Te Ako ʼAē ʼe Ina Taki Ki Te Maʼuli Heʼegata
1 ʼE ko he meʼa fakafiafia mokā tou sio ki te mata fiafia ʼaē ʼa te hahaʼi ’ʼi tanatou mahino ki te ʼu moʼoni ʼaē ʼe nātou ako ʼi te Folafola ʼa te ʼAtua! ʼE tou fiafia moʼoni mokā tou fakahā ki te hahaʼi ia te ʼatamai mālama ʼo ʼuhiga mo te ʼAtua pea mo tona finegalo. Ko te taʼi ako ʼaia ʼe ina taki te hahaʼi ki te maʼuli heʼegata.—Soa. 17:3.
2 Ko Te Ako ʼe Maʼuhiga Age: ʼE mole māu te ʼu ako ʼe fai ia ʼaho nei pea ko te ʼu ako ʼo ʼuhiga mo te ʼu ʼaluʼaga kehekehe. (Tnk. 12:12) Kae ko te ʼu ako ʼaia ʼe mole lava fakatatau ia ki te maʼuhiga ʼo “te u gaue fakaofolele a te Atua.” (Gaue 2:11) Ko te ako ʼaē ʼe foaki ʼi te malamanei ʼe ina lava fakaōvi koa ia te hahaʼi ki te Tupuʼaga pea mo nātou mahino ki tana fakatuʼutuʼu? ʼE tokoni koa ki te hahaʼi ke nātou mahino peʼe koteā ʼaē ʼe hoko mokā mate he tahi peʼe he koʼe ʼe lahi koa te ʼu mamahi? ʼE ina foaki koa he ʼamanaki ki te hahaʼi? ʼE tokoni koa ki te hikihiki ʼo te maʼuli faka famili? Kailoa ia. ʼE gata pe ki te ako ʼaē ʼe foaki mai e te ʼAtua ʼe tou lava maʼu ai e te hahaʼi he ʼu tali ki te ʼu fehuʼi maʼuhiga ʼaē ʼe nātou fai ʼo ʼuhiga mo te maʼuli.
3 ʼE foaki e te ako fakaʼatua ia te meʼa ʼaē ʼe mole lava foaki e te ʼu ako ʼaē ʼe fai ʼi te malamanei iā ʼaho nei—ko te fetogi ʼo te ʼu aga heʼeʼaoga ʼaē ʼe fai e te hahaʼi. Ko te Folafola ʼa te ʼAtua, ʼe ina lava taʼaki ia te fehiʼa ki te tahi lanu, te fakapalatahi, pea mo te tauhi fakavale ki tokita fenua. (Hep. 4:12) ʼE ina uga te hahaʼi ke nātou līaki te agamālohi kae ke nātou ‘kofuʼi ia te ʼulugaaga foʼou.’ (Kol. 3:9-11; Mik. 4:1-3) Tahi ʼaē meʼa, ʼaki te ako fakaʼatua ʼe feala ki te lauʼi miliona hahaʼi ke nātou maʼu te mālohi moʼo tekeʼi he ʼu aga pea mo he ʼu vavaiʼaga ʼe mole leleiʼia e te ʼAtua.—1 Ko. 6:9-11.
4 ʼE Maʼuhiga Totatou Temi: Ko totatou Tupuʼaga Lahi ʼe ina fakatokaga mai ʼe maʼuhiga te temi ʼaenī ʼe tou māʼuʼuli ai. Pea ko tana ʼu fakamāu ʼaē neʼe fakakikite e te kau faka polofeta, ʼe ko he ʼu fakamāu ki totatou temi, pea ʼe tonu ke tala ki te hahaʼi ʼo te malamanei kātoa. (Apk. 14:6, 7) ʼE ʼafio ia Kilisito ʼi te lagi, pea kua vave pulihi te kautahi faka malamanei ʼo te lotu hala, pea ko te Puleʼaga ʼo te ʼAtua ʼe ina fakaʼauha anai te ʼu puleʼaga fuli ʼaē ʼe tuʼu ʼi te kele. (Tan. 2:44; Apk. 11:15; 17:16) Koia, ʼe tonu ki te hahaʼi ke nātou tali te Hau ʼaē neʼe fakanofo e te ʼAtua ʼi totatou temi, ke nātou hola mai ia Papiloni Lahi, pea ʼaki te tui ke nātou fetapā ki te huafa ʼo Sehova. (Pes. 2:11, 12; Loma 10:13; Apk. 18:4) ʼOfa pe ke tou lagolago lelei ki te foaki ki te hahaʼi ia te ako ʼaē ʼe ina taki anai nātou ki te maʼuli.