Tou Haʼele Ki Te Mālo Fakaʼosi!
“Koʼeni ia te hōsi hina; pea ko ia ʼaē neʼe heka ai, neʼe ʼi ai tana nahau; pea neʼe foaki age kia te ia te kolona, pea neʼe hū fakatoʼa ia ki tuʼa pea mo fakaʼosi tana mālo.”—Apokalipesi 6:2, MN.
1. Koteā te ʼu meʼa ʼaē neʼe sio kiai ia Soane ʼo ʼuhiga mo te ka haʼu?
ʼAKI te takitaki ʼa te laumālie maʼoniʼoni, neʼe sio te ʼapositolo ko Soane ki te ka haʼu ʼaē ka hoko mai ʼi te ʼu taʼu e 1 800 pea mo ina fakamatalatala te fakanofo hau ʼo Kilisito. Neʼe ʼaoga te tui kia Soane moʼo faka tui ki te ʼu meʼa ʼaē neʼe sio kiai. Ia ʼaho nei, kua mahino lelei kia tatou ko te fakanofo hau ʼaē neʼe fakakikite neʼe hoko ʼi te 1914. ʼAki te tui, ʼe tou sio kia Sesu Kilisito ʼe “hū fakatoʼa ia ki tuʼa pea mo fakaʼosi tana mālo.”
2. Koteā ʼaē neʼe fai e te Tevolo ʼi te ʼosi fakatuʼu ʼo te Puleʼaga, pea koteā ʼaē ʼe fakamoʼoni kiai?
2 ʼI te ʼosi fakatuʼu ʼo te Puleʼaga, neʼe kapu ifo Satana mai te lagi, pea ʼe ina fai he tau mālohi ʼaki he ʼita lahi kae mole feala ke mālo. (Apokalipesi 12:7-12) ʼAki tona ʼita kua ʼāsili kovi ai te ʼu ʼaluʼaga faka malamanei. ʼE hage te sosiete fakatagata ʼe maumau māmālie. Maʼa te kau Fakamoʼoni ʼa Sehova, ʼe ko he fakamoʼoni ʼaia ko tonatou Hau ʼe haʼele moʼo “fakaʼosi [ʼo] tana mālo.”
Neʼe Faʼufaʼu Te Sosiete ʼo He Mālama Foʼou
3, 4. (a) Koteā te ʼu fetogi ʼaē neʼe fai ʼi te kokelekasio faka Kilisitiano talu mai te fakatuʼu ʼo te Puleʼaga, pea he koʼe neʼe ʼaoga te ʼu fetogi ʼaia? (b) He koʼe neʼe lelei te ʼu fetogi ʼaia ʼaē neʼe fakakikite e Isaia?
3 ʼI te kua fakatuʼu ʼo te Puleʼaga, neʼe tonu leva ke toe mulimuli te kokelekasio faka Kilisitiano—ʼaē kua lahi age tona ʼu maʼua ʼo ʼuhiga mo te Puleʼaga—ki te ʼu gāue ʼo te kokelekasio faka Kilisitiano ʼo te ʼuluaki sēkulō. Koia, ʼi te ʼu alatike ʼo te ʼaho 1 pea mo te ʼaho 15 ʼo Sūnio 1938, neʼe vakavakaʼi e Te Tule Leʼo peʼe tonu ke feafeaʼi te fakatuʼutuʼu ʼa te kautahi faka Kilisitiano. Ki muli age, ko te alatike Fakafalani ʼo te ʼaho 15 ʼo Malesio 1972, neʼe ina fakamahino lelei te Kolesi Pule ia ʼaho nei ʼi te alatike: “ ʼE Kehekehe Te Kolesi Pule Mo He Sosiete Kua Fakamoʼoni.” ʼI te 1972, neʼe fakatuʼutuʼu te ʼu kolesi ʼo te kau tagata ʼāfea moʼo tokoni pea mo takitaki te ʼu kokelekasio.
4 ʼAki te ʼu fakatuʼutuʼu foʼou ʼaia ʼo ʼuhiga mo te taupau, neʼe ina fakamālohiʼi ʼaupito ai te kokelekasio faka Kilisitiano. Neʼe toe lagolago ki te faʼahi ʼaia, te ʼu fakatuʼutuʼu ʼaē neʼe fai e te Kolesi Pule moʼo ako ʼo te ʼu tagata ʼāfea ʼo ʼuhiga mo tanatou ʼu gāue ohage ko te ako kia nātou te fai ʼo he fakamāu. Neʼe fakakikite ia Isaia 60:17, te fakafoʼou māmālie ʼo te fakatuʼutuʼu ʼo te kautahi fakakelekele ʼa te ʼAtua, pea mo tona ʼu fua lelei: “ ʼE mole ʼau ʼaumai anai te kapa, ka ko te aulo, ʼe mole ʼau ʼaumai anai te ukamea ka ko te siliva, ʼe mole ʼau ʼaumai anai te ʼakau ka ko te kapa, ʼe mole ʼau ʼaumai anai te maka, ka ko te ukamea; pea ʼe ʼau fakatuʼu anai te tokalelei ohage ko hau ʼu tagata taupau, pea ko te faitotonu ohage ko hau ʼu hahaʼi tufa gāue.” ʼE ʼiloga te tapuakina ʼa te ʼAtua ʼi te ʼu fetogi ʼaia, pea mo te tali lelei e te ʼAtua ia te hahaʼi ʼaē ʼe nātou lagolago mālohi ki tona Puleʼaga.
5. (a) Koteā ʼaē neʼe fai e Satana ʼi te tapuakinaʼi e Sehova ia Tana hahaʼi? (b) ʼO mulimuli ki te manatu ia Filipe 1:7, neʼe tali feafeaʼi e te hahaʼi ʼa Sehova te ʼita ʼa Satana?
5 Neʼe mole puli kia Satana te ʼofa pea mo te takitaki ʼaē neʼe fai e te ʼAtua ki tana hahaʼi ʼi te ʼosi fakatuʼu ʼo te Puleʼaga. Ohage la, ʼi te 1931 ko te kiʼi kūtuga Kilisitiano ʼaia neʼe nātou tala ʼi muʼa ʼo te kaugamālie ʼe mole ko nātou pe ko he kau Ako ʼo te Tohi-Tapu. ʼO mulimuli ki te manatu ia Isaia 43:10, neʼe ko he kau Fakamoʼoni ʼa Sehova! Pe neʼe hoko fakapunamaʼuli peʼe kailoa, kae neʼe fai e te Tevolo te fakataga lahi ʼi te kele. Māʼiape la mo te ʼu fenua ʼaē ʼe nātou fakagafua te lotu fuli pe, ohage la ko Amelika, Kanata, pea mo Siamani, kae neʼe tuʼa lahi te fakamāu ʼo te kau Fakamoʼoni ʼo ʼuhiga mo te taupau ʼo tanatou ʼāteaina ki te tauhi. ʼI te 1988, neʼe fai e te Telepinale Lahi ʼo Amelika te ʼu fakamāu e 71 ʼo ʼuhiga mo te kau Fakamoʼoni ʼa Sehova, pea ko ʼihi fihifihia neʼe lelei maʼa nātou. Ia ʼaho nei, ʼi te malamanei katoa ʼe kei fai te ʼu fakamāu feiā, pea ohage pe ko te ʼuluaki sēkulō ʼe lava ai ke “puipui te logo lelei pea mo fakamoʼoni kiai te lao.”—Filipe 1:7.
6. Neʼe tāʼofi koa e te ʼu tapu pea mo te ʼu faka tuʼakoi te haʼele ki muʼa ʼa te hahaʼi ʼa Sehova? Koutou tuku mai he faʼifaʼitaki.
6 ʼI te ʼu taʼu 1930, ʼi te ʼu ʼaho ʼaē neʼe iku ai ki te Lua Tau Faka Malamanei, ko te ʼu puleʼaga agamālohi neʼe nātou fai te ʼu tapu pea mo te ʼu faka tuʼakoi ki te gāue ʼa te kau Fakamoʼoni ʼa Sehova ʼi Siamani, ʼi Sepania, pea mo Saponia. Kae ʼi te taʼu 2000, ʼi te ʼu fenua ʼaia e tolu neʼe teitei toko 500 000 te ʼu kaugā faka mafola faʼafai ʼo te Puleʼaga ʼo te ʼAtua. Neʼe teitei pe ko te tuʼa hogofulu ʼo te hahaʼi ʼo te kau Fakamoʼoni ʼi te malamanei katoa ʼi te 1936! Kae ʼe ʼiloga lelei mai ai, neʼe mole lava tāʼofi e te ʼu tapu pea mo te ʼu faka tuʼakoi ia te hahaʼi ʼa Sehova, ʼi tanatou haʼele ki muʼa ʼi te takitaki ʼo tonatou Pule mālo ko Sesu Kilisito.
7. Koteā te meʼa fakatalakitupua ʼaē neʼe hoko ʼi te 1958, pea koteā te fetogi fakamataku ʼaē neʼe hoko talu mai ai?
7 Neʼe hā lelei te tuputupu ʼaia ʼi te 1958, ʼi te ʼuluaki fakatahi lahi ʼaupito ʼa te kau Fakamoʼoni ʼa Sehova ʼi te kolo ʼo New York, ko te Fakatahi Faka Malamanei ʼaē ko tona kupu tāfito “Te Finegalo ʼo Te ʼAtua,” pea neʼe kau kiai te toko 253 922. ʼI te 1970, ʼaki tanatou faka mafola neʼe feala ai ke gāueʼi te ʼu fenua e tolu ʼaē neʼe tou talanoa kiai ʼi te kamata, gata pe ki te fenua ko Siamani ʼo te Potu Esite. Kae neʼe kei tapuʼi te gāue ʼa te kau Fakamoʼoni ʼi te fenua lahi ko Lusia ʼāfea pea mo te ʼu puleʼaga ʼaē neʼe kaugā gāue mo ia ʼi te Pacte de Varsovie. ʼI te temi nei, ʼi te ʼu puleʼaga komunisi ʼāfea ʼaia, ʼe ko te toko tahi miliona vaelua kau Fakamoʼoni.
8. Neʼe koteā te fua ʼo te tapuakina ʼa Sehova ki tana hahaʼi, pea koteā ʼaē neʼe ʼui e Te Tule Leʼo ʼi te 1950 ki te faʼahi ʼaia?
8 Neʼe tapuakinaʼi te kau Fakamoʼoni ʼa Sehova ke nātou tuputupu, koteʼuhi neʼe nātou haga “kumi muʼa te puleʼaga [ʼo te ʼAtua] pea mo tona faitotonu.” (Mateo 6:33) ʼI hona ʼaluʼaga moʼoni, ko te lea faka polofeta ʼa Isaia neʼe kua hoko: “Ko te tokosiʼi ʼe liliu anai ko te lauʼi afe, pea ko ia ʼaē ʼe veliveli ʼe liliu anai ko te puleʼaga mālohi. Ko ʼau, Sehova, ʼe ʼau fakavaveʼi anai te faʼahi ʼaia ʼi tona temi totonu.” (Isaia 60:22) Pea ʼe kei hoko atu te tuputupu ʼaia. ʼI te ʼu taʼu pe ʼaenī e hogofulu kua hili, ko te hahaʼi ʼaē neʼe lagolago ki te Puleʼaga, neʼe tuputupu ʼo aʼu ki te toko 1 750 000. Ko te hahaʼi ʼaia neʼe nātou tali lelei ke nātou kau ki te kūtuga ʼaē neʼe talanoa fēnei kiai Te Tule Leʼo ʼo te 1950: “ ʼE teuteuʼi nei e te ʼAtua ia te sosiete ʼo he mālama foʼou. . . . ʼE fakalaka maʼuli anai te hahaʼi ʼaia ʼi Halamaketone, . . . ʼe nātou ʼuluaki kau anai ki te gāue ʼi te ‘kele foʼou’ . . . , ʼo mulimuli ki te ʼu fakatuʼutuʼu faka teokalatike, heʼe kua nātou popoto ʼi te fai ʼo he ʼu fakatuʼutuʼu.” Neʼe fakaʼosi fēnei te alatike: “Koia, tou haʼele ki muʼa! Tou gāue mālohi fakatahi ohage ko he sosiete ʼo te mālama foʼou!”
9. Neʼe ʼaoga feafeaʼi te ʼu meʼa ʼaē neʼe ako e te kau Fakamoʼoni ʼa Sehova lolotoga ni ʼu tau?
9 Lolotoga te temi ʼaia, neʼe ako e te sosiete ʼo te mālama foʼou peʼe feafeaʼi te fai ʼo he ʼu fakatuʼutuʼu lelei pea mo fakapotopoto, pea kua maʼuhiga ʼaupito te faʼahi ʼaia ia ʼaho nei, ʼo lagi toe ʼaoga anai ki te ʼu gāue ʼaē ka fai ʼi te palatiso ʼi te ʼosi ʼo Halamaketone. Ohage la, neʼe ako e te kau Fakamoʼoni peʼe feafeaʼi te fakatuʼutuʼu ʼo he ʼu fakatahi lalahi, te foaki ʼo he ʼu meʼa moʼo tokoni ki te hahaʼi ʼaē ʼe faigataʼaʼia, pea mo te laga fale fakavilivili. ʼAki te gāue ʼaia, neʼe fakavikiviki pea mo fakaʼapaʼapa ai te tokolahi ki te kau Fakamoʼoni ʼa Sehova.
Neʼe Fakatonutonuʼi Te ʼu Manatu Hala
10, 11. Fakamatala pe neʼe feafeaʼi te fakatonutonuʼi ʼo te ʼu manatu hala ʼo ʼuhiga mo te kau Fakamoʼoni ʼa Sehova.
10 Kae ʼe ʼi ai te ʼu hahaʼi ʼe nātou lau ko te kau Fakamoʼoni ʼa Sehova ʼe nātou fakafeagai ki te sosiete fakatagata. ʼE tupu tāfito te faʼahi ʼaia ʼuhi ko te ʼu akonaki faka Tohi-Tapu ʼaē ʼe mulimuli kiai te kau Fakamoʼoni ʼa Sehova, ohage la ko te ʼu foʼi huki toto, te mole kau ki te politike, te suluka, pea mo tanatou fai te ʼu aga ʼaē ʼe lelei. Kae kua fakahaʼuhaʼu te fakaʼapaʼapa ʼa te hahaʼi ki te ʼu manatu ʼa te kau Fakamoʼoni. Ohage la ko te tōketā fafine ʼi Polonia neʼe telefoni ki te pilō ʼa te kau Fakamoʼoni ʼa Sehova, pea mo ina ʼui age ko ia mo tona ʼu kaugā gāue ʼi te lopitali neʼe nātou palalau fualoa ʼo ʼuhiga mo te ʼu foʼi huki toto. Neʼe nātou fai palalau ki te alatike neʼe tā ʼi te ʼaho ʼaia ʼi te nusipepa Polonia ko te Dziennik Zachodni. Neʼe ʼui e te tōketā fafine ʼaia: “ ʼE mole ʼau leleiʼia te fakaʼaogaʼi fau ʼo te toto ʼi te ʼu faitoʼo ʼa te kau tōketā. ʼE tonu ke fetogi te faʼahi ʼaia, pea ʼe ʼau fiafia heʼe koutou palalau ki te faʼahi ʼaia. ʼE ʼau fia maʼu he tahi ʼu fakamahino.”
11 ʼI te taʼu kua hili, ko te kau tōketā lalahi ʼo Kanata, ʼo te Eulopa, ʼo Iselaele, pea mo Amelika, neʼe nātou fai tanatou fono ʼo ʼuhiga mo te faitoʼo ʼaē ka fakaʼaogaʼi moʼo tokoni ki te kau mahaki ʼaē ʼe mole nātou fakaʼaogaʼi te toto. Neʼe tala ʼi te fono ʼaia neʼe fai ʼi Suisi, ʼe faihala te tokolahi, heʼe hahaʼi age te kau mahaki ʼe nātou mamate ʼi te fakaʼaogaʼi ʼo te ʼu foʼi huki toto, ʼi te kau mahaki ʼaē neʼe mole nātou fakaʼaogaʼi. ʼI te agamāhani ʼe lelei vave age te kau mahaki Fakamoʼoni ʼi te hahaʼi ʼaē neʼe ʼai kia nātou te toto, pea ʼi te agamāhani ʼe mole totogi kovi tonatou faitoʼo.
12. Koutou tuku he faʼifaʼitaki pe neʼe vikiʼi feafeaʼi te lotomālohi ʼa te kau Fakamoʼoni ʼa Sehova e te ʼu hahaʼi maʼuhiga ʼo ʼuhiga mo tanatou ʼāteaina mai te politike.
12 Neʼe lahi mo te ʼu fakavikiviki neʼe fai ki te mole kau ʼa te kau Fakamoʼoni ʼa Sehova ki te tau, ʼi muʼa pea ʼi te lolotoga ʼo te Lua Tau Faka Malamanei ʼaē neʼe gaohi koviʼi tāfito ai nātou e te kau Nasi. Neʼe lahi te ʼu palalau lelei neʼe fai e te hahaʼi ʼo ʼuhiga mo te foʼi fime viteo ʼa te kau Fakamoʼoni ʼa Sehova, ko tona kupu tāfito ‘La fermeté des Témoins de Jéhovah face à la persécution nazie,’ ʼaē neʼe ʼuluaki fakahāhā ʼi te lotoʼā fakamamahi ʼi Siamani ʼi te ʼaho 6 ʼo Novepeli 1996. ʼI te fakahāhā ʼo te foʼi fime ʼaia ʼi te lotoʼā fakamamahi ʼiloa ʼi Bergen-Belsen ʼi te ʼaho 18 ʼo ʼApelili 1998, ko te tagata pule ʼo te Ako Faka Politike ʼi Lower Saxony, neʼe ʼui fēnei e te tōketā Pule ko Wolfgang Scheel: “ ʼE ʼi ai te moʼoni ʼi te ʼu moʼoni ʼo te hisitolia ʼe mole faʼa leleiʼia e te hahaʼi, ko te ʼui ʼaē ko te kau Fakamoʼoni ʼa Sehova neʼe mole nātou lagolago ki te Tauhi Faka Puleʼaga pea neʼe mālohi age tanatou fakafisi ʼi te ʼu ʼēkelesia Kilisitiano. . . . Tatau aipe pe koteā tatatou sio ki te ʼu akonaki pea mo te tauhi lotu ʼa te kau Fakamoʼoni ʼa Sehova, kae ko tonatou lotomālohi lolotoga te puleʼaga Nasi ʼe tāu ke tou fakaʼapaʼapa kia nātou.”
13, 14. (a) Ko ai ʼaē neʼe ina fai te ʼu palalau lelei ʼo ʼuhiga mo te kau ʼuluaki Kilisitiano? (b) Tuku mai he ʼu faʼifaʼitaki ʼo he ʼu palalau lelei neʼe fai maʼa te hahaʼi ʼa te ʼAtua ia ʼaho nei.
13 Mokā lagolago te ʼu hahaʼi maʼuhiga peʼe ko te ʼu telepinale ki te kau Fakamoʼoni ʼa Sehova ʼo ʼuhiga mo he ʼu fakafeagai, pea ʼe feala ke tekeʼi ai te laukovi pea mo te ʼu fakapalatahi ʼaē ʼe fai ʼo ʼuhiga mo te kau Fakamoʼoni. Ko te faʼahi ʼaia ʼe ina faka fealagia kia nātou ke nātou fai palalau mo ni hahaʼi neʼe mole nātou fia logo ʼi muʼa atu. Koia ko te ʼu taʼi aga ʼaia ʼe lelei, pea ʼe fakafetaʼi ʼaupito te kau Fakamoʼoni ʼa Sehova ki te faʼahi ʼaia. Ko te faʼahi ʼaia ʼe ina fakamanatuʼi mai te meʼa ʼaē neʼe hoko ʼi te ʼuluaki sēkulō ʼi Selusalemi. ʼI te temi ʼaē neʼe fia matehi te kau Kilisitiano e te Sanetualio, te telepinale lahi ʼa te kau Sutea, ʼuhi ko te mālohi ʼo tanatou faka mafola, ko Kamaliele, “ko he faiʼako o te lao pea nee fakaapaapaʼi e te hahai fuape,” neʼe ina fai te fakatokaga ʼaenī ʼo ʼui maʼana: “U tagata o Iselaele, koutou tokaga kia koutou, o uhiga mo mea e koutou amanaki fai ki te u tagata aeni. . . . Koutou fakatafatafa mai te u tagata aeni pea koutou tukuʼage natou, koteuhi kapau e ko he tonu pe ko he gaue mai te tagata, e alunoa anai. Kae, kapau e mai te Atua, e mole feala anai tautou maumaui natou, pea e koutou hoko anai ko he u tagata e tau fakafehagai ki te Atua.”—Gaue 5:33-39.
14 Mole heʼeki faʼa fualoa, ohage ko Kamaliele, ko te ʼu hahaʼi maʼuhiga neʼe nātou palalau lelei ki te ʼāteaina faka lotu maʼa te kau Fakamoʼoni ʼa Sehova. Ohage la, ko te pelesita ʼāfea ʼo te Ako Faka Malamanei maʼa te ʼĀteaina Faka Lotu pea mo te ʼu Akonaki, neʼe ina ʼui fēnei: “Ko te ʼu fealagia faka lotu ʼo he lotu ʼe mole tonu ke tou fakafisi kiai ʼuhi pe ʼe mole tali tana ʼu akonaki e te sosiete peʼe mole ʼalutahi mo te ʼu fakatuʼutuʼu māhani ʼo te ʼu lotu.” Pea ko te tagata polofesea ʼo te ako fakapotopoto ʼo te lotu ʼi te univelesitē neʼe ina fai te fehuʼi poto ʼo ʼuhiga mo te fakatuʼutuʼu ʼo te puleʼaga Siamani ʼaē neʼe fakatuʼu moʼo fai he ʼu kumi ʼo ʼuhiga mo te ʼu magaʼi lotu, neʼe ina fehuʼi fēnei: “He koʼe ʼe tonu ke fakamāu te ʼu lotu ʼaē ʼe mole faʼa hahaʼi kae mole fakamāu te ʼu ʼēkelesia lalahi e lua [ʼaē ko te ’Ēkelesia Katolika Loma pea mo te ’Ēkelesia ʼo Lutelo]?” ʼE tou maʼu tona tali ʼi te ʼu palalau ʼaē neʼe tohi e te tagata Siamani, ʼe ina ʼui fēnei: “ ʼE mahalo ia ʼe mole he tahi ʼe ina ʼiloʼi, kae neʼe mulimuli te politike ʼa te puleʼaga ki te ʼu meʼa ʼaē neʼe fakatotonu age e te ʼu hahaʼi ʼaē ʼe tauhi mālohi ki te ʼēkelesia.”
Ko Ai Koa ʼAē ʼe Tou Kumi Ki Ai Te Fakafimālie?
15, 16. (a) He koʼe neʼe mole lava hoko katoa te palalau ʼa Kamaliele? (b) He koʼe neʼe tuʼakoi te ʼu meʼa ʼaē neʼe lava fai e te foʼi toko tolu ʼo ʼuhiga mo Sesu?
15 Ko te meʼa ʼaē neʼe ʼui e Kamaliele ʼe ina fakahā lelei mai, ʼe mole feala ke iku lelei he gāue mo kapau ʼe mole tokoni kiai te ʼAtua. Neʼe lagi leleiʼia e te kau ʼuluaki Kilisitiano tana ʼu palalau ʼaia ʼi te Sanetualio, kae neʼe mole galo kia nātou neʼe moʼoni mo te ʼu palalau ʼa Sesu ʼaē neʼe ina ʼui ʼe fakatagaʼi anai tana ʼu tisipulo. Ko te palalau ʼa Kamaliele neʼe ina fakaiku noaʼi te ʼu fakatuʼutuʼu ʼa te kau takitaki lotu ʼaē ke nātou matehi te ʼu ʼapositolo, kae neʼe mole ina fakagata te ʼu fakataga ʼaē neʼe fai kia nātou, heʼe tou lau fēnei: “Nee pauiʼi e natou te kau apositolo, nee natou fakatotonu ke huipiʼi natou, nee natou tapu kia natou tanatou toe lea i te Huafa o Sesu, pea nee natou fakaateainaʼage natou.”—Gaue 5:40.
16 ʼI te temi ʼaē neʼe fakamāuʼi ai Sesu, neʼe mole maʼu e Posio Pilato hana hala, pea neʼe ina faigaʼi ke ina faka ʼāteaina Sesu, kae neʼe mole hoko. (Soane 18:38, 39; 19:4, 6, 12-16) Māʼiape la mo te foʼi toko lua ʼi te Sanetualio, ko Nikotemo pea mo Sosefo ʼo Alimatea ʼaē neʼe nā leleiʼia ia Sesu, neʼe mole nā lava tāʼofi te telepinale ke ʼaua naʼa matehi ia Sesu. (Luka 23:50-52; Soane 7:45-52; 19:38-40) ʼE faka tuʼakoi te fakafimālie ʼaē ʼe lava fai e te tagata moʼo puipui te hahaʼi ʼa Sehova, tatau aipe pe koteā he faʼahiga ʼaluʼaga. ʼE hoko atu anai te fehiʼaʼinaʼi ʼo te kau tisipulo moʼoni ʼa Kilisito, ohage ko te fehiʼa ʼa te malamanei kia Kilisito. Ko te fakafimālie ʼe haʼu pe ia mai ia Sehova tokotahi.—Gaue 2:24.
17. Koteā te meʼa ʼe ʼiloʼi papau e te kau Fakamoʼoni ʼa Sehova, kae he koʼe ʼe mole nātou lotovaivai ʼi te fia hoko atu ʼo tanatou faka mafola te logo lelei?
17 ʼE ʼiloʼi papau e te kau Fakamoʼoni ʼa Sehova ʼe hoholo atu anai te ʼu fakataga. ʼE hoki gata anai te ʼu fakafeagai mokā pulihi ʼosi te tuʼu ʼa Satana. Kae ko te ʼu fakataga ʼaia, logola ʼe mole ko he meʼa fakafiafia, kae ʼe mole ina tāʼofi te kau Fakamoʼoni ke nātou fakahoko tanatou gāue ʼaē ko te faka mafola ʼo te Puleʼaga. He koʼe ʼe hoko te meʼa ʼaia mo kapau ʼe lagolago te ʼAtua kia nātou? ʼE nātou faka ʼuhiga tonatou Pule lototoʼa ʼaē ko Sesu Kilisito, ʼe ko te faʼifaʼitaki lelei.—Gaue 5:17-21, 27-32.
18. Koteā te fihifihia ʼe fakatalitali kiai te hahaʼi ʼa Sehova, kae koteā ʼaē ʼe nātou ʼiloʼi papau ʼe hoko anai?
18 Mai te kamataʼaga, neʼe fai te ʼu fakafeagai mālohi ki te lotu moʼoni. ʼE mole kei tuai, pea ʼe tauʼi mālohi anai te lotu moʼoni e Koke, ʼaē ʼe ina fakatātā ia Satana ʼaē kua fakamālaloʼi talu tona kapu ifo mai te lagi. Kae ʼe hāofaki anai te lotu moʼoni. (Esekiele 38:14-16) Pea ko “te u hau o te malama-nei katoa” ʼaē ʼe takitaki e Satana, ʼe nātou “tauʼi anai te Akeno, pea e malo anai te Akeno ia natou, koteuhi e ko te Aliki o te u aliki.” (Apokalipesi 16:14; 17:14) Ei, ko totatou Hau ʼe haʼele ki te mālo fakaʼosi pea kua vave “fakaʼosi tana mālo.” ʼE ko he pilivilesio hakita haʼele tahi mo ia, heʼe kua mahino kia tatou ʼe mole toe ʼi ai anai he fakafeagai ki te kau atolasio ʼa Sehova ʼi tanatou ʼui ʼaenī: “E kau te Atua mo tatou”!—Loma 8:31; Filipe 1:27, 28.
ʼE Feala Koa Hakotou Fakamahino?
• Koteā te meʼa ʼaē neʼe fai e Sehova moʼo fakaloto mālohiʼi te kokelekasio faka Kilisitiano talu mai te fakatuʼu ʼo te Puleʼaga?
• Koteā te meʼa ʼaē neʼe fai e Satana moʼo tāʼofi te mālo fakaʼosi ʼa Kilisito, pea neʼe koteā tona fua?
• Koteā te manatu lelei ʼaē ʼe tonu ke tou maʼu ʼo ʼuhiga mo te ʼu gāue lelei ʼaē ʼe fai e te hahaʼi ʼe mole ko he kau Fakamoʼoni?
• Koteā ʼaē ka ʼamanaki fai e Satana, pea koteā anai tona ikuʼaga?
[Paki ʼo te pasina 18]
Ko te ʼu fakatahi ʼe ko he fakaʼiloga ʼe haʼele ki muʼa te hahaʼi ʼa Sehova
[Paki ʼo te pasina 20]
Ko te tauhi ʼāteaina ʼa te kau Fakamoʼoni ʼi te Lua Tau Faka Malamanei ʼe kei vikiʼi ai ia Sehova