la, ko te nusipepa ʼaenī, neʼe tā ʼi te fale tā tohi ʼo te Petele. ʼE ʼaoga ʼaupito te ʼu fakatuʼutuʼu ohage ko te ʼu Petele ki te faka mafola ʼo te logo lelei ʼo te Puleʼaga pea mo te tufaki ʼo te meʼa kai fakalaumālie ʼaē neʼe fakakikite e Sesu—ko te ʼu fakatuʼutuʼu ʼaia ʼe lagolago kiai te kaugāue lotolelei pea mo te ʼatu ʼu kaugana ʼa Sehova.—Mateo 24:14, 45.
ʼE koutou holi koa ke ʼāsili age takotou mahino ʼaē ki te polokalama gāue māhani ʼaē ʼe fai ʼi te ʼaho fuli ʼi te Petele? ʼI te koga meʼa ʼaē ʼe nonofo ai ia Helga pea mo Herta, ʼi te hola 6 ʼosi 30 ʼo te pogipogi uhu ʼe tagi te kiʼi pele ʼi te ʼu faʼahi fuli ʼo te ʼu fale laufata, logope la ko ʼihi ʼi te toko 800 tupu ʼaē gāue hoholo ʼi ai, ʼe nātou ʼaʼala fakatomuʼa age nātou. ʼI te hola 7 uhu, mai te mōnite ki te moeaki, ʼe maʼopoʼopo te famili ʼi te fale kai moʼo talanoa ki te vaega ʼo te ʼaho, peʼe ko te tauhi ʼo te pogipogi uhu. ʼE hoa mai leva kiai te ʼinu kafe ʼo te uhu. ʼI te ʼaho fuli ʼe kamata te gāue ʼi te hola 8 uhu pea ʼe fai hoholo ia hola e valu, ʼo ai pe te kiʼi tuʼu ʼi te ʼu temi kai. (ʼI te agamāhani ko te famili ʼe gāue pe ia ʼi te moeaki uhu.) ʼE lahi te gāue ʼaē ʼe tonu ke fai, peʼe ʼi te fale kuka, peʼe ʼi te fale tā tohi, peʼe ʼi te fale fai fō, peʼe ʼi te ʼu pilō ʼaē ʼe gāue ki te ʼu pepa, peʼe ʼi te ʼu fale ʼaē ʼe tānaki ai te ʼu meʼa gāue, peʼe ʼi te ʼu fale ʼaē ʼe fakapipiki ai te ʼu tohi, peʼe ʼi he tahi age pe faʼahi.
ʼI te ʼu afiafi ʼo feiā ki te moeaki mo te ʼahotapu, ko te ʼu Tēhina pea mo te ʼu Tuagaʼane ʼo te famili ʼo te Petele ʼe nātou kau ki te ʼu fono ʼo tonatou ʼu kokelekasio pea mo te fai faka mafola. E lahi te ʼu Tēhina ʼi te famili ʼo te Petele ko te ʼu tagata ʼāfea peʼe ko te ʼu tagata faifekau faka minisitelio ʼo te ʼu kokelekasio ʼaia. ʼE fiafia ʼaupito te ʼu Tēhina ʼo te ʼu koga meʼa ʼaia ʼi tanatou kaugā gāue fakatahi, ohage pe ko he sino e tahi, ʼo nātou fefakaʼapaʼapaʼaki pea mo felotomahinoʼaki. (Kolose 2:19) ʼE mahino ki te Tēhina pe ko te Tuagaʼane ʼaē ʼe gāue ʼi te Petele ʼe takimuʼa aipe tana gāue ʼi te “Fale ʼo te ʼAtua” ia meʼa fuli. Kae, ko te lotomālohi ki te gāue faka mafola pea mo te lagolago ʼaē ki te kokelekasio, ʼo fakatahi pea mo te aga fakapotopoto, ʼe nātou fakamālohiʼi anai te faʼahi fakalaumālie ʼo te Tēhina pe ko te Tuagaʼane ʼaē ʼe gāue ʼi te Petele, ʼo lahi age tona fiafia, pea mo ʼāsili age tana faʼa gāue. ʼI maʼuhiga ʼaupito foki ʼo te ʼu kalitate ʼaia mokā ʼe kita gāue ʼi he “Fale” ko tona higoa ʼe faka ʼuhiga ki he pipiki ʼāteaina, ʼaki tokita nefesi katoa!
Koutou Faiga Ke Fua Lelei Takotou Selevisi ʼi Te Petele
Koteā ʼaē neʼe tokoni ki te tokolahi ʼi te kau Fakamoʼoni ʼa Sehova ke fua lelei tanatou selevisi ʼi te Petele? ʼE ʼui fēnei e te ʼu Tēhina pea mo te ʼu Tuagaʼane kua fualoa tanatou kau ki te famili ʼo te Petele ʼo Falani: “Ko te ʼofa ʼaē kia Sehova. Ko te faiga mālohi ʼaē ke mātou haga fai te gāue, ʼi te potu fuli pe ʼe hinoʼi mai ke mātou gāue ai; ko te agavaivai, te talagafua pea mo te fakalogo ʼaē ki te takitaki ʼaē ʼe foaki mai e te Sosiete.” (Denise) “Neʼe ʼau fakatokagaʼi te maʼuhiga ʼaē ʼo te fakaʼapaʼapa ki te pelesepeto ʼaē neʼe tohi e Paulo ia Loma 12:10: ‘ ʼO ʼuhiga mo takotou fefakaʼapaʼapaʼaki, koutou tuku he faʼifaʼitaki.’ Ko te vaega ʼaia ʼe ina fakahā mai te maʼuhiga ʼo te mole faiga ʼaki te mālohi ke tali takita ʼu manatu, kae, ke tou fakatokagaʼi te ʼu manatu ʼa nātou ʼaē. ʼI he tahi age faʼahiga palalau, ke mole tou kumi te fia pule.” (Jean-Jacques) “Ko tatatou fakaʼapaʼapa ʼaē ki te selevisi ʼo te Petele ʼe feala ke tuʼutāmakiʼia mo kapau ʼe tou sioʼi te ʼu meʼa ʼaki he manatu fakatagata,” ko te ʼui ʼaia ʼa Barbara, “ ʼuhi ko te faʼahi ʼaia ʼe feala pe ke puli ia tatou te ʼaluʼaga ʼaē ko Sehova ʼaē ʼe ina taki tana kautahi. Ko te taʼi fakaʼapaʼapa ʼaia ʼe feala pe ke puli mo kapau ʼe tou tūkia ʼi te ʼu vaivaiʼaga ʼo niʼihi.”
Ko nātou fuli ʼaē kau ki te famili ʼo te Petele ʼe nātou agahala, koia ko te ʼu fakakaugā ʼe ʼaoga ke fakakaukauʼi fakalelei. Ko te kau tūpulaga peʼe ko nātou ʼaē ʼe foʼofoʼou ʼe mole lelei hanatou faka tuʼakoi pe tanatou fakakaugā ki tonatou ʼu kaumeʼa. Ko nātou ʼaē ʼe fai fatufatu pea mo lotokovi ʼe mole ko he ʼu fakakaugā lelei ʼi te Petele peʼe ʼi te kokelekasio. Kae ʼi te tahi age faʼahi, ko te faʼifaʼitakiʼi ʼo te “poto ʼaē ʼe haʼu mai ʼoluga,” ʼaē talanoa kiai te tohi ʼa Sake 3:17, ʼe ina foaki ia te ʼu tapuakina. Ko te poto ʼaia “ ʼuluaki muʼa, ʼe aga fakamaʼoniʼoni, ʼe agalelei, ʼe aga fakapotopoto, ʼe fia fakalogo, ʼe fonu ʼi te manavaʼofa, pea e lahi tona ʼu fua lelei, ʼe mole fakapalatahi, pea ʼe mole malualoi.” Ko te ʼu kalitate ʼaia, ʼo toe kau kiai mo te loto faʼa kātaki pea mo te agalelei, ʼaē tou maʼu ʼi te “Fale ʼo te ʼAtua,” ʼe nātou fakaloto fiafia pea mo uga ia ia ʼaē ʼe nofo ai. Māʼiape la mo te hahaʼi ʼaē ʼe ʼōmai ʼo mamata ki te Petele ʼe nātou fakahā tanatou ʼofolele ʼi te aga fakaʼapaʼapa, mo te feʼofanaki, pea mo te fiafia ʼa te kau gāue.
Neʼe fakamatala e Anny, ʼaē neʼe kau ki te famili ʼo te Petele ʼo Siamani talu mai te taʼu 1956 pea kua taʼu 70 tupu ʼi te temi nei, neʼe ina fakamatala pe neʼe lava feafeaʼi tana taupau maʼu tana nofo teuteu ki te gāue ʼa Sehova: “Ke feala haku taupau maʼu taku aga fakalaumālie, ʼe ʼau faiga mālohi ke ʼau ʼiloʼi te ʼu meʼa ʼaē ʼe talanoa kiai te ʼu tohi ʼa te Sosiete, ke ʼau kau tuʼumaʼu ki te ʼu fono ʼo te kokelekasio, pea mo kau tuʼumaʼu ki te gāue faka mafola. ʼE ʼau toe faiga pe foki ke ʼau hāo mai te ʼu mahaki ʼaki taku fai ʼo ni ʼu faigaoʼi ʼi te pogipogi uhu fuli pe, ʼaki taku mole fakaʼaogaʼi tuʼumaʼu te ascenseur, pea ʼaki taku ʼalu ʼaē ʼo haʼele ʼi te ʼu temi ʼaē feala ai, tāfito la ʼi te fai faka mafola.”
Tokolahi ia nātou ʼaē neʼe kua nātou maʼuʼuli ʼi te Petele ʼe nātou tonu tahi anai mo Anny. ʼE mole pe he temi ʼe nātou tāʼofi ai tanatou ako, ʼe mole pe he temi ʼe nātou tāʼofi ai tanatou gāue. Ke nātou hāo mai te mahaki fakasino ʼe tonu ke feʼauga tonatou temi moe pea mo tanatou fai ʼaē ʼo ni ʼu faigaoʼi pea ʼe toe ʼaoga pe foki ke nātou fakapotopoto ʼi te kai pea mo te ʼinu. Pea ko te faʼahi maʼuhiga leva ʼi te ʼu faʼahi fuli pe, ʼe mole nātou meʼa noaʼi tanatou ʼu faikole takitokotahi pea mo tanatou ako faka Tohi-Tapu.
Ke Tou Fakaʼapaʼapa ʼAupito Ki Te Tauhi Maʼoniʼoni ʼi Te Petele
“ ʼE koutou gāue ʼifea?” ʼe ko he fehuʼi ia, ʼe tau fai kia nātou ʼaē ʼe gāue ʼi te Petele. ʼE kehekehe te ʼu gāue ʼaē ʼe feala ke hinoʼi he tahi kiai, kae ko te ʼu gāue fuli ʼaia ʼe tāu mo te fakaʼapaʼapa ʼa te Tēhina peʼe ko te Tuagaʼane fuli pe. Koteā tona tupuʼaga? Koteʼuhi ko te ʼu gāue fuli ʼaia—peʼe ko te gāue ʼaē ʼi te ʼu masini ʼaē ʼe nātou tā te meʼa kai fakalaumālie, peʼe ko te fai fō, peʼe ko te kuka pea mo te menasi, peʼe ko te gāue ʼaē ʼi he pilō—ʼe nātou kau ki te tauhi maʼoniʼoni. Ohage neʼe ko tona tuʼu mai ʼi ʼoluga, ko te kau Kilisitiano ʼe mole nātou fakapalatahi. ʼE nātou manatuʼi ko te ʼu gāue fuli ʼaē neʼe tonu ke fai e te kau pelepitelo pea mo te kau Levite ʼi te fale lotu, ʼi tona ʼu malaʼe peʼe ko tona ʼu fale kai, kia Sehova neʼe nātou kau fuli ki te tauhi maʼoniʼoni. Neʼe toe kau kiai mo te matehi ʼaē ʼo te ʼu manu ʼo toe feiā aipe ki te teuteuʼi ʼo te ʼu manu ki te sakilifisio, te toe fakafonu ʼo te ʼu mālama ʼaki te lolo, māʼiape la pea mo te fakamaʼa pea mo te ʼu gāue ʼaē tonu ke fai e ia ʼaē ʼe selevisi. ʼO toe feiā aipe, ko he gāue pe ʼe hinoʼi mai ʼi te Petele ʼe ko he gāue ia ʼe fakafimālie pea ʼe ko he gāue ia ʼe ʼalutahi mo te “gāue ʼaē ki te ʼAliki,” ʼe ko he pilivilesio makehe ia.—1 Kolonito 15:58.
Tou fakatokagaʼi fakanounou age muʼa he faʼahi ʼe feala ke ina fakamamaʼo tatou mai te faka maʼuhigaʼi ʼaē ʼo te “Fale ʼo te ʼAtua.” Ko te kau Kilisitiano peʼe nātou kau ki te Petele peʼe kailoa ʼe tonu ke nātou nofo fakaonoono ʼo ʼuhiga mo te mānumānu peʼe ko te fuaʼā, ʼaē “ko he meʼa popo ia ki te ʼu hui.” (Tāʼaga Lea 14:30) ʼE mole tonu ia ke mānumānu he tahi ki te ʼu pilivilesio gāue ʼa te kau Petelite. Tahi ʼaē meʼa, ʼe mole he lapalasi ʼo te fuaʼā, ʼaē ko he fua ia ʼo te kakano, ʼi te lotolotoiga ʼo te famili ʼo te Petele. Koutou talitali ʼaki he agavaivai—ʼe ko he tokoni ia ʼe ʼaoga kia ia ʼaē ʼe hage neʼe mole fakatokagaʼi ʼi te temi ʼaē neʼe foaki ai ni ʼu pilivilesio maʼuhiga ki niʼihi age. Ko te tahi ʼaē faʼahi ʼe maʼuhiga, ko te ʼu hahaʼi ʼaē ʼe maʼuʼuli fakatahi ʼi te Petele ʼe mole tatau tonatou ʼu ʼaluʼaga ʼi te faʼahi ʼo te paʼaga. ʼI meʼa faka lotovaivai foki mokā fakasiosio he tahi tona ʼaluʼaga “ ʼo fakatatau ki te ʼaluʼaga ʼo he tahi kehe”! Ko tanatou fakafeauga pe ʼaē ʼi te “meʼa kai pea mo te mutuʼi kofu” neʼe tokoni ki te tokolahi ke nātou haga gāue agatonu lolotoga ni ʼu taʼu ʼe lauʼi hogofulu ʼi te “Fale ʼo te ʼAtua.”—Kalate 5:20, 26; 6:4; 1 Timoteo 6:8.
Ko te kau Fakamoʼoni ʼa Sehova pea mo te tahi age toko miliona hahaʼi ʼe nātou maʼu te ʼu tapuakina lahi ʼi te gāue ʼaē ʼe nātou fai ʼaki he lotolelei ʼi te Petele—ko he gāue ʼe fai ʼaki he ʼofa ʼe mole fakatalitali ki he toe liufaki age kae ʼe fai pe ʼaki te ʼofa ʼaē ki te ʼAtua pea mo te kāiga. Ko te ʼu Petele pea mo te ʼu fale tā tohi ʼo te Sosiete Watch Tower, ʼo toe feiā aipe ki te tahi age ʼu fakatuʼutuʼu faka teokalatike ʼe faka fealagia e te ʼu meʼa ʼofa ʼaē neʼe foaki ʼaki he lotolelei. (2 Kolonito 9:7) Ohage ko te Hau ko Tavite pea mo te tahi age ʼu hahaʼi ʼaliki pea mo pule ʼo Iselaele, ʼe feala ke tou fakahā tatatou faka maʼuhigaʼi pea mo tatatou leleiʼia te “Fale ʼo te ʼAtua” ʼaki hatatou lagolago ki te Sosiete ʼi te faʼahi ʼo te ʼu aga ʼaē ʼe tonu ke fai pea mo te faʼahi ʼo te falā. (1 Fakamatala 29:3-7) ʼI te temi nei tou vakaʼi age muʼa peʼe lava feafeaʼi hatatou “sio mata ki te matalelei ʼo Sehova” ʼi te Petele.
Ko Te ʼu Tapuakina ʼi Te “Fale ʼo Te ʼAtua”
ʼI takotou kau ki he fakatahi, ʼe koutou logoʼi koa he toe fiafia, ʼi te hahaʼi ʼa te ʼu kaugana fiafia ʼa Sehova? Koutou fakakaukauʼi age muʼa, ko he Tēhina peʼe ko he Tuagaʼane ʼe gāue ʼi te Petele ʼe ina maʼu te pilivilesio ʼaē ko te gāue mo ni ʼu Tēhina ʼi te ʼaho fuli pe! (Pesalemo 26:12) ʼI faigamālie lelei ʼaupito foki ki te tuputupu ʼi te faʼahi fakalaumālie! Neʼe ʼui e te Tēhina, ʼi te taʼu pe e tahi ʼi te Petele neʼe lahi age te ʼu meʼa ʼaē neʼe ina ako ʼo ʼuhiga mo ia ʼi te ʼu meʼa ʼaē neʼe ina ako ia taʼu e tolu ʼi tuʼa. Koteā tona tupuʼaga? He neʼe mole ʼi ai he tahi age koga meʼa ʼe feala ke ina faʼifaʼitakiʼi ai te tui ʼa te kau Kilisitiano kua aga fakalalahi.—Tāʼaga Lea 13:20.
ʼI te Petele ʼe maʼu e te Tēhina peʼe ko te Tuagaʼane te ʼu hahaʼi fai tokoni ʼe kua nātou māhani ki te ʼu ʼaluʼaga ʼo te maʼuli. Pea ko te tahi ʼaē meʼa, ʼe kita maʼu ai te fealagia ʼaē ke kita fagono ki ni ʼu tali peʼe ko ni ʼu palapalalau neʼe teuteuʼi lelei, mokā fai te fono ʼo te pogipogi uhu pea ʼi te temi ʼaē teuteuʼi ai e te famili ʼo te Petele ia Te Tule Leʼo pea mo nātou fagono ai ki te ʼu akonaki ʼaē ʼe fai ʼi te ʼu afiafi fuli ʼo te Mōnite. Ko nātou ʼaē ʼe foʼofoʼou ʼi te Petele, ʼe akoʼi ia nātou ki te Ako ʼaē ʼe ina Teuteuʼi nātou ki te maʼuli ʼo te Petele pea ʼe fakamaʼua age ke nātou lau te Tohi-Tapu katoa ʼi tanatou ʼuluaki taʼu.
ʼE ko he fakaloto mālohi kia nātou te ʼu fakamatala pea mo te ʼu meʼa neʼe hoko ki te ʼu hahaʼi ʼe ʼōmai ʼo mamata. Tahi ʼaē meʼa, ko te ʼu Tēhina ʼo te Kolesi Pule peʼe ko ʼonatou ʼu fakafofoga ʼe nātou fai te ʼu ʼaʼahi ki te ʼu filiale. “Logope la te lahi ʼo tanatou gāue,” ʼe fakatokagaʼi e Helga, “ko te ʼu Tēhina ʼe nātou maʼu aipe he kiʼi moʼi temi moʼo fai ʼo ni ʼu palalau ʼe fakatupu fiafia peʼe ko hanatou malimali pe.” ʼI meʼa fakaloto mālohi foki hakita sio mata ki te agalelei pea mo te agavaivai ʼa te taʼi tagata ʼaia!
Tāfito la ʼi te Petele ʼe feala ki he tahi ke sio mata peʼe feafeaʼi te gāue ʼa te kautahi ʼa te ʼAtua peʼe feafeaʼi te haga ʼa te laumālie maʼoniʼoni ʼo uga te ʼu lotolelei pea mo te ʼu nima ki te faʼa gāue. “ ʼI te Petele e kita logoʼi takita ōvi ʼaupito ki te faʼahi maʼuhiga ʼo te gāue,” ko te ʼui ʼaia ʼa te Tēhina, ʼe gāue ʼi te Petele ʼo Falani talu mai te taʼu 1949. ʼO ina toe hoko atu: “ ʼE feala pe ke ʼau ʼui fakahagatonu, ʼi taku manatu ko te Petele ʼe ko te faʼahiga selevisi katoa ʼaia ʼaē ʼe ina faka fealagia mai kia ʼau ke ʼau foaki te temi pea mo te mālohi ʼaē ʼe ʼau lavaʼi ki te gāue ʼa Sehova pea mo te tokoni ʼaē ki te ʼu tuʼuga Tēhina.” Pea ʼe mole koa la ko tatatou fakatuʼutuʼu ʼaia ʼo ʼuhiga mo te maʼuli—ko te fai ʼaē ʼo te finegalo ʼo te ʼAtua? ʼI te Petele ʼe feala ki he tahi ke ina “foaki he ʼu fakavikiviki” ʼi te ʼaho katoa! ʼI tapuakina lahi foki!—Pesalemo 44:8.
Ohage ko te meʼa ʼaē neʼe tou vakaʼi, ko he tahi ʼe gāue ʼi te Petele ʼe feala ke sio mata ki te matalelei ʼo Sehova pea mo ina maʼu ai he tuʼuga tapuakina. (Hepeleo 6:10) Ko te selevisi ʼaē ʼi te “Fale ʼo te ʼAtua” ʼe tāu koa mo koutou? Ko nātou ʼi te kau Fakamoʼoni ʼa Sehova ʼaē kua taʼu 19, ʼaē ʼe aga fakalaumālie pea mo mālohi, ohage ko Timoteo, ʼe “lelei te talanoa ʼo ʼuhiga mo nātou” ʼe feala ke nātou kole ke nātou hū ʼo gāue ʼi te Petele. (Gāue 16:2) Tokolahi neʼe nātou fakaliliu te selevisi ʼi te Petele ko te gāue ʼaia ʼi tonatou maʼuli, ohage la ko nātou ʼaē neʼe tou talanoa ki ai ʼi te kamata ʼo te alatike. Kia nātou ʼaia ko te holi mālohi ʼa te tagata fai pesalemo ʼaē—ke ‘nofo ʼi te Fale ʼo Sehova ʼi te ʼu ʼaho fuli pe ʼo tona maʼuli’—kua liliu ia ko he meʼa ʼe moʼoni.
Ko te kau Fakamoʼoni ʼa Sehova ʼe nātou fakaʼapaʼapa ʼaupito ki te manatu faka sakilifisio ʼo tonatou ʼu Tēhina mo Tuagaʼane Petelite, ʼaē ʼe nātou fakahoko tonatou ʼu maʼua ʼaki he lotolelei pea mo he loto fiafia. Tatau aipe peʼe tou kaugana kia Sehova ʼi te Petele peʼe kailoa, ko tatou fuli ʼe tonu ke tou manatu ohage ko te Hau ko Tavite—Ke tou faka maʼuhigaʼi, mo tou loto fakafetaʼi pea mo tou fiafia ʼi te “Fale ʼo te ʼAtua.”
[Paki ʼo te pasina 31]
Ko te kau Kilisitiano ʼaia neʼe nātou fiafia ʼi te selevisi maʼoniʼoni lolotoga ni ʼu taʼu ʼe lauʼi hogofulu ʼi te Petele ʼo Siamani