Koteā Te Palatiso Fakalaumālie?

KO GUSTAVO neʼe lahilahi ake ʼi te kiʼi kolo veliveli ʼo Pelesile.a Talu mai tana kei veliveli, neʼe akoʼi age kia ia ko te hahaʼi agalelei ʼe ʼolo ki selo mokā nātou mamate. Neʼe mole ina ʼiloʼi te fakatuʼutuʼu ʼa te ʼAtua, ʼe ʼi ai te ʼaho ʼe maʼu ai anai e te hahaʼi agatonu te maʼuli haohaoa ʼi te palatiso ʼi te kele. (Apokalipesi 21:3, 4) Pea neʼe ʼi ai te tahi meʼa neʼe mole ina ʼiloʼi. Neʼe mole mahino kia ia, māʼiape la ʼi te temi nei, neʼe feala ke maʼuli ʼi he palatiso fakalaumālie.

Neʼe kua koutou logo koa ki te palatiso fakalaumālie ʼaia? ʼE koutou ʼiloʼi koa pe koteā tona faka ʼuhiga pea koteā ʼaē ʼe tonu ke tou fai ke tou kau ai? Ko ia ʼaē ʼe ina fia maʼu te fiafia moʼoni, ʼe tonu ke ina ʼiloʼi pe koteā te palatiso ʼaia.

ʼE Tuʼu ʼIfea Te Palatiso Fakalaumālie?

ʼE lagi mole tui anai he tahi mokā tou ʼui age, ʼi te temi nei, ʼe feala ke maʼuli ʼi he palatiso. ʼE mole feala ke tou ʼui ko te malamanei ʼe ko he palatiso, heʼe hoko ki te hahaʼi tokolahi te meʼa ʼaenī neʼe fakamatala e te hau Hepeleo ʼo te temi muʼa: “Koutou sisio ki te ʼu loʼimata ʼo nātou ʼaē neʼe maʼuʼuli taʼomia, kae neʼe mole ʼi ai hanatou tagata fakaloto fīmālie; pea neʼe maʼu te mālohi ʼi te faʼahi ʼo nātou ʼaē ʼe nātou faka taʼomia ia nātou, pea neʼe mole ʼi ai hanatou tagata fakafimālie.” (Tagata Tānaki 4:1) Ko te toko lauʼi miliona hahaʼi ʼe nātou maʼuli mamahi ʼuhi ko te ʼu kākā faka politike, faka lotu, pea mo te ʼu fihifihia faka ekonomika, pea ʼe mole hanatou fakaloto fīmālie, ʼe mole hanatou tagata fakaloto fīmālie. Pea ko te tokolahi ʼe nātou faiga ke nātou totogi tonatou ʼu maʼua, mo pusiaki tanatou fānau, pea ʼe nātou fai mo te tahi ʼu gāue moʼo taupau te maʼuli. ʼO feiā mo te ʼu hahaʼi, ʼe mahino ia ʼe nātou lotolelei anai ke ʼi ai hanatou tagata fakaloto fīmālie, ko he tahi ʼe ina fakamaʼamaʼa siʼisiʼi pe tanatou ʼāmoga. Kia nātou fuli ʼaia, ko tonatou maʼuli ʼe mole ko he palatiso.

Kae ʼe tuʼu koa ʼifea te palatiso fakalaumālie? Ko te ʼu kupu faka Keleka pea mo faka Hepeleo ʼaē neʼe fakaliliu ʼaki te kupu “palatiso,” ʼe faka ʼuhiga ki he ʼōloto, ko he koga meʼa tokalelei ke kita mālōlō ai pea ʼe fīmālieʼi ai tokita loto. ʼE fakapapau mai e te Tohi-Tapu, ko te kele ʼe liliu anai ko he palatiso moʼoni, ko he ʼōloto maʼa te hahaʼi haohaoa. (Pesalemo 37:10, 11) ʼAki te manatu ʼaia, ʼe tou fakatokagaʼi ai ko te palatiso fakalaumālie ʼe ko he ʼaluʼaga ʼe tou mataleleiʼia pea ʼe kita maʼuli fīmālie ai, ʼo feala ai ki te hahaʼi ke nātou tokalelei pea mo tokalelei mo te ʼAtua. Ia ʼaho nei, kua tuʼu te palatiso ʼaia, he neʼe maʼu e Gustavo pea ʼe kau kiai te hahaʼi ʼe nātou ʼāsili kaugamālie.

ʼI tona taʼu 12, neʼe fakatuʼutuʼu e Gustavo ke liliu ko he patele. Neʼe lotolelei kiai tana ʼu mātuʼa, pea neʼe hū ai ki te seminalio. Neʼe kau ai ki te fai mahōlō, mo te fai théâtre pea mo te fai politike, ʼaē neʼe fakatuʼutuʼu e te lotu ke ʼolo age te kau tūpulaga. Neʼe ina ʼiloʼi ko he patele ʼe tonu ke ina tauhi te hahaʼi pea ʼe mole feala ke ʼohoana. Kae neʼe ʼiloʼi e Gustavo ko ʼihi patele pea mo ʼihi hahaʼi seminalio neʼe nātou fai te ʼu aga heʼemaʼa. ʼI tana sio ki te ʼu meʼa ʼaia, neʼe kamata ai te ʼinu kava lahi ʼa Gustavo. ʼE mahino ia neʼe mole heʼeki ina maʼu te palatiso fakalaumālie.

ʼI te tahi ʼaho, neʼe lau e Gustavo te kiʼi pepa lotu neʼe palalau ʼo ʼuhiga mo te palatiso ʼi te kele. Neʼe ina fakakaukauʼi ai te fakatuʼutuʼu ʼo te maʼuli. ʼE ina ʼui fēnei: “Neʼe ʼau kamata lau tuʼumaʼu ai te Tohi-Tapu, kae neʼe mole ʼau mahino kiai. Neʼe mole ʼau fakatokagaʼi pe la ʼe ʼi ai te huafa ʼo te ʼAtua.” Neʼe mavae ʼi te seminalio pea neʼe ʼalu ki te kau Fakamoʼoni ʼa Sehova, ʼo ina kole ke nātou tokoni age ke mahino ki te Tohi-Tapu. Ki muli age, neʼe tuputupu vave pea neʼe ina foaki tona maʼuli ki te ʼAtua. Neʼe ʼiloʼi e Gustavo te ʼuhiga ʼo te palatiso fakalaumālie.

Ko He Hahaʼi ʼe Nātou Toʼo Te Huafa ʼo Te ʼAtua

Neʼe ako e Gustavo, ko te huafa ʼo te ʼAtua ia Sehova, ʼe ko he puani maʼuhiga ʼaupito ki he tahi ʼe ina ako te Tohi-Tapu. (Ekesote 6:3) ʼE ko he faʼahi maʼuhiga ʼo te tauhi moʼoni. Neʼe akoʼi e Sesu tana ʼu tisipulo ke nātou faikole fēnei: “Ko tamatou Tamai e i Selo, ke tapuha tou Huafa.” (Mateo 6:9) ʼI tana palalau ki te kau Senitile ʼaē neʼe liliu ko he kau Kilisitiano, neʼe ʼui fēnei e te tisipulo ko Sakopo: “[Neʼe] haga . . . te ʼAtua ʼo tokagaʼi te ʼu puleʼaga ke toʼo mai ai he hahaʼi ki tona huafa.” (Gaue 15:14, MN ) ʼI te ʼuluaki sēkulō, ko te “hahaʼi ki tona huafa” neʼe ko te kokelekasio faka Kilisitiano. Ia ʼaho nei, ʼe ʼi ai koa he hahaʼi ki te huafa ʼo te ʼAtua? Ei, pea neʼe mahino ai kia Gustavo ko te hahaʼi ʼaia ʼe ko te kau Fakamoʼoni ʼa Sehova.

ʼE gāue te kau Fakamoʼoni ʼa Sehova ia fenua pea mo telituale e 235. ʼE nātou toko ono miliona tupu kau minisi, pea ko te tahi ʼu hahaʼi fia logo ʼe toko valu miliona neʼe nātou kau ki tanatou ʼu fono. ʼE ʼiloʼi lelei nātou e te hahaʼi ʼuhi ko tanatou fai faka mafola, heʼe nātou fakahoko te ʼu folafola ʼaenī ʼa Sesu: “Ko te logo lelei ʼaenī ʼo te puleʼaga ʼe faka mafola anai ʼi te kele katoa, ko he meʼa fakamoʼoni ia ki te ʼu puleʼaga katoa.” (Mateo 24:14, MN ) Kae he koʼe koa neʼe manatu e Gustavo neʼe ina maʼu te palatiso fakalaumālie ʼi tana fakatahi mo te kau Fakamoʼoni ʼa Sehova? ʼE ina ʼui fēnei: “Neʼe ʼau fakatatau te ʼu meʼa ʼaē neʼe ʼau sio ʼi te mālama kae tāfito ʼi te seminalio pea mo te meʼa ʼaē neʼe ʼau maʼu ʼi te kau Fakamoʼoni ʼa Sehova. Ko te meʼa ʼaē ʼe kehe ʼaupito ai ʼe ko te ʼofa ʼaē ʼe maʼu e te kau Fakamoʼoni.”

Neʼe tatau te ʼu palalau ʼaē neʼe fai e ʼihi ʼo ʼuhiga mo te kau Fakamoʼoni ʼa Sehova. Ko Miriam, ko he taʼahine Pelesile, neʼe ina ʼui fēnei: “Neʼe mole ʼau ʼiloʼi peʼe feafeaʼi haku maʼuli fiafia, māʼia ʼi toku famili. Neʼe ʼau ʼuluaki sio ki te maʼuliʼi ʼo te ʼofa ʼi te kau Fakamoʼoni ʼa Sehova.” Neʼe ʼui fēnei e te tagata ʼe higoa ko Christian: “ ʼI ʼihi temi neʼe ʼau faifakalauʼakau ai, kae neʼe mole maʼuhiga kia ʼau te lotu. Neʼe maʼuhiga age kia ʼau toku ʼaluʼaga ʼi te sosiete pea mo taku gāue aseniolo. Kae ʼi te kamata ako ʼo toku ʼohoana te Tohi-Tapu mo te kau Fakamoʼoni ʼa Sehova, neʼe ʼau sio ki tana fetogi. Neʼe ʼau toe punamaʼuli ʼi te fiafia pea mo te faʼafai ʼa te kau fafine Kilisitiano ʼaē neʼe nātou ʼaʼahi ia ia.” He koʼe ʼe palalau feiā te hahaʼi ʼo ʼuhiga mo te kau Fakamoʼoni ʼa Sehova?

Koteā Te Palatiso Fakalaumālie?

Ko te faʼahi ʼaē ʼe makehe ai te kau Fakamoʼoni ʼa Sehova ʼe ko tanatou leleiʼia te ʼatamai mālama ʼo te Tohi-Tapu. ʼE nātou tui ko te Tohi-Tapu ʼe moʼoni pea ʼe ko te Folafola ʼa te ʼAtua. Kae ʼe mole nātou faka feʼauga pe ki tanatou mahino ki te ʼu meʼa tāfito ʼo tanatou lotu. ʼE ʼi ai tanatou polokalama ako takitokotahi pea mo te lau ʼo te Tohi-Tapu. Ka fakatahi he tahi mo te kau Fakamoʼoni ʼa Sehova, pea ʼe lahi ai te ʼu meʼa ʼaē ʼe ina ako ʼo ʼuhiga mo te ʼAtua pea mo Tona finegalo, ohage ko tona fakahā ʼi te Tohi-Tapu.

Ko te ʼatamai mālama ʼaia ʼe ina faka ʼāteainaʼi te kau Fakamoʼoni ʼa Sehova mai te ʼu manatu ʼaē ʼe nātou pulihi te fiafia ʼa te hahaʼi, ohage ko te mataku pea mo te ʼu manatu kovi. Neʼe ʼui fēnei e Sesu: “E fakaateaina anai koutou e te mooni,” pea ʼe ko te faʼahi la ʼaia ʼaē ʼe hoko ki te kau Fakamoʼoni ʼa Sehova. (Soane 8:32) Ko Fernando, ʼaē neʼe faifakalauʼakau ʼi te temi muʼa, ʼe ina ʼui fēnei: “Neʼe ʼau maʼu te fīmālie lahi ʼi taku ako ʼo ʼuhiga mo te maʼuli heʼegata. Neʼe ʼau mataku naʼa ʼau mate peʼe mate taku ʼu mātuʼa.” ʼAki te moʼoni, neʼe mole kei mataku ia Fernando ki te ʼu laumālie pea mo te ʼui ʼaē ʼe toe hoko atu tokita maʼuli mokā kita mate.

ʼI te Tohi-Tapu, ko te ʼatamai mālama ʼo ʼuhiga mo te ʼAtua ʼe pipiki ki te palatiso. Neʼe ʼui fēnei e te polofeta ko Isaia: “ ʼE mole nātou fai anai he meʼa ʼe kovi pea ʼe mole fakatupu anai he maumau ʼi toku moʼuga maʼoniʼoni katoa, heʼe fonu moʼoni anai te kele ʼi te ʼatamai mālama ʼo ʼuhiga mo Sehova ohage ko te ʼuʼufi ʼo te tai e te ʼu vai.”—Isaia 11:9.

ʼE moʼoni, ʼe mole feʼauga ia te ʼatamai mālama moʼo fakahoko ʼo te tokalelei ʼaē neʼe fakakikite e Isaia. ʼE tonu ke maʼuliʼi te ʼu meʼa ʼaē ʼe ako. Neʼe ʼui fēnei e Fernando: “Ka maʼuliʼi e he tahi ia te ʼu fua ʼo te laumālie, pea ʼe lagolago ki te palatiso fakalaumālie.” Neʼe talanoa ia Fernando ʼo ʼuhiga mo te ʼu palalau ʼa te ʼapositolo ko Paulo, ʼaē neʼe ina fakahigoaʼi te ʼu kalitate lelei ʼaē ʼe tonu ke maʼuliʼi e he Kilisitiano, ko “te fua ʼo te laumālie.” Neʼe ina ʼui ʼe ko “te ofa, te fiafia, te tokalelei, te kataki, te agalelei, te agaofa, te agatonu, te agamalu, te agalolomi.”—Kalate 5:22, 23.

ʼE koutou mahino koa pe koʼe ko te fakatahi ʼaia mo te hahaʼi fuli ʼaē ʼe nātou faiga ke nātou maʼuliʼi te ʼu kalitate ʼaia, ʼe nātou faʼu ia te palatiso? Ko te palatiso fakalaumālie ʼaē neʼe fakakikite e te polofeta ko Sofonia ʼe maʼu moʼoni ʼi te hahaʼi ʼaia. Neʼe ina ʼui fēnei: “ ʼE mole nātou fai anai he ʼu aga heʼe faitotonu, pea ʼe mole nātou fakamatala anai ni ʼu loi, pea ʼe mole maʼu anai ʼi tonatou ʼu gutu he ʼalelo kākā; koteʼuhi, ʼe nātou kakai anai pea mo nātou takokoto anai, pea ʼe mole he tahi ʼe ina fakamatakuʼi anai nātou.”—Sofonia 3:13.

ʼE ʼAoga ʼAupito Te ʼOfa

Neʼe lagi koutou fakatokagaʼi ko te ʼuluaki fua ʼo te laumālie ʼaē neʼe talanoa kiai Paulo ʼe ko te ʼofa. ʼE ko te kalitate ʼaia ʼaē ʼe talanoa tāfito kiai ia te Tohi-Tapu. Neʼe ʼui fēnei e Sesu: “Aki te mea aia, e iloi anai e te tagata fuape, ko koutou ko aku tisipulo, kapau e koutou maù te feʼofaʼofani.” (Soane 13:35) ʼE moʼoni, ko te kau Fakamoʼoni ʼa Sehova ʼe mole ko he ʼu hahaʼi haohaoa. ʼI ʼihi temi, ʼe hoko he ʼu fihifihia ia nātou ohage pe ko te ʼu meʼa ʼaē neʼe hoko ki te kau ʼapositolo ʼa Sesu. Kae ʼe nātou feʼofaʼofani moʼoni, pea ʼe nātou faikole ke tokoni age te laumālie maʼoniʼoni ke nātou maʼuliʼi te kalitate ʼaia.

Koia ʼe makehe tanatou ʼu felogoi. ʼE mole nātou fakakeheʼi he kolo peʼe ko he fenua. ʼI tona ʼuhiga moʼoni, ʼi te ʼu taʼu fakaʼosi ʼo te 20 sēkulō, ʼi te ʼu fenua ʼaē neʼe hoko ai te fetauʼaki ʼo te hahaʼi ʼaē ʼe lanu kehekehe, neʼe tokolahi te kau Fakamoʼoni ʼi te ʼu fenua ʼaia neʼe nātou fepuipuiʼaki logola neʼe feala ke nātou mamate ai. Logola tanatou ʼōmai “mai te atu puleaga, mo te u hako, mo te u lanu, pea mo te u lea fuape,” kae ʼe nātou maʼu te logo tahi ʼe hoki feala hakotou mahino kiai mo kapau ʼe hoko kia koutou te faʼahi ʼaia.—Apokalipesi 7:9.

Te Palatiso Fakalaumālie ʼo Te Hahaʼi ʼa Te ʼAtua

ʼE mole maʼu ʼi te palatiso fakalaumālie te fialahi, te aga heʼeʼaoga, pea mo te manatu pe ʼaē kia kita. Neʼe ʼui fēnei ki te kau Kilisitiano: “Tuku takotou muliʼi te tuʼu ʼo te ʼu faʼahiga meʼa ʼaenī, kae ke koutou fetogi ia koutou ʼo fakafoʼou tokotou ʼatamai, ke feala ai hakotou ʼiloʼi papau pe koteā te finegalo ʼo te ʼAtua, tona lelei, tona lave lelei, pea mo tona haohaoa.” (Loma 12:2, MN ) Kapau ʼe tou taupau ke maʼa totatou maʼuli pea mo tou fai te finegalo ʼo te ʼAtua, ʼe tou tokoni ki te laga ʼo te palatiso fakalaumālie pea mo tokoni ki tatatou fiafia. Neʼe sio ia Carla ki te moʼoni ʼo te faʼahi ʼaia. ʼE ina ʼui fēnei: “Neʼe akoʼi mai e taku tāmai ke ʼau gāue kinakina ke ʼau maʼu haku paʼaga. Kae logola neʼe ʼau maʼu he fīmālie ʼi taku ako ʼi te univelesitē, kae neʼe mole ʼau maʼu te logo tahi faka famili pea mo te fīmālie, ʼaē ʼe feala pe ke kita maʼu ʼaki te ʼatamai mālama ʼo te Folafola ʼa te ʼAtua.”

ʼE moʼoni, ʼe mole puli te ʼu fihifihia ʼo te maʼuli ʼi tatatou maʼuli ʼi te palatiso fakalaumālie. ʼE kei mahahaki pe te kau Kilisitiano. Ko te fenua ʼaē ʼe nātou nonofo ai ʼe lava hoko ai he tau faka sivile. Tokolahi ʼe nātou kātakiʼi tonatou ʼaluʼaga masiva. Kae ko tatatou felogoi lelei mo Sehova ʼAtua—te koga maʼuhiga ʼo te palatiso fakalaumālie—ko tona faka ʼuhiga ʼe tou lava kumi tokoni kia te ia. Koia ʼe ina fakaafe tatou ke tou ‘tuku tatatou kavega kia te ia,’ pea tokolahi ʼe nātou lava fakamoʼoni neʼe tokoni age te ʼAtua kia nātou ʼi hona ʼaluʼaga fakatalakitupua ʼi te ʼu temi faigataʼa ʼaupito. (Pesalemo 55:22; 86:16, 17) ʼE fakapapau e te ʼAtua ʼe nofo mo tana kau atolasio tatau aipe peʼe nātou ʼi “te mafa ʼo te fakapōʼuli.” (Pesalemo 23:4) Kapau ʼe tou falala ʼe lava tokoni mai te ʼAtua kia tatou, pea ʼe feala ai ke tou taupau te “tokalelei o te Atua aia e fakalaka i te atamai fuape,” ʼaē ʼe ko te faʼahi tāfito ʼaia ʼo te palatiso fakalaumālie.—Filipe 4:7.

Tou Lagolago Ki Te Palatiso Fakalaumālie

Tokolahi te hahaʼi ʼe nātou leleiʼia te ʼolo ʼo mamata ki he ʼōloto. ʼE nātou leleiʼia tanatou ʼolo ʼo haʼele ai peʼe ko tanatou heheka ʼi he hekaʼaga ʼo mamata. ʼO toe feiā pe, tokolahi ʼe nātou leleiʼia te fakatahi mo te kau Fakamoʼoni ʼa Sehova. Kia nātou ko te fakatahi ʼaia ʼe fakaloto fīmālie, mo tokalelei, pea mo fakaloto mālohi. Kae ko he ʼōloto matalelei ʼe tonu ke kita tokaga kiai ke hage tuʼumaʼu ko he palatiso. ʼO toe feiā aipe, ʼe feala ke maʼu ia te palatiso fakalaumālie ʼi te mālama ʼaenī ʼaē ʼe mole ko he palatiso, ʼuhi pe heʼe tokaga kiai te kau Fakamoʼoni ʼa Sehova, pea ʼe tapuakina e te ʼAtua tanatou ʼu faiga. Pea ʼe lava feafeaʼi hakita tokoni ki te taupau ʼo te palatiso ʼaia?

ʼUluaki, ʼe tonu ke koutou fakatahi mo te kokelekasio ʼa te kau Fakamoʼoni ʼa Sehova, ke koutou ako ia te Tohi-Tapu mo nātou, pea ke koutou maʼu te ʼatamai mālama ʼo te Tohi-Tapu ʼaē ʼe ko te tafitoʼaga ʼaia ʼo te palatiso fakalaumālie. Neʼe ʼui fēnei e Carla: “ ʼE mole he palatiso fakalaumālie mo kapau ʼe mole he meʼa kai fakalaumālie.” ʼE kau kiai takotou lau tuʼumaʼu te Folafola ʼa te ʼAtua pea mo takotou fakakaukauʼi te ʼu meʼa ʼaē ʼe koutou lau. Ko te ʼatamai mālama ʼaē ʼe koutou maʼu ʼe ina fakaōvi koutou kia Sehova ʼAtua, pea ʼe koutou ʼoʼofa anai kia te ia. ʼE koutou toe ako anai ke koutou palalau kia te ia ʼi te faikole, pea mo koutou kole tana tokoni pea mo tona laumālie moʼo tokoni atu ke koutou fai tona finegalo. Neʼe ʼui mai e Sesu kia tatou ke tou haga faikole. (Luka 11:9-13) Neʼe ʼui fēnei e te ʼapositolo ko Paulo: “Koutou faikole tuumau.” (1 Tesalonika 5:17) Ko te faʼahi maʼuhiga ʼo te palatiso fakalaumālie, ʼe ko te pilivilesio ʼaē ke koutou palalau ki te ʼAtua ʼi te faikole, ʼo koutou falala katoa ʼe fakalogo atu.

ʼAki te temi, ʼe hikihiki anai tokotou maʼuli ʼuhi ko te ʼu meʼa ʼaē ʼe koutou ako, pea ki ʼamuli, ʼe koutou fia palalau anai ki te hahaʼi ʼo ʼuhiga mo te ʼu meʼa ʼaia. Pea ʼe feala anai ke tou mulimuli ki te fakatotonu ʼaenī ʼa Sesu: “Ke huhulu feia toutou malama ia mua o te hahai, koteuhi ke natou mamata ki autou gaue lelei pea e natou fakakololia ki tautou Tamai i Selo.” (Mateo 5:16) ʼE koutou fiafia ʼaupito anai, mo kapau ʼe koutou vaevae mo ʼihi te ʼatamai mālama ʼo ʼuhiga mo Sehova ʼAtua pea mo Sesu Kilisito, pea mo koutou vikiʼi te ʼofa lahi ʼaē neʼe nā fakahā ki te malamanei.

ʼE hoko mai anai te ʼaho ʼaē ka liliu ai te kele katoa ko he palatiso—ko he ʼōloto ʼe mole ʼulihi pea mo he nofoʼaga matalelei maʼa te hahaʼi agatonu. Ko te palatiso fakalaumālie ʼaē ʼe tou maʼu ʼi te ʼu “temi faigataa” ʼaenī, ʼe ko he fakamoʼoni ʼo te mālohi ʼa te ʼAtua pea mo he fakahā fakatomuʼa ʼo te meʼa ʼaē ʼe feala ke ina fai pea ʼe ina fai anai ʼi te ka haʼu.—2 Timoteo 3:1.

Māʼia ʼi te temi nei, ko nātou ʼaē ʼe nonofo ʼi te palatiso fakalaumālie ʼe hoko kia nātou ʼi hona ʼaluʼaga fakalaumālie ia Isaia 49:10: “ ʼE mole nātou fia kakai anai, pea ʼe mole nātou fia ʼiʼinu anai, pea ʼe mole lave anai kia nātou te vevela pea mo te laʼā. He ko Ia ʼaē ʼe fakaʼofaʼofa kia nātou, ʼe ina takitaki anai nātou, pea ʼe ina taki anai nātou ōvi ki te ʼu vaitafe.” Ko José ʼe fakamoʼoni ki te faʼahi ʼaia. Neʼe fakaʼamu ke liliu ko he tagata fai mahōlō ʼiloa, kae kua lahi age tana fiafia ʼi tana tauhi ki te ʼAtua ʼaki te kokelekasio faka Kilisitiano. ʼE ina ʼui fēnei: “ ʼI te temi nei, ʼe ʼi ai te ʼuhiga ʼo toku maʼuli. ʼE ʼau logo fīmālie ʼi te loto fale fakatautehina faka Kilisitiano, pea ʼe ʼau ʼiloʼi ko Sehova ʼe ko he Tāmai ʼofa ʼe feala ke tou falala kia te ia.” Ko te fiafia ʼa José—pea mo te lauʼi miliona hahaʼi ohage ko ia—ʼe fakamatala lelei ia Pesalemo 64:10: “Ko ia ʼaē ʼe faitotonu ʼe fakafiafia anai ia Sehova pea mo nono moʼoni ia te ia.” ʼE ko he fakamatala matalelei ʼaia ʼo te palatiso fakalaumālie!

[Kiʼi nota]

[Paki ʼo te pasina 10]

ʼI tatatou maʼuʼuli ʼi te palatiso fakalaumālie, tou faiga ke mafola te palatiso ʼaia!