Koutou Tokagaʼi Te Folafola Faka Polofeta ʼa Te ʼAtua
“ ʼE kua mātou maʼu te tala ʼa te kau polofeta kua moʼoni ia, pea ʼe lelei ke koutou tokaga kiai.”—2 Petelo 1:19, MN.
1, 2. Koteā te ʼu fakamatala ʼaē ʼe feala ke koutou fai ʼo ʼuhiga mo te ʼu mesia loi?
TALU mai ni ʼu sēkulō, neʼe faigaʼi e te ʼu mesia loi ke nātou fakakik ite te ʼu meʼa ʼaē ka hoko. ʼI te nima sēkulō ʼo totatou temi, ko te tagata ʼaē neʼe ina ʼui ʼe higoa ko Moisese, neʼe ina fakalotoʼi te kau Sutea ʼo te motu ko Kelete ke nātou tui ko ia te mesia, pea ʼe ina faka ʼāteaina anai te hahaʼi ʼo Kelete mai tonatou maʼuli popūla. ʼI te ʼaho ʼaē neʼe tonu ke hoko ai tonatou faka ʼāteaina, neʼe nātou muliʼi ia ia ʼo aʼu ki te potu māʼoluga ʼaē neʼe feala ke nātou sio ai ki te Tai Metitelanea. Neʼe ina ʼui age, kapau ʼe nātou fakatō ki te tai pea ʼe ava lua anai. Neʼe malemo te tokolahi ʼo te ʼu hahaʼi ʼaē neʼe fakatō ki te tai, pea neʼe hola ai te mesia loi.
2 ʼI te 12 sēkulō, neʼe hā te tahi “mesia” ʼi Yémen. Neʼe kole age e te calife, pe ko te pule, ke ina fakahoko he fakaʼiloga ʼo tona ʼuhiga mesia. Neʼe ʼui e te “mesia” ʼaia ke fakatotonu e te calife ke tuʼusi tona kia. Neʼe ina fakakikite ko te fakaʼiloga ʼaē ka ina foaki, ʼe ko tona foimo fakatuʼuake anai ʼo ia. Neʼe ʼio te calife ki te fakatuʼutuʼu ʼaia—pea neʼe gata ai te “mesia” ʼaia.
3. Ko ai te Mesia moʼoni, pea koteā ʼaē neʼe fakamoʼoni e tona minisitelio?
3 ʼE iku noa fuli te ʼu mesia loi pea mo tanatou ʼu lea fakakikite, kae ʼe mole tou fakahemala anai ʼi he temi mo kapau ʼe tou tokagaʼi te folafola faka polofeta ʼa te ʼAtua. Ko Sesu Kilisito, te Mesia moʼoni, neʼe ina fakahoko te tuʼuga lea faka polofeta faka Tohi-Tapu ʼi tona maʼuli. Ohage la, neʼe fakaʼaogaʼi e te tagata fai evaselio ko Mateo te lea faka polofeta ʼa Isaia ʼi tana tohi fēnei: “ ‘Kele o Sepulone mo te kele o Nefetali, ala o te tai i te tafaaki o te Solotane, Kalilea o te u puleaga. Ko te hahai nee nofo i te fakapouli kua natou mamata ki he toe malama: pea ko te hahai nee nofo i te kele o te malumalu o te mate kua mafoa ake te malama kia natou.’ Nee kamata ai e Sesu tana fai akonaki mo folafola maʼana: ‘Koutou tafoki, he kua fakaovi mai te puleaga o Selo.’ ” (Mateo 4:15-17; Isaia 9:1, 2) Ko Sesu neʼe ko te “toe malama” ʼaia, pea ko tona minisitelio neʼe ina fakamoʼoni ko ia te Polofeta ʼaē neʼe talanoa ki ai ia Moisese. Ko nātou ʼaē ʼe mole nātou fia fakalogo anai kia Sesu, ʼe fakaʼauha anai nātou.—Teutalonome 18:18, 19; Gaue 3:22, 23.
4. Neʼe fakahoko feafeaʼi e Sesu ia Isaia 53:12?
4 Tahi ʼaē meʼa, neʼe fakahoko e Sesu te folafola faka polofeta ʼa Isaia 53:12: “Neʼe ina folahi tona nefesi ʼi te mate, pea neʼe lau ia ia ʼi te kau agahala; pea ko ia totonu neʼe ina ʼamo te agahala ʼa te tokolahi, pea neʼe ina hūfaki te kau agahala.” ʼI tana ʼiloʼi ʼaē ʼe mole kei tuai pea ina foaki anai tona maʼuli ohage ko he totogi, neʼe fakaloto mālohiʼi e Sesu te tui ʼo tana kau tisipulo. (Maleko 10:45) Neʼe ina fai te faʼahi ʼaia ʼi he ʼaluʼaga makehe ʼi tana fetogi faka milakulo.
Te Fetogi Faka Milakulo ʼe Ina Fakamālohiʼi Tanatou Tui
5. ʼAki takotou faʼahiga palalau, e feafeaʼi hakotou fakamatala te fetogi faka milakulo?
5 Ko te fetogi faka milakulo neʼe ko he meʼa faka polofeta. Neʼe ʼui e Sesu: “E amanaki haele mai te Foha o te tagata i te kololia o tana Tamai fakatahi mo tana kau aselo . . . Mooni, e au tala atu kia koutou, e tutuu i heni, ia natou ae e mole natou iloi anai te mate, i mua o tanatou mamata ki te haele mai o te Foha o te tagata mo tona Puleagahau.” (Mateo 16:27, 28) Neʼe sio moʼoni koa ʼihi ʼapositolo ki te haʼu ʼa Sesu ʼi tona Puleʼaga? ʼE ʼui fēnei ia Mateo 17:1-7: “I te hili aho e ono ki ai, pea too e Sesu ia Petelo, mo Sakopo mo tona tehina ko Soane, pea ina taki ake natou ki te lavaki i he fuga mouga maoluga. Pea nee fetogi fofoga i onatou mua.” Neʼe ko he lakaga maʼuhiga ʼaupito! “Nee huhulu ona fofoga o hage ko te laa, pea nee mamaʼa ona teu o hage ko te malama. Pea nee natou mamata kia Moisese mo Elia nee feleu mo ia.” Tahi ʼaē meʼa, neʼe “malumaluʼi natou e he ao malama,” pea neʼe nātou logo ki te leʼo totonu ʼo te ʼAtua neʼe ina ʼui fēnei: “ ‘E ko toku Alo aeni, te Ofaina, ia te ia e katoa ai toku loto, koutou fakalogo kia te ia!’ Pea i te fagono ki ai a te u tisipulo, nee natou manavahe aupito pea nee natou fetokahi foʼohifo ki te kele. Pea nee fakaoviʼage Sesu o kapa ifo kia natou mo ui maʼana: ‘Koutou tutuʼu ake pea aua tautou manavahe.’ ”
6. (a) He koʼe neʼe ʼui e Sesu ko tana fetogi neʼe ko he meʼa fakatātā? (b) Koteā ʼaē neʼe fakakikite e te fetogi faka milakulo ʼaia?
6 Neʼe lagi hoko te meʼa maʼuhiga ʼaia ʼi te tumutumu ʼo te Moʼuga ʼo Helemone, ʼaē neʼe nonofo po katoa ai ia Sesu pea mo tana kau ʼapositolo e tolu. ʼE mahino ia, neʼe hoko te faʼahi ʼaia ʼi te pōʼuli, ʼo nātou sio lelei ai ki te mālama. Ko te tahi tupuʼaga ʼo te ʼui e Sesu neʼe ko he sio fakatātā, he neʼe mole tutuʼu moʼoni ʼi ʼona tafa ia Moisese pea mo Elia ʼaē kua fualoa tanā mamate. Neʼe ko Sesu tokotahi pe ʼaē neʼe tuʼu moʼoni ʼi te moʼuga ʼaia. (Mateo 17:8, 9) Kia Petelo, mo Sake pea mo Soane, ko te mālamagia ʼo te fetogi faka milakulo ʼaia, neʼe ko he fakaʼiloga fakatomuʼa pea mo fakaofoofo ʼo te mālohi faka hau pea mo faka kolōlia ʼo Sesu. Ko Moisese pea mo Elia, ʼe nā fakatātā te kau fakanofo ʼaē ʼe nātou kaugā hau anai mo Sesu, pea ko te meʼa ʼaē neʼe hā ʼe ko he fakamoʼoni lahi ki tona ʼuhiga hau pea mo te Puleʼaga.
7. E tou ʼiloʼi feafeaʼi neʼe manatuʼi lelei e Petelo te fetogi faka milakulo?
7 Ko te fetogi ʼaia neʼe ina fakaloto mālohiʼi te tui ʼa te kau ʼapositolo e tolu ʼaē ʼe maʼuhiga anai tanatou gāue ʼi te kokelekasio faka Kilisitiano. Ko te huhulu ʼo te fofoga ʼo Kilisito, mo te mālamagia ʼo tona ʼu kofu, pea mo te leʼo ʼo te ʼAtua ʼaē neʼe ina ʼui ko Sesu ʼe ko Tona ʼAlo ʼofaina ʼaē ʼe tonu ke nātou fakalogo ki ai—ko te ʼu meʼa fuli ʼaia neʼe ʼi ai tonatou fakatuʼutuʼu. Kae neʼe hoki feala pe ki te kau ʼapositolo ke nātou fakamatala te meʼa ʼaē neʼe nātou sio kiai, ʼi te ʼosi fakatuʼuake ʼo Sesu. Hili kiai ia taʼu e 32, neʼe kei manatuʼi lelei e Petelo te faʼahi ʼaia. ʼI tana talanoa kiai pea mo tona faka ʼuhiga, neʼe ina tohi fēnei: “Koteuhi nee mole matou mulimuli ki he u fagana fakapoto, i te temi nee matou fakailoilo ai kia koutou te haele fakamafimafi mai o totatou Aliki ko Sesu Kilisito, kae nee matou siomata ki tona Mafimafi. He nee ina tali mai te Atua te Tamai, te fakaapaapa mo te kololia, i te temi nee hifo mai ai te leo mai te kololia hoihoifua o te Atua o folafola maʼana: ‘Ko Ia aeni e ko toku Alo ofaina, e ko Ia ae nee taau mo au ke au filifili.’ Pea ko te leo aeni nee matou logoʼi, nee hifo ia mai te lagi i te temi nee matou fakatahi ai mo ia i te fuga mouga taputapu.”—2 Petelo 1:16-18.
8. (a) Koteā ʼaē neʼe faka maʼuhigaʼi e te ʼu palalau ʼa te ʼAtua ʼo ʼuhiga mo tona ʼAlo? (b) Koteā ʼaē neʼe fakatātā e te ʼao ʼaē neʼe hā ʼi te fetogi ʼa Sesu?
8 Neʼe ko he meʼa maʼuhiga ʼaupito te ʼui ʼaenī ʼa te ʼAtua: “E ko toku Alo aeni, te Ofaina, ia te ia e katoa ai toku loto, koutou fakalogo kia te ia!” Ko te palalau ʼaia ʼe ina faka maʼuhigaʼi tāfito ia Sesu ʼi tona ʼuhiga Hau ʼaē neʼe fakanofo e te ʼAtua, pea ʼe tonu ke fakalogo ki ai te ʼu meʼa fuli ʼaē neʼe fakatupu. Ko te ʼao ʼaē neʼe ina malumaluʼi nātou, neʼe ko he fakahā ʼaia ko te meʼa ʼaē neʼe nātou sio kiai, ʼe hoko anai ʼi te fakapulipuli. ʼE mahino pe kiai ia nātou ʼaē ʼe nātou sio ʼaki te fakasiosio tonu, pea ʼe nātou ʼiloʼi anai “te fakailoga” ʼo te ʼi henī fakapulipuli ʼa Sesu ʼi te mālohi ʼo tona Puleʼaga. (Mateo 24:3) ʼI tona fakahagatonu, ko te fakatotonu ʼa Sesu ke mole tala e te kau ʼapositolo te meʼa ʼaē neʼe hā kia nātou ʼo aʼu ki tona fakatuʼuake mai te mate, ʼe hā ʼaki mai ʼe hoki hikihiki anai ia ia pea mo faka kolōlia ʼi tona ʼosi fakatuʼuake.
9. He koʼe ʼe fakamālohiʼi tatatou tui e te fetogi?
9 ʼI tana ʼosi talanoa ki te fetogi ʼa Sesu, neʼe ʼui fēnei e Petelo: “ ʼE kua mātou maʼu te tala ʼa te kau polofeta kua moʼoni ia, pea ʼe lelei ke koutou tokaga kiai ohage ko he mālama ʼe mū ʼi he faʼahi fakapōʼuli, ʼo aʼu ki te mafoa ʼo te ʼaho pea mo hopo ai te fetuʼu ʼaho, ʼi ʼokotou ʼu loto. ʼE mole he lea faka polofeta ʼo te Tohi-Tapu neʼe haʼu mai he faʼahiga fakamatala fakatagata. Neʼe mole heʼeki he temi neʼe fai ai te lea faka polofeta ʼaki te finegalo ʼo te tagata, kae neʼe palalau ni ʼu tagata ʼaki te fakatotonu ʼa te ʼAtua, he neʼe uga nātou e te laumālie maʼoniʼoni.” (2 Petelo 1:19-21, MN) Ko te fetogi faka milakulo ʼaia ʼe ina fakahā lelei mai, ʼe feala ke tou tui papau ki te ʼu folafola faka polofeta ʼa te ʼAtua. ʼE tonu ke tou tokaga ki te ʼu folafola ʼaia, kae mole ki “he faʼahiga fakamatala fakatagata” ʼe mole lagolago kiai te ʼAtua. Ko te fetogi ʼaē neʼe hoko kia Sesu, ʼe tonu ke ina fakamālohiʼi tatatou tui ki te ʼu folafola faka polofeta, koteʼuhi kua hoko moʼoni te meʼa ʼaē neʼe ina fakahā fakatomuʼa te kolōlia ʼo Sesu pea mo te mālohi ʼo tona Puleʼaga. Ei, ʼe ʼi ai he ʼu fakamoʼoni mālohi kua Hau ia Kilisito ʼi te temi nei ʼi selo.
E Feafeaʼi Te Hopo Ake ʼa Te Fetuʼu ʼAho
10. Ko ai pe koteā te “fetuʼu ʼaho” ʼaē neʼe talanoa kiai ia Petelo, pea he koʼe ʼe koutou tali feiā?
10 Neʼe tohi fēnei e Petelo: “ ʼE lelei ke koutou tokaga kiai [te ʼu folafola faka polofeta] ohage ko he mālama ʼe mū ʼi he faʼahi fakapōʼuli, ʼo aʼu ki te mafoa ʼo te ʼaho pea mo hopo ai te fetuʼu ʼaho.” Ko ai pe koteā te “fetuʼu ʼaho” ʼaia? ʼE maʼu tuʼa tahi pe te kupu “fetuʼu ʼaho” ʼi te Tohi-Tapu, pea ʼe tatau tona faka ʼuhiga mo te ‘fetuʼu ʼo te uhu.’ Ia Apokalipesi 22:16 (MN), ʼe fakahigoaʼi ia Sesu Kilisito ko “te fetuʼu gigila ʼo te uhu.” ʼI ʼihi fasiga taʼu, ko te ʼu taʼi fetuʼu ʼaia ʼe hā fakamuli ʼi te faʼahi esite. ʼE hake ake te ʼu fetuʼu ʼaia ʼi muʼa ʼo te hopo ake ʼa te laʼā, pea ʼe ko te fakaʼiloga ʼaia ʼe kamata te ʼaho foʼou. Neʼe fakaʼaogaʼi e Petelo te kupu “fetuʼu ʼaho” ʼo ʼuhiga mo Sesu ʼi te ʼosi fakatoʼo age te mālohi ʼo te Puleʼaga. ʼI te temi ʼaia, neʼe tuʼu ake Sesu ʼi te ʼatulaulau katoa, ʼo kau kiai mo totatou kele! ʼI tona ʼuhiga Fetuʼu ʼAho faka Mesianike, ʼe ina fakahā te mafoa ʼo te ʼaho foʼou pe ko te temi foʼou ki te malamanei ʼaē ʼe fakalogo kia te ia.
11. (a) Ia 2 Petelo 1:19, he koʼe ʼe mole faka ʼuhiga ko te “fetuʼu ʼaho” ʼe hopo ake ʼi te ʼu mafu kakano? (b) E feafeaʼi hakotou fakamahino ia 2 Petelo 1:19?
11 ʼE lahi te ʼu fakaliliu faka Tohi-Tapu ʼe nātou lagolago ki te ʼui ʼaē, ia 2 Petelo 1:19, neʼe talanoa ai Petelo ki te mafu moʼoni ʼo te tagata. Ko te mafu ʼo te tagata ʼe kalama 250 peʼe 300. Neʼe lava feafeaʼi kia Sesu Kilisito ke tuʼu ake ʼi te kiʼi koga veliveli ʼaia ʼo te sino, kae ko ia ʼe ko te laumālie faka kolōlia ʼe maʼuli tuputupua ʼi selo? (1 Timoteo 6:16) ʼE mahino ia, ʼe talanoa te vaega ʼaia ki totatou mafu fakatātā, heʼe tou tokagaʼi ʼaki te Folafola faka polofeta ʼa te ʼAtua. Kae koutou vakaʼi fakalelei ia 2 Petelo 1:19, pea ʼe koutou sio anai ko te Tohi-Tapu Les Saintes Écritures — Traduction du monde nouveau ʼe ina ʼai he virgule moʼo fakakeheʼi te kupuʼi palalau “ ʼo aʼu ki te mafoa ʼo te ʼaho pea mo hopo ai te fetuʼu ʼaho” pea mo te kupu “ ʼi ʼokotou ʼu loto.” ʼE feala ke tou lau fēnei te vaega ʼaia: ‘Kua tou ʼiloʼi ʼe hoko moʼoni anai te folafola faka polofeta; pea ʼe lelei ke tou tokagaʼi ohage ko he mālama taki ʼe mū ʼi te faʼahi fakapōʼuli, ʼaē ko totatou loto, ʼo aʼu ki te mafoa ʼo te ʼaho pea mo te hopo ake ʼo te fetuʼu ʼaho.’
12. ʼI te agamāhani, koteā te ʼaluʼaga ʼo te ʼu mafu fakatātā ʼo te hahaʼi agahala, kae koteā te ʼaluʼaga ʼo te kau Kilisitiano moʼoni?
12 ʼI te agamāhani, koteā te ʼaluʼaga ʼo te ʼu mafu fakatātā ʼo te hahaʼi agahala? ʼE fakapōʼuli tonatou loto ʼi te faʼahi fakalaumālie! Kae kapau ko tatou ko te kau Kilisitiano moʼoni, pea ʼe hage pe ʼe mū te mālama ʼi totatou loto, kae kapau ʼe mole tou feiā pea ʼe fakapōʼuli totatou loto. Ohage ko tona fakahā mai e te ʼu palalau ʼa Petelo, ʼe nofo ʼalaʼala anai te kau Kilisitiano moʼoni pea mo nātou mālamagia ki te mafoa ʼo te ʼaho foʼou, mo kapau ʼe nātou tokagaʼi te folafola faka polofeta ʼa te ʼAtua. Kua mahino kia nātou kua ʼosi hopo ake te Fetuʼu ʼAho ia muʼa ʼo meʼa fuli ʼaē neʼe fakatupu, kae mole ʼi te ʼu mafu fakatagata.
13. (a) He koʼe ʼe feala ke tou ʼiloʼi papau, kua hake ake te Fetuʼu ʼAho? (b) He koʼe ʼe feala ke kātakiʼi e te kau Kilisitiano te ʼu faigataʼaʼia ʼaē neʼe fakakikite e Sesu ki totatou temi?
13 Kua ʼosi hopo ake te Fetuʼu ʼAho! ʼE feala ke tou ʼiloʼi papau te faʼahi ʼaia mo kapau ʼe tou tokagaʼi te lea faka polofeta maʼuhiga ʼa Sesu ʼo ʼuhiga mo tana ʼi henī. Ia ʼaho nei, ʼe tou sio ki te hoko ʼo te ʼu faʼahiga tau ʼaē neʼe mole hoko ʼi muʼa atu, mo te pakupaku, mo te ʼu mafuike pea mo te faka mafola ʼo te logo lelei ʼi te malamanei katoa. (Mateo 24:3-14) Logope la ʼe toe malave kia tatou kau Kilisitiano te ʼu faigataʼaʼia ʼaē neʼe fakakikite e Sesu, kae ʼe tou lava kātakiʼi ʼaki te loto fiafia pea mo te tokalelei. Koteā tona tupuʼaga? Koteʼuhi ʼe tou tokagaʼi te folafola faka polofeta ʼa te ʼAtua, pea mo tou tui ki tana ʼu fakapapau ʼo ʼuhiga mo te ka haʼu. ʼE tou ʼiloʼi kua tou fakaōvi ki he ʼu temi taulekaleka, heʼe kua tou aʼu ki “te temi fakaʼosi”! (Taniela 12:4) ʼE tau te malamanei mo te ʼu ʼaluʼaga kovi ʼaē ʼe fakakikite ia Isaia 60:2: “Koʼeni ko te fakapōʼuli ʼe ina ʼaofi anai te kele, pea [ʼe ʼaofi anai] te ʼu puleʼaga e te fakapōʼuli mātolu.” ʼE lava feafeaʼi ki he tahi ke ina maʼu tona ala ʼi te fakapōʼuli ʼaia? ʼE tonu ke agavaivai ʼo ina tokagaʼi te folafola faka polofeta ʼa te ʼAtua ʼi te temi nei, naʼa tauhala. Ko te hahaʼi fakamalotoloto ʼe tonu ke nātou haga kia Sehova ʼAtua, te Matapuna ʼo te maʼuli pea mo te mālama. (Pesalemo 36:9; Gaue 17:28) Kapau ʼe kita fai te faʼahi ʼaia pea ʼe feala anai ke kita maʼu te mālama moʼoni, pea mo te ʼamanaki ʼo ʼuhiga mo te ka haʼu taulekaleka ʼaē neʼe fakapapauʼi e te ʼAtua ki te hahaʼi fakalogo.—Apokalipesi 21:1-5.
“Nee Haele Mai Te Malama Ki Te Malamanei”
14. Koteā ʼaē ʼe tonu ke tou fai ke tou sio ki te hoko ʼo te ʼu lea faka polofeta taulekaleka ʼa te Tohi-Tapu?
14 ʼE fakahā lelei mai e te Tohi-Tapu, kua nofo Hau ia Sesu ʼi te temi nei. Mai tona ʼuhiga ʼaē neʼe haʼu ʼi te mālohi ʼi te taʼu 1914, ʼe kei tonu ke hoko te tahi ʼu lea faka polofeta taulekaleka. Kapau ʼe tou fia sio ki te hoko ʼo te ʼu lea faka polofeta ʼaia, pea ʼe tonu ke tou agavaivai ʼo tui kia Sesu Kilisito, pea mo tou fakahemala ki te ʼu agahala pea mo te ʼu aga kovi ʼaē neʼe tou fai ʼi tatatou kei nonofo ʼi te fakapōʼuli. ʼE mahino ia, ko nātou ʼaē ʼe nātou leleiʼia te fakapōʼuli, ʼe mole nātou maʼu anai te maʼuli heʼegata. Neʼe ʼui fēnei e Sesu: “Pea koeni te fakamau: nee haele mai te malama ki te malamanei pea nee lahiʼage te ofa o natou tagata ki te fakapouli i tanatou ofa ki te malama: koteuhi ko te kovi o anatou gaue. Ko ae e ina fakahoko te kovi e fehia ki te malama pea e mole laka ki te malama naʼa ha ana gaue. Kae, kia ia e ina fakahoko te lelei e laka ki te malama ke fakaha ana gaue, he nee gaueʼi ia i te Atua.” —Soane 3:19-21.
15. Koteā ʼaē ka hoko mo kapau ʼe tou meʼa noaʼi te fakatuʼutuʼu ʼa te ʼAtua moʼo hāofaki tatou ʼaki tona ʼAlo?
15 Ko Sesu ʼaē neʼe ina fakaaʼu mai te mālama fakalaumālie ki te malamanei pea ʼe tonu ke tou fakalogo kia ia. Neʼe tohi fēnei e Paulo: “Nee liuliuga pea ia aluʼaga kehekehe i te temi mua, nee folafola ai te Atua ki atatou matua aki te kau polofeta, i te u aho ki muli mai, nee folafola mai kia tatou i tona Alo, iaʼia ae nee ina fakanofo ko tona tofia ia te meafuape.” (Hepeleo 1:1, 2) Koteā ʼaē ka hoko mo kapau ʼe tou fakafisi ki te fakatuʼutuʼu ʼaē neʼe fai e te ʼAtua ʼaki tona ʼAlo moʼo hāofaki ʼo tatou? Neʼe toe ʼui fēnei e Paulo: “Koteuhi, kapau nee tuku’pau te folafola nee tala aki te kau aselo, pea nee tali he totogi e tonu e ia ae e maumau’lao mo te talagataa fuape, pe feafeai hatatou hao anai, kapau e tou noai te toe mauliʼaga feia nee uluaki folafola ki ai te Aliki i te kamataʼaga, pea nee fakamooni mai kia tatou e natou nee logo ki ai, o fakatahi mo te fakamooni a te Atua aki he u fakailoga, mo he u milakulo, mo he u gaue manamana kehekehe, pea mo te tufa o te u meaofa o te Laumalie-Maonioni o fai ki tona finegalo.” (Hepeleo 2:2-4) Ei, ʼe maʼuhiga tāfito ia Sesu ʼi te kalagaʼi ʼo te folafola faka polofeta.—Apokalipesi 19:10.
16. He koʼe ʼe feala ke tou tui papau ki te ʼu lea faka polofeta fuli ʼa Sehova ʼAtua?
16 Neʼe ʼui fēnei e Petelo: “Neʼe mole heʼeki he temi neʼe fai ai te lea faka polofeta ʼaki te finegalo ʼo te tagata.” ʼE mole feala ki te tagata ke ina fai he ʼu lea faka polofeta moʼoni, kae ʼe tou lava falala ki te ʼu lea faka polofeta fuli ʼa te ʼAtua. Ko te ʼu lea faka polofeta ʼaia ʼe haʼu tonu mai ia Sehova ʼAtua. ʼAki tona laumālie maʼoniʼoni, neʼe ina faka fealagia ki tana kau kaugana ke nātou mahino, peʼe hoko feafeaʼi anai te ʼu lea faka polofeta ʼa te Tohi-Tapu. Ei, ʼe tou loto fakafetaʼi kia Sehova he neʼe tou sio ki te fakahoko ʼo te tuʼuga lea faka polofeta talu mai te taʼu 1914. Pea ʼe tou tui papau ko te tahi ʼu lea faka polofeta ʼo ʼuhiga mo te fakaʼosi ʼo te mālama ʼaenī, ʼe hoko fuli anai. ʼE maʼuhiga ʼaupito ke tou haga tokagaʼi te ʼu fakatokaga ʼa te ʼAtua pea ke mū totatou mālama. (Mateo 5:16) ʼE tou fakafetaʼi ʼaupito koteʼuhi ‘ ʼe foaki mai e Sehova kia tatou te mālama ʼi te fakapōʼuli mātolu’ ʼaē ʼe ina ʼaofi te kele ia ʼaho nei!—Isaia 58:10.
17. He koʼe ʼe ʼaoga kia tatou te mālama fakalaumālie ʼaē ʼe foaki mai e te ʼAtua?
17 Ko te mālama ʼe ina faka fealagia ke tou sio. Tahi ʼaē meʼa, ʼe ina faka fealagia te homo ake ʼa te ʼu ʼakau ʼaē ʼe nātou foaki mai he ʼu meʼa kai kehekehe. ʼE mole feala ke tou maʼuli mo kapau ʼe mole ʼi ai he mālama. Kaeā te mālama fakalaumālie? ʼE ina takitaki tatou pea mo ina fakahā mai te ka haʼu ʼaē ʼe talanoa kiai te Tohi-Tapu, te Folafola ʼa te ʼAtua. (Pesalemo 119:105) ʼI tona ʼofa ʼe ‘foaki mai [e Sehova ʼAtua] tona mālama pea mo tana moʼoni.’ (Pesalemo 43:3) ʼE mahino ia, ʼe tonu ke tou loto fakafetaʼi ʼaupito ki te ʼu meʼa ʼofa ʼaia. Koia tou faiga mālohi ke tou toʼo te mālama ʼo “te iloi o te kololia o te Atua” ke mālamagia totatou loto.—2 Kolonito 4:6; Efeso 1:18.
18. Koteā te meʼa ʼaē kua teuteu ke fai e te Fetuʼu ʼAho ʼa Sehova?
18 ʼE tapuakinaʼi tatou heʼe tou ʼiloʼi, ʼi te taʼu 1914, neʼe tuʼu ake ia Sesu Kilisito, te Fetuʼu ʼAho, ʼi te ʼatulaulau pea neʼe ina kamata fakahoko te meʼa ʼaē neʼe hā ʼi tana fetogi faka milakulo! Kua ʼi henī te Fetuʼu ʼAho ʼa Sehova, pea ʼe teuteu ke ina fakahoko te fakatuʼutuʼu ʼa te ʼAtua—“te tau o te aho fakaʼilifia o te Atua Mafimafi.” (Apokalipesi 16:14, 16) ʼI te ʼosi fakaʼauha ʼo te mālama ʼaenī, ʼe fakahoko anai e Sehova tana fakapapau ʼo ʼuhiga mo “he lagi foou mo he kele foou,” ʼe feala ai anai ke tou vikiʼi ʼo talu ai te Tuʼi ʼAliki ʼo te ʼatulaulau pea mo te ʼAtua ʼo te ʼu lea faka polofeta moʼoni. (2 Petelo 3:13) ʼO aʼu ki te ʼaho maʼuhiga ʼaia, tou haga haʼele ʼi te mālama fakaʼatua, ʼo tou tokagaʼi te folafola faka polofeta ʼa te ʼAtua.
ʼE Feafeaʼi Anai Takotou Tali?
• E feafeaʼi hakotou fakamatala te fetogi ʼa Sesu?
• ʼE fakaloto mālohiʼi feafeaʼi tatatou tui e te fetogi faka milakulo?
• Ko ai pe koteā te Fetuʼu ʼAho ʼa Sehova, pea neʼe hopo ake ʼanafea?
• He koʼe ʼe tonu ke tou tokagaʼi te folafola faka polofeta ʼa te ʼAtua?
[Paki ʼo te pasina 13]
ʼE koutou lava fakamahino feafeaʼi te fetogi faka milakulo?
[Paki ʼo te pasina 15]
Kua hopo ake te Fetuʼu ʼAho. ʼE koutou ʼiloʼi koa pe neʼe hoko ʼanafea pea neʼe hoko feafeaʼi?