Te ʼu Fehuʼi ʼa Te Kau Lautohi
Ia Isaia kapite 53 ʼe maʼu ai te lea faka polofeta ʼiloa ʼo ʼuhiga mo te Mesia. ʼE ʼui fēnei ʼi te vaega 10: “Neʼe ko he meʼa fakafiafia kia Sehova totonu tana moloki ia ia; neʼe ina fai ke mahaki.” Koteā koa tona faka ʼuhiga?
ʼE tou mahino pe koʼe ʼe lagaʼi te fehuʼi ʼo ʼuhiga mo Isaia 53:10. ʼE ʼiloʼi e te kau Kilisitiano moʼoni, ʼe mole ko he meʼa fakafiafia ki totatou ʼAtua manavaʼofa pea mo agalelei tana molomoloki he tahi peʼe ina fai ke mahaki. ʼE fakamoʼoni mai e te Tohi-Tapu ʼe feala hatatou falala ʼe mole fiafia te ʼAtua ʼi te fakamamahiʼi ʼo he tahi neʼe mole hana hala. (Teutalonome 32:4; Selemia 7:30, 31) Lolotoga te ʼu sēkulō, neʼe lagi ʼi ai he ʼu lakaga neʼe fakagafua ai e Sehova ke hoko he ʼu mamahi ʼo mulimuli ki tona poto pea mo tona ʼofa. Kae ʼe mahino papau ia, neʼe mole ina fakatupu te ʼu mamahi ʼaē neʼe hoko ki tona ʼAlo ʼofaina ko Sesu. Kae koteā koa te faka ʼuhiga moʼoni ʼo te vaega ʼaia?
Ko te faʼahi ʼaē ka tokoni mai ke tou mahino ki ai, ʼe ko te vakaʼi ʼo te vaega katoa, ʼo tou tokagaʼi te ʼu ʼaluʼaga e lua ʼaē ʼe fakaʼaogaʼi ai te kupu “fiafia.” ʼE tou lau fēnei ia Isaia 53:10: “Neʼe ko he meʼa fakafiafia kia Sehova totonu tana moloki ia ia; neʼe ina fai ke mahaki. Kapau ʼe ke tuku tona nefesi ohage ko he sakilifisio ʼo te lākahala, pea ʼe sio anai ki tona hōloga, ʼe ina fakaloaloaga anai tona ʼu ʼaho, pea ʼi tona nima ʼe hoko anai te meʼa ʼaē ʼe fiafia ai Sehova.”
Ko te logo katoa ʼaē ʼe tou maʼu ʼi te Tohi-Tapu, ʼe ina fakahā mai ko “te fiafia ʼa Sehova,” ʼaē ʼe talanoa kiai ʼi te fakaʼosi ʼo te vaega, ʼe faka ʼuhiga tāfito ki te fakahoko ʼo tana fakatuʼutuʼu ʼi te Puleʼaga. Kapau ʼe fakahoko e Sehova te faʼahi ʼaia, pea ʼe ina fai tana lagavaka ʼaki tona ʼuhiga tuʼi ʼo te ʼatulaulau, pea ʼe ina faka fealagia anai ke pulihi te agahala ʼa te hahaʼi fakalogo—ei, ke pulihi tatatou ʼu agahala. (1 Fakamatala 29:11; Pesalemo 83:18; Gaue 4:24; Hepeleo 2:14, 15; 1 Soane 3:8) Moʼo fakahoko te ʼu faʼahi fuli ʼaia, neʼe tonu ke tupu tagata te ʼAlo ʼo te ʼAtua pea ke ina foaki te sakilifisio faitotogi. ʼE tou ʼiloʼi, neʼe hoko te ʼu mamahi kia Sesu. ʼE ʼui mai e te Tohi-Tapu neʼe “ina ako te fakalogo i te u mamahi.” Koia neʼe maʼu e Sesu te ʼu tapuakina mai tona ʼu mamahi ʼaia.—Hepeleo 5:7-9.
Neʼe ʼiloʼi fakatomuʼa e Sesu ʼe maʼuli mamahi anai ʼi te gāue lelei ʼaē neʼe tonu ke ina fai. ʼE hā lelei te faʼahi ʼaia ʼi tana ʼu palalau ʼaē ʼe tuʼu ia Soane 12:23, 24, ʼaē ʼe tou lau fēnei ai: “Kua hoko mai te hola ke fakakololiaʼi ai te Foha o te tagata. Mooni, mooni, e au tala atu kia koutou, kapau e mole mate te fuai fulumeto i tana to ki te kele, e nofo tokotahi ia, pea kapau e mate, e fua ia o fuhifuhiga.” Ei, neʼe ʼiloʼi e Sesu ʼe tonu anai ke nofo agatonu ʼo aʼu ki tana mate fakamamahi. ʼE toe ʼui fēnei e te vaega: “I te lakaga-nei e hoha toku laumalie; pea kotea ae ke au lau? Tamai fakahao [ʼau] mai te hola aeni. Kae e ko te hola aeni nee au haele mai ai. Tamai fakakololiaʼi tou huafa. Nee hifo mai leva he leo mai te lagi: ‘Kuʼau fakakololia ia pea e au toe fakakololiaʼi anai ia.’ ”—Soane 12:27, 28; Mateo 26:38, 39.
ʼE feala hatatou mahino ki te vaega ʼo Isaia 53:10 ʼaki te ʼu meʼa ʼaenī neʼe tou talanoa kiai. Neʼe ʼiloʼi lelei e Sehova te ʼu mamahi ʼaē ka hoko ki tona ʼAlo, pea ʼi hona tahi faʼahiga faka ʼuhiga, ʼe moloki anai. Kae ʼi tana manatuʼi te kolōlia pea mo te ʼu meʼa lelei ʼaē ka hoko ʼaki, neʼe fiafia ai Sehova ʼi te meʼa ʼaē ka hoko kia Sesu. Ko te faka ʼuhiga ʼaia ʼo te ʼui ʼaē “neʼe ko he meʼa fakafiafia kia Sehova . . . tana moloki,” peʼe fakavolu te Mesia. Pea neʼe fiafia ia Sesu ʼi te meʼa ʼaē neʼe feala ke ina fakahoko, pea mo tana fakahoko te faʼahi ʼaia. ʼE moʼoni, ohage ko tona fakaʼosi ia Isaia 53:10, ‘ ʼi tona nima neʼe hoko ai te meʼa ʼaē neʼe fiafia ai Sehova.’