Koutou Kumi Te ʼAtua ʼAki Tokotou Loto Pea Mo Tokotou ʼAtamai

Moʼo fakatuputupu he tui ʼe lelei ki te ʼAtua, ʼe fakaloto mālohiʼi e te lotu faka Kilisitiano moʼoni ke tou fakaʼaogaʼi totatou loto pea mo totatou ʼatamai.

HEʼE ko ia ʼaē neʼe ina fakatuʼu te lotu faka Kilisitiano, ia Sesu Kilisito, neʼe ina akoʼi mai ʼe tonu ke tou ʼofa ki te ʼAtua ʼaki totatou “atamai katoa,” ʼo hilifaki kiai mo totatou “loto katoa” pea mo totatou “laumalie katoa.” (Mateo 22⁠:37) Ei, ʼe maʼuhiga ke tou fakaʼaogaʼi totatou ʼu fealagia fakakaukau ki tatatou tauhi.

Ka fakaafe e Sesu te hahaʼi ke nātou fakakaukauʼi tana faiakonaki, neʼe ina tau ʼui fēnei age: “Kotea [takotou] manatu?” (Mateo 17⁠:25; 18⁠:12; 21⁠:28; 22⁠:42) ʼO toe feiā mo te ʼapositolo ko Petelo, neʼe faitohi ki tona ʼu kaugā gāue tui ke nātou ‘fakaʼalaʼala tonatou ʼu fealagia fakakaukau.’ (2 Petelo 3⁠:⁠1) Ko Paulo ia te ʼuluaki misionea ʼaē neʼe lahi ʼaupito tana feʼaluʼaki, neʼe ina fakaloto mālohiʼi te kau Kilisitiano ke nātou fakaʼaogaʼi tonatou “ ʼatamai” pea “ke . . . [nātou] ʼiloʼi papau pe koteā te finegalo ʼo te ʼAtua, tona lelei, tona tali lelei, pea mo tona haohaoa.” (Loma 12⁠:​1, 2, MN ) Kapau ʼe fai feiā te kau Kilisitiano, pea ʼe hoki feala ai ke nātou fakatupu he tui ʼe leleiʼia e te ʼAtua pea mo faka fealagia ai kia nātou ke nātou tauʼi tonatou ʼu fihifihia.​—Hepeleo 11⁠:​1, 6.

Moʼo tokoni ki te hahaʼi ke nātou fakatupu te taʼi tui ʼaia, ko te kau Kilisitiano ʼo te ʼuluaki sēkulō neʼe nātou “fakaʼaogaʼi te Tohi-Tapu moʼo uga [te hahaʼi] ke nātou fakakaukau, mo fakamahino pea mo fakamoʼoni” ki te ʼu meʼa ʼaē neʼe nātou akoʼi age. (Gaue 17⁠:​1-3, MN ) Ko te taʼi faʼahiga fai ʼaia, neʼe ina faka fealagia ai kia nātou ʼaē ʼe loto faitotonu ke nātou tali leleiʼi te logo. Ohage la, ko te hahaʼi tokolahi ʼi te kolo ʼo Masetonia pea mo Pelea neʼe nātou “tali fulipe te Folafola [ʼa te ʼAtua] mo te lotolelei, pea i te aho fuape nee natou vakaʼi i te Tohitapu, te mooni o mea aia [neʼe fakamahino age e Paulo pea mo tona ʼu kaugā fagona].” (Gaue 17⁠:11) Ko manatu e lua ʼe tonu ke tou tokagaʼi ʼi te vaega ʼaia. ʼUluaki, neʼe fia fakalogo te kau Pelea ki te Folafola ʼa te ʼAtua; lua, neʼe mole nātou hoko tali feiā pe, kae neʼe nātou vakaʼi ʼi te Tohi-Tapu peʼe moʼoni te ʼu meʼa ʼaē neʼe nātou logo kiai. Neʼe vikiʼi e te misionea ko Luka ia te kau Pelea ki te koga ʼaia, ʼo ina ʼui ko nātou neʼe nātou “lotolelei.” ʼE koutou maʼu koa te lotolelei ʼaia ʼo ʼuhiga mo te ʼu meʼa fakalaumālie?

Ko Te ʼAtamai Pea Mo Te Loto ʼe Nā Kaugā Gāue

Ohage ko tona fakahā ʼi muʼa atu, ʼe fakapipiki ki te tauhi moʼoni ia te ʼatamai pea mo te loto. (Maleko 12⁠:30) Koutou fakakaukauʼi age muʼa te faʼifaʼitaki ʼi te ʼuluaki alatike ʼo ʼuhiga mo te tagata fai pena ʼaē neʼe mole ina fakaʼaogaʼi te pena totonu moʼo pena ʼaki te ʼapi. Kanapaula neʼe fakalogo lelei ki te ʼu fakatotonu ʼo tona patolo, neʼe lagi feala pe ke ina fai tana gāue mo tona loto katoa pea mo falala ʼe leleiʼia anai tana gāue e te tagata ʼaē ʼo ʼona te ʼapi. ʼE feiā mo tatatou tauhi.

Neʼe ʼui fēnei e Sesu: “E atolasio anai ki te tamai te kau atolasio mooni, i te mooni mo te laumalie.” (Soane 4⁠:23) Koia neʼe tohi fēnei ai e Paulo: “Ko te tupuʼaga foki la ʼaia . . . neʼe mole tuku tamatou hūfakiʼi koutou pea mo kole ke koutou fonu ʼi te ʼatamai mālama totonu ʼo ʼuhiga mo tona finegalo, ʼaki te poto pea mo te mahino fakalaumālie, ke feala hakotou haʼele ʼi he ʼaluʼaga ʼe tau mo feʼauga mo Sehova, ke koutou lelei katoa kia te ia.” (Kolose 1⁠:​9, 10, MN ) Ko te taʼi “ ʼatamai mālama” ʼaia ʼe ina faka fealagia ki te hahaʼi fakamalotoloto ke nātou tauhi mo tonatou loto pea mo tonatou nefesi koteʼuhi ʼe nātou “atolasio kia ia ae e [nātou] iloi.”​—Soane 4⁠:⁠22.

Ko te ʼu tupuʼaga la ʼaia, ʼaē ʼe mole papitemaʼi ai e te kau Fakamoʼoni ʼa Sehova ia te tamaliki pea mo nātou ʼaē ʼe kei foʼofoʼou heʼe mole heʼeki nātou akoʼi fakalelei te Tohi-Tapu. Neʼe fakatotonu fēnei e Sesu ki tana kau tisipulo: “Koutou olo o fakahoko he u tisipulo i te atu puleaga, . . . koutou fakaʼako natou ki te taupau o meafuape nee au fakatotonu kia koutou.” (Mateo 28⁠:​19, 20) ʼE hoki fai e te kau ako fakamalotoloto ʼo te Tohi-Tapu he tonu ʼo ʼuhiga mo te tauhi, mo kapau kua nātou maʼu te ʼatamai mālama ʼo ʼuhiga mo te finegalo ʼo te ʼAtua. ʼE koutou faigaʼi koa ke koutou maʼu he ʼatamai mālama totonu feiā?

Tou Mahino Ki Te Faikole ʼa Te ʼAliki

Moʼo fakahā te kehekehe ʼo te maʼu ʼo he ʼatamai mālama totonu ʼo te Tohi-Tapu pea mo he faʼahiga mālama feiā pe, tou tokagaʼi age muʼa Te Tāmai ʼe ʼi selo, peʼe ko te Faikole ʼa te ʼAliki, ʼaē ʼe tuʼu ia Mateo 6⁠:​9-13.

Ko te lauʼi miliona hahaʼi ʼe nātou lau tuʼumaʼu te faikole ʼaia ʼa Sesu ʼi te ʼēkelesia. Kae neʼe feafeaʼi te akoʼi ʼo te faikole ʼaia ki te tokolahi, tāfito la te ʼuluaki koga ʼaē ʼe palalau ai ki te huafa ʼo te ʼAtua mo tona Puleʼaga? Neʼe kamata e Sesu te faikole ʼaki te koga ʼaia heʼe maʼuhiga ʼaupito.

ʼE kamata fēnei: “Ko tamatou Tamai e i selo, ke tapuha tou Huafa,” ko tona faka ʼuhiga ke fakaliliu ʼo maʼoniʼoni. Koutou tokagaʼi neʼe ʼui e Sesu ke tou faikole ke tāpuhā te huafa ʼo te ʼAtua. Ki te hahaʼi tokolahi, ko fehuʼi e lua ʼe malaga ai. ʼUluaki, ko ai te huafa ʼo te ʼAtua? Pea lua, he koʼe ʼe tonu ke tāpuhā?

ʼE lava maʼu ʼi te Tohi-Tapu te tali ki te ʼuluaki fehuʼi, heʼe tuʼa 7 000 tupu te fakaʼaogaʼi ʼo te huafa ʼaia ʼi te ʼu lea ʼuluaki ʼaē neʼe tohi ʼaki. ʼE tuʼu fēnei ia Pesalemo 83⁠:18: “Ke nātou ʼiloʼi ko koe, ʼaē ko tou huafa ko Sehova, ko koe tokotahi pe, te Māʼoluga ʼAupito ʼi te kele katoa.” ʼO ʼuhiga mo te huafa ʼo te ʼAtua, ʼaē ko Sehova, ʼe ʼui fēnei ia Ekesote 3⁠:15: “Koʼena toku huafa ʼo aʼu ki he ʼu temi ʼe mole ʼiloʼi hona gataʼaga, pea koʼena te fakamanatu kia te ʼau ʼi te tahi taʼiake ki te tahi taʼiake.”a Kae he koʼe ʼe tonu ke tāpuhā te huafa ʼo te ʼAtua, kae ʼe maʼa pea mo maʼoniʼoni? Koteʼuhi neʼe ʼulihi pea mo fai te ʼu fasituʼu kiai talu mai te tupu ʼo te tagata.

ʼI Eteni, neʼe ʼui age e te ʼAtua kia Atama mo Eva ʼe nā mamate anai mo kapau ʼe nā kai ki te fuaʼi ʼakau ʼaē neʼe tapuʼi. (Senesi 2⁠:17) Neʼe fakafeagai ia Satana ki te ʼAtua ʼi tana ʼui fēnei kia Eva: “ ʼE mole koulua mamate anai.” Neʼe tukugakoviʼi e Satana ia te ʼAtua ʼo ʼui ʼe loi ia. Kae neʼe mole gata ai; neʼe ina toe ʼulihi te huafa ʼo te ʼAtua, ʼo ina ʼui kia Eva ko te ʼAtua neʼe ina fufū age ki ai te ʼatamai mālama maʼuhiga. “Heʼe ʼiloʼi e te ʼAtua, ko te ʼaho pe ʼaē ʼe koulua kai anai [ki te fuʼu ʼakau ʼo te mālama ki te meʼa ʼaē ʼe lelei pea mo te meʼa ʼaē ʼe kovi], ʼe ava anai tokolua ʼu mata pea ʼe koulua hage anai ko te ʼAtua, ʼo ʼiloʼi te lelei pea mo te kovi.” Ko he toe fasituʼu!​—Senesi 3⁠:​4, 5.

ʼI tanā kai te fuaʼi ʼakau ʼaē neʼe tapuʼi, neʼe lagolago ia Atama mo Eva kia Satana. Peʼe nātou ʼiloʼi peʼe kailoa, kae ko te tokolahi ʼo te hahaʼi neʼe nātou lagolago ki te fakafihiʼi ʼaia, he neʼe nātou līaki te ʼu pelesepeto faitotonu ʼa te ʼAtua. (1 Soane 5⁠:19) ʼE fasituʼu te hahaʼi ki te ʼAtua ʼo nātou tukugakoviʼi ia ia ʼo ʼuhiga mo te ʼu mamahi ʼaē ʼe tau mo nātou​—tatau aipe pe neʼe tupu te ʼu mamahi ʼaia ʼuhi neʼe mole lelei tanatou ʼu tonu. ʼE ʼui fēnei ia Tāʼaga Lea 19⁠:3: “Ko te agavale ʼo te tagata ʼe ina fakapikopiko tona ala, pea ʼe ʼita ai ki te Aliki.” (The New English Bible) ʼE koutou tokagaʼi koa te tupuʼaga ʼo te faikole ʼa Sesu, ia ia ʼaē neʼe ʼofa moʼoni ki tana Tāmai, pea mo faikole ke tāpuhā Tona huafa?

“Ke Hoko Mai Tou Puleʼaga”

ʼI tana kole ke tāpuhā te huafa ʼo te ʼAtua, neʼe ʼui fēnei e Sesu: “Ke hoko mai tou puleʼaga. Ke fai tou finegalo ʼi te kele, ohage ko selo.” (Mateo 6⁠:​10, MN ) ʼO ʼuhiga mo te koga ʼaia, ʼe feala ke tou feʼekeʼaki: ‘Koteā koa te Puleʼaga ʼo te ʼAtua? Pea koteā te pikipikiga ʼo te haʼu ʼo te puleʼaga ʼaia mo te fakahoko ʼo te finegalo ʼo te ʼAtua ʼi te kele?’

ʼI te Tohi-Tapu, ko te kupu “puleʼaga” ʼe faka ʼuhiga tāfito ki he “takitaki ʼe fakahoko e he hau.” ʼE mahino mai, ko te Puleʼaga ʼo te ʼAtua ʼe faka ʼuhiga ki he takitaki, peʼe ko he puleʼaga, ʼe fakahoko e te ʼAtua ʼaki he hau neʼe ina filifili. Ko te Hau ʼaia ʼe ko Sesu Kilisito ʼaē kua fakatuʼuake​—ia te “Hau o te u hau, Aliki o te u aliki.” (Apokalipesi 19⁠:16; Taniela 7⁠:​13, 14) ʼO ʼuhiga mo te Puleʼaga faka Mesianike ʼa te ʼAtua ʼaē ʼe takitaki e Sesu Kilisito, neʼe tohi fēnei e te polofeta ko Taniela: “ ʼI te ʼu ʼaho ʼo te ʼu hau ʼaia [te ʼu puleʼaga fakatagata ʼaē ʼe pule ʼi te temi nei] ko te ʼAtua ʼo te lagi ʼe ina fakatuʼu anai he puleʼaga ʼe mole pulihi anai ʼi he temi. Pea ko te puleʼaga ʼaia ʼe mole tuku anai ki he tahi hahaʼi. ʼE ina laliki anai pea mo fakagata anai te ʼu puleʼaga fuli ʼaia, pea ko ia totonu ʼe tuʼu anai ʼo aʼu ki he ʼu temi ʼe mole ʼiloʼi honatou gataʼaga,” ko tona faka ʼuhiga, ʼo talu ai.​—Taniela 2⁠:⁠44.

Ei, ʼe puleʼi katoa anai e te Puleʼaga ʼo te ʼAtua ia te kele, ʼo taʼaki mai ai te hahaʼi agakovi fuli, kae pule ia “ ʼo aʼu ki he ʼu temi ʼe mole ʼiloʼi honatou gataʼaga,” ko tona faka ʼuhiga, ʼo talu ai. ʼAki tona faʼahiga fai ʼaia, ko te Puleʼaga ʼo te ʼAtua ʼe ko te koga ʼaia ʼe faka tāpuhā anai e Sehova ia tona huafa, ʼo ina fakamaʼa mai te ʼu loi fuli ʼa Satana pea mo te hahaʼi agakovi.​—Esekiele 36⁠:⁠23.

Ohage ko te ʼu puleʼaga fuli, ʼe ʼi ai te hahaʼi fakalogo ʼo te Puleʼaga ʼo te ʼAtua. Ko ai te ʼu hahaʼi ʼaia? ʼE tali fēnei kiai te Tohi-Tapu: “Ko te kau agavaivai ʼe nātou maʼu anai te kele, pea ʼe nātou fiafia moʼoni anai ʼi te mahu ʼo te tokalelei.” (Pesalemo 37⁠:11) Neʼe toe ʼui fēnei e Sesu: “Manuʼia ia nātou ʼaē ʼe agamālū, heʼe nātou maʼu anai te kele.” Ei, ko nātou ʼaia kua nātou maʼu te ʼatamai mālama totonu ʼo ʼuhiga mo te ʼAtua, pea ʼe ko he fakamaʼua ʼaia mo kapau ʼe nātou fia maʼuʼuli.​—Mateo 5⁠:​5, MN; Soane 17⁠:⁠3.

Koutou fakakaukauʼi age muʼa, ʼi te kele katoa ʼe fonu ai anai te hahaʼi agamālū ka nātou ʼoʼofa moʼoni ki te ʼAtua pea mo nātou feʼofaʼaki. (1 Soane 4⁠:​7, 8) Neʼe ko te meʼa ʼaia neʼe faikole kiai ia Sesu ʼi tana ʼui fēnei: “Ke hoko mai tou puleʼaga! Ke fai tou finegalo ʼi te kele, ohage ko selo.” ʼE koutou mahino koa ki te meʼa ʼaē neʼe akoʼi e Sesu ki ʼana tisipulo ke nātou faikole kiai? Mole gata ai, kae ʼe koutou mahino koa peʼe feafeaʼi anai tokotou maʼuli mo kapau ʼe hoko te faikole ʼaia?

Ko Te Toko Lauʼi Miliona ʼe Nātou Fai Palalau Ki Te Tohi-Tapu

Neʼe fakakikite e Sesu ia te gāue faka malamanei, ʼe ko te ako fakalaumālie ʼe ina fagonogono anai te hoko mai ʼo te Puleʼaga ʼo te ʼAtua. Neʼe ina ʼui fēnei: “Ko te logo lelei ʼaenī ʼo te puleʼaga ʼe faka mafola anai ʼi te kele katoa, ko he meʼa fakamoʼoni ia ki te ʼu puleʼaga katoa; pea hoko mai ai leva te fakaʼosi [ʼo te mālama ʼaenī].”​—Mateo 24⁠:​14, MN.

ʼI te malamanei katoa, ʼe tala e te toko ono miliona kau Fakamoʼoni ʼa Sehova ia te logo lelei ki ʼonatou tatau. ʼE nātou fakaafe atu ke koutou ako ke koutou mālama ki te ʼAtua pea mo tona Puleʼaga, ʼo koutou “vakaʼi [fakalelei] i te Tohitapu,” ʼo koutou fakaʼaogaʼi tokotou ʼatamai. Kapau ʼe koutou fai feiā, pea ʼe koutou fakamālohiʼi ai anai takotou tui pea mo fakafiafia tokotou loto ʼaki te ʼamanaki ki he maʼuli ʼi te palatiso ʼi te kele, ʼaē ka “fonu moʼoni anai . . . ʼi te ʼatamai mālama ʼo ʼuhiga mo Sehova ohage ko te ʼuʼufi ʼo te tai e te ʼu vai.”​—Isaia 11⁠:​6-9.

[Kiʼi nota]

[Talanoa ʼo te pasina 8]

TOU FAʼIFAʼITAKIʼI TE TAGATA FAIAKO LAHI

ʼI te agamāhani ʼi te ʼu faiakonaki ʼa Sesu, neʼe talanoa ki te ʼu akonaki faka Tohi-Tapu. Ohage la, ʼi tona ʼosi fakatuʼuake neʼe ina fakamahino tona tuʼulaga ʼi te fakatuʼutuʼu ʼa te ʼAtua ki tana ʼu tisipulo e toko lua he neʼe mole nā mahino ki tona mate. ʼE ʼui fēnei ia Luka 24⁠:27: “Nee ina kamata fakamahino kia naua ia meafuape o uhiga mo ia i te Tohitapu, maia Moisese pea mo te kau polofeta katoa.”

Koutou fakatokagaʼi neʼe fili e Sesu te akonaki maʼuhiga​—neʼe talanoa “o uhiga mo ia [totonu],” ia te Mesia​—pea ko tana fakamahino ʼaia neʼe ina fai ʼo fakatafito kia “meafuape . . . i te Tohitapu.” ʼIo neʼe fakamāʼopoʼopo e Sesu te ʼu koga tohi faka Tohi-Tapu ʼo feala ai ki tanā ʼu tisipulo ke nā mahino lelei ki te moʼoni fakalaumālie. (2 Timoteo 1⁠:13) Neʼe mole gata ʼaki aipe tanā mahino kae neʼe malave ʼaupito ki tonā loto. ʼE ʼui fēnei e te Tohi-Tapu: “Nee ’na feʼuiʼaki ai: ‘Pe nee mole vela ota loto, i tana talanoa mai kia taua i te ala, pea mo tana fakaava mai kia taua te Tohitapu?’ ”​—Luka 24⁠:⁠32.

ʼE faiga te kau Fakamoʼoni ʼa Sehova ke nātou faʼifaʼitakiʼi te ʼu gāue ʼa Sesu ʼi tanatou minisitelio. Ko tanatou ʼu tohi ako ʼe ko te kaupepa lahi Koteā ʼAē ʼe Fakamaʼua Mai e Te ʼAtua Kia Tatou? pea mo te tohi Te ʼAtamai Mālama ʼAē ʼe Ina Taki Ki Te Maʼuli Heʼegata. Ko te ʼu tohi ʼaia ʼe talanoa ki te ʼu akonaki faka Tohi-Tapu maʼuhiga ohage la: “Ko Ai Te ʼAtua?,” “He Koʼe Koa ʼe Fakagafua e Te ʼAtua Ia Te ʼu Mamahi?,” “ ʼE Lava Feafeaʼi Hakotou Maʼu Te Lotu Moʼoni?,” “Ko Te ʼu ʼAho Fakamuli ʼAenī!,” pea “Ko Te Faʼufaʼu ʼo He famili ʼe Ina Faka Maʼuhigaʼi Te ʼAtua.” ʼE lahi te ʼu vaega faka Tohi-Tapu ʼi te ʼu kapite ʼaia.

ʼE fakaafe atu koutou ke koutou felāveʼi mo te kau Fakamoʼoni ʼa Sehova ʼo tokotou kolo peʼe koutou faitohi ki he tuʼasila ʼi te ʼu tuʼasila ʼaē ʼi te pasina 2 ʼo te nusipepa ʼaenī ke fai hakotou ako Tohi-Tapu ki te ʼu kaupepa ʼaenī peʼe ko he tahi age kaupepa.

[Paki]

Koutou talanoa ki he akonaki e tahi ke malave ki te loto ʼo ia ʼaē ʼe ako mo koutou

[Paki ʼo te pasina 7]

ʼE koutou mahino koa ki te faka ʼuhiga ʼo te faikole ʼa Sesu?

“Ko tamatou Tamai e i selo, ke tapuha tou Huafa . . . ”

“Ke hoko mai tou puleʼaga [Faka Mesianike] . . .”

“Ke fai tou finegalo ʼi te kele, ohage ko selo”