E Feafeaʼi Takotou Aga ʼo ʼUhiga Mo Te Malualoi?

ʼI TE ʼōloto ʼo Setesemane, neʼe haʼu ia Sutasi Isikaliote kia Sesu pea neʼe “fekita kia te ia.” Neʼe ko te agamāhani ʼaia ʼa te hahaʼi moʼo fakahā tonatou ʼofa. Kae neʼe ko te aga kākā ʼaia neʼe fai e Sutasi moʼo fakahā pe ko ai ia Sesu kia nātou ʼaē neʼe ʼōmai ʼi te po ʼaia moʼona puke. (Mateo 26:48, 49) Ko Sutasi neʼe ko he tahi neʼe malualoi—ko he tahi neʼe mole ina fakahā ki tuʼa tona ʼuhiga moʼoni, neʼe ina fufū tana ʼu manatu kovi ʼaki he ʼu aga lelei. Ko te kupu faka Keleka ʼaē neʼe fakaliliu ʼaki te kupu “malualoi,” ʼe faka ʼuhiga ki “he tahi ʼe fai hana tali” pea ʼe toe faka ʼuhiga ki he tahi ʼe gaoʼi ʼi he théâtre. ʼI te ʼalu ʼo te temi, neʼe faka ʼuhiga leva te kupu ʼaia ki he tahi ʼe aga fakakākā ki te hahaʼi.

E feafeaʼi takotou aga ʼo ʼuhiga mo te malualoi? Ohage la, ʼe koutou ʼiʼita koa mokā koutou sio ki te hahaʼi faʼu sikaleti ʼe nātou fakaloto mālohiʼi ia te hahaʼi ke nātou suluka, kae ʼe fakahā lelei e te ʼu tōketā ʼe kovi te ʼu meʼa ʼaia? ʼE koutou ʼiʼita koa ki te malualoi ʼo nātou ʼaē ʼe nātou gaohi koviʼi te hahaʼi ʼaē ʼe nātou taupau? ʼE koutou lotomamahi koa mokā neʼe kākāʼi koutou ʼe tokotou kaumeʼa ʼaē neʼe koutou falala ki ai? Koteā takotou manatu ʼo ʼuhiga mo te malualoi faka lotu?

“Malaʼia Ia Koutou . . . Malualoi!”

Koutou tokagaʼi te ʼaluʼaga faka lotu ʼi te temi ʼaē neʼe maʼuli ai Sesu ʼi te kele. Neʼe lau e te kau sekelipa pea mo te kau Faliseo ko nātou ko he kau faiako agatonu ʼo te Lao ʼa te ʼAtua, kae ʼi tona ʼuhiga moʼoni, neʼe nātou fakafonu te ʼatamai ʼo te hahaʼi ʼaki te ʼu akonaki fakatagata, neʼe nātou fakamamaʼo ia nātou mai te ʼAtua. Neʼe fakakinauʼi e te kau sekelipa pea mo te kau Faliseo ke mulimuli fakalelei te hahaʼi ki te lao, kae neʼe nātou tuku keheʼi te ʼu pelesepeto maʼuhiga ohage ko te ʼofa pea mo te loto manavaʼofa. Ia muʼa ʼo te hahaʼi neʼe nātou fakahā ʼe nātou tauhi fakamalotoloto ki te ʼAtua, kae ʼi tanatou tō ʼāteaina neʼe nātou fonu ʼi te agakovi. Neʼe mole ʼalutahi tanatou ʼu palalau mo tanatou ʼu aga. Neʼe nātou fai tanatou ʼu gāue ke “sioʼi e te tagata.” Neʼe nātou hage ko “te u falemaka nee pena lahe; io, e matalelei i tua, kae i loto e fonu ko te hui o te u manafa pea mo mea uli kehekehe fuape.” ʼI tana fakahā ʼaki he lototoʼa tanatou malualoi, neʼe ʼui liuliuga fēnei e Sesu kia nātou: “Malaia ia koutou Sekelipa mo koutou Faliseo, malualoi!”—Mateo 23:5, 13-31.

Kapau neʼe koutou maʼuʼuli ʼi te temi ʼaia, pea ohage ko te hahaʼi ʼaē neʼe fakamalotoloto, neʼe lagi fakalialia kia koutou te taʼi malualoi faka lotu ʼaia. (Loma 2:21-24; 2 Petelo 2:1-3) Kae ʼi takotou ʼita ʼaia ʼi te malualoi ʼa te kau sekelipa pea mo te kau Faliseo, neʼe feala koa hakotou fakafisi ki te ʼu lotu fuli pe, ʼo kau kiai mo te lotu ʼaē neʼe akoʼi pea mo kau ai ia Sesu Kilisito pea mo tana ʼu tisipulo? Neʼe mole feala koa ke fua kovi kia koutou takotou fakafisi ʼaia?

Ko te aga malualoi ʼa te hahaʼi lotu ʼe lagi fakalialia kia tatou, ʼo mole tou fia logo ki he meʼa ʼo ʼuhiga mo te lotu. Kae ko te aga ʼaia ʼe ina tāʼofi anai tatou ke mole tou tokagaʼi te kau atolasio moʼoni pea mo fakamalotoloto. ʼI tona fakahagatonu, ko tatatou puipui ia tatou mai te malualoi ʼe feala ke ina fakamamaʼo tatou mai he ʼu fakakaumeʼa lelei. Koia, ko tatatou aga ʼo ʼuhiga mo te malualoi ʼe tonu ke fakapotopoto pea mo fakafuafua lelei.

“Ke ʼAla ʼOkotou Mata”

ʼUluaki, ʼe tonu ke tou ako ke tou ʼiloʼi pe ko ai te kau malualoi. ʼE mole faigafua tuʼumaʼu te faʼahi ʼaia. Neʼe hoko te faʼahi ʼaia ki te famili, pea neʼe fua kovi ʼaupito kia nātou. Ko te faʼe neʼe ʼi te koma. Neʼe ʼave e te famili ʼaia te lopitali ki te telepinale he neʼe ʼi ai tanatou hala, pea neʼe totogi e te famili te avoka ʼaē neʼe ko te tagata fai faka mafola ʼo tonatou ʼēkelesia. Logola neʼe totogi leva e te lopitali ia tola e 3, 4 miliona, kae neʼe ʼāsili kovi te tuʼutāmaki ʼaē neʼe hoko ki te famili ʼaia. Neʼe mate masiva te faʼe, pea neʼe mole he falā moʼo totogi tona ʼavaifo. Koteā tona tupuʼaga? Koteʼuhi neʼe lahi te falā ʼaē neʼe kaihaʼa e te avoka. ʼO ʼuhiga mo te avoka ʼaia, neʼe ʼui fēnei e te sulunale ʼo te lao: “Kapau neʼe ina faka mafola te taʼi aga ʼaia neʼe ina fai . . . pea neʼe ko te meʼa pe ʼaenī neʼe tonu ke tou fai: ke tou faikole.” ʼE tou lava hāo feafeaʼi mai te faʼahiga hahaʼi feiā?

“Ke ʼala ʼokotou mata,” neʼe ko te fakatokaga ʼaia ʼa Sesu neʼe ina fai ʼi tona temi kia nātou ʼaē neʼe hoko kiai te malualoi faka lotu. (Mateo 16:6, MN; Luka 12:1) Ei, ʼe tonu ke tou nofo tokaga. ʼE feala ke tala e te hahaʼi he ʼu manatu ʼe lelei ʼaupito pea mo fakamalotoloto, kae ʼe tonu ke tou nofo tokaga pea mo ʼaua naʼa tou tali he tahi ʼe hage ʼe agalelei. ʼE mole tou vakavakaʼi anai koa tatatou paʼaga ʼi te fale paʼaga mo kapau ʼe tou ʼiloʼi neʼe ʼi ai te ʼu aga kākā neʼe hoko?

Neʼe ʼi ai mo te kau malualoi ʼi te loto kokelekasio faka Kilisitiano moʼoni. Neʼe fakatokaga e te tisipulo ko Suta ʼo ʼuhiga mo nātou ʼaia, ʼo ina ʼui fēnei: “Ko nātou ʼaia ʼi takotou ʼu kaitahi ʼo te ʼofa, ʼe ko te ʼu maka ʼe ū ʼi te lalo vai, ʼe nātou kakai mo koutou, ko he ʼu tagata tauhi ōvi ʼe nātou fafaga pe ia nātou totonu ʼo mole nātou matataku; ko he ʼu ʼao magemage, ʼe faka viligia e te ʼu lau matagi, ko te vao ʼakau ʼi te fakaʼosi ʼo te fasiga taʼu tō lau, ʼe mole honatou fua.”—Suta 12, MN.

Ko te ʼui ʼaē ke ‘ ʼala totatou ʼu mata’ ko tona faka ʼuhiga, ke mole kākāʼi tatou e he tahi ʼe ina ʼui ʼe ʼofa kae ʼi tona ʼuhiga moʼoni, ʼe tokaga pe ia kia ia totonu pea mo ina faka mafola he ʼu manatu ʼe mole tuʼu ʼi te Folafola ʼa te ʼAtua. Ohage ko he foʼi maka māsila ʼe ū ʼi te lalo tai ʼaē ʼe tokalelei, ko te faʼahiga hahaʼi ʼaia ʼe feala ke nātou fakatupu tūkia ʼi te faʼahi fakalaumālie ia ia ʼaē ʼe mole nofo tokaga. (1 Timoteo 1:19) Ko te tagata malualoi ʼe feala ke lahi te ʼu lelei ʼe ina fakapapauʼi ʼi te faʼahi fakalaumālie, kae ʼe liliu ia ko he ‘ ʼao magemage’—ʼe mole ina fakatō he ʼua. Ohage ko he fuʼu ʼakau ʼe mole hona ʼu fua, ko ʼaē ʼe kākā ʼe mole ina maʼu te ʼu fua moʼoni ʼo he Kilisitiano. (Mateo 7:15-20; Kalate 5:19-21) Ei, ʼe tonu ke tou nofo tokaga ki te ʼu hahaʼi kākā ʼaia. Kae ʼe mole tonu leva ke tou fai te faʼahi ʼaia ʼaki he mahalohalo fau ki te ʼu meʼa ʼaē ʼi te loto ʼo te hahaʼi.

“Tuku Takotou Fakamāu”

ʼI meʼa faigafua leva ki te hahaʼi agahala hanatou fakahā te ʼu hala ʼa ʼihi kae mole nātou tokagaʼi tanatou ʼu hala! Kapau ʼe tou maʼu te taʼi aga ʼaia pea ʼe faigafua hatatou tō ki te malualoi. Neʼe ʼui fēnei e Sesu: “Malualoi! Toʼo muʼa te lalago ʼi tou mata, pea hoki ke sio lelei ai leva ke ke toʼo ia te mohuku mai te mata ʼo tou tēhina.” ʼE lelei ke tou mulimuli ki tana tokoni ʼaenī: “Tuku takotou fakamāu, koteʼuhi ke ʼaua naʼa fakamāuʼi koutou; heʼe fakamāuʼi anai koutou ʼaki te fakamāu ʼaē ʼe koutou fakamāuʼi ʼaki . . . He koʼe ia ʼe ke sioʼi koe te mohuku ʼaē ʼe ʼi te mata ʼo tou tēhina, ka mole ke tokaga koe ki te lalago ʼaē ʼe ʼi tou mata ʼo koe?”—Mateo 7:1-5, MN.

Kapau ʼi ʼihi temi ʼe hage kia tatou ʼe fai e ʼihi he ʼu meʼa faka malualoi, pea ke tou tokaga naʼa tou foimo fakahigoaʼi nātou ko he kau malualoi. Ohage la ko te ʼapositolo ko Petelo, “nee fakamamao ia o nofo kehe” mai te kau tisipulo Senitile ʼo Atiokia, ke leleiʼia ia ia e te hahaʼi Sutea mai Selusalemi. Ko Palenapasi ‘neʼe ina toe muliʼi ia Petelo pea mo te toe o te kau Sutea ʼi tanatou malualoi.’ Neʼe fai e Petelo te aga ʼaia logola neʼe ina maʼu te pilivilesio ʼaē ke ina ʼuluaki tali te kau Senitile ki te kokelekasio faka Kilisitiano.’ (Kalate 2:11-14; Gaue 10:24-28, 34, 35) Kae ko te kiʼi hala ʼaia ʼa Palenapasi pea mo Petelo neʼe mole nā kau ai leva ki te faʼahiga hahaʼi ohage ko te kau sekelipa pea mo te kau Faliseo peʼe ko Sutasi Isikaliote.

“Ke ʼAua Naʼa Malualoi Tokotou ʼOfa”

Neʼe fakatotonu fēnei e Sesu: “Ka ke fai leva he meʼa lelei ki te hahaʼi, ʼaua naʼa ke fakatagi he fakatagi ʼi ʼou muʼa—ohage ko nātou ʼaē ʼe nātou fai kākā ʼi te ʼu sinakoka mo te ʼu ala, ke vikiʼi nātou e te hahaʼi.” (Mateo 6:2, Phillips) Neʼe tohi fēnei e te ʼapositolo ko Paulo: “Ke ʼaua naʼa malualoi tokotou ʼofa.” (Loma 12:9, MN ) Neʼe ina fakaloto mālohiʼi te tūpulaga ko Timoteo ke ina maʼu “te ofa mai he loto maʼa . . . pea mo he tui e mole lohi.” (1 Timoteo 1:5) Kapau ʼe moʼoni totatou ʼofa pea mo tatatou tui—ʼaē neʼe mole ʼulihi ʼaki te manatu pe ʼaē kia kita pea mo te kākā—pea ʼe falala anai te hahaʼi kia tatou. ʼE tou liliu moʼoni anai ko he fakaloto mālohi ki te hahaʼi. (Filipe 2:4; 1 Soane 3:17, 18; 4:20, 21) Pea ʼe tou maʼu tāfito anai te ʼofa ʼo Sehova.

ʼI te tahi age faʼahi, ko te aga malualoi ʼe liliu anai ko he tuʼutāmaki kia nātou ʼaē ʼe malualoi. Ki muli age, ʼe hā anai te aga malualoi ʼaia ia muʼa ʼo te hahaʼi. Neʼe ʼui fēnei e Sesu Kilisito: “Mole he mea e uʼufi, e mole anai hueʼi, pea e mole he mea e fufu, e mole anai fakailoilo.” (Mateo 10:26; Luka 12:2) Neʼe tala fēnei e te Hau poto ko Salomone: “Ko te ʼAtua moʼoni ʼe ina fakamāuʼi totonu anai te ʼu faʼahiga gāue fuli pe, ʼo ʼuhiga mo te ʼu meʼa fuli ʼaē ʼe ū, moʼo vakaʼi peʼe lelei peʼe kovi.”—Tagata Tānaki 12:14.

Koia, ʼe mole tou tuku anai te aga malualoi ʼa ʼihi ke ina tāʼofi tatou ke tou maʼu he ʼu kaumeʼa ʼe ʼoʼofa moʼoni. ʼE feala ke tou nofo tokaga kae ke mole tou liliu ʼo mahalohalo fau ʼo ʼuhiga mo te hahaʼi. Pea ke tou faiga mālohi ke mole malualoi totatou ʼofa pea mo tatatou tui.—Sakopo 3:17; 1 Petelo 1:22.

[Paki ʼo te pasina 22, 23]

Neʼe feala koa ke koutou tuku te malualoi ʼa te kau sekelipa pea mo te kau Faliseo ke koutou maliu kehe ai mai ia Sesu Kilisito pea mo tana kau tisipulo?