Koteā Takotou ʼu Pelesepeto?

ʼE KOUTOU mulimuli koa ki te ʼu pelesepeto? Peʼe koutou manatu ʼe mole kei ʼaoga te faʼahi ʼaia? Kua tou ʼiloʼi papau, ko te hahaʼi fuli ʼe mulimuli ki he ʼu faʼahiga pelesepeto, ʼo tahi fakafuafua te potu ʼe maʼuhiga kia ia. ʼE ʼui fēnei e te tikisionalio, The New Shorter Oxford English Dictionary, ʼe feala pe ke ʼui ko he pelesepeto ʼe ko he “lekula ʼa kita tokotahi ʼo ʼuhiga mo te aga ʼaē ʼe lelei.” Ko te ʼu pelesepeto ʼe nātou takitaki te ʼu tonu ʼaē ʼe tou fai pea mo fakafuafua te faʼahiga ala ʼe tonu ke tou mulimuli kiai. ʼE hage pe te ʼu pelesepeto ko he kāpasā.

Ohage la, neʼe uga e Sesu tana kau tisipulo ke nātou taupau te Lekula Aulo, ʼaē ʼe tuʼu ia Mateo 7:12: “Koia, ko meafuape e koutou fakaamuʼage ke fai kia koutou e te hahai, pea koutou fai feia’pe kia natou.” Ko te ʼu tisipulo ʼa Confucius ʼe nātou mulimuli ki te ʼu pelesepeto ʼo te li mo te ren, ʼaē ʼe maʼu ai te ʼu kalitate ohage ko te agalelei, te agavaivai, te fakaʼapaʼapa, mo te agatonu. Māʼia mo te hahaʼi ʼaē ʼe mole lotu ʼe takitaki tanatou aga e te ʼu faʼahiga lekula.

Koteā Te ʼu Faʼahiga Pelesepeto ʼe Tonu Ke Tou Filifili?

Kae ʼe lelei ke tou manatuʼi ʼe ʼi ai te ʼu pelesepeto ʼe lelei pea ʼe ʼi ai te ʼu pelesepeto ʼe kovi. Ohage la, kua kaugamālie te hahaʼi ʼe uga nātou e te faʼahiga maʼuli ʼo te ʼu taʼu fakamuli ʼaenī e hogofulu, ʼaē ko te manatu muʼa kia kita. Logope ʼe lagi tokolahi te hahaʼi ʼaē ʼe nātou ʼui ʼe mole nātou feiā, kae ko te tahi manatu pe kia kita ʼe ko he pelesepeto, pea ko te aga ʼaia ʼe maʼu e te tokolahi heʼe nātou līaki te ʼu aga ʼaē ʼe lelei. Peʼe ko he kupu ʼe tou mahino gafua kiai peʼe kailoa, kae ko te tahi manatu pe kia kita ʼe ko he faʼahiga aga ʼe mole kita tokagaʼi ai te hahaʼi, kae ʼe tautau pipiki kiai te faiga fakavale ki te ʼu koloā. Neʼe ʼui fēnei e te tagata pule ʼo te fale televisio ʼi Siaina: “Ko ʼamatou pelesepeto e lua ʼe mātou mulimuli kiai. ʼUluaki, ko te foaki ʼo te meʼa ʼaē ʼe loto kiai te hahaʼi. Lua, ko te kumi paʼaga.”

ʼE hage te faʼahiga maʼuli ʼaia ko he manete. Pea koteā ʼaē ʼe hoko ki he kāpasā mokā fakaōvi kiai he manete? ʼE maliu kehe te hui pea ʼe mole kei ina fakahā te ala totonu. ʼO toe feiā pe, ʼe feala ki te manatu pe kia kita, ke fakatupu kovi ki te faʼahiga aga lelei ʼa he tahi, ʼo ina ʼuluaki fakahoko muʼa tona ʼu holi, kae ina tuku ki muli te aga ʼaē ʼe lelei.

ʼE koutou punamaʼuli anai koa mo kapau ʼe ʼui atu ʼe mole ko he aga foʼou ʼaia? Ko te faʼahiga maʼuli ʼaia neʼe kamata ʼi te ʼōloto ʼo Eteni, ʼi te temi ʼaē neʼe lītuʼa ai tatatou ʼu ʼuluaki mātuʼa ki te faʼahiga takitaki neʼe tuku age e totatou Tupuʼaga. Neʼe nā fakaʼaogaʼi kovi te kāpasā ʼo tonā maʼuli. Mai te ʼaluʼaga ʼaē ʼe hifo fuli te hahaʼi mai ia Atama mo Eva, koia kua nātou maʼu te taʼi maʼuli ʼaia, ʼo fakahigoaʼi ʼi te temi nei ko te “manatu pe kia kita.”—Senesi 3:6-8, 12.

Kua mafola tāfito te faʼahiga aga ʼaia ʼi te temi ʼaē ʼe fakahigoaʼi e te lea faka polofeta ʼa te Tohi-Tapu ko “te ʼu ʼaho fakamuli,” ʼaē ʼe ko he ʼu “temi maʼuhiga ʼaupito mo faigataʼa.” Tokolahi te hahaʼi “ ʼe kaumeʼa pe anai mo nātou totonu.” Koia ʼe mole tou punamaʼuli ai ia te fakaneke ʼo tatou ke tou muliʼi te faʼahiga maʼuli ʼaia, ʼaē ko te tahi faiga muʼa kia kita.—2 Timoteo 3:1-5, MN.

ʼE lagi koutou manatu tahi mo te tūpulaga ko Olaf, ʼaē neʼe faitohi fēnei ki te filiale ʼa te kau Fakamoʼoni ʼa Sehova ʼi te fenua ʼo te Eulopa: “ ʼE faigataʼa ʼaupito ia te taupau ʼo he aga ʼe maʼa pea mo nofo agatonu, tāfito la kia mātou kau tūpulaga. Koia, koutou ʼofa ʼo toe fakamanatuʼi mai kia mātou ia te maʼuhiga ʼo te pipiki maʼu ki te ʼu pelesepeto ʼa te Tohi-Tapu.”

Neʼe sio mamaʼo ia Olaf. Peʼe tou tūpulaga peʼe kua tou matutuʼa, kae ʼe lava tokoni mai te ʼu pelesepeto fakaʼatua, ke tou taupau te ʼu faʼahiga aga lelei māʼoluga. ʼE nātou toe faka fealagia ai foki ke tou tekeʼi ia te tahi manatu pe muʼa kia kita. Kapau ʼe koutou fia ʼiloʼi peʼe feafeaʼi he lava tokoni ʼa te ʼu pelesepeto fakaʼatua kia koutou, koutou vakavakaʼi fakalelei te alatike ʼe hoa mai kiai.

[Paki ʼo te pasina 4]

ʼI te temi nei, tokolahi te hahaʼi ʼe mole kei nātou tokagaʼi te meʼa ʼaē ʼe ʼaoga ki tonatou tatau