ʼE Lava Puleʼi Feafeaʼi Totatou Loto e Te Tokalelei ʼo Kilisito?

“Ke pule te tokalelei ʼo Kilisito ʼi ʼokotou loto, he neʼe pāuiʼi koutou kiai ʼi te sino pe e tahi.”—Kolose 3:15, MN.

1, 2. ʼE puleʼi feafeaʼi e “te tokalelei ʼo Kilisito” te loto ʼo he Kilisitiano?

KO TE kupu pule ʼe mole faʼa leleiʼia e te tokolahi, koteʼuhi ʼe pipiki ki he fakakinauʼi ʼo he tahi, peʼe ki he gaohi meʼa fakakākā. Koia lagi ʼe mole faʼa leleiʼia anai e ʼihi, te tokoni ʼa Paulo ki tona ʼu kaugā gāue ʼi Kolose, “Ke pule te tokalelei ʼo Kilisito ʼi ʼokotou loto.” (Kolose 3:15, MN ) ʼE mole feala koa la ke tou loto faʼifaʼitaliha? He koʼe ʼe puleʼi anai ʼotatou loto e he meʼa peʼe ko he tahi?

² Neʼe mole faka ʼuhiga te palalau ʼa Paulo ki te kau Kolose ke nātou līaki tonatou loto faʼifaʼitaliha. Ko te kupu faka Keleka ʼaē neʼe fakaliliu ʼaki te kupu “pule” ia Kolose 3:15, ʼe pipiki ki te kupu alapiti, ko he tahi ʼe ina foaki te fakapale ki te hahaʼi ʼaē neʼe kau ʼi he faigaoʼi. Neʼe mulimuli ʼāteaina te kau faigaoʼi ki te ʼu lekula, kae neʼe ko te alapiti ʼaē neʼe ina tala pe ko ai ʼaē neʼe mulimuli lelei ki te ʼu lekula pea mo mālo ʼi te faigaoʼi ʼaia. ʼO toe feiā pe mo tatou, ʼe lahi te ʼu tonu ʼe tou filifili faʼitaliha, kae ka tou fai te faʼahi ʼaia pea ʼe tonu tuʼumaʼu ko te tokalelei ʼo Kilisito ʼaē ʼe ina “alapitiʼi” tatou—ohage ko te ʼui ʼa te tagata fakaliliu ko Edgar J. Goodspeed, “ko te pule takitaki” ʼi totatou ʼu loto.

3. Koteā “te tokalelei ʼo Kilisito”?

³ Koteā “te tokalelei ʼo Kilisito”? Ko te fīmālie ʼo te loto, ʼaē ʼe tou maʼu mokā tou liliu ko te ʼu tisipulo ʼa Sesu, pea mo tou ʼiloʼi ʼe ʼofainaʼi tatou pea mo tali leleiʼi tatou e Sehova ʼAtua pea mo tona ʼAlo. ʼI te ʼamanaki mavae ʼa Sesu ʼi tana kau tisipulo, neʼe ina ʼui fēnei age kia nātou: “E au tuku atu te Tokalelei kia koutou. . . . Aua naʼa hoha outou loto pe koutou mataku.” (Soane 14:27) Kua teitei taʼu 2 000, kua maʼu te tokalelei ʼaia e te kau fakanofo agatonu ʼaē ʼe nātou kau ki te sino ʼo Kilisito, pea ia ʼaho nei ko tonatou ʼu kaugā gāue, te “tahi ʼu ōvi,” ʼe kau mo nātou ki te sino ʼaia. (Soane 10:16, MN ) Ko te tokalelei ʼaia ʼe tonu ke ina puleʼi mālohi ʼotatou loto, heʼe ka tou tau mo he ʼu fihifihia faigataʼa, pea ʼe tokoni mai anai ke tou tekeʼi te mataku peʼe ko te hoha lahi. Tou vakaʼi peʼe moʼoni feafeaʼi te faʼahi ʼaia mokā tou tau mo he aga heʼe faitotonu, mo he loto hoha pea mokā tou manatu ʼe mole hotatou ʼaoga.

Mokā Tou Tau Mo He Aga Heʼe Faitotonu

4. (a) Neʼe koteā te ʼu aga heʼe faitotonu neʼe fai kia Sesu? (b) Neʼe tali feafeaʼi e te kau Kilisitiano te ʼu aga heʼe faitotonu ʼaē neʼe fai age kia nātou?

⁴ Neʼe fakatokagaʼi fēnei e Salomone: “Ko te tagata ʼe ina puleʼi te tagata ki tona malaʼia.” (Tagata Tānaki 8:9) Neʼe ʼiloʼi e Sesu te moʼoni ʼo te ʼu palalau ʼaia. ʼI tana kei maʼuli ʼi te lagi, neʼe sio ifo Sesu ki te ʼu aga heʼe faitotonu lahi ʼaē neʼe hoko ʼi te kele. Logola tona haohaoa kae ʼi tana maʼuli ʼi te kele, neʼe felāveʼi mo te ʼu aga heʼe faitotonu lahi, he neʼe tukugakoviʼi neʼe leakovi ki te ʼAtua, pea neʼe matehi ai ohage ko he tagata fai fakapō. (Mateo 26:63-66; Maleko 15:27) Ia ʼaho nei, ʼe kei mālohi pe te heʼe faitotonu, pea neʼe mamahi ʼaupito te kau Kilisitiano moʼoni he neʼe nātou liliu “ko he ʼu meʼa ʼe fehiʼaʼinaʼi e te ʼu puleʼaga katoa.” (Mateo 24:9, MN ) Kae logola te ʼu meʼa fakamataku ʼaia ʼaē neʼe hoko kia nātou, ko te tokalelei ʼo Kilisito neʼe tokoni kia nātou ke nātou nonofo agatonu ʼi te ʼu lotoʼā fakamamahi Nasi pea mo te ʼu lotoʼā fakamamahi Lusia, pea mo tonatou gaohi koviʼi e te hahaʼi agamālohi, mo te ʼu tukugakovi hala, pea mo te ʼu fasituʼu. Neʼe nātou faʼifaʼitakiʼi ia Sesu, ʼaē ʼe tohi fēnei ʼo ʼuhiga mo ia: “Iaʼia nee ina tali te u leakovi, pea nee mole leakovi ia, i tana tali mamahi nee mole ita ia, kae nee ina tuku iaʼia ki te Tuʼi-fakamau faitotonu.”—1 Petelo 2:23.

5. Ka tou logo ki he aga heʼe faitotonu neʼe fai ʼi te kokelekasio ka mole tou mata tonuʼia, koteā te meʼa ʼe tonu ke tou ʼuluaki fai?

⁵ ʼI te kokelekasio ʼe feala ke tou manatu neʼe mole lelei te aga ʼaē neʼe fai ki he tahi. ʼI te taʼi ʼaluʼaga ʼaia, ʼe lagi tou maʼu te manatu ʼa Paulo, ʼaē neʼe ina ʼui fēnei: “Ko ai ʼaē ʼe tūkia ka mole ʼau ʼita ai?” (2 Kolonito 11:29, MN ) Koteā te meʼa ʼe tou lava fai? ʼE tonu ke tou fai te fehuʼi ʼaenī, ‘ ʼE ko he aga heʼe faitotonu moʼoni koa?’ ʼI te agamāhani ʼe mole tou ʼiloʼi te ʼu meʼa fuli ʼaē neʼe hoko. ʼE lagi tou tali koviʼi te tonu ʼaia he neʼe tou fakalogo ki te ʼu palalau ʼa he tahi ʼe ina ʼui ʼe ina ʼiloʼi te ʼu meʼa ʼaē neʼe hoko. Kae ʼe ʼui fakalelei mai e te Tohi-Tapu: “Ko ia ʼaē ʼe mole heʼeki fakapotopoto ʼe tui ki te ʼu palalau fuli.” (Tāʼaga Lea 14:15) Koia ʼe tonu ai ke tou nonofo tokaga.

6. ʼE tou lava tali feafeaʼi te ʼu aga heʼe faitotonu ʼaē ʼe hoko ʼi te kokelekasio?

⁶ Kae kapau la ʼe ko tatou ʼaē ʼe hoko ki ai he aga heʼe faitotonu. Koteā anai ka fai e he tahi ʼe ina maʼu te tokalelei ʼo Kilisito ʼi tona loto? ʼE lagi tou fia palalauʼi anai te faʼahi ʼaia mo ia ʼaē neʼe ina fai mai te agakovi. ʼAua naʼa tou fakamatala ki he tahi ʼe lagolago mai anai kia tatou, kae tou tuku te fihifihia ʼaia kia Sehova ʼi te faikole pea mo falala kia te ia ke ina fakatokatoka te fihifihia ʼaia. (Pesalemo 9:10; Tāʼaga Lea 3:5) Koia kapau ʼe tou fai te faʼahi ʼaia, pea ʼe tou fakatokatoka anai te fihifihia ʼi totatou loto pea “mo nofo fakalogologo.” (Pesalemo 4:4) ʼI te agamāhani, ʼe tou mulimuli anai ki te tokoni ʼaenī ʼa Paulo: “Koutou fe’katakiʼaki mo fe’fakamolemoleʼaki, kapau e mau e he tahi hona mamahi ki he tahiʼage; io, o hage ko te Aliki nee fakamolemole kia koutou, pea mo koutou, koutou fai feia.”—Kolose 3:13.

7. Koteā ʼaē ʼe tonu ke tou manatuʼi tuʼumaʼu ʼo ʼuhiga mo tatatou ʼu felogoi mo totatou ʼu tēhina?

⁷ Tatau aipe pe koteā ʼaē ka tou fai, kae ʼe tonu ke tou manatuʼi kapau ʼe mole tou lava lolomi te meʼa ʼaē ʼe hoko, ʼe tou lava lolomi tatatou fakakaukau. Kapau ʼe mole fakapotopoto takita tali ki he aga heʼe faitotonu, pea ʼe feala ke fua kovi te aga heʼe faitotonu ʼaia ki tatatou tokalelei. (Tāʼaga Lea 18:14) ʼE feala pe ke tou tūkia pea mo tou fakamamaʼo ʼi te kokelekasio ʼo aʼu ki te temi ʼaē kua tou ʼiloʼi ai kua fakatokatoka te fihifihia ʼaia. Neʼe ʼui e te tagata fai pesalemo “ ʼe mole he maka fakatupu tūkia” kia nātou ʼaē ʼe nātou manako ki te ʼu lao ʼa Sehova. (Pesalemo 119:165) ʼI tona fakahagatonu, ʼe tou tau fuli ʼi ʼihi temi mo te heʼe faitotonu. ʼAua naʼa koutou tuku te ʼu tokakovi ʼaia ke nātou tāʼofi takotou tauhi ʼaē kia Sehova. Kae koutou tuku tokotou loto ke puleʼi e te tokalelei ʼo Kilisito.

Mokā Lahi Tatatou Tuʼania

8. Koteā te ʼu meʼa ʼaē ʼe tupu ai te loto tuʼania, pea koteā ʼaē ʼe lava hoko ʼuhi ko te loto tuʼania?

⁸ ʼE hoko moʼoni te tuʼania ʼi te ʼu “aho fakamuli” ʼaenī. (2 Timoteo 3:1) ʼE moʼoni neʼe ʼui fēnei e Sesu: “Aua tautou hoha ki outou mauli, pe kotea ka koutou kai, pe ki outou sino, pe kotea ka koutou teu.” (Luka 12:22) Kae ko te tuʼania ʼe mole hoko ʼuhi pe ko te ʼu koloā fakamālama. Neʼe “lotomamahi ʼaupito” ia Lote ʼuhi ko te ʼu aga heʼeʼaoga ʼaē neʼe fai ʼi Sotoma. (2 Petelo 2:7, MN ) Neʼe “tuʼania [ia Paulo] ʼo ʼuhiga mo te ʼu kokelekasio fuli.” (2 Kolonito 11:28, MN ) ʼI te lotomamahi ʼaupito ʼo Sesu ʼi te po ʼi muʼa ʼo tona mate, “neʼe liliu tona kakava ohage ko he ʼu toʼi toto ʼe hali ki te kele.” (Luka 22:44, MN ) ʼE ʼiloga mai, ko te ʼu tuʼania fuli ʼe mole ko he fakaʼiloga ʼaia ʼo he tui ʼe vaivai. Tatau aipe pe koteā te ʼu tupuʼaga ʼo tatatou tuʼania, kae kapau ʼe mālohi pea mo fualoa, pea ʼe lava puli ai totatou tokalelei. ʼI te lahi fau ʼo te loto tuʼania ʼa ʼihi, neʼe mole kei nātou lava fakahoko ai tonatou ʼu maʼua ʼaē kia Sehova. ʼE ʼui fēnei e te Tohi-Tapu: “Ko te tuʼania ʼi te loto ʼo he tagata, ʼe ina fakamamahiʼi tona loto.” (Tāʼaga Lea 12:25) Koia koteā te meʼa ʼe tou lava fai mo kapau ʼe lahi fau totatou loto tuʼania?

9. Koteā te ʼu faʼahiga meʼa ʼe tou lava fai moʼo fakamaʼamaʼa te loto tuʼania, kae he koʼe ʼe mole lava pulihi te ʼu tupuʼaga ʼo te tuʼania?

⁹ ʼI ʼihi ʼaluʼaga, ʼe tou lava fai he ʼu fakatuʼutuʼu ʼaoga. Kapau ʼe tou loto tuʼania heʼe tou mahaki, ʼe lelei anai ke tou tokaga ki te faʼahi ʼaia, logola ʼe ko he faʼahi ʼe fakalogo kia tatou takitokotahi.a (Mateo 9:12) Kapau ʼe lahi fau tatatou ʼu gāue, pea ʼe tou lava tuku he tahi ʼu gāue ke fai e niʼihi. (Ekesote 18:13-23) Kae ʼe feafeaʼi kia nātou—ohage ko te ʼu mātuʼa—ʼaē ʼe lahi tonatou ʼu maʼua kae mole nātou lava tuku ke fakahoko e niʼihi? Peʼe ko he Kilisitiano ʼe mole kau tona hoa ʼi te moʼoni? Peʼe ki he famili ʼe tau mo he fihifihia faigataʼa faka ekonomika peʼe maʼuli ʼi he koga meʼa ʼe hoko ai te tau? ʼE mahino ia ʼe mole tou lava pulihi ʼi te tuʼu ʼaenī, te ʼu tupuʼaga fuli ʼo totatou ʼu tuʼania. Kae ʼe tou lava taupau te tokalelei ʼo Kilisito ʼi totatou loto. ʼO feafeaʼi?

10. Koteā te ʼu fakatuʼutuʼu e lua ʼaē ʼe lava fai e he Kilisitiano moʼo fakamaʼamaʼa tona loto tuʼania?

¹⁰ Moʼo taupau te tokalelei ʼaia, ʼe lelei ke tou kumi he fakaloto fīmālie ki te Folafola ʼa te ʼAtua. Neʼe tohi fēnei e te Hau ko Tavite: “ ʼI te hoha lahi ʼo toku loto, neʼe fakapelepeleʼi toku nefesi e tau ʼu fakaloto fīmālie.” (Pesalemo 94:19) ʼE tou lava maʼu te ʼu “fakaloto fīmālie” ʼa Sehova ʼi te Tohi-Tapu. ʼE tou lava taupau anai te tokalelei ʼo Kilisito ʼi totatou loto mo kapau ʼe tou vakaʼi tuʼumaʼu te Tohi ʼa te ʼAtua. ʼE ʼui fēnei e te Tohi-Tapu: “Tuku tau kavega kia Sehova totonu, pea ko ia totonu ʼe lagolago anai kia te koe. ʼE mole ina fakagafua anai ke tūkia ia ia ʼaē ʼe faitotonu.” (Pesalemo 55:22) ʼO mulimuli pe ki te manatu ʼaia, neʼe tohi fēnei e Paulo: “Aua naa koutou tuania i he mea, kae i te meafuape aki te faikole mo te lauga fakatahi mo te u fakafetai, koutou fakaha ki te Atua autou u kole. Pea ko te tokalelei o te Atua aia e fakalaka i te atamai fuape, e ina malui anai outou loto mo autou fakakaukau ia Kilisito Sesu.” (Filipe 4:6, 7) Ko tatatou faikole fakamalotoloto tuʼumaʼu ʼe tokoni mai anai ke tou taupau tatatou tokalelei.

11. (a) Koteā te faʼifaʼitaki lelei ʼaē neʼe tuku mai e Sesu ʼo ʼuhiga mo te faikole? (b) ʼE tonu ke tou faka ʼuhiga feafeaʼi te faikole?

¹¹ Ko Sesu neʼe ko te faʼifaʼitakiʼaga lelei ki te faʼahi ʼaia. ʼI te tahi ʼaluʼaga, neʼe faikole fakamalotoloto ai ki tana Tāmai ʼaē ʼi selo lolotoga he temi loaloaga. (Mateo 14:23; Luka 6:12) Neʼe tokoni te faikole kia te ia ke ina kātakiʼi te ʼu ʼahiʼahiʼi fakamataku ʼaē ka hoko kia ia. ʼI te po ʼi muʼa ʼo tana mate, neʼe hoha ʼaupito. Koteā ʼaē neʼe ina fai? Neʼe “toe ʼāsili age te fakamalotoloto ʼo tana faikole.” (Luka 22:44, MN ) Ei ko te ʼAlo haohaoa ʼo te ʼAtua, neʼe faikole tuʼumaʼu. Ko tona faka ʼuhiga, ʼe tonu ke faikole tuʼumaʼu mo tana kau tisipulo heʼe haohaoa! Neʼe akoʼi e Sesu ki tana kau tisipulo “ke nātou faikole tuʼumaʼu pea mo ʼaua naʼa nātou fiu.” (Luka 18:1, MN ) Ko te faikole ʼe ko he felogoi moʼoni pea mo maʼuhiga mo Ia ʼaē ʼe ina ʼiloʼi lelei age tatou. (Pesalemo 103:14) Kapau ʼe tou fia taupau te tokalelei ʼo Kilisito ʼi totatou loto, pea ʼe tou “faikole tuumau” anai.—1 Tesalonika 5:17.

Tou Mālo ʼi Totatou ʼu Tuʼakoi

12. He koʼe ʼe manatu ʼihi ko tanatou tauhi ʼe mole lelei?

¹² ʼE maʼuhiga kia Sehova tana ʼu kaugana fuli. (Asea 2:7, kiʼi nota ʼi te lalo pasina) Kae tokolahi ʼe mata faigataʼa kia nātou ia te faʼahi ʼaia. ʼE lagi lotovaivai ʼihi heʼe kua nātou matutuʼa, peʼe mamafa fau te ʼu maʼua faka famili, peʼe ko te ʼāsili kovi ʼo he mahaki. ʼE lagi ko ʼihi ʼe nātou lotomamahi ʼuhi ko te ʼu meʼa kovi ʼaē neʼe hoko kia nātou ʼi tanatou kei liliki. Pea ki ʼihi ʼe lagi nātou hoha ʼuhi ko he ʼu hala neʼe nātou fai ʼi muʼa atu, heʼe nātou manatu ʼe mole heʼeki fakamolemole e Sehova tanatou ʼu hala ʼaia. (Pesalemo 51:3) Koteā ʼaē ʼe feala ke tou fai ʼo ʼuhiga mo te ʼu taʼi ʼu manatu ʼaia?

13. Koteā te fakafimālie ʼe foaki mai e Tohi-Tapu kia nātou ʼaē ʼe nātou manatu ʼe mole nātou maʼuhiga?

¹³ Ko te tokalelei ʼo Kilisito ʼe ina fakamoʼoni mai anai te ʼofa ʼo Sehova. ʼE tou lava maʼu te tokalelei ʼaia ʼi totatou loto mo kapau ʼe tou metitasioʼi, ko Sesu neʼe mole ina ʼui ʼi he temi ʼe fakafuafua totatou maʼuhiga mokā fakatatau tatatou ʼu gāue mo te ʼu gāue ʼa ʼihi. (Mateo 25:14, 15; Maleko 12:41-44) Ko te meʼa ʼaē neʼe ina faka maʼuhigaʼi neʼe ko te agatonu. Neʼe ina ʼui fēnei ki tana kau tisipulo: “Ko ae e kataki anai ki te gataʼaga, e mauli anai.” (Mateo 24:13) Ko Sesu neʼe “fehiʼaʼinaʼi” e te hahaʼi, kae neʼe ina ʼiloʼi papau ʼe ʼofa tana Tāmai kia te ia. (Isaia 53:3; Soane 10:17) Pea neʼe ina tala ki tana kau tisipulo, ʼe toe ʼofa tana Tāmai kia nātou. (Soane 14:21) Moʼo faka maʼuhigaʼi te faʼahi ʼaia, neʼe ʼui fēnei e Sesu: “Pe mole fakatau misi e lua ki te fala tahi? E mole he misi e to ifo anai ki te kele, kae e mole iloi e tautou Tamai. Kae kia koutou, mo outou fuluiʼulu kua lau katoa. Koia, aua tautou tuania; e koutou mauhigaʼage i te atu misi fuape.” (Mateo 10:29-31) ʼE ko he fakapapau fakafiafia ʼo ʼuhiga mo te ʼofa ʼo Sehova!

14. Koteā te fakaloto mālohi ʼaē ʼe tou maʼu ko Sehova ʼe ʼofa kia tatou fuli?

¹⁴ Neʼe toe ʼui fēnei e Sesu: “E mole feala ki he tahi ke haù kia te au, kapau e mole taki mai ia kia te au e te Tamai ae nee ina fekaui mai au.” (Soane 6:44) Ko te tupuʼaga la ʼaia ʼo te haga taki tatou e Sehova ke tou mulimuli ia Sesu heʼe ina loto ke tou hāo. Neʼe ʼui fēnei e Sesu ki tana kau tisipulo: “E mole ko te finegalo o tautou Tamai i Selo, ke puli he tahi o natou liliki aeni.” (Mateo 18:14) Koia kapau ʼe koutou tauhi ʼaki he loto katoa, pea ʼe koutou lava fakafiafia ʼuhi ko takotou ʼu gāue lelei. (Kalate 6:4) Kapau ʼe koutou hoha ʼuhi ko he ʼu hala ʼāfea, koutou loto falala ko Sehova ʼe fakamolemole “lahi” anai ki te hahaʼi ʼaē ʼe nātou fakahemala moʼoni. (Isaia 43:25; 55:7) Kapau ʼe ʼi ai he tahi tupuʼaga ʼo takotou lotovaivai, koutou manatuʼi “ko Sehova ʼe ōvi kia nātou ʼaē ʼe lavea ʼonatou loto; pea ʼe ina hāofaki ia nātou ʼaē ʼe taʼomia tonatou laumālie.”—Pesalemo 34:18.

15. (a) ʼE faiga feafeaʼi ia Satana ke ina pulihi totatou tokalelei? (b) Koteā te falala ʼe tou lava maʼu ia Sehova?

¹⁵ ʼE faiga mālohi ia Satana ke ina pulihi tokotou tokalelei. ʼE ko ia ʼaē neʼe ina fakahū te agahala pea ʼe tou lolotoga tauʼi nei. (Loma 7:21-24) ʼE ina loto ke koutou manatu ko takotou tauhi ʼe mole leleiʼia e te ʼAtua, ʼuhi ko tokotou ʼuhiga heʼe haohaoa. ʼAua naʼa koutou tuku te Tevolo ke ina fakaloto vaivaiʼi koutou ʼi he temi! Koutou tokaga ki tana ʼu kākā, pea ʼi takotou mahino leva ki tana ʼu kākā ʼaia, koutou faiga mālohi ke koutou kātakiʼi. (2 Kolonito 2:11; Efeso 6:11-13) Koutou manatuʼi “e lahiʼage te Atua i otatou loto pea e ina iloi te meafuape.” (1 Soane 3:20) ʼE mole sio pe ia Sehova ki tatatou ʼu agahala. ʼE toe sio ki te ʼu meʼa ʼaē ʼe ina uga tatou pea mo tatatou ʼu fakatuʼutuʼu. Koia koutou maʼu te fīmālie ʼi te ʼu palalau ʼaenī ʼa te tagata fai pesalemo: “ ʼE mole līaki anai e Sehova tana hahaʼi, pea ʼe mole situʼa anai ki tona tofiʼa.”—Pesalemo 94:14.

Logo Tahi ʼi Te Tokalelei ʼo Kilisito

16. He koʼe ʼe mole tou tokotahi mokā tou faiga ke tou kātakiʼi totatou ʼu fihifihia?

¹⁶ Neʼe tohi e Paulo ʼe tonu ke tou tuku te tokalelei ʼo Kilisito ke ina puleʼi totatou loto, koteʼuhi neʼe “pāuiʼi [tatou] ki ai ʼi te sino pe e tahi.” Ko te kau Kilisitiano fakanofo ʼaē neʼe faitohi ki ai Paulo neʼe pāuiʼi nātou ke nātou kau ki te sino ʼo Kilisito, ohage pe ko te toe ʼo te kau fakanofo ia ʼaho nei. Ko tonatou ʼu kaugā gāue ia te “tahi ʼu ōvi,” ʼe nātou logo tahi mo nātou ohage ko he “faga ōvi pe e tahi,” ʼo mulimuli ki te takitaki ʼa te “tagata tauhi ōvi pe e tahi” ia Sesu Kilisito. (Soane 10:16, MN ) Ko nātou fakatahi, ʼe ko te toko lauʼi miliona “faga ōvi” ʼi te malamanei katoa, pea ko te tokalelei ʼo Kilisito ʼaē ʼe ina puleʼi tonatou loto. ʼI tatatou ʼiloʼi ʼaē ʼe mole tou tokotahi ʼe ko he tokoni ʼaia kia tatou ke tou kātakiʼi totatou ʼu fihifihia. Neʼe tohi fēnei e Petelo: “Ke koutou fakafeagai kia [Satana], ʼo koutou mālohi ʼi te tui, heʼe koutou ʼiloʼi ko te ʼu meʼa ʼaia ʼo ʼuhiga mo te ʼu mamahi ʼe hoko ki te famili katoa ʼo tokotou ʼu tēhina ʼi te malamanei.”—1 Petelo 5:9, MN.

17. He koʼe ʼe tonu ke tou tuku te tokalelei ʼo Kilisito ke ina puleʼi totatou loto?

¹⁷ Koia ʼofa pe ke tou haga fakatuputupu te tokalelei, te fua maʼuhiga ʼaia ʼo te laumālie maʼoniʼoni ʼo te ʼAtua. (Kalate 5:22, 23) Kia mata ʼo Sehova ko nātou ʼaē ʼe heʼe mele, mo haohaoa pea mo tokalelei, ʼe tapuakina anai nātou ʼaki te maʼuli heʼegata ʼi te palatiso ʼi te kele, ʼaē ka maʼu ai te faitotonu. (2 Petelo 3:13, 14) ʼE tonu ke tou falala ʼo tuku te tokalelei ʼo Kilisito ke ina puleʼi totatou loto.

[Kiʼi nota]

ʼE Kei Koutou Manatuʼi Koa?

• Koteā te tokalelei ʼo Kilisito?

• ʼE lava puleʼi feafeaʼi e te tokalelei ʼo Kilisito totatou loto mokā tou tau mo te heʼe faitotonu?

• ʼE tokoni feafeaʼi mai te tokalelei ʼo Kilisito ke tou tauʼi te loto tuʼania?

• ʼE fakafimālieʼi feafeaʼi tatou e te tokalelei ʼo Kilisito mokā tou manatu ʼe mole tou maʼuhiga?

[Paki ʼo te pasina 15]

ʼI muʼa ʼo tona ʼu tagata tukugakovi, ko Sesu neʼe falala kia Sehova

[Paki ʼo te pasina 16]

Ohage ko te fāʼufua ʼa he tāmai ʼofa, ko te ʼu fakaloto fīmālie ʼa Sehova ʼe nātou lava fakamaʼamaʼa totatou loto tuʼania

[Paki ʼo te pasina 18]

ʼE maʼuhiga ʼaupito ki te ʼAtua te faʼa kātaki