ʼE Mālohi Te Lotu Faka Kilisitiano Moʼoni!
“ ʼAki he agaaga mālohi neʼe haga tuputupu pea mo mālohi ʼaupito te folafola ʼa Sehova.”—Gaue 19:20, MN.
1. Koutou fakamatala te tuputupu ʼo te Lotu Faka Kilisitiano ʼi te ʼuluaki sēkulō.
ʼAKI te mālohi ʼo te laumālie maʼoniʼoni, neʼe tala e te ʼu ʼuluaki Kilisitiano te folafola ʼa te ʼAtua ʼaki he faʼafai neʼe mole feala hona tāʼofi. Neʼe tohi fēnei e te tagata fai hisitolia: “Neʼe fakaofoofo te mafola vave ʼo te Lotu Faka Kilisitiano ʼi te Puleʼaga Loma katoa. ʼI te taʼu 100, neʼe lagi teitei maʼu te ʼu hahaʼi Kilisitiano ʼi te ʼu palokia fuli ʼo te ʼu tafaʼaki ʼo te Metitelanea.”
2. Neʼe faigaʼi feafeaʼi e Satana ke ina fakagata te mafola ʼo te logo lelei, pea neʼe fakakikite feafeaʼi te potu ʼaia?
2 Neʼe mole feala kia Satana te Tevolo ke ina fakagata te faka mafola ʼa te kau ʼuluaki Kilisitiano. Kae moʼo tauʼi te mafola ʼo te logo lelei, neʼe ina fakaʼaogaʼi te tahi puleʼaki—te ʼapositasia. Neʼe fakakikite e Sesu te tuputupu ʼo te faʼahi ʼaia ʼi tana lea fakatātā ʼo ʼuhiga mo te vao kovi pea mo te pulapula lelei. (Mateo 13:24-30, 36-43) Neʼe toe fai te fakatokaga e te ʼapositolo ko Petelo ʼo ʼuhiga mo te kau faiakonaki loi ʼaē ka malaga ake ʼi te kokelekasio, pea ʼe nātou faʼu anai te ʼu magaʼi lotu fakatupu maveuveu. (2 Petelo 2:1-3) ʼO feiā mo te ʼapositolo ko Paulo, neʼe ina fakahā fakalelei ʼe hoko anai te ʼapositasia ʼi muʼa ʼo te ʼaho ʼo Sehova.—2 Tesalonika 2:1-3.
3. Koteā ʼaē neʼe hoko ʼi te ʼosi mate ʼo te kau ʼapositolo?
3 ʼI te ʼosi mate ʼo te kau ʼapositolo, neʼe taʼomia te logo lelei e te ʼu akonaki pea mo te ʼu filosofia pagani. Ohage ko tona fakakikite, neʼe fetogi pea mo ʼulihi te logo maʼa ʼo te moʼoni e te kau tagata faiakonaki loi. Neʼe pulihi māmālie te Lotu Faka Kilisitiano moʼoni e te lotu loi ʼe fakahigoaʼi ko te Keletiate. Neʼe haʼu mai ai te kalasi ʼo te kau takitaki lotu ʼaē neʼe nātou faigaʼi ke mole maʼu te Tohi-Tapu e te hahaʼi. Logope te tuputupu ʼo nātou ʼaia ʼe nātou lau ko nātou ko te kau Kilisitiano, kae ko tanatou tauhi neʼe mole maʼa ia. Neʼe mafola te Keletiate ʼi te ʼu fenua pea neʼe liliu ko he fakatuʼutuʼu mālohi pea mo he mālohi ʼi te Potu Uesite, kae neʼe mole ina maʼu te tapuakina pea mo te laumālie ʼo te ʼAtua.
4. He koʼe koa neʼe mole hoko ia te fakatuʼutuʼu ʼa Satana moʼo fakaiku noaʼi te finegalo ʼo te ʼAtua?
4 Kae ko te fakatuʼutuʼu ʼa Satana moʼo fakaiku noaʼi te finegalo ʼo Sehova neʼe mole hoko ia. Māʼia mo te ʼu temi ʼaē neʼe mālohi ai te ʼapositasia, neʼe kei maʼuli pe te Lotu Faka Kilisitiano moʼoni ʼi ʼihi hahaʼi. Ko te ʼu tagata ʼaē neʼe nātou hiki te Tohi-Tapu, neʼe nātou faigaʼi ke nātou fai fakalelei te gāue ʼaia. Koia, neʼe mole malave he gāue ʼa te ʼapositasia ki te Tohi-Tapu, logope ko te logo ʼaē ʼe maʼu ai neʼe fetogi e te tokolahi ʼo te hahaʼi ʼaē neʼe nātou ʼui ʼe tonu ke nātou akoʼi ki te hahaʼi. Lolotoga te ʼu sēkulō, ko te ʼu tagata popoto ohage ko Jérôme pea mo Tyndale neʼe nātou fakaliliu pea mo tufa te Tohi-Tapu ʼaki he lototoʼa. Neʼe fakahā te Tohi-Tapu ki te ʼu lauʼi miliona hahaʼi ʼo feiā mo te faʼahiga Lotu Faka Kilisitiano, kae ki te lotu ʼaia neʼe ko te lotu loi ia.
5. Koteā ʼaē neʼe fakakikite e te polofeta ko Taniela ʼo ʼuhiga mo ‘te ʼatamai mālama moʼoni’?
5 Kae ohage ko tona fakakikite ʼi te tohi ʼo Taniela, ‘neʼe mahu te ʼatamai mālama moʼoni.’ Neʼe hoko te potu ʼaia ʼi “te temi fakaʼosi”—te temi ʼaenī ʼe tou lolotoga maʼuʼuli ai. (Taniela 12:4) Neʼe taki e te laumālie maʼoniʼoni te hahaʼi ʼaē ʼe nātou ʼoʼofa ki te moʼoni ke nātou maʼu te ʼatamai mālama totonu ʼo ʼuhiga mo te ʼAtua moʼoni pea mo tana fakatuʼutuʼu. Hili te ʼu sēkulō ʼo te akonaki faka ʼaposita, kua mālohi te folafola ʼa te ʼAtua! ʼI te temi nei, kua kalagaʼi te logo lelei ʼi te potu fuli, ʼo fakahā ki te hahaʼi te ʼamanaki ʼo he mālama foʼou taulekaleka. (Pesalemo 37:11) Tou vakaʼi age muʼa te tuputupu ʼo te folafola ʼa te ʼAtua ʼi te temi nei.
Ko Te Tuputupu ʼo Te Folafola ʼi Te Temi Nei
6. Neʼe koteā te ʼu moʼoni ʼaē neʼe mahino kiai te kau Ako ʼo te Tohi-Tapu ʼi te 1914?
6 ʼI te fakaʼosi ʼo te 19 sēkulō, neʼe fakaloto mālohiʼi e te moʼoni faka Tohi-Tapu ia te kiʼi kūtuga ʼo te kau Ako ʼo te Tohi-Tapu, ʼaē ʼe fakahigoaʼi ʼi te temi nei ko te kau Fakamoʼoni ʼa Sehova. ʼI te 1914 neʼe nātou mahino lelei ai ki te Tohi-Tapu. Neʼe nātou mahino ki te ʼu moʼoni taulekaleka ʼo ʼuhiga mo te fakatuʼutuʼu ʼa te ʼAtua. Neʼe malave ʼaupito kia nātou te ʼofa ʼo Sehova ʼi tana momoli ifo tona ʼAlo ki te kele, ʼo faka fealagia ai te maʼu ʼo te maʼuli heʼegata. Neʼe nātou ʼiloʼi ai pea mo mahino ai ki te huafa ʼo te ʼAtua pea mo tona ʼulugaaga. Tahi ʼaē meʼa, neʼe nātou mahino ki te kua ʼosi ʼo “te ʼu temi ʼo te kau Senitile,” ʼo nātou mālama ai ki te kua ōvi mai ʼo te temi ʼaē ka foaki ai e te Puleʼaga ʼo te ʼAtua te ʼu tapuakina ki te malamanei. (Luka 21:24, King James Version) ʼE ko he logo fakaofoofo! Neʼe tonu ke tala te ʼu logo mālohi ʼaia ki te hahaʼi fuli, ʼi te potu fuli. Neʼe fakalogo te maʼuli ʼo te hahaʼi ki te gāue ʼaia!
7. Kua mālohi feafeaʼi te moʼoni faka Tohi-Tapu ʼi te ʼu temi ʼaenī?
7 Neʼe tapuakina e Sehova te kau Kilisitiano ʼaē neʼe fakanofo ʼaki te laumālie. ʼI te temi nei, ko nātou ʼaē kua nātou maʼu te Lotu Faka Kilisitiano moʼoni kua nātou fakalaka ʼi te ono miliona hahaʼi. Kua toe mafola foki te folafola ʼa te ʼAtua ʼi te ʼu fenua, koteʼuhi ʼe maʼu te kau Fakamoʼoni ʼa Sehova ʼi te ʼu fenua e 235. Pea tahi ʼaē meʼa, kua mālohi age te moʼoni faka Tohi-Tapu ʼi te ʼu fihifihia faka lotu fuli, ʼo feiā mo ʼihi ʼatu fihifihia. ʼE toe fakamoʼoni e te gāue fai faka mafola ʼaia ʼi te malamanei katoa te moʼoni ʼo te ʼi henī ʼa Sesu ʼi tona ʼuhiga hau.—Mateo 24:3, 14.
8. Koteā ʼaē ʼe ʼui e ʼihi ʼo ʼuhiga mo te tuputupu ʼo te kau Fakamoʼoni ʼa Sehova?
8 Ohage ko te fakatokagaʼi e te kau tagata fai hisitolia te tuputupu fakaofoofo ʼo te Lotu Faka Kilisitiano ʼi te ʼuluaki sēkulō, tokolahi te kau popoto ʼe nātou palalau ki te tuputupu ʼo te hahaʼi ʼa Sehova ʼi te ʼu temi ʼaenī. ʼI Amelika, neʼe tohi fēnei e te ʼu tagata popoto e toko lua: “ ʼI te ʼu taʼu e 75 kua hili, neʼe fakaofoofo te tuputupu ʼa te kau Fakamoʼoni ʼa Sehova . . . pea neʼe hoko te faʼahi ʼaia ʼi te malamanei katoa.” ʼE ʼui e te nusipepa ʼo te Potu Esite ʼo Afelika, ko te kau Fakamoʼoni ʼa Sehova ʼe “ko te lotu ʼaē neʼe vave ʼaupito tana tuputupu pea mo tona fakaʼapaʼapaʼia ʼi te malamanei katoa, ʼuhi ko tana pipiki katoa ki te ʼu akonaki faka Tohi-Tapu.” Pea ko te nusipepa Katolika, ʼe tā ʼi te Eulopa, ʼe palalau ki te “tuputupu fakaofoofo ʼo te kau Fakamoʼoni ʼa Sehova.” Koteā ʼaē neʼe tokoni ki te tuputupu ʼaia?
ʼE Gāue Te Laumālie Maʼoniʼoni ʼi Te Temi Nei
9. (a) Koteā te ʼuluaki tupuʼaga ʼo te mālohi ʼo te folafola ʼa te ʼAtua ʼi te temi nei? (b) ʼE taki feafeaʼi mai e Sehova tana hahaʼi kia te ia?
9 Ko te ʼuluaki tupuʼaga ʼo te mālohi ʼo te folafola ʼa te ʼAtua ʼi te temi nei ʼe ko te gāue mālohi ʼa te laumālie ʼo Sehova, ohage ko tona fai ʼi te ʼuluaki sēkulō. Neʼe ʼui fēnei e Sesu: “E mole feala ki he tahi ke haù kia te au, kapau e mole taki mai ia kia te au e te Tamai ae nee ina fekaui mai au.” (Soane 6:44) ʼE hā ʼaki mai te ʼu palalau ʼaia, ʼe taki fakalelei mai e te ʼAtua te hahaʼi ʼaē ʼe nātou lotolelei kiai, ʼo ina fai ke lave ʼi tonatou ʼu loto. ʼAki te gāue fai faka mafola ʼo tana kau Fakamoʼoni, ʼe taki mai e Sehova ki tana tauhi “te ʼu meʼa ʼaē ʼe manakoʼia ʼo te ʼu puleʼaga fuli”—te hahaʼi agamālū, te hahaʼi ʼo te kele ʼaē ʼe hage ko he ʼu ōvi.—Asea 2:6, 7.
10. Ko te ʼu faʼahiga hahaʼi feafeaʼi ʼaē ʼe nātou tali te folafola ʼa te ʼAtua?
10 Neʼe mole gata pe te fakaloto mālohiʼi e te laumālie maʼoniʼoni te hahaʼi ʼa te ʼAtua ke nātou ʼave te folafola ʼa te ʼAtua ki te potu taupotu ʼo te kele; kae neʼe ina toe uga foki mo te hahaʼi kehekehe ke nātou tali te logo lelei. ʼE moʼoni, ko nātou ʼaē neʼe nātou tali te folafola ʼa te ʼAtua neʼe ʼōmai mai “te u hako, mo te u lea, mo te u hahai kehekehe, pea mai te atu puleaga fuape.” (Apokalipesi 5:9; 7:9, 10) ʼE kau ai te ʼu hahaʼi maʼu koloā mo te hahaʼi māsisiva, te ʼu hahaʼi neʼe lelei tanatou ako pea mo te ʼu hahaʼi ʼe mole popoto ʼi te lautohi pea mo te faitohi. Ko ʼihi ʼe nātou tali te folafola ʼi te ʼaluʼaga faigataʼa, ohage ko te tau pea mo te fakataga, kae ko ʼihi ʼe nātou tali te logo lelei ʼi te ʼu ʼaluʼaga fīmālie. Ko te ʼu tagata mo te ʼu fafine mai te ʼu puleʼaga kehekehe, mo te ʼu agaʼi fenua kehekehe, mai te ʼu lotoʼā fakamamahi ʼo aʼu ki te ʼu fale matalelei ʼaupito, neʼe nātou tali lelei te logo lelei.
11. ʼE gāue feafeaʼi te laumālie maʼoniʼoni ʼi te maʼuli ʼo te hahaʼi, pea koteā ʼaē kua ʼiloga lelei?
11 Logope te kehekehe ʼaupito ʼo te hahaʼi ʼe kau ki te hahaʼi ʼa te ʼAtua, kae ʼe nātou faifaitahi. (Pesalemo 133:1-3) Ko te tahi fakamoʼoni ʼaia ki te gāue ʼa te laumālie maʼoniʼoni ʼi te maʼuli ʼo te hahaʼi ʼaē ʼe tauhi ki te ʼAtua. Ko tona laumālie ʼe ko he mālohi ʼe ina uga tana ʼu kaugana ki te faʼahi ʼaē ʼe lelei, ʼe ina faka fealagia ke nātou fakahā te ʼofa, te fiafia, te finegaloʼofa, pea mo ʼihi kalitate matalelei. (Kalate 5:22, 23) ʼI te temi nei, ʼe tou sio lelei ki te meʼa ʼaē neʼe fakakikite e te polofeta ko Malakia: “ ʼE koutou . . . mamata anai ki te kehekehe ʼo te tagata faitotonu pea mo te tagata agakovi, te kehekehe ʼo te tagata ʼaē ʼe kaugana ki te ʼAtua pea mo te tagata ʼaē ʼe mole kaugana kia te ia.”—Malakia 3:18.
ʼE Gāue Mālohi Te Folafola ʼa Te ʼAtua ʼi Te Kau Gāue Faʼafai
12. ʼE faka ʼuhiga feafeaʼi e te kau Fakamoʼoni ʼa Sehova te gāue fai evaselio, pea koteā te meʼa ʼaē kua nātou mahino kiai ʼo ʼuhiga mo tanatou gāue fai faka mafola?
12 Ko te kau Fakamoʼoni ʼa Sehova ʼo te temi nei ʼe mole ko he ʼu hahaʼi lotu ʼe nonofo noa. ʼE nātou kau mālohi ki te gāue fai faka mafola. Ohage pe ko te ʼu ʼuluaki Kilisitiano, ʼe nātou foaki tonatou maʼuli ʼaki he loto lelei moʼo fai ʼo te finegalo ʼo te ʼAtua, ʼo nātou faiga ke nātou tokoni ki te hahaʼi ke nātou mahino ki te ʼu fakapapau ʼo te Puleʼaga ʼo Sehova. Ko nātou ko te ʼu kaugā gāue ʼa te ʼAtua, pea ʼaki tona laumālie maʼoniʼoni, ʼe nātou fakatahiʼi te hahaʼi ki te tauhi kia Sehova. ʼAki tanatou fai te potu ʼaia, ʼe nātou fakahā ai te manavaʼofa ʼo Sehova pea mo tona ʼofa ki te malamanei heʼe tui. Logope tonatou mole tali leleiʼi, mo tonatou manukiʼi pea mo fakatagaʼi, kae nātou fai pe te gāue ʼaia. Neʼe teuteuʼi e Sesu tana ʼu tisipulo ki te faʼahiga tali kehekehe ʼa te hahaʼi ki te logo lelei. Neʼe ina ʼui fēnei: “E mole lahiʼage te kaugana i tona [“pule,” MN ]. Kapau nee natou fakatagai au pea e natou fakatagai anai mo koutou; kapau nee natou taupau taku folafola pea e natou taupau anai mo ʼa koutou.”—Soane 15:20.
13. Koteā te ʼu faʼahi ʼaē ʼe mole maʼu e te Keletiate, kae ʼe lahi tona maʼu ʼi te kau Fakamoʼoni ʼa Sehova?
13 ʼE tou ōfo ki te tatau ʼo te kau Fakamoʼoni ʼa Sehova ʼo te temi nei pea mo nātou ʼaē neʼe nātou tali te Lotu Faka Kilisitiano ʼi te ʼuluaki sēkulō. ʼE toe ʼiloga lelei ʼi te temi nei te kehekehe ʼo te kau Fakamoʼoni ʼa Sehova pea mo te Keletiate. ʼI tana ʼosi faitohi ʼo ʼuhiga mo te faʼafai ʼa te kau ʼuluaki Kilisitiano ʼi te fai faka mafola, neʼe lāuga fēnei te tagata poto: “Ke feiā age la ʼe ʼi ai he fetogi ʼi te fakatuʼutuʼu ʼo te ʼēkelesia ʼo te temi ʼaenī, ke feala he fakahoko e te kau Kilisitiano fuli kua papitema ia te gāue faka evaselio, pea ke ʼiloga ʼi tonatou faʼahiga maʼuli ʼo laka age ia ʼi te maʼuli ʼo nātou ʼaē ʼe mole tui, ʼe tonu ia ke lahi hatatou faiga ki te potu ʼaia.” Ko te ʼu faʼahi ʼaē ʼe mole maʼu e te Keletiate, ʼe lahi tona maʼu ʼi te kau Fakamoʼoni ʼa Sehova! ʼE nātou maʼu he tui ʼe maʼuli, ko he tui ʼe moʼoni, pea ʼe ko he tui ʼe fakatafito ki te moʼoni faka Tohi-Tapu, pea ʼe ina uga ia nātou ke nātou vahevahe mo te hahaʼi fuli ʼaē ka nātou fia logo anai.—1 Timoteo 2:3, 4.
14. Neʼe faka ʼuhiga feafeaʼi e Sesu tona minisitelio, pea koteā te aga ʼaē ʼe fakahā e tana kau tisipulo ʼi te temi nei?
14 Neʼe fai fakamalotoloto e Sesu tana minisitelio, pea neʼe ko te potu ʼaia neʼe tokaga tāfito kiai. Neʼe ina ʼui fēnei kia Pilato: “Ko te mea aeni, nee au tupu mai ai pea nee au haele mai ai ki te malama-nei, ke au fakamooni ki te mooni.” (Soane 18:37) ʼE manatu tahi te hahaʼi ʼa te ʼAtua mo Sesu. ʼAki tanatou taupau te moʼoni faka Tohi-Tapu ʼi tonatou loto, ʼe nātou faiga ke maʼu he ʼu puleʼaki moʼo vahevahe te moʼoni ʼaia mo he tokolahi. ʼE ʼiloga tanatou poto fakakaukau ʼi ʼihi puleʼaki poto neʼe nātou fai.
15. Neʼe fakahā feafeaʼi e ʼihi te faʼahiga puleʼaki poto moʼo faka mafola te logo lelei?
15 ʼI te fenua ʼo te Potu Saute ʼo Amelika, neʼe folau te kau Fakamoʼoni ʼi te ʼu maga ʼo te Vaitafe ʼo Amazonie moʼo fakakaku te moʼoni ki te hahaʼi. Kae ʼi te hoko ʼo te tau ʼi te loto fenua ʼi te 1995, neʼe tapuʼi te feʼaluʼaki ʼa te hahaʼi ʼi te vaitafe ʼaia. ʼI te loto ʼa te kau Fakamoʼoni ke nātou haga ʼave te ʼu tohi faka Tohi-Tapu ki te hahaʼi ʼaē ʼe nātou fia fai kiai, neʼe nātou fakatuʼutuʼu ke nātou faka tafea te logo ʼaia ʼi te ʼu fuga vai. Neʼe nātou fai te ʼu tohi pea mo nātou ʼai fakatahi mo te ʼu nusipepa ʼo Te Tule Leʼo pea mo te Réveillez-vous ! ki te ʼu gaʼasi hina palasitike. Pea neʼe nātou tuku te ʼu foʼi hina ʼaia ke tafea ʼi te ʼu vai. Neʼe fai te faʼahi ʼaia lolotoga taʼu e fā vaelua ʼo aʼu ki te toe fakagafua ʼo te feʼaluʼaki ʼi te vaitafe. ʼI te ʼu tafatafa ʼo te vaitafe, neʼe fakamālo te hahaʼi ki te kau Fakamoʼoni ʼo ʼuhiga mo te ʼu tohi ʼaē neʼe nātou momoli feiā age. Neʼe ʼi ai te fafine, neʼe ko te ako faka Tohi-Tapu, neʼe ʼuma kia nātou pea mo tagi ʼo ina ʼui fēnei age: “Neʼe ʼau manatu ʼe mole ʼau toe felāveʼi anai mo koutou. Kae ʼi taku kamata maʼu te ʼu tohi ʼi te ʼu foʼi hina, neʼe ʼau ʼiloʼi ai, neʼe mole koutou galoʼi ia ʼau!” Ko ʼihi ʼe maʼuʼuli ʼi te vaʼe vaitafe neʼe nātou ʼui neʼe nātou lau liuliuga te ʼu nusipepa. Neʼe lahi te ʼu nofoʼaga neʼe ʼi ai tonatou faʼahiga “fale meli”—ko he ʼāhiohio neʼe ina tānaki faka temi te ʼu meʼa fuli ʼaē ʼe tafea ʼi te ʼu fuga vai. Ko te koga meʼa ʼaia neʼe tautau ʼōmai kiai te hahaʼi ʼaē neʼe nātou fia fai ki te logo, moʼo vakaʼi peʼe mole ʼi ai he “tohi” mai ia nātou ʼo ʼuta.
16. Kapau ʼi ʼihi temi ʼe tou fealagia ai, pea e feafeaʼi hatatou maʼu he faigamālie moʼo fai ʼo ni ʼu tisipulo?
16 ʼE takitaki pea mo lagolago e Sehova, ʼo feiā mo tana kau ʼaselo mālohi ia te faka mafola ʼo te logo lelei. (Apokalipesi 14:6) Kapau ʼe tou fealagia, pea ʼe tautau hoko te ʼu faigamālie neʼe mole tou ʼamanaki kiai. ʼI Nairobi, ʼi Kenia, neʼe fakaʼosi te faka mafola ʼa te ʼu fafine Kilisitiano e lua ʼi te ʼu ʼapi ʼaē neʼe hinoʼi age kia nāua. Fokifā pe neʼe ʼalu age te fafine ʼo ʼui age kia nāua ʼaki he loto fiafia: “Neʼe ʼau faikole ke ʼau felāveʼi mo he tahi ohage ko koulua.” Neʼe ina kole age ki te ʼu Fakamoʼoni ke nā foimo ʼolo age ki tona ʼapi ke nātou fai palalau ai, pea ʼi te ʼaho pe ʼaia neʼe kamata atu aipe tana ako Tohi-Tapu. He koʼe neʼe ʼalu fakavilivili age te fafine ʼaia ki te ʼu Kilisitiano ʼaia e lua? Koteʼuhi ʼi te ʼu vāhaʼa e lua ki muʼa atu, neʼe mate tana kiʼi toe kei meamea. Pea ʼi tana sio ki te tūpulaga mo tana pepa lotu “Quel espoir y-a-t-il pour nos chers disparus ?” neʼe fia fai kiai, pea neʼe ina kole age ki te tūpulaga ke ina foaki age maʼa ia. Neʼe mole loto kiai te tūpulaga, kae neʼe ina fakahā age te ʼu Fakamoʼoni ʼaē neʼe nātou fakatoʼo age ki ai te kiʼi pepa lotu. Neʼe tuputupu vave te fafine ʼi te faʼahi fakalaumālie, pea neʼe kua ina lava kātakiʼi te ʼu mamahi ʼo ʼuhiga mo tana tamasiʼi ʼaē kua mate.
ʼE Tonu Ke Mālohi Totatou ʼOfa Ki Te ʼAtua
17-19. Ko te ʼofa feafeaʼi ʼaē neʼe fakahā e Sehova ki te malamanei ʼaki te totogi?
17 ʼE pipiki tāfito te tuputupu ʼo te folafola ʼa te ʼAtua ʼi te kele katoa ki te sakilifisio faitotogi ʼa Kilisito Sesu. Ohage pe ko te totogi, ko te gāue fai faka mafola ʼe ko he fakahā ʼaia ʼo te ʼofa ʼa Sehova ki te hahaʼi ʼi te potu fuli pe. Neʼe takitaki e te ʼAtua te ʼapositolo ko Soane ke ina tohi te faʼahi ʼaenī: “Nee ofa lahi te Atua ki te malama-nei, ko te tupuaga aia o tana foaki mai tona Alo Ulutokotahi, ke aua naa mate ia natou fuape e tui kia te ia, kae ke natou maù te mauli heegata.”—Soane 3:16.
18 Koutou fakakaukauʼi age muʼa ki te ʼofa ʼo Sehova ʼi tana foaki te totogi. Lolotoga he ʼu temi kua fualoa ʼaupito, neʼe felogoi lelei te ʼAtua mo tona ʼAlo ʼofaina pea mo ulutokotahi, “te kamataʼaga ʼo te ʼu meʼa ʼaē neʼe fakatupu e te ʼAtua.” (Apokalipesi 3:14, MN ) ʼE ʼofa mamahi ia Sesu ki tana Tāmai, pea ko Sehova neʼe ʼofa ki tona ʼAlo “i muà o te fakatafito o te malama-nei.” (Soane 14:31; 17:24) Neʼe tali e Sehova ke mate tona ʼAlo ʼofaina ke feala ai ke maʼu e te malamanei te maʼuli heʼegata. Ko he toe ʼofa lahi ki te malamanei!
19 ʼE ʼui fēnei ia Soane 3:17: “Nee mole fekauʼi mai e te Atua tona Alo ki te malama-nei ke ina fakamau te malama-nei, kae ke fakamauli te malama-nei aki iaʼia.” Koia, neʼe tuku ifo e Sehova tona ʼAlo ke ina fai te gāue ʼofa moʼo hāofaki ia te hahaʼi, kae neʼe mole haʼu moʼo fakamāuʼi peʼe tauteaʼi. ʼE ʼalutahi te faʼahi ʼaia mo te ʼu palalau ʼaenī ʼa Petelo: “E mole loto ia [Sehova] ke mate niʼihi, kae ke tafoki te tagata fuape o fakahemala.”—2 Petelo 3:9.
20. Koteā te pikipikiga ʼo te hāofaki pea mo te faka mafola ʼo te logo lelei?
20 ʼAki tana fakatuʼutuʼu ʼo ʼuhiga mo te hāofaki logope te mamahi neʼe tau mo ia, ʼe loto e Sehova ke fakaʼaogaʼi e he hahaʼi tokolahi te faigamālie ʼaia. Neʼe tohi fēnei e te ʼapositolo ko Paulo: “ ‘Ko ia ʼaē ʼe fetapā ki te huafa ʼo Sehova ʼe hāo anai ia.’ Kae ʼe nātou fetapā feafeaʼi anai kia ia ʼaē ʼe mole nātou tui ki ai? Pea ʼe nātou tui feafeaʼi anai kia ia ʼaē ʼe mole heʼeki nātou logo ki he talanoa ʼo ʼuhiga mo ia? Pea ʼe nātou logo feafeaʼi anai, mo kapau ʼe mole he tahi ʼe fai faka mafola?”—Loma 10:13, 14, MN.
21. ʼE tonu ke tou faka ʼuhiga feafeaʼi te faigamālie ʼaē ko te kau ki te gāue fai faka mafola?
21 Ko he pilivilesio taulekaleka hakita kau ki te gāue fai faka mafola ʼaia pea mo te fai ako ʼaē ʼe fai ʼi te malamanei katoa! ʼE mole ko he gāue faigafua, kae ʼe fiafia ʼaupito ia Sehova mokā sio ifo ki tana hahaʼi agatonu ʼe nātou maʼuliʼi te moʼoni pea mo fakahā te logo lelei ki te hahaʼi! Koia tatau aipe pe koteā tokotou ʼaluʼaga, kae koutou tuku te laumālie ʼo te ʼAtua pea mo tokotou ʼofa ke ina ʼeke koutou ke koutou kau ki te gāue ʼaia. Pea ke koutou manatuʼi ko te meʼa ʼaē ʼe tou sio kiai ʼe hoko ʼi te malamanei, ʼe ina fakamoʼoni mai kua vave fakahoko e Sehova ʼAtua tana fakapapau ʼo ʼuhiga mo tatatou hū “ki te ʼu lagi foʼou pea mo te kele foʼou” faka kolōlia “ ʼaē ʼe tonu ke nofo ai te faitotonu.”—2 Petelo 3:13, MN.
ʼE Kei Koutou Manatuʼi Koa?
• He koʼe koa neʼe mole lava tāʼofi te logo lelei e te ʼapositasia?
• Neʼe mālohi feafeaʼi te folafola ʼa te ʼAtua ʼi totatou temi?
• Ko te ʼu ʼaluʼaga fea ʼaē ʼe gāue ai te laumālie ʼo te ʼAtua ʼi te temi nei?
• Koteā te pikipikiga ʼo te totogi pea mo te faka mafola ʼo te logo lelei?
[Mape mo te paki ʼo te pasina 16]
(Vakaʼi te nusipepa)
Te tuputupu ʼo te kau fai faka mafola ʼo te Puleʼaga ʼi te 20 sēkulō
Tona fakafuafua (ʼo lauʼi miliona)
6.0
5.5
5.0
4.5
4.0
3.5
3.0
2.5
2.0
1.5
1.0
0.5
1900 1910 1920 1930 1940 1950 1960 1970 1980 1990 2000
[Paki ʼo te pasina 15]
JÉRÔME
TYNDALE
GUTTENBERG
HUS
[Haʼuʼaga ʼo te paki]
Gutenberg and Hus: From the book The Story of Liberty, 1878
[Paki ʼo te pasina 15]
Ko te kau Ako Tohi-Tapu ʼe nātou tala te logo lelei ʼi te ʼu taʼu 1920
[Paki ʼo te pasina 16, 17]
ʼE tali te logo lelei e te ʼu hahaʼi ʼo te malamanei katoa
[Paki ʼo te pasina 18]
Ohage pe ko te sakilifisio faitotogi ʼa Sesu Kilisito, ʼe vikiʼi e te gāue fai faka mafola te ʼofa ʼo te ʼAtua