Koteā ʼAē ʼe Maʼuhiga Moʼoni?

ʼE feala ke kita fiafia mokā tou maʼu he meʼa ʼe maʼuhiga moʼoni. Kae koteā ʼaē ʼe maʼuhiga moʼoni? Ko he toe paʼaga? Ko he ʼu meʼa gigila totogi kovi? Ko te ʼiloa pea mo te maʼu tuʼulaga? Maʼa te tokolahi ʼe maʼuhiga ʼaupito te ʼu meʼa ʼaia. ʼAki te ʼu meʼa ʼaia ʼe tou maʼu te ʼu meʼa ʼaē ʼe ʼaoga kia tatou, peʼe maʼuhiga ai totatou maʼuli, peʼe faka fīmālie ai totatou loto ʼaē ke ʼofainaʼi tatou pea mo tou fia fakahoko he meʼa. ʼE tou faiga koa ki te ʼu meʼa ʼaia, ʼaki te ʼamanaki ʼaē ʼe tou lava fakahoko anai tatatou ʼu fakatuʼutuʼu pea mo te ʼu meʼa ʼaē ʼe tou loto kiai ʼi te ka haʼu?

ʼI TE agamāhani, ʼe maʼuhiga he meʼa ki te hahaʼi mokā feala ke ina foaki kia nātou te ʼu meʼa ʼaē ʼe ʼaoga kia nātou, peʼe ina fakafimālieʼi tonatou ʼu holi. ʼE tou leleiʼia te ʼu meʼa ʼaē ʼe tou logo fīmālie ai pea mo tou maʼu ai he ka haʼu ʼe lelei. ʼE maʼuhiga kia tatou te ʼu meʼa ʼaē ʼe tou lava maʼu ai te fīmālie ʼi te temi nei, te maʼuli lelei, peʼe ko te ʼiloa. Kae ko te faka maʼuhigaʼi ʼo he meʼa ʼo fakatafito ki tatatou ʼu holi ʼaē ʼe fetogi peʼe ko te manatu pe ʼaē kia kita, ʼe mole loloto pea ʼe mole tologa. ʼI tona ʼaluʼaga moʼoni, ko te meʼa ʼaē ʼe ʼaoga tāfito kia tatou ʼe ko te meʼa ʼaia ʼaē ka tou faka maʼuhigaʼi moʼoni.

Koteā te meʼa ʼaē ʼe ʼaoga tāfito kia tatou? ʼE mole maʼuhiga he meʼa mokā mole maʼu te meʼa tāfito ʼaē ko te maʼuli. Kapau ʼe mole he maʼuli pea ʼe mole feala ke tou maʼuʼuli. Neʼe tohi fēnei e Salomone, te Hau ʼāfea ʼo Iselaele: “Ko te kau mate, ʼe mole kei nātou ʼiloʼi he meʼa . . . ʼe mole he gāue, he fakatuʼutuʼu, he mālama, he poto ʼi te Seole [te falemaka ʼaē ʼe ʼolo fuli kiai te hahaʼi].” (Tagata Tānaki 9:5, 10) Ka tou mamate, pea ʼe mole tou ʼave totatou ʼu koloā mo tatou. Koia ko te meʼa ʼaē ʼe ʼaoga lahi kia tatou, ʼe ko te meʼa ʼaē ka ina fakatologa anai totatou maʼuli. Koteā ʼaē ka ina fakatologa anai totatou maʼuli?

Koteā ʼAē Ka Ina Fakatologa Anai Totatou Maʼuli?

Neʼe tala fēnei e te Hau ko Salomone: “Ko te falā ʼe ʼaoga ki te puipui.” (Tagata Tānaki 7:12) ʼAki te falā ʼe feala ke kita toʼo he meʼa kai pea mo maʼu hokita ʼapi. ʼE feala ʼaki te falā ke kita folau. ʼE feala ke ina taupau kita mo kapau ʼe mole kei feala hakita gāue ʼuhi ko te matutuʼa peʼe ko te mahaki. Ei, ʼe lahi te ʼu lelei ʼe tou maʼu ʼaki te falā. Kae ʼe mole feala ke fakatologa e te falā totatou maʼuli. Neʼe tokoni fēnei te ʼapositolo ko Paulo kia Timoteo: “Fakatotonu ki te hahai maumea o te malama aeni, ke aua tanatou fiameamea mo tanatou tuku tanatou falala ki he u koloa fakalakilua, kae ki te Atua.” (1 Timoteo 6:17) Ko te paʼaga katoa ʼo te malamanei ʼe mole pe feala ke tou totogi ʼaki totatou maʼuli.

Tou tokagaʼi te meʼa ʼaē neʼe hoko ki te tagata ʼe higoa ko Hitoshi. Neʼe tupu ake ʼi he famili masiva, koia neʼe holi mālohi ai e Hitoshi ke maʼu koloā. Neʼe tui lahi ki te mālohi ʼo te paʼaga, ʼo ina manatu ʼe toe feala ke totogi he ʼu hahaʼi ʼaki te paʼaga. Pea neʼe ʼalu age te tagata ki te ʼapi ʼo Hitoshi pea mo ina fehuʼi age peʼe ina ʼiloʼi neʼe mate Sesu Kilisito maʼa ia. ʼAki te fehuʼi ʼaia, neʼe tupu ai te fia ʼiloʼi ʼa Hitoshi te faʼahi ʼaia, he neʼe manatu ia ʼe mole feala ke mate he tahi maʼa ia. Neʼe fakalogo ki te faiakonaki faka Tohi-Tapu pea neʼe punamaʼuli ʼi tana logo ki te tokoni ʼaē ke tou ‘taupau he mata ʼe lelei.’ Neʼe fakamahino e te tēhina faiakonaki ko te mata ʼaē ʼe “lelei” ʼe sio mamaʼo pea ʼe tokaga ki te ʼu meʼa fakalaumālie. (Luka 11:34) Neʼe mole kei faiga lahi e Hitoshi ke maʼu paʼaga, kae neʼe ina kamata fakamuʼamuʼa ʼi tona maʼuli te ʼu meʼa fakalaumālie maʼuhiga.

Ka tou maʼu meʼa pea ʼe feala ke tou toe maʼu ai mo te faʼahiga tokalelei pea mo he fīmālie. Ka lahi totatou ʼu koloā pea ʼe mole tou hoha ʼo ʼuhiga mo te ʼu meʼa ʼaē ʼe ʼaoga kia tatou ʼi te ʼaho fuli. ʼE feala ke tou manatu kua tou katoa ia meʼa fuli mo kapau ʼe tou maʼu he ʼapi ʼe matalelei ʼi he koga meʼa ʼe matalelei. ʼAki he ʼu mutuʼi meʼa matalelei pea mo he motokā matalelei ʼe feala ke tokagaʼi ai tatou e te hahaʼi.

ʼE ko he tapuakina te ‘mamata ki te lelei katoa ʼo tatatou gāue kinakina.’ (Tagata Tānaki 3:13) Pea ko te ʼu koloā ʼaē ʼe tou maʼu ʼe ina faka fealagia ai kia nātou ʼe tou ʼoʼofa ai ke nātou ‘faka fīfīmālie, mo kakai, mo ʼiʼinu, pea mo nātou fiafia.’ Kae ʼe puli vave te maʼuhiga ʼo te ʼu koloā. ʼI tana fakatokaga ʼo ʼuhiga mo te loto mānumānu, neʼe ʼui fēnei e Sesu Kilisito: “E mole fakalogo te mauli o he tagata ki te u koloa e ina mau.” (Luka 12:15-21) Ko tatatou ʼu koloā, tatau aipe peʼe lahi peʼe maʼuhiga, kae ʼe mole feala ke nātou foaki mai te maʼuli.

Ohage ko Liz, neʼe ʼohoana mo te tagata neʼe haʼele lelei tana gāue. ʼE ina fakamatala fēnei: “Neʼe ʼi ai tomā ʼapi matalelei pea mo tamā ʼu motokā e lua, pea ʼaki tamā paʼaga neʼe feala ai ke ma toʼo te ʼu koloā fuli ʼaē ʼe foaki mai e te mālama . . . ʼE lagi mata faikehe, kae neʼe kei ʼau tuʼania ʼo ʼuhiga mo te paʼaga.” ʼE ina fakamahino fēnei: “Neʼe lahi tamā ʼu meʼa neʼe feala ke kaihaʼa. ʼE hage ia, ka lahi takita ʼu koloā pea ʼe siʼisiʼi takita logo fīmālie.”

ʼE toe maʼuhiga lahi ki te tokolahi te ʼiloa pea mo te maʼu tuʼulaga, koteʼuhi ʼe vikiʼi pea mo fakaʼapaʼapaʼi ai nātou. ʼI te mālama ʼaenī ʼe holi e te hahaʼi ke nātou maʼu tuʼulaga ʼi te gāue. Kapau ʼe tou poto lelei ʼi te fai ʼo he meʼa, pea ʼe feala ke maʼuhiga ai totatou higoa. ʼE feala ke vikiʼi tatou e ʼihi, mo nātou faka maʼuhigaʼi lahi tatatou ʼu manatu, pea mo nātou faiga ke tou leleiʼia nātou. Ko te ʼu meʼa fuli ʼaia ʼe fakafiafia. Kae ki muli age, ʼe vaʼiganoa. Neʼe maʼu e Salomone te kolōlia pea mo te mālohi katoa ʼaē ʼe feala ke maʼu e he hau, kae neʼe meo fēnei: “ ʼE mole lahi age te manatuʼi ʼo ia ʼaē ʼe poto ia ia ʼaē ʼe vale . . . ʼE galoʼi moʼoni ia nātou fuli.” (Tagata Tānaki 2:16) ʼE mole tou maʼu te maʼuli ʼaki te ʼiloa pea mo te maʼu tuʼulaga.

Ko Celo, te tagata togi maka, neʼe ina leleiʼia te meʼa neʼe maʼuhiga age ʼi te ʼiloa. Neʼe poto ʼi te gāue ʼaia, koia neʼe feala ke ina muliʼi te ako moʼo fakatuputupu ʼo tona poto ʼaia. Mole tuai, pea neʼe vikiʼi tana gāue e te ʼu sulunale pea mo te hahaʼi ʼaē ʼe nātou sivi te gāue matalelei ʼaia. Neʼe lahi tana ʼu gāue neʼe fakahāhā ʼi te ʼu kolo lalahi ʼo Eulopa. ʼE fakamatala fēnei e Celo: “ ʼE ʼau fakamoʼoni neʼe ʼi ai te temi neʼe maʼuhiga tāfito taku gāue ʼi toku maʼuli. Kae neʼe mahino leva kia ʼau, kapau ʼe ʼau haga hoko atu taku gāue ʼaia pea neʼe hage pe neʼe ʼau faiga ke ʼau tauhi kia pule e lua. (Mateo 6:24) Neʼe ʼau tui papau ko te meʼa maʼuhiga ʼaē neʼe feala ke ʼau fai neʼe ko te faka mafola ʼo te logo lelei ʼo te Puleʼaga ʼa te ʼAtua. Koia neʼe ʼau fakatotonu ai ke ʼau tuku taku gāue togi maka.”

Koteā ʼAē ʼe Maʼuhiga Tāfito?

Mai tona ʼaluʼaga ʼaē ʼe mole maʼuhiga he meʼa mo kapau ʼe mole tou maʼuʼuli, koteā ʼaē ʼe feala ke tou maʼu ke feala hatatou maʼuʼuli ai? Ko te maʼuli fuli ʼe haʼu mai ia Sehova ʼAtua. (Pesalemo 36:9) Koia “ ʼe tou maʼu te maʼuli mai ia te ia pea mai ia te ia ʼe tou gaūgaūe.” (Gaue 17:28, MN ) ʼE ina foaki te meʼa ʼofa ʼaē ko te maʼuli heʼegata kia nātou ʼaē ʼe ʼofa ai. (Loma 6:23) Koteā ʼaē ʼe tonu ke tou fai ke ina foaki mai te meʼa ʼofa ʼaia?

Ke tou maʼu te meʼa ʼofa ʼaē ko te maʼuli heʼegata, ʼe tonu ke tou felogoi lelei mo Sehova. Koia ʼe mole he tahi meʼa ʼe maʼuhiga age ʼi tona ʼofa. Kapau ʼe tou maʼu tona ʼofa, pea ʼe tou maʼu te ʼamanaki ki he fiafia lahi pea mo heʼegata. Kae kapau ʼe mole tou maʼu te ʼofa ʼo te ʼAtua pea ʼe hoko anai kia tatou te mate heʼegata. Koia ʼe maʼuhiga ʼaupito kia tatou ia meʼa fuli pe ʼaē ka tokoni mai anai ke tou felogoi lelei mo Sehova.

Te Meʼa ʼAē ʼe Tonu Ke Tou Fai

ʼE fakalogo te lelei ʼo totatou maʼuli ki te ʼatamai mālama ʼaē ʼe tou maʼu. Ko te matapuna ʼo te ʼatamai mālama totonu ʼe ko te Folafola ʼa Sehova, te Tohi-Tapu. ʼE ko te tohi pe ʼaia ʼe tahi ʼaē ʼe ina ʼui mai te meʼa ʼaē ʼe tonu ke tou fai moʼo fakafiafia te ʼAtua. Koia ʼe ʼaoga ai ke tou ako fakalelei te Tohi-Tapu. Kapau ʼe tou faiga mālohi ke tou ako lahi ʼo ʼuhiga mo Sehova ʼAtua pea mo Sesu Kilisito, pea ʼe tou maʼu anai te ‘ ʼatamai mālama ʼaē ʼe faka ʼuhiga ki te maʼuli heʼegata.’ (Soane 17:3) Ko te ʼatamai mālama ʼaia ʼe ko he koloā ʼe tonu ke tou taupau fakalelei!—Tāʼaga Lea 2:1-5.

ʼAki te ʼatamai mālama ʼaē ʼe tou maʼu ʼi te Folafola ʼa te ʼAtua, ʼe feala ai ke tou tui kia Sesu Kilisito. Neʼe fakatotonu e Sehova ko nātou fuli ʼaē ʼe nātou faikole kia te ia, ʼe tonu ke nātou fai ʼaki ia Sesu. (Soane 14:6) ʼE moʼoni, “e mole mau te mauli heegata i he tahiʼage.” (Gaue 4:12) Ko totatou hāofaki ʼe mole fakalogo ia ki ‘te paʼaga peʼe ki te aulo . . . kae ki te taʼataʼa maʼuhiga ʼa Kilisito.’ (1 Petelo 1:18, 19) ʼE tonu ke tou fakahā ʼe tou tui ki te ʼu akonaki ʼa Sesu pea mo tou mulimuli ki tana faʼifaʼitaki. (Hepeleo 12:1-3; 1 Petelo 2:21) Pea ʼe maʼuhiga ʼaupito tana sakilifisio! Ko te ʼu lelei ʼaē ʼe tou maʼu mai te sakilifisio ʼaia ʼe ina fakahā mai te ka haʼu heʼegata ʼaē ka maʼu e te malamanei katoa. Ka fakahoko katoa te ʼu lelei ʼaia, pea ʼe foaki mai kia tatou te meʼa ʼofa maʼuhiga moʼoni ʼo te maʼuli heʼegata.—Soane 3:16.

Neʼe ʼui fēnei e Sesu: “E ke ofa anai ki te Aliki tou Atua mo tou loto katoa, mo tou laumalie katoa, pea mo tou atamai katoa.” (Mateo 22:37) Ko te ʼofa kia Sehova ko tona faka ʼuhiga ke “tou taupau tana u [“fakatotonu,” MN ].” (1 Soane 5:3) ʼE fakamaʼua mai e tana ʼu fakatotonu ke mole tou pipiki ki te ʼu meʼa ʼo te mālama, mo tou taupau maʼu te aga ʼaē ʼe tonu ke fai, pea mo tou nofo agatonu ʼo lagolago ki te ʼu gāue ʼo tona Puleʼaga. Kapau ʼe tou fai feiā, ʼe tou “fili [ai] te maʼuli” kae mole ko te mate. (Teutalonome 30:19) Kapau ʼe tou ‘fakaōvi ki te ʼAtua, pea ʼe fakaōvi mai anai kia tatou.’—Sakopo 4:8.

Ko te ʼiloʼi papau ʼaē ʼe tou maʼu te ʼofa ʼo te ʼAtua, ʼe maʼuhiga ʼaupito age ʼi te ʼu koloā fuli ʼo te malamanei. Ko nātou ʼaē ʼe nātou maʼu te ʼofa ʼaia ʼo te ʼAtua ʼe nātou koloaʼia age, ia nātou ʼaē ʼe maʼu meʼa ʼi te kele katoa! Koia, tou haga faiga ke tou maʼu te koloā ʼaē ʼe maʼuhiga moʼoni—te ʼofa ʼo Sehova. Koia, tou taupau te tokoni ʼaenī ʼa te ʼapositolo ko Paulo: “Tulikaki te faitotonu, te lotu mooni, te tui, te ofa, te kataki mo te agamalu. Tau mo te tau lelei o te tui, puke te mauli heegata.”—1 Timoteo 6:11, 12.

[Paki ʼo te pasina 21]

Koteā ʼaē ʼe maʼuhiga lahi kia koutou? Te paʼaga, te ʼu koloā, te ʼiloa ʼi te malamanei, peʼe ko he tahi age meʼa?

[Paki ʼo te pasina 23]

ʼE tonu ke tou ako fakalelei te Tohi-Tapu