ʼE Aʼu Atu Anai Koa Kia Koutou Te Tapuakina ʼa Sehova?

“Ko te ʼu tapuakina fuli ʼaenī ʼe tonu anai ke hoko atu kia te koe pea mo aʼu atu kia koe, koteʼuhi ʼe ke haga fakalogo ki te leʼo ʼo Sehova, tou ʼAtua.”—Teutalonome 28:2.

1. Koteā ʼaē neʼe fakalogo kiai te ʼu tapuakina peʼe ko te ʼu malaʼia ʼa te kau Iselaele?

NEʼE nonofo te kau Iselaele ʼi te ʼu Mafa ʼo Moape, ʼi te fakaʼosi ʼo te ʼu taʼu e 40 ʼo tanatou feʼoloʼaki ʼi te toafa. Neʼe nātou ʼamanaki hū ki te Kele ʼo te Fakapapau. Pea neʼe tohi ʼi te temi leva ʼaia e Moisese te tohi ʼo Teutalonome, ʼaē ʼe tuʼu ai te ʼatu ʼu tapuakina pea mo te ʼu malaʼia. Kapau ko te hahaʼi ʼo Iselaele ʼe nātou “haga fakalogo ki te leʼo ʼo Sehova” ʼo nātou talagafua kia te ia, pea ʼe “aʼu” anai kia nātou te ʼu tapuakina. Neʼe ʼofa Sehova kia nātou ohage ko hona “koloā makehe” pea neʼe ina fakaʼaogaʼi tona mālohi maʼa nātou. Kae kapau ʼe mole nātou haga fakalogo kia te ia, ʼe nātou malaʼia anai.—Teutalonome 8:10-14; 26:18; 28:2, 15.

2. Koteā te faka ʼuhiga ʼo te ʼu kupu faka Hepeleo, ʼaē neʼe fakaliliu ia Teutalonome 28:2 ʼaki te ʼu kupuʼi palalau “haga fakalogo” pea mo “aʼu atu”?

² Ko te kupu faka Hepeleo ʼaē neʼe fakaliliu ʼaki te kupuʼi palalau “haga fakalogo” ʼo Teutalonome 28:2, ʼe faka ʼuhiga ki he gāue ʼe fai hoholo. Ko te fakalogo ʼa te hahaʼi ʼa Sehova kia te ia, ʼe mole faka temi kae ʼe nātou fai ʼi te temi fuli pe, ʼo hoki nātou maʼu ai te ʼu tapuakina fakaʼatua. Ko te kupu faka Hepeleo ʼaē neʼe fakaliliu ʼaki te kupuʼi palalau “aʼu atu”, neʼe ko te kupu ki te kapu manu ʼaē ʼe tau faka ʼuhiga ki te kupu “puke.”

3. ʼE tou lava faʼifaʼitakiʼi feafeaʼi ia Sosue, pea he koʼe ʼe maʼuhiga ki totatou maʼuli?

³ Ko Sosue te tagata takitaki ʼo Iselaele neʼe ina fili ke fakalogo kia Sehova pea neʼe ina maʼu ai te ʼu tapuakina. Neʼe ʼui fēnei e Sosue: “Koutou fili maʼa koutou ʼi te ʼaho nei pe ko ai ʼaē ka koutou tauhi ki ai . . . Kae kia ʼau mo toku loto fale, ʼe mātou tauhi anai kia Sehova.” ʼI te logo ʼa te hahaʼi ki tana palalau ʼaia, neʼe nātou tali fēnei: “ ʼE mole feala kia mātou ke mātou līaki Sehova ʼo ʼolo ʼo tauhi ki ni tahi ʼu ʼatua.” (Sosue 24:15, 16) ʼUhi he neʼe lelei te manatu ʼa Sosue, neʼe kau ʼi te tokosiʼi ʼo tona taʼiake ʼaē neʼe nātou maʼu te pilivilesio ke nātou hū ki te Kele ʼo te Fakapapau. Ia ʼaho nei, ʼe tou ʼamanaki hū ki te Kele ʼo Te Fakapapau ʼe lahi age—ko te palatiso ʼi te kele, ʼe maʼu ai anai te ʼu tapuakina ʼe lahi age ʼi te temi ʼo Sosue, maʼa nātou ʼaē ʼe ʼofa ki ai te ʼAtua. ʼE koutou maʼu anai koa te ʼu taʼi tapuakina ʼaia? Ei, mo kapau ʼe koutou haga fakalogo kia Sehova. Ke tou lotomālohi ʼo ʼuhiga mo te faʼahi ʼaia, tou vakaʼi te hisitolia ʼo te Iselaele ʼāfea pea mo te ʼu faʼifaʼitaki ʼe ʼaoga kia tatou takitokotahi.—Loma 15:4.

Ko Te Tapuakina Peʼe Ko Te Malaʼia?

4. Moʼo tali ki te faikole ʼa Salomone, koteā ʼaē neʼe foaki age e te ʼAtua, pea ʼe tonu ke feafeaʼi kia tatou te ʼu taʼi tapuakina ʼaia?

⁴ ʼI te temi hau ʼo Salomone, neʼe maʼu e te kau Iselaele te ʼu tapuakina lahi mai ia Sehova. Neʼe nātou maʼuli fīmālie pea mo mahu ʼi te ʼu meʼa lelei. (1 Hau 4:25) Logola neʼe logona te koloaʼia ʼo Salomone, kae neʼe mole ina kole ki te ʼAtua ke maʼu meʼa. Kailoa, neʼe ina kole ke ina maʼu he loto fakalogo ʼuhi he neʼe kei tūpulaga, pea neʼe mole heʼeki fakapotopoto—pea neʼe tali tana kole e Sehova he neʼe ina tapuakinaʼi ia ia ʼaki te aga fakapotopoto pea mo te ʼatamai. Pea neʼe faka fealagia ai kia Salomone ke ina fakamāuʼi fakalelei ia te hahaʼi, pea ke ina ʼiloʼi te meʼa ʼaē ʼe lelei ʼi te meʼa ʼaē ʼe kovi. Logola neʼe toe foaki age e te ʼAtua kia te ia te ʼu koloā pea mo te kolōlia ʼi tana kei tūpulaga, kae neʼe fakafetaʼi lahi ia Salomone ki te maʼuhiga ʼaupito ʼo te ʼu koloā fakalaumālie. (1 Hau 3:9-13) Tatau aipe peʼe tou mahu peʼe kailoa ʼi te faʼahi faka koloā, kae ʼe tou lava fakafetaʼi mo kapau ʼe tou maʼu te tapuakina ʼa Sehova pea mo tou koloaʼia ʼi te faʼahi fakalaumālie!

5. Koteā ʼaē neʼe hoko ki te hahaʼi ʼo Iselaele pea mo Suta ʼi tanatou mole kei fakalogo kia Sehova?

⁵ Neʼe mole loto fakafetaʼi te kau Iselaele ki te tapuakina ʼa Sehova. Pea ʼi tanatou mole kei fakalogo kia te ia, neʼe fakakikite ʼe aʼu mai anai kia nātou te ʼu malaʼia. Koia ʼaē neʼe tauʼi ai nātou e tonatou ʼu fili, pea mo ʼave faka popūla ai te ʼu hahaʼi ʼo Iselaele pea mo Suta. (Teutalonome 28:36; 2 Hau 17:22, 23; 2 Fakamatala 36:17-20) ʼAki te mamahi ʼaē neʼe tau mo nātou, neʼe mahino koa ki te hahaʼi ʼa te ʼAtua, ko te ʼu tapuakina fakaʼatua ʼe aʼu pe kia nātou ʼaē ʼe nātou haga fakalogo kia Sehova? Ko te toe ʼo te kau Sutea ʼaē neʼe liliu ki tonatou kele ʼi te 537 ʼi muʼa ʼo totatou temi, neʼe tonu ke nātou fakahā ʼi te temi ʼaia peʼe kua nātou maʼu “he loto fakapotopoto,” pea mo mahino ki te ʼaoga ʼaē ke nātou haga fakalogo ki te ʼAtua.—Pesalemo 90:12.

6. (a) He koʼe neʼe fekauʼi e Sehova ia Asea pea mo Sakalia ke nā faka mafola ki tana hahaʼi? (b) ʼAki ia Asea, koteā te meʼa ʼaē neʼe faka maʼuhigaʼi e te ʼAtua?

⁶ Ko te kau Sutea ʼaē neʼe toe liliu ki tonatou fenua, neʼe nātou fakatuʼu te ʼaletale pea mo kamata laga te fale lotu ʼo Selusalemi. Kae ʼi te temi ʼaē neʼe mālohi ai te ʼu fakafeagai, neʼe nātou lotovaivai ai, ʼo nātou tuku te gāue. (Esitalasi 3:1-3, 10; 4:1-4, 23, 24) Neʼe nātou toe faka maʼuhigaʼi te ʼu meʼa ʼo tonatou maʼuli fakasino. Koia, neʼe fekauʼi ai e te ʼAtua ia te ʼu polofeta ko Asea pea mo Sakalia moʼo toe fakamālohiʼi te loto ʼo tana hahaʼi ki te tauhi moʼoni. ʼAki ia Asea, neʼe ʼui fēnei e Sehova: “ ʼE ko he temi koa ke koutou nonofo ʼi ʼokotou ʼu ʼapi matalelei, kae lāvaki te fale [tauhi] ʼaenī? . . . Koutou tuku tokotou loto ki ʼokotou ʼu ala. Neʼe lahi takotou to kae siʼisiʼi tona taʼukai. ʼE tou kakai, kae ʼe mole tou makokona . . . pea ko ʼaē ʼe ina maʼu tona totogi ʼe ina maʼu ʼi te taga ʼe pu.” (Asea 1:4-6) ʼE mole tou maʼu te tapuakina ʼa Sehova mo kapau ʼe tou fakamuʼamuʼa te ʼu koloā fakamālama kae tou meʼa noaʼi te ʼu meʼa fakalaumālie.—Luka 12:15-21.

7. He koʼe neʼe ʼui e Sehova ki te kau Sutea: “Koutou tuku tokotou loto ki ʼokotou ʼu ala”?

⁷ ʼI te tokaga fau ʼa te kau Sutea ki tanatou ʼu gāue ʼi te ʼaho fuli, neʼe galo ai kia nātou te ʼu tapuakina fakaʼatua ohage la ko te ʼua pea mo te ʼu fasiga taʼu ʼaē ʼe aʼu mai kia nātou mokā nātou fakalogo ki te ʼAtua, māʼiape la ʼi te ʼu temi fakafeagai. (Asea 1:9-11) Koia ʼaē ʼe ʼaoga ai te tokoni ʼaenī: “Koutou tuku tokotou loto ki ʼokotou ʼu ala”! (Asea 1:7) Neʼe hage pe neʼe ʼui age e Sehova kia nātou: ‘Koutou fakakaukauʼi pe koʼe ʼe mole he fua ʼo takotou gāue kinakina ʼi te gāueʼaga pea mo te tuku lāvaki feiā ʼo toku fale tauhi.’ Ki muli age neʼe malave ki ʼonatou ʼu loto te ʼu palalau ʼa te ʼu polofeta ʼa Sehova, he neʼe nātou toe hoko atu te laga ʼo te fale lotu, ʼaē neʼe fakaʼosi ʼi te 515 ʼi muʼa ʼo totatou temi.

8. ʼI te temi ʼo Malakia, koteā te fakaloto mālohi neʼe foaki e Sehova ki te kau Sutea, pea koteā tona tupuʼaga?

⁸ Ki muli age, ʼi te temi ʼo te polofeta ko Malakia, neʼe toe agahala te kau Sutea ʼi te faʼahi fakalaumālie, ʼo nātou fai te ʼu mōlaga neʼe mole leleiʼia e te ʼAtua. (Malakia 1:6-8) Koia, neʼe fakaloto mālohiʼi ai nātou e Sehova ke nātou ʼaumai te hogofulu ʼo te vahe ʼo tonatou ʼu magisi ki tona fale koloā, pea ke nātou ʼahiʼahiʼi ia ia peʼe mole ina avahi age anai kia nātou, te ʼu matapā ʼo te lagi pea mo huaʼi age kia nātou he ʼu tapuakina ʼo aʼu ki te mole toe ʼi ai ʼo he hoge. (Malakia 3:10) Neʼe ko he agavale ʼa te kau Sutea tanatou mole fakalogo ki te leʼo ʼo Sehova, kanaʼauala neʼe ina foaki age te ʼu tapuakina lahi, kae ʼi te temi leva ʼaia neʼe kua tonu ke nātou gāue kinakina moʼo maʼu ʼo te ʼu tapuakina ʼaia!—2 Fakamatala 31:10.

9. Ko ai anai te foʼi toko tolu ʼaē ka tou vakaʼi tonatou maʼuli ʼi te Tohi-Tapu?

⁹ ʼO toe hilifaki mai ki te hisitolia ʼo te puleʼaga ʼo Iselaele, ʼe fakahā mai e te Tohi-Tapu te ʼu tapuakina fakaʼatua peʼe ko te ʼu malaʼia ʼaē neʼe hoko ki te tokolahi, ʼo mulimuli pe ki tanatou haga fakalogo peʼe kailoa kia Sehova. Tou vakaʼi age pe koteā te meʼa ʼe tou lava ako mai te toko tolu ʼaenī—ko Poase, Napale pea mo Ana. Ki te faʼahi ʼaia, ʼe koutou lava lau ia te tohi ʼo Lute ʼo feiā mo te tohi ʼo 1 Samuele 1:1–2:21 pea mo 1 Samuele 25:2-42.

Neʼe Fakalogo Ia Poase Ki Te ʼAtua

10. Ko te ʼu ʼaluʼaga fea ʼaē neʼe tatau ai ia Poase pea mo Napale?

¹⁰ Logola neʼe mole maʼuli tahi ia Poase pea mo Napale, kae neʼe teitei tatau tonā maʼuli. Neʼe nā maʼuʼuli ʼi te fenua ʼo Suta. Neʼe nā maʼu meʼa, pea neʼe ʼi ai te temi neʼe tonu ai ke nā fakahā tonā lotoʼofa kia ia ʼaē ʼe fakaʼofaʼofa. Koʼena te ʼu faʼahi ʼaē neʼe tatau ai tonā maʼuli.

11. Neʼe fakahā feafeaʼi e Poase tana haga fakalogo ʼaē kia Sehova?

¹¹ Neʼe maʼuli ia Poase ʼi te temi ʼo te kau tuʼi fakamāu ʼo Iselaele. Neʼe fakaʼapaʼapa ki te hahaʼi, pea neʼe fakaʼapaʼapa tana kau gāue kia te ia. (Lute 2:4) ʼO mulimuli pe ki te lao, neʼe tokaga ia Poase ke ʼaua naʼa tae te ʼu fua ʼo te taʼukai ʼaē neʼe to ki lalo kae ke tuku maʼa te hahaʼi māsisiva. (Levitike 19:9, 10) Koteā te meʼa neʼe fai e Poase maʼa Lute pea mo Naomi? Pea koteā te meʼa neʼe ina fai ʼi tana ʼiloʼi ʼaē ʼe tokaga ia Lute ki te maʼuli fakasino ʼo tana faʼe ko Naomi? Neʼe agalelei kia Lute he neʼe ina fakatotonu ki tana kau gāue ke ʼaua naʼa nātou tae fuli te ʼu fua ʼo te taʼukai ʼaē neʼe to ki lalo ʼi tana gāueʼaga. ʼAki te tokaga ʼofa ʼaia ʼa Poase, neʼe ina fakahā ai tana manako ki te ʼu meʼa fakalaumālie he neʼe fakalogo kia Sehova. Koia neʼe ina maʼu ai te ʼofa pea mo te tapuakina ʼa te ʼAtua.—Levitike 19:18; Lute 2:5-16.

12, 13. (a) Neʼe fakahā feafeaʼi e Poase ia tana faka maʼuhigaʼi te lao ʼa Sehova ʼo ʼuhiga mo te totogi? (b) Koteā te ʼu tapuakina neʼe maʼu e Poase?

¹² Neʼe fakahā tāfito e Poase tana haga fakalogo kia Sehova ʼi tana mulimuli ki te lao ʼa te ʼAtua ʼo ʼuhiga mo te totogi. Neʼe fai e Poase ia meʼa fuli moʼo fakahoko te hōloga ʼo tona kāiga—ʼaē ko Elimeleke te ʼohoana ʼo Naomi ʼaē kua mate—ke ina maʼu hona hākoga. ʼAki te fakatuʼutuʼu ʼaē “ke ʼohoana te fafine mo he tēhina ʼo tona ʼohoana,” neʼe tonu ke ʼohoana te fafine vitua mo he kāiga totonu ʼo tona hoa ʼaē kua mate, ke maʼu ai hanā tama moʼo taupau te hōloga. (Teutalonome 25:5-10; Levitike 25:47-49) Kae ko Lute ʼaē neʼe ina fakahoko te faʼahi ʼaia he neʼe kua finematuʼa ia Naomi ʼo ʼuhiga mo te maʼu fānau. ʼI te mole fia fakahoko e te kāiga ʼo Elimeleke ia te tokoni ʼofa ʼaia kia Naomi, neʼe ko Poase leva ʼaē neʼe ʼohoana mo Lute. Pea ko tanā tama ko Opete, neʼe hage pe ko he hākoga ʼo Naomi pea mo he foha totonu ʼo Elimeleke.—Lute 2:19, 20; 4:1, 6, 9, 13-16.

¹³ Neʼe lahi te ʼu tapuakina neʼe maʼu e Poase ʼuhi ko tana fakalogo katoa ki te lao ʼa te ʼAtua. Neʼe tapuakina ia ia pea mo Lute ʼaki tanā tama ko Opete, he neʼe nā maʼu te pilivilesio ʼaē ke nā liliu ko te ʼu kui ʼa Sesu Kilisito. (Lute 2:12; 4:13, 21, 22; Mateo 1:1, 5, 6) ʼE tou mahino ʼaki te aga ʼaia ʼa Poase, ko te ʼu tapuakina ʼe foaki kia nātou ʼaē ʼe nātou ʼofa ki te hahaʼi, pea mo mulimuli ki te ʼu fakatotonu ʼa te ʼAtua.

Neʼe Mole Fakalogo Ia Napale

14. Neʼe feafeaʼi te tagata ko Napale?

¹⁴ Neʼe mole tatau ia Napale mo Poase he neʼe mole fakalogo ia kia Sehova. Neʼe ina maumauʼi te lao ʼaenī ʼa te ʼAtua: “ ʼE tonu ke ke ʼofa ki tou kāiga ohage pe ko koe totonu.” (Levitike 19:18) Neʼe mole manako ia Napale ki te ʼu meʼa fakalaumālie, he “neʼe aga fefeka pea neʼe kovi tana ʼu aga.” Māʼiape la mo tana ʼu tagata faifekau neʼe nātou faka ʼuhiga ia ia ohage “ko he tagata ʼe mole hona ʼuhiga.” Koia ko tona higoa ko Napale ko tona faka ʼuhiga “ ʼe mole hona ʼatamai,” peʼe “vale.” (1 Samuele 25:3, 17, 25) Neʼe feafeaʼi te aga ʼa Napale ʼi te temi ʼaē neʼe tonu ai ke loto manavaʼofa ki te tagata neʼe fakaʼofaʼofa—ko Tavite, te fakanofo ʼa Sehova?—1 Samuele 16:13.

15. Neʼe feafeaʼi te aga ʼa Napale kia Tavite, pea neʼe feafeaʼi te aga ʼa Apikaela?

¹⁵ ʼAki he loto ʼofa, ko Tavite pea mo tana ʼu tagata faifekau, neʼe nātou puipui mai te hahaʼi kaihaʼa te faga manu ʼa Napale ʼaē neʼe nonofo ʼi ʼonatou ʼu tafaʼaki. Neʼe ʼui fēnei e te tagata tauhi manu ʼa Napale: “Neʼe nātou hage ko he kaupā maʼa mātou, ʼi te po pea mo te ʼaho.” Kae ʼi te temi ʼaē neʼe kole meʼa kai ai te ʼu tagata faifekau ʼa Tavite kia Napale, neʼe ina “tali koviʼi nātou” pea neʼe ina fakaliliu ʼātea nātou. (1 Samuele 25:2-16) Pea ko Apikaela, te ʼohoana ʼa Napale, neʼe ina foimo teuteuʼi atu aipe te meʼa kai maʼa Tavite. ʼI te lahi fau ʼo te ʼita ʼo Tavite neʼe ina fakatuʼutuʼu ke ina pulihi katoa ia Napale pea mo tana hahaʼi. Koia ko te puleʼaki ʼaē neʼe fai e Apikaela, neʼe ina hāofaki ai te tokolahi pea mo tāʼofi Tavite naʼa lākahala ʼi tana fia ligi toto ʼaia. Kae neʼe kovi ʼaupito te loto mānumānu ʼa Napale pea mo tana aga fefeka. Hili ʼaia ʼaho e hogofulu, pea “neʼe tāʼi e Sehova ia Napale, ʼo mate ai.”—1 Samuele 25:18-38.

16. ʼE tou lava faʼifaʼitakiʼi feafeaʼi ia Poase pea mo tekeʼi te ʼu aga ʼa Napale?

¹⁶ ʼI kehekehe leva ʼo Poase pea mo Napale! Koia ʼe tonu ke tou tekeʼi te aga fefeka pea mo te manatu ʼaē neʼe maʼu e Napale ʼo ʼuhiga mo ia totonu, kae ke tou faʼifaʼitakiʼi te agalelei pea mo te loto fia foaki ʼa Poase. (Hepeleo 13:16) ʼE tou lava fai te faʼahi ʼaia ʼaki hatatou muliʼi te tokoni ʼaenī ʼa te ʼapositolo ko Paulo: “I tatatou kei mau te temi, tou fai ia te lelei ki te tagata fuape, kae tafito ia te lelei o te kaiga o te tui.” (Kalate 6:10) Ia ʼaho nei, ko “te tahi ʼu ōvi” ʼa Sesu, ia te kau Kilisitiano ʼaē ka nātou maʼuʼuli ʼi te kele, ʼe nātou maʼu te pilivilesio ʼaē ke nātou fai te meʼa ʼaē ʼe lelei ki te kau fakanofo ʼa Sehova, te toe ʼo te toko 144 000 ʼaē ka nātou maʼuʼuli tuputupua anai ʼi te lagi. (Soane 10:16, MN; 1 Kolonito 15:50-53; Apokalipesi 14:1, 4) ʼE faka ʼuhiga e Sesu te ʼu gāue ʼofa ʼaia ohage pe neʼe fai age kia te ia totonu, pea ʼaki te ʼu meʼa lelei ʼaia ʼe nātou maʼu ai te ʼu tapuakina lahi mai ia Sehova.—Mateo 25:34-40; 1 Soane 3:18.

Te ʼu ʼAhiʼahiʼi Pea Mo Te ʼu Tapuakina ʼo Ana

17. Koteā te ʼu ʼahiʼahiʼi neʼe fai kia Ana, pea neʼe ina tali feafeaʼi?

¹⁷ Neʼe toe aʼu te tapuakina ʼa Sehova ki te fafine aga faka lotu ko Ana. Neʼe nofo mo tona ʼohoana Levite ko Elekana ʼi te ʼu potu moʼugaʼia ʼo Efalaime. Neʼe ʼi ai te tahi ʼohoana ʼo Elekana ko Penina, he neʼe fakagafua te faʼahi ʼaia e te Lao. Ko Ana neʼe paʼa, pea neʼe ko he meʼa fakaufiufi maʼa he fafine Iselaele, kae ko Penina neʼe maʼu fānau. (1 Samuele 1:1-3; 1 Fakamatala 6:16, 33, 34) Neʼe mole fakaloto fīmālieʼi e Penina ia Ana, kae neʼe ina fakamamahiʼi ia ia, ko te tupuʼaga ʼaia ʼo te tagi pea mo te mole fia kai ʼa Ana. Kae ko te meʼa ʼaē neʼe fakaʼofaʼofa tāfito, he neʼe fai e Penina tana aga ʼaia ʼi te “taʼu fuli” mokā hake te famili ki te ʼapi ʼo Sehova, ʼi Silo. (1 Samuele 1:4-8) ʼI loto fefeka leva ʼo Penina, pea neʼe ko he ʼahiʼahi lahi ki te tui ʼa Ana! Kae neʼe mole tukugakoviʼi e Ana ia Sehova, pea neʼe mole nofo ʼi fale ʼi te temi ʼaē neʼe hake ai tona ʼohoana ki Silo. Kae ki muli age neʼe ina maʼu te tapuakina lahi.

18. Neʼe koteā te faʼifaʼitaki neʼe tuku mai e Ana?

¹⁸ Neʼe tuku e Ana te faʼifaʼitaki lelei maʼa te hahaʼi ʼa Sehova ia ʼaho nei, tāfito la maʼa nātou ʼaē ʼe lagi lotomamahi ʼi he ʼu palalau kovi neʼe fai age e niʼihi. ʼI te ʼu ʼaluʼaga ʼaia, ʼe mole tonu ia ke kita nofo tokotahi. (Tāʼaga Lea 18:1) Neʼe mole tuku e Ana te ʼu ʼahiʼahi ʼaia ke nātou tāʼofi tana ʼalu ʼaē ki te ʼu potu ʼe akoʼi ai te Folafola ʼa te ʼAtua pea mo fakatahi ai tana hahaʼi ki te tauhi. Neʼe mālohi tuʼumaʼu ʼi te faʼahi fakalaumālie. ʼE hā te loloto ʼo tona maʼuli fakalaumālie ʼi tana faikole matalelei ʼaē ia 1 Samuele 2:1-10.a

19. ʼE tou lava fakahā feafeaʼi tatatou loto fakafetaʼi ki te ʼu meʼa fakalaumālie?

¹⁹ ʼI totatou ʼuhiga kaugana ʼa Sehova ʼo te temi nei, ʼe mole tou tauhi ʼi he tapenakulo. Kae ʼe tou lava fakahā tatatou loto fakafetaʼi ʼo ʼuhiga mo te ʼu meʼa fakalaumālie ohage pe ko Ana. ʼE tou lava fakafetaʼi lahi ki te ʼu koloā fakalaumālie ʼaki tatatou kau tuʼumaʼu ki te ʼu fono pea mo te ʼu fakatahi lalahi. Tou fakaʼaogaʼi te ʼu ʼaluʼaga ʼaia ke tou fefakalotomālohiʼaki ai ki te tauhi moʼoni kia Sehova, ʼaē ʼe tou maʼu ai “te pilivilesio . . . [ke tou] tauhi kia te ia ʼo mole tou manavasiʼi ʼaki he tauhi tapu ʼi te agatonu pea mo te faitotonu ʼi ʼona muʼa.”—Luka 1: 74, 75, MN; Hepeleo 10:24, 25.

20, 21. Neʼe feafeaʼi te fakapale ʼo Ana ʼuhi ko tana aga faka lotu?

²⁰ Neʼe tokagaʼi e Sehova te aga faka lotu ʼa Ana pea neʼe ina fakapale lahi ia ia. ʼI te tahi fagona ʼa te famili ki Silo, ohage ko tanatou fai ʼi te taʼu fuli, neʼe tagi ia Ana ʼo kole fakamalotoloto ki te ʼAtua pea mo fakapapau: “Ê Sehova ʼo te ʼatu kautau, kapau ʼe ke sio ki te mamahi ʼo tau fafine kaugana, pea mo ke manatuʼi moʼoni ia ʼau, pea ʼaua naʼa galo ia koe tau fafine kaugana, ke ke foaki moʼoni ki tau fafine kaugana he tamasiʼi tagata, pea ʼe ʼau foaki anai ia ia kia Sehova ʼi te ʼaho fuli ʼo tona maʼuli.” (1 Samuele 1:9-11) Neʼe logoʼi e te ʼAtua te kolekole ʼa Ana pea neʼe ina tapuakinaʼi ia ia ke ina fānauʼi te tama neʼe ina fakahigoa ko Samuele. ʼI tana ʼosi vavae te tamasiʼi, neʼe ina ʼave ia ia ki Silo ke feala ai hana tauhi ʼi te tapenakulo.—1 Samuele 1:20, 24-28.

²¹ Neʼe fakahā e Ana tona ʼofa ki te ʼAtua, ʼo mulimuli pe ki te tana fakapapau ʼaē neʼe ina fai ʼo ʼuhiga mo Samuele. Pea neʼe lahi te ʼu tapuakina ʼaē neʼe nā maʼu taumatuʼa ʼuhi he ko tanā tama ʼofaina ʼaia neʼe tauhi ʼi te tapenakulo ʼa Sehova! ʼE lahi te ʼu mātuʼa Kilisitiano neʼe nātou maʼu te ʼu fiafia pea mo te ʼu tapuakina feiā, koteʼuhi ko tanatou ʼu fānau neʼe pionie, peʼe kau ʼi te famili ʼo te Petele, peʼe ko te tahi atu ʼu gāue ʼe fakavikiviki ai pe kia Sehova.

Koutou Haga Fakalogo Kia Sehova!

22, 23. (a) Koteā ʼaē ʼe tou ʼiloʼi papau mo kapau ʼe tou haga fakalogo ki te leʼo ʼo Sehova? (b) Koteā ʼaē ka tou vakaʼi anai ʼi te alatike ka hoa mai?

²² Koteā ʼaē ʼe tou ʼiloʼi papau mo kapau ʼe tou haga fakalogo kia Sehova? ʼE tou koloaʼia anai ʼi te faʼahi fakalaumālie, mo kapau ʼe tou fakahā ki te ʼAtua tokita ʼofa ʼaē kia te ia ʼaki totatou nefesi katoa, pea mo kita fakahā ʼi totatou maʼuli, ko tatou ko tana ʼu kaugana. Tatau aipe mo te taʼi maʼuli ʼaia, ʼe tou felāveʼi mo te ʼu ʼahiʼahi faigataʼa, kae ʼe aʼu mai pe kia tatou te tapuakina ʼa Sehova—ʼo lagi laka age ʼi te ʼu meʼa ʼaē neʼe tou ʼamanaki kiai.—Pesalemo 37:4; Hepeleo 6:10.

²³ ʼI te ka haʼu, ʼe foaki anai ki te hahaʼi ʼa te ʼAtua te ʼu tapuakina lahi. ʼUhi he neʼe fakalogo lelei te “hahai kaugamalie” kia Sehova, ʼe nātou hāo anai ʼi te “ahiahi lahi” pea ʼe nātou maʼu anai te ʼu fiafia ʼo te maʼuli ʼi te mālama foʼou ʼa te ʼAtua. (Apokalipesi 7:9-14; 2 Petelo 3:13) ʼI te temi ʼaia ʼe fakahoko anai e Sehova te ʼu fakaʼamu faitotonu ʼo tana hahaʼi fuli. (Pesalemo 145:16) Pea ʼi te alatike ka hoa mai, ʼe ina fakahā mai anai ko nātou ʼaē ʼi te temi nei ʼe nātou haga fakalogo ki te leʼo ʼo Sehova, ʼe tapuakinaʼi nātou ʼaki ‘te ʼu meʼa ʼofa lelei pea mo te mōlaga haohaoa ʼe haʼu ia mai ʼoluga.’—Sakopo 1:17.

[Kiʼi nota]

ʼE Kei Koutou Manatuʼi Koa?

• Koteā ʼaē ʼe tou lava ako mai te hisitolia ʼo Iselaele ʼo ʼuhiga mo te ʼu tapuakina fakaʼatua?

• Neʼe koteā te kehekehe ʼo Poase pea mo Napale?

• ʼE tou lava faʼifaʼitakiʼi feafeaʼi ia Ana?

• He koʼe ʼe tonu ke tou haga fakalogo ki te leʼo ʼo Sehova?

[Paki ʼo te pasina 10]

Neʼe kole e te Hau ko Salomone he loto fakalogo, pea neʼe tapuakinaʼi ia ia e Sehova ʼaki te poto

[Paki ʼo te pasina 12]

Neʼe fakaʼapaʼapa pea mo agalelei ia Poase ki te hahaʼi

[Paki ʼo te pasina 15]

Neʼe tapuakinaʼi lahi ia Ana he neʼe falala kia Sehova