Tou Fakapotopoto ʼi Tatatou ʼu Fakaʼamu
ʼE TOU loto fīmālie mokā hoko tatatou ʼu fakaʼamu pea mo te ʼu meʼa ʼaē ʼe tou loto kiai. ʼE tonu ke mahino kia tatou ʼe lahi tatatou ʼu moemisi ʼe mole iku tuʼumaʼu ohage ko tatatou fakaʼamu. Ko te ʼu lotomamahi ʼaē ʼe tautau hoko ʼe feala pe ke fakatupu ʼita kia tatou totonu peʼe tou ʼiʼita ki niʼihi. Neʼe fēnei te fakatokaga tonu ʼa te tagata poto: “ ʼE mahaki te loto, mokā ʼe mole hoko vave te meʼa ʼaē ʼe fakatalitali kiai.”—Tāʼaga Lea 13:12.
Koteā he tahi ʼu meʼa ʼe feala ke lotomamahi ai he tahi? E feafeaʼi hatatou gāue ʼaki he aga fakapotopoto ki te ʼu meʼa ʼaē ʼe tou fakaʼamu kiai? Pea tahi ʼaē meʼa, he koʼe ʼe lelei ke tou fai feiā?
Ko Te ʼu Fakaʼamu Pea Mo Te ʼu Lotomamahi
ʼAki te faʼahiga maʼuli ʼo te temi nei ʼaē ʼe haʼele vave, kapau ʼe tou faigaʼi ke tou fakaʼalu tahi mo te temi pea ʼe hage ia ʼe tou ʼāsili holomuli. Ko te ʼu fakamaʼua ʼaē ki totatou temi pea mo totatou mālohi ʼe fakatupu mamahi, pea mo kapau ʼe mole tou lava fakahoko he faʼahi neʼe tou fakatuʼutuʼu, pea ʼi te agamāhani ʼe tou ʼiʼita ai kia tatou totonu. Pea tahi, ʼe lagi feala ke tou ʼui, ʼe tou fakaloto mamahiʼi ʼihi. ʼE ʼui fēnei e Cynthia, ko te fafine ʼohoana kua maʼu fānau, ʼe ina ʼiloʼi te kinakina ʼo te ʼuhiga faʼe: “ ʼE ko he meʼa fakatupu ʼita kia ʼau, taku mole poto ʼi te fakafuafua te akoʼi ʼo taku fānau pea mo taku sio ʼaē ʼe mole ʼau akoʼi lelei ia nātou.” ʼE ʼui fēnei e te finemui ko Stéphanie ʼo ʼuhiga mo tana ako: “ ʼE mole maʼu hoku temi ke ʼau fai te ʼu meʼa fuli ʼaē ʼe ʼau loto kiai, pea ʼe tupu ʼaki ai haku lotohoha.”
Ko he ʼu fakaʼamu ʼe mole fakapotopoto ʼe liliu ʼaki te temi ko te perfectionnisme (ko te faiga ʼaē ke lelei ʼosi he faʼahiga ʼaluʼaga), pea ʼe feala ke kita lotomamahi ʼaupito ʼaki te faʼahi ʼaia. ʼE fakamoʼoni fēnei e Ben ko te tūpulaga neʼe hoki ʼohoana: “Ka ʼe ʼau sivisivi taku ʼu aga, pea mo taku ʼu manatu, peʼe ko te ʼu meʼa ʼe ʼau logoʼi, ʼe ʼau vakaʼi tuʼumaʼu pe koteā ʼaē neʼe ʼau lava fai ke lelei age. ʼE ʼau faiga tuʼumaʼu pe ke lelei ʼosi te ʼu meʼa fuli, pea ʼe tupu ʼaki ai taku lotohoha, pea mo taku fītaʼa pea mo lotomamahi.” ʼE ʼui fēnei e te fafine Kilisitiano ko Gail: “ ʼE mole tali e te faʼahiga manatu perfectionniste ke ʼi ai he hala. ʼE tou loto ke tou liliu ʼo lelei ʼosi, pea ke tou liliu ko he ʼu fafine ʼohoana ʼe lelei ʼosi. ʼE tonu ke lahi te ʼu meʼa ʼaē ʼe tou fai ke feala hatatou fiafia, koia ko te ʼu faiga ʼaē ʼe mole iku ʼe fakatupu ʼita.”
Kae ko te tahi faʼahi ʼaē ʼe feala ke fakatupu ʼita kia kita, ʼe ko te mahamahaki pea mo te liliu ʼo matuʼa. Ko te mole kei tatau ʼo te gaūgaūe pea mo te hifo ʼo te mālohi ʼe nātou toe fakahāhā lelei totatou ʼu tuʼakoi pea ʼe nātou toe hilifaki he tahi ʼu manatu fakatupu ʼita. ʼE fakamoʼoni fēnei mai e Elizabeth: “Neʼe ʼau logoʼi taku mole faʼa kātaki, ʼi taku mole lava fakahoko te ʼu meʼa ʼaē neʼe faigafua pea mo ʼau māhani kiai ʼi muʼa ʼo taku mahaki.”
Ko te ʼu meʼa fuli ʼaia ʼe ko he koga pe ia ʼo te ʼu meʼa ʼaē ʼe feala ke nātou fakatupu he faʼahiga lotomamahi ia tatou. Kapau ʼe mole fakatātāʼofi te ʼu meʼa ʼaia ʼe tou logoʼi, pea ʼe feala ʼaki te ʼu meʼa ʼaia ke tou manatu ʼe mole leleiʼia tatou e te hahaʼi. Koia, koteā he ʼu fakatuʼutuʼu lelei ʼe feala ke tou fai ke tupu ʼaki ai hatatou tali te ʼu lotomamahi pea mo maʼu he ʼu fakaʼamu fakapotopoto?
Ko He ʼu Puleʼaki Ke Tou Maʼu He ʼu Fakaʼamu Fakapotopoto
ʼUluaki, koutou manatuʼi ko Sehova ʼe fakapotopoto pea mo lotomahino. ʼE fakamanatuʼi fēnei mai e te Pesalemo 103:14: “ ʼE ina ʼiloʼi lelei pe neʼe faʼu tatou ʼaki teā, ʼo ina manatuʼi ko tatou ʼe tou efu.” ʼI tana ʼiloʼi totatou ʼu fealagia pea mo totatou ʼu gataʼaga, ʼe loto e Sehova ke tou foaki age pe te meʼa ʼaē ʼe tou lavaʼi. Pea ko te meʼa pe e tahi ʼe ina fakaʼui mai kia tatou ʼe ko tatatou “haʼele mo [totatou] ʼAtua ʼaki he fia mālalo.”—Mikea 6:8.
ʼE toe fakaloto mālohiʼi foki tatou e Sehova ke tou faikole age kia te ia. (Loma 12:12; 1 Tesalonika 5:17) Kae ʼe tokoni feafeaʼi te potu ʼaia kia tatou? Ko te faikole ʼe ina fakatokatoka pea mo fakafuafua lelei tatatou fakakaukau. Ko te faikole fakamalotoloto ʼe ko he fakamoʼoni ʼaia ʼe ʼaoga kia tatou he tokoni—ʼe ko te fakaʼiloga ʼaia ʼo te fia mālalo pea mo te agavaivai. ʼE tali leleiʼi e Sehova tatatou ʼu faikole ʼo ina foaki mai kia tatou tona laumālie maʼoniʼoni ʼaē ʼe maʼu ai te ʼu fua ʼaē ko te ʼofa, te agalelei, te agaʼofa pea mo te aga lolomi. (Luka 11:13; Kalate 5:22, 23) Tahi ʼaē meʼa, ʼe fakamaʼamaʼa e te faikole te lotohoha pea mo te fitafitaʼa. ʼE ʼui e Elizabeth, ʼaki te faikole, “ ʼe ke maʼu ai he fīmālie ʼe mole ke maʼu ʼi tuʼa atu.” ʼE fakamoʼoni fēnei e Kevin: “ ʼE ʼau faikole ke ʼau maʼu he loto fīmālie pea mo he ʼatamai maʼa ke ʼau lava maʼu ai he puleʼaki ki he faʼahiga fihifihia. ʼE mole heʼeki he temi neʼe līaki ʼau e Sehova.” Neʼe ʼiloʼi e Paulo te maʼuhiga ʼo te faikole. Ko te tupuʼaga ʼaia ʼo tana tokoniʼi fēnei: “Koutou fakahā ki te ʼAtua takotou ʼu kole; pea ko te tokalelei ʼa te ʼAtua, ʼaē ʼe māʼoluga ake ʼi te ʼu manatu fuli, ʼe ina taupau anai tokotou ʼu loto pea mo tokotou ʼu ʼatamai ʼaki ia Kilisito Sesu.” (Filipe 4:6, 7, MN ) ʼIo, ko te felogoi mo Sehova ʼe ʼaoga moʼoni anai moʼo tokoniʼi ʼo tatou ke tou maʼu he ʼu fakaʼamu fakapotopoto ʼo ʼuhiga mo tatou totonu pea mo nātou ʼaē.
Kae ʼi ʼihi temi, ʼe tou loto ke foimo fai mai he fakaloto mālohi. Ko he lea ʼe fai ʼi tona lakaga totonu ʼe ko he meʼa lelei. Ko hatatou fai palalau ʼāteaina mo hotatou kaumeʼa kua aga fakapotopoto pea ʼe feala hatatou falala ki ai, ʼe lava tokoni mai ke tou mahino lelei ki te meʼa ʼaē ʼe fakatupu lotomamahi pea mo fakatupu lotohoha kia tatou. (Tāʼaga Lea 15:23; 17:17; 27:9) Ko te kau tūpulaga ʼaē ʼe tau mo he ʼu faʼahiga fihifihia, ʼe nātou mahino ko te tokoni ʼa te ʼu mātuʼa ʼe ina faka fealagia age kia nātou ke nātou poto ʼi te fakafuafua lelei. ʼE fēnei te fakamoʼoni fakafiafia ʼa Kandi: “Ko te takitaki ʼofa ʼo taku ʼu mātuʼa neʼe ina fakaliliu ʼau ko he tahi ʼe fakapotopoto age, pea mo lahi age taku fakafuafua lelei, pea kua fia fakakaugā te hahaʼi mo ʼau.” Ei, ko te fakamanatu ʼa te Tāʼaga Lea 1:8, 9 ʼe kei ʼaoga ʼi te temi nei, heʼe ina ʼui fēnei: “Fakalogo, Ê toku foha, ki te akonaki ʼa tau tāmai, pea ʼaua naʼa ke līaki te lao ʼo tau faʼe. Heʼe ko te ʼu meʼa ʼaia ʼe ko he pale taulekaleka ki tou ʼulu pea mo he kahoa matalelei ki tou kia.”
ʼE maʼu ʼi te tāʼaga lea ʼaenī, te fakamatalatala lelei ʼo te ʼu ikuʼaga ʼo tokita loto ʼaē ke lelei ʼosi ia meʼa fuli: “ ʼE kita lotomamahi anai mo kapau ʼe kita fakaʼamu ke hoko te ʼu meʼa ʼo te maʼuli ohage ko takita fakaʼamu kiai.” Ke ʼaua naʼa tou manatu feiā, ʼe maʼua ke kita fakatonutonuʼi takita fakakaukau. ʼE mahino ia, ʼe akoʼi anai tatou e te agavaivai pea mo te fia mālalo—ko te maʼu ʼo te fakafuafua tonu ʼo ʼuhiga mo tatatou ʼu gataʼaga—ke tou ʼiloʼi peʼe koteā he ʼu fakaʼamu fakapotopoto. Koia ʼe tonu te fakatokaga ʼaē ʼe fai mai ia Loma 12:3, (MN ), “ke ʼaua naʼa lahi fau tatatou manatu ʼo ʼuhiga mo [tatou totonu].” Pea tahi ʼaē, ʼe fakaloto mālohiʼi tatou ia Filipe 2:3 ke tou agavaivai, pea ke tou faka ʼuhiga te hahaʼi ʼe nātou māʼoluga age ia tatou.
Ko Elizabeth, ʼaē neʼe tou talanoa ki ai ʼi muʼa atu, neʼe mole kei ina kātakiʼi ia ia totonu ʼuhi ko tana mahaki. Kia ia, neʼe ʼaoga ke tuku age he temi ke ina maʼu te manatu ʼa Sehova ʼo ʼuhiga mo te ʼu faʼahiga ʼaluʼaga, pea ke feala hana loto fīmālie ʼi tana ʼiloʼi ʼaē ʼe mole ina galoʼi tatatou gāue. Ko Colin ʼe mole kei gaūgaūe ʼuhi ko te mahaki fakatupu gaʼegaʼe. ʼI muʼa atu, neʼe manatu tuʼumaʼu ia ʼe mole he ʼuhiga ʼo tana gāue faka minisitelio ʼi te temi ʼaē neʼe kei mālohi ai. ʼI tana metitasioʼi te ʼu vaega faka Tohi-Tapu ohage ko 2 Kolonito 8:12, (MN ); neʼe ina lava toʼo ai te ʼu taʼi manatu ʼaia. ʼE ʼui fēnei e te vaega ʼaia: “Kapau ʼe ʼi ai tāfito te lotolelei, ʼe lelei tāfito ia, ʼo fakalogo pe ki te meʼa ʼaē ʼe maʼu e he tahi, kae mole fai ʼaki he meʼa ʼe mole maʼu e he tahi.” ʼE ʼui fēnei e Colin: “Logope ʼe mole lahi he meʼa ke ʼau foaki, kae ʼe kei ʼau lava foaki pe, pea ʼe ko te potu la ʼaia ʼaē ʼe tali e Sehova.” ʼE fakamanatuʼi fēnei mai e Hepeleo 6:10, (MN ), “ ʼE mole heʼe agatonu te ʼAtua ke ina galoʼi takotou gāue pea mo te ʼofa ʼaē neʼe koutou fakahā ʼo ʼuhiga mo tona huafa.”
Koia, ʼe tou lava ʼiloʼi feafeaʼi ʼe fakapotopoto tatatou ʼu fakaʼamu peʼe kailoa? Tou fai te fehuʼi ʼaenī kia tatou totonu, ‘ ʼE ʼalutahi koa taku ʼu fakaʼamu mo te ʼu fakaʼamu ʼa te ʼAtua?’ ʼE tala fēnei ia Kalate 6:4, MN: “Ke tahi vakaʼi tana gāue takitokotahi, pea ʼe tupu ai anai hana fiafia ʼuhi pe ko ia totonu, kae mole fiafia anai ʼuhi he neʼe fakatatau ki he tahi kehe.” Koutou manatuʼi neʼe ʼui fēnei e Sesu: “Ko taku ʼakau toho ʼe mālū pea ko taku kavega ʼe maʼamaʼa.” ʼE moʼoni, ʼi totatou ʼuhiga Kilisitiano, ʼe tou tahi ʼamo tona ʼakau toho, kae ʼe “mālū” pea mo “maʼamaʼa,” pea neʼe fakapapau e Sesu ʼe maʼamaʼa anai mo kapau ʼe tou ako tona faʼahiga ʼamo ʼaē ʼe lelei.—Mateo 11:28-30, MN.
Ko Te ʼu Fakaʼamu Fakapotopoto ʼe Maʼu Ai Te ʼu Fakapale
ʼI tatatou gāue ke tou maʼu he ʼu fakaʼamu fakapotopoto, ʼe tou maʼu ai he ʼu fakapale ʼi te temi nei pea ʼe tou maʼu he ʼu fakapale heʼegata ʼi tatatou fakalogo pea mo tatatou maʼuliʼi te tokoni ʼa te Folafola ʼa te ʼAtua. Ohage la, ko te potu ʼaia ʼe ʼi ai tona fakaʼiloga kia tatou ʼi te faʼahi fakasino. ʼE fakamoʼoni fēnei e Jennifer, ko he fafine neʼe fai age e Sehova te ʼu fakamanatu: “Kua ʼau mālohi pea kua ʼau fiafia.” Koia, ʼe tokoniʼi mālohi tatou e te Tāʼaga Lea 4:21, 22 ke tou tokagaʼi te ʼu palalau ʼa Sehova ʼaki ʼotatou ʼu mata pea mo totatou loto, “heʼe ko he fakamaʼuliʼaga kia nātou ʼaē ʼe nātou maʼu, pea mo fakafimālie ki tonatou sino katoa.”
Ko te tahi fakapale, ʼe ko tatatou logo lelei ʼi te faʼahi ʼo te fakakaukau pea mo te faʼahi ʼo te loto. ʼE ʼui fēnei e Theresa, “ ʼe ʼau tokagaʼi, mokā ʼau tuku taku fakakaukau pea mo toku loto ki te Folafola ʼa te ʼAtua, pea ʼe ʼau fiafia tuʼumaʼu.” ʼE moʼoni, ʼe hoko atu pe anai tatatou tali mamahi. Kae ʼe tou tali lelei anai te ʼamo ʼo te ʼu mamahi ʼaia. ʼE fai mai te fakaloto mālohi ʼaenī ia Sakopo 4:8, “koutou fakaovi ki te Atua pea e fakaovi atu anai kia koutou.” ʼE toe fakapapau mai foki e Sehova ʼe ina foaki mai anai he mālohi kia tatou ke tou lava tauʼi te ʼu fihifihia ʼo te maʼuli pea mo tapuakina tatou ʼaki te tokalelei.—Pesalemo 29:11.
Ko te maʼu ʼo he ʼu fakaʼamu fakapotopoto ʼe ina faka fealagia mai kia tatou ke tou mālolohi ʼi te faʼahi fakalaumālie. Ko te potu ʼaia ʼe toe faka ʼuhiga pe foki ko he tapuakina. ʼE tou lava sio lelei ai ki te ʼu meʼa ʼaē ʼe maʼuhiga age ʼi te maʼuli. (Filipe 1:10) Kapau ʼe tou fai feiā, pea ʼe fakapotopoto anai tatatou ʼu fakatuʼutuʼu, pea ʼe tou ʼiloʼi ai ʼe tou lava kakusia kiai, pea ʼe tou maʼu ai he fiafia lahi pea mo he loto fakafeauga lahi. ʼE tou fia falala anai kia Sehova, heʼe mahino kia tatou ʼe ina fai pe anai he ʼu meʼa ʼe fua lelei kia tatou. ʼE ʼui fēnei e Petelo, “koutou fiavaivai ifo i te nima mafimafi o te Atua, koteuhi ke ina hikihiki ake koutou moka hoko mai tona temi.” (1 Petelo 5:6) ʼE ʼi ai koa he meʼa ʼe maʼuhiga age ʼi te faka maʼuhigaʼi ʼo tatou e Sehova?
[Paki ʼo te pasina 31]
Ko he ʼu fakaʼamu fakapotopoto ʼe lava tokoni kia tatou ke tou kātakiʼi te ʼu fītaʼa pea mo te ʼu lotomamahi