ʼE Maʼuhiga Koa Kiā Koutou Ia Te Sākilifisio ʼAē Neʼe Fai e Sehova Moʼo Haofaki Koutou?

“Ke tapuakiʼi ia Sehova, te ʼAtua ʼo Iselaele, he kua ina fakahaga tana tokaga ki tana hahaʼi, pea kua ina fai kiā nātou he fakahao.”—LUKA 1:68.

1, 2. Koteā ʼaē ʼe lava fakatātā kiai ia te ʼaluʼaga kovi ʼaē ʼe tau nei mo tātou, pea koteā ia te ʼu fehuʼi ʼaē kā tou vakaʼi?

KOTOU fakakaukauʼi age muʼa ʼe kotou takoto mahaki ʼi lōpitali. ʼE tuku koutou ʼi te faʼahi ʼaē ʼe tākokoto mahaki ai ia nātou ʼaē ʼe tatau tonatou mahaki pea mo koutou, ʼe ko he mahaki ʼe mole heʼeki maʼu hona faitoʼo. ʼI takotou logo ʼaē ʼe ʼi ai te tōketā ʼe faiga ki te kumi ke maʼu he faitoʼo kiai, kua kotou nofo ʼamanaki leva. Pea ʼe kotou fia ʼiloʼi tuʼumaʼu peʼe kua feafeaʼi ia tana ʼu kumi ʼaē ʼe ina fai. ʼI te tahi ʼaho, ʼe kotou logo kua maʼu ia te faitoʼo ki te mahaki ʼaia! Ko te tōketā ʼaē neʼe ina maʼu ia te faitoʼo, neʼe ina fai ia te ʼu toe sākilifisio lalahi ke maʼu ia te faitoʼo ʼaia. ʼE malave feafeaʼi anai kiā koutou ia te ʼu gāue ʼaē neʼe ina fai? ʼE mahino ia, ʼe kotou logoʼi anai ia he toe fakaʼapaʼapa pea mo he loto fakafetaʼi ki te tagata ʼaia, ʼi tana kua fakafealagia atu leva kiā koutou pea mo ʼihi, ke haofaki koutou mai te mate.

² ʼE lagi ko he ʼaluʼaga fakamataku ʼaenī ʼe tou talanoa kiai, kae ko he meʼa ʼe hoko moʼoni kiā tātou fuli. Ko tātou takitokotahi ʼe tou tau mo te ʼaluʼaga ʼe kovi age ʼosi ia ʼi te fakatā ʼaenī neʼe tou talanoa kiai. ʼE ʼaoga ʼaupitō kiā tātou hotatou haofakiʼaga. (Lau ia Loma 7:24.) Moʼo haofaki ʼo tātou, neʼe lahi ʼaupitō ia te ʼu sākilifisio ʼaē neʼe fai e Sehova. ʼO toe fēia ki tona ʼAlo, neʼe lahi mo te ʼu sākilifisio ʼaē neʼe ina fai. Tou vakaʼi age muʼa, te ʼu fehuʼi maʼuhiga e fā: He koʼē ʼe ʼaoga ke fakaʼāteaina tātou? Koteā ʼaē neʼe tonu ke fai e Sesu ke tupu ʼaki ai hotatou ʼāteaina? Koteā ʼaē neʼe fai e Sehova ke tupu ʼaki ai hotatou ʼāteaina? Pea ʼe tou lava fakahā feafeaʼi ia tatatou loto fakafetaʼi ki te maʼuhiga ʼo te fakaʼāteaina ʼaia mai te ʼAtua?

He Koʼē ʼe ʼAoga Ke Fakaʼāteaina Tātou?

3. Koteā ʼaē ʼe tatau ai ia te agahala pea mo he taʼi mahaki?

³ ʼI te tānaki ʼe heʼeki faʼa fualoa kiai, ko te taʼi mahaki ʼaē neʼe kovi ʼaupitō ʼosi ʼi te hisitolia ʼo te mālamanei, neʼe ko te taʼi mahaki Fakasepania ʼaē neʼe maʼu e te hahaʼi ʼi te taʼu 1918, ʼaē neʼe mamate ai ia te toko hogofulu miliona hahaʼi. ʼE ʼi ai pē foki mo ʼihi mahaki ʼe fakatupu mate. Logolā ʼe ko he tokosiʼi pē ʼaē ʼe pikisia ai, kae ʼe kaugamālie ʼaupitō iā nātou ʼaia ʼaē kā mamate ai.a Kae ʼe feafeaʼi age lā mo kapau ʼe tou fakatatau ia te agahala ki he taʼi mahaki fēia? Tou manatuʼi ia te ʼu palalau ʼaē iā Loma 5:12: “ ʼAki pē te tagata e tahi neʼe hū te agahala ki te mālamanei, pea ʼaki te agahala te mate, pea koia kua mafola ai te mate ki te tagata fuli pē koteʼuhi kua natou agahala fuli.” ʼE fakafuafua ko nātou ʼaē ʼe pikisia ʼi te agahala ʼe ko te toko 100 ki te teau, heʼe ko te hahaʼi heʼe haohaoa fuli ʼe natou agahala. (Lau ia Loma 3:23.) Ko te toko fia ʼaē ʼe mamate ʼuhi ko te agahala? Neʼe tohi e Paulo ko te agahala ʼe taki ia te ‘hahaʼi fuli’ ki te mate.

4. Neʼe koteā te fakatuʼutuʼu ʼa Sehova ʼo ʼuhiga mo te loaloaga ʼo totatou maʼuli, pea koteā ʼaē ʼe kehekehe ai ia tana manatu pea mo te tokolahi iā ʼaho nei?

⁴ Tokolahi iā ʼaho nei ʼe mole natou fakaʼuhiga fēia ia te agahala pea mo te mate. ʼE natou tuʼaniaʼi ia te kua mamate tautonu ʼa te hahaʼi , kae ʼe natou meʼa noaʼi ia te mamate māmālie ʼaē ʼa te hahaʼi ʼaki ia tanatou liliu ʼo mātutuʼa pea mo mamate tuku holo ki te hahaʼi fuli pē, ʼe ko he meʼa kua natou māhani kiai. ʼE faigafua pē ki te hahaʼi hanatou galoʼi ia te fakatuʼutuʼu ʼa te ʼAtua. Kua nounou ʼosi ia totatou maʼuli ʼi te meʼa ʼaē neʼe fakatuʼutuʼu kiai ia te ʼAtua. ʼI tona fakahagatonu, kiā mata ʼo Sehova ʼe mole heʼeki he tahi kua maʼuli ʼi he “ ʼaho kātoa.” (2 Pet. 3:8) Koia ko te Folafola ʼa te ʼAtua ʼe ina ʼui ko totatou maʼuli ʼe hagē pē ia ko te vao ʼaē ʼe homo ake peʼe ko he tuku mānava. (Pes. 39:5; 1 Pet. 1:24) ʼE tonu ke tou manatuʼi tuʼumaʼu ia te ʼu palalau ʼaia. Koteā tona tupuʼaga? Kapau ʼe tou mahino ki te kovi ʼo te “mahaki” ʼaē ʼe tau mo tātou, pea ʼe tou leleiʼia lahi age anai ia te maʼuhiga ʼo te “faitoʼo,” ia totatou fakaʼāteaina.

5. Koteā ia te ʼu fua kovi ʼo te agahala kiā tātou?

⁵ Ke tou mahino ki te kovi ʼo te agahala pea mo tona ʼu ikuʼaga kovi, ʼe tonu ke tou mahino ki tona ʼu fua kovi ʼaē kiā tātou. ʼE feala ʼi te kamata ke faigataʼa, ʼuhi ko te agahala, ʼe mole feala ke tou maʼu te meʼa ʼaē neʼe maʼu e tatatou ʼu ʼuluaki mātuʼa. ʼI te kamata neʼe maʼuli haohaoa ia Atama pea mo Eva. Neʼe haohaoa tonā ʼatamai pea mo tonā sino, pea neʼe fakalogo pē kiā nāua ia te ʼu meʼa ʼaē ʼe nā fia manatu kiai, mo loloto kiai, pea mo tanā ʼu gāue. Koia neʼe feala pē hanā fakatuputupu ia he ʼu kalitātē taulekaleka ʼi tonā ʼuhiga kaugana ʼa Sehova ʼAtua. Kae neʼe nā sītuʼa leva ki te meʼa ʼofa taulekaleka ʼaē neʼe foaki age kiā nāua, ia tonā maʼuli haohaoa. ʼI tanā filifili ʼaē ke nā talagataʼa kiā Sehova, neʼe nā pulihi ai maʼa nāua pea mo tonā hōloga ia te maʼuli ʼaē neʼe fakatuʼutuʼu e Sehova maʼa nātou. (Sen. 3:16-19) ʼI te moʼi temi pē ʼaia, neʼe nā tauteaʼi ia nāua pea mo tātou ʼaki ia te “mahaki” fakamataku ʼaē neʼe tou talanoa kiai. Koia ʼe matatonu ai ia te haga leva ʼaē ʼa Sehova ʼo fakatūʼā nāua. Kae kiā tātou, ʼe ina foaki mai ia te ʼamanaki ʼo te ʼāteaina.—Pes. 103:10.

Koteā ʼAē Neʼe Tonu Ke Fai e Sesu Ke Tupu ʼAki Ai Hotatou ʼĀteaina?

6, 7. (a) Neʼe ʼuluaki fakahā feafeaʼi e Sehova ʼe fakamaʼua anai ia he toe sākilifisio ʼo ʼuhiga mo totatou fakaʼāteaina? (b) Koteā ʼaē ʼe tou ako mai te ʼu sākilifisio ʼaē neʼe momoli e Apele pea mo te ʼu pāteliaka ʼaē neʼe māʼuʼuli ʼi muʼa atu ʼo te Lao?

⁶ Neʼe ʼiloʼi e Sehova ʼe fakamaʼua anai ki te faʼahi ʼaia ia he toe sākilifisio lahi moʼo haofaki ia te hōloga ʼo Atama mo Eva. ʼI te lea fakapolofetā ʼaē iā Senesi 3:15, ʼe tou ako ai ʼo ʼuhiga mo te faʼahi ʼaē neʼe ʼaoga ki te fakaʼāteaina ʼo te hahaʼi. ʼE foaki mai anai e Sehova ia he “hako,” ko he haofakiʼaga, ʼe ina fakaʼauha anai ia Satana, ʼo ina matehi ia ia. Kae ko te tagata haofaki ʼaia ʼe fakamamahiʼi anai, ʼo lavea anai ʼi tona muliʼi vaʼe ʼi hona ʼaluʼaga fakatātā. ʼE ko he meʼa fakalotomamahi pea mo kovi, kae koteā tona fakaʼuhiga? Koteā ʼaē neʼe tonu ke ʼūtakiʼi e Ia ʼaē neʼe Fili e Sehova?

⁷ Moʼo haofaki ia te mālamanei mai te agahala, neʼe tonu ki te tagata haofaki ke ina fai he faifakalelei, he faʼahiga fakatokatoka ʼi te tagata pea mo te ʼAtua, ʼo ina toʼo ia te ʼu fua kovi ʼo te agahala. Koteā ʼaē kā fakamaʼua anai kiai? Neʼe ʼi ai te ʼu meʼa neʼe hoko ʼi te temi muʼa neʼe fakahā ai ʼe fakamaʼua anai ke ʼi ai he sākilifisio. ʼI te temi ʼaē neʼe mōlagaʼi ai e te ʼuluaki tagata agatonu ko Apele ia te ʼu sākilifisio manu kiā Sehova, neʼe ina maʼu ai ia te ʼofa ʼo Sehova. Ki muli age, neʼe toe fēia pē mo te ʼu sākilifisio manu ʼaē neʼe mōlagaʼi e te ʼu pāteliaka ʼaia ʼaē neʼe manavasiʼi ki te ʼAtua, ia Noe, mo Apalahamo, mo Sakopo pea mo Sopo, ʼaē neʼe leleiʼia e te ʼAtua. (Sen. 4:4; 8:20, 21; 22:13; 31:54; Sopo 1:5) ʼI te ʼu sēkulō ki muli age, neʼe toe fakahāhā lelei e te Lao ʼa Moisese ia te maʼuhiga ʼaē ʼo te ʼu sākilifisio.

8. Koteā ʼaē neʼe fai e te pelepitelō lahi ʼi te taʼu fuli ʼi te ʼAho ʼo Te ʼu Faifakalelei?

⁸ ʼI te ʼu sākilifisio maʼuhiga ʼaē neʼe fakamaʼua ʼi te Lao, neʼe kau ai ia te ʼu sākilifisio ʼaē neʼe mōlagaʼi ʼi te taʼu fuli ʼi te ʼAho ʼo Te ʼu Faifakalelei. ʼI te ʼaho ʼaia, ko te pelepitelō lahi neʼe ina fai ia te ʼu gāue fakatātā. Neʼe ina momoli ia te ʼu sākilifisio kiā Sehova ki te fakamolemole ʼaē ʼo te ʼu agahala, ʼuluaki maʼa te ʼu agahala ʼa te kau pelepitelō, pea lua leva maʼa te ʼu agahala ʼa te ʼu telepī ʼaē ʼe mole kau ki te kau pelepitelō. Neʼe hū ia te pelepitelō lahi ki te potu Taputapu ʼAupitō ʼo te tapenakulo peʼe ko te fale lotu, neʼe ko ia pē neʼe feala ke hū kiai pea tuʼa tahi pē ʼi te taʼu. ʼI te potu ʼaia, neʼe ina tū ai te toto ʼo te ʼu sākilifisio ʼi muʼa ʼo te ʼaleka ʼo te fuakava. ʼI ʼoluga ʼo te foʼi puha taputapu ʼaia, ʼi ʼihi temi neʼe ʼi ai te ʼao neʼe mālama, ʼo ina fakatā ia te ʼafio ai ʼa Sehova ʼAtua.—Eke. 25:22; Lev. 16:1-30.

9. (a) ʼI te ʼAho ʼo Te ʼu Faifakalelei, ko ai ʼaē neʼe fakatātā e te pelepitelō lahi, pea koteā ʼaē neʼe fakaʼuhiga kiai ia te ʼu sākilifisioʼi ʼaē neʼe mōlagaʼi? (b) Koteā ʼaē neʼe fakatātā e te hū ʼa te pelepitelō lahi ki te potu Taputapu ʼAupitō?

⁹ Neʼe takitaki e te ʼAtua ia te ʼapositolo ko Paulo ke ina fakamahino ia te fakaʼuhiga ʼo te ʼu gāue fakatātā ʼaia. Neʼe ina fakahā ko te pelepitelō lahi ʼaia neʼe ina fakatā ia te Mēsia, ko Sesu Kilisito, heʼe ko te momoli ʼo te ʼu sākilifisio neʼe ina fakatātā ia te mate fakasākilifisio ʼo Kilisito. (Hep. 9:11-14) Ko te sākilifisio haohaoa ʼaia ʼe ina foaki anai he fakamolemole lahi ki te foʼi kūtuga e lua—te kalasi fakapelepitelō ʼo te ʼu tehina fakanofo e toko 144 000 ʼa Kilisito pea mo te “tahi ʼu ovi.” (Soa. 10:16) ʼI te temi ʼaē neʼe hū ai ia te pelepitelō lahi ki te potu Taputapu ʼAupitō, neʼe ina fakatātā ia te hū ʼaē ʼa Sesu ki te lagi, ʼo fakahā iā muʼa ʼo Sehova ʼAtua ia te maʼuhiga ʼo tana sākilifisio faitotogi.—Hep. 9:24, 25.

10. Koteā ʼaē neʼe fakahā e te ʼu lea fakapolofetā ʼo te Tohi-Tapu ʼe hoko anai ki te Mēsia?

¹⁰ ʼE hā mai, ʼe fakamaʼua anai ki te fakaʼāteaina ʼo te hōloga ʼo Atama mo Eva ia te toe sākilifisio lahi. ʼE tonu anai ki te Mēsia ke ina sākilifisioʼi ia tona maʼuli! Ko te ʼu polofetā ʼi te Koga Tohi Fakahepeleo, ʼe lahi ia te ʼu fakamahino ʼe natou fai ʼo ʼuhiga mo te moʼoni ʼaia. Ohagē lā, neʼe fakahā fakahagatonu e te polofetā ko Taniela ko te “Mēsia te Takitaki” ʼe “toʼo” anai ia peʼe matehi, ke feala ai ia he “fai [ʼo] he fakalelei ʼo ʼuhiga mo te hala.” (Tan. 9:24-26) Neʼe fakakikite e Isaia ko te Mēsia ʼe liʼakina anai, ʼe fakatagaʼi anai, pea ʼe matehi anai, peʼe lavelavea anai, ke tupu ʼaki ai ia hana fua ia te ʼu hala ʼa te hahaʼi heʼe haohaoa.—Isa. 53:4, 5, 7.

11. Ko te ʼu ʼaluʼaga fea ʼaē neʼe fakahā ai e te ʼAlo ʼo Sehova ia tana lotolelei ʼo sākilifisioʼi tona maʼuli moʼo fakaʼāteaina ʼo tātou?

¹¹ ʼI muʼa ʼo tana hifo mai ʼo maʼuli ʼi te kele, neʼe mahino ki te ʼAlo ʼulutokotahi ʼo te ʼAtua ia te ʼu sākilifisio lahi ʼaē kā ina fai ke tupu ʼaki ai hatatou maʼu ia te ʼāteaina. ʼE tonu anai ke mamahi ʼaupitō pea mo matehi leva ia. ʼI tona akoʼi age e tana Tamai kiā ia te ʼu moʼoni ʼaia, neʼe lotovaivai ai koa pe neʼe fakafeagai kiai? Kailoa ia, neʼe lotolelei ʼo fakalogo ki te ʼu fakatotonu ʼa tana Tamai. (Isa. 50:4-6) Lagi ʼi tana kei maʼuli ʼi te kele, neʼe fakalogo Sesu, ʼo ina fai ia te finegalo ʼo tana Tamai. Koteā tona tupuʼaga? Neʼe tali kiai, ʼaki te ʼu palalau ʼaenī: “ ʼE au ʼofa ki te Tamai.” Neʼe ina toe tali fēnei: “ ʼE mole he tahi ʼe ina maʼu he ʼofa ʼe lahi age ʼi te meʼa ʼaenī: ke foaki e he tahi tona nefesi maʼa tona ʼu kaumeʼa.” (Soa. 14:31; 15:13) Koia neʼe fakaʼāteaina tāfito tātou ʼuhi ko te ʼofa ʼo te ʼAlo ʼo Sehova. Logolā neʼe ina sākilifisioʼi ai tona maʼuli haohaoa, kae neʼe fiafia ia ʼi tona fai moʼo haofaki ʼo tātou.

Koteā ʼAē Neʼe Fai e Sehova Ke Tupu ʼAki Ai Hotatou ʼĀteaina?

12. Ko te finegalo ʼo ai ʼaē ke fai ia te sākilifisio faitotogi, pea he koʼē neʼe ina fai ia te faʼahi ʼaia?

¹² Neʼe mole ko Sesu ʼaē neʼe ina fakatuʼutuʼu ke fai ia te sākilifisio faitotogi. Ko te puleʼaki ʼaia ki te fakaʼāteaina, neʼe ko he fakatuʼutuʼu tāfito ʼo te finegalo ʼo Sehova. Neʼe fakahā e te ʼapositolo ko Paulo, ko te ʼaletale ʼaē ʼi te fale lotu, ʼaē neʼe mōlagaʼi ai ia te ʼu sākilifisio, neʼe natou fakatātā ia te finegalo ʼo Sehova. (Hep. 10:10) Koia ko te ʼāteaina ʼaē ʼe tou maʼu ʼaki te sākilifisio ʼo Kilisito, ʼe ko he fakatuʼutuʼu ʼe tonu ke tou fakamālo ʼuluaki pea mo tāfito kiā Sehova. (Luka 1:68) ʼE ko he fakahā ʼaia ʼo tona finegalo haohaoa pea mo tona ʼofa lahi ʼaē ki te mālamanei.—Lau ia Soane 3:16.

13, 14. ʼE tokoni feafeaʼi mai ia te faʼifaʼitaki ʼa Apalahamo ke tou mahino ki te maʼuhiga ʼo te sākilifisio ʼaē neʼe fai e Sehova maʼa tātou?

¹³ Koteā ʼaē neʼe sākilifisioʼi e Sehova ʼi tana fakahā ʼaia tona ʼofa ʼaē kiā tātou? ʼE faigataʼa kiā tātou ia hatatou fakakaukauʼi ia te faʼahi ʼaia. Kae ʼe ʼi ai te fakamatala Fakatohi-tapu ʼe lava tokoni mai ke tou mahino lelei ai ki te meʼa ʼaē neʼe hoko. Neʼe kole e Sehova ki te tagata agatonu ko Apalahamo ke ina fakahoko ia te meʼa faigataʼa ʼaupitō, ke ina mōlagaʼi fakasākilifisio ia tona foha ko Isaake. Ko Apalahamo neʼe ko te tamai ʼofa. Neʼe ʼui age e Sehova kiā ia ʼo ʼuhiga mo Isaake, ʼe ko “tou foha ʼulu tokotahi ʼaē ʼe ke ʼofa mamahi ai.” (Sen. 22:2) Kae kiā Apalahamo neʼe maʼuhiga age kiā ia, ia te fai ʼo te finegalo ʼo Sehova ʼi tona ʼofa ʼaē kiā Isaake. Neʼe mulimuli pē ia Apalahamo ki te fakatotonu ʼa te ʼAtua, ʼo fakalogo, kae neʼe mole fakagafua e Sehova ke fai e Apalahamo ia te sākilifisio ʼaē kā ina fai anai e Ia totonu ki ʼamuli ʼo ʼuhiga mo Sesu. Neʼe fekauʼi ifo e te ʼAtua ia he ʼāselo moʼo tāʼofi ia te nima ʼo Apalahamo ʼi muʼa ʼo hana sākilifisioʼi tona foha. Neʼe fakatotonu ia e Apalahamo ke fakalogo ki tona ʼAtua ʼi te ʼahiʼahi faigataʼa ʼaia, he neʼe tui papau ko te ʼamanaki pē e tahi ke toe sio ki tona foha, ʼe ko te fakatuʼuake. Kae neʼe tui mālohi ia ko te ʼAtua ʼe ina fakahoko anai ia te fakatuʼutuʼu ʼaia. ʼIo, neʼe ʼui e Paulo ko Apalahamo neʼe ina tali ia Isaake mai te fakatuʼuake ohagē ko “he faʼahiga faʼifaʼitaki.”—Hep. 11:19.

¹⁴ ʼE kotou lava fakakaukauʼi age muʼa ia te lotomamahi ʼo Apalahamo, ʼi tana ʼamanaki teuteuʼi ʼaē ke ina sākilifisioʼi tona foha? Koia ko te meʼa ʼaē neʼe logoʼi e Apalahamo ʼe ʼaoga moʼo fakatā ia te meʼa ʼaē neʼe logoʼi e Sehova, ʼi tana sākilifisioʼi ia ia ʼaē ʼe ina higoaʼi ko “toku ʼAlo, ia te ʼofaina.” (Mat. 3:17) Kae tou manatuʼi, ko te mamahi ʼaē neʼe tau mo Sehova neʼe lahi ʼaupitō age ia. Ko ia pea mo tona ʼAlo neʼe nā felōgoi lelei iā taʼu ʼe lauʼi miliona, lagi taʼu miliale pē lā. Neʼe gāue fiafia te ʼAlo mo tana Tamai, ko hana “tufuga faiva” ʼofaina, pea mo tana Tagata Fakahoko Palalau, “te Folafola.” (Taag. 8:22, 30, 31; Soa. 1:1) Ko te lotomamahi ʼaē neʼe tau mo Sehova ʼi te temi ʼaē neʼe gaohi koviʼi ai tona ʼAlo, mo fakalainoaʼi, pea mo matehi leva ohagē ko he tagata agakovi, ʼe mole feala ke tou mahino kātoa kiai. Neʼe ko he toe sākilifisio lahi ʼaē neʼe fai e Sehova moʼo fakaʼāteaina ʼo tātou! Koia, ʼe feafeaʼi hatatou fakahā ʼe maʼuhiga kiā tātou te fakaʼāteaina ʼaia?

ʼE Feafeaʼi Hakotou Fakahā ʼe Maʼuhiga Kiā Koutou Ia Te Fakaʼāteaina?

15. Neʼe hoki kātoa feafeaʼi ia te faifakalelei lahi ʼaē neʼe fai e Sesu, pea koteā ʼaē neʼe fakafealagia ʼaki te faʼahi ʼaia?

¹⁵ Neʼe hoki kātoa ia te faifakalelei ʼaē neʼe fai e Sesu, ʼi tona kua ʼosi fakatuʼuake ʼaē ki selō. ʼI tana kua toe fakatahi leva ʼaē mo tana Tamai ʼofaina, neʼe ina foaki age leva ki Ai ia te maʼuhiga ʼaē ʼo tana sākilifisio. Neʼe iku ai leva ki te ʼu tapuakina lahi. Neʼe maʼu kātoa ai leva ia te fakamolemole, ʼuluaki ki te ʼu agahala ʼo te ʼu tehina fakanofo ʼo Kilisito, pea lua leva ki te ʼu agahala ʼo “te mālamanei kātoa.” ʼAki te sākilifisio ʼaia, ko nātou fuli ʼaē iā ʼaho nei ʼe natou fakahemala moʼoni ki ʼanatou agahala pea mo liliu ko ni ʼu tisipulo moʼoni ʼa Kilisito, ʼe feala ai ke natou maʼa iā muʼa ʼo Sehova ʼAtua. (1 Soa. 2:2) ʼE fakaʼuhiga feafeaʼi ia te faʼahi ʼaenī kiā koutou?

16. Koteā ʼaē ʼe feala ke tou fakaʼaogaʼi moʼo fakatā pe koʼē ʼe tonu ke tou loto fakafetaʼi ki te fakaʼāteaina ʼaē neʼe fakafealagia e Sehova maʼa tātou?

¹⁶ Tou toe vakaʼi age muʼa ia te faʼifaʼitaki ʼaē neʼe tou talanoa kiai ʼi te kamata. Kotou fakakaukauʼi age muʼa ʼo ʼuhiga mo te tōketā ʼaē neʼe ina maʼu te faitoʼo ki te mahaki, ʼe ʼalu ki te kau mahaki ʼaē ʼe tākokoto tahi mo koutou, ʼo ina ʼui fēnei age kiā nātou: Ko nātou fuli ʼaē ʼe natou tali te faitoʼo pea mo muliʼi tona ʼu tapu ʼe natou logo lelei moʼoni anai. ʼE feafeaʼi anai mo kapau tokolahi ʼi te kau mahaki ʼe mole natou tali te ʼu fakatotonu ʼa te tōketā, ʼo natou takuʼaki ʼe faigataʼa fau hanatou muliʼi te faitoʼo peʼe ko te ʼu tapu ʼo te faitoʼo ʼaia? ʼE kotou muliʼi anai tanatou tonu, logolā takotou ʼiloʼi papau ʼaē ʼe fua lelei moʼoni anai ia te faitoʼo ʼaia? Kailoa ia! ʼE mahino ia, ʼe kotou fakafetaʼi anai ʼo ʼuhiga mo te faitoʼo ʼaia pea mo kotou muliʼi fakalelei ia te ʼu fakatotonu ʼa te tōketā, ʼo lagi kotou talanoa ki niʼihi ʼo ʼuhiga mo te tonu ʼaē neʼe kotou fai. ʼE tou fakahā anai ʼi hona ʼaluʼaga ʼe lahi age ia, tatatou loto fakafetaʼi ʼaē kiā Sehova ʼo ʼuhiga mo te fakaʼāteaina ʼaē neʼe ina fakafealagia ʼaki te sākilifisio faitotogi ʼo tona ʼAlo.—Lau ia Loma 6:17, 18.

17. Koteā ʼaē ʼe feala ke tou fai moʼo fakahā ia tatatou loto fakafetaʼi ki te ʼu sākilifisio ʼaē neʼe fai e Sehova moʼo fakaʼāteainaʼi ʼo tātou?

¹⁷ Kapau ʼe tou loto fakafetaʼi ki te ʼu sākilifisio ʼaē neʼe fai e Sehova pea mo tona ʼAlo ke fakaʼāteaina tātou mai te agahala pea mo te mate, pea ʼe tou fakahā anai. (1 Soa. 5:3) ʼE tou tauʼi anai te ʼu holi ʼaē ki te agahala. ʼE mole tou fai anai he ʼu aga heʼeʼaoga pea mo maʼuli fakamālualoi, ʼaē ʼi te agamāhani ʼe hoko tuʼumaʼu. ʼAki te taʼi faʼahiga aga ʼaia, ʼe tou fakahā ai anai ʼe mole maʼuhiga kiā tātou ia te totogi peʼe mole tou fakafetaʼi kiai. Kae ʼe tou fakahā anai ia tatatou loto fakafetaʼi, ʼo tou gāue kinakina ke tou taupau maʼu ia tatatou ʼu felōgoi lelei ʼaē mo te ʼAtua. (2 Pet. 3:14) ʼE tou fakahā anai ia te faʼahi ʼaia, ʼo tou tala ki niʼihi ia te ʼamanaki taulekaleka ʼo te fakaʼāteaina, ke feala mo nātou hanatou maʼa iā muʼa ʼo Sehova pea mo maʼu ia te ʼamanaki ʼo he maʼuli heʼegata ʼi te kā haʼu. (1 Tim. 4:16) ʼE mahino ia ʼe tuha mo Sehova pea mo tona ʼAlo ia te temi pea mo te mālohi ʼaē ʼe tou fakaʼaogaʼi moʼo fakavikivikiʼi ʼo nāua! (Mko. 12:28-30) Kotou fakakaukauʼi age muʼa! ʼE tou lava fakaʼamu fakafiafia ki te temi ʼaē kā pulihi kātoa ai anai ia te agahala ʼaē ʼi totatou kakano. ʼE tou lava maʼu ia te maʼuli ʼaē neʼe loto kiai ia te ʼAtua, ia te maʼuli haohaoa mo heʼegata, ʼuhi ko te ʼu sākilifisio ʼaē neʼe fai e Sehova moʼo fakaʼāteainaʼi ʼo tātou!—Loma 8:21.

[Nota]

ʼE Kotou Tali Feafeaʼi Anai?

• He koʼē kua ʼaoga fakavilivili kiā koutou ia he fakaʼāteaina?

• ʼE malave feafeaʼi kiā koutou ia te sākilifisioʼi ʼaē e Sesu tona maʼuli?

• ʼE malave feafeaʼi kiā koutou ia te meʼa ʼofa ʼaē ʼa Sehova, ko te totogi?

• Koteā ʼaē ʼe ina uga koutou ke kotou fai moʼo tali ki te ʼu fakatuʼutuʼu ʼa Sehova ʼo ʼuhiga mo tokotou fakaʼāteaina?

[Paki ʼo te pasina 29]

ʼI te ʼAho ʼo Te ʼu Faifakalelei, neʼe fakatā e te pelepitelō lahi ʼo Iselaele ia te Mēsia

[Paki ʼo te pasina 30]

Ko te lotolelei ʼaē ʼa Apalahamo ke ina mōlagaʼi ia tona foha, ʼe ina akoʼi mai ia te toe sākilifisio lahi ʼaē neʼe fai e Sehova