ʼE Koutou Fealagia Koa?
1 Neʼe hoko te meʼa fakaofoofo ʼi te taʼu 778 ʼi muʼa ʼo totatou temi. Neʼe sio ia te polofeta ko Isaia kia “Sehova ʼe heka ʼi te hekaʼaga hau ʼe lahi pea mo māʼoluga.” Pea neʼe logo ia Isaia ki te ʼu selafimi ʼe nātou fakatokagaʼi te kolōlia ʼo Sehova, ʼo nātou ʼui fēnei: “Maʼoniʼoni, Maʼoniʼoni ia Sehova ʼo te ʼu kautau.” Neʼe lagi fakaofoofo ʼaupito te faʼahi ʼaia! ʼI te lakaga ʼaia, neʼe lagaʼi e Sehova te fehuʼi maʼuhiga: “Ko ai anai ka ʼau fekauʼi, pea mo ʼalu anai maʼa tatou?” Neʼe mole fakahā pe koteā te fekau ʼaia, peʼe koteā te fakapale ka maʼu anai e ia ʼaē ka fia ʼalu. Kae neʼe tali fakavilivili fēnei e Isaia: “Koʼeni ʼau! Fekauʼi ʼau.”—Isa. 6:1, 3, 8.
2 ʼE maʼu ʼi te hahaʼi ʼa Sehova te taʼi lotolelei ʼaia. (Pes. 110:3) Pea ʼi te temi nei ʼe fai te fakaafe makehe ki te hahaʼi ʼaē ʼe nātou fealagia ki te gāue. ʼE koutou lava tali koa ʼaki he lotolelei, ohage ko Isaia?
3 ʼE ʼaoga lahi ke ʼi ai he ʼu tēhina ke nātou gāue ʼi te Petele. ʼE maʼua kia nātou ʼaia ke nātou fia fakamuʼamuʼa te ʼu gāue ʼo te Puleʼaga, pea mo nātou fia fai te ʼu gāue kehekehe ʼaē ʼe lagolago ki te fai faka mafola ʼi te malamanei katoa. (Mat. 6:33) ʼI tona fakahagatonu, ko te gāue ʼi te Petele, ʼe ko he faigamālie makehe ʼaia ke kita tauhi kia Sehova ʼaki tokita nefesi katoa. ʼO feafeaʼi?
4 Te Gāue ʼAē ʼe Fai ʼi Te Petele: Koutou fakakaukauʼi age muʼa ki te ʼu gāue kehekehe ʼaē ʼe fai tuʼumaʼu ʼi te Petele ʼaē ʼe tuʼu ʼi Normandie. Ko te ʼu tēhina mo tuagaʼane ʼaē ʼe nātou kau ʼi te famili ʼo te Petele, ʼe nātou maʼu te pilivilesio ʼaē ke nātou gāue mo te tagata kaugana agatonu mo poto pea mo tona Kolesi Pule, moʼo fai te ʼu tohi faka Tohi-Tapu ʼaē ka fakaʼaogaʼi ʼi te faka mafola pea mo te ako takitokotahi. (Mat. 24:45) ʼE toe ʼi ai mo te ʼu meʼa gāue ʼe foaki ki te kau fakaliliu moʼo tokoni ki tanatou fakaliliu te ʼu lea e tolu: te Faka Pisilama, te Faka Lifu, pea mo te Fakaʼuvea. ʼE lahi te ʼu gāue ʼe fai moʼo takitaki te gāue ʼaē ʼe fakahoko ʼi te ʼu kokelekasio e 28 ʼo te ʼu fenua e tolu. ʼE toe fai mo te lagolago ki te Komite Laga Fale, ʼaē ʼe nātou sivi te toe fakafoʼou pea mo te laga ʼo te ʼu Fale ʼo te Puleʼaga. ʼE maʼua ke ʼi ai he ʼu tēhina mo tuagaʼane moʼo tokaga ki te momoli ʼo te ʼu tohi, te fakamaʼa, te faʼu ʼo te ʼu meʼa ʼaē ʼe mole kei haʼele, te fai ʼo te meʼa kai, te faifakatau, te lau ʼo te falā, pea mo te tahi ʼu gāue ʼi te Petele.
5 Ko te fai ʼo te ʼu gāue fuli ʼaia ʼe ko he toe gāue lahi, kae ʼe fakafiafia ʼi te faʼahi fakalaumālie. ʼE tou fiafia ʼaupito, heʼe tou ʼiloʼi ko totatou mālohi katoa ʼe fakaʼaogaʼi moʼo lagolago ki te fai faka mafola pea mo te akoʼi ʼo te hahaʼi. Ko te gāue ʼi te Petele ʼe tokoni mai kia tatou ke tou ʼiloʼi lelei ai te kautahi ʼa Sehova. ʼE tou manatuʼi te fakaloto mālohiʼi e te tagata fai pesalemo ia te kau Iselaele, ke nātou mahino lelei ki te potu tāfito ʼi te kele, ʼaē neʼe fai ai te pule faka teokalatike ʼi tonatou temi.—Pes. 48:12, 13.
6 Te ʼu Tapuakina ʼi Te Gāue ʼi Te Petele: Koteā te manatu ʼo nātou ʼaē ʼe gāue ʼi te Petele ʼo ʼuhiga mo tonatou pilivilesio ʼaia? Koutou tokagaʼi te ʼu palalau ʼaenī neʼe fai e ʼihi tūpulaga pea mo matuʼa ʼo te famili ʼo te Petele. Ko te tuagaʼane ʼo te famili ʼo te Petele kua taʼu tolu tana gāue ʼi te Petele, ʼe ina ʼui fēnei: “Neʼe mālohi age taku ʼu felogoi mo Sehova ʼi taku nofo ʼi te Petele. Talu taku nofo ʼi henī, kua lahi te ʼu meʼa ʼaē ʼe ʼau ako ʼo ʼuhiga mo te fakaʼaluʼalu ʼo te gāue ʼi te Petele, pea toe lahi mo te ʼu meʼa ʼaē ʼe ʼau ako ʼo ʼuhiga mo te ʼulugaaga ʼo Sehova. ʼI taku gāue ʼi te Petele neʼe ʼau kamata sio ai ki te fakaʼaogaʼi e Sehova tana hahaʼi—te ʼu hahaʼi kehekehe. Pea ʼe mole tonu ke tou haohaoa ke feala hana tali tatou.”
7 ʼE ʼui fēnei e te tēhina tūpulaga: “ ʼE ʼau manatuʼi neʼe ʼau fakakaukau fēnei, ‘ ʼE ko he meʼa fakafiafia anai taku hū ki te mālama foʼou pea mo fakahā ki te ʼu tagata agatonu ʼo te temi muʼa neʼe ʼau gāue ʼi ni ʼu taʼu ʼi te Petele, kae neʼe mole ʼau faiga ke ʼau maʼu koloā ʼi te mālama.’ ”
8 ʼE fakakaukau fēnei e te tēhina tūpulaga te ʼu meʼa ʼaē neʼe ina ako: “Neʼe ko he toe tapuakina lahi kia ʼau taku ʼiloʼi ia ʼau totonu, mo te ʼu faʼahi ʼaē neʼe tonu ke ʼau gāueʼi pea mo ʼau fakatuputupu te ʼu kalitate ʼaia. ʼE ʼau sio ʼi te temi nei, kua feala ke lelei age taku tauhi kia Sehova. Kua lahi age leva taku faʼa kātaki, mo taku loto lolomi, pea kua feala ke lahi age taku fakahā ia te ʼofa.”
9 ʼE ʼui fēnei e te tuagaʼane ʼo ʼuhiga mo tana ʼu tapuakina talu tana nofo ʼi te Petele: “Ko te polokalama fakalaumālie ʼi henī neʼe ina akoʼi lahi mai kia ʼau ʼo ʼuhiga mo Sehova pea mo haku lava faʼifaʼitakiʼi lelei tana ʼu manatu, te ʼu meʼa ʼaē ʼe ina logoʼi pea mo tana ʼu gāue. Pea ʼi te hoko atu pe ʼo te ʼu meʼa ʼaē ʼe ʼau ako, ʼe toe hoko atu mo te ʼu tapuakina ʼaē ʼe ʼau maʼu.”
10 Neʼe ʼui fēnei e te tēhina kua taʼu 59 tana kau ki te minisitelio temi katoa, ʼo kau kiai tona ʼu taʼu e 43 ʼi te Petele: “Ko te Petele ʼe mole hage ko he monasetelio, ohage ko te manatu ʼa ʼihi. ʼE lahi te ʼu gāue ʼaē ʼe mātou fai he kua fakatuʼutuʼu tamatou ʼu gāue. . . . ʼE mole he ʼaho ʼi taku ʼosi gāue ʼe ʼau ʼita ai ʼo ʼuhiga mo te meʼa ʼaē neʼe ʼau fai. Koteā tona tupuʼaga? Koteʼuhi mokā tou foaki totatou nefesi katoa kia Sehova, pea ʼe tou fiafia ʼi te ʼiloʼi ʼaē ‘neʼe tou fai ia mea fuape neʼe fakatotonu mai kia tatou.’ ”—Lu. 17:10.
11 Ko te tahi tēhina, kua taʼu 62 tana gāue ʼi te Petele, neʼe ina ʼui fēnei: “ ʼE ʼau tui papau ko te Petele ko te koga meʼa lelei tokotahi ʼaia ʼe feala ke tou maʼuʼuli ai ʼi muʼa ʼo te fakatuʼu ʼo te Palatiso ʼi te kele. ʼE mole ʼau fakahemala ʼi he temi ʼi taku haga fili ʼi toku maʼuli katoa te selevisi temi katoa. ʼE ko he fiafia lahi taku sio pea mo taku tokoni ki te tuputupu lahi ʼo te kautahi ʼa Sehova ʼi te kele! ʼE ʼau fakatotonu, ʼaki te tokoni ʼa Sehova, ke ʼau haga nofo ʼi te Petele pea mo foaki toku nefesi katoa moʼo fakahaʼele ki muʼa te ʼu gāue ʼo te Puleʼaga.”
12 Neʼe fakahā e te ʼu hahaʼi ʼaia ʼo te Petele ʼihi ʼi te ʼu tapuakina lahi ʼaē ʼe feala ke koutou maʼu mo kapau ʼe koutou faka fealagia ke koutou gāue ʼi te Petele. Kae ohage pe ko te ʼu pilivilesio fuli ʼo te selevisi, ʼe tonu ke koutou ʼuluaki mulimuli ki te ʼu meʼa ʼaē ʼe fakamaʼua atu. Koteā ʼihi ʼu fakamaʼua ke feala ke koutou kau ki te famili ʼo te Petele?
13 Te ʼu Fakamaʼua Ki Te Gāue ʼi Te Petele: Ko te ʼu fakamaʼua tāfito kia nātou ʼaē ʼe hū ki te Petele ʼe fakahā ʼi te kiʼi talanoa. Tahi ʼaē meʼa, ʼe maʼuhiga ke nātou faʼa gāue, ke mole nātou “manako ki te u fiafia.” (2 Tim. 3:4; 1 Ko. 13:11) Ko te famili ʼo te Petele ʼe ko he ʼu hahaʼi tagata mo fafine ʼe manatu fakalaumālie, kua nātou māhani ʼi te fai ʼo hanatou ako takitokotahi pea mo akoʼi tanatou ʼu fealagia fakakaukau ke nātou ʼiloʼi te “kehekehe o te lelei pea mo te kovi.” (Hep. 5:14) Kua tonu ke hā tonatou ʼuhiga Kilisitiano fakapotopoto ʼi te ʼu faʼahi fuli ʼo tonatou maʼuli, ʼo kau kiai tanatou faʼahiga teu, mo te faʼu ʼo te lauʼulu, pea mo te filifili ʼo te musika pea mo te fakafiafia. ʼE loto lelei te kau Petelite ke nātou gāue ʼi te faʼahi pe ʼaē ʼe feala ke nātou ʼaoga ai. ʼE tau foaki ki te kau tūpulaga te ʼu gāue ʼe tonu ke nātou mālolohi ai, ohage ko te tā ʼo te ʼu tohi, te teuteu pea mo te momoli ʼo te ʼu tohi, te faʼu ʼo te ʼu meʼa ʼaē ʼe mole kei haʼele ʼi te Petele, te fakamaʼa, te fai fō, pea mo te teuteu ʼo te meʼa kai. (Taag. 20:29) Kae ʼo mole hage ko he gāue ʼi te mālama, ʼe maʼu te fiafia ʼi te ʼu gāue fuli pe ʼaia koteʼuhi ʼe ko he tauhi taputapu ʼe faka kolōliaʼi ai ia Sehova.—Kol. 3:23.
14 Ko te temi siʼisiʼi ʼo te nofo ʼo he tahi neʼe fakaafe ki te Petele ʼe ko te taʼu katoa. ʼE feala ai ke nātou akoako ke nātou liliu ko he ʼu hahaʼi ʼe fua tanatou gāue. ʼE fakaʼamu ke liliu anai te Petele ko honatou ʼapi. ʼE ko tonatou ʼofa kia Sehova ʼaē ʼe ina uga ai te kau Petelite ke nātou fakamuʼamuʼa ia te Puleʼaga ʼi te ʼu meʼa ʼaē ʼe nātou loto kiai pea ʼe fiafia ai Sehova.—Mat. 16:24.
15 Te ʼu Meʼa ʼAē ʼe ʼAoga Kiai ʼi Te Temi Nei: ʼUhi ko te gāue ʼaē ʼe fai ʼi te Petele, koia ʼe ʼaoga tāfito ʼi te temi nei he ʼu tēhina selipatea. Logola ʼe mole kau ki te ʼu meʼa ʼaē ʼe fakamaʼua, kae ʼe leleiʼia age ia nātou ʼaē kua pionie katoa, heʼe kua nātou kau ki te selevisi temi katoa. ʼI ʼihi temi ʼe foaki te fealagia ʼaia ki te ʼu tuagaʼane selipatea pea mo te ʼu taumatuʼa, mai te taʼu 19 ki te 35, kua nātou faiva ʼi he faʼahiga gāue ʼe ʼaoga ki te Petele. Tahi ʼaē meʼa, ko ʼihi tēhina mo tuagaʼane ʼaē kua fakalaka ʼi te taʼu 35 pea mo nātou popoto ʼi he faʼahiga gāue ʼe feala ke ʼaoga ki te Petele, ʼe fakaloto mālohi ia nātou ʼaia ke nātou tohi he pepa. Ohage la ʼe kau kiai he ʼu hahaʼi poto ʼi te lau ʼo te falā, mo fai kuka pea mo fai hila, pea mo te tahi atu ʼu gāue. Kae ʼe mole fakaloto mālohiʼi te kau tūpulaga ke nātou maʼu pepa ʼi he faʼahiga gāue ʼaki te manatu ʼaē ʼe feala anai ke tali nātou ʼi te Petele. Ko nātou ʼaē kua popoto ʼi he gāue, lagi ʼi muʼa ʼo tanatou hū ki te moʼoni, ʼe feala ke nātou tohi te ʼu ako ʼaē neʼe nātou fai pea mo nātou fakapipiki tahi mo tanatou pepa kole ʼaē ke hū ki te Petele.
16 Kapau ʼe koutou tohi hakotou pepa pea mole fakaafe koutou ke koutou gāue ʼi te Petele, pea ʼaua naʼa koutou lotovaivai. ʼE feala ke koutou toe fai hakotou kole tuʼa tahi ʼi te taʼu fuli. Ko ʼihi tēhina ʼe popoto ʼi te faʼahiga gāue neʼe ʼaoga kiai ʼi te Petele, neʼe nātou faka fealagia ke nātou gāue faka temi ʼi te Petele. Neʼe nātou kole ke nātou gāue faka temi ʼi te Petele lolotoga te vāhaʼa e tahi, lua, tolu peʼe fā peʼe laka atu ia māhina e tolu. Ko te tēhina sikalaipe ʼo te kokelekasio ʼe nofo mo te ʼu pepa ʼo ʼuhiga mo te gāue faka temi maʼa nātou ʼaē ʼe nātou fia tokoni feiā. Ko te kole ʼo he tahi ʼu pepa feiā ʼo ʼuhiga mo te gāue faka temi ʼe feala ke tohi ʼi te Pepa Fakaʼui Tohi.
17 Ko te tauhi kia Sehova fakatahi mo te ʼu tēhina ʼo Kilisito ʼe ko te pilivilesio makehe ʼaia ʼe maʼu e nātou ʼaē ʼe gāue ʼi te Petele. ʼE leleiʼia e te Kolesi Pule te loto faka sakilifisio ʼo nātou fuli ʼaē ʼe nātou faka fealagia ia nātou ke feala hanatou tauhi ki te ʼu meʼa ʼaē ʼe ʼaoga ki totatou fale tautēhina ʼi te malamanei katoa.—Filp. 2:20-22; 2 Tim. 4:11.
18 Kau Tūpulaga—Koutou Teuteu Nei Ki Te Gāue ʼi Te Petele: Ko te teuteu ki te gāue ʼi te Petele ʼe kamata fualoa ʼi muʼa ʼo te aʼu ki te taʼu 19. Koteā ʼaē ʼe feala ke fai e te kau tūpulaga moʼo teuteu ki te gāue ʼi te Petele? Neʼe ʼui fēnei e Sesu: “Ko ai ae ia koutou, e loto ke ina fakatuu he tule, pe e mole nofo ifo muà o vakai tona totogi.” (Lu. 14:28) Mai tona ʼaluʼaga ʼaē ʼe maʼuhiga ke teuteu lelei pea mo fai he ʼu fakatuʼutuʼu ke lava ai te laga ʼo he fale, ʼe toe maʼuhiga ki te kau tūpulaga ke nātou vakaʼi fakalelei peʼe lava feafeaʼi hanatou fakatuʼu tonatou ka haʼu ʼi te tauhi ʼaē kia Sehova! ʼE tonu ke fakatuʼu talu mai te kamata he tafitoʼaga mālohi ke feala hanatou fakahoko te ʼu fakatuʼutuʼu fakalaumālie. ʼU tūpulaga, ʼe lelei feafeaʼi takotou fakatuʼu ʼaē ʼo tokotou tafitoʼaga? Kapau ʼe koutou fia gāue ʼi te Petele pea ʼe lelei anai ke koutou tokaga fakalelei ki te ʼu meʼa ʼaē ʼe hoa mai.
19 “Tuku Ke Hoko” Kia Koutou Te Pilivilesio Makehe ʼAia: Ohage ko tona tuʼu ia Mateo 19:12 (MN ), neʼe fakaloto mālohiʼi e Sesu tana kau tisipulo ke nātou “tuku ke hoko te meʼa ʼaia” ʼo ʼuhiga mo te maʼuli faka selipatea. Koteā tona tupuʼaga? Ke mole nātou fakamuʼamuʼa te ʼu meʼa ʼaē ʼe nātou loto kiai “ ʼuhi ko te puleʼaga ʼo selo, MN.” Neʼe toe fakaloto mālohi e Paulo te maʼuli ʼaia ke feala hanatou “tauhi tuʼumaʼu ki te ʼAliki, ʼo mole fakalelu.” (1 Ko. 7:32-35) Meʼa fakaʼofaʼofa foki, he neʼe mole maʼu e ʼihi te pilivilesio ke nātou ḡaue ʼi tonatou temi selipatea ʼi te Petele he neʼe nātou faiga ke nātou ʼohoana tautonu. ʼE tou fia fakaloto mālohiʼi totatou ʼu tēhina tūpulaga ke nātou fakaʼaogaʼi tonatou mālohi moʼo gāue ʼi te minisitelio temi katoa, he mole heʼeki ai honatou ʼu maʼua faka famili. Pea hili he temi kapau ʼe nātou fia ʼohoana, pea ʼe ko he ʼu tagata ʼohoana lelei anai he kua lahi te ʼu meʼa kua nātou ʼiloʼi ʼi te maʼuli pea mo te minisitelio Kilisitiano. Hili tanatou gāue lolotoga ni ʼu taʼu ʼi te Petele, neʼe ʼohoana ʼihi pea neʼe feala ke hoko atu e te taumatuʼa ʼaia tanā gāue ʼi ai. Kapau ki muli age ʼe nātou maʼu he tahi ʼu pilivilesio, ohage ko te gāue taupau feʼaluʼaki peʼe nātou misionea, pea ʼe mahino ia ʼe mole nātou fakahemala ʼi tanatou fakaʼaogaʼi he temi ki te gāue ʼi te Petele.
20 ʼAua Naʼa Fakaleluʼi Koutou e Te Kumi ʼo Te ʼu Koloā: ʼE lelei ke tahi fai e te kau tūpulaga te fehuʼi ʼaenī: ‘ ʼE ʼau fakatuʼutuʼu koa ʼi te hili ʼo taku maʼu pepa ʼi te faleako ke ʼau kumi he gāue temi katoa peʼe ke ʼau tauhi kia Sehova temi katoa?’ ʼE moʼoni, ko te fakatuʼutuʼu ʼaē ke tauhi kia Sehova ʼe fakamaʼua ke koutou fai he ʼu sakilifisio. Kae ʼe toe feiā anai mo kapau ʼe koutou fili ke koutou maʼu hakotou gāue ʼi te mālama! Ki ʼamuli, ʼe ko te fakatuʼutuʼu fea ʼaē ʼe maʼu moʼoni ai anai he fua ʼe tologa pea mo ʼaoga? Neʼe tali fakalelei kiai e Sesu. Ohage ko tona tuʼu ia Mateo 6:19-21, neʼe ina ʼui fēnei: “Aua naa koutou tanaki he u koloa maʼa koutou i te kelekele, e maumaui ia e te ane mo te ukaukamea, pea e foa e te tagata kaihaa te kaupa o kaihaʼasia. Kae, koutou tanaki he u koloa maʼa koutou i Selo, i ai, e mole maumaui e te ane mo te ukaukamea, pea i ai e mole foa e te tagata kaihaa te matapa pea e mole ina kaihaʼa ia. He ko te faahi anai e i ai tou koloa, pea e i ai mo tou loto.” ʼOfa pe ke mole taki tatou e totatou loto ke tou fia maʼu tuʼulaga ʼi te mālama peʼe ko he ʼu koloā, ʼo mole tou tauhi ai kia Sehova ʼaki totatou loto katoa. Ko tatou fuli ʼe tou fakamoʼoni ko te fakatuʼutuʼu maʼuhiga pe e tahi ʼaē ʼe tonu ke tou kumi, ʼe ko te ʼu felogoi lelei mo Sehova, ke tou fakafiafia ai tona loto. (Taag. 27:11) Kapau ʼe tou fakamuʼamuʼa ia Sehova ʼi totatou maʼuli ʼi tatatou kei tūpulaga, pea ʼe tou fakahā ai te ʼu meʼa ʼaē ʼe maʼuhiga kia tatou, pea mo te maʼuhiga ʼo te Puleʼaga kia tatou. Koutou manatuʼi, “ko te tapuakina ʼa Sehova—koʼena te meʼa ʼaē ʼe ina fakakoloaʼia, pea ʼe mole maʼu ai he mamahi.” (Taag. 10:22) ʼE maʼu e te kau tūpulaga te fealagia lelei ʼaē ke nātou fakahā te faʼahi ʼaē ʼe ʼi ai tonatou loto, ʼo nātou toe liufaki he meʼa lelei kia Sehova ʼuhi ko te ʼu meʼa fuli ʼaē neʼe ina foaki mai. ʼE foaki e te gāue ʼi te Petele te fealagia fakaofoofo ʼaia kia nātou ʼaē ʼe nātou lavaʼi.
21 Ke Maʼa Te Aga ʼo Nātou ʼAē ʼi Te Petele: Neʼe kole fēnei e te tagata fai pesalemo: “ ʼE lava feafeaʼi anai ki he tūpulaga ke ina fakamaʼa tona ala?” Neʼe ina tali fēnei: “Kapau ʼe nofo tokaga ʼo mulimuli ki [te] folafola [ʼa Sehova].” (Pes. 119:9) Ko tona faka ʼuhiga ʼaē ke tekeʼi ia meʼa fuli pe ʼe pipiki ki te tuʼu ʼo te ʼu faʼahiga meʼa aga heʼeʼaoga ʼa Satana. Ko te ʼu paki heʼeʼaoga ʼi te Internet, ko he aga heʼeʼaoga mo he ʼu hahaʼi fafine peʼe tagata, te ʼu musika pea mo te ʼu fakafiafia kovi, pea mo te inu kava kae mole heʼeki taʼu 18, ʼe ko ʼihi ʼu hele ʼaia ʼe fakaʼaogaʼi e Satana moʼo tāʼofi te kau tūpulaga ke ʼaua naʼa nātou fakahoko he ʼu fakatuʼutuʼu fakalaumālie. ʼE tonu ke maʼu he mālohi lahi moʼo tauʼi te ʼu fakahala ʼaia. Kapau ʼi tokotou ʼuhiga tūpulaga ʼe koutou fai he meʼa ʼi te ʼu meʼa ʼaia, pea koutou palalau ki te kau tagata ʼāfea ʼo tokotou kokelekasio pea koutou fakatokatoka te ʼu faʼahi ʼaia ʼi muʼa ʼo takotou kole ke koutou gāue ʼi te Petele. ʼE maʼuhiga ke kita maʼu he leʼo ʼo loto ʼe maʼa ke kita tauhi katoa ai kia Sehova.—1 Tim. 1:5.
22 Koutou Felogoi Lelei Mo Te Hahaʼi: Ko te faʼahi maʼuhiga ke lelei ai tatatou gāue ʼi te Petele ʼe ko te ako ʼaē ke tou felogoi lelei mo te hahaʼi. ʼE tou maʼu ʼi te famili ʼo te Petele ʼo Niu Kaletonia te ʼu tēhina mo tuagaʼane mai te ʼu faʼahiga maʼuli kehekehe. Logola ʼe kau te kehekehe ʼaia ʼo te ʼu ʼulugaaga ki te matalelei ʼo te Petele, kae ʼi ʼihi temi ʼe feala pe foki ke hoko he ʼu faigataʼaʼia. Kapau ʼe koutou fia hū ki te Petele, pea ʼe lelei ke koutou fai te ʼu fehuʼi ʼaenī: ‘ ʼE ʼau ʼita vave koa mokā mole manatu tahi ʼihi mo ʼau? ʼE faigafua kua ki ʼihi ke nātou felogoi lelei mo ʼau?’ Kapau ʼe tonu ke hikihiki te ʼu faʼahi ʼaia, pea koutou kamata gāue atu nei kiai. Ko takotou fai feiā ʼe tokoni anai kia koutou ke faigafua age takotou fetogi ke feala hakotou maʼuli pea mo gāue tahi mo te famili ʼo te Petele.
23 Koutou faiga ʼaupito ke koutou liliu ko he tahi ʼe manatu fakalaumālie, ʼo koutou felogoi lelei mo Sehova. Koutou fai hakotou polokalama ako takitokotahi, ʼaē ʼe kau kiai te lau ʼo te Tohi-Tapu ʼi te ʼaho fuli. Koutou kau lahi ki te vaevae ʼo te logo lelei ki te hahaʼi. Kapau ʼe koutou maʼuliʼi te ʼu meʼa ʼaia, pea ʼe hā ai anai takotou tuputupu ʼi te faʼahi fakalaumālie. (1 Tim. 4:15) Ko he ʼu tapuakina fakatalakitupua anai ka maʼu e nātou ʼaē ʼe nātou teuteu ʼi te temi nei ke nātou hū ki te selevisi temi katoa!
24 ʼU Mātuʼa, Koutou Akoʼi Takotou ʼu Fānau: Koteā ʼaē ʼe feala ke fai e te ʼu mātuʼa moʼo fakaloto mālohiʼi te kau tūpulaga ke nātou kau ki te minisitelio temi katoa? Neʼe ʼui fēnei e Sesu: “Ko te tagata fuape nee katoa tona fakaʼako e hage anai ko tona aliki.” (Lu. 6:40) Ko he tahi neʼe akoʼi fakalelei ʼe ina fia fakahā te ʼu kalitate ʼo tona tagata peʼe fafine faiako. ʼE tonu ke manatuʼi e te ʼu mātuʼa te pelesepeto ʼaia, ʼi tanatou faiga lahi ke nātou akoʼi tanatou fānau “ki te mauli fakalotu.” (1 Tim. 4:7) Mai tona ʼaluʼaga ʼaē ʼe faʼifaʼitakiʼi e te fānau te manatu ʼo tanatou ʼu mātuʼa ki te ʼu meʼa fakalaumālie, koia ʼe lelei ke feʼekeʼaki fēnei e te ʼu mātuʼa: ‘ ʼE maʼuhiga koa kia tāua te gāue ʼaē ʼe fai ʼi te Petele ke haʼele ki muʼa te ʼu gāue ʼo te tauhi moʼoni ʼa Sehova? ʼE tā fakamoʼoni koa ki te tapuakina e Sehova ia te Petele? ʼE tā tui papau koa ko te maʼuli ʼi te selevisi ʼo Sehova ʼe ko te gāue lelei tokotahi ʼaia ke fili e tatā fānau?’ Ko tatatou leleiʼia te Petele pea mo te gāue ʼaē ʼe fai ai ʼe tokoni anai ke toe leleiʼia e tatatou ʼu fānau te Petele.
25 Neʼe loto fakafetaʼi lahi ia Elekana pea mo Ana ki te tauhi moʼoni. Neʼe nā tuku te faʼifaʼitaki lelei ki te ʼu mātuʼa Kilisitiano ia ʼaho nei. ʼI te Iselaele ʼāfea, neʼe fakamaʼua pe ki te hahaʼi tagata ke nātou “hā ia muʼa ʼo te ʼAliki moʼoni, ko Sehova,” tuʼa tolu ʼi te taʼu ʼi te tapenakulo. Kae neʼe fagona lalo ia Elekana ia kilometa e 30, mo tona famili katoa “ ʼi te taʼu fuli” moʼo fai sakilifisio ʼi te potu ʼaē neʼe fai ai te tauhi kia Sehova. (Ek. 23:17; 1 Sam. 1:3, 4, 9, 19; 2:19) ʼE ʼasi mai ai neʼe loto e te pule famili ʼaia ke toe tokaga feiā tona famili katoa ki te ʼu meʼa fakalaumālie.
26 Ohage ko tona ʼohoana, neʼe toe leleiʼia e Ana te tauhi moʼoni. Neʼe ina ʼiloʼi tona maʼua ʼaē ke tokoni ki te lagolago ʼo te tauhi moʼoni ʼi te tapenakulo. Neʼe fakapapau e Ana kapau ʼe foaki age e Sehova hana tama, pea ʼe ina foaki anai ia ia ke tauhi ʼi te tapenakulo. (1 Sam. 1:11) Neʼe fakagafua e te Lao Faka Moisese ki te tagata ʼohoana ke ina molehi he fakapapau neʼe fai e tona ʼohoana kae neʼe mole mata feʼauga. (Fkma. 30:6-8) Kae ʼe hā mai neʼe leleiʼia e Elekana te fakapapau ʼa Ana, ʼo hā ai neʼe toe lagolago mo ia ki te gāue ʼaia ʼo te tauhi moʼoni!—1 Sam. 1:22, 23.
27 Neʼe malave lelei koa kia Samuele te loto fakafetaʼi pea mo te manatu lelei ʼaē neʼe fakahā e tana ʼu mātuʼa? Ei. ʼI tana kei tūpulaga, neʼe fakahoko e Samuele tana ʼu gāue ʼaki he lotolelei pea mo agatonu, pea neʼe ako ki te tahi atu ʼu pilivilesio maʼuhiga ʼi te tauhi ki te ʼAtua. Ko te tokaga ʼaē neʼe fakahā e Elekana pea mo Ana ʼo ʼuhiga mo te tauhi ʼa Samuele ʼi te tapenakulo, neʼe mole gata ʼi tana ʼosi gāue ai. Neʼe hoko atu tanā ʼaʼahi ia ia moʼo fakaloto mālohiʼi pea mo lagolago kia ia ʼi tana gāue temi katoa ʼaia.—1 Sam. 2:18, 19.
28 ʼE ko he faʼifaʼitaki lelei ʼaupito neʼe tuku e Elekana pea mo Ana ki te ʼu mātuʼa Kilisitiano ʼo te temi nei! Ka logo tatatou ʼu fānau ki tatatou palalau lelei ʼo ʼuhiga mo te pilivilesio ʼo te gāue ʼi te Petele pea mo nātou sio ki te loto faka sakilifisio ʼaē ʼe tou fakahā moʼo fakahaʼele ki muʼa te ʼu gāue ʼo te Puleʼaga, pea ʼe nātou loto anai mo nātou ke nātou tauhi ki te hahaʼi. Neʼe fua lelei ki te ʼu mātuʼa ʼe tokolahi tanatou fakahū ki tanatou fānau te manatu lelei ʼaia. Neʼe tohi fēnei e te taʼahine taʼu fitu: “Ka ʼau lahi anai, pea ʼe ʼau fia hū ki te Petele, pea ʼe ʼau fiafia anai ʼi te fai ʼo te ʼu gāue ʼaenī ʼi ai: (1) Ko te tā ʼo te ʼu nusipepa Te Tule Leʼo pea mo te Réveillez-vous !, (2) peʼe ʼau gāue ʼi te faʼahi ʼo te pena peʼe ko te tohi ʼo te ʼu paki, (3) te fetuʼi fō. Ko he gāue pe ʼe feala ke ʼau fai, ʼe lelei pe kia ʼau.” ʼE fiafia ai totatou loto ʼi tatatou sio ki te tuputupu ʼo te manatu fia foaki ʼaia ʼi te loto ʼo tatatou fānau!
29 ʼU tūpulaga, koutou manatuʼi “e fakamole te malama-nei mo tana u holi; kae kia ia ae e ina fai te finegalo o te Atua e mauli o talu ai.” (1 Soa. 2:17) Koutou haga fai hakotou ʼu fakatuʼutuʼu fakalaumālie, ʼo kau kiai te pilivilesio ʼaē ko te gāue ʼi te Petele. ʼU mātuʼa, koutou faʼifaʼitakiʼi te hahaʼi ʼaē ʼi te temi muʼa neʼe nātou fakaloto mālohiʼi tanatou fānau ke nātou pipiki ki te ʼAtua. (2 Pet. 3:11) Pea ʼofa pe ke tou lagolago fuli ki totatou ʼu tēhina mo tuagaʼane tūpulaga ke lahi age tanatou tauhi ki totatou Tupuʼaga Lahi, heʼe maʼu e te faʼahi ʼaia “te fakapapau o te mauli, o te mauli nei pea mo te mauli kahau.”—1 Tim. 4:8; Taag. 12:1.
[Talanoa ʼo te pasina 4]
Te ʼu Fakamaʼua Tāfito Ke Hū Ki Te Petele
● Kua teitei taʼu katoa tana papitema
● Ko he tahi ʼe manatu fakalaumālie mo ʼofa lahi kia Sehova pea mo tona kautahi
● Ke mālohi ʼi te faʼahi fakalaumālie, ʼi tona fakakaukau, mo te ʼu meʼa ʼi tona loto, pea mo te faʼahi fakasino
● Ke fakamoʼoni e te lao ʼe maʼuli ʼi Niu Kaletonia
● Ke poto lautohi, mo faitohi, pea mo palalau lelei ʼi te Fakafalani
● Ke taʼu 19 ki te 35