Koutou Katoa Pea Mo Koutou Tui Mālohi

‘Koʼeni! Te Toe Hahaʼi Tokolahi!’

NEʼE ko te fehuʼi neʼe fakakaukau kiai te kau kaugana ʼa Sehova lolotoga te ʼu taʼu ʼe lauʼi hogofulu. Neʼe nātou faigaʼi ke nātou maʼu he puleʼaki ki te faʼahi ʼaia ʼaki te Tohi-Tapu. Neʼe lahi ai te ʼu talanoa ki te faʼahi ʼaia. Kae neʼe hoki maʼu tona tali ʼi te Tohi-Tapu, pea neʼe fiafia lahi te hahaʼi ʼaē neʼe kau ki te fakatahi ʼi Washington, ʼi te taʼu 1935.

Koʼeni te fehuʼi ʼaē neʼe lahi tona fakakaukauʼi: Ko ai te “hahai kaugamalie” (Tauhi Foou ), peʼe ko “te toe hahaʼi tokolahi” (Traduction du monde nouveau ), ʼaē ʼe tuʼu ia Apokalipesi 7:9? ʼE maʼuʼuli anai koa te kūtuga ʼaia ʼi selo?

Ko He Fehuʼi Talu Mai Fualoa

Talu mai te temi ʼo te ʼapositolo ko Soane ʼo kaku mai ki totatou temi, neʼe feʼekeʼaki te kau Kilisitiano peʼe ko ai ʼaē ʼe faka ʼuhiga ki ai te “hahai kaugamalie.” Neʼe ʼui e te kau Ako ʼo te Tohi-Tapu ko te toe hahaʼi tokolahi neʼe ko he lua kalasi ʼo he ʼu hahaʼi ʼe maʼuʼuli anai ʼi selo, ko he kūtuga neʼe nātou maʼu he ʼatamai mālama ʼo ʼuhiga mo te moʼoni faka Tohi-Tapu kae neʼe mole lahi hanatou fai faka mafola.

Kae neʼe ʼi ai te kau kaugā gāue ʼa te kau Kilisitiano fakanofo neʼe nātou mālolohi ʼaupito ʼi te fai faka mafola. Neʼe mole nātou ʼamanaki ke nātou ʼolo ki selo. ʼI tona fakahagatonu, neʼe ʼalutahi tanatou ʼamanaki mo te akonaki “Ko Te Toko Lauʼi Miliona Hahaʼi ʼe Maʼuʼuli ʼi Te Temi Nei ʼe Mole Nātou Mamate Anai,” neʼe fakahā e te hahaʼi ʼa Sehova mai te taʼu 1918 ki te 1922. ʼE maʼu anai e te ʼu hahaʼi ʼaia te maʼuli heʼegata ʼi te kele.

Neʼe talanoa Te Tule Leʼo Fakapilitānia ʼo te ʼaho 15 ʼo ʼOketopeli 1923 ki te lea fakatātā ʼa Sesu ʼo ʼuhiga mo te ʼu ōvi pea mo te ʼu tao pea neʼe ʼui fēnei ai: “ ʼE fakatā e te ʼu ōvi te ʼu hahaʼi fuli ʼo te ʼu puleʼaga, ʼe mole fakanofo nātou e te laumālie kae ʼe nātou lotolelei ki te faitotonu, ʼe nātou fakamoʼoni ʼi tonatou ʼatamai kia Sesu Kilisito ko te ʼAliki pea mo nātou kumi pea mo ʼamanaki ki he temi ʼe lelei age lolotoga tona temi hau.”—Mateo 25:31-46.

Ko He Tahi ʼu Faka Mālamagia

ʼI te 1931, ko te ʼUluaki Tohi Justification, neʼe talanoa ki te kapite 9 ʼo Esekiele, ʼo ina fakahā ko te hahaʼi ʼaia ʼaē neʼe fakaʼiloga ʼonatou ʼu laʼe ki te maʼuli ʼi te fakaʼosi ʼo te mālama, ʼe ko te ʼu ōvi ʼo te lea fakatātā ʼa Sesu. Ko te Tolu Tohi ʼo te Justification (ʼaē neʼe tā ʼi te 1932) neʼe ina fakamatala ai te loto faitotonu ʼa te tagata ʼaē ʼe mole ko he Iselaele ko Sonatape, ʼaē neʼe heka fakatahi ʼi te saliote ʼa te Hau fakanofo ʼo Iselaele ʼaē ko Seu ʼi tana fakaʼauha te hahaʼi ʼaē neʼe tauhi ki te lotu hala. (2 Hau 10:15-28) Neʼe ʼui fēnei ʼi te tohi: “Neʼe fakatātā peʼe neʼe faka ʼuhiga e Sonatape, te kalasi ʼaia ʼo te hahaʼi ʼo te temi ʼaenī ʼi te kele, ʼaē kua nātou mavae mai te kautahi ʼa Satana, ʼo nātou kau ki te faʼahi ʼo te faitotonu, pea ko nātou ʼaia ʼaē ka hāofaki anai e te ʼAliki lolotoga te temi ʼo Halamaketone, ʼe ina puipui anai nātou mai te mamahi ʼaia pea ʼe ina foaki age anai kia nātou te maʼuli heʼegata ʼi te kele. ʼE faʼufaʼu e nātou ʼaia te kalasi ʼa te ʼu ‘ōvi.’ ”

ʼI te 1934, neʼe fakamahino lelei te faʼahi ʼaia e Te Tule Leʼo Fakapilitānia, ʼe tonu ki te kau Kilisitiano ʼaē ʼe nātou ʼamanaki maʼuʼuli ʼi te kele, ke nātou foaki tonatou maʼuli kia Sehova pea mo papitema. Neʼe kua fakahaʼuhaʼu leva te mālama ʼaē ʼo ʼuhiga mo te ʼaluʼaga ʼo te kalasi ʼaia ʼo te hahaʼi ʼaē ʼe maʼuʼuli ʼi te kele!—Tāʼaga Lea 4:18.

Ko He Fakamahino ʼe Mātala

ʼI te temi nei, kua feala ke katoa te mahino ʼaē ki te Apokalipesi 7:9-17. (Pesalemo 97:11) Neʼe fakahā e Te Tule Leʼo te fakaʼamu ke liliu te fakatahi ʼaē neʼe fakatuʼutuʼu ki te ʼaho 30 ʼo Maio ki te ʼaho 3 ʼo Sūnio 1935, ʼi Washington, ʼi Amelika, ko “he meʼa fakafiafia pea mo ʼaoga” kia nātou ʼaia neʼe fakatātā e Sonatape. Neʼe hoko moʼoni te faʼahi ʼaia!

ʼI te akonaki fakaofoofo ʼo ʼuhiga mo “[Te] Hahai Kaugamalie,” neʼe fai ia muʼa ʼo te toko 20 000 hahaʼi, neʼe fakahā e J. F. Rutherford, te fakamoʼoni faka Tohi-Tapu ʼaē ko “te tahi ʼu ōvi” ʼo te temi ʼaenī, ko nātou “te toe hahaʼi tokolahi” ʼaē ʼe talanoa ki ai te Apokalipesi 7:9. (Soane 10:16, MN ) ʼI te fakaʼosi ʼo te akonaki ʼaia, neʼe fehuʼi fēnei e te tagata fai akonaki: “ ʼE ʼau kole atu kia nātou ʼaē ʼe nātou ʼamanaki ke nātou maʼuʼuli ʼo heʼegata ʼi te kele, ke nātou tutuʼu ake!” ʼI te lahi ʼaupito ʼo te hahaʼi ʼaē neʼe tutuʼu ake, neʼe ʼui fēnei e Rutherford: “Koʼeni! Te hahaʼi kaugamālie!” Neʼe gona te nofoʼaki pea neʼe hoa kiai te ʼu pasipasi. ʼI te ʼaho ake, neʼe papitema ai te toko 840 kau Fakamoʼoni foʼou ʼa Sehova, ko te tokolahi ia nātou ʼaia, ʼe nātou kau ki te toe hahaʼi tokolahi.

ʼE Nātou ʼIloga Lelei

ʼI muʼa ʼo te taʼu 1935, neʼe tuputupu te kaugamālie ʼo nātou ʼaē neʼe nātou tali te logo lelei pea neʼe nātou gāue mālohi ʼi te fai faka mafola pea mo nātou ʼamanaki ke nātou maʼuʼuli ʼo heʼegata ʼi te Palatiso ʼi te kele. Neʼe mole nātou holi ke nātou ʼolo ki selo, koteʼuhi neʼe mole foaki age e te ʼAtua kia nātou he ʼamanaki ke nātou maʼuʼuli ʼi selo. Ko te fakahāhā lelei ʼo nātou ʼaia ko te toe hahaʼi tokolahi ʼo te tahi ʼu ōvi ʼi te taʼu 1935 neʼe fakamoʼoni ʼaki ko te pāui ʼo te toko 144 000 Kilisitiano fakanofo neʼe kua katoa.—Apokalipesi 7:4.

ʼI te hoko mai ʼo te Lua Tau Faka Malamanei, neʼe faiga mālohi ia Satana te Tevolo ke ina fakagata te tānaki ʼo nātou ʼaē ka nātou faʼufaʼu te toe hahaʼi tokolahi. Neʼe lahi te ʼu fenua neʼe nātou tapuʼi te gāue fai faka mafola ʼo te Puleʼaga. Lolotoga te ʼu temi fakapōʼuli ʼaia, pea ʼi muʼa ʼo tana mate ʼi Sanualio 1942, neʼe ʼui fēnei e J. F. Rutherford: “ ʼE hage ia ʼe mole faʼa hahaʼi te ‘hahaʼi kaugamālie.’ ”

Kae ʼaki te tapuakina fakaʼatua, ʼe kehe te fakaʼaluʼalu ʼo te ʼu meʼa. Ko te kau Kilisitiano fakanofo ʼo feiā mo ʼonatou ʼu kaugā gāue, te tahi ʼu ōvi, ʼe nātou ‘katoa pea mo tui mālohi,’ ʼo nātou fakahoko te maʼua ʼaē ko te fai ʼo ni ʼu tisipulo. (Kolose 4:12; Mateo 24:14; 28:19, 20) ʼI te 1946, neʼe kaku te hahaʼi ʼo te kau Fakamoʼoni ʼa Sehova ki te toko 176 456—tokolahi ia nātou ʼe nātou kau ki te toe hahaʼi tokolahi. ʼI te taʼu 2000, neʼe ko te toko 6 000 000 tupu kau Fakamoʼoni neʼe nātou tauhi agatonu kia Sehova ʼi te ʼu fenua e 235—ʼe moʼoni ia ko he toe hahaʼi tokolahi! Pea ʼe kei hoko atu pe tana tuputupu.