He Takitaki Lelei—ʼE Tou Lava Maʼu ʼIfea?

ʼE ʼUI fēnei e te Tohi-Tapu: “Ko te api fuape e i ai tona tufuga, kae ko te tufuga o meafuape e ko te Atua.” (Hepeleo 3⁠:4; Apokalipesi 4⁠:11) Mai te ʼaluʼaga ʼaē ko te ʼAtua moʼoni, ia Sehova, “ ʼe ina ʼiloʼi lelei pe neʼe faʼu tatou ʼaki teā.” (Pesalemo 103⁠:14) ʼE ina ʼiloʼi katoa te ʼu meʼa ʼe ʼaoga kia tatou mo te ʼu meʼa ʼe faka tuʼakoi mai kia tatou. Pea mai te ʼaluʼaga ʼaē ko ia ko te ʼAtua ʼofa, ʼe ina fia foaki mai te ʼu meʼa ʼaia ʼe ʼaoga kia tatou. (Pesalemo 145⁠:16; 1 Soane 4⁠:⁠8) Ei, ʼe ʼaoga moʼoni kia tatou he takitaki lelei.

Neʼe tala fēnei e Sehova ʼaki ia Isaia: “Koʼeni! Neʼe ʼau foaki ia ia ko he fakamoʼoni ki te ʼu kūtuga faka puleʼaga, ko te takitaki pea mo te pule ki te ʼu kūtuga faka puleʼaga.” (Isaia 55⁠:⁠4) ʼO ʼuhiga mo te puleʼaki ki te faigataʼa ʼo te takitaki, ʼe maʼua muʼa ke ʼiloʼi te Tagata Takitaki ʼaia​—ʼaē neʼe fakanofo tonu e te Māʼoluga—​pea mo tali tana faʼahiga takitaki. Ko ai te Takitaki pea mo te Pule ʼaia neʼe fakakikite? Koteā tona ʼu fakamoʼoni ki tona ʼuhiga Takitaki? ʼE ina fai anai tana pule ʼaia ʼifea? Koteā ʼaē ʼe tonu ke tou fai ke ʼaoga kia tatou tana Takitaki?

ʼE Haʼu Te Takitaki ʼAē Neʼe Fakapapauʼi Mai

Kua hili nei kiai taʼu e 2 500, neʼe hā te ʼaselo ko Kapeliele ki te polofeta ko Taniela pea mo ina ʼui fēnei age: “ ʼE tonu ke ke ʼiloʼi pea mo ke mahino ʼe talu mai te palalau ʼaē ke toe fakafoʼou pea mo toe laga ia Selusalemi, ʼo aʼu kia Mesia ʼaē ko te Takitaki, ʼe ʼi ai anai vāhaʼa e fitu, pea mo vāhaʼa e onogofulu-ma-lua. ʼE toe liliu mai anai pea ʼe toe laga moʼoni anai, ʼaki ni malaʼe pea mo ni kanivo, kae ʼi he ʼu temi mamahi.”​—Taniela 9⁠:⁠25.

ʼE mahino ia, neʼe fakahā e te ʼaselo kia Taniela te temi totonu ʼaē ka haʼu ai te Takitaki ʼaē neʼe filifili e Sehova. Neʼe hoki hā te “Mesia te Takitaki” ʼi te fakaʼosi ʼo te ʼu vāhaʼa e 69, peʼe ko te ʼu taʼu e 483, ʼaē neʼe kamata mai te taʼu 455 ʼi muʼa ʼo totatou temi, ʼi te temi ʼaē neʼe fakatotonu ai ke toe laga ia Selusalemi.a (Nehemia 2⁠:​1-8) Koteā ʼaē neʼe hoko ʼi te fakaʼosi ʼo te temi ʼaia? ʼE fakamatala fēnei e te tagata faitohi Evaselio ko Luka: “I te hogofulu-ma-nima tau o te pule a Tipele Sesale, nee kovana ia Posio Pilato i Sutea, nee Tetalaka Helote i Kalilea [ʼi te taʼu 29 ʼo totatou temi], . . . nee fakahuʼu te folafola a te Atua kia Soane, alo o Sakalia, i te toafa. Pea nee alu i te fenua katoa o te Solotane o fagonogono he papitema o te fakahemala o uhiga mo te fakamolemole o te u agahala.” ʼI te temi ʼaia, “nee nofo te hahai mo amanaki” ki te Mesia ʼaē ko te Takitaki. (Luka 3⁠:​1-3, 15) Logope te ʼolo ʼa te hahaʼi kia Soane, kae neʼe mole ko ia te Tagata Takitaki.

ʼI te lagi māhina ʼo ʼOketopeli ʼo te taʼu 29 ʼo totatou temi, neʼe ʼalu age ia Sesu mai Nasaleti kia Soane ke papitemaʼi ia ia. Pea neʼe fakamoʼoni fēnei e Soane: “Nee au mamata ki te Laumalie, e hage he lupe, nee hifo ifo mai te lagi o nofo ia te ia. Pea mo au, nee mole au iloi ia, kae ko ia ae nee ina fekaui mai au ke au faipapitema i te vai, nee ina tala mai kia te au: ‘Ko te fuga ulu o ia ae e au sio anai ki te hifo ifo a te Laumalie o nofo ai, e ko ia ae e faipapitema i te Laumalie-Maonioni.’ Pea nee au mamata mo au fakamooni e ko ia te Alo o te Atua.” (Soane 1⁠:​32-34) ʼI tona papitema, neʼe liliu ai ia Sesu ko te Takitaki ʼaē neʼe fakanofo​—te Mesia, peʼe ko Kilisito.

Ei, ʼo mulimuli ki te fakapapau, ko te “takitaki pea mo te pule ki te ʼu kūtuga faka puleʼaga” neʼe ko Sesu Kilisito. Pea ka tou sivisivi tona ʼu kalitate ʼi tona ʼuhiga takitaki, ʼe tou mahino ai ko tana takitaki ʼe laka age ia ʼi te ʼu meʼa ʼaē ʼe fakamaʼua ʼi te temi nei ʼo ʼuhiga mo he takitaki lelei.

Te Mesia​—Ko He Takitaki Lelei

Ko he tagata takitaki lelei ʼe ina foaki he ʼu fakaʼaluʼalu lelei pea mo tokoni ki te hahaʼi ʼaē ʼe tokaga kiai, ke nātou toe mālolohi moʼo maʼu he puleʼaki ki ʼonatou ʼu fihifihia. ʼE ʼui fēnei e te tohi 21st Century Leadership: Dialogues With 100 Top Leaders: ‘ ʼE fakamaʼua ki he tagata takitaki ʼo te 21 sēkulō ke lelei tana takitaki.’ Neʼe teuteuʼi fakalelei e Sesu te hahaʼi ʼaē neʼe fagono kia te ia, ke nātou fakatokatoka tonatou ʼaluʼaga ʼo te ʼaho fuli! Koutou fakatokagaʼi age muʼa tana akonaki logona ʼaupito​—te Akonaki ʼi te Moʼuga. ʼE lahi ʼaupito te ʼu tokoni ʼaoga ʼe fakamatala ia Mateo kapite 5 ʼo aʼu ki te kapite 7.

Ohage la, koutou fakatokagaʼi age muʼa te tokoni ʼa Sesu ʼo ʼuhiga mo te fakatokatoka ʼo te ʼu fihifihia takitokotahi. Neʼe ina ʼui fēnei: “Koia, ka ke aumai hou molaga ki te aletale pea e ke manatui, e i ai he mea e fakafehagai ai tou tehina kia te koe. Tuku tou molaga i te mua aletale, alu mua o fakatokatoka mo tou tehina, pea ke haù o momoli tou molaga.” (Mateo 5⁠:​23, 24) Ko te ʼuluaki faʼahi ʼe tonu ke fai, ke foimo fakatokatoka tokita fihifihia mo te hahaʼi​—pea ʼe maʼuhiga age ʼi he maʼua faka lotu, ohage la ko te ʼave ʼo he ʼu mōlaga ki te aletale ʼo te fale lotu ohage ko tona fakamaʼua e te Lao ʼa Moisese. Kapau ʼe mole fai muʼa te koga ʼaia, pea ʼe mole tali anai e te ʼAtua te tauhi ʼaē ʼe fai age kia te ia. ʼE kei ʼaoga pe te tokoni ʼa Sesu ʼi te temi nei ohage pe ko tona ʼaoga ʼi te ʼu sēkulō kua hili.

Neʼe toe tokoni foki ia Sesu ki te hahaʼi ʼaē neʼe fakalogo kia ia, ke nātou fakamamaʼo mai te hele ʼo te ʼu aga heʼeʼaoga. Neʼe ina tokoniʼi fēnei nātou: “Neʼe koutou fagono neʼe ʼui fēnei: ‘ ʼAua naʼa ke tono.’ Kaʼe ʼau tala atu ʼau kia koutou, ko ʼaē ʼe ina haga sioʼi he fafine ʼo tupu ai hana holi ki ai, ʼe kua tono ia mo ia ʼi tona loto.’ ” (Mateo 5⁠:​27, 28, MN ) Ko he fakatokaga ʼe totonu! ʼAua naʼa tou tali he ʼu manatu ki he koga feiā naʼa faifai pe pea tou tono. Koteʼuhi neʼe ʼui e Sesu, ko te folonikasio pea mo te tono ʼe haʼu mai te loto. (Mateo 15⁠:​18, 19) Koia, tou fakapotopoto ʼo tou hāofaki totatou loto.​—Tāʼaga Lea 4⁠:⁠23.

ʼE maʼu ʼi te Akonaki ʼi te Moʼuga te ʼu tokoni lelei ʼo ʼuhiga mo te ʼofa ki totatou ʼu fili, mo te loto fia foaki, mo te maʼu ʼo te manatu fakapotopoto ki te ʼu meʼa fakasino mo te ʼu meʼa fakalaumālie, pea mo te tahi ʼu meʼa. (Mateo 5⁠:​43-47; 6⁠:​1-4, 19-21, 24-34) Neʼe toe fakahā e Sesu ki te hahaʼi peʼe feafeaʼi te kumi tokoni ki te ʼAtua, ʼo ina akoʼi age kia nātou ia te faʼahiga fai ʼo te faikole. (Mateo 6⁠:​9-13) Neʼe fakamālohiʼi pea mo teuteuʼi e te Mesia ʼaē ko te Takitaki tana kau tisipulo ke nātou lava kātakiʼi te ʼu fihifihia ʼaē ʼe tau mo te hahaʼi fuli.

ʼI tana Akonaki ʼi te Moʼuga, neʼe kamata e Sesu tana ʼu palalau ʼaki te ʼu kupu ʼaenī “neʼe koutou fagono neʼe ʼui fēnei” peʼe “neʼe toe ʼui fēnei foki,” pea neʼe ina fakahā ai te tahi manatu ʼo ina ʼui fēnei “kaʼe ʼau tala atu.” (Mateo 5⁠:​21, 22, 27, 28, 31-34, 38, 39, 43, 44, MN ) ʼE hā mai neʼe mulimuli te hahaʼi ki te faʼahiga maʼuli neʼe fakatafito ki te talatuku ʼa te kau Faliseo. Kae ʼi te temi nei kua fakahā age e Sesu te tahi faʼahiga maʼuli​—ko he faʼahiga maʼuli ʼe ina muliʼi lelei te Lao ʼa Moisese. Koia, kua fai e Sesu te fetogi, pea neʼe fai te fetogi ʼaia ke faigafua ki tana kau tisipulo hanatou tali. Ei, neʼe uga e Sesu ia te hahaʼi ke nātou fai he ʼu fetogi katoa ʼi tonatou maʼuli, ʼi te faʼahi fakalaumālie pea mo te aga ʼaē ʼe tonu ke fai. Neʼe ko he fakaʼiloga ʼaia ʼo he takitaki moʼoni.

ʼE fakahā e te tohi ʼe faigataʼa te fai ʼo he toe fetogi feiā. ʼE ʼui fēnei e te tohi ʼaia: “ ʼE tonu ki te tagata ʼaē ʼe ina fai te fetogi ʼaia [ia te tagata takitaki] ke liliu ko he tahi ʼe gāue moʼo tokoni ki te hahaʼi, mo sio mamaʼo ohage he tōketā ʼe tokaga ki te ʼu mahaki ʼulu, ko he tahi ʼe kātaki fualoa ohage ko he tagata lele mānava, ko he tahi ʼe mole vaivai gafua ohage ko te kuli ʼaē ko te bulldog, ko he tahi ʼe maʼuli faʼitaliha ohage ko he tahi ʼe nofo tokotahi, pea mo faʼa kātaki ohage he sagato. Pea tatau aipe peʼe ina maʼu te ʼu kalitate fuli ʼaia, kae ʼe mole faka ʼuhiga leva ʼe lelei anai tana takitaki.”

Neʼe ʼui e te alatike, ko tona kupu tāfito “ ‘Kau Takitaki: ʼE Koutou Fai Fakahagatonu Koa?,’ ʼe tonu ki te kau takitaki ke nātou fai te faʼahiga maʼuli ʼaē ʼe nātou loto ke mulimuli kiai tanatou hahaʼi fakalogo.” ʼI tona fakahagatonu, ko he tagata ʼe takitaki lelei ʼe ina maʼuliʼi te ʼu meʼa ʼaē ʼe palalau kiai. Pea neʼe feiā ia Sesu Kilisito! Ei, neʼe ina akoʼi ki te hahaʼi ʼaē neʼe nonofo mo ia ke nātou agavaivai, pea neʼe ina toe tuku age foki he faʼifaʼitaki lelei ʼi tana fufulu ʼonatou vaʼe. (Soane 13⁠:​5-15) Neʼe mole ina fekauʼi pe tana kau tisipulo ke nātou ʼolo ʼo faka mafola te logo lelei ʼo te Puleʼaga ʼo te ʼAtua, kae neʼe toe gāue mālohi foki mo ia ki te potu ʼaia. (Mateo 4⁠:​18-25; Luka 8⁠:​1-3; 9⁠:​1-6; 10⁠:​1-24; Soane 10⁠:​40-42) Pea ʼo ʼuhiga mo te faʼahi ʼo te takitaki, neʼe tuku e Sesu te faʼifaʼitaki. Neʼe ina ʼui fēnei ʼo ʼuhiga mo ia: “Ko te ʼAlo ʼe mole feala ke ina fai he meʼa ʼi tona loto faʼitaliha, kaʼe ʼe ina fai pe te meʼa ʼaē neʼe sio ʼe fai e te Tāmai.”​—Soane 5⁠:​19, MN.

Ko te ʼu meʼa ʼaē neʼe fai e Sesu pea mo tana ʼu akonaki, ʼe fakahā lelei mai ko ia ʼe ko he Takitaki lelei. ʼI tona fakahagatonu, ʼe laka age ʼi te ʼu fakamaʼua fakatagata ʼo ʼuhiga mo te takitaki lelei. Ko Sesu ʼe haohaoa. ʼI tana ʼosi maʼu te maʼuli tuputupua ʼi te hili ʼo tona mate pea mo tona fakatuʼuake, kua maʼuli ʼo heʼegata. (1 Petelo 3⁠:18; Apokalipesi 1⁠:​13-18) Ko ai te tagata takitaki ʼaē ʼe ina lava maʼu te ʼu kalitate ʼaia?

Koteā ʼAē ʼe Tonu Ke Tou Fai?

ʼI tona ʼuhiga Hau ʼo te Puleʼaga ʼo te ʼAtua, ʼe tuku ifo anai e te “Mesia ʼaē ko te Takitaki” te ʼu tapuakina ki te hahaʼi fakalogo. ʼO ʼuhiga mo te faʼahi ʼaia ʼe fakapapauʼi fēnei mai e te Tohi-Tapu: “ ʼE fonu moʼoni anai te kele ʼi te ʼatamai mālama ʼo ʼuhiga mo Sehova ohage ko te ʼuʼufi ʼo te tai e te ʼu vai.” (Isaia 11⁠:⁠9) “Ko te kau agavaivai ʼe nātou maʼu anai te kele, pea ʼe nātou fiafia moʼoni anai ʼi te mahu ʼo te tokalelei.” (Pesalemo 37⁠:11) “ ʼE nātou tahi heka anai ʼi tona lalo fuʼu vite pea mo tona lalo fuʼu fiku, pea ʼe mole ʼi ai anai he tahi ʼe ina fakamanavaheʼi ia nātou.” (Mikea 4⁠:⁠4) “Ko te ʼAtua totonu ʼe nofo anai mo nātou. Pea ʼe ina holoholoʼi anai te ʼu loʼimata fuli pe ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he kekē, he mamahi. Ko te ʼu meʼa ʼāfea kua puli ia.”​—Apokalipesi 21⁠:3, 4, MN.

Ko te malamanei ʼo te temi nei ʼe tau mo te fihifihia ʼo te takitaki. Kae ʼe lolotoga taki nei e Sesu Kilisito ia te kau agavaivai ki he mālama foʼou ʼe maʼu ai te tokalelei, ʼe fakatahi ai anai te hahaʼi fakalogo ʼi te tauhi kia Sehova ʼAtua pea ʼe nātou fakakaku anai ki te maʼuli haohaoa. Koia ʼe maʼuhiga ʼaupito ke tou toʼo he temi ke tou maʼu te ʼatamai mālama ʼo ʼuhiga mo te ʼAtua moʼoni pea mo te Takitaki ʼaē neʼe ina fakanofo, pea ke ʼalutahi totatou maʼuli pea mo te ʼatamai mālama ʼaia!​—Soane 17⁠:⁠3.

Kapau ʼe tou fia fakafetaʼi moʼoni ki he tahi, pea ʼe tou faʼifaʼitakiʼi ia ia. ʼE mole tonu koa la ke tou faigaʼi ke tou faʼifaʼitakiʼi te Takitaki lahi ʼaupito​—ʼaē ko Sesu Kilisito? ʼE tou lava fakahoko feafeaʼi te potu ʼaia? Kapau ʼe tou tali tana takitaki, koteā tona fua ki totatou maʼuli? ʼE hoki vakaʼi anai te ʼu fehuʼi ʼaia pea mo ʼihi atu ʼi te ʼu alatike e lua ʼe hoa mai kiai.

[Kiʼi nota]

[Paki ʼo te pasina 4]

Neʼe fakakikite e Taniela te haʼu ʼo te Takitaki ʼaē neʼe filifili e te ʼAtua

[Paki ʼo te pasina 7]

Ko te ʼu akonaki ʼa Sesu neʼe ina teuteuʼi te hahaʼi ki te tauʼi ʼo te ʼu fihifihia ʼo te maʼuli

[Paki ʼo te pasina 7]

ʼE taki anai e Sesu ia te hahaʼi fakalogo ki he mālama foʼou ʼe maʼu ai te tokalelei