ʼE Puleʼi Te Maʼuli e Te ʼu Meʼa Fakamataku
ʼE KOUTOU felāveʼi mo he tahi ʼi takotou mavae mai tokotou ʼapi. ʼE koutou tūkia ʼi te foʼi maka. ʼE ʼi ai te manu lele ʼe tagi ʼi te pōʼuli. ʼE tatau tuʼumaʼu pe te moemisi ʼaē ʼe koutou fai. Maʼa te hahaʼi tokolahi, ko te ʼu meʼa ʼaia ʼe ko he ʼu meʼa noa pe ia. Kae ko ʼihi hahaʼi ʼo te Potu Uesite ʼo Afelika, ʼe nātou faka ʼuhiga te ʼu meʼa ʼaia ohage ko he ʼu fakaʼiloga, peʼe ko he ʼu logo mai te ʼu laumālie. ʼE hoko anai he meʼa lelei peʼe ko he malaʼia, ʼo fakalogo ki te fakaʼiloga pea mo tona faka ʼuhiga.
ʼE mahino ia, ʼe mole ko te ʼu hahaʼi pe ʼo Afelika ʼaē ʼe tui ki te ʼu meʼa fakamataku. Logola neʼe mole nātou tui lolotoga ni ʼu taʼu ki he ʼAtua, kae ʼe fakapunamaʼuli heʼe tokolahi te hahaʼi Siaina pea mo Lusia ʼe kei nātou tui ki te ʼu meʼa fakamataku. ʼI te ʼu fenua ʼo te Potu Uesite, tokolahi ʼe nātou lau te horoscope, mo nātou tui ʼe kovi te ʼaho mokā ko te Feliaono 13, pea nātou matataku ʼi te ʼu pusi ʼuli. Ki te hahaʼi ʼo te Potu Noleto, ka fetogi te lagi ʼi te pōʼuli ʼe ko he fakaʼiloga ʼaia ʼe hoko anai he tau pea mo he malaʼia. ʼI Initia, kua kamata mafola te mahaki ʼo te SITA ʼuhi ko te ʼu tagata ʼaē ʼe nātou foe te ʼu foʼi kamio, heʼe nātou tui ʼe tonu ke nātou fai he ʼu felāveʼi fakasino ke mokomoko ai tonatou sino ʼi te ʼu ʼaho vevela. ʼI Saponia, ko te hahaʼi ʼaē ʼe nātou keli te ʼu ala ʼi te lalo kele, ʼe nātou tui ʼe hoko anai he malaʼia mo kapau ʼe hū he fafine ki te ʼu ala ʼaia kae heʼeki ʼosi. ʼE toe tui te hahaʼi faigaoʼi ki te ʼu meʼa fakamataku. Ko te tahi ʼe gaoʼi pale ʼe ina tui ʼe mālo heʼe ina tui tona ʼu sūlie lanu ʼuli kae mole ko te ʼu sūlie hina. ʼE lahi ʼaupito te taʼi ʼu manatu feiā.
E feafeaʼi kia koutou? ʼE ʼi ai koa he meʼa ʼe koutou mataku ai kae ʼe mole koutou ʼiloʼi tona tupuʼaga? ʼE malave koa kia koutou “he meʼa ʼe tui kiai te hahaʼi, peʼe ko he koga ʼo te tui ʼaia, peʼe ko he agaʼi fenua ʼe hage ʼe mole feala ke fakamahino”? ʼO mulimuli ki te fakamahino ʼaia ʼa te tohi te ʼu meʼa fakamataku, ko takotou tali ki te ʼu fehuʼi ʼaia ʼe lava hā ai peʼe koutou tui ki te ʼu meʼa fakamataku peʼe kailoa.
Ko he tahi ʼe mulimuli ki te ʼu meʼa fakamataku moʼo fai he ʼu tonu pea ʼi tana ʼu gāue, ʼe liliu ʼo fakalogo ki he meʼa ʼe mole mahino moʼoni kiai. ʼE ko he agapoto koa ʼaia? ʼE tonu koa ke tou fakalogo ki he mālohi ʼe mole tou mālama lelei kiai pea ʼe feala ke fua kovi kia tatou? ʼE tonu koa ke tou meʼa noaʼi te ʼu meʼa fakamataku peʼe ko he ʼu meʼa ʼe feala ke tou tuʼutāmaki ai?