Te Manatu Faka Kilisitiano ʼo ʼUhiga Mo Te ʼu Fai ʼAvaifo

KO HE meʼa fakaloto mamahi te mate fakafokifā ʼa he tahi ʼe tou ʼofa ai. ʼE ko he meʼa faikehe kia tatou pea ʼe tou lotomamahi ʼaupito ai. ʼE kehe ia mokā mate he tahi neʼe nofo fualoa mo hona mahaki fakamataku, kae ʼe toe lahi foki tokita lotomamahi.

Tatau aipe pe koteā te ʼu ʼaluʼaga ʼaē neʼe mate ai he tahi neʼe kita ʼofa ai, kae ʼe tonu ke kita lagolago pea mo fakafimālieʼi ia ia ʼaē ʼe lotomamahi. Tahi ʼaē meʼa, ʼe lagi fakatagaʼi anai he Kilisitiano ʼe lotomamahi e te ʼu hahaʼi ʼaē ʼe nātou fakakinauʼi ia ia ke mulimuli ki he ʼu agaʼi fenua ʼo ʼuhiga mo te ʼu ʼavaifo ʼaē ʼe fakafeagai ki te Tohi-Tapu. ʼE lahi te ʼu fenua ʼi Afelika pea mo te tahi ʼu koga meʼa ʼe hoko māhani ia te meʼa ʼaia.

Koteā ʼaē ka tokoni anai ki he Kilisitiano ʼe tau mo te mamahi ʼaia, ke mole mulimuli ki te ʼu agaʼi fenua ʼo ʼuhiga mo te ʼu ʼavaifo ʼaē ʼe fakafeagai ki te Tohi-Tapu? ʼE lava kātakiʼi feafeaʼi e tatatou ʼu tēhina mo tuagaʼane te ʼu ʼahiʼahi ʼaia? Ko nātou fuli ʼaē ʼe nātou faiga ke nātou fakafiafia te loto ʼo Sehova ʼe nātou fia ʼiloʼi anai pe koteā te ʼu tali ki te ʼu fehuʼi ʼaia, he “ko te tauhi ʼaē ʼe maʼa pea mo imakulata ʼi te manatu ʼo totatou ʼAtua pea mo Tāmai, ʼe koʼeni: ko te tokaga ki te ʼu fānau ʼaē ʼe hala mo tāmai pea mo faʼe mo te kau fafine vitua ʼi tonatou ʼu mamahi pea mo nofo tokaga ʼo ʼāteaina ʼi te mele fuli pe ʼo te malamanei.”​—Sake 1:​27.

ʼE Nātou Tui Fuli Ki Te Akonaki e Tahi

Ko te faʼahi ʼaē ʼe tatau ai te ʼu agaʼi fenua ʼo ʼuhiga mo te ʼavaifo, ʼe ko te tui ʼaē ko te kau mate ʼe nātou maʼuʼuli ʼi te koga meʼa fakapulipuli ʼo te ʼu kui. Moʼo fakafimālieʼi nātou, tokolahi te ʼu hahaʼi putu ʼe tonu ke nātou fakahoko he ʼu faʼahiga toʼotoʼoga. Peʼe nātou matataku naʼa mole leleiʼia nātou e te hahaʼi, ʼaē ʼe nātou tui ʼe hoko anai he malaʼia ki te kolo mo kapau ʼe mole nātou mulimuli ki te ʼu toʼotoʼoga ʼo te fai ʼavaifo.

ʼE mole tonu ke mataku he Kilisitiano moʼoni ki te tagata pea mo kau ki te ʼu agaʼi fenua ʼaē ʼe mole leleiʼia e te ʼAtua. (Tāʼaga Lea 29:25; Mateo 10:28) ʼE fakahā mai e te Tohi-Tapu ko te kau mate ʼe mole kei nātou ʼiloʼi he meʼa: “Ko te kau maʼuʼuli ʼe nātou ʼiloʼi ʼe nātou mamate anai; kae ko te kau mate, ʼe mole kei nātou ʼiloʼi he meʼa e tahi . . . Mole he gāue, he fakatuʼutuʼu, he mālama, he poto ʼi te Seole, te potu ʼaē ʼe ke ʼalu ki ai.” (Tagata Tānaki 9:​5, 10) Pea tahi ʼaē meʼa, neʼe foaki e Sehova ʼAtua te fakatokaga ki tona hahaʼi ʼo te temi muʼa, ke mole nātou faiga ke nātou fakafimālieʼi te kau mate peʼe nātou faka felogoi mo nātou. (Teutalonome 14:1; 18:10-​12; Isaia 8:​19, 20) ʼE mole ʼalutahi te ʼatu agaʼi fenua māhani ʼaia ʼo te fai ʼavaifo mo te ʼu moʼoni faka Tohi-Tapu.

E Feafeaʼi Ki “Te Fakamaʼa ʼAki Te ʼu Felāveʼi Fakasino”?

ʼI ʼihi fenua ʼo Afelika, mokā mate te tagata pe ko te fafine, pea ʼe tonu ke fai e tona ʼohoana ʼaē ʼe putu he ʼu felāveʼi fakasino mo he tahi ʼi tona famili totonu. Kapau ʼe mole ina fai te faʼahi ʼaia, pea ʼe ʼui e te hahaʼi ʼe fakahoko anai e te mate he malaʼia ki te famili. ʼE fakahigoaʼi te toʼotoʼoga ʼaia ko “te fakamaʼa ʼaki te ʼu felāveʼi fakasino.” Kae ʼe fakahā mai e te Tohi-Tapu ko te ʼu felāveʼi fakasino ʼaē ʼi tuʼa ʼo te nofo ʼohoana, ʼe ko he “folonikasio” ia. Mai tona ʼuhiga ʼaē ʼe tonu ke “hola [te kau Kilisitiano] mai te folonikasio,” koia ʼaki he lototoʼa, ʼe mole nātou mulimuli anai ki te agaʼi fenua ʼaia ʼaē ʼe fakafeagai ki te Tohi-Tapu.​—1 Kolonito 6:​18.

Koutou fakatokagaʼi te faʼifaʼitaki ʼo te fafine vitua ko Mercy.a ʼI te mate ʼo tona ʼohoana ʼi te taʼu 1989, neʼe loto e tana famili ke ina fai mo he tagata ʼo tona famili, te fakamaʼa ʼaē ʼe fai ʼaki te ʼu felāveʼi fakasino. Neʼe fakafisi kiai, ʼo ina fakamahino age kia nātou ʼe fakafeagai te toʼotoʼoga ʼaia ki te lao ʼa te ʼAtua. Neʼe ʼita ai tana famili, pea nātou tauveleʼi ia ia ʼi muʼa ʼo tanatou mavae. Hili kiai te māhina, pea nātou maumauʼi tona ʼapi, ʼo nātou toʼo te ʼu taliave ʼo tana ʼato, pea nātou ʼui fēnei: “ ʼE tokoni atu anai tou lotu.”

Neʼe fakaloto fīmālieʼi e te kokelekasio ia Mercy pea mo nātou laga tona ʼapi foʼou. Neʼe punamaʼuli te hahaʼi ʼo tana kolo pea neʼe nātou kau ki te laga ʼaia ʼo te ʼapi, pea neʼe ko te ʼohoana Katolika ʼo te pule ʼaē neʼe ina ʼuluaki foaki te mohuku ki te fale ʼaē neʼe laga. Ko te agatonu ʼa Mercy, neʼe ina fakaloto mālohiʼi tana ʼu fānau. Talu mai te temi ʼaia, ko te toko fā neʼe nātou foaki tonatou maʼuli kia Sehova ʼAtua pea mole heʼeki faʼa fualoa, ko te tahi neʼe kau ki te Ako ʼo Te Kau Faifekau Faka Minisitelio.

ʼUhi ko te agaʼi fenua ʼaē ko te fakamaʼa ʼaē ʼe fai ʼaki te ʼu felāveʼi fakasino, neʼe liliu ʼihi kau Kilisitiano ʼo ʼohoana mo he tahi neʼe mole nātou lotu tahi. Ohage la, ko te tagata vitua e taʼu 70 neʼe ʼohoana fakavilivili mo te taʼahine neʼe kāiga mo tona ʼohoana ʼaē kua mate. ʼI tana fai te faʼahi ʼaia, neʼe feala ai ke ina ʼui neʼe ina fai te fakamaʼa ʼaki he ʼu felāveʼi fakasino. Kae ʼe mole mulimuli te aga ʼaia ki te tokoni ʼa te Tohi-Tapu, ʼaē ʼe ina ʼui ke ʼohoana te kau Kilisitiano “ ʼi te ʼAliki pe.”​—1 Kolonito 7:​39.

Te ʼAla ʼo Te Mate

ʼE lahi te ʼu fenua, ko te hahaʼi putu ʼe nātou fakatahitahi ki te ʼapi ʼo te mate pea mo nātou ʼala ai ʼi te pōʼuli katoa. ʼI te agamāhani, ʼi te ʼala mate ʼaia ʼe kakai ai te hahaʼi, pea mo fakatatagi ai he musika. ʼE faka tui e te hahaʼi ko te faʼahi ʼaia ʼe ina fakafimālieʼi anai te mate pea mo ina puipui te famili mai te ʼu meʼa fakatemonio. ʼE lagi fai ai anai he ʼu akonaki ʼe nātou laupisi ai ki te mate, ke mole ʼita. Hili te akonaki, pea hiva e te hahaʼi putu he hiva faka lotu, ʼosi ʼaia pea fai te tahi akonaki, pea ʼe feala ke hoko atu te faʼahi ʼaia ʼo aʼu ki te māfoatā.b

ʼE mole tonu ke kau he Kilisitiano moʼoni ki te taʼi ʼala mate ʼaia ʼaē ʼe fai ʼi te po katoa, heʼe fakahā mai e te Tohi-Tapu ʼe mole feala ke tokoni mai te kau mate peʼe nātou fai mai he meʼa ʼe kovi kia tatou. (Senesi 3:​19; Pesalemo 146:​3, 4; Soane 11:11-​14) ʼE tauteaʼi e te Tohi-Tapu te faifakalauʼakau. (Fakahā 9:​21; 22:15) Kae ʼe lagi faigataʼa ki he fafine vitua Kilisitiano hana tāʼofi te hahaʼi ke mole nātou fai he ʼu aga faifakalauʼakau. ʼE lagi nātou fakakinauʼi anai ia ia ke nātou ʼala te mate ʼi te po katoa ʼi tona ʼapi. Koteā ʼaē ʼe feala ke fai e te ʼu tēhina mo tuagaʼane moʼo tokoni ki te ʼu Kilisitiano ʼaē ʼe kua mate honatou kāiga, ke nātou tauʼi te tahi faigataʼaʼia ʼaia?

Neʼe tokoni te kau tagata ʼāfea ʼo te kokelekasio ki te famili neʼe tau mo te mamahi feiā, ʼo nātou palalau ki te ʼu kāiga pea mo te hahaʼi ʼo te kolo. ʼI tanatou ʼosi palalau ʼaia, neʼe tali lelei e te hahaʼi ʼaia ke nātou mavae ʼi te loto fale pea hoki nātou toe fakatahi ʼi te ʼaho ʼo te ʼavaifo. Kae e feafeaʼi mo kapau ʼe fakafifihi ʼihi? ʼE feala ke hoko he ʼu tokakovi mokā koutou haga faiga ke koutou palalau age kia nātou. ‘Ko he kaugana ʼa te ʼAliki ʼe mole tonu ke fuhu, kae ʼe tonu ke ina lolomi ia ia ʼi te agakovi.’ (2 Timoteo 2:​24) Koia kapau ʼe mole fia mulimuli te famili ki te faʼahi ʼaia, pea mo nātou fakatupu fifihi, pea ʼe mole feala ke tāʼofi te faʼahi ʼaia e te tuagaʼane vitua pea mo tana fānau. Kae ʼe mole tonu ke nātou kau ki te ʼu toʼotoʼoga faka lotu ʼaia ʼaē ʼe fai ʼi tonatou loto fale, heʼe nātou fakalogo ki te fakatotonu ʼaenī ʼo te Tohi-Tapu: “ ʼAua naʼa koutou kaugā ʼamo fakatahi mo te hahaʼi ʼaē ʼe mole tui.”​—2 Kolonito 6:​14.

ʼE toe faka ʼuhiga te pelesepeto ʼaia ki te ʼaho ʼaē ʼe fai ai te ʼavaifo. ʼE mole kau te kau Fakamoʼoni ʼa Sehova ki te ʼu hiva, te ʼu faikole, peʼe ko te ʼu toʼotoʼoga ʼaē ʼe takitaki e he patele pe ko he pasitea. Kapau ʼe manatu e te ʼu Kilisitiano ʼaē ʼe kāiga totonu mo te famili ʼe tonu ke nātou ʼolo ki te ʼu meʼa ʼaia, pea ʼe nātou ʼolo anai kae ʼe mole nātou kau anai kiai.​—2 Kolonito 6:​17; Fakahā 18:4.

Ko He ʼu ʼAvaifo ʼe Fai Fakalelei

Ko te ʼu ʼavaifo ʼaē ʼe fai e te kau Fakamoʼoni ʼa Sehova ʼe mole fakahoko ai he ʼu toʼotoʼoga moʼo fakafimālieʼi te kau mate. ʼE fai te akonaki faka Tohi-Tapu ʼi te Fale ʼo te Puleʼaga, ʼi te fale mate, ʼi te ʼapi ʼo te mate, peʼe ʼi te potu ʼaē ka ʼavaifo ai. ʼE fai te akonaki moʼo fakaloto fīmālie ia nātou ʼaē kua mate tonatou kāiga, ʼo fakamahino age te ʼu meʼa ʼaē ʼe ʼui e te Tohi-Tapu ʼo ʼuhiga mo te mate pea mo te ʼamanaki ki te fakatuʼuake. (Soane 11:25; Loma 5:​12; 2 Petelo 3:​13) ʼE feala ke hiva ai he katiko, pea ʼe fakaʼosi ʼaki he faikole fakaloto fīmālie.

Mole heʼeki faʼa fualoa, neʼe fai te ʼavaifo feiā maʼa te Fakamoʼoni ʼa Sehova, neʼe ko te kiʼi tokolua veliveli ʼo Nelson Mandela, te pelesita ʼo te Potu Toga ʼo Afelika. ʼI te hili ʼo te ʼavaifo, neʼe fakamālo te pelesita kia ia ʼaē neʼe faiakonaki. Neʼe tokolahi te ʼu hahaʼi maʼuhiga pea mo maʼu tuʼulaga ʼaē neʼe kau ki te ʼavaifo ʼaia. Neʼe ʼui fēnei e te minisi fafine ʼo te puleʼaga: “Ko taku hoki kau ʼaē ki he ʼavaifo ʼe fai fakalelei.”

ʼE Lelei Koa Te ʼu Teu Fakamamahi?

ʼE lotomamahi te kau Fakamoʼoni ʼa Sehova mokā mate he tahi neʼe nātou ʼofa ai. Ohage ko Sesu, ʼe lagi nātou fetāgihi. (Soane 11:35, 36) Kae ʼe nātou manatu ʼe mole ʼaoga ke nātou fai he ʼu meʼa moʼo fakahā ki te hahaʼi ʼe nātou putu. (Vakaʼi ia Mateo 6:​16-​18.) ʼE lahi te ʼu fenua ʼaē ʼe fakamaʼua ai ki te ʼu fafine vitua ke nātou ʼai he ʼu teu fakamamahi moʼo fakafimālie te kau mate. ʼE tonu ke nātou ʼai te ʼu teu ʼaia lolotoga ni ʼu māhina peʼe ko he taʼu katoa ʼi te ʼosi fai ʼo te ʼavaifo, pea ʼi te temi ʼaē ka nātou toʼo ai te ʼu teu ʼaia, ʼe fai ai te tahi kātoaga.

Maʼa te hahaʼi, kapau ʼe mole kita putu, pea ʼe ko he meʼa fakaloto mamahi kia ia ʼaē kua mate. Koia la ʼaē, ʼi ʼihi ʼu kolo ʼo Swaziland ko te ʼu pule kolo neʼe nātou kapu te kau Fakamoʼoni ʼa Sehova ʼi tonatou ʼapi pea mo tonatou fenua. Kae neʼe foaki tuʼumaʼu e te ʼu tēhina fakalaumālie ʼaē ʼe nonofo ʼi te tahi ʼu koga meʼa he tokoni ki te kau Kilisitiano agatonu ʼaia.

Ko te Telepinale Lahi ʼo Swaziland neʼe lagolago ki te kau Fakamoʼoni ʼa Sehova, ʼo ina fakatotonu ke tuku nātou ke nātou toe liliu mai ki tonatou ʼapi pea mo tanatou kolo. ʼI te tahi faʼahi, neʼe fakagafua ki te tuagaʼane vitua ke nofo ʼi tona moʼi kele, he neʼe fai e tona ʼohoana te tohi pea mo ina puke te foʼi fime, ʼe ina fakahā lelei ai ʼe mole tonu ke ʼai e tona ʼohoana he ʼu teu fakamamahi. Koia, neʼe feala ai ke ina fakamoʼoni ʼe fakaʼapaʼapa moʼoni ki tona ʼohoana.

ʼE maʼuhiga ʼaupito ʼi muʼa ʼo te mate ʼa he tahi ke ina fakahinohino fakalelei peʼe fakahoko feafeaʼi anai tona ʼavaifo, tāfito la ʼi te ʼu fenua ʼaē ʼe fai māhani ai te ʼu toʼotoʼoga ʼaē ʼe fakafeagai ki te Tohi-Tapu. Koutou fakatokagaʼi te faʼifaʼitaki ʼo Victor, ʼi Cameroun. Neʼe ina tohi te ʼu meʼa ʼaē neʼe tonu ke nātou mulimuli kiai mokā fai anai tona ʼavaifo. Tokolahi ʼi tona famili neʼe ko he ʼu hahaʼi maʼuhiga neʼe nātou mulimuli lelei ki te ʼu agaʼi fenua ʼo ʼuhiga mo te kau mate, ohage ko te tauhi ki te ʼu ʼulu poko. Mai tona ʼaluʼaga ʼaē neʼe fakaʼapaʼapaʼi ia Victor e tona famili, neʼe ina ʼiloʼi ai ʼe nātou fakahoko anai te faʼahi ʼaia. Koia neʼe ina fakahinohino fakalelei ai te ʼu meʼa ʼaē ka fai anai e te kau Fakamoʼoni ʼa Sehova ʼi tana ʼavaifo. Ko te faʼahi ʼaia neʼe ina faka faigafua ki tona ʼohoana pea mo tana fānau, pea neʼe fai he fakamoʼoni lelei ki te kolo.

ʼAua Naʼa Faʼifaʼitakiʼi Te ʼu Agaʼi Fenua ʼAē ʼe Fakafeagai Ki Te Tohi-Tapu

Ko ʼihi ʼaē kua mālama ki te Tohi-Tapu neʼe nātou matataku ʼi tanatou mole mulimuli ki te ʼu meʼa ʼaē ʼe fai māhani e te hahaʼi. Ke mole fakatagaʼi nātou, neʼe nātou faiga ke leleiʼia nātou e te hahaʼi, ʼo nātou fai he ʼu meʼa ke hā ai ʼe nātou mulimuli ki te ʼu fai māhani ʼo te ʼala mate. Logope la ʼe lelei ke koutou ʼaʼahi te famili ʼaē ʼe tau mo te mamahi ʼaia moʼo fakaloto fīmālieʼi nātou, kae ʼe mole fakamaʼua leva ke ʼolo ki te mate ʼo fai ohage ko he kiʼi ʼavaifo, ʼi muʼa ʼo te ʼaho totonu ʼaē ka fai ai te ʼavaifo. ʼE feala ke tūkia ai ia nātou ʼaē ʼe nātou sio ki te faʼahi ʼaia, heʼe feala ke nātou manatu ai ʼe mole koutou tui moʼoni ki te meʼa ʼaē ʼe ʼui e te Tohi-Tapu ʼo ʼuhiga mo te ʼaluʼaga ʼo te kau mate.​—1 Kolonito 10:32.

ʼE uga e te Tohi-Tapu te kau Kilisitiano ke nātou fakamuʼamuʼa te tauhi ʼaē ki te ʼAtua pea mo nātou fakaʼaogaʼi fakapotopoto tanatou temi. (Mateo 6:​33; Efesi 5:​15, 16) ʼI te tahi ʼu koga meʼa, neʼe vāhaʼa katoa peʼe laka age, te mole kei fai ʼo te ʼu gāue ʼo te kokelekasio, ʼuhi ko te ʼavaifo. ʼE mole hoko pe te faʼahi ʼaia ʼi Afelika. ʼO ʼuhiga mo te fai ʼavaifo, ʼe ʼui fēnei e te fakamatala mai te Potu Toga ʼo Amelika: “Neʼe tokosiʼi ia nātou ʼaē neʼe kau ki te ʼu fono e tolu. Neʼe mole kei nātou lagolago ki te fai faka mafola lolotoga ʼaho e hogofulu tupu. Māʼia mo te hahaʼi ʼo te mālama pea mo te kau ako Tohi-Tapu neʼe nātou punamaʼuli pea mo lotovaivai ʼi tanatou sio ʼaē, neʼe kau ʼihi tēhina mo tuagaʼane ki te ʼu toʼotoʼoga ʼo te ʼavaifo.”

ʼI ʼihi ʼu fenua, ʼe feala ke fakaafe e te famili ʼaē ʼe putu honatou ʼu kaumeʼa lelei ke nātou ʼolo ʼo kakai ʼi te hili ʼo te ʼavaifo. Kae ʼe lahi te ʼu koga meʼa ʼi Afelika, ko te tokolahi ʼo te hahaʼi ʼaē ʼe kau ki te ʼavaifo ʼe nātou ʼolo ki te ʼapi ʼo ia ʼaē kua mate pea nātou fai ai te kātoaga, pea ʼe tautau matehi ai te ʼu manu. Ko ʼihi ʼaē ʼe nātou fakatahitahi mo te kokelekasio, neʼe nātou fai te agaʼi fenua ʼaia, ʼo hage mai ʼe nātou taupau te agaʼi fenua ʼo te ʼu kātoaga moʼo fakafimālie te kau mate.

Ko te ʼu fai ʼavaifo ʼa te kau Fakamoʼoni ʼa Sehova ʼe mole ko he kavega faka paʼaga kia ia ʼaē ʼe putu. Koia ʼe mole ʼaoga ke fai he fakatuʼutuʼu ke foaki he paʼaga moʼo totogi ʼaki te ʼu meʼa ʼaē ʼe ʼaoga ki te ʼavaifo. Kapau ʼe mole lavaʼi e te ʼu fafine vitua māsisiva te totogi ʼo te ʼu meʼa ʼaē ʼe ʼaoga ki te faʼahi ʼaia, pea ʼe mahino ia ʼe ko he meʼa fakafiafia anai ki ʼihi ʼi te kokelekasio ke nātou tokoni kia nātou ʼaia. Kapau ʼe mole feʼauga te tokoni ʼaia, pea ʼe feala ke fakatuʼutuʼu e te kau tagata ʼāfea ke nātou foaki he tokoni fakasino ki te ʼu fafine ʼaia ʼaē ʼe ʼaoga ke nātou lagolago kiai.​—1 Timoteo 5:​3, 4.

ʼE mole fakafeagai tuʼumaʼu te ʼu agaʼi fenua ʼo te fai ʼavaifo ki te ʼu pelesepeto ʼo te Tohi-Tapu. Kapau ʼe nātou fakafeagai kiai, pea ʼe mulimuli anai te kau Kilisitiano ki te Tohi-Tapu.c (Gāue 5:​29) Logope la ʼe feala ke tupu ai he tahi mamahi, kae ʼe tokolahi te kau kaugana ʼa te ʼAtua ʼe feala ke nātou fakamoʼoni neʼe nātou lava tauʼi te ʼu ʼahiʼahi ʼaia. Neʼe nātou fakahoko ʼaki te mālohi ʼa Sehova, “te ʼAtua ʼo te fakaloto fīmālie fuli pe,” pea ʼaki te tokoni ʼofa ʼo tanatou ʼu kaumeʼa ʼi te tui, ʼaē neʼe nātou fakaloto fīmālieʼi nātou ʼi tonatou mamahi.​—2 Kolonito 1:​3, 4.

[Nota ʼi te lalo pasina]

[Talanoa ʼo te pasina 23]

Neʼe Tapuakina Nātou He Neʼe Nātou Pipiki Maʼu Ki Tanatou Tui

Ko Sibongili ʼe ko he tuagaʼane vitua lototoʼa ʼe nofo ʼi Swaziland. ʼI te ʼosi mate pe ʼo tona ʼohoana, neʼe mole fia mulimuli ki te ʼu agaʼi fenua ʼaē neʼe manatu e te tokolahi, ʼe tonu ke fai moʼo fakafimālie te kau mate. Ohage la, neʼe mole ina tele tona lauʼulu. (Teutalonome 14:1) Neʼe ʼiʼita te toko valu ʼo tona famili pea neʼe nātou tele fakakinau tona lauʼulu. Tahi ʼaē meʼa, neʼe nātou tapuʼi ke ʼolo age te kau Fakamoʼoni ʼa Sehova kiō Sibongili moʼo fakaloto fīmālieʼi ia ia. Kae ko ʼihi hahaʼi ʼaē neʼe nātou tali te logo lelei ʼo te Puleʼaga, neʼe nātou fiafia ʼi tanatou ʼaʼahi ia ia pea neʼe nātou ʼavage te ʼu tohi fakaloto mālohi ʼaē neʼe fai e te kau tagata ʼāfea. ʼI te ʼaho ʼaē neʼe tonu ai ke ʼai e Sibongili te ʼu teu fakamamahi, neʼe hoko te meʼa fakapunamaʼuli. Neʼe fakatuʼutuʼu e te tahi ʼe maʼuhiga ʼi tona famili ke nātou talaga ʼo palapalalau pe koʼe ʼe mole ina fia ʼai te ʼu teu ʼaia.

ʼE ʼui fēnei e Sibongili: “Neʼe nātou fehuʼi mai peʼe fakagafua mai e taku lotu ke ʼau ʼai te ʼu kofu ʼuli ki te putu. ʼI taku ʼosi fakamahino age taku manatu, neʼe nātou ʼui mai ʼe mole nātou fakamālohiʼi anai ʼau ki te faʼahi ʼaia. Neʼe ʼau punamaʼuli, he neʼe nātou faifakalelei mai ʼo ʼuhiga mo tanatou gaohi koviʼi ʼau pea mo tanatou tele fakakinau toku lauʼulu. Neʼe nātou faifakalelei fuli mai.” Ki muli age, neʼe fakahā e te tēhina veliveli ʼo Sibongili tana tui ʼaē ʼe ko te kau Fakamoʼoni ʼa Sehova ʼaē ʼe nātou maʼu te lotu moʼoni, pea neʼe ina kole age ke fai hana ako Tohi-Tapu.

Tou vakaʼi te tahi faʼifaʼitaki: Ko te tūpulaga ʼo te Potu Toga ʼo Afelika ʼe higoa ko Benjamin, neʼe taʼu 29 ʼi te temi ʼaē neʼe fakahā age te mate fakapunamaʼuli ʼo tana tāmai. ʼI te temi ʼaia, neʼe ko Benjamin tokotahi pe ʼaē neʼe Fakamoʼoni kia Sehova ʼi tona famili. Lolotoga te ʼavaifo, ko nātou fuli ʼaē neʼe fakalaka ʼi muʼa ʼo te puha, neʼe tonu ke nātou lī he moʼi kele kiai.d ʼI te ʼosi pe ʼo te ʼavaifo neʼe tele e te famili katoa tonatou ʼu ʼulu. Kae neʼe mole fai e Benjamin te faʼahi ʼaia, pea neʼe fakakikite e te hahaʼi pea mo tona famili ʼe tauteaʼi anai ia ia e te laumālie ʼo tana tāmai ʼaē kua mate.

ʼE ʼui fēnei e Benjamin: “ ʼI taku falala ʼaē kia Sehova, neʼe mole hoko he meʼa.” Neʼe fakatokagaʼi e tona famili te faʼahi ʼaia. ʼAki te temi, ko ʼihi ia nātou neʼe nātou kamata ako te Tohi-Tapu mo te kau Fakamoʼoni ʼa Sehova pea mo nātou papitema. Koteā ʼaē neʼe hoko kia Benjamin? Neʼe kau ki te fai faka mafola ʼi te temi katoa. ʼI te ʼu taʼu pe ʼaenī, kua ina maʼu te pilivilesio ʼaē ke tagata taupau feʼaluʼaki pea ʼe ina ʼaʼahi te ʼu kokelekasio ʼa te kau Fakamoʼoni ʼa Sehova.

[Nota]