Ko Te Foha Neʼe Tokoni Ki Tana Tāmai

KO JAMES, mai Pilitania, ʼi tona taʼu 30, ʼe mole ina maʼu katoa tana fakakaukau pea ʼe ina maʼu te mahaki ʼo te autisme. Lolotoga te ʼu taʼu, neʼe kau ki te ʼu fono ʼa te kau Fakamoʼoni ʼa Sehova mo tana faʼe pea mo tona tokolua. Kae neʼe mole fia ʼiloʼi e tana tāmai te ʼu meʼa ʼaē ʼe nātou tui kiai. ʼI te tahi afiafi ʼi te hili ʼo te fono ʼaē neʼe fakahā ai te faʼifaʼitaki ʼo te faʼahiga fakaafe ʼo he kāiga ki te ʼAho Fakamanatu ʼo te mate ʼa Kilisito, neʼe hū fakavilivili ia James ki tona kogafale. ʼI te fia ʼiloʼi e tana faʼe pe koteā ʼaē ʼe feiā ai tana tama, neʼe ina muliʼi ia ia ʼo maʼu atu ʼe ina huke te ʼu numelo ʼāfea ʼo Te Tule Leʼo pea mo te Réveillez-vous ! Neʼe ina fili te nusipepa ʼe tuʼu ai te paki ʼo te fakaafe ki te ʼAho Fakamanatu ʼi te tuʼa nusipepa pea lele ai ki tana tāmai. Neʼe ina tuhiʼi ʼuluaki te paki pea haga age ki tana tāmai ʼo ʼui age ki ai “Ko koe!” Neʼe fesioʼaki ai tanā ʼu mātuʼa, mo punamaʼuli ki te fakaafe ʼaē neʼe fai e James ki tana tāmai ʼo ʼuhiga mo te ʼAho Fakamanatu. Neʼe ʼui age ai e tana tāmai ʼe lagi kau anai ʼi te fono ʼaia.

ʼI te afiafi ʼo te ʼAho Fakamanatu, neʼe ʼalu ia James ki te puha mutuʼi meʼa ʼo tana tāmai ʼo filifili mai te vāvaʼe loloa, ʼo fakatoʼo ki tana tāmai, pea mo fakahā age ko te vāvaʼe ʼaē ʼe tonu ke ina tui. Neʼe tali age e tana tāmai ʼe mole ʼalu ia ki te fono. Koia, neʼe ko James mo tana faʼe pe ʼaē neʼe ʼolo ki te Fale ʼo Te Puleʼaga.

Kae ki muli age, neʼe mole kei fia fakalogo ia James mokā ʼui age e tana faʼe ke teuteu ki te fono, ʼo fia nofo ia ʼi fale mo tana tāmai. Pea ʼi te tahi ʼAhotapu uhu, neʼe fakafisi aipe ia James ki te faiga age ʼo tana faʼe ke teuteu ki te fono. Ko te meʼa neʼe hoko neʼe mole ʼamanaki kiai tana faʼe, neʼe haga age ki ai tana tāmai pea mo ina ui age, “James, kapau ʼe ʼau ʼalu ki te fono, ʼe ke haʼu anai?” Neʼe fetogi ai te fofoga ʼa James. Neʼe ina fāʼufua tana tāmai pea mo tali age ki ai “Ei!” pea neʼe nātou ʼolo toko tolu ai ki te Fale ʼo Te Puleʼaga.

Talu mai te ʼaho ʼaia mo te ʼalu tuʼumaʼu ʼa te tāmai ʼa James ki te ʼu fono ʼo te ʼAhotapu, pea mo ina ʼui kapau ʼe fia haʼele ki muʼa, pea ʼe tonu foki ke kau ki te ʼu fono fuli. (Hepeleo 10:24, 25) Pea neʼe ina fai te potu ʼaia, pea hili te ʼu māhina e lua pea neʼe ina kamata ako hoholo te Tohi-Tapu. Neʼe vave tana tuputupu, ʼo ina fai ai te ʼu fetogi ʼi tona maʼuli, pea mole faʼa fualoa kiai pea neʼe kau ki te gāue fai faka mafola ʼo te Puleʼaga. Hili te taʼu katoa ʼo tana kamata ako te Tohi-Tapu, pea neʼe ina foaki tona maʼuli kia Sehova ʼo papitema. ʼI tana kokelekasio, ʼe tagata faifekau faka minisitelio. ʼI te temi nei, kua tauhi fuli te famili kia Sehova, ʼi te logo tahi.