Ko Te Ako ʼe ʼi Ai Tona Ikuʼaga

“Tala te mālama ki ʼaē ʼe faitotonu, pea ʼe tuputupu anai ʼi te poto.” — Tāʼaga Lea 9:9.

1. ʼO ʼuhiga mo te mālama, koteā te loto ʼa Sehova ʼo ʼuhiga mo tana kau kaugana?

KO SEHOVA ʼe ko te “ ʼAtua ʼo te mālama”. (1 Samuele 2:3.) ʼE ina ako tana ʼu kaugana. Neʼe fakakikite e Moisese ko te hahaʼi ʼo tona temi ʼe nātou ʼui fēnei anai ʼo ʼuhiga mo Iselaele: “Ko te fenua lahi ʼaenī ko he hahaʼi ʼe popoto moʼoni ia pea mo ʼatamai.” (Teutalonome 4:6). ʼO toe feiā aipe mo te ʼu kilisitiano moʼoni ʼe tonu anai ke nātou maʼu he mālama. ʼE tonu ke nātou ako tuʼumaʼu te Folafola ʼa te ʼAtua. ʼO ʼuhiga mo te ikuʼaga ʼo te ako ʼaia, neʼe fēnei te tohi ʼa te ʼapositolo ko Paulo: “ ʼE mole gata tamatou faikole maʼa koutou pea mo kole ke koutou fonu ʼi te mālama totonu ʼo tona finegalo, ʼi te poto feiā aipe mo te ʼatamai fakalaumālie, ke mata feʼauga takotou haʼele mo Sehova, ke koutou lelei ʼaupito kia ia, ʼi takotou haga ʼamo aipe he fua ʼi te gāue lelei fuli pea mo tuputupu ʼi te mālama totonu ʼa te ʼAtua.” — Kolose 1:9, 10.

2. a) Koteā ʼaē ʼe maʼuhiga ke maʼu ai te mālama totonu ki te ʼAtua? b) Koteā te fakatuʼutuʼu neʼe fai e te Kolesi pule ʼa te kau Fakamoʼoni ʼa Sehova ki te faʼahi ʼaia?

² Ke maʼu he mālama totonu ki te ʼAtua pea mo tana ʼu fakatuʼutuʼu, ʼe tonu ke maʼu he faʼahiga ako. Kae tokolahi ia nātou ʼaē neʼe nātou ako te moʼoni ʼo te Folafola ʼa te ʼAtua neʼe nātou maʼuʼuli ʼi te ʼu fenua ʼe veliveli ai te fealagia ʼo hanatou maʼu he ako fakalelei. Neʼe mole nātou maʼu he faigamalie. Moʼo fakatokatoka te fihifihia ʼaia, ko te Kolesi pule ʼa te kau Fakamoʼoni ʼa Sehova neʼe ina fai te ʼu ako ʼi te ʼu kokelekasio ʼaē ʼe ʼaoga ki ai te lautohi feiā mo te faitohi. Kua hili nei ki ai taʼu e 30, ko te sulunale faka pelesile ko te Diário de Mogi neʼe ina ta te alatike ʼe kupu “Ko te kau Fakamoʼoni ʼa Sehova ʼe nātou tauʼi te mole poto lautohi feiā aipe mo te faitohi”. ʼE ina tala fēnei: “Ko te tagata faiako kua māhani ʼe faʼa kataki aipe ʼo ako ʼihi ki te lautohi pea mo te faitohi (...). ʼI tanatou fia gāue ʼaē ko te kau minisi ʼa te ʼAtua, ʼe tonu ke maʼu e te kau ako ʼaia he mālama ʼi te lea ke feala hanatou fai he ʼu akonaki.” Ko te toko lauʼi afe hahaʼi ʼi te kele katoa kua fealagia tanatou liliu ko he kau ako lelei ʼo te Tohi-Tapu. ʼI tanatou fai te ako ʼaia, ʼe nātou fakakaukauʼi ʼi tonatou ʼatamai te ikuʼaga maʼuhiga.

Te ʼu kalitate ʼaoga ke liliu ai ko te kau minisi faiva

3, 4. a) He koʼe koa ʼe tokaga te kau kilisitiano moʼoni ki te ako? b) Neʼe feafeaʼi te ʼaluʼaga ʼi Iselaele, pea koteā te kiʼi ako ʼaē ʼe ʼaoga ʼi ʼatatou ʼu kokelekasio ʼo te temi nei?

³ Ko te kau kilisitiano moʼoni ʼe mole nātou kau pe ki te ako ʼaia ʼuhi pe ke nātou ʼiloʼi he ʼu meʼa, kae ke nātou liliu ʼaki te ako ʼaia ko he ʼu kaugana faiva ʼa Sehova. Neʼe foaki e Kilisito ki te kau kilisitiano fuli te gāue ʼaenī: “Koutou fai he kau tisipulo ʼi te hahaʼi ʼo te fenua fuli pe, (...) ʼo koutou akonakiʼi ia nātou ke nātou taupau te ʼu meʼa fuli pe neʼe ʼau fakatotonu atu.” (Mateo 28:19, 20). Ke nātou akoʼi niʼihi, ʼe tonu muʼa ke nātou ako, pea ʼe ko he meʼa ia ʼe fakamaʼua ke maʼu he ʼu faʼahiga ako fakalelei. ʼE tonu ke nātou popoto ʼi te vakaʼi fakalelei ʼo te Tohi-Tapu (Gāue 17:11). Ke hoko tanatou gāue ʼaia, ʼe tonu ke nātou potopoto ʼi te lautohi fakalelei. — Vakaʼi ia Hapakuke 2:2; 1 Timoteo 4:13.

⁴ Ohage pe ko te meʼa neʼe kua tou talanoa ki ai ʼi te alatike kua hili atu, ko te kau tūpulaga ʼo Iselaele ʼo te temi muʼa neʼe nātou popoto ʼi te lautohi pea mo te faitohi (Kau Fakamāu 8:14; Isaia 10:19). ʼE ʼaoga ki te kau minisi kilisitiano ʼo te temi nei ke nātou toʼo ni ʼu nota mokā nātou fagonogono ʼi te ʼu ʼapi. ʼE nātou tohi te ʼu mataʼi tohi, pea mo toʼo te ʼu nota ʼi te ʼu fono, feiā aipe mo te ʼu fakaʼiloga ʼi tanatou ʼu tohi ako. Ko te ʼu meʼa fuli ʼaia ʼe fakamaʼua ia nātou ke nātou potopoto lelei ʼi te faitohi. Ke taupau fakalelei te ʼu kaupepa ʼo te kokelekasio, ʼe tonu foki ke maʼu he kiʼi mālama ki te tānaki ʼo te ʼu numelo.

Te ʼu faiga lelei ʼo he ako lelei

5. a) ʼE feafeaʼi te ʼuluaki faka ʼuhiga ʼo te kupu ʼaē ko te “faleako”? b) Ko te fealagia fea ʼaē ʼe tonu ke maʼu e te kau tūpulaga?

⁵ Koia, ko te kupu ʼaē ko te “faleako” ʼe haʼu mai te kupu faka keleka ʼaē ko te skholê, ko tona faka ʼuhiga ʼuluaki ko te “mālōlō” peʼe ko te fakaʼaoga ʼo te temi mālōlō moʼo fai he ʼu faʼahiga gāue maʼuhiga ohage la ko te ako. Ki muli age neʼe faka ʼuhiga leva te kupu ʼaia ki te koga meʼa ʼaē ʼe fai ai te ako. ʼE ʼiloga mai ai, ʼi muʼa atu, neʼe gata pe ki te kalasi makehe neʼe ina maʼu te lelei ʼaē ʼo te ako. Ko te kalasi gāue ʼaē ʼi Keleka pea mo ʼihi atu fenua neʼe mole ina maʼu te ako ʼaia. ʼI te temi nei, ʼe lahi te ʼu fenua ko te ʼu fānau pea mo te kau tūpulaga tuvao kua nātou maʼu te temi moʼo ako. Ko te kau fakamoʼoni ʼaē kei tūpulaga ʼa Sehova, ʼe tonu anai ke nātou ‘totogi te temi faigamalie’ ke nātou maʼu te ʼu meʼa lelei pea mo nātou liliu ko he ʼu kaugana faiva ʼa Sehova. — Efesi 5:15, 16.

6, 7. a) Koutou fakahā he ʼu kalitate ʼo he ako lelei? b) ʼE ʼaoga koa kiteā he ʼiloʼi ʼo he lea kehe? c) ʼE feafeaʼi te ʼaluʼaga ʼa te kau tūpulaga tokolahi mokā nātou mavae ʼi te faleako?

⁶ Ko he kiʼi mālama ki te hisitolia, te seokalafia, pea mo te ʼu ʼaluʼaga ʼo te maʼuli, pea mo ʼihi atu pe ʼu meʼa, ʼe ina faka fealagia anai ki te kau fakamoʼoni ʼaē kei tūpulaga ke nātou liliu ko he kau minisi popoto. ʼI te lolotoga ʼo tanatou ako, ʼe mole gata ʼaki pe tanatou mahino ki te ʼu faʼahiga meʼa kehekehe, kae ʼe nātou toe ʼiloʼi aipe te ako. Ko te kau kilisitiano moʼoni ʼe mole nātou tuku tanatou ako mokā kua nātou mavae mai te faleako. Kae, ʼi tanatou popoto ʼi te ako, ko tanatou ako ʼe toe lelei age ʼosi. ʼE feala ke tokoni kia nātou te ako ʼaē neʼe nātou maʼu ʼi te faleako pea mo te kokelekasio moʼo fakatuputupu tanatou ʼu fealagia (Tāʼaga Lea 5:1, 2). Ka ʼe nātou lautohi anai, ʼe nātou ʼiloʼi lelei anai te meʼa ʼaē ʼe maʼuhiga ke vakaʼi pea mo ʼaē ke fakamaʼu loto.

⁷ Koia ʼaē, ko te ako ʼo he lea, ʼe mole ina haga pe ʼo faka fālahi te ʼatamai ʼa te ʼu tūpuluga kae ʼe ina faka fealagia kia nātou honatou toe ʼaoga ki te kautahi ʼa Sehova. ʼI ʼihi filiale ʼo te Sosiete Watch Tower, ko te ʼu tēhina kei tūpulaga ʼe nātou maʼu te ʼu fua lelei ʼi tanatou popoto ʼi te palalau peʼe ko te lautohi fakapilitānia. Pea tahi ʼaē meʼa, ko te kau kilisitiano fuli ʼe tonu ke nātou faiga ʼo palalau ki tanatou lea. Ko te logo lelei ʼo te Puleʼaga ʼe tonu ke fakahā ʼi he faʼahiga palalau ʼe lelei pea mo mahino. ʼE ʼiloga ʼi te ʼu meʼa ʼaē neʼe hoko, ko te maʼuli ʼo te temi nei, ʼe tokolahi te kau tūpulaga kua mavae ʼi te faleako ʼe mole heʼeki nātou ʼiloʼi lelei te faitohi feiā aipe mo te palalau, tatau aipe mo he fai ʼo he tānaki faka numelo faigafua; pea ʼe mole lahi pe la te ʼu meʼa ʼe nātou ʼiloʼi ʼo ʼuhiga mo te hisitolia pea mo te seokalafia.

Te ako ʼaē ʼe ʼaoga

8. Ko te ʼu koga tohi fea ʼi te Tohi-Tapu ʼe ʼaoga ki te ako pea mo te maʼua ʼaē ke tokaga ki te maʼuli fakasino?

⁸ ʼE ko he temi faigamalie moʼo vakaʼi te agaaga ʼa te kilisitiano ʼo ʼuhiga mo te ako. Koteā te ʼu fakatuʼutuʼu ʼe pipiki ki te meʼa ʼaia? ʼUluaki, ʼe lahi te ʼu fenua ko te fakalogo ʼaē kia “Sesale” ʼe fakamaʼua ki te kau kilisitiano ke nātou ʼave tanatou ʼu fānau ki te faleako (Maleko 12:17; Tito 3:1). Pea ki te kau tūpulaga, ʼe tonu ke nātou manatuʼi ʼi tanatou ʼu gāue ʼaē ʼi te faleako, te talanoa ʼaē ia Kolose 3:23, ʼaē ʼe ʼui fēnei: “Pe ko he meʼa pe ʼe koutou fai, koutou gāue ki ai mo tokotou nefesi katoa, ohage maʼa Sehova kae ʼaua maʼa te tagata.” Ko te lua fakatuʼutuʼu, ʼe tonu ke popoto te kau kilisitiano ʼi te taupau ʼo tonatou maʼuli fakasino, logope la ko nātou ko te ʼu pionie katoa (1 Tesalonika 3:10-12). Ko te tagata ʼohoana, ʼe tonu anai ke tokaga ki te ʼu meʼa ʼe ʼaoga tāfito ki tona ʼohoana pea mo tana fānau, pea kapau ʼe lahi ke ina vaevae mo nātou ʼaē ʼe nonofo ʼi te faigataʼaʼia, feiā aipe ki te ʼu meʼa ʼo te kokelekasio mo te gāue faka mafola ʼi te malamanei. — Efesi 4:28; 1 Timoteo 5:8.

9, 10. a) Koteā te manatu ʼa te tokolahi ʼi te ʼu fenua? b) Koteā te ʼuhiga ki he pionie he totogi ʼe tau?

⁹ Ko temi koa ʼe fia ʼe ʼaoga ke ako ai te kilisitiano tūpulaga ke feala hana fai fakalelei tona ʼu maʼua faka kilisitiano ʼaki te ʼu fakatuʼutuʼu faka tohi-tapu ʼaia? Ko te faʼahi ʼaia ʼe kehekehe pe ʼi te ʼu fenua. Kae ʼe mole heʼeki fualoa ki ai, ʼe lahi te ʼu fenua kua ʼiloga ia ko te manatu ʼa te tokolahi ke fai he ako māʼoluga moʼo maʼu he totogi ʼe tau. Ko te ʼu fakamatala ʼe maʼu e te ʼu filiale ʼo te Sosiete Watch Tower ʼi te ʼu potu kehekehe ʼo te kele, ʼe ʼiloga mai ʼe lahi te ʼu koga meʼa ʼe faigataʼa ai te maʼu ʼo he gāue ko te totogi ʼe tau, māʼia pe la neʼe kita maʼu he faʼahiga ako neʼe fakamaʼua kiai e te puleʼaga, peʼe neʼe kita fai te kolesi.

¹⁰ ʼE tou mahino koa ʼi te talanoa ko te “totogi ʼe tau”: ko he totogi ʼe lahi? Kailoa. Ko te kupu ʼaē “ ʼe tau” ko tona faka ʼuhiga ʼi te talanoa ʼaia ʼe “feʼauga, fakafimālie”. Koteā ʼaē ʼe “feʼauga” kia nātou ʼe fia liliu ko te kau minisi katoa ʼo te logo lelei? ʼI te agamahani, ko te ʼu kilisitiano ʼaia ʼe ʼaoga ke nātou maʼu hanatou gāue vaeluaʼi temi ke ʼaua naʼa nātou liliu “ko he kavega mamafa” maʼa tanatou ʼu tēhina pea mo tonatou famili (1 Tesalonika 2:9). ʼE feala ke tou ʼui ʼo ʼuhiga mo tonatou totogi ʼe “feʼauga”, peʼe “fakafimālie”, mo kapau ʼe feala hanatou maʼuli ʼi te totogi ʼaia ʼo nātou maʼu he temi pea mo he mālohi faigamalie ki tanatou minisitelio faka kilisitiano.

11. He koʼe koa neʼe tuku ʼe ʼihi kau tūpulaga tanatou gāue pionie, pea koteā te fehuʼi ʼe tou maʼu ki te faʼahi ʼaia?

¹¹ Koteā te meʼa ʼe tau hoko ʼi te temi nei? ʼI ʼihi fenua ʼe tokolahi te kau tūpulaga ʼi tanatou fia pionie, neʼe nātou mavae ʼi te faleako ʼi tanatou maʼu pe te kiʼi fua veliveli ʼo tanatou ako. Neʼe mole heʼeki nātou maʼu hanatou tuʼulaga gāue. Kapau ʼe mole nātou maʼu he tokoni mai tanatou ʼu mātuʼa ʼo ʼuhiga mo tonatou maʼuli fakasino, neʼe tonu leva ke nātou maʼu hanatou gāue katoa. Ko ʼihi neʼe nātou tali te ʼu gāue ʼe fakamaʼua nātou ke nātou gāue te ʼu hola fualoa ke feala ki te ʼu meʼa ʼo tonatou maʼuli. ʼI tanatou gaʼegagaʼe, neʼe nātou tuku ai leva tanatou gāue pionie. Koteā te meʼa ʼe feala ke nātou fai moʼo taupau ʼo tonatou maʼuli fakasino pea ke nātou toe kau ki te gāue pionie?

Ko he manatu poto ʼo ʼuhiga mo te ako

12. a) ʼO ʼuhiga mo te ako, koteā te ʼu manatu tāfito e lua ʼaē ʼe tonu ke tekeʼi e te kilisitiano? b) Ki te ʼu kaugana ʼa Sehova feiā mo tanatou ʼu fānau, koteā koa te ikuʼaga ʼo te ako?

¹² ʼE ko he fakasiosio lelei ki te ako ʼe feala ke ʼaoga. ʼE tokolahi te kau tūpulaga ʼi te mālama ʼaenī kia nātou ko te ako ʼe ko he fakaʼiloga ia ʼo te poto, ko he meʼa ʼe tokoni kia nātou ke nātou maʼuhiga ʼi te malamanei, ko he kalavi ki te maʼu koloā. Ko ʼihi, ko te ako ʼe ko he kavega ke fakaʼosi fakavilivili. Ko te kau kilisitiano moʼoni ʼe mole nātou maʼu te ʼu manatu ʼaia. Kae, koteā koa ʼaē ʼe tou higoaʼi ko te “manatu poto”? ʼE tonu anai ke fakaʼaoga e te kau kilisitiano te ako ohage ko he meʼa moʼo fakahoko he fakatuʼutuʼu. ʼI te ʼu ʼaho fakamuli ʼaenī, ʼe nātou fakatuʼutuʼu ke nātou gāue lahi pea mo gāue lelei kia Sehova. Kapau, ʼi te ʼu fenua ʼaē ʼe nātou maʼuʼuli ai, ko te ako ʼaē ʼe nātou maʼu ʼi tonatou temi ako peʼe feiā aipe mo te temi ʼo te kolesi, ʼe mole feala ai ke nātou maʼu he gāue ʼaki he totogi ʼe tau mo tonatou maʼuli pea ke liliu ke nātou pionie, ʼe lagi ʼe maʼua anai ke nātou toe hoko atu tanatou ako. ʼE fai anai te meʼa ʼaia ʼaki te manatu ʼaē ke pionie katoa ki muli age.

13. a) Koteā te meʼa neʼe feala ke fai e te tuagaʼane ʼi Filipine ke nofo tuʼumaʼu ʼi tana gāue pionie logope la tona ʼu maʼua faka famili? b) Koteā te valoki ʼe tau mo te faʼahi ʼaia?

¹³ Ko ʼihi neʼe nātou kau ki te ʼu ako neʼe feala ai leva hanatou maʼu ʼo hanatou ʼu gāue pea mo faka fealagia kia nātou hanatou kau ki te gāue pionie katoa. Ko te faʼe kilisitiano ʼi Filipine neʼe ʼi ai tana famili ke tokaga kiai neʼe fia pionie. ʼE fakamatala fēnei e te filiale ʼo ʼuhiga mo ia: “Neʼe feala tana pionie koteʼuhi neʼe ina toe maʼu te ako ko te poto ʼi te tokaga ki te ʼu meʼa ʼaē ke totogi.” ʼE toe tala fēnei e te filiale: “ ʼE mātou mau te kau pionie ʼe tokolahi, ʼaki tanatou fakatuʼutuʼu fakalelei ʼo tonatou temi, ʼe nātou ako pea mo haga fai pe tanatou gāue pionie. ʼI te agamahani ʼaki tanatou popoto ʼe nātou liliu ko te kau fai faka mafola lelei, mo kapau foki ʼe mole nātou mānumānu ki te ʼu meʼa ʼaē ʼo te malamanei.” Ko te manatu fakaʼosi ʼe tonu ke ina uga tatou ke tou fakakaukauʼi te faʼahi ʼaia. ʼE mole tonu ke puli ia tatou te tupuʼaga ʼaē ʼo tatou hoko atu tatatou ako mo kapau ʼe ʼaoga ke tou fai te faʼahi ʼaia, pea mo ʼaua naʼa tou fia fai ki he ʼu meʼa fakamālama.

14, 15. a) He koʼe koa ʼe mole tonu ke fai he ʼu lekula fakakinau ʼo ʼuhiga mo te ako? b) Ko te ʼu ako feafeaʼi ʼaē neʼe maʼu e ʼihi tēhina neʼe hilifaki kia nātou te ʼu maʼua, pea neʼe feafeaʼi te maui mālie ʼo te meʼa ʼaia?

¹⁴ ʼI ʼihi pe fenua, ko te ʼu kolesi ʼe ko he maui mālie moʼo teuteuʼi he kilisitiano tūpulaga ki he gāue mokā ʼe ina maʼu anai tona pepa. Kapau ʼe mole hoko te faʼahi ʼaia, ʼi ʼihi fenua ko te kau tūpulaga ʼaē neʼe nātou maʼu pe he faʼahiga poto ʼi te ako kae ʼe nātou faʼa gāue, ʼe nātou maʼu tanatou gāue vaeluaʼi temi ke fakafeauga pe ki tonatou maʼuli fakasino kae ke nātou pionie. Koia, ʼe mole tonu ke tou fai he ʼu lekula fakakinau moʼo fakafeagai peʼe mo tali te fakahoko ʼo te ako.

¹⁵ Tokolahi ia nātou ʼaē ʼe nātou maʼu te ʼu maʼua ʼaē ʼi te gāue feʼaluʼaki, peʼe ʼi te Sosiete, peʼe ʼi he filiale pe, neʼe nātou maʼu te ako veliveli pe. Ko te kau pionie agatonu neʼe mole nātou fiu ʼi te ako, feiā aipe ki te akonaki, pea koia ʼaē neʼe tuku ai kia nātou ʼihi age ʼu maʼua lahi. Neʼe mole nātou fakahemala pe la ʼo ʼuhiga mo te meʼa ʼaē neʼe nātou fili ke nātou fai. Pea ko ʼihi ʼi tonatou taʼiake, neʼe nātou fia fai ki te ʼu ako lalahi pea mo nātou mavae ai leva ʼi te ala faitotonu, heʼe kua mālohi age kia nātou te ʼu filosofia pea mo “te poto ʼo te malamanei” ʼaē neʼe nātou maumauʼi tanatou tui. — 1 Kolonito 1:19-21; 3:19, 20; Kolose 2:8.

Tou fakafuafua tona totogi

16. a) Ko ai koa ʼaē ʼe pule ki he fai ʼo he ako fualoa, pea koteā ʼaē ka ina fakamuʼamuʼa? b) Koteā ʼaē ʼe tonu ke tou tokagaʼi?

¹⁶ Ko ai koa ʼaē ʼe pule ki te kilisitiano tūpulaga ʼo ʼuhiga mo te fualoa ʼaē ʼo tana ako? ʼE maʼuhiga leva ki te faʼahi ʼaia te fakatuʼutuʼu faka tohi-tapu ʼo ʼuhiga mo te pule (1 Kolonito 11:3; Efesi 6:1). Ke mulimuki ki te fakatuʼutuʼu ʼaia, ʼe loto anai te ʼu mātuʼa ke nātou kau mo ʼanatou ʼu fānau ki te fili ʼaē ʼo hanatou gāue ʼo toe feiā aipe mo te temi ʼaē ki te ako ʼo te gāue ʼaia. ʼE lahi te ʼu fenua, ko te fili ʼaē ʼo he gāue ʼo ʼuhiga mo te maʼuli ki muli age ʼe kamata pe ia ʼi te ʼu kolesi. ʼE ʼaoga leva ʼi te temi ʼaia ke kumi e te ʼu mātuʼa kilisitiano pea mo te kau tūpulaga te taki ʼa Sehova ke lelei te tonu ʼaē ka nātou fai, ʼo nātou manatuʼi ko te ʼu meʼa ʼo te puleʼaga ʼaē ʼe maʼuhiga age. Ko te kau tūpulaga ʼe mole tatau tanatou ʼu fakatuʼutuʼu pea mo tanatou ʼu fealagia. Ko te ʼu mātuʼa popoto ʼe nātou tokagaʼi anai te ʼu faʼahi ʼaia. Ko he faʼahiga gāue fakahagatonu ʼe lelei, peʼe ko he gāue faka tufuga peʼe ko he gāue pilō. Logope la te faka ʼuhiga ʼaē ʼo te gāue pilō e te malamanei kae ʼe ina meʼa noaʼi te gāue kinakina ʼa he tahi mo tona ʼu nima, ko te Tohi-Tapu ia ʼe mole feiā tana manatu (Gāue 18:3). Pea kapau leva kua fakatotonu e te kau tūpulaga kilisitiano pea mo tanatou ʼu mātuʼa he tonu ki te faʼahi ʼaia heʼe kua nātou faikoleʼi te meʼa ʼaia, ʼaua naʼa fatufatuʼi nātou ʼe ʼihi ʼi te kokelekasio ʼo ʼuhiga mo tanatou tonu.

17. Koteā te fili ʼe tau fai ʼe ʼihi ʼu mātuʼa maʼa tanatou ʼu fānau?

¹⁷ Kapau ʼe loto moʼoni he ʼu mātuʼa kilisitiano ke nātou tuku tanatou ʼu fānau ke nātou fai he ʼu ako māʼoluga, ʼe fakalogo pe ia kia nātou. Ko te temi ako ʼe fakalogo anai ki te faʼahiga gāue neʼe fakatuʼutuʼu ki ai. ʼI te ʼaluʼaga ʼaē ʼo te maʼuli fakasino pea ke toʼo fakavilivili e ʼanatou ʼu fānau te pionie katoa, tokolahi te ʼu mātuʼa neʼe nātou fili ke fai e tanatou ʼu fānau he faʼahiga ako ʼe faigafua hanatou maʼu hanatou gāue. ʼI ʼihi ʼaluʼaga, ko te kau tūpulaga ʼe nātou fai te ako, kae ko tanatou fakatuʼutuʼu ke nātou gāue ʼi tonatou maʼuli katoa kia Sehova.

18. Kapau ʼe tou fai he ʼu ako lalahi, koteā te meʼa ʼaē ʼe mole tonu ke galo ia tatou?

¹⁸ Ko ia ʼaē ʼe ina fai te ʼu ako māʼoluga, ʼaua naʼa ina manatu ke ʼiloa tona poto peʼe mo ina teuteuʼi hona maʼuli ʼi te mālama ʼaenī. ʼE tonu ke tou fili fakalelei te ʼu faʼahiga meʼa ʼaē ka tou ako. ʼE fakahā tuʼumaʼu pe e te nusipepa ʼaenī te ʼu tuʼutāmaki ʼo te ako māʼoluga, pea ʼe ko he meʼa moʼoni ia, heʼe ko te ʼu meʼa ʼaē ʼe akoʼi ʼe fakafeagai ki te “akonaki ʼo te maʼuli” ʼo te Tohi-Tapu (Tito 2:1; 1 Timoteo 6:20, 21). Pea tahi foki ʼaē, talu mai te ʼu taʼu 60 ʼe lahi te ʼu faleako lalahi kua liliu ko te ʼu koga meʼa ʼe nātou meʼa noaʼi te lao feiā aipe mo te aga ʼaē ʼe tonu ke fai. Ko te “tagata kaugana agatonu mo poto” neʼe ina tokoniʼi fakamālohi te kau tūpulaga ke ʼaua naʼa nātou kau ki te faʼahiga maʼuli ʼaia (Mateo 24:12, 45). Kae, ʼe tou ʼiloʼi pe foki ia ʼaho nei ko te kau tūpulaga ʼe nātou felāveʼi mo te ʼu tuʼutāmaki ʼaia ʼi te ʼu lisē pea mo te ʼu kolesi feiā aipe mo te ʼu koga meʼa ʼaē ʼe nātou gāue ai. — 1 Soane 5:19a.

19. a) Koteā te ʼu fakatuʼutuʼu ʼe fai anai ʼe nātou ʼaē ʼe nātou fia hoko atu tanatou ako? b) Koteā te meʼa lelei neʼe fakaʼaoga ki ai e ʼihi tanatou ako?

¹⁹ Kapau ʼe fakatotonu ʼe he kilisitiano tūpulaga ke hoko atu tana ako, ʼe lagi ʼe lelei anai ke haga maʼuli muʼa mo tana ʼu mātuʼa. ʼE feala ai leva kia ia ke ina taupau he ʼu agamahani lelei faka kilisitiano, ohage ko te ako takitokotahi ʼo te Tohi-Tapu, mo te kau ki te ʼu fono feiā aipe mo te faka mafola. Pea tahi ʼaē, ʼe tonu ke ina kamata fakahā atu tana tali ʼaē ʼo te ʼu fakatuʼutuʼu faka tohi-tapu. ʼE tou manatuʼi ia Taniela pea mo tona ʼu kaumeʼa hepeleo e tolu neʼe nātou ʼaunofo ʼi Papiloni pea neʼe fakamaʼua nātou ke fai he ʼu ako māʼoluga, kae neʼe nātou taupau aipe tanatou agatonu (Taniela, kapite 1). Koia, ʼi tanatou fakamuʼamuʼa aipe te ʼu meʼa ʼo te puleʼaga, ʼe lahi te ʼu fenua ko te kau fakamoʼoni kei tūpulaga neʼe nātou fai te ʼu ako ʼe faka fealagia kia nātou hanatou maʼu ʼo hanatou ʼu gāue vaeluaʼi temi, ohage ko te tokaga ki te ʼu meʼa ʼaē ke totogi, ko te tagata fakatau, ko te tagata faiako, ko he ʼu hahaʼi fakaliliu ʼo te ʼu lea feiā mo te fakahoko lea, peʼe ko ʼihi age ʼu gāue ʼaē neʼe tokoni aipe kia nātou ʼi tanatou ʼuluaki gāue faka pionie (Mateo 6:33). Tokolahi ia nātou ʼaia ki muli age neʼe nātou liliu ko te kau tagata taupau feʼaluʼaki peʼe ko ni hahaʼi ʼo te ʼu Petele.

Ko te hahaʼi logo tahi pea mo ʼatamai

20. Koteā ʼaē ʼe maʼu ʼi te mālama ʼe mole tonu ke hoko ʼi te ʼu kaugana ʼa Sehova?

²⁰ ʼI te hahaʼi ʼa Sehova, pe ko he tahi ʼe gāue kinakina peʼe gāue pilō, peʼe gāue kele, peʼe ko he faʼahiga gāue pe, ʼe ʼaoga pe ke tou ako fakalelei te Tohi-Tapu ke tou feala akoʼi ki niʼihi. Te ʼu kalitate ʼaē neʼe tou maʼu ʼi te lautohi, ʼi te ako pea mo te akonaki ʼe nātou fakapuli te aga ʼaē ʼa te malamanei ko te fakakeheʼi ʼa he tahi ʼe gāue kinakina ʼaki tona ʼu nima mo ʼaē ʼe gāue pīlo. ʼE lagolago te meʼa ʼaia ki te logo tahi pea mo te fefakaʼapaʼapaʼaki ʼaē ʼe tou tokagaʼi ʼi te lotolotoiga ʼo te hahaʼi ʼo te ʼu Petele pea mo nātou ʼaē ʼe nātou gāue ʼi te ʼu faʼuʼaga fale ʼa te Sosiete Watch Tower, ʼaē ko te ʼu kalitate fakalaumālie ʼe fakamaʼua kia nātou fuli pe. ʼI te maʼuli ʼaia, ko te tagata gāue pilō ʼe kaugā gāue fiafia mo ʼaē ʼe faiva ʼi te gāue tufuga, ʼo nātou maʼu aipe te feʼofaʼaniʼaki. — Soane 13:34, 35; Filipe 2:1-4.

21. Koteā anai ʼe tonu ke fakatuʼutuʼu ki ai te kau kilisitiano tūpulaga?

²¹ ʼU mātuʼa, koutou taki takotou ʼu fānau ke nātou liliu ko he ʼu hahaʼi ʼaoga ʼi te tuʼu foʼou! ʼU tūpulaga kilisitiano, koutou fakaʼaogaʼi takotou ʼu fealagia ohage ko he meʼa moʼo teuteuʼi koutou ke koutou fai fakalelei takotou ʼu pilivilesio ʼi te gāue kia Sehova! Koutou ʼaē ko te kau ako, ke feala hakotou liliu fuli ko ni hahaʼi faiva ʼo te sosiete teokalatike ʼi te temi nei pea ki he temi heʼegata ʼi te “kele foʼou” neʼe fakapapau e te ʼAtua! — 2 Petelo 3:13; Isaia 50:4; 54:13; 1 Kolonito 2:13.

[Nota ʼi te lalo pasina]

Tou sivi totatou ʼatamai

◻ He koʼe koa ʼe tokaga te kau kilisitiano ki te ako?

◻ Koteā te ʼu manatu ʼe mole ʼaoga ʼo ʼuhiga mo te ako ʼe tonu ke tekeʼi anai e te kau kilisitiano?

◻ Koteā te ʼu tuʼutāmaki ʼaē ʼe tonu ke tou tokagaʼi ʼi te ʼu ako māʼoluga, pea koteā te ʼu fakatuʼutuʼu ʼe tonu ke fai ki ai?

◻ Koteā ʼaē ʼe maʼu ʼi te mālama ʼe mole tonu ke hoko ʼi te ʼu kaugana ʼa Sehova?

[Paki ʼo te pasina 16]

ʼI hanatou ako fakalelei, ko te kau tūpulaga kilisitiano ʼe feala ke nātou liliu ʼo ʼaoga lahi ʼi te mālama foʼou.

[Paki ʼo te pasina 19]

Kapau ʼe tou fili ke hoko tatatou ako, ʼe tonu ke tou fai ʼaki te loto ʼaē ke lelei age tatatou gāue maʼa Sehova.