ʼE Pulihi Te ʼu Mamahi ʼo Te Tau

IA TAʼU e 20 neʼe kau ia Abraham ʼi te foʼi solia agatuʼu.a Kae kua ina līaki te tau pea ʼe mole toe kau anai ʼi he tau. Ei, ko ʼihi ʼi tona ʼu fili ki muʼa atu kua nātou liliu ʼi te temi nei ko tona ʼu kaumeʼa. Koteā te meʼa ʼaē neʼe ina fetogi ia ia? Ko te Tohi-Tapu. Neʼe ina foaki kia Abraham te ʼamanaki pea mo te fakasiosio tonu, moʼo tokoni kia ia ke sio ki te ʼu gāue ʼa te tagata ohage ko te sio ʼa te ʼAtua. Neʼe toʼo e te Tohi-Tapu ʼi tona loto tana fia tau, pea neʼe kamata puli ai tona lotomamahi, tona loto fehiʼa pea mo tona lotokovi. Neʼe ina maʼu ʼi te Tohi-Tapu te faitoʼo mālohi ʼo ʼuhiga mo te loto.

ʼE tokoni feafeaʼi te Tohi-Tapu ki he tahi moʼo fakafimālieʼi te ʼu mamahi ʼo tona loto? Neʼe mole feala ke ina fetogi te ʼu meʼa ʼaē neʼe hoko kia Abraham. Kae ko te lau pea mo te metitasioʼi ʼo te Folafola ʼa te ʼAtua neʼe ina fulihi tana fakakaukau ke ʼalutahi mo te manatu ʼaē ʼa te ʼAtua. Kua ina maʼu ʼi te temi nei te ʼamanaki ki te ka haʼu, pea kua ʼi ai tana ʼu gāue foʼou kua ina fakamuʼamuʼa tāfito. Kua maʼuhiga kia ia te ʼu meʼa ʼaē ʼe maʼuhiga ki te ʼAtua. Kua kamata mole te ʼu lavea ʼo tona loto, ʼi tana mahino ki te faʼahi ʼaia. Ko he tokoni ʼaia kia Abraham ke ina fetogi tona maʼuli.

Neʼe Maʼuli ʼi Te Lotolotoiga ʼo Te Tau Faka Sivile

Neʼe tupu ia Abraham ʼi te ʼu taʼu 1930 ʼi Afelika. ʼI te ʼosi ʼo te lua tau faka malamanei, neʼe puleʼi tona fenua e te fenua mālohi ʼe nā fetafaiʼaki, kae tokolahi te hahaʼi ʼo te fenua ʼo Abraham neʼe nātou fia puleʼaga faʼitaliha. ʼI te 1961, neʼe kau ia Abraham ki te kautahi ʼe tau ʼo ʼuhiga mo te ʼāteaina, neʼe ko te guérilla ʼe ina tauʼi te ʼu mālohi ʼo te ʼu fenua ʼi ʼonatou ʼu tafaʼaki.

ʼE fakamatala fēnei e Abraham: “Neʼe ko tomatou ʼu fili. Neʼe nātou fakatuʼutuʼu ke nātou matehi ia mātou, koia ʼaē neʼe mātou fakatotonu ai ke mātou matehi ia nātou.”

Neʼe lahi te ʼu lakaga neʼe tuʼutāmaki ai ia Abraham, koia ʼi te 1982, hili taʼu e 20 ʼaē neʼe kau ai ki te tau, neʼe hola leva ki Eulopa. ʼI te temi ʼaia neʼe kua taʼu fāgofulu tupu, pea kua feala ke ina fakakaukauʼi tona maʼuli heʼe kua lahi tona temi maʼa ia. Kua feafeaʼi koa te ʼu meʼa ʼaē neʼe fakaʼamu kiai? Neʼe feafeaʼi ki muli age? Neʼe felāveʼi ia Abraham mo te Fakamoʼoni ʼa Sehova pea neʼe kamata ʼalu ki tanatou ʼu fono. Neʼe ina manatuʼi ʼi te ʼu taʼu ki muʼa atu ʼi Afelika, neʼe ina lau te kiʼi pepa lotu neʼe foaki age e te Fakamoʼoni. Neʼe talanoa ai ki te palatiso ʼaē ka fakatuʼu ʼi te kele, pea mo te puleʼaga ʼi selo ʼaē ka ina takitaki te malamanei. Neʼe lava hoko moʼoni koa?

ʼE ʼui fēnei e Abraham: “ ʼAki te Tohi-Tapu kua mahino ai kia ʼau, ko te ʼu taʼu ʼaē neʼe ʼau kau ai ki te tau, neʼe mole ʼi ai hona ʼuhiga. ʼE ko te Puleʼaga pe ʼo te ʼAtua ʼaē ka faitotonu anai ki te hahaʼi fuli.”

Mole tuai ʼo te ʼosi papitema ʼa Abraham ko te Fakamoʼoni ʼa Sehova, pea ko te tahi tagata ʼe higoa ko Robert neʼe hola mo ia mai Afelika ki Eulopa, ki te kolo ʼaē neʼe nofo ai ia Abraham. Ko Robert mo Abraham neʼe nā kau toko lua ʼi te tau, kae neʼe nā kau ʼi te ʼu foʼi solia kehekehe. Neʼe tau feʼekeʼaki ia Robert ʼo ʼuhiga mo te fakatuʼutuʼu moʼoni ʼo te maʼuli. Neʼe ko te tagata lotu, pea neʼe ina ʼiloʼi ko te huafa ʼo te ʼAtua ʼe ko Sehova, he neʼe ina lau te ʼu koga ʼo te Tohi-Tapu. ʼI te temi ʼaē neʼe ʼōmai ai te kau Fakamoʼoni ʼo te kokelekasio ʼo Abraham ʼo tokoni kia Robert ke mahino lelei age ki te Tohi-Tapu, neʼe ina foimo tali aipe.

ʼE fakamatala fēnei e Robert: “Mai te kamataʼaga, neʼe ʼau punamaʼuli ʼi te faʼahiga fakaʼaogaʼi e te kau Fakamoʼoni ia te ʼu huafa ʼo Sehova pea mo Sesu, pea neʼe ʼau ʼiloʼi ai ʼe ko te ʼu ʼipotasi kehekehe. Neʼe ʼalutahi te faʼahi ʼaia mo te ʼu meʼa ʼaē neʼe kua ʼau ʼiloʼi ʼi te Tohi-Tapu. Tahi ʼaē meʼa, neʼe nātou teu maʼa pea mo agalelei ki te hahaʼi, heʼe mole nātou siosio lanu. Neʼe malave mālohi te ʼu meʼa ʼaia kia te ʼau.”

Ko Te ʼu Fili Kua Liliu ʼo Kaumeʼa

Ko Robert mo Abraham, neʼe ko te ʼu fili ʼi muʼa atu, pea kua nā liliu nei ko te ʼu kaumeʼa. ʼE nā pionie fakatahi ʼi te kokelekasio ʼa te kau Fakamoʼoni ʼa Sehova. ʼE fakamatala fēnei e Abraham: “Lolotoga te tau, neʼe ʼau feʼekeʼaki tuʼumaʼu peʼe feafeaʼi ki ni ʼu hahaʼi mai he ʼu fenua ʼe feōvi ke nātou fefehiʼaʼaki—pea tahi ʼe nātou lotu tahi. Neʼe ʼau lotu tahi mo Robert, kae neʼe ma fefakafeagaiʼaki ʼi te tau. ʼI te temi nei ko māua ko te ʼu Fakamoʼoni ʼa Sehova, pea ʼaki tamā tui kua ma logo tahi.”

Pea toe ʼui e Robert: “ ʼE kehekehe te faʼahi ʼaia mo tomā maʼuli ʼāfea. ʼE ma kau nei ki te tauhi ʼe ko te foʼi famili fakatautehina moʼoni. ʼE mole ma toe kau anai ki he tau.” Neʼe malave mālohi te Tohi-Tapu ki te ʼu loto ʼo te ʼu hahaʼi neʼe nātou fefakafeagaiʼaki ʼi muʼa atu. Neʼe fetogi te loto fehiʼa pea mo te lotomamahi e te falala pea mo te aga fakakaumeʼa.

ʼI te temi ʼaē neʼe tau ai ia Abraham mo Robert, ko te tahi ʼu tūpulaga e lua neʼe nā fefakafeagaiʼaki ʼi te fetauʼaki ʼo tonā ʼu fenua. Mole tuai pea neʼe gāue te Tohi-Tapu ohage ko he faitoʼo mālohi moʼo fakafimālieʼi tonā ʼu loto. ʼO feafeaʼi?

Neʼe Nātou Fia Mamate Faka Maletile

Neʼe lahilahi ake ia Gabriel ʼi te famili lotu, pea neʼe akoʼi age ko tona fenua ʼe kau ki te tau maʼoniʼoni. Koia ʼi tona taʼu 19, neʼe ʼalu ʼaki he lotolelei ki te solia pea mo kole ke fekauʼi ia ia ki te potu ʼaē ʼe hoko tāfito ai te tau. Lolotoga māhina e 13 neʼe kau ʼi te ʼu tau ʼaē neʼe mālohi ʼaupito, pea ʼi ʼihi temi neʼe mole vaha ia kilometa e tahi mo ʼonatou ʼu fili. ʼE ina ʼui fēnei: “ ʼE kei ʼau manatuʼi tāfito te tahi lakaga. Neʼe ʼui mai e tomatou kamutoa, ʼi te po ʼaia ʼe ʼohofi anai mātou e tomatou ʼu fili. ʼI te lahi fau ʼo tamatou nofo hoha, neʼe mātou teuteuʼi tamatou ʼu mahafu tau ʼi te po katoa.” ʼI tana manatu, neʼe tonu ke ina matehi te ʼu hahaʼi ʼo te ʼu fenua ʼaē ʼe nātou fetafaiʼaki he ko tona ʼu fili. “ ʼI taku manatu, kapau ʼe feala, pea ʼe tonu ke ʼau matehi te tokolahi. Koia, ohage ko te ʼu kaumeʼa e tokolahi, neʼe ʼau fia mate faka maletile.”

Kae ʼaki te temi neʼe mahino leva kia Gabriel ʼe mole he ʼuhiga ʼo te meʼa ʼaē neʼe ina fai. Neʼe hola ki te ʼu moʼuga, pea aʼu ki te tuʼakoi ʼo te fenua ʼaē ʼe mole kau ʼi te tau, pea folau ki Eulopa. Neʼe ina fehuʼi tuʼumaʼu ki te ʼAtua pe koʼe ʼe faigataʼa ʼaupito te maʼuli, peʼe ko te ʼu fihifihia neʼe ko he tūʼa koa mai te ʼAtua. Neʼe felāveʼi mo te kau Fakamoʼoni ʼa Sehova, ʼo nātou fakahā age ʼaki te Tohi-Tapu pe koʼe ʼe lahi te ʼu fihifihia ia ʼaho nei.—Mateo 24:3-14; 2 Timoteo 3:1-5.

ʼAki te ʼu tuʼuga meʼa ʼaē neʼe ako e Gabriel ʼi te Tohi-Tapu, neʼe toe ʼāsili age tana mahino ʼaē ʼe ko te moʼoni. “Neʼe ʼau ako ʼe feala ke tou maʼuʼuli ʼo heʼegata ʼi te palatiso fakakelekele. Meʼa faikehe foki, heʼe ko he meʼa neʼe ʼau fakaʼamu kiai talu taku kei tamasiʼi.” Neʼe haga te Tohi-Tapu ʼo fakafimālieʼi pea mo fakatokatoka ia te lotohoha ʼaē ʼo Gabriel. Neʼe kamata puli te ʼu mamahi lahi ʼaē neʼe ʼi tona loto. ʼAki te temi neʼe felāveʼi mo Daniel ia ia ʼaē neʼe fakafeagai mo ia ki muʼa atu, kae neʼe mole kei loto fehiʼa ia Gabriel. Pea he koʼe neʼe ʼalu ia Daniel ki Eulopa?

“Kapau ʼe Ke Maʼuli Moʼoni, Fakalelei Kae Ke Tokoni Mai!”

Neʼe lahilahi ake ia Daniel ʼi te lotu Katolika pea ʼi tona taʼu 18 neʼe pāuiʼi ki te solia. Neʼe fekauʼi ki te tau ʼaē neʼe kau ai ia Gabriel kae ko te ʼu foʼi tau ʼaē neʼe nā kau ai neʼe nā fefakafeagaiʼaki. ʼI tana fakaōvi ki te koga meʼa ʼaē neʼe fai ai te tau, neʼe ʼalu ia Daniel ʼi te foʼi tānike pea fokifā pe neʼe paʼulu te foʼi pulu ki te tānike. Neʼe mate tona ʼu kaumeʼa ʼaē neʼe kaugā ʼolo mo ia, kae ko ia neʼe lavea kovi pea neʼe pilisoniʼi. Neʼe lauʼi māhina tana nofo ʼi te lopitali pea mo te koga meʼa ʼaē neʼe ʼave kiai te kau pilisoni, ʼo aʼu ki tona ʼave ki te fenua ʼaē ʼe mole tau. Neʼe fia fakamate he neʼe tokotahi pea neʼe mole kei ʼi ai hana meʼa. Neʼe faikole fēnei ia Daniel ki te ʼAtua: “Kapau ʼe ke maʼuli moʼoni, fakalelei ka ke tokoni mai!” ʼI te uhu ake, neʼe ʼaʼahi ia ia e te kau Fakamoʼoni ʼa Sehova pea neʼe nātou tali ki tana ʼu tuʼuga fehuʼi. ʼOsi ʼaia, pea neʼe folau ki Eulopa ohage ko he tahi ʼe hola mai tona fenua. Neʼe toe fakatahi ia Daniel ki te kau Fakamoʼoni pea mo ako te Tohi-Tapu. Ko te meʼa ʼaē neʼe ina ako neʼe ina fakafimālieʼi tona lotohoha pea mo tona lotokovi.

Kua kaumeʼa lelei nei ia Gabriel mo Daniel, kua nā logo tahi ʼi te foʼi famili fakatautehina fakalaumālie heʼe kua nā papitema ko te ʼu Fakamoʼoni ʼa Sehova. ʼE ʼui fēnei e Gabriel: “Ko toku ʼofa kia Sehova pea mo te ʼu meʼa ʼaē neʼe ʼau ako ʼi te Tohi-Tapu, neʼe tokoni mai kia ʼau ke ʼau mulimuli ki tana manatu. ʼE mole kei ʼau faka ʼuhiga ia Daniel ko toku fili. ʼI te ʼu taʼu ki muʼa atu neʼe ʼau fia matehi ia ia. Kae neʼe akoʼi mai e te Tohi-Tapu te tahi ia manatu—ke ʼau tali lelei ke ʼau mate maʼa ia.”

ʼE ʼui fēnei e Daniel: “Neʼe ʼau sio ki te hahaʼi ʼo te ʼu lotu kehekehe pea mo te ʼu fenua kehekehe ʼe nātou fefakapogiʼaki. Pea neʼe ʼi ai te ʼu hahaʼi neʼe nātou lotu tahi kae neʼe nātou fematematehiʼaki. ʼI taku sio ki te faʼahi ʼaia, neʼe mahino ai kia ʼau neʼe mole ko te ʼAtua ʼaē neʼe tonu ke tukugakoviʼi. ʼI te temi nei kua ʼau ʼiloʼi ko Satana ʼaē ʼe ina uga te ʼu tau fuli. ʼI te temi nei, ko ʼau mo Gabriel kua ma Kilisitiano, pea ʼe mole ma toe kau anai ki he tau!”

“E Mauli Te Folafola a Te Atua, Pea e Gaue”

He koʼe neʼe fai te ʼu fetogi lahi e Abraham, mo Robert, mo Gabriel, pea mo Daniel? Neʼe lava feafeaʼi hanatou pulihi te loto fehiʼa pea mo te ʼu mamahi ʼi ʼonatou ʼu loto?

Ko te ʼu tagata fuli ʼaia neʼe nātou lau, metitasio, pea mo akoʼi te moʼoni ʼo te Tohi-Tapu, ʼaē ʼe “mauli . . . pea e gaue.” (Hepeleo 4:12) Ko Ia ʼaē neʼe ina fai te Tohi-Tapu ʼe ko te Tupuʼaga ʼo te malamanei, ia ia ʼaē ʼe ina ʼiloʼi peʼe feafeaʼi hana uga lelei te loto ʼo he tahi ʼe fia fakalogo pea mo fia ako. “Ko te Tohi-Tapu katoa ʼe haʼu mai te ʼAtua pea ʼe ʼaoga moʼo akoʼi, moʼo fakatonutonuʼi, moʼo fakatokatoka ʼo te ʼu meʼa, moʼo akonakiʼi ʼi te faitotonu.” Ka tali e he tahi ke takitaki ia ia e te Tohi-Tapu, pea ʼe ina maʼu te ʼu manatu pea mo te ʼu lekula foʼou. ʼE ina kamata ako peʼe feafeaʼi hana mulimuli ki te ʼu manatu ʼa Sehova. Kapau ʼe ina fai te faʼahi ʼaia, pea ʼe ina maʼu ai te ʼu tuʼuga tapuakina, ʼo kau ai te fakafimālie ʼo te ʼu mamahi ʼo te tau.—2 Timoteo 3:16, MN.

ʼE fakahā mai e te Folafola ʼa te ʼAtua, ʼe mole he puleʼaga, he fenua, he lanu ʼe lelei age peʼe kovi age. “Ko te ʼAtua ʼe mole fakapulepule; kae ʼi te puleʼaga fuli pe ko te tagata ʼaē ʼe manavasiʼi kia te ia pea mo ina maʼuliʼi te faitotonu ʼe ina tali lelei ia ia.” Ko ia ʼaē ʼe ina lau te Tohi-Tapu pea mo tali te faʼahi ʼaia, ʼe ina lava tauʼi māmālie te ʼu manatu fakapulepule peʼe ko te fehiʼa ki he tahi puleʼaga.—Gaue 10:34, 35, MN.

ʼE hā ʼi te ʼu lea faka polofeta ʼo te Tohi-Tapu, ko te ʼAtua ʼe ina fakaʼaogaʼi anai tona Puleʼaga Faka Mesianike moʼo fetogi te pule ʼa te tagata ʼi te temi ʼaenī. ʼAki te puleʼaga ʼaia, ʼe “fakagata [e te ʼAtua] te ʼu tau ʼo aʼu ki te potu taupotu ʼo te kele.” Ko te ʼu kautahi ʼaē ʼe nātou lagolago ki te ʼu tau pea mo fakaneke te hahaʼi ke nātou fetauʼaki, ʼe pulihi anai nātou. ʼE fakatuʼuake anai te hahaʼi ʼaē neʼe mamate ʼi te tau ke nātou maʼuʼuli ʼi te palatiso fakakelekele. ʼE mole toe hola anai he tahi ʼuhi ko he tahi ʼe agamālohi peʼe aga fefeka.—Pesalemo 46:9, Taniela 2:44; Gaue 24:15.

ʼO ʼuhiga mo te hahaʼi ʼaē ka maʼuʼuli ʼi te temi ʼaia, ʼe ʼui fēnei e te Tohi-Tapu: “ ʼE mahino papau ia, ʼe nātou laga anai ni ʼu fale pea ʼe nātou nofoʼi anai; pea ʼe mahino papau ia ʼe nātou to anai he ʼu fuʼu vite pea mo nātou kai anai tonatou ʼu fua. ʼE mole nātou laga anai ke nofo ʼi e he tahi . . . ʼE mole nātou kinakina noa anai, pea ʼe mole nātou fānau anai moʼo maveuveu.” ʼE pulihi anai te ʼu meʼa kovi pea mo te ʼu mamahi. Ko te tui ki te taʼi ʼamanaki ʼaia, ʼe ina toʼo māmālie te mamahi pea mo te lotomamahi ʼi te loto ʼo te hahaʼi.—Isaia 65:21-23.

ʼIo ko te Tohi-Tapu ʼe ko he faitoʼo mālohi ki te loto. ʼAki tana ʼu akonaki kua ina fakafimālieʼi te ʼu mamahi ʼo te tau. Ko te hahaʼi ʼaē neʼe nātou fakafeagai ki muʼa atu, kua nātou logo tahi ʼi he foʼi famili fakatautehina faka malamanei. ʼE fai hoholo anai te fakamālōlō ʼaia ʼi te tuʼu foʼou ʼa te ʼAtua, ʼo aʼu ki te temi ʼaē kua puli ai te fehiʼa pea mo te lotokovi, te lotomamahi pea mo te mamahi ʼo te loto ʼo te malamanei. ʼE fakapapau mai e te Tupuʼaga “ ʼe mole tou toe manatuʼi anai te ʼu meʼa ʼāfea, pea ko te ʼu meʼa ʼaia ʼe mole toe hake anai ki te loto.”—Isaia 65:17.

[Kiʼi nota]

[Paki ʼo te pasina 4]

“ ʼAki te Tohi-Tapu kua mahino ai kia ʼau, ko te ʼu taʼu ʼaē neʼe ʼau kau ai ki te tau, neʼe mole ʼi ai hona ʼuhiga”

[Paki ʼo te pasina 5]

ʼE feala ke malave mālohi te Tohi-Tapu ki te ʼu loto ʼo te hahaʼi ʼaē neʼe nātou fefakafeagaiʼaki ki muʼa atu

[Paki ʼo te pasina 6]

Neʼe fetogi māmālie te loto fehiʼa pea mo te lotokovi ʼaki te falala pea mo te aga fakakaumeʼa

[Paki ʼo te pasina 6]

Ka tali e he tahi ke takitaki ia ia e te Tohi-Tapu, pea ʼe ina maʼu te ʼu manatu pea mo te ʼu lekula foʼou

[Paki ʼo te pasina 7]

Ko te hahaʼi ʼaē neʼe nātou fakafeagai ki muʼa atu, kua nātou logo tahi nei ʼi he foʼi famili fakatautehina faka malamanei

[Haʼuʼaga ʼo te paki pasina 4]

Refugee camp: UN PHOTO 186811/J. Isaac