Te ʼu Fehuʼi ʼa Te Kau Lautohi

Ka fakamate he tahi, ʼe gafua koa ki he Kilisitiano ke ina fai he akonaki ʼo te ʼavaifo?

ʼE tahi vakaʼi anai e te Kilisitiano peʼe fakagafua e tona leʼo ʼo loto ke ina fai he akonaki ki te ʼavaifo maʼa he tahi neʼe hage neʼe ina matehi pe ia ia totonu. Ka ina fai he tonu, ʼe tonu anai ke ina tokagaʼi te ʼu fehuʼi ʼaenī: Koteā te manatu ʼa Sehova ʼo ʼuhiga mo te fakamate? ʼO ʼuhiga mo ia ʼaē kua mate, neʼe ina matehi totonu pe koa ia ia? Neʼe ʼi ai koa he faʼahiga meʼa neʼe hoha kiai ʼaē neʼe tupu ai tana fakamate? ʼO ʼuhiga mo te fakamate ʼaia, koteā te manatu ʼa te hahaʼi ʼo te koga meʼa ʼaia?

ʼI totatou ʼuhiga Kilisitiano, ʼe tou fia ʼiloʼi peʼe koteā te manatu ʼa Sehova ʼo ʼuhiga mo te fakamate. Maʼa Sehova, ko te maʼuli ʼa te tagata ʼe maʼuhiga pea mo taputapu. (Senesi 9:5; Pesalemo 36:9) Ko he tahi ʼe ina matehi pe ia ia totonu ʼe ko he fakapogi pe ʼo ia totonu, pea ko he koga ia ʼe mole leleiʼia e te ʼAtua. (Ekesote 20:13; 1 Soane 3:15) Ko tona faka ʼuhiga koa ʼe mole lava fai he akonaki ʼi te ʼavaifo ʼo ia ʼaē neʼe fakamate?

Koutou tokagaʼi age muʼa te meʼa ʼaē neʼe hoko ki te Hau ʼo Iselaele ko Saulo. ʼI tana ʼiloʼi ʼaē ʼe mole hāo anai ʼi tana tau fakamuli ki te kau Filisitini, ʼi tana mole loto ʼaē ke gaohi koviʼi ia ia e nātou ʼaia, “neʼe toʼo e Saulo te heletā pea neʼe fakamate ʼaki.” ʼI te maʼu tona sino e te kau Filisitini, neʼe nātou tautau ʼi te kaupā ʼo te kolo ʼo Pete-Sane. ʼI te logoʼi e te hahaʼi ʼo Sapesi-Kalaate ia te meʼa ʼaē neʼe fai e te kau Filisitini, neʼe nātou ʼōmai ʼo toʼo te sino ʼo Saulo pea nātou tutu. Pea neʼe nātou toʼo tona ʼu hui ʼo tanu. Neʼe nātou sesunio ʼaho e fitu, ko he putu faka agaʼi fenua ʼa te kau Iselaele. (1 Samuele 31:4, 8-13; Senesi 50:10) ʼI te logo ʼa Tavite, te fakanofo ʼo Sehova, ki te meʼa ʼaē neʼe fai e te hahaʼi ʼo Sapesi-Kalaate, neʼe ina ʼui fēnei age kia nātou: “Ke tapuakiʼi koutou e Sehova ʼi takotou lotoʼofa ʼo tanu tokotou ʼaliki, ia Saulo. Pea ʼi te temi nei ke lotoʼofa pea mo agatonu atu ia Sehova kia koutou.” (2 Samuele 2:5, 6) ʼE mole fakahā mai e te Tohi-Tapu neʼe tauteaʼi te hahaʼi ʼo Sapesi-Kalaate ʼi tanatou fai he toʼotoʼoga moʼo ʼavaifo te Hau ko Saulo. Koutou fakatatau mo nātou ʼaē neʼe mole tanu ʼuhi ko tanatou agakovi. (Selemia 25:32, 33) ʼE lava fakakaukauʼi e he Kilisitiano ia te fakamatala ʼo ʼuhiga mo Saulo mokā ina fai he tonu peʼe ina fai anai peʼe kailoa he akonaki maʼa te ʼavaifo ʼa he tahi neʼe fakamate.

Ko te tahi meʼa ʼaē ʼe lava fai e te Kilisitiano, ko tana vakaʼi te ʼuhiga ʼo he toʼotoʼoga ʼo te ʼavaifo. Ko te kau Fakamoʼoni ʼa Sehova ʼe mole nātou hage ko te hahaʼi ʼaē ʼe tui ki te maʼuli tuputupua ʼo he nefesi, koia ʼe mole nātou fai he toʼotoʼoga ki te ʼavaifo ʼaki te manatu hala ʼaē ko ia ʼaē kua mate kua ʼalu ki he tahi mālama. ʼE mole fai te toʼotoʼoga maʼa ia ʼaē kua mate, kae ʼe fai tāfito moʼo fakaloto fīmālieʼi te famili ʼo te mate, pea mo fai he fagonogono ʼo ʼuhiga mo te ʼaluʼaga ʼo te mate kia nātou ʼaē ʼe kau ki te toʼotoʼoga. (Tagata Tānaki 9:5, 10; 2 Kolonito 1:3-5) Ko te tahi tupuʼaga ʼo te toʼotoʼoga ʼo te ʼavaifo, ʼe ko he tokoni kia nātou fuli ʼaē neʼe kau ai ke nātou mahino ki te nounou ʼo te maʼuli. (Tagata Tānaki 7:2) ʼE ʼaoga anai koa te ʼu fakatuʼutuʼu ʼaenī moʼo fakahoko ʼo he akonaki ʼo te ʼavaifo maʼa he tahi neʼe fakamate?

ʼE moʼoni, ʼe lagi manatu ʼihi ko he tahi neʼe ina matehi pe ia ia totonu, neʼe ina ʼiloʼi pe ʼe ko he agahala mamafa kia Sehova. Kae ʼe tonu tuʼumaʼu koa te manatu ʼaia? Pe neʼe mole koa la ina fai te faʼahi ʼaia he neʼe mole ina fakakaukauʼi te meʼa ʼaē neʼe tonu ke ina fai? ʼE ʼi ai ʼihi hahaʼi neʼe nātou faigaʼi ke nātou fakamate kae neʼe nātou fakahemala ʼo nātou līaki te faʼahi ʼaia. Kae ʼe mole feala ki he tahi kua mate ke fakahemala ki te meʼa ʼaē neʼe ina fai.

ʼE ʼi ai te tahi faʼahi ʼe ko te ʼu maveuveu ʼo te fakakaukau ʼaē ʼe tupu ai te lahi ʼo te fakamate. Ko nātou ʼaia ʼe ko te ʼu vikitima moʼoni ʼo te fakamate. ʼI te ʼu sivi neʼe fai, ko te toko 90 ʼi te teau ia nātou ʼaē ʼe fakamate ʼe ʼi ai tonatou fihifihia ʼi tonatou ʼatamai, ʼi te meʼa ʼi tonatou loto, peʼe ko he fihifihia mo he agamāhani. ʼE fakamolemole anai koa e Sehova ki te hahaʼi ʼaē neʼe nātou fakamate ʼuhi ko he fihifihia feiā ʼo tanatou fakakaukau? ʼE mole ʼa tatou te fakamāuʼi pe neʼe ina fai he agahala ʼe mole feala ke fakamolemole e Sehova. ʼE lagi tokagaʼi anai e te Kilisitiano te ʼu ʼaluʼaga pea mo te mahaki ʼo ia ʼaē neʼe fakamate, mokā ina vakavakaʼi peʼe ina fai anai te akonaki maʼa te ʼavaifo ʼo ia ʼaē neʼe fakamate.

Ko te tahi koga ʼe tonu ke tokagaʼi: Koteā te manatu ʼa te hahaʼi ʼo te kolo ʼo ʼuhiga mo te fakamate pea mo ia ʼaē kua mate? Ko te faʼahi ʼaia ʼe tokakaga tāfito anai kiai te kau tagata ʼāfea, ʼaē ʼe nātou taupau te matagafua ʼo te kokelekasio ʼa te kau Fakamoʼoni ʼa Sehova ʼo te koga meʼa. ʼO mulimuli pe ki te manatu ʼa te hahaʼi ʼo te koga meʼa ʼo ʼuhiga mo te fakamate, pea mo tanatou manatu ki te faʼahi ʼaē neʼe hoko, ʼe lagi mole tali anai e te kau tagata ʼāfea ke nātou fai he ʼavaifo fakahāhā, peʼe fai he akonaki ʼo te ʼavaifo ʼi te Fale ʼo te Puleʼaga.

Kae kapau ʼe kole ki he Kilisitiano ke ina fakaʼaluʼalu te toʼotoʼoga ʼo te ʼavaifo, ʼe lagi manatu anai ʼe ina lava fai te potu ʼaia ʼi tona loto tokotahi. Kapau ʼe ina fai te potu ʼaia, pea ʼe tonu anai ke tokaga naʼa ina fai he ʼu palalau ke tukupau ʼo ʼuhiga mo te fakatuʼuake ʼaē ka hoko. ʼE ʼa Sehova pe te vakaʼi peʼe ina fakatuʼuake anai ia ia ʼaē kua mate peʼe kailoa. ʼE feala ki te Kilisitiano ke talanoa tāfito ki te ʼu moʼoni faka Tohi-Tapu ʼo ʼuhiga mo te mate, pea mo fakaloto fīmālieʼi te famili ʼo ia ʼaē kua mate.