Te ʼu Fehuʼi ʼa Te Kau Lautohi
Koteā tona faka ʼuhiga ke tou tauhi kia Sehova “ ʼaki te laumālie”?
ʼI tana fai faka mafola ki te fafine ʼo Samalia ʼaē neʼe haʼu ʼo ʼohu vai ʼi te vai keli ʼo Sakopo, ʼaē ʼe ōvi ki te kolo ʼo Sisale, neʼe ʼui fēnei e Sesu Kilisito: “Ko te ʼAtua ʼe laumālie, pea ko nātou ʼaē ʼe atolasio kia te ia, ʼe tonu ke nātou atolasio kia te ia ʼaki te laumālie pea mo te moʼoni.” (Soane 4:24, MN ) Ko te tauhi moʼoni ʼe tonu ke fai ‘ ʼaki te moʼoni’, ke ʼalutahi mo te meʼa ʼaē neʼe fakahā e Sehova ʼAtua ʼi te Tohi-Tapu ʼo ʼuhiga mo ia pea mo tana ʼu fakatuʼutuʼu. ʼE tou toe fai tatatou tauhi ki te ʼAtua ʼaki he lototoʼa, peʼe tou fai ʼaki he loto faʼafai, heʼe uga tatou e he loto ʼe fonu ʼi te ʼofa pea mo te tui. (Tito 2:14) Kae ko te ʼu palalau ʼaē ʼe fai e Sesu ʼi muʼa atu ʼo ʼuhiga mo te ‘atolasio ki te ʼAtua ʼaki te laumālie,’ ʼe mole faka ʼuhiga pe ia ki te faʼahiga loto ʼaē ʼe tonu ke tou maʼu moʼo tauhi kia Sehova.
Ko te fai palalau ʼa Sesu mo te fafine ʼi te vai keli neʼe mole faka ʼuhiga ki te maʼu peʼe ko te mole maʼu ʼo he loto faʼafai ʼi te tauhi. Māʼiape la mo te tauhi hala ʼe feala ke fai ʼaki he loto faʼafai pea mo fai fakamalotoloto. ʼI tana ʼosi ʼui ʼaē ko te tauhi ki te Tāmai ʼe mole fai anai ʼi he ʼu koga meʼa, ohage ko te moʼuga ʼi Samalia peʼe ʼi te fale lotu ʼi Selusalemi, neʼe fakahā lelei e Sesu te faʼahiga tauhi foʼou ʼaē ʼe fakatafito ki te ʼuhiga moʼoni ʼo te ʼAtua. (Soane 4:21) Neʼe ina ʼui fēnei: “Ko te Atua e laumalie.” (Soane 4:24) Ko te ʼAtua moʼoni ʼe mole hona sino kakano pea ʼe mole feala ke tou sio peʼe tou fāfā kia te ia. Ko te tauhi ʼaē kia te Ia ʼe mole fai ʼi he fale lotu peʼe ko he moʼuga. Koia neʼe manatu ia Sesu ki te tauhi ʼe mole gata ʼaki pe te ʼu meʼa ʼaē ʼe tou sio kiai.
Ko te tauhi lelei ʼe fai ʼaki te moʼoni pea ʼe toe tonu foki ke takitaki e te laumālie maʼoniʼoni—te mālohi gāue pea mo fakapulipuli ʼa te ʼAtua. Neʼe tohi fēnei e te ʼapositolo ko Paulo: “Heʼe ko te laumālie [maʼoniʼoni] ʼe ina sivisivi ia meʼa fuli, māʼiape la mo te ʼu meʼa loloto ʼa te ʼAtua.” Neʼe ina toe ʼui fēnei: “Neʼe tou maʼu, ʼe mole ko te manatu ia ʼo te mālama ʼaenī, kae ko te laumālie ʼaē ʼe haʼu mai te ʼAtua, ke feala hatatou ʼiloʼi te ʼu meʼa ʼaē neʼe loto lelei te ʼAtua ke ina foaki mai.” (1 Kolonito 2:8-12, MN ) Ke tali e te ʼAtua tatatou tauhi, ʼe tonu ke tou maʼu tona laumālie pea ke ina takitaki tatou. Tahi ʼaē meʼa, ʼe maʼuhiga ke ʼalutahi tatatou faʼahiga manatu mo te laumālie ʼo te ʼAtua, ʼo tou ako pea mo maʼuliʼi tana Folafola.
[Paki ʼo te pasina 28]
Tou tauhi ki te ʼAtua “ ʼaki te laumālie pea mo te moʼoni”