Ko Te Kau Fai Faka Mafola ʼo Te Puleʼaga
“ ʼE Lahi Te ʼu Meʼa ʼe Koutou ʼIloʼi ʼi Te Tohi-Tapu”
ʼI TONA taʼu 12 neʼe fai palalau ia Sesu ʼaki he lototoʼa mo te ʼu takitaki lotu ʼo Selusalemi, “pea nee punamauli ia natou fuape nee fagono kia te ia i tona poto mo tana u tali.” (Luka 2:47) ʼE toe feiā ʼi te temi nei, ko te tokolahi ʼo te kau tūpulaga ʼaē ʼe nātou tauhi kia Sehova, ʼe nātou lototoʼa ʼo palalau ʼo ʼuhiga mo te ʼAtua pea mo te Tohi-Tapu ki ʼonatou ʼu faiako pe ki ʼonatou ʼu kaumeʼa, pea ʼi te agamāhani ʼe ʼi ai tona ʼu fua lelei.
Ko Tiffany, ʼe taʼu 14, neʼe kau ki te ako neʼe talanoa ai ki te ʼu vāhaʼa taʼu e 70 ʼo te lea faka polofeta ʼo te Tohi-Tapu, ʼaē ʼe tuʼu ia Taniela 9:24-27. Neʼe fakahā e te tagata faiako te ʼu meʼa ʼaē neʼe hoko moʼoni ʼo ʼuhiga mo te ʼu vaega pea neʼe mole palalau fualoa ki te puani ʼaia.
ʼI te kamata, neʼe mole fia hiki e Tiffany tona nima. Pea ʼe ina ʼui fēnei “kae neʼe mole ʼau faʼa leleiʼia te mole fakamahino katoa ʼo te ʼu vaega. Kae fakapunamaʼuli pe, neʼe ʼau hiki toku nima.” Neʼe ōfo ai te tagata faiako ʼi te fia talanoa ʼa he tahi ki te faʼahi ʼaia, mai tona ʼaluʼaga ʼaē neʼe faigataʼa ki te tokolahi ʼo te kau ako tanatou mahino kiai.
Neʼe tuku age ke ina fakamahino te lea faka polofeta ʼaia, pea neʼe tuʼu atu aipe ia Tiffany ʼo palalau. Pea ʼi tana ʼosi fakamahino, neʼe mole kei ai he logoaʼa ʼi te kalasi. Neʼe ʼai te kiʼi tuʼania ʼa Tiffany. Pea neʼe pasipasi mālohi te kalasi.
Pea neʼe ʼui liuliuga e te tagata faiako, “ ʼe lelei ʼosi, Tiffany, ʼe lelei ʼosi.” Neʼe ina ʼiloʼi ʼe ʼi ai te tahi ʼu fakamahino ki te ʼu vaega ʼaia, pea ko Tiffany ʼaē neʼe ina ʼuluaki fakamahino lelei age te ʼu faʼahi ʼaia. Pea ʼi te hili ʼo te ako, neʼe fakalavelave age e te tagata faiako pe koʼe ʼe lahi te ʼu meʼa ʼaē ʼe ina ʼiloʼi ʼi te Tohi-Tapu.
Pea ina tali age “Heʼe ko ʼau ko te Fakamoʼoni a Sehova. ʼI muʼa ʼo taku mahino kiai, neʼe fakamahino tuʼa lahi mai e taku ʼu mātua te lea faka polofeta ʼaia kia ʼau.”
Ko tona ʼu kaumeʼa ako neʼe nātou punamaʼuli ki tana mālama lelei ki te Tohi-Tapu. Neʼe ʼui fēnei e te tahi ia nātou kia Tiffany: “ ʼI te temi nei, kua ʼau ʼiloʼi pe koʼe ʼe faka mafola te kau Fakamoʼoni ʼa Sehova ʼi te ʼu ʼapi, heʼe lahi te ʼu meʼa ʼe koutou ʼiloʼi ʼi te Tohi-Tapu.” Pea ko ihi neʼe nātou fakapapau age ki ai ʼe mole nātou toe valokiʼi anai te ʼu meʼa ʼaē ʼe tui kiai.
Neʼe fakahā age e Tiffany te meʼa ʼaia ki tana ʼu mātuʼa, pea nā ʼui age ke ina foaki ki tana tagata faiako te kiʼi tohi Te ʼAtamai Mālama ʼAē ʼe Ina Taki Ki Te Maʼuli Heʼegata. Neʼe ina fai te faʼahi ʼaia pea neʼe ina fakahā ki tana tagata faiako te ʼu kapite ʼaē ʼe fakamahino ai te lea faka polofeta ʼa Taniela, pea neʼe ina tali lelei te tohi ʼo ina fakamālo age ki ai ʼo ʼuhiga mo te kiʼi tohi ʼaia.
Koia, kapau ʼe palalau te ʼu tūpulaga Kilisitiano ʼaki he lototoʼa ki te ʼu meʼa ʼaē neʼe akoʼi age e tanatou ʼu mātuʼa ʼo ʼuhiga mo te ʼAtua pea mo te Tohi-Tapu, ʼe mahino ia ko he fakavikiviki pea mo he fakaʼapaʼapa kia Sehova, pea ʼe ko he ʼu tapuakina ʼaia kia nātou.—Mateo 21:15, 16.