ʼE Maʼuhiga Koa Te Vilitute?

KO TE tagata Saponia ko Kunihito neʼe mole heʼeki faʼa fualoa tana kua nofo ʼi Amelika.a Hili te ʼu vāhaʼa ʼi tana ʼosi tau kiai, neʼe hoko kia ia te ʼaluʼaga neʼe feala pe ke fakatupu tuʼutāmaki ai ki tana gāue. ʼE fakamatala fēnei e Kunihito: “ ʼI te fehuʼi mai e taku pule peʼe ʼau lavaʼi te faʼahiga tuʼulaga, neʼe feala noa pe taku tali te gāue ʼaia. Kae mai te ʼaluʼaga ʼaē neʼe akoʼi mai ke ʼau faka ʼuhiga te fia mālalo ohage ko he vilitute, neʼe ʼau tali fēnei ai: ‘ ʼE mole ʼau ʼiloʼi peʼe ʼau lavaʼi anai, kae ʼe ʼau faigaʼi anai ke ʼau fai fakalelei te tuʼulaga ʼaia.’ Maʼa taku pule, neʼe hage ia neʼe mole ʼau lavaʼi te tuʼulaga ʼaia pea mo ʼau lotolotolua. ʼI taku ʼiloʼi te potu ʼaia, neʼe mahino kia ʼau ʼe ʼaoga ke ʼau fai he ʼu fetogi.”

Ko te taʼahine ko Maria, ʼaē ʼe nofo ʼi te kolo ʼo New York, neʼe lelei tana ako, pea neʼe fia tokoni tuʼumaʼu ki tana ʼu kaugā ako. Ko Juan neʼe ko he kaugā ako ʼo Maria pea neʼe tautau tokoni age ki ai ia Maria. Kae neʼe manako ia Juan kia ia pea neʼe gaohi meʼa fakatokaga age ki ai. Logope tana fia nofo poipoi, kae neʼe tō ia Maria ki te ʼu fakaoloolo ʼa Juan pea neʼe ina fai ai te aga heʼemaʼa.

ʼE moʼoni ia kua faigataʼa te maʼuliʼi ʼo te vilitute ʼi he mālama ʼe kehe tona faʼahiga maʼuli pea mo aga heʼemaʼa. He koʼe koa ʼe tonu ke maʼuliʼi te vilitute? Koteʼuhi ko te aga vilitute ʼe ina fakafiafia te ʼAtua, pea ʼe mahino ia ko te tokolahi ia tatou ʼe tou loto ke ina tali ia tatou.

ʼE fakaloto mālohiʼi e te Folafola ʼa te ʼAtua, te Tohi-Tapu, te hahaʼi fuli ʼaē ʼe nātou lau ke nātou maʼuliʼi te vilitute. Ohage la, ʼe tohi fēnei e te ʼapositolo ko Paulo: “Kapau e ko he vilitute pea kapau e ko he mea e vikivikiʼia, koutou tokaga kia mea aia.” (Filipe 4:8) Pea ʼe fakaloto mālohiʼi tatou e te ʼapositolo ko Petelo ke tou fakahoko he ʼu ‘faʼahiga faʼafai fuape ʼo fakatahiʼi ki tatatou tui te vilitute.’ (2 Petelo 1:5) Kae koteā koa te vilitute? ʼE feala koa ke akoʼi ʼi te faleako? ʼE tou lava maʼuliʼi feafeaʼi?

[Kiʼi nota]