“Ke Lahi Age Tatatou Tokaga”

“ ʼE tonu ai ke lahi age tatatou tokaga ki te ʼu meʼa ʼaē neʼe kua tou logo kiai, naʼa tou tafea.”—Hepeleo 2:1, MN.

1. Koutou tuku mai he faʼifaʼitaki moʼo fakahā ʼe feala ke tuʼutāmaki te hahaʼi mo kapau ʼe mole nātou tokakaga?

ʼI TE taʼu fuli, ʼi Amelika neʼe mamate te toko 37 000 hahaʼi ʼi te ʼu fakaʼī. ʼE ʼui e te kau popoto neʼe feala ki te tokolahi ke mole nātou mamate mo kanapaula neʼe nātou tokakaga fakalelei ʼi te ala. Ko ʼihi ʼe mole nātou tokakaga ʼi te ala heʼe nātou taukalo ki ʼihi pea mo nātou sioʼi he ʼu pano, peʼe nātou fai telefoni. Pea ko ʼihi ʼe nātou kakai kae nātou lolotoga uli motokā. ʼI te ʼu ʼaluʼaga fuli ʼaia, ʼe feala pe ke tuʼutāmaki ai te hahaʼi.

2, 3. Koteā te tokoni neʼe foaki e Paulo ki te kau Kilisitiano Hepeleo, pea he koʼe neʼe ʼaoga tana tokoni?

² Kua hili nei kiai te teitei taʼu e 2 000 ʼi muʼa ʼo te faʼu ʼo te motokā, neʼe talanoa te ʼapositolo ko Paulo ki te ʼu meʼa ʼaē neʼe tuʼutāmaki ai ʼihi Kilisitiano Hepeleo. Neʼe fakahā lelei e Paulo ko Sesu Kilisito neʼe fakatuʼuake ki te tuʼulaga ʼe māʼoluga age ʼi te kau ʼaselo fuli, he neʼe fakanofo ia ki te toʼomataʼu ʼo te ʼAtua. Pea neʼe ʼui fēnei e te ʼapositolo: “Koia, ʼe tonu ai ke lahi age tatatou tokaga ki te ʼu meʼa ʼaē neʼe kua tou logo kiai, naʼa tou tafea.”—Hepeleo 2:1, MN.

³ He koʼe neʼe tonu ki te kau Kilisitiano Hepeleo “ke lahi age [tanatou] tokaga ki te ʼu meʼa ʼaē neʼe kua [nātou] logo kiai” ʼo ʼuhiga mo Sesu? Koteʼuhi neʼe kua teitei ʼosi ia taʼu e 30 ki te kua hake ʼo Sesu ki te lagi. Pea ko te kau Kilisitiano Hepeleo ʼi tanatou mole kei sio ki tonatou Pule, neʼe nātou kamata tafea ai ʼi te tui moʼoni. Neʼe fakahalaʼi nātou e te Lotu Sutea, te tauhi ʼaē neʼe nātou kau kiai ʼi muʼa atu.

Neʼe Tonu Ke Nātou Tokaga

4. He koʼe neʼe feala ki ʼihi Kilisitiano Hepeleo ke nātou fia liliu ki te Lotu Sutea?

⁴ He koʼe neʼe feala ki he Kilisitiano ke toe fia liliu ki te Lotu Sutea? Koteʼuhi ʼi te Lao, ko te ʼu meʼa ʼaē neʼe nātou tauhi kiai neʼe nātou sio mata kiai. Ko te hahaʼi neʼe feala ke nātou sio ki te kau pelepitelo pea mo mamanu ki te ʼu holokoseta. Kae ʼi ʼihi faʼahi neʼe mole tatau te tauhi faka Kilisitiano mo te Lotu Sutea. Ko Sesu Kilisito neʼe ko te Pelepitelo Lahi ʼo te kau Kilisitiano, kae neʼe kua taʼu tolugofulu tanatou mole kei sio ki ai ʼi te kele. (Hepeleo 4:14) Neʼe ʼi ai tonatou fale lotu, kae neʼe kua tuʼu tonu te potu taputapu ʼi selo. (Hepeleo 9:24) ʼO mole hage ko te silikosisio ʼaē neʼe fakamaʼua ʼi te lao, ko te silikosisio faka Kilisitiano neʼe fai ʼi te “loto ʼaki te laumālie.” (Loma 2:29, MN ) Maʼa te kau Kilisitiano Hepeleo, lagi ʼe mole moʼoni te Lotu Faka Kilisitiano.

5. Neʼe fakahā feafeaʼi e Paulo ko te tauhi ʼaē neʼe fakatuʼu e Sesu neʼe māʼoluga age ʼi te Lao?

⁵ Neʼe ʼi ai te faʼahi tāfito ʼi te tauhi ʼaē neʼe fakatuʼu e Kilisito neʼe tonu ke mahino kiai te kau Kilisitiano Hepeleo. Ko tanatou tauhi neʼe tonu ke fakatafito ki te tui kae neʼe mole tonu ke fakatafito ki tanatou sio, pea neʼe māʼoluga age ia ʼi te Lao ʼaē neʼe foaki age ki te polofeta ko Moisese. Neʼe tohi fēnei e Paulo: “Kapau ko te toto o te u tao mo ae o te u vitulo pea mo te lefulefu o he [pipi] fafine e fai aki te luluku, ke fakamaonioni natou nee uli o uhiga mo te fakamaa fakasino, e feafeai anai te mauhiga kehe o te taataa o Kilisito, iaʼia ae, i te Laumalie heegata, nee ina momoli iaʼia ko he vikitima hee mele ki te Atua, e ina fakamaa ai otatou loto mai te u gaue mate koteuhi ke tou tauhi ki te Atua mauli.” (Hepeleo 9:13, 14) Ei, ko te fakamolemole ʼaki te tui ki te sakilifisio faitotogi ʼa Sesu Kilisito, neʼe māʼoluga age ʼi te ʼu sakilifisio fuli ʼaē neʼe fai ʼi te Lao.—Hepeleo 7:26-28.

6, 7. (a) Koteā te ʼaluʼaga maʼuhiga neʼe tonu ai ki te kau Kilisitiano Hepeleo “ke lahi age [tanatou] tokaga ki te ʼu meʼa ʼaē neʼe [nātou] logo kiai”? (b) ʼI te temi ʼaē neʼe tohi ai e Paulo tana tohi ki te kau Hepeleo, neʼe ko temi e fia neʼe kei toe pea fakaʼauha Selusalemi? (Vakaʼi te kiʼi nota ʼi te lalo pasina.)

⁶ Neʼe ʼi ai te tahi tupuʼaga neʼe tonu ai ki te kau Kilisitiano Hepeleo ke nātou tokakaga fakalelei ki te ʼu meʼa ʼaē neʼe nātou logo kiai ʼo ʼuhiga mo Sesu. Neʼe fakakikite e Sesu ʼe fakaʼauha anai Selusalemi. Neʼe ina ʼui fēnei: “[ʼE] hoko mai anai te ʼu ʼaho kia te koe, ʼaia ka fakatuʼu ai anai e tou ʼu fili ʼi ʼou tafaʼaki he ʼā ʼaki he ʼu pou kua fakamata, pea ʼe nātou apuipui anai koe, pea ʼe nātou ʼōposi anai koe mai te potu fuli pe, pea ʼe nātou laliki anai koe ki te kele, ia koe pea mo ʼau fānau ʼaē ʼe ʼi loto ia te koe; pea ʼe mole nātou tuku anai ia te koe he maka ʼe hili ʼi he tahi maka, koteʼuhi he neʼe mole ke ʼiloʼi te temi ʼaē neʼe ʼaʼahi ai koe.”—Luka 19:43, 44, MN.

⁷ Ko ʼafea ʼaē ka hoko ai te fakaʼauha ʼaia? Neʼe mole fakahā e Sesu te ʼaho pea mo te hola. Kae neʼe ina foaki te fakatotonu ʼaenī: “Ka koutou sisio anai ʼe ʼā takatakai ia Selusalemi e he ʼu kautau neʼe faka ʼapitaki-tau, ke koutou ʼiloʼi kua ōvi mai tona maumau. Koia, ko nātou ʼaē ka nonofo anai ʼi Sutea, ke nātou feholaki ki te ʼu moʼuga, pea ko nātou ka nonofo anai ʼi tona lotolotoiga ke nātou mavae mai ai, pea ko nātou ʼaē ka nonofo anai ʼi te ʼu potu ʼo te tuvao ke ʼaua naʼa nātou hū kiai.” (Luka 21:20, 21, MN ) Hili taʼu e 30 ki te ʼu palalau ʼaia ʼa Sesu, neʼe mole kei maʼuhiga ki ʼihi Kilisitiano ʼo Selusalemi ia te ʼamanaki hoko mai ʼo te ʼaho, koteʼuhi neʼe kua nātou tokaga ki te tahi age ʼu meʼa. Neʼe hage neʼe mole kei nātou haga sio ki muʼa. Kapau neʼe mole nātou fetogi tanatou ʼu manatu, ʼe mahino papau ia ʼe nātou tuʼutāmaki anai. Pe neʼe nātou manatu ʼe hoko anai peʼe kailoa, kae ko te fakaʼauha ʼo Selusalemi neʼe kua ōvi mai!a Kae ʼaki te tokoni ʼa Paulo neʼe feala ai ke nonofo ʼalaʼala te kau Kilisitiano ʼo Selusalemi mai tanatou momoe fakalaumālie.

“Ke Lahi Age Tatatou Tokaga” Ia ʼAho Nei

8. He koʼe ʼe tonu “ke lahi age tatatou tokaga” ki te ʼu moʼoni ʼo te Folafola ʼa te ʼAtua?

⁸ Ohage ko te kau Kilisitiano ʼo te ʼuluaki sēkulō, ʼe tonu “ke lahi age tatatou tokaga” ki te ʼu moʼoni ʼo te Folafola ʼa te ʼAtua. Koteā tona tupuʼaga? Koteʼuhi ʼe ʼamanaki ke hoko mai te fakaʼauha lahi, pea ʼe mole fakaʼauha anai he puleʼaga pe e tahi kae ko te tuʼu katoa ʼo te ʼu faʼahiga meʼa ʼaenī. (Apokalipesi 11:18; 16:14, 16) ʼIo, ʼe mole tou ʼiloʼi te ʼaho pea mo te hola totonu ʼaē ka fakahoko ai e Sehova tana fakaʼauha ʼaia. (Mateo 24:36) Kae ʼi “te u aho fakamuli” ʼaenī, ʼe tou sio ai ʼe hoko te ʼu lea faka polofeta faka Tohi-Tapu. (2 Timoteo 3:1-5) Koia, ʼe tonu ai ke tou tokaga ke ʼaua naʼa fakaleluʼi tatou e he meʼa. ʼE tonu ke tou tokakaga ki te Folafola ʼa te ʼAtua pea mo taupau maʼu te maʼuhiga ʼo te temi. Kapau ʼe tou fai feiā pea ʼe tou “hāo [anai] ʼi te ʼu meʼa fuli ʼaia ʼaē ʼe tonu ke hoko mai.”—Luka 21:36, MN.

9, 10. (a) ʼE tou lava fakahā feafeaʼi ʼe tou tokaga ki te ʼu meʼa fakalaumālie? (b) ʼE liliu feafeaʼi te folafola ʼa te ʼAtua ‘ko he mālama taki ki totatou ʼu vaʼe pea mo totatou ala’?

⁹ ʼI te ʼu temi faigataʼa ʼaenī, ʼe tou lava fakahā feafeaʼi ʼe “lahi age tatatou tokaga” ki te ʼu meʼa fakalaumālie? ʼE tonu ke tou kau tuʼumaʼu ki te ʼu Fono, mo te ʼu fakatahi lalahi. ʼE tonu ke tou ako mālohi te Tohi-Tapu ke feala ai hatatou fakaōvi ki te Tupuʼaga, ko Sehova. (Sakopo 4:8) Kapau ʼe tou maʼu ʼi tatatou ako takitokotahi pea mo te ʼu fono ia te ʼatamai mālama ʼo ʼuhiga mo Sehova, pea ʼe tou hage anai ko te tagata fai pesalemo ʼaē neʼe ina ʼui fēnei ki te ʼAtua: “Ko tau folafola ʼe ko he mālama taki ki toku vaʼe, pea ʼe ko he mālama ki toku ala.”—Pesalemo 119:105.

¹⁰ Ko te Tohi-Tapu ʼe ko ‘he mālama ki totatou ala’ heʼe ina fakahā mai te ʼu fakatuʼutuʼu ʼa te ʼAtua ki te ka haʼu. ʼE ko ‘he mālama taki ki totatou vaʼe.’ Ko tona faka ʼuhiga, ʼe tokoni mai kia tatou mokā tou felāveʼi mo he ʼu fihifihia faigataʼa ʼi totatou maʼuli. Koia ʼaē ʼe “lahi age [anai] tatatou tokaga” mokā ʼe tou ako fakatahi mo totatou ʼu tēhina pea mo totatou ʼu tuagaʼane, pea mokā ʼe tou lau takitokotahi te Folafola ʼa te ʼAtua. Ko te ʼu fakamatala ʼaē ka tou lau ai, ʼe tokoni mai anai kia tatou ke tou fai he ʼu tonu ʼe fakapotopoto pea mo fua lelei kia tatou, pea ʼe leleiʼia e Sehova pea mo fakafiafia ai tona loto. (Tāʼaga Lea 27:11; Isaia 48:17) ʼE tou lava hikihiki feafeaʼi te temi ʼaē ʼe tou fakalogo ai ʼi te ʼu fono pea mo te ʼu temi ʼaē ʼe tou ako takitokotahi ai, ke tou maʼu ai te ʼu fua lelei ʼo te ʼu fakatuʼutuʼu fakalaumālie mai te ʼAtua?

Tou Hikihiki Tatatou Fakalogo ʼi Te ʼu Fono

11. He koʼe ʼi ʼihi temi ʼe faigataʼa tatatou fakalogo ki te ʼu akonaki?

¹¹ ʼI ʼihi temi, ʼe mole faigafua tatatou fakalogo ʼi te ʼu fono. ʼE fakalelu gafua totatou ʼatamai ʼi ʼihi meʼa, ohage la ko he tagi ʼa he kiʼi tamasiʼi peʼe ko te tauhala mai ʼa ʼihi ki te fono. Peʼe lagi kua tou gaʼegaʼe he neʼe tou gāue ʼaho katoa. ʼE lagi mole faʼa lelei te faiakonaki ʼa te tēhina, pea fokifā pe kua tou manatu ki he tahi meʼa—peʼe lagi tou tulemomoe! ʼE tonu ke tou hikihiki tatatou fakalogo ʼi te ʼu fono heʼe maʼuhiga te ʼu akonaki ʼaē ʼe fai ai. Kae ʼe tou lava hikihiki feafeaʼi tatatou fakalogo?

12. Koteā ʼaē ʼe feala ke tokoni mai ke faigafua age tatatou fakalogo ʼi te ʼu fono?

¹² Kapau neʼe tou teuteuʼi tatatou ʼu fono pea ʼe faigafua age tatatou fakalogo. Koia, ʼe maʼuhiga ai ke tou taupau he temi moʼo teuteuʼi te ʼu kiʼi akonaki ʼaē ka tou vakaʼi anai ʼi te ʼu fono. ʼE lagi ko ni ʼu kiʼi minuta pe ʼi te ʼaho fuli moʼo lau pea mo metitasioʼi te ʼu kapite ʼo te Tohi-Tapu ʼaē neʼe tuku mai ke tou vakaʼi ʼi te vāhaʼa fuli. Kapau ʼe ʼi ai hatatou polokalama, ʼe tou maʼu anai he temi moʼo teuteuʼi te Ako Tohi pea mo te Ako ʼo Te Tule Leʼo. Tatau aipe pe koteā te polokalama ʼaē neʼe tou fakatuʼutuʼu kiai, kae koʼeni te meʼa ʼaē ʼe maʼuhiga: Kapau ʼe tou teuteuʼi fakatomuʼa tatatou ʼu fono pea ʼe tou fakalogo anai ki te ʼu akonaki ʼaē ka fai ai.

13. Koteā ka tokoni mai ke tou fakalogo ki te ʼu akonaki ʼaē ʼe fai ʼi te ʼu fono?

¹³ ʼO hilifaki ki te teuteuʼi fakalelei ʼo te ʼu fono, ko ʼihi ʼe nātou fakalogo lelei mokā ʼe nātou heheka ʼi te ʼu hekaʼaga ʼi muʼa ʼo te Fale ʼo Te Puleʼaga. Ko te tahi ʼu meʼa moʼo puipui totatou ʼatamai ke mole manatu ki he tahi meʼa, ʼe tonu ke tou sio ki te tēhina ʼaē ʼe faiakonaki, pea mo tou mulimuli ʼi tatatou Tohi-Tapu ki te ʼu vaega ʼaē ʼe ina lau, pea mo tou tohi he ʼu kiʼi nota. Kae ʼe maʼuhiga age ʼi te ʼu meʼa fuli ʼaia ke tou teuteuʼi totatou loto. ʼE tonu ke tou mahino pe koʼe ʼe tou kau ki te ʼu fakatahi ʼaia. ʼE tou fakatahi mo totatou ʼu tēhina mo tuagaʼane moʼo tauhi kia Sehova. (Pesalemo 26:12; Luka 2:36, 37) Ko te ʼu fono ʼe ko he koga maʼuhiga ʼaia ʼe fafaga ai tatou ʼi te faʼahi fakalaumālie. (Mateo 24:45-47) Pea tahi, ʼe tou maʼu ʼi te ʼu fono ʼaia te ʼu fealagia ke tou ‘feʼugaʼaki ai ki te ʼofa pea mo he ʼu gāue lelei.’—Hepeleo 10:24, 25.

14. Koteā ʼaē ʼe maʼuhiga tāfito ke lelei ai he fono?

¹⁴ Ko ʼihi ʼe lagi mole nātou leleiʼia te fai ʼo te ʼu akonaki. ʼE feala pe ke tou ʼui ko he fono neʼe lelei, mo kapau neʼe lelei te faiakonaki ʼa te ʼu tēhina. Kae kapau ʼe hage ʼe mole lelei te ʼu akonaki, ʼe lagi feala ke tou manatu neʼe mole lelei te fono. ʼE moʼoni ko nātou ʼaē ʼe fai tanatou ʼu kiʼi akonaki ʼe tonu ke nātou fai fakalelei pea tāfito ke malave tanatou ʼu akonaki ki te loto ʼo te hahaʼi. (1 Timoteo 4:16) Kae kia tatou ʼaē ʼe fagono ki te ʼu akonaki ʼaia, ʼe mole tonu ke tou valokiʼi nātou. ʼE moʼoni ʼe tonu ke lelei te ʼu akonaki ʼaē ʼe fai kae ʼe mole ko te potu tāfito ʼaia ke ʼui neʼe lelei he fono. ʼE lagi koutou fakamoʼoni anai, ko te meʼa ʼaē ʼe maʼuhiga tāfito, ʼe mole ko te faiakonaki lelei ʼa te tēhina, kae ko tatatou faʼahiga fakalogo kiai. Ka tou kau ki te ʼu fono pea mo fakalogo ki te ʼu meʼa ʼaē ʼe fakahā ai, ʼe tou tauhi ki te ʼAtua ʼo mulimuli pe ki tona finegalo. Koʼena la te potu ʼaē ʼe ʼui ai ʼe lelei he fono. Kapau ʼe tou fia maʼu te ʼatamai mālama ʼo ʼuhiga mo te ʼAtua, ʼe tou tokaga anai ʼo fakalogo ʼi te ʼu fono, tatau aipe peʼe feafeaʼi te ʼu fealagia ʼo te tēhina. (Tāʼaga Lea 2:1-5) ʼAki te ʼu fakatuʼutuʼu fuli ʼaia, tou faiga mālohi “ke lahi age tatatou tokaga” ʼi tatatou ʼu fono.

Ke Tou Leleiʼia Tatatou Ako Takitokotahi

15. ʼE lava feafeaʼi ki te ako pea mo te metitasio ke fua lelei kia tatou?

¹⁵ ʼE fua lelei tatatou ako pea mo tatatou metitasio takitokotahi mokā ʼe ‘lahi age tatatou tokaga’ ʼi te ʼu temi ʼaia. ʼE tou maʼu te ʼu fealagia lahi ʼi tatatou fakapipiki te ʼu moʼoni ʼo te Folafola ʼa te ʼAtua ki totatou loto, mo kapau ʼe tou lau pea mo metitasioʼi te Tohi-Tapu, pea mo te ʼu tohi faka Tohi-Tapu. Kapau ʼe tou fai feiā, pea ʼe malave mālohi anai ki tatatou fakakaukau pea mo te ʼu meʼa ʼaē ʼe tou fai. ʼIo, ʼe tokoni mai anai ke tou fiafia ʼi te fai ʼo te finegalo ʼo Sehova. (Pesalemo 1:2; 40:8) Koia, ʼe tonu ai ke tou fakatuputupu tatatou fakalogo ke tou maʼu tona ʼu fua lelei mokā ʼe tou ako. ʼE faigafua hotatou fakaleluʼi! Ko he ʼu kiʼi meʼa noa pe—ohage la ko te tagi ʼo te telefoni peʼe ko he kiʼi logoaʼa. Peʼe lagi ʼe siʼisiʼi pe tatatou fakalogo. ʼE lagi ʼe tou fia ako moʼo fafaga tatou ʼi te faʼahi fakalaumālie, kae mole faʼa fualoa kiai ko totatou ʼatamai kua manatu ia ki he tahi meʼa. ʼE lava feafeaʼi “ke lahi age tatatou tokaga” ʼi te ʼu temi ʼaē ʼe tou ako takitokotahi ai te Folafola ʼa te ʼAtua?

16. (a) He koʼe ʼe maʼuhiga kia tatou ke tou fakatuʼutuʼu he temi ki tatatou ako takitokotahi? (b) ʼE tou lava maʼu feafeaʼi hotatou temi ki te ako ʼo te Folafola ʼa te ʼAtua?

¹⁶ ʼE lelei ke fai hatatou polokalama pea mo filifili he ʼaluʼaga lelei ke tou fai ai tatatou ako. Ko ʼihi ia tatou, ʼe mole lahi totatou temi. ʼE feala ke hage kia tatou ʼe mole feala ke tou fai he meʼa heʼe gaholo vave te ʼaho. ʼE moʼoni, ʼe tonu ke tou faigaʼi ke mole kaihaʼa totatou temi e te ʼu meʼa ʼo te temi nei, pea mo tou tuku he temi ki tatatou ako. ʼE mole tonu pe ke tou fakalogo ki he temi faigamālie moʼo fai te faʼahi ʼaia. Kae ke tou popoto ʼi te fakaʼaluʼalu ʼo tatatou ʼu gāue ke tou maʼu ai he temi ki tatatou ako. (Efeso 5:15, 16) Ko ʼihi ʼi te uhu ʼe nātou fakaʼaogaʼi he kiʼi temi ki te faʼahi ʼaia, heʼe mole lahi te ʼu meʼa ʼaē ʼe nātou fakaleluʼi ai nātou. Ko ʼihi ʼe nātou leleiʼia age te afiafi. Ko te meʼa ʼaē ʼe maʼuhiga kia tatou, ʼe tonu ke tou maʼu te ʼatamai mālama ʼo ʼuhiga mo te ʼAtua pea mo tona ʼAlo. (Soane 17:3) Koia, tou fakatuʼutuʼu he temi ki tatatou ako takitokotahi pea ke tou mulimuli tuʼumaʼu ki tatatou polokalama ʼaia.

17. Koteā te metitasio, pea koteā anai tona ʼaoga kia tatou?

¹⁷ ʼE maʼuhiga ʼaupito tatatou metitasio heʼe ʼi te temi ʼaia ʼe tou fakakaukauʼi ai te ʼu meʼa ʼaē neʼe tou ako. ʼE tokoni mai te metitasio ʼaia ke tou fakahū ki totatou loto, te ʼu manatu ʼa te ʼAtua ʼaē neʼe tohi ʼi te pepa. ʼE tou mahino ʼaki te metitasio peʼe feafeaʼi hatatou fakaʼaogaʼi te tokoni faka Tohi-Tapu, ke feala ai ke tou “mauliʼi te folafola, kae mole [tou] fakalogo’pe.” (Sakopo 1:22-25) Tahi ʼaē, ʼe tou fakaōvi kia Sehova ʼaki te metitasio, heʼe ina faka fealagia ke tou fakakaukauʼi tona ʼu kalitate, pea mo tou mahino peʼe faka maʼuhigaʼi feafeaʼi ʼi te ʼu alatike ako ʼaē ʼe tou vakaʼi.

18. Koteā te ʼu ʼaluʼaga ʼaē ʼe ʼaoga moʼo fai he metitasio ʼe lelei?

¹⁸ Ke tou maʼu te ʼu fua lelei ʼo te ako pea mo te metitasio, ʼe tonu ke tou taupau maʼu he ʼatamai tāsilo, ke mole ʼi ai he ʼu meʼa ʼe nātou fakaleluʼi. Ke tou maʼu he manatu foʼou ʼi te temi ʼaē ʼe tou metitasio ai, ʼe tonu ke tou situʼa ki te ʼu meʼa ʼaē ʼe nātou fakaleluʼi tatou ʼi te temi nei. Ko te fai ʼo te faʼahi ʼaia, ʼe fakamaʼua he temi kiai pea mo tou ʼāteaina, kae ʼe ko he meʼa fakaloto fīmālie te fakaʼaogaʼi ʼo te meʼa kai fakalaumālie pea mo te vai ʼo te ʼu moʼoni ʼaē ʼe tou maʼu ʼi te Folafola ʼa te ʼAtua!

19. (a) ʼO ʼuhiga mo te ako takitokotahi, koteā ʼaē neʼe tokoni ki ʼihi ke nātou hikihiki tonatou temi ako? (b) ʼE tonu ke faka ʼuhiga feafeaʼi te ako, pea koteā tona ʼu fua lelei ka tou maʼu ai?

¹⁹ Kae e feafeaʼi la mo kapau ʼe mole heʼeki fualoa tatatou ako kae kua tou manatu ki he tahi meʼa? Ko ʼihi ʼe nātou hikihiki tanatou faʼahiga tokaga mokā ʼe nātou ako ʼi he ʼu kiʼi temi nounou pea ʼaki te temi ʼe nātou fakaloaloaga atu te ako ʼaia. ʼE tou fakatuʼutuʼu ke tou fakaʼaogaʼi he temi feʼauga ki te ako, kae ke ʼaua naʼa tou fai fakavilivili. ʼE tonu ke tou holi mālohi ki te ako ʼaē ka tou fai. Pea ʼe feala ke tou fai he tahi ʼu kumi ʼo tou fakaʼaogaʼi te ʼu tuʼuga tohi ʼaē neʼe foaki mai e te tagata kaugana agatonu mo poto. ʼE maʼuhiga ʼaupito mokā ʼe tou vakaʼi “te ʼu meʼa loloto ʼa te ʼAtua.” (1 Kolonito 2:10, MN ) Kapau ʼe tou fai te faʼahi ʼaia, pea ʼe tou lava hikihiki ai tatatou ʼiloʼi ia te ʼAtua pea mo fakatuputupu tatatou fealagia fakakaukau. (Hepeleo 5:14) Kapau ʼe tou ako fakalelei te Folafola ʼa te ʼAtua, pea ʼe tou liliu anai ʼo “popoto moʼo akoʼi ʼo ʼihi.”—2 Timoteo 2:2, MN.

20. ʼE tou lava fakatuputupu pea mo taupau feafeaʼi he ʼu felogoi lelei mo Sehova ʼAtua?

²⁰ ʼE tokoni lahi anai kia tatou tatatou kau ki te ʼu fono pea mo tatatou ako takitokotahi ke tou fakatuputupu pea mo taupau he ʼu felogoi lelei mo Sehova. ʼE mahino ia, neʼe feiā te ʼaluʼaga ʼo te tagata fai pesalemo ʼaē neʼe ina ʼui fēnei ki te ʼAtua: “ ʼE ʼau ʼofa ʼaupito ki tau lao! ʼI te ʼaho fuli pe ʼe ʼau manatu kiai.” (Pesalemo 119:97) ʼAki te ʼu meʼa fuli ʼaia, tou kau tuʼumaʼu ki te ʼu fono, pea mo te ʼu fakatahi lalahi. Pea ʼofa pe ke tou totogi te temi moʼo ako pea mo metitasioʼi te Tohi-Tapu. ʼE tou maʼu anai te fakapale lahi mokā ʼe “lahi age tatatou tokaga” ki te Folafola ʼa te ʼAtua.

[Kiʼi nota]

Kei Koutou Manatuʼi Koa?

• He koʼe neʼe mavae ʼihi Kilisitiano Hepeleo mai te tui moʼoni?

• ʼE tou lava tokaga feafeaʼi ki te ʼu fono faka Kilisitiano?

• Koteā anai te tokoni ka ʼaoga kia tatou ke tou maʼu ai he ʼu fua lelei ʼi tatatou ako takitokotahi pea mo tatatou metitasioʼi te Tohi-Tapu?

[Paki ʼo te pasina 11]

Neʼe tonu ke fakatokaga ki te kau Kilisitiano Hepeleo te fakaʼauha ʼaē neʼe ʼamanaki hoko ki Selusalemi

[Paki ʼo te pasina 13]

ʼE lava tokoni te ʼu mātuʼa ki tanatou ʼu fānau ke nātou maʼu te ʼu fua lelei ʼo te ʼu fono faka Kilisitiano