Ko Te Kau Fai Faka Mafola ʼo Te Puleʼaga
“Neʼe ʼAu Fia Tauhi Ki Te ʼAtua”
“KOUTOU mavae mai ia te ia, ê taku hahaʼi!” Neʼe fai te pāui ʼaia e te ʼaselo pea neʼe logo kiai ia te ʼapositolo ko Soane ʼi te ʼuluaki sēkulō ʼo totatou temi. ʼI totatou temi, ko te lauʼi miliona hahaʼi kua nātou tali ki te pāui ʼaia, pea kua nātou hola mai ia “Papiloni Lahi,” te puleʼaga faka malamanei ʼo te lotu hala. (Apokalipesi 18:1-4, MN ) Ia nātou ʼaia, ʼe kau ai ia Wilner mai te fenua ʼo Haïti, pea ʼe ina fakamatala mai te meʼa ʼaē neʼe hoko kia ia.
“Neʼe ʼau tupu ʼi te taʼu 1956 ʼi he famili ʼe tauhi lelei ki te Lotu Katolika, ʼi te kolo veliveli ʼo Saint Marc, ʼi Haïti. Neʼe fiafia ʼaupito toku famili he neʼe filifili ia ʼau pea mo te tahi toko lua ʼo tomatou kolo ke mātou kau ki te seminalio ʼi Saint Michel de lʼAtalaye, ʼi Haïti. Pea ʼi te taʼu 1980, neʼe ʼave mātou ki Stavelot, ʼi Pelesike, ki he tahi ako. Neʼe mole gata ai kae neʼe mātou kau foki ʼi te ako ʼi te univelesitē Katolika.
“ ʼI te kamata neʼe ʼau fiafia ʼi taku lava maʼu te tuʼulaga patele. ʼI te tahi ʼaho ʼi te fale kai, neʼe kole mai e te patele ʼaē neʼe tokaga kia mātou ke ʼau nofo age muʼa, he neʼe ʼi ai te meʼa neʼe ina fia ʼui mai. Neʼe ʼau punamaʼuli ʼaupito ʼi tana fakahā fakahagatonu mai ʼe ina fia fai mo ʼau he ʼu felāveʼi fakasino! Neʼe ʼau fakafisi ki ai pea neʼe ʼau lotomamahi katoa ki te aga ʼaia. Neʼe ʼau faitohi ki taku famili ʼo ʼuhiga mo te meʼa ʼaē neʼe hoko, pea hili kiai te ʼu māhina neʼe ʼau mavae ʼi te seminalio, logola tanatou mole loto kiai. Neʼe ʼau maʼu taku kogafale ʼi te kolo pea neʼe ʼau hoko atu taku ako kae neʼe mole kei ʼau faiga leva ke ʼau patele.
“ ʼI taku toe liliu ki Saint Marc, neʼe mole kei ʼau tui ki te Lotu Katolika. Kae neʼe kei ʼau fia tauhi ki te ʼAtua, kae neʼe mole ʼau ʼiloʼi peʼe koteā ʼaē neʼe tonu ke ʼau fai. Neʼe ʼau ʼalu ki te ʼēkelesia ʼa te kau Adventistes, mo te ʼēkelesia ʼo te Ebenezer, pea mo te ʼēkelesia Mormon. Neʼe ʼau hēhē ʼi te faʼahi fakalaumālie.
“Pea neʼe ʼau manatuʼi ʼi te temi ʼaē neʼe kei ʼau nofo ai ʼi te seminalio ʼi Pelesike, neʼe ʼau fakaʼaogaʼi te Tohi-Tapu ʼo Crampon. Neʼe ʼau maʼu ai ko te ʼAtua ʼe ʼi ai tona huafa. Koia, neʼe ʼau fakaʼaogaʼi te huafa ʼaia, ʼo ʼau faikole fakamalotoloto ki te ʼAtua ke tokoni mai ke ʼau maʼu te lotu moʼoni.
“Hili ʼaia, pea neʼe ʼōmai te ʼu Fakamoʼoni ʼa Sehova ʼo nonofo ʼi toku vāhaʼa fale. Neʼe mole ko he ʼu hahaʼi logoaʼa, pea neʼe nā aga fakaʼapaʼapa. Neʼe malave kia ʼau tonā faʼahiga maʼuli. Hoko te tahi ʼaho, neʼe fakaafe ʼau e te tahi ia nāua ki te Fakamanatu ʼo te mate ʼa Sesu, ʼaē ʼe fai ʼi te taʼu fuli. Neʼe ʼau leleiʼia te fono pea neʼe ʼau tali ke fai tuʼumaʼu haku ako Tohi-Tapu mo te kau Fakamoʼoni. Hili kiai te ʼu māhina e ono, neʼe ʼau tui papau kua ʼau maʼu te faʼahiga tauhi ʼaē ʼe lelei ki te ʼAtua. Neʼe ʼau foaki toku maʼuli kia Sehova pea neʼe ʼau papitema ʼi te ʼaho 20 ʼo Novepeli 1988.”
ʼAki te temi neʼe gāue pionie ia Wilner. ʼI te temi nei, kua tagata ʼāfea ʼi te kokelekasio. Ko ia mo tona ʼohoana, mo tanā ʼu tamaliki e lua, ʼe nātou tauhi fakafiafia ʼi te kokelekasio.
[Paki ʼo te pasina 9]
ʼI tana lau ia te Tohi-Tapu, neʼe ʼiloʼi ai e Wilner ko Sehova ʼe ko te huafa ʼo te ʼAtua