Te ʼu Fehuʼi ʼa Te Kau Lautohi
Neʼe ʼiloʼi koa e Apele neʼe tonu ke ina fai he sakilifisio manu ke ʼofa te ʼAtua kia ia?
ʼE nounou te fakamatala ʼa te Tohi-Tapu ʼo ʼuhiga mo te ʼu mōlaga ʼaē neʼe fai e Kaino pea mo Apele. Ia Senesi 4:3-5, ʼe tou lau fēnei: “Hili kiai he kiʼi temi, pea neʼe ʼaumai e Kaino te ʼu fua ʼo te kele ko he mōlaga kia Sehova. Kae kia Apele, neʼe ina ʼaumai foki mo ia te ʼu ʼuluaki tupu ʼo tana faga manu, pea mo tonatou ʼu koga ʼaē ʼe gako. Pea neʼe leleiʼia e Sehova ia Apele pea mo tana mōlaga, kae neʼe mole ina leleiʼia ia Kaino pea mo tana mōlaga.”
ʼI muʼa ʼo te hoko ʼo te meʼa ʼaenī, neʼe mole ʼi ai he fakamatala ʼi muʼa atu ʼi te Tohi-Tapu ʼo ʼuhiga mo he fakamaʼua e Sehova ke fai he ʼu sakilifisio peʼe ko te ʼu faʼahiga sakilifisio ʼaē ʼe ina leleiʼia. Koia, ʼe ʼiloga mai neʼe fai e Kaino mo Apele tonā ʼu mōlaga ʼuhi ko tonā loto ʼo nāua totonu. Neʼe tapu tanā hū ki te ʼuluaki nofoʼaga faka palatiso ʼo tanā ʼu mātuʼa; neʼe nā kamata logoʼi te ʼu fua ʼo te agahala; pea neʼe kua nā mamaʼo mai te ʼAtua. ʼI tonā ʼaluʼaga agahala pea mo fakaʼofaʼofa, neʼe nā logoʼi ʼe tonu ke tokoni age te ʼAtua kia nāua. Neʼe lagi nā fai mōlaga ki te ʼAtua ke feala hanā maʼu ia te ʼofa ʼo te ʼAtua.
Ko te meʼa ʼaē neʼe hoko, neʼe tali te mōlaga ʼa Apele e te ʼAtua kae fakafisi ki te mōlaga ʼa Kaino. Koteā tona tupuʼaga? Neʼe hoko feiā koa ʼuhi he neʼe mōlagaʼi e Apele te ʼu meʼa ʼaē ʼe lelei kae neʼe kovi te mōlaga ʼaē neʼe fai e Kaino? ʼE mole feala ke tou ʼiloʼi papau ke tou ʼui neʼe hoko te meʼa ʼuhi ko te faʼahiga mōlaga, koteʼuhi neʼe mole ʼi ai he tahi ia nāua neʼe fakahā age ki ai peʼe koteā te tupuʼaga ʼo te tali lelei ki ʼaē kae fakafisi ki ʼaē. Kae ʼe mahino ia ʼe mole ko te faʼahiga mōlaga ʼaē neʼe hoko ai te ʼaluʼaga kehekehe ʼaia. ʼI te Lao ʼaē neʼe fakatoʼo e Sehova ki te hahaʼi ʼo Iselaele, ʼi te ʼu sakilifisio ʼaē neʼe tali leleiʼi neʼe mole gata pe ki te ʼu manu peʼe ko he ʼu koga ʼo te ʼu manu, kae neʼe kau ai foki mo te ʼu tegaʼi fulumeto ʼaē neʼe fakapaku, mo te kauʼi olose, mo te falena lelei, mo te ʼu meʼa kai neʼe taʼo, pea mo te vino. (Levitike 6:19-23; 7:11-13; 23:10-13) ʼE mahino mai ia, neʼe mole ko te faʼahi fakasino ʼo te ʼu sakilifisio ʼa Kaino mo Apele ʼaē neʼe tupu ai te tali ʼo te tahi kae lītuʼa ki te tahi.—Vakaʼi ia Isaia 1:11; Amosi 5:22.
Hili kiai te ʼu sēkulō, neʼe tala fēnei e te ʼapositolo ko Paulo: “Aki te tui, nee momoli ki te Atua e Apele he sakilifisio nee leleiʼage i te sakilifisio a Kaino, nee ina tali ai te fakamooni, e ko he tagata agatonu, nee fakamooni ki ai te Atua i tana tali ona meaofa.” (Hepeleo 11:4) Koia, neʼe hoko te meʼa ʼaia ʼuhi ko te tui ʼa Apele ʼaē neʼe fakamoʼoni kiai te ʼAtua, ʼe ko he tagata faitotonu. Kae neʼe tui kiteā? Neʼe tui ki te fakapapau ʼa Sehova ʼe ina foaki anai he Hāko, ʼe ina ‘fakavolu anai te ʼulu ʼo te gata’ pea mo toe fakatuʼu anai ia te tokalelei pea mo te maʼuli haohaoa ʼaē neʼe maʼu ʼi te kamataʼaga ʼo te malamanei. ʼAki te ʼui ʼaē ʼe ‘fakavolu anai te Hāko ʼi te muliʼi vaʼe,’ neʼe lagi mahino ai kia Apele ʼe tonu ke liligi he toto ʼi te fai sakilifisio. (Senesi 3:15) Logope te faʼahi ʼaia, kae ko te koga maʼuhiga neʼe ko te tui ʼa Apele, ʼaē neʼe tupu ai tana fai “he sakilifisio nee leleiʼage i te sakilifisio a Kaino.”
ʼO toe feiā pe, neʼe mole līʼakina ia Kaino ʼuhi ko te lelei ʼo tana faʼahiga sakilifisio, kae ʼuhi ko tana mole tui, ohage ko tona fakahā e tana ʼu aga. Neʼe fakahā lelei age e Sehova kia Kaino: “Kapau ʼe ke fai te meʼa ʼaē ʼe lelei, ʼe mole hoko anai koa he hikihiki?” (Senesi 4:7) Neʼe mole līaki e te ʼAtua ia Kaino ʼuhi ko tana mole leleiʼia tana mōlaga. Neʼe ina līaki ia ia “koteuhi nee kovi tana u gaue”—ʼaē neʼe ʼiloga ʼaki te maheka, mo te fehiʼa pea mo te fakapō.—1 Soane 3:12.