ʼE Mole Mālo Anai Te Hahaʼi ʼAē ʼe Nātou Tauʼi Te ʼAtua!
“ ʼE mahino papau ia, ʼe nātou tauʼi anai koe, kae ʼe mole nātou mālo anai ia te koe.”—Selemia 1:19.
1. Koteā te gāue ʼaē neʼe hinoʼi kia Selemia, pea neʼe ina hoko atu ʼo aʼu ki ʼanafea?
NEʼE hinoʼi e Sehova te tūpulaga ko Selemia ke polofeta ki te ʼu puleʼaga. (Selemia 1:5) Neʼe hoko te faʼahi ʼaia lolotoga te ʼafio ʼa Sosiasi te Hau agalelei ʼo Suta. Pea neʼe hoko atu te minisitelio faka polofeta ʼa Selemia ʼo aʼu ki te ʼu temi maveuveu ʼaē neʼe hoko ʼi muʼa ʼo te mālo ʼa Papiloni ʼi Selusalemi, pea mo te ʼave faka popūla ʼo te hahaʼi ʼa te ʼAtua.—Selemia 1:1-3.
2. Koteā te fakaloto mālohi ʼaē neʼe fai e Sehova kia Selemia, pea ko te tauʼi ʼo te polofeta neʼe faka ʼuhiga kiteā?
2 ʼE mahino ia, ʼe fakafeagai anai te hahaʼi ki te ʼu fakamāu ʼaē neʼe tonu ke fakahā e Selemia. Koia neʼe fakamālohiʼi ia ia e te ʼAtua ki te meʼa ʼaē ka hoko kia ia. (Selemia 1:8-10) Ohage la, neʼe fakaloto mālohiʼi te loto ʼo te polofeta ʼaki te ʼu palalau ʼaenī: “ ʼE mahino papau ia, ʼe nātou tauʼi anai koe, kae ʼe mole nātou mālo anai ia te koe, koteʼuhi ‘ ʼe ʼau nofo mo koe moʼou hāofaki,’ ko te ʼui ʼaia ʼa Sehova.” (Selemia 1:19) Kapau neʼe tauʼi Selemia e he tahi pea neʼe hage pe ʼe ina tauʼi te ʼAtua. Ia ʼaho nei, ko Sehova ʼe ʼi ai tana hahaʼi ʼe tatau tanatou gāue mo te gāue ʼa Selemia. Ohage pe ko ia, ʼe nātou kalagaʼi ʼaki he lototoʼa te folafola faka polofeta ʼa te ʼAtua. Pea ko te logo ʼaia ʼe fua lelei peʼe fua kovi ki te hahaʼi pea mo te ʼu puleʼaga, ʼo mulimuli pe ki tanatou faʼahiga tali kiai. Ohage ko te temi ʼo Selemia, ko ʼihi ʼe nātou tauʼi te ʼAtua ʼi tanatou fakafeagai ki tana kau kaugana, pea mo te ʼu gāue ʼaē neʼe hinoʼi age e te ʼAtua.
ʼE Tauʼi Te Kau Kaugana ʼa Sehova
3. He koʼe neʼe tauʼi te kau kaugana ʼa Sehova?
3 Talu mai te kamata ʼo te 20 sēkulō, neʼe tauʼi te hahaʼi ʼa Sehova. ʼE lahi te ʼu fenua, neʼe faigaʼi ai e te hahaʼi agakovi ke nātou tāʼofi—ei, ke nātou fakalologo—te kalagaʼi ʼo te logo lelei ʼo ʼuhiga mo te Puleʼaga ʼo te ʼAtua. ʼE ʼeke nātou e totatou Fili tāfito, te Tevolo, ʼaē ʼe “hage ko he laione e gugulu, e feʼaluʼaki o kumi he tahi ke ina kai.” (1 Petelo 5:8) ʼI te fakaʼosi ʼo “te temi o te u puleaga” ʼi te taʼu 1914, neʼe fakanofo e te ʼAtua tona ʼAlo ko te Hau foʼou ʼo te kele, ʼo ina fakatotonu fēnei age: “ ʼAlu ʼo pule ʼi te lotolotoiga ʼo tou ʼu fili.” (Luka 21:24; Pesalemo 110:2) Neʼe fakaʼaogaʼi e Kilisito tona mālohi moʼo kapu ia Satana mai te lagi, pea neʼe ina tāʼofi ia ia ke nofo maʼu ʼi te ʼu tafaʼaki ʼo te kele. ʼI tana ʼiloʼi ʼaē kua nounou tona temi, ʼe ʼita kovi te Tevolo ki te kau Kilisitiano fakanofo pea mo tonatou ʼu kaugā gāue. (Apokalipesi 12:9, 17) Neʼe koteā te ʼu fua ʼo te ʼu fakafeagai ʼa nātou ʼaia neʼe nātou tauʼi te ʼAtua?
4. Koteā te ʼu fakamāu ʼaē neʼe fai ki te hahaʼi ʼa Sehova ʼi te lolotoga ʼo te ʼUluaki Tau Faka Malamanei, pea koteā ʼaē neʼe hoko ʼi te taʼu 1919 pea mo te taʼu 1922?
4 Lolotoga te ʼUluaki Tau Faka Malamanei, neʼe hoko te ʼu ʼahiʼahi lahi ki te tui ʼa te kau kaugana fakanofo ʼa te ʼAtua. Neʼe vāʼi nātou pea mo manukiʼi, neʼe kapu nātou e te hahaʼi agamālohi, pea neʼe tā nātou. Ohage ko tona fakakikite e Sesu, neʼe nātou liliu “ko he ʼu meʼa ʼe fehiʼaʼinaʼi e te ʼu puleʼaga katoa.” (Mateo 24:9, MN) ʼI te lolotoga ʼo te ʼu maveuveu ʼo te tau, ko te ʼu fili ʼo te Puleʼaga ʼo te ʼAtua, neʼe nātou fakaʼaogaʼi he fakatuʼutuʼu neʼe kua fakaʼaogaʼi kia Sesu Kilisito. Neʼe nātou fai te ʼu tukugakovi hala ki te hahaʼi ʼa Sehova, ʼo nātou ʼui ʼe nātou agatuʼu ki te puleʼaga, pea neʼe nātou ʼohofiʼi te tafitoʼaga ʼo te kautahi ʼa te ʼAtua ʼi te kele. ʼI Maio ʼo te taʼu 1918, neʼe fai e te puleʼaga he ʼu tonu ke puke ia J. F. Rutherford, te pelesita ʼo te Sosiete Watch Tower, pea mo tona ʼu kaugā gāue e toko fitu. Neʼe fakatūʼa te ʼu tagata ʼaia e toko valu ke nātou pilisoni lolotoga ni ʼu taʼu, pea neʼe ʼave nātou ki te fale pilisoni ʼo Atlanta, ʼi Géorgie, ʼi Amelika. Hili kiai māhina e hiva, pea neʼe faka ʼāteaina nātou. ʼI Maio 1919, neʼe ʼui e te tahi telepinale, neʼe mole faitotonu te fakamāu ʼo te ʼu tagata ʼaia, pea neʼe molehi ai tonatou ʼuluaki fakamāu. Neʼe toe kole ke fai he tahi fakamāu, kae ki muli age, neʼe fakagata e te puleʼaga te fakatuʼutuʼu ʼaia, pea neʼe molehi fuli te ʼu tukugakovi hala ʼaē neʼe fai ki te Tēhina ko Rutherford pea mo tana kau kaugā gāue e toko fitu. Neʼe nātou toe hoko atu leva tanatou ʼu gāue pea ʼaki te ʼu fakatahi ʼaē neʼe fai ʼi Cedar Point, ʼi Ohio, ʼi te taʼu 1919 pea mo te taʼu 1922, neʼe toe mālohi ai te gāue ʼo te faka mafola ʼo te Puleʼaga.
5. Neʼe koteā te ʼaluʼaga ʼo te kau Fakamoʼoni ʼa Sehova ʼi Siamani Nasi?
5 Ko te ʼu puleʼaga aga fefeka ʼaē neʼe tupu ʼi te ʼu taʼu 1930 pea mo Siamani, mo Italia pea mo Saponia, neʼe nātou fakatahi moʼo faʼufaʼu te ʼu mālohi ʼo te Axe. ʼI te kamata ʼo te ʼu taʼu ʼaia, neʼe fakatagaʼi kovi te hahaʼi ʼa te ʼAtua, tāfito la ʼi Siamani Nasi. Neʼe tapuʼi tanatou gāue. Neʼe hue tonatou ʼu ʼapi, pea neʼe puke te hahaʼi. Neʼe ʼave te toko lauʼi afe hahaʼi ki te ʼu lotoʼā fakamamahi he neʼe mole nātou fia līaki tanatou tui. Ko te tauʼi ʼo te ʼAtua pea mo tana hahaʼi, neʼe ko he fakatuʼutuʼu moʼo molehi ʼo te kau Fakamoʼoni ʼa Sehova ʼi te puleʼaga aga fefeka ʼaia.a ʼI Siamani, ʼi te ʼolo ʼa te kau Fakamoʼoni ki te ʼu telepinale he neʼe nātou toe fia maʼu tanatou faʼifaʼitaliha, ko te Minisi ʼo te Faitotonu ʼo te Reich, neʼe ina teuteuʼi te talaga loaloaga moʼo fakamahino ʼe mole tonu ke hoko tanatou fakatuʼutuʼu. Neʼe ʼui fēnei ai: “Ko te ʼu telepinale ʼe mole tonu ke nātou molehi tanatou ʼu tonu ʼuhi pe ko he ʼu agaaga veliveli ʼo te lao; koia logope la te ʼu faigataʼaʼia ʼaia ʼo ʼuhiga mo te lao, kae ʼe tonu ke nātou kumi he ʼu fakatuʼutuʼu pea mo faiga ke nātou fakahoko tonatou ʼu maʼua lahi.” Ko tona faka ʼuhiga ʼe mole fai fakalelei anai te fakamāu. Neʼe haga ʼui e te kau Nasi, ʼe kovi te ʼu gāue ʼa te kau Fakamoʼoni ʼa Sehova, pea ʼe fakafeagai ki te puleʼaga, pea ‘neʼe nātou fakatupu maveuveu ki te laga ʼo te Puleʼaga faka Socialiste.’
6. Koteā te ʼu meʼa ʼaē neʼe fai moʼo fakagata tatatou gāue ʼi te ʼUluaki Tau Faka Malamanei pea mo hili kiai?
6 Lolotoga te Lua Tau Faka Malamanei, neʼe tapuʼi pea mo faka tuʼakoi te ʼu gāue ʼa te hahaʼi ʼa te ʼAtua ʼi Kanata pea mo Ositalalia pea mo te tahi ʼu fenua ʼaē neʼe kau ki te Commonwealth Fakapilitānia—ʼi Afelika, mo Asia, pea mo te ʼu motu ʼo Caraïbes pea mo te Pasifika. ʼI Amelika, ko te ʼu fili ʼaē ʼe maʼu tuʼulaga pea mo te hahaʼi ʼaē neʼe tui ki te ʼu loi, neʼe nātou fakaʼaogaʼi ‘te lao moʼo fai he ʼu fakamamahi.’ (Pesalemo 94:20) Kae neʼe ʼolo te kau Fakamoʼoni ʼa Sehova ki te ʼu telepinale ke nātou maʼu he ʼu puleʼaki ʼo ʼuhiga mo tanatou mole fia tauhi ki te fuka pea mo te tapuʼi e te ʼu kolo tanatou fai faka mafola ʼi te ʼu ʼapi, pea ʼi Amelika neʼe fai he ʼu tonu lelei ʼe nātou lagolago ki te ʼāteaina ʼo te lotu. ʼAki ia Sehova, neʼe mole iku te ʼu faiga ʼa te ʼu fili. ʼI te fakaʼosi ʼo te tau ʼi Eulopa, neʼe fakagata ai te tapuʼi ʼo te gāue. Neʼe faka ʼāteaina te toko lauʼi afe kau Fakamoʼoni ʼaē neʼe pilisoniʼi ʼi te ʼu lotoʼā fakamamahi, kae neʼe mole gata ai tonatou ʼu fihifihia. Mole tuai ʼi te ʼosi ʼo te Lua Tau Faka Malamanei, pea neʼe kamata ai te Tau Momoko. Pea neʼe fakafeagai ai te ʼu puleʼaga ʼo Eulopa ʼo te Potu Esite ki te hahaʼi ʼa Sehova. Neʼe fai e te ʼu puleʼaga he ʼu tonu moʼo tāʼofi peʼe fakagata te gāue fai faka mafola, pea mo te tā ʼo te ʼu tohi faka Tohi-Tapu, pea mo te fai ʼo te ʼu fakatahi. Neʼe pilisoniʼi te tokolahi peʼe ʼave nātou ki te ʼu lotoʼā ke nātou gāue fakamālohi ai.
ʼE Hoko Atu Te Gāue Fai Faka Mafola!
7. ʼI te ʼu taʼu ʼaenī, koteā ʼaē neʼe hoko ʼi Polonia, mo Lusia pea mo te tahi ʼu fenua?
7 ʼAki te temi, neʼe toe tali te fai ʼo te gāue fai faka mafola. ʼI Polonia, logope la neʼe kei pule ai te kau Komunisi, kae neʼe fakagafua ai ke fai he ʼu fakatahi ʼaho tahi ʼi te taʼu 1982. Neʼe fai ai mo te ʼu fakatahi faka malamanei ʼi te taʼu 1985. Pea ʼi te taʼu 1989, neʼe fai mo te ʼu fakatahi faka malamanei lalahi, pea neʼe kau kiai te toko lauʼi afe mai Lusia pea mo Ukraine. ʼI te taʼu ʼaia ʼi Hongrie pea mo Polonia, neʼe fakamoʼoni ai te lao ki te gāue ʼa te kau Fakamoʼoni ʼa Sehova. ʼI te fasiga taʼu fakatōlau ʼo te taʼu 1989, neʼe maumauʼi ai te Kaupā ʼo Berlin. Hili kiai ni ʼu māhina, neʼe fakamoʼoni kia tatou ia Siamani ʼo te Potu Esite, pea mole faʼa fualoa pea neʼe fai te fakatahi faka malamanei ʼi Berlin. ʼI te fakaʼosi ʼo te 20 sēkulō, neʼe tou faigaʼi ke tou felāveʼi mo te ʼu tēhina ʼo Lusia. Neʼe fai te talaga mo te ʼu hahaʼi ʼo te puleʼaga ʼo Moscou, pea ʼi te taʼu 1991, neʼe nātou fakamoʼoni ki te gāue ʼa te kau Fakamoʼoni ʼa Sehova. Talu mai ai, neʼe tuputupu lahi te gāue ʼi Lusia pea mo te ʼu lepupilika ʼaē neʼe kau ki te Union soviétique ʼāfea.
8. ʼI te ʼu taʼu e 45 ʼi te ʼosi ʼo te Lua Tau Faka Malamanei, koteā ʼaē neʼe hoko ki te hahaʼi ʼa Sehova?
8 Neʼe kua malū ifo te ʼu fakataga ʼi ʼihi fenua, kae neʼe ʼāsili kovi ʼi te tahi ʼu fenua. ʼI te ʼu taʼu e 45 ʼi te ʼosi ʼo te lua tau faka malamanei, ʼe lahi te ʼu fenua ʼaē neʼe mole nātou fia fakamoʼoni ki te kau Fakamoʼoni ʼa Sehova. Tahi ʼaē meʼa, neʼe tapuʼi tatou pe ko tatatou ʼu gāue ia fenua e 23 ʼi Afelika, e 9 ʼi Asia, e 8 ʼi Eulopa, e 3 ʼi Amelika Latina, pea mo motu e 4.
9. Koteā ʼaē neʼe hoko ki te kau Fakamoʼoni ʼa Sehova ʼi Malawi?
9 ʼI Malawi, neʼe kamata gaohi koviʼi te kau Fakamoʼoni ʼa Sehova ʼi te taʼu 1967. ʼUhi ko tanatou mole kau ki te ʼu meʼa faka politike, ko totatou ʼu tēhina neʼe mole nātou fia totogi te ʼu kate ʼo te kūtuga faka politike. (Soane 17:16) ʼI te hili ʼo te fono ʼo te Malawi Congress Party ʼi te taʼu 1972, neʼe toe ʼāsili ai te ʼu fakataga. Neʼe kapu te ʼu tēhina mai tonatou ʼu ʼapi pea neʼe mole fia foaki age hanatou gāue. Ko te toko lauʼi afe neʼe nātou feholaki mai tonatou fenua naʼa matehi nātou. Kae neʼe mālo koa te hahaʼi ʼaē neʼe nātou tauʼi te ʼAtua pea mo tana hahaʼi? Kailoa! Neʼe hoko te ʼu fetogi, pea ʼi te taʼu 1999 ʼi Malawi neʼe gāue te toko 43 767 kau fai faka mafola ʼo te Puleʼaga, pea ko te toko 120 000 neʼe nātou kau ai ki te ʼu fakatahi faka tisitilike. Neʼe laga te filiale foʼou ʼi te kolo muʼa.
ʼE Nātou Kumi Te Takuʼaki
10. Ohage ko te meʼa ʼaē neʼe hoko kia Taniela, koteā ʼaē neʼe fai e te hahaʼi fakafeagai ki te hahaʼi ʼa te ʼAtua?
10 Ko te kau ʼaposita, mo te kau takitaki lotu pea mo te tahi ʼu hahaʼi, ʼe nātou fehiʼa ki tatatou logo ʼaē ʼe haʼu mai te Folafola ʼa te ʼAtua. Ko ʼihi ʼo te Keletiate ʼe nātou fakaneke totatou ʼu fili ke nātou fakaʼaogaʼi te lao moʼo tauʼi ʼo tatou. Koteā te ʼu fakatuʼutuʼu ʼaē ʼe nātou fakaʼaogaʼi? Koteā te ʼu meʼa ʼaē neʼe fai e te hahaʼi ʼaē neʼe nātou fonofono moʼo fakafeagai ki te polofeta ko Taniela? Ia Taniela 6:4, 5, ʼe tou lau fēnei: “Ko te kau tagata maʼu tuʼulaga pea mo te kau kovana neʼe nātou faigaʼi tuʼumaʼu ke nātou maʼu he takuʼaki moʼo fakafeagai kia Taniela ʼo ʼuhiga mo te puleʼaga; kae neʼe mole nātou lava maʼu he takuʼaki peʼe ko he aga heʼe faitotonu, koteʼuhi neʼe agatonu ia pea neʼe mole he hala pe ko he kākā ia ia. Koia neʼe ʼui fēnei e te ʼu tagata ʼaia: ‘ ʼE mole tou maʼu anai he takuʼaki ʼi te Taniela ʼaenī, gata pe mo kapau ʼe tonu ke tou maʼu ʼi te lao ʼo tona ʼAtua he fakafeagai kia te ia.’ ” ʼE toe feiā pe ia ʼaho nei, ko te hahaʼi fakafeagai ʼe nātou kumi he takuʼaki. ʼE nātou ʼui ki te hahaʼi ke nātou tokaga ki te ʼu “magaʼi lotu fakamataku,” pea ʼe nātou ʼui ʼe feiā mo te kau Fakamoʼoni ʼa Sehova. ʼAki te loi pea mo te ʼu palalau kākā, ʼe nātou fai he ʼu tukugakovi ʼo ʼuhiga mo tatatou tauhi pea mo tatatou mulimuli ki te ʼu pelesepeto fakaʼatua.
11. Koteā te ʼu meʼa ʼaē neʼe lau e te kau fakafeagai ki te kau Fakamoʼoni ʼa Sehova?
11 ʼI ʼihi fenua, ko te hahaʼi lotu pea mo te hahaʼi fai politike, ʼe mole nātou fia fakamoʼoni ʼe tou maʼuliʼi “te lotu maʼa mo heʼe mele ia mua o te Atua.” (Sakopo 1:27) Logope la ʼe fai tatatou gāue ia fenua e 234, kae ʼe ʼui e te hahaʼi fakafeagai, ʼe mole “ ʼiloʼi lelei totatou lotu.” ʼI muʼa ʼo te fakatahi faka malamanei ʼi te taʼu 1998, neʼe tohi e te sulunale ʼo Ateni ko te kau takitaki lotu Keleka Orthodoxe, neʼe nātou ʼui ko “[te kau Fakamoʼoni ʼa Sehova] ʼe mole ko he ‘lotu ʼe ʼiloʼi lelei e te hahaʼi,’ ” logola ʼe fakafeagai kiai te tonu ʼaē neʼe fai e te Telepinale ʼo te Eulopa ʼo ʼUhiga Mo Te Faʼifaʼitaliha ʼa Te Tagata. Hili kiai ni ʼu ʼaho, neʼe maʼu ʼi te tahi sulunale te ʼu palalau ʼaenī: “[Ko te kau Fakamoʼoni ʼa Sehova] ʼe mole ko ‘he kokelekasio faka Kilisitiano,’ koteʼuhi ʼe mole nātou ʼalutahi mo te tui faka Kilisitiano ʼo ʼuhiga mo Sesu Kilisito.” Meʼa faikehe foki, heʼe mole he tahi lotu ʼi te lotu ʼa te kau Fakamoʼoni ʼa Sehova ʼe nātou faka maʼuhigaʼi ʼaupito ai te maʼua ʼaē ke tou faʼifaʼitakiʼi ia Sesu.
12. Koteā ʼaē ʼe tonu ke tou fai ʼi tatatou tau fakalaumālie?
12 ʼE tou faiga ke tou puipui te logo lelei ʼaki te lagolago ʼa te lao. (Filipe 1:7) Tahi ʼaē meʼa, ʼe mole tou fetogi anai peʼe tou līaki tatatou tapiki maʼu ki te ʼu lekula faitotonu ʼa te ʼAtua. (Tito 2:10, 12) Ohage ko Selemia, ʼe ‘tou haʼi totatou ʼu kogaloto pea mo tou fakahā te meʼa fuli ʼaē ʼe fakatotonu mai e te ʼAtua,’ kae ʼe mole tou tuku anai te kau fakafeagai ke nātou fakamatakuʼi tatou. (Selemia 1:17, 18) ʼE mahino papau ia, ko te Folafola Taputapu ʼa Sehova ʼe ina fakahā lelei mai te ala ʼaē ʼe tonu ke tou haʼele ai. ʼE mole he temi ʼe tou fia falala anai ki te “nima fakakakano,” peʼe tou kumi anai “te nonoʼaga ʼi te malumalu ʼo Esipito,” ʼaē ko te mālama ʼaenī. (2 Fakamatala 32:8; Isaia 30:3; 31:1-3) ʼI tatatou tau fakalaumālie, ʼe tonu ke tou falala kia Sehova ʼaki totatou loto katoa, mo tou tuku ke ina takitaki tatou pea ke ʼaua naʼa tou falala ki totatou ʼatamai. (Tāʼaga Lea 3:5-7) Kapau ʼe mole lagolago te ʼAtua kia tatou pea mo ina puipui tatou, pea ʼe “mole iku” anai tatatou gāue.—Pesalemo 127:1.
ʼE Nātou Agatonu ʼi Te ʼu Fakataga
13. He koʼe ʼe feala ke tou ʼui neʼe mole iku te fakafeagai ʼa Satana kia Sesu?
13 Ko te faʼifaʼitaki tāfito ʼo te agatonu tuʼumaʼu kia Sehova, ʼe ko Sesu, ʼaē neʼe tukugakoviʼi hala e te hahaʼi, he neʼe nātou ʼui neʼe ina uga te hahaʼi ke nātou agatuʼu ki te puleʼaga pea neʼe fakatupu maveuveu. ʼI tana ʼosi vakaʼi te ʼu tukugakovi ʼo ʼuhiga mo Sesu, neʼe fia faka ʼāteaina ia ia e Pilato. Kae ko te hahaʼi ʼaē neʼe fakaneke e te kau takitaki lotu, neʼe nātou kalaga ke haʼi ia Sesu ʼi te pou, logope la neʼe mole ina fai he meʼa kovi. Pea neʼe nātou kole ke faka ʼāteaina ia Palapasi—te tagata neʼe pilisoniʼi he neʼe ina uga te hahaʼi ke nātou agatuʼu pea neʼe ko he tagata fai fakapō! Neʼe toe faigaʼi e Pilato ke fetogi te manatu ʼa te hahaʼi fakafeagai vale, kae ki muli age neʼe ina fai te meʼa ʼaē neʼe nātou kole age. (Luka 23:2, 5, 14, 18-25) Tatau aipe pe neʼe mate Sesu ʼi te pou, kae neʼe mole iku te ʼu fakafeagai ʼa Satana ki te ʼAlo ʼo te ʼAtua, he neʼe fakatuʼuake e Sehova ia Sesu pea neʼe ina hikihiki ia ia ki Tona toʼomataʼu. Pea ʼi te ʼaho ʼo te Penikosite ʼo te taʼu 33 ʼo totatou temi, ʼaki ia Sesu ʼaē neʼe faka kolōliaʼi, neʼe tufa te laumālie maʼoniʼoni pea neʼe fakatuʼu ai te kokelekasio faka Kilisitiano—“ko he fakatupu foʼou.”—2 Kolonito 5:17, MN; Gaue 2:1-4.
14. Koteā ʼaē neʼe hoko ʼi te fakafeagai ʼa te kau takitaki lotu ki te kau tisipulo ʼa Sesu?
14 Mole fualoa kiai, pea neʼe tuʼutāmakiʼia te kau ʼapositolo ʼuhi ko te kau takitaki lotu, kae neʼe mole fakagata e te kau tisipulo ʼa Kilisito tanatou palalau ʼo ʼuhiga mo te ʼu meʼa ʼaē neʼe nātou sio kiai pea mo logo kiai. Neʼe faikole fēnei te kau tisipulo ʼa Sesu: “Aliki, fofogaʼage ki anatou fakamatakutaku pea ke foaki mai ki au kaugana he matamua ki te tala katoa o tau folafola.” (Gaue 4:29) Neʼe tali e Sehova ki tanatou faikole ʼo ina foaki age tona laumālie maʼoniʼoni, pea mo fakaloto mālohiʼi nātou ke nātou hoko atu tanatou fai faka mafola ʼaki te lototoʼa. Mole tuai pea neʼe toe fakatotonu ki te kau ʼapositolo ke nātou fakagata te faka mafola, kae neʼe tali fēnei age e Petelo pea mo te tahi kau ʼapositolo: “E maua ke [mātou] fakalogo ki te Atua i te fakalogo ki te tagata.” (Gaue 5:29) Logola tonatou tā pea mo tonatou puke, neʼe mole feala ke tāʼofi tanatou fakatuputupu te faka mafola ʼo te Puleʼaga.
15. Neʼe ko ai ia Kamaliele, pea koteā te tokoni ʼaē neʼe ina fai ki te kau takitaki lotu ʼaē neʼe nātou fakafeagai ki te ʼu tisipulo ʼa Sesu?
15 Koteā ʼaē neʼe fai e te kau takitaki lotu? “Nee natou vela itaʼita pea nee natou amanaki fakapogi [te kau ʼapositolo].” Kae ʼi te fono ʼaia neʼe kau ai ia Kamaliele, te Faliseo pea mo tagata faiako ʼo te Lao, pea neʼe fakaʼapaʼapaʼi e te hahaʼi fuli. Neʼe ina fakahū ki tuʼa te kau ʼapositolo ʼi te telepinale ʼo te Sanetualio ʼi te kiʼi temi nounou, pea neʼe ina fai te tokoni ʼaenī ki te kau takitaki lotu fakafeagai: “U tagata o Iselaele, koutou tokaga kia koutou, o uhiga mo mea e koutou amanaki fai ki te u tagata aeni. . . . Pea e au tala atu nei kia koutou, koutou fakatafatafa mai te u tagata aeni pea koutou tukuʼage natou, koteuhi kapau e ko he tonu pe ko he gaue mai te tagata, e alunoa anai. Kae, kapau e mai te Atua, e mole feala anai tautou maumaui natou, pea e koutou hoko anai ko he u tagata e tau fakafehagai ki te Atua.”—Gaue 5:33-39.
ʼE Iku Noa Anai Te ʼu Mahafu Tau ʼAē ʼe Fakafeagai Mai
16. ʼAki takotou faʼahiga palalau, e feafeaʼi hakotou fakamahino te fakapapau ʼaē neʼe fai e Sehova ki tana hahaʼi?
16 Neʼe lelei te tokoni ʼaē neʼe fai e Kamaliele, pea ʼe tou leleiʼia mokā lagolago mai he tahi kia tatou. Tahi ʼaē meʼa, ʼe tou fakamoʼoni ko te ʼāteaina ʼo te lotu neʼe lagolago kiai te ʼu tonu ʼaē neʼe fai e te ʼu tuʼi fakamāu faitotonu. ʼE mahino ia, ko te kau takitaki lotu ʼo te Keletiate pea mo Papiloni Lahi, te kautahi faka malamanei ʼo te lotu hala, ʼe mole nātou leleiʼia tatatou mulimuli ki te Folafola ʼa te ʼAtua. (Apokalipesi 18:1-3) Logope la ko nātou ʼaia pea mo te hahaʼi ʼaē ʼe nātou fakalogo kia nātou, ʼe nātou tauʼi tatou, kae ʼe tou ʼiloʼi te fakapapau ʼaenī: “ ‘Ko te mahafu fuli ʼe faʼu anai moʼo fakafeagai kia te koe ʼe iku noa anai, pea ko te lea fuli ʼe fakafeagai anai kia te koe ʼi he fakamāu, ʼe ke tauteaʼi anai. Koʼena te tofiʼa ʼa te kau kaugana ʼa Sehova, pea ko tanatou faitotonu ʼe haʼu mai ia te ʼau,’ ʼe ko te folafola ʼaia ʼa Sehova.”—Isaia 54:17.
17. Logope la ʼe tauʼi tatou e totatou ʼu fili, kae he koʼe ʼe tou lototoʼa?
17 ʼE tauʼi tatou e totatou ʼu fili logope la neʼe mole tou fai he meʼa kovi, kae ʼe mole tou lotovaivai ai. (Pesalemo 109:1-3) ʼE mole he temi ʼe tou tuku anai ia nātou ʼaē ʼe fehiʼa ki tatatou logo faka Tohi-Tapu ke nātou fakamatakuʼi tatou ke tou līaki tatatou tui. Logope la ʼe tou ʼiloʼi ʼe ʼāsili faigataʼa anai tatatou tau fakalaumālie, kae ʼe tou ʼiloʼi tona ikuʼaga. Ohage ko Selemia, ʼe hoko anai kia tatou te lea faka polofeta ʼaenī: “ ʼE mahino papau ia ʼe nātou tauʼi anai koe, kae ʼe mole nātou mālo anai ia te koe, koteʼuhi ‘ ʼe ʼau nofo mo koe moʼou hāofaki,’ ko te ʼui ʼaia ʼa Sehova.” (Selemia 1:19) Ei, ʼe tou ʼiloʼi papau ʼe mole mālo anai te hahaʼi ʼaē ʼe nātou tauʼi te ʼAtua!
[Nota ʼi te lalo pasina]
a Koutou vakaʼi te alatike “Neʼe Nātou Agatonu Pea Mo Lototoʼa ʼi Te Fakataga Nasi,” ʼi te pasina 24 ki te 28.
ʼE Feafeaʼi Anai Takotou Tali?
• He koʼe neʼe tauʼi te kau kaugana ʼa Sehova?
• Neʼe tauʼi feafeaʼi e te ʼu fili te hahaʼi ʼa Sehova?
• He koʼe ʼe tou lava ʼiloʼi papau ʼe mole mālo anai te hahaʼi ʼaē ʼe nātou tauʼi te ʼAtua?
[Paki ʼo te pasina 17]
Neʼe fakapapauʼi age kia Selemia ʼe nofo anai ia Sehova mo ia
[Paki ʼo te pasina 18]
Neʼe nātou hāo ʼi te ʼu lotoʼā fakamamahi
[Paki ʼo te pasina 18]
ʼE gaohi koviʼi te kau Fakamoʼoni ʼa Sehova e te hahaʼi agamālohi
[Paki ʼo te pasina 18]
Ko J. F. Rutherford pea mo tona ʼu kaugā gāue
[Paki ʼo te pasina 21]
ʼO ʼuhiga mo Sesu, neʼe mole mālo te hahaʼi ʼaē neʼe nātou tauʼi te ʼAtua