Ko Te Logo Makehe
ʼI TE ʼaho 7 ʼo ʼOketopeli 2000, ʼi te fakaʼosi ʼo te fono ʼaē ʼe fai ʼi te taʼu fuli e te Watch Tower Bible and Tract Society of Pennsylvania, neʼe tala te logo makehe e te pelesita ko John E. Barr ʼaē ʼe kau ʼi te Kolesi Pule. ʼI te ʼaho ʼaia, neʼe kamata ʼaki te ʼu akonaki neʼe fai e Theodore Jaracz pea mo Daniel Sydlik.—Vakaʼi te ʼu pasina 12-16 pea mo te 28-31 ʼo te nusipepa ʼaenī.
Neʼe fakahā e te Tēhina ko Barr te logo ʼe maʼuhiga ʼaupito, ʼo ina ʼui fēnei: “Neʼe foaki ki te ‘kaugana agatonu mo fakapotopoto’ pea mo te Kolesi Pule, ia te ʼu gāue ʼe maʼuhiga age pea mo lahi age ʼi te ʼu gāue ʼaē neʼe fakagafua ke fai e te ʼu sosiete kua fakamoʼoni e te lao fakatagata. ʼO mulimuli pe ki te ʼu meʼa ʼaē neʼe fakatuʼutuʼu ʼaki te ʼu sosiete ʼaia, neʼe fakaʼaogaʼi pe maʼa te kau Fakamoʼoni ʼa Sehova. Kae ko totatou Pule ia Sesu Kilisito neʼe ina fakanofo te kaugana agatonu ki tana ‘ ʼu meʼa’ fuli peʼe ko te ʼu gāue ʼo te Puleʼaga ʼi te kele.”—Mateo 24:45-47.
ʼO ʼuhiga mo te sosiete ʼo Pennsylvania, neʼe toe ʼui fēnei e te Tēhina ko Barr: “Talu tona fakatuʼu mai te 1884, neʼe ʼaoga ʼaupito ia te Watch Tower Bible and Tract Society of Pennsylvania ki te gāue ʼa te kau Fakamoʼoni ʼa Sehova ʼo te temi nei. Kae ʼi te ʼu lakaga ʼaē neʼe ʼaoga ai, neʼe fakaʼaogaʼi e te ‘kaugana agatonu mo fakapotopoto’ te sosiete ʼaia ʼaē kua fakamoʼoni ʼi te lao.”
ʼI te ʼu akonaki ʼa te ʼu Tēhina ko Sydlik pea mo Jaracz, neʼe nā fakamahino neʼe tuku te ʼu gāue fakakelekele fuli ʼa te ʼAliki ki te “kaugana agatonu mo fakapotopoto,” pea ko te kaugana ʼaia ʼe ina fakanofo te ʼu tagata fakapotopoto ʼi ‘te tahi ʼu ōvi’ moʼo tokaga ki te tahi ʼu maʼua. (Soane 10:16) ʼE mole he vaega faka Tohi-Tapu ʼe ina fakamaʼua ai ki te kau Kilisitiano fakanofo ke nātou takitaki te ʼu sosiete ʼaē ʼe fakaʼaogaʼi e te kau Fakamoʼoni ʼa Sehova, ʼaē kua fakagafua e te lao fakatagata.
Neʼe fakahā e te Tēhina ko Barr ki te hahaʼi ʼo te fono, mole heʼeki faʼa fualoa ko ʼihi tēhina ʼo te Kolesi Pule ʼa te kau Fakamoʼoni ʼa Sehova ʼaē neʼe ko te kau takitaki pea mo nātou faʼufaʼu te ʼu pilō, kua nātou tuku te ʼu maʼua ʼaia ʼo te ʼu sosiete fuli ʼaē ʼe fakaʼaogaʼi e te “kaugana agatonu mo fakapotopoto” ʼi Amelika. Moʼo fetogi ʼo nātou, neʼe filifili ʼi te kalasi ʼo te tahi ʼu ōvi ia te ʼu tēhina ʼe feala hatatou falala kia nātou.
Neʼe lelei te tonu ʼaia. ʼE faka fealagia ai ki te ʼu tēhina ʼo te Kolesi Pule ke lahi tonatou temi moʼo teuteuʼi te meʼa kai fakalaumālie, pea mo tokaga ki te ʼu meʼa ʼaē ʼe ʼaoga ʼi te faʼahi fakalaumālie maʼa te foʼi famili fakatautehina faka malamanei.
Moʼo fakaʼosi, neʼe ʼui fēnei e te pelesita ki te hahaʼi ʼo te fono: “Ko te ʼu maʼua kehekehe ʼaia neʼe hinoʼi ke fai e te ʼu tagata taupau kua fakapotopoto, . . . ʼe nātou gāue fuli ʼo mulimuli ki te takitaki fakalaumālie ʼa te Kolesi Pule. . . . Tou kole fuli kia Sehova ke ina tapuakinaʼi tatatou ʼu faiga fakatahi moʼo fai tona finegalo, moʼo vikiʼi pea mo faka kolōliaʼi tona huafa lahi.”