Ko Te Kau Fai Faka Mafola ʼo Te Puleʼaga
Neʼe Fakapale Tanatou Tui
NEʼE makehe te tui ʼa te ʼapositolo ko Paulo, pea neʼe ina fakaloto mālohiʼi tona ʼu tēhina mo tuagaʼane ke nātou maʼu te tui. Neʼe ina ʼui fēnei: “He ko ae e laka ki te Atua, e maua ke tui, e mauli pea e ina fakapale natou e natou kumi iaʼia.” (Hepeleo 11:6) Ko te ʼu meʼa ʼaenī neʼe hoko ʼi Mozambique, pea ʼe nātou fakahā mai peʼe fakapale feafeaʼi e Sehova te tui mālohi pea ʼe ina tali feafeaʼi ki te ʼu faikole fakamalotoloto.
• Ko te tuagaʼane vitua ʼe maʼuli ʼi te koga fenua ʼo Niassa ʼi te potu noleto, neʼe ina fakakaukauʼi peʼe ʼalu feafeaʼi anai mo tana ʼu toe e toko ono, ki te Fakatahi Faka Tisitilike ʼaē ko tona kupu tāfito: “Ko Te Faʼahiga Maʼuli ʼAē ʼe Fakamaʼua Mai e Te ʼAtua.” Ko tana foʼi falā neʼe ina maʼu ʼaki pe te ʼu meʼa ʼaē neʼe ina fakatau ʼi te lapalasi fakatauʼaga meʼa ʼo te kolo, kae ʼi te fakaōvi mai ʼo te ʼaho ʼo te fakatahi, neʼe feʼauga pe tana falā moʼo totogi tanatou ʼolo ʼi te saliote afi kae neʼe mole feʼauga ki tanatou toe liliu mai. Kae neʼe falala ʼe foaki anai e Sehova te ʼu meʼa ʼaē ʼe ʼaoga kia ia, pea neʼe ina fakahoko tana fakatuʼutuʼu ʼaē ke ʼalu ki te fakatahi.
Neʼe heka ʼi te saliote afi mo tana ʼu toe e toko ono. Lolotoga te fagona, neʼe ʼalu age te tagata vakaʼi tikite, ʼo kumi age tana tikite. Neʼe ina tokagaʼi ʼe ina tau te kiʼi kate ʼi tona kofu, pea neʼe ina fehuʼi age pe koteā te kiʼi kate ʼaia. Neʼe ʼui age e te tuagaʼane neʼe ko te kiʼi kate ʼe ina fakahā ʼe ʼalu ki te fakatahi faka tisitilike ʼa te kau Fakamoʼoni ʼa Sehova. Neʼe fehuʼi age fēnei e te tagata: “Kofea ʼaē ka fai ai te fakatahi ʼaia?” ʼI tana fakahā age ʼe fai anai te fakatahi ʼi te ʼu tafaʼaki ʼo te koga fenua ʼo Nampula, ia kilometa e 300, neʼe ina ʼui age ki te tuagaʼane ke ina totogi pe te vaelua ʼo te totogi ʼo te tikite! Neʼe ina faka fealagia ai ke ina fakaʼaogaʼi te toe ʼo tana falā moʼo totogi ʼaki te tikite ʼo tanatou toe liliu. Neʼe fiafia lahi ai te tuagaʼane ʼaia, he neʼe ina tuku tana falala kia Sehova!—Pesalemo 121:1, 2.
• Lolotoga teitei taʼu e 25, ko te fafine tauhi lotu neʼe faikole ki te ʼAtua ke ina fakahā age te faʼahiga tauhi ʼaē ʼe tonu ke ina fai. Ko te lotu ʼaē neʼe kau ai neʼe ina fakafio tana ʼu toʼotoʼoga faka lotu pea mo te ʼu talatisio, pea neʼe mole tui papau ia ʼe tali e te ʼAtua te faʼahiga tauhi ʼaia.
ʼE ina fakamatala fēnei: “Neʼe ʼau manatuʼi tuʼumaʼu te ʼu palalau ʼaē neʼe fai e Sesu ia Mateo 7:7: ‘Koutou kole, pea e foaki atu anai kia koutou, koutou kumi pea e koutou mau anai: koutou tukituki pea e avahi anai kia koutou.’ ʼI taku manatuʼi te vaega ʼaia, neʼe ʼau faikole tuʼumaʼu ai ki te ʼAtua ke ina taki ʼau ki te moʼoni. ʼI te tahi ʼaho, neʼe kole e te pasitea ʼo tamatou ʼēkelesia kia nātou fuli ʼaē neʼe gāue ʼi te lapalasi fakatauʼaga meʼa ʼo te kolo, ke nātou foaki he falā pea mo ni ʼu koloā ke feala ai hana tapuakiʼi nātou. Neʼe ʼau manatu ko te kole ʼaia ʼe mole ʼalutahi mo te Tohi-Tapu, koia neʼe mole ʼau foaki meʼa ʼofa ai. ʼI te sio ʼa te pasitea ki taku mole foaki ‘meʼa ʼofa,’ neʼe ina kamata leakoviʼi ʼau ia muʼa ʼo te hahaʼi fuli ʼo te ʼēkelesia. ʼI te ʼaho ʼaia neʼe ʼau mahino ai ʼe mole loto e te ʼAtua ke tou tauhi feiā kia te ia, pea neʼe ʼau mavae ai ʼi te lotu ʼaia. Kae neʼe ʼau haga faikole ke ʼau maʼu te moʼoni.
Ki muli age, ʼaki he lototoʼa, neʼe ʼau ʼalu ki toku kāiga neʼe ko te Fakamoʼoni ʼa Sehova. Neʼe ina foaki mai te kiʼi pepa lotu, pea ʼi taku lau te kiʼi pepa ʼaia neʼe ʼau ʼiloʼi atu aipe kua tali e te ʼAtua taku ʼu faikole. ʼAki te temi, ko te tagata ʼaē neʼe ma nonofo neʼe ina kamata leleiʼia te ʼu moʼoni ʼo te Tohi-Tapu, pea neʼe ma ʼohoana ai. Kae ki muli age, neʼe mahaki kovi toku ʼohoana. Kae ʼo aʼu ki tona mate, neʼe ina fakaloto mālohiʼi ʼau ke ʼau haga haʼele ʼi te ala ʼo te moʼoni, ke feala ai hamā toe felāveʼi ʼi te Palatiso.
ʼE ʼau fakafetaʼi tuʼumaʼu anai kia Sehova, he neʼe ina tali ki taku ʼu faikole pea neʼe ina fakahā mai te tauhi ʼaē ʼe lelei. Neʼe ina toe tali ki taku ʼu faikole, he neʼe ʼau sio ki te liliu ʼo taku ʼu toe e toko valu ko he ʼu kaugana ʼa Sehova kua foaki tonatou maʼuli kia te ia.