He Koʼe ʼe Lahi Te Aga Fakahehema?

“ ʼAua naʼa ke tali he totogi fakafūfū, koteʼuhi ko te totogi fakafūfū ʼaia ʼe ina fakakiviʼi te hahaʼi ʼaē ʼe fakasiosio poto pea ʼe feala ke ina fakahalaʼi te ʼu folafola ʼa te kau agatonu.—Ekesote 23:8.

KUA hili kiai taʼu e tolu afe nimageau, neʼe tauteaʼi e te Lao ʼa Moisese te foaki ʼo he totogi fakafūfū. ʼI te ʼu sēkulō talu mai te temi ʼaia, neʼe lahi ai te ʼu lao ʼaē neʼe fai moʼo fakafeagai ki te aga fakahehema. Kae neʼe mole lava tāʼofi e te ʼu lao ʼaia te aga fakahehema. ʼI te ʼaho fuli ʼe fefoakiʼaki e te hahaʼi he ʼu totogi fakafūfū ʼe lauʼi miliona, pea ko te toko lauʼi miliale hahaʼi ʼe hoko ki ai tona ʼu fua kovi.

ʼE mafola ʼaupito te aga fakahehema pea ʼe fakatupu tuʼutāmaki ki te ʼu tafitoʼaga ʼo te sosiete. ʼI ʼihi fenua, kapau ʼe kita fia fakahoko he fakatuʼutuʼu pea ʼe tonu muʼa ke kita fai he totogi fakafūfū. ʼAki te meʼa ʼofa ʼaia, ʼe lava maʼu anai e he tahi tana pepa ako, pe ko te pelemi, pe ko he kotala, peʼe mālo anai ʼi he fakamāu. ʼE meo fēnei ia Arnaud Montebourg, te tagata avoka ʼo Palesi, “ko te aga fakahehema ʼe hage ko he meʼa ʼuli ʼe ina faka mafasia te manatu ʼa te hahaʼi.”

ʼE mafola tāfito te aga fakahehema ʼi te ʼu faifakatau koloā. Ko ʼihi matani gāue ʼe nātou fakaʼaogaʼi te vahe tolu ʼo tonatou paʼaga moʼo totogi he ʼu hahaʼi aga fakahehema ʼo te puleʼaga. ʼE ʼui e te kaupepa Fakapilitānia The Economist, ko te vahe hogofulu ʼi te teau ʼo te 25 miliale tola ʼaē ʼe fakaʼaogaʼi ki te fakatau ʼo te ʼu mahafu ʼi te malamanei katoa, ʼe totogi e te ʼu hahaʼi ʼaē e nātou fia maʼu te ʼu mahafu ʼaia. ʼE tuputupu te aga fakahehema, pea ʼe toe ʼāsili mo tona ʼu fua kovi. ʼE ʼui, ʼi te ʼu taʼu ʼaenī e hogofulu kua ʼosi, ko te capitalisme ʼaē ʼe fai “fakakaumeʼa”​—ko he ʼu aga fakahehema ʼo te faifakatau ʼe foaki ai e ʼihi he ʼu pilivilesio ki tonatou ʼu feʼilo​—neʼe ina maumauʼi te maʼuli faka ekonomika ʼo te ʼu fenua katoa.

ʼE mahino papau ia, ko nātou ʼaē ʼe mamahi tāfito ʼi te aga fakahehema pea mo te mole lelei ʼo te maʼuli faka ekonomika, ʼe ko te kau māsisiva​—ia nātou ʼaē ʼe mole ʼi ai hanatou paʼaga moʼo fai he ʼu totogi fakafūfū. Ohage ko tona fakanounou e te kaupepa The Economist, “ko te aga fakahehema ʼe ko he faʼahiga pule ʼe aga fefeka.” ʼE feala koa ke pulihi te faʼahiga pule fefeka ʼaia, peʼe mole feala koa ke kita hāo ʼi te aga fakahehema? Moʼo tali ki te fehuʼi ʼaia, ʼe tonu muʼa ke tou ʼiloʼi te ʼu tupuʼaga tāfito ʼo te aga fakahehema.

Koteā Te ʼu Tupuʼaga ʼo Te Aga Fakahehema?

He koʼe ʼe fili e te hahaʼi ke nātou aga fakahehema kae mole nātou aga fakahagatonu? Ki ʼihi, ʼe mata faigafua age te aga fakahehema—​peʼe hage ʼe ko te puleʼaki pe ʼaia e tahi​—ke nātou maʼu ai te meʼa ʼaē ʼe nātou loto kiai. ʼI ʼihi temi, ʼe fai e he tahi he totogi fakafūfū ke hāo ʼi he tautea. Ko te tokolahi ʼe nātou sio ko te hahaʼi fai politike, mo te kau polisi, mo te kau tuʼi fakamāu ʼe mole nātou koviʼia te aga fakahehema, māʼiape la mo ʼihi ʼe nātou fai te aga ʼaia, pea ʼe nātou mulimuli pe ki tanatou faʼifaʼitaki.

ʼI te fakaʼāsili ʼo te aga fakahehema, kua liliu ko he meʼa ʼe tali gafua e te hahaʼi pea mo nātou fai māhani. Ko te hahaʼi ʼaē ʼe mole lahi tonatou litotogi, ʼe nātou manatu ai ʼe mole he tahi puleʼaki kia nātou ʼo nātou tali he ʼu totogi fakafūfū ke lelei age tonatou maʼuli. Pea ka sio te hahaʼi, ʼe mole tauteaʼi ia nātou ʼaē ʼe nātou fai te ʼu totogi fakafūfū, pea ko te tokosiʼi ʼe nātou fia fakafeagai ki te taʼi aga ʼaia. Neʼe fakatokagaʼi fēnei e te Hau ko Salomone: “Koteʼuhi neʼe mole fakahoko vave te tautea ki he gāue ʼe kovi, koia ʼaē kua liliu ai te loto ʼo te ʼu foha ʼo te tagata ʼo tukupau moʼo fai te meʼa ʼaē ʼe kovi.”​—Tagata Tānaki 8:​11.

ʼE ʼi ai te ʼu mālohi e lua ʼe nā fakatuputupu te aga fakahehema: ʼe ko te manatu pe kia kita pea mo te loto mānumānu. ʼUhi ko tanatou manatu pe kia nātou, ko te hahaʼi aga fakahehema ʼe nātou meʼa noaʼi te ʼu mamahi ʼaē ʼe hoko ki te hahaʼi ʼuhi ko tanatou aga, pea ʼe mole nātou koviʼia te fai ʼo he ʼu totogi fakafūfū, koteʼuhi ʼe fua lelei kia nātou. ʼE lahi te ʼu koloā ʼaē ʼe nātou maʼu ai, pea ʼe toe tuputupu ai mo tonatou loto mānumānu. Neʼe ʼui fēnei e Salomone: “Ko ʼaē ʼe ʼofa ʼi te falā ʼe mole fīmālie anai ʼi te falā, pea ko ʼaē ʼe ʼofa ki te ʼu koloā [ʼe mole fiafia anai] ʼi te totogi.” (Tagata Tānaki 5:10) ʼE moʼoni, ʼe faigafua anai takita maʼu paʼaga, mo kapau ʼe kita loto mānumānu, kae ʼe kita kivi anai ʼi te aga fakahehema pea mo te maumauʼi ʼo te lao.

Ko te tahi meʼa ʼe mole tonu ke galo kia tatou, ʼe ko te gāue ʼa te pule fakapulipuli ʼo te mālama ʼaenī, ʼaē ʼe fakahigoaʼi e te Tohi-Tapu ko Satana te Tevolo. (1 Soane 5:​19; Apokalipesi 12:9) ʼE gāue mālohi Satana moʼo faka mafola te aga fakahehema. ʼE ko Satana ʼaē neʼe ina fai te totogi fakafūfū ʼaē ʼe lahi tokotahi, ʼi tana ʼui kia Kilisito: ‘ ʼE ʼau foaki atu anai kia te koe te ʼu puleʼaga fuli ʼo te mālama mo kapau ʼe ke punou pea mo fai ʼi ʼoku muʼa he atolasio.’​—Mateo 4:8, 9.

Kae ko Sesu neʼe mole ina fai he aga fakahehema, pea neʼe ina akoʼi ki tana kau tisipulo ke nātou fai feiā mo nātou. ʼE lava ʼaoga koa te ʼu akonaki ʼa Kilisito moʼo tauʼi te aga fakahehema ia ʼaho nei? ʼE tali anai te lua alatike ki te fehuʼi ʼaia.