ʼE ʼi Ai Koa He Falalaʼaga Ki He Hāofaki?
Kua fakahigoaʼi te ʼuafulu sēkulō ko te sēkulō ʼaē kua lahi ʼaupito ai te ligi toto. ʼI te ʼu taʼu e hogofulu ʼaenī kua hili, kua tuputupu te fai fakapō, te ʼu tau, te ʼu fihi fakalanu, te fakaʼaogaʼi ʼo te toloke, te aga kākā, pea mo te ʼu mamahi. ʼE toe hilifaki kiai te lotomamahi pea mo te ʼu mamahi ʼaē ʼe hoko ʼuhi ko te mahaki, mo te matutuʼa, pea mo te mate. Ko ai koa ʼaē ʼe mole fakaʼamu ki he faka ʼāteaina mai te ʼu fihifihia lahi ʼaupito ʼaia ʼaē ʼe hoko ʼi te malamanei? ʼI tatatou sio ki te ka haʼu, ʼe ʼi ai koa he falalaʼaga ki te maʼuli?
TOU vakaʼi te meʼa neʼe hā ki te ʼapositolo ko Soane kua hili nei kiai taʼu e 2 000. Neʼe ina tohi fēnei: “Koʼeni! Ko te fale fehikitaki ʼo te ʼAtua ʼe nofo mo te hahaʼi, pea ʼe nofo anai mo nātou, pea ʼe nātou liliu anai ko tana ʼu hahaʼi. Pea ko te ʼAtua totonu ʼe nofo anai mo nātou. Pea ʼe ina holoholoʼi anai te ʼu loʼimata fuli pe ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he kekē, he mamahi. Ko te ʼu meʼa ʼāfea kua puli ia.” (Apokalipesi 21:3, 4, MN ) Neʼe toe fakakikite e te polofeta ko Isaia te meʼa feiā: “ ʼE ina fakaʼauha moʼoni anai te mate ʼo talu ai, pea ʼe mahino papau ia, ko te Tuʼi ʼAliki ko Sehova ʼe ina holoholoʼi anai te ʼu loʼimata ʼi te ʼu fofoga fuli pe. Pea ʼe ina toʼo anai te lainoa ʼa tana hahaʼi ʼi te kele katoa, he neʼe ʼui totonu e Sehova.”—Isaia 25:8.
Koutou fakakaukauʼi age muʼa peʼe feafeaʼi anai mo kapau ʼe fakahoko e te ʼAtua tana ʼu fakapapau! ʼE faka ʼāteaina anai te malamanei mai te mamahi pea mo te agamālohi. Tatau aipe mo te mahaki, mo te matutuʼa pea mo te mate ʼe mole nātou toe fakamamahiʼi anai tatou! ʼE fakapapau mai e te Folafola ʼa te ʼAtua ia te Tohi-Tapu, ʼe tou maʼu anai te maʼuli heʼegata ʼi te ʼu ʼaluʼaga lelei ʼi te kele. (Luka 23:43; Soane 17:3) Pea ʼe lava maʼu e te hahaʼi fuli ʼaē ʼe nātou fakaʼamu kiai. “ ʼE loto [e te ʼAtua] ke hāofaki te faʼahiga tagata fuli pe, pea ke nātou maʼu te ʼatamai mālama totonu ʼo te moʼoni.”—1 Timoteo 2:3, 4, MN.
Kae ke kita maʼu te ʼu fakapapau ʼa te ʼAtua, ʼe tonu ke tou mahino ki te tuʼulaga ʼo Sesu Kilisito ʼo ʼuhiga mo totatou hāofaki pea mo tou haga tui kia te ia. Neʼe ʼui fēnei e Sesu ʼo ʼuhiga mo ia totonu: “Nee ofa lahi te Atua ki te malama-nei, ko te tupuaga aia o tana foaki mai tona Alo Ulutokotahi, ke aua naa mate ia natou fuape e tui kia te ia, kae ke natou maù te mauli heegata.” (Soane 3:16) ʼO ʼuhiga mo te tuʼulaga tāfito ʼo Sesu Kilisito ki te faʼahi ʼaia, neʼe ʼui fēnei e te ʼapositolo ko Petelo: “E mole mau te mauli heegata i he tahiʼage, koteuhi e mole he tahiʼage higoa nee kua foaki ki te tagata i te lalo lagi e tonu ke fakamauli ai tatou.” (Gaue 4:12) Neʼe fakaloto mālohiʼi e te ʼapositolo ko Paulo pea mo tona kaugā gāue ko Silasi ia te tagata, ʼo nā ʼui fēnei age: “Ke ke tui ki te Aliki Sesu, pea e ke mauli anai mo tou kauga api katoa.”—Gaue 16:30, 31.
Ei, ko Sesu Kilisito ʼe ko te “Tupuaga o te mauli,” pea ʼe hoki maʼu pe te maʼuli ʼaki ia ia. (Gaue 3:15) Kae ʼe lava feafeaʼi ki he tahi ke ina hāofaki tatou? Kapau ʼe tou mahino lelei ki te tuʼulaga ʼo Sesu ʼi te faʼahi ʼaia, pea ʼe ina fakaloto mālohiʼi anai tatatou falala ʼaē ki he hāofaki.
[Haʼuʼaga ʼo te paki pasina 2]
Page 3: Bombers: USAF photo; starving children: UNITED NATIONS/J. FRAND; burning battleship: U.S. Navy photo