Ko Te Ako ʼAē ʼe Haʼu Mai Te ʼAtua ʼe Māʼoluga ʼAupitō Age Ia
“ ʼE au fakaʼuhiga ko te ʼu meʼa fuli ʼe pulinoa ʼuhi ko te māʼoluga ʼaupitō age ʼo te mālama ʼo Kilisito Sesu.”—FILP. 3:8.
1, 2. Koteā ʼaē neʼe filifili e ʼihi Kilisitiano ke natou fai, pea koteā tona tupuʼaga?
TALU mai te kamata ako ʼa Robert mo te lelei ʼaupitō ʼo tona ʼu nota ʼaē ʼi te faleako. ʼI tana kei taʼu valu pē, neʼe haʼu ki tona ʼapi ia tona tahi fafine faiako pea mo ina ʼui age ʼe lahi anai ia te ʼu gāue ʼe feala anai ke ina fai. Neʼe ina fakahā age ia tana falala ʼaē ʼe liliu anai ia ʼi he ʼaho ʼo tōketā. Neʼe feala kiā Robert hana kau ki te ʼu univelesitē lalahi ʼo tona fenua he neʼe lelei ʼaupitō ia tana ako ʼi te kolesi. Kae neʼe mole filifili e Robert ia te faʼahi ʼaia, ʼaē ki te manatu ʼa te tokolahi neʼe ko he faigamālie pē e tahi ʼaia ʼi tona maʼuli kātoa, he neʼe fia kau ia ki te selevisi pioniē kātoa.
2 Ohagē ko Robert, tokolahi te kau Kilisitiano tūpulaga pea mo fotufotuʼa, ʼe natou maʼu ia te ʼu fealagia ke lelei age ia tonatou maʼuli ʼi te mālama ʼaenī. Ko ʼihi ʼe natou filifili ke mole natou fakaʼaogaʼi ia te ʼu fealagia kātoa ʼaia, heʼe natou fia fakahoko tanatou ʼu fakatuʼutuʼu fakalaumālie. (1 Ko. 7:29-31) Koteā ʼaē ʼe ina uga ia te kau Kilisitiano ohagē ko Robert ke natou tali ke natou gāue kinakina ʼi te gāue fai fakamafola? ʼE mole gata pē ʼi tonatou ʼoʼofa ʼaē iā Sehova, ʼaē ko te tupuʼaga tāfito ʼo tanatou fai ia te faʼahi ʼaia, kae ʼe natou toe fakafetaʼi foki ki te ako māʼoluga ʼaupitō ʼaē neʼe natou maʼu mai te ʼAtua. ʼI te ʼu hoholo mai ʼaenī, neʼe kua kotou fakakaukauʼi koa peʼe feafeaʼi anai tokotou maʼuli mo kanapau lā neʼe mole kotou maʼu ia te ʼatamai mālama ʼo te moʼoni? Kā kotou fakakaukauʼi age muʼa ia te ʼu tapuakina taulekaleka ʼaē neʼe kotou maʼu ʼi te akoʼi ʼo koutou e Sehova, pea ʼe tokoni atu anai ia te faʼahi ʼaia ke kotou taupau maʼu ia takotou loto fakafetaʼi ʼaē ki te logo lelei pea ke kotou faʼafai ʼo fakahā ia te logo ʼaia ki niʼihi.
ʼE Ko He Toe Pilivilēsio Lahi Hotatou Akoʼi e Te ʼAtua
3. He koʼē ʼe feala ke tou tui papau ko Sehova ʼe ina tali lelei ke ina akoʼi ia te hahaʼi heʼe haohaoa?
3 ʼI tona lotoʼofa, ʼe tali lelei e Sehova ke ina akoʼi te hahaʼi heʼe haohaoa. ʼI tana fai fakakikite ʼo ʼuhiga mo te kau Kilisitiano fakanofo, ʼe ʼui fēnei iā Isaia 54:13: “Ko tou ʼu foha fuli ʼe natou liliu anai ko he ʼu hahaʼi neʼe akoʼi e Sehova, pea ko te tokalelei ʼo tou ʼu foha ʼe mahu anai.” Ko te ʼu palalau ʼaenī ʼe toe fakaʼuhiga ki te “tahi ʼu ovi” ʼa Kilisito. (Soa. 10:16) ʼE hā lelei te faʼahi ʼaia ʼi te lea fakapolofetā ʼe lolotoga hoko ʼi totatou temi. Ko te meʼa neʼe hā kiā Isaia, pea neʼe sio ki te hahaʼi mai te ʼu puleʼaga kehekehe ʼe natou hake ki te tauhi moʼoni. ʼE ina ʼui ʼo ʼuhiga mo nātou, ʼe natou feʼuiʼaki: “Ke tou hake ki te moʼuga ʼo Sehova, ki te fale ʼo te ʼAtua ʼo Sakopo; pea ʼe ina akoʼi mai anai kiā tātou tona ʼu ala, pea ʼe tou haʼele anai ʼi tona ʼu ala foufou.” (Isa. 2:1-3) ʼE ko he toe pilivilēsio lahi hotatou akoʼi e te ʼAtua!
4. Koteā ʼaē ʼe fakamaʼua e Sehova kiā nātou ʼaē ʼe ina akoʼi?
4 Koteā ʼaē ʼe tonu ke tou fai ke feala hatatou maʼu ia te ako ʼaē ʼe foaki mai e Sehova? ʼE tonu tāfito ke tou agavaivai pea ke faigafua hotatou akoʼi. Neʼe tohi fēnei e te tagata fai pesalemo ko Tavite: “Ko Sehova ʼe agalelei pea mo totonu. . . . ʼE ina akoʼi anai ki te kau agavaivai tona ala.” (Pes. 25:8, 9) Pea neʼe ʼui fēnei e Sesu: “Tamai, ʼe au vikiviki kiā te koe iā muʼa ʼo te hahaʼi, ʼAliki ʼo te lagi mo te kele, he neʼe ke fufū fakalelei te ʼu meʼa ʼaenī ki te kau popoto pea mo te hahaʼi ʼaē ʼe gāue fakaʼatamai, kā kua ke fakahā koe kiā nātou liliki.” (Luka 10:21) ʼE mole kotou fia fakaovi koa ki he ʼAtua “ ʼe ina foaki ia tona ʼofa makehe ki te kau agavaivai”?—1 Pet. 5:5.
5. Koteā ʼaē neʼe hoki feala ai ke tou maʼu ia te ʼatamai mālama ʼo ʼuhiga mo te ʼAtua?
5 ʼI totatou ʼuhiga kaugana ʼa Sehova, ʼe feala koa hakita ʼui kua kita maʼu ia te moʼoni ʼuhi ko totatou ʼu fealagia peʼe ko totatou poto ʼo kita totonu? Kailoa ia, heʼe kapau ʼe fakalogo kiā kita ia te faʼahi ʼaia, pea ʼe mole heʼeki tou maʼu nei ia te ʼatamai mālama ʼo ʼuhiga mo te ʼAtua. Neʼe ʼui fēnei e Sesu: “ ʼE mole he tahi ʼe feala ke haʼu kiā te au, mo kapau ko te Tamai ʼaē neʼe ina fekauʼi mai au ʼe mole ina taki mai ia ia.” (Soa. 6:44) ʼAki te fai fakamafola pea mo tona laumālie māʼoniʼoni, ʼe taki mai e Sehova te hahaʼi ʼaē ʼe hagē ko ni ʼu ovi, “te ʼu meʼa ʼaē ʼe manakoʼia ʼo te ʼu puleʼaga fuli.” (Asea 2:7) ʼE mole kotou loto fakafetaʼi koa lā ʼi takotou kau iā nātou ʼaē neʼe taki mai e Sehova kiā te ia ʼaki tona ʼAlo?—Lau ia Selemia 9:23, 24.
Te Ako ʼAē Mai Te ʼAtua ʼe Mālohi Moʼo Hikihiki Ke Lelei Age Ia Te Maʼuli ʼo Te Hahaʼi
6. Koteā ia te fetogi taulekaleka ʼe feala ke hoko ki te hahaʼi ʼaē ʼe natou mahino ki “te ʼatamai mālama ʼo ʼuhiga mo Sehova”?
6 ʼI te lea fakapolofetā ʼa Isaia, neʼe fakaʼaogaʼi ai ia te pāki taulekaleka moʼo fakamatalatala ia te fetogi ʼaē ʼe lolotoga hoko ʼi te temi nei ki te ʼulugaaga ʼo te tagata. Ko te hahaʼi agamālohi ki muʼa atu kua natou fetogi ʼo tokalelei. (Lau ia Isaia 11:6-9.) Ko nātou ʼaē neʼe fēhihiʼaʼaki ʼuhi ko tanatou ʼu lanu kehekehe, mo puleʼaga kehekehe, mo telepī kehekehe, peʼe agaʼi fenua kehekehe kua natou popoto ʼi te māʼuʼuli fakatahi ʼi te logotahi. Kua hagē pē kua natou “tuki tanatou ʼu heletā ke liliu ko he ʼu huo laga kele.” (Isa. 2:4) Koteā ʼaē neʼe tupu ai ia te ʼu fetogi taulekaleka ʼaia? Neʼe mahino ia te hahaʼi ki “te ʼatamai mālama ʼo ʼuhiga mo Sehova” pea neʼe natou maʼuliʼi ʼi tonatou maʼuli. Logolā te ʼuhiga heʼe haohaoa ʼa te ʼu kaugana ʼa te ʼAtua, kae ʼe natou faʼufaʼu ia te foʼi kautahi fale tautēhina fakamālamanei. Ko te fia logo ʼi te mālamanei ki te logo lelei pea mo te ʼu fua lelei ʼaē ʼe tupu ai, ʼe ko he fakamoʼoni ʼo te māʼoluga ʼaupitō age ʼo te ako ʼaē mai te ʼAtua.—Mat. 11:19.
7, 8. (a) Koteā te “ ʼu tule” ʼaē ʼe haga ia te ako fakaʼatua ʼo tokoni te hahaʼi ke natou liʼaki? (b) Ko te faʼifaʼitaki fea ʼaē ʼe hā ʼaki mai ai ko te ako ʼaē mai te ʼAtua ʼe ina fakatupu ai ia he fakavikiviki ʼo Sehova?
7 Neʼe fakatatau e te ʼapositolo ko Paulo ia te minisitelio ʼa te ʼu kaugana ʼa te ʼAtua ki he tau fakalaumālie. Neʼe ina tohi fēnei: “Ko te ʼu mahafu ʼo tatatou tau ʼe mole kakano, kae ʼe mālolohi ʼuhi ko te ʼAtua moʼo holoʼi ʼo he ʼu tule. Heʼe tou holoʼi te ʼu manatu pea mo te ʼu meʼa fuli ʼe fialahi pea mo fakatutuʼu ki te mālama ʼo te ʼAtua.” (2 Ko. 10:4, 5) Koteā ia te “ ʼu tule” ʼaē ʼe haga ia te ako fakaʼatua ʼo fakaʼāteaina mai ai ia te hahaʼi? ʼE ko te ʼu akonaki hala, mo te ʼu gāue fakatemonio, pea mo te ʼu filosofia fakatagata, pea ʼe kei toe age pē lā mo ʼihi age meʼa. (Kol. 2:8) Ko te ako fakaʼatua ʼe tokoni ki te hahaʼi ke natou liʼaki ia te ʼu aga heʼeʼaoga pea mo natou fakatuputupu ia te ʼu kalitātē fakalaumālie. (1 Ko. 6:9-11) ʼE ina hikihiki ke lelei age ia te maʼuli fakafāmili. Pea ʼe ina foaki kiā nātou ʼaē ʼe heʼe falala ia he ʼuhiga moʼoni ʼo tonatou maʼuli. Ko te taʼi faʼahiga ako lā ʼaia ʼe ʼaoga ki te hahaʼi iā ʼaho nei.
8 ʼE ʼi ai te kalitātē ʼe tokoniʼi e Sehova ia te hahaʼi ke natou fakatuputupu, ʼe ko te aga fakahagatonu, pea koʼenī ia te faʼifaʼitaki. (Hep. 13:18) ʼI Initia, ko te fafine neʼe ina tali ke fai tana ako Tohi-Tapu pea ʼaki te temi kua feala leva hana kaugā fagona kae heʼeki papitema. ʼI tana liliu mai ʼi te tahi ʼaho ki tona ʼapi ʼi tana kua ʼosi gāue ʼi te laga ʼo te Fale ʼo Te Puleʼaga, neʼe ina maʼu ʼi te tauʼaga papikā ia te seini ʼaulo, ko tona tau neʼe ko te 71 598. Logolā tona masiva, kae neʼe ina ʼave ia te seini ki te kau polisi ke natou kumi peʼe ʼa ʼai. Ko te polisi ʼaē neʼe ina fakatalitali ia ia neʼe punamaʼuli ki tana aga! Ki muli age, neʼe fehuʼi age e te tahi polisi ki te fafine: “He koʼē neʼe ke liufaki mai ia te seini?” Neʼe ina fakamahino fēnei age: “Ko te ako ʼo te Tohi-Tapu neʼe ina fetogi ia toku maʼuli, koia ʼi te temi nei kua au aga fakahagatonu.” Neʼe ʼofolele ai ia te polisi, ʼo ina fehuʼi age ki te tagata ʼāfea ʼaē neʼe kaugā ʼolo age mo te fafine: “ ʼE nonofo ʼi te koga meʼa ʼaenī ia te toko 38 miliona tupu hahaʼi. Kapau ʼe kotou lava tokoniʼi he toko 10 iā nātou ʼaia ke natou fetogi ohagē ko te fafine ʼaenī, ʼe ko he toe gāue lelei kua fakahoko.” Kā tou fakafuafua ia te ʼu toko lauʼi miliona hahaʼi ʼaē kua fetogi ia tonatou maʼuli ʼaki te ako ʼaē mai te ʼAtua, ʼe mole tou fiafia ai koa lā ke tou fakavikiviki ia Sehova?
9. ʼE lava feafeaʼi ki te hahaʼi ke natou fai ni ʼu toe fetogi lahi ʼi tonatou maʼuli?
9 Ko te mālohi ʼo te Folafola ʼa te ʼAtua moʼo fetogi ia te maʼuli ʼo te hahaʼi, pea mo te tokoni ʼa Sehova ʼaē ʼe ina foaki ʼaki tona laumālie māʼoniʼoni, ʼe feala ai ki te hahaʼi ke natou fai ni ʼu toe fetogi lahi ʼi tonatou maʼuli. (Loma 12:2; Kal. 5:22, 23) ʼE ʼui fēnei iā Kolose 3:10: “Ke kotou kofuʼi te ʼulugaaga foʼou, ʼaē ʼaki te ʼatamai mālama totonu, ʼe fakafoʼou ʼo mulimuli ki te pāki ʼo Ia ʼaē neʼe ina fakatupu.” Ko te logo ʼaē ʼe maʼu ʼi te Folafola ʼa te ʼAtua, ia te Tohi-Tapu, ʼe mālohi moʼo fakaʼasi ia te ʼulugaaga moʼoni ʼo he tahi, pea ʼe ina lava fetogi ia te faʼahiga fakakaukau ʼa he tahi pea mo te ʼu meʼa ʼaē ʼe ina logoʼi ʼi tona loto. (Lau ia Hepeleo 4:12.) Kā maʼu e he tahi ia te ʼatamai mālama ʼo ʼuhiga mo te Tohi-Tapu pea mo ina maʼuliʼi ia te ʼu lēkula faitotonu ʼa Sehova, pea ʼe feala hana liliu ko he kaumeʼa ʼo te ʼAtua, ʼaki te ʼamanaki ʼaē ke ina maʼu ia te maʼuli heʼegata.
ʼE Teuteuʼi e Sehova Ia Tātou Ki Te Kā Haʼu
10. (a) He koʼē ʼe gata pē kiā Sehova tokotahi ʼaē ʼe lava tokoni mai ki totatou teuteuʼi ʼaē ki te kā haʼu? (b) Koteā te ʼu fetogi fakamataku kā ʼamanaki hoko mai ki te kele kātoa?
10 ʼE gata pē kiā Sehova tokotahi ʼaē ʼe lava tokoni mai ke tou teuteuʼi totatou kā haʼu, koteʼuhi ʼe ina ʼiloʼi lelei ia te ʼu meʼa ʼaē kā hoko mai. ʼE ina fakatuʼutuʼu ia te kā haʼu ʼo te mālamanei. (Isa. 46:9, 10) ʼE fakahā ʼi te lea fakapolofetā Fakatohi-tapu ko “te ʼaho lahi ʼo Sehova kua ovi mai.” (Sofo. 1:14) ʼO ʼuhiga mo te ʼaho ʼaia, ʼe liliu anai ʼo moʼoni ia te ʼu palalau ʼaenī iā Tāʼaga Lea 11:4: “Ko te ʼu meʼa maʼuhiga ʼe mole ʼi ai anai honatou ʼaoga ʼi te ʼaho ʼo te hauhau, kae ko te faitotonu ʼe ina haofaki anai mai te mate.” Kā hoko mai anai te tautea ʼa Sehova ki te mālama ʼa Satana, ko te meʼa ʼaē ʼe maʼuhiga ʼaupitō anai ʼe ko tatatou maʼu ia te ʼofa ʼo te ʼAtua. ʼE mole ʼi ai anai he ʼuhiga ʼo te falā. ʼE ʼui fēnei iā Esekiele 7:19: “ ʼE natou laku anai tanatou paʼaga ki te ʼu ala, pea ko tanatou ʼaulo ʼe liliu anai ko he meʼa fakalialia.” ʼI tatatou ʼiloʼi ia te faʼahi ʼaia, ʼe tokoni mai ke tou foimo fai he puleʼaki fakapotopoto ʼi muʼa ʼo te hoko mai ʼo te ʼaho ʼaia.
11. Ko te faʼahi fea ʼaē ʼe teuteuʼi ai tātou e te ako fakaʼatua ki te kā haʼu?
11 Ko te faʼahi ʼe teuteuʼi ai tātou e te ako fakaʼatua ki te hoko mai ʼo te ʼaho ʼo Sehova, ke tou fakamuʼamuʼa ia te ʼu meʼa ʼaē ʼe maʼuhiga. Neʼe faitohi fēnei ia te ʼapositolo ko Paulo kiā Timoteo: “Fakatotonu kiā nātou ʼaē ʼe maʼu meʼa ʼi te tuʼu ʼo te ʼu faʼahiga meʼa ʼaenī, ke ʼaua naʼa natou maʼu te loto fiahā, ke ʼaua naʼa natou fakatafito tanatou falala ki he ʼu koloa ʼe fakalākilua, kae ki te ʼAtua.” Logolā ʼe mole tou maʼu meʼa, kae ʼe tou lava maʼu he ʼu lelei mai te tokoni ʼaia ʼe haʼu mai te ʼAtua. Koteā ʼaē ʼe fakamaʼua kiai? ʼE mole tonu ke tou tānaki hotatou ʼu koloa fakamālama, kae ʼe tonu ke tou faiga ʼo “gāue ki te fai ʼo te meʼa ʼaē ʼe lelei,” pea ‘ke tou maʼu meʼa ʼi he ʼu gāue lelei.’ ʼI tatatou fakamuʼamuʼa ʼi totatou maʼuli ia te ʼu gāue fakalaumālie, ʼe tou ‘tānaki ai maʼa tātou ia he fakatafito taulekaleka ki te kā haʼu.’ (1 Tim. 6:17-19) Ko te taʼi maʼuli fakasākilifisio ʼaia, ʼe fakahā ʼaki ai he toe fakapotopoto lahi, ohagē ko tona ʼui e Sesu: “Koteā anai hona ʼaoga ki he tagata mo kapau ʼe ina maʼu te mālamanei kātoa, kae ina totogi ʼaki tona nefesi?” (Mat. 16:26, 27) ʼI te kua ovi mai ʼo te ʼaho ʼo Sehova, ko tātou fuli ʼe lelei ke tou fai ia te ʼu fehuʼi ʼaenī: ‘Ko te ʼu koloa fea ʼaē ʼe au lolotoga tānaki nei? ʼE au kaugana koa ki te ʼAtua peʼe ki te ʼu Koloa?’—Mat. 6:19, 20, 24.
12. He koʼē ʼe mole tonu ke tou lotovaivai mo kapau ʼe manukinuki e niʼihi ia tatatou minisitelio?
12 Ko te gāue ʼaē ʼe maʼuhiga age ʼi ‘te ʼu gāue lelei’ ʼaē ʼe talanoa kiai te Folafola ʼa te ʼAtua ke fai e te kau Kilisitiano, ʼe ko te fakamafola ʼo te Puleʼaga pea mo te fai ʼo ni ʼu tisipulo, ʼaē ʼe haofaki ai ia te hahaʼi. (Mat. 24:14; 28:19, 20) Ohagē ko te ʼuluaki sēkulō, ko ʼihi ʼe natou manukinuki tatatou minisitelio. (Lau ia 1 Kolonito 1:18-21.) Kae ko te faʼahi ʼaia ʼe mole ina fetogi ia te maʼuhiga ʼo te logo ʼaē ʼe tou fakamafola, pea ʼe mole ina pulihi ia te maʼuhiga ʼaē ke tou foaki te faigamālie ki te hahaʼi fuli, ke natou tui ki te logo ʼaia, heʼe kei maʼu te temi. (Loma 10:13, 14) ʼI tatatou tokoni ki ʼihi ke natou maʼu ia te ako ʼaē mai te ʼAtua, ʼe tou maʼu ai foki mo tātou ia te ʼu tuʼuga tapuakina.
ʼE Tapuakiʼi e Sehova Tana ʼu Kaugana ʼAē ʼe Natou Maʼuli Fakasākilifisio
13. Koteā te ʼu sākilifisio neʼe fai e te ʼapositolo ko Paulo ʼuhi ko te logo lelei ʼo te Puleʼaga?
13 ʼI muʼa ʼo tana liliu ko he Kilisitiano, neʼe akoʼi ia te ʼapositolo ko Paulo ke fua lelei ia tana ʼu gāue ʼaē ʼi te maʼuli Fakasutea. ʼI tana lagi mole heʼeki taʼu 13 pē lā, neʼe mavae ia mai tona kolo ko Talesi ʼaē neʼe tupu ai, ʼo ʼalu ki Selusalemi ke akoʼi ai ia ia e te tagata faiako lahi ʼo te Lao, ko Kamaliele. (Gāue 22:3) ʼAki te temi, neʼe liliu ia Paulo ʼo makehe age ia tona poto iā nātou ʼaē ʼo tona temi, pea neʼe tuputupu aipē ia tona poto, ʼo feala ai pē hana liliu ko he tagata māʼoluga ʼi te Lotu Fakasutea. (Kal. 1:13, 14) Kae ʼi tana ʼiloʼi ʼaē ia te logo lelei pea mo kau ki te gāue fai fakamafola, neʼe situʼa leva Paulo ki te ʼu meʼa fuli ʼaia. Neʼe fakahemala koa Paulo ʼi tana fai ia te fili ʼaia ʼi tona maʼuli? Kailoa ia. Neʼe ina tohi fēnei: “ ʼE au fakaʼuhiga ko te ʼu meʼa fuli ʼe pulinoa ʼuhi ko te ʼuhiga māʼoluga ʼo te mālama ʼo Kilisito Sesu, toku ʼAliki. ʼUhi ko ia, neʼe au tali ke liʼaki ia meʼa fuli pea ʼe hagē kiā au ko he ʼu tuʼuga ʼotaʼota.”—Filp. 3:8.
14, 15. Ko te tapuakina fea ʼaē ʼe tou logoʼi ʼi tatatou kau ia nātou ʼaē ko te ʼu “kaugā gāue ʼa te ʼAtua”?
14 Ohagē ko Paulo, ko te kau Kilisitiano ʼo te temi nei ʼe natou fai ia te ʼu sākilifisio ʼuhi ko te logo lelei ʼo te Puleʼaga. (Mko. 10:29, 30) ʼE tou maʼuli fakaʼofaʼofa koa ʼi tatatou fai ia te faʼahi ʼaia? Ko Robert ʼaē neʼe tou talanoa ki ai ʼi te kamata ʼo te ʼalatike, neʼe ina maʼu ia te manatu ʼa te tokolahi, ʼi tana ʼui ʼaenī: “ ʼE mole au fakahemala pē lā. Neʼe foaki mai e te minisitelio temi kātoa ia te fiafia pea mo te maʼuli fakafeʼauga, pea mo fakafealagia mai ke au ‘ ʼahiʼahi pea mo vakaʼi ko Sehova ʼe lelei.’ ʼI te temi fuli ʼaē ʼe au fai ai he sākilifisio ʼuhi ko haku ʼu fakatuʼutuʼu fakalaumālie, neʼe tapuakinaʼi aipē au e Sehova ʼo laka age ʼi he sākilifisio neʼe feala ke au fai. ʼE hagē pē ia neʼe mole au fai he sākilifisio. Neʼe au mahu ʼaupitō pē au ʼi te tapuakina!”—Pes. 34:8; Taag. 10:22.
15 Kapau kua fuafualoa takotou fai fakamafola pea mo faiako, lagi mo koutou foki neʼe kua kotou maʼu he ʼu faigamālie ke kotou ʼahiʼahi pea mo sio ko Sehova ʼe lelei. Neʼe ʼi ai koa he ʼu lakaga neʼe kotou logoʼi ai te tokoni ʼo tona laumālie māʼoniʼoni ʼi te temi ʼaē neʼe kotou fakahā ai ia te logo lelei ki niʼihi? Neʼe kua kotou sio koa ki te gigila ʼo te ʼu mata ʼo nātou ʼaē neʼe ʼavahi ʼonatou loto e Sehova ke natou tali ia te logo lelei? (Gāue 16:14) Neʼe tokoni atu koa Sehova ke kotou tauʼi he ʼu fihifihia, ʼo lagi ina foaki atu he faigamālie ke lahi age takotou kau ʼaē ki te minisitelio? Kua tokoni atu koa Sehova ʼi te ʼu temi ʼaē neʼe kotou fihifihia ai, ʼo ina fakafealagia atu ke hoko atu takotou tauhi ʼaē kiā te ia ʼi te ʼu temi ʼaē neʼe kotou logo ai kua koutou vaivai? (Filp. 4:13) Kā tou logoʼi ia te tokoni ʼa Sehova ʼi te temi ʼaē ʼe tou fakahoko ai ia tatatou minisitelio, pea ʼe mahino ai kiā tātou ʼe ko he tahi ʼe maʼuli mʼoʼoni pea ʼe tou logoʼi ʼe tou ovi ki ai. (Isa. 41:10) ʼE mole ko he tapuakina koa lā hatatou kau ia nātou ʼaē ko te ʼu “kaugā gāue ʼa te ʼAtua” ʼi te toe gāue lahi ʼaē ʼo te ako fakaʼatua?—1 Ko. 3:9.
16. ʼE kotou feafeaʼi ʼo ʼuhiga mo te ʼu faiga pea mo te ʼu sākilifisio ʼaē ʼe kotou fai ʼo ʼuhiga mo te ako fakaʼatua?
16 Tokolahi te hahaʼi ʼe natou fia fakahoko he ʼu meʼa ke tologa ʼi tonatou maʼuli kātoa. Neʼe tou vakaʼi, māʼiapē lā mo te ʼu gāue fakatalakitupua ʼaē neʼe fakahoko ʼi te mālama ʼaenī, ʼi te agamāhani ʼe galoʼi vave pē ia. Kae ko te ʼu gāue ʼaē ʼe lolotoga fakahoko nei e Sehova ʼo ʼuhiga mo te fakatapuhā ʼo tona huafa, ʼe mahino papau ia ʼe liliu anai ko he fakamatala ʼe tuku holo ʼi te hisitolia ʼo te hahaʼi ʼa Sehova. Ko te ʼu gāue ʼaia ʼe mole toe galoʼi ia ʼi he temi. (Taag. 10:7; Hep. 6:10) ʼOfa pē ke tou fakamaʼuhigaʼi ia totatou pilivilēsio ʼaē ko te akoʼi ʼo niʼihi ʼo ʼuhiga mo Sehova, ʼaē ko he gāue ʼe mole galoʼi anai ia ʼi he temi.
ʼE Kotou Tali Feafeaʼi Anai?
• Koteā ʼaē ʼe fakamaʼua e Sehova kiā nātou ʼaē ʼe ina akoʼi?
• ʼE feafeaʼi te haga ʼa te ako fakaʼatua ʼo hikihiki ke lelei age ia te maʼuli ʼo te hahaʼi?
• Ko te ʼu ʼaluʼaga fea ʼaē ʼe tapuakinaʼi ai tātou ʼi tatatou tokoni ki niʼihi ke natou maʼu ia te ako fakaʼatua?
[Paki ʼo te pasina 25]
Ko nātou ʼaē ʼe akoʼi e Sehova ʼe natou faʼufaʼu ia te foʼi kautahi fale tautēhina fakamālamanei
[Paki ʼo te pasina 26]
ʼE mole ko he tapuakina koa lā hatatou kau iā nātou ʼaē ko te ʼu “kaugā gāue ʼa te ʼAtua”?