ʼE Fua Lelei Koa Kia Koutou?
1 Ko te lauʼi miliona hahaʼi ia ʼaho nei, ʼe nātou fia ʼiloʼi peʼe feafeaʼi te tauʼi ʼo te ʼu fihifihia pea mo maʼu he maʼuli fiafia. ʼE nātou leleiʼia ʼaupito te ʼu tohi fai tokoni ʼo te temi nei, peʼe nātou kumi tokoni ki ni ʼu hahaʼi pea mo ni ʼu kautahi, ke lava hikihiki ai tonatou maʼuli. Lagi ko ʼihi ʼe nātou ʼui anai neʼe mole nātou maʼu he ʼu fua lelei ʼaki te ʼu tohi ʼaia pea mo te ʼu kautahi ʼaia. Kae ʼo mulimuli ki te ʼaluʼaga ʼo te maʼuli ia ʼaho nei, kua maʼu koa e te hahaʼi he maʼuli tokalelei pea mo fakafiafia, ʼi te ʼu polokalama ako fakatagata? ʼE tou lava ʼui ʼe faigataʼa te faʼahi ʼaia!—1 Ko. 3:18-20.
2 ʼI te tahi faʼahi, ko totatou Tupuʼaga ʼe ina tuku mai te ako ʼaē ʼe maʼuhiga ʼaupito kia nātou fuli ka nātou fakalogo anai kiai. ʼE loto e Sehova ke maʼu e te hahaʼi fuli te ʼu lelei ʼo tana faiakonaki. ʼAki he loto manavaʼofa, neʼe ina foaki tana Folafola moʼo takitaki te malamanei ʼi te faitotonu, pea neʼe ina fai ke tala te logo lelei ʼo tona Puleʼaga ʼi te kele katoa. (Pes. 19:7, 8; Mat. 24:14; 2 Tim. 3:16) Ko te maʼuli fiafia moʼoni ʼe pipiki tāfito ia ki tatatou tokagaʼi te ʼu fakatotonu ʼa Sehova.—Isa. 48:17, 18.
3 Ko te ʼu tokoni ʼa Sehova ʼe māʼoluga age ia ʼi te ʼu tokoni ʼaē ʼe maʼu ʼi te ʼu tohi ʼo te temi nei peʼe ko te ʼu fakatuʼutuʼu ʼaē ʼe fai e te malamanei moʼo hikihiki te maʼuli ʼo te hahaʼi. ʼE feala ke tou maʼu he tokoni moʼoni pea mo he ʼu lelei heʼegata mo kapau ʼe tou fakaʼaogaʼi katoa te ʼu fakatuʼutuʼu ʼa Sehova ʼaē ʼe tuʼu ʼi tana Folafola pea mo te ʼu fakatuʼutuʼu ʼaē ʼe ina akoʼi mai ʼi tana kautahi.—1 Pet. 3:10-12.
4 Koutou Fakaʼaogaʼi Lelei Te ʼu Fono ʼo Te Kokelekasio: Ia ʼaho nei, ʼe fakahā mai e Sehova ʼe tokaga moʼoni kia tatou, heʼe ina akoʼi mai tana ʼu ala, pea ʼe fua lelei kia tatou mo kapau ʼe tou fakaʼaogaʼi te ʼu meʼa ʼaē ʼe ina akoʼi mai. Ko te ʼu fono e nima ʼo te vāhaʼa fuli ʼe ko he fakamoʼoni ʼaia ʼo te ʼofa ʼa Sehova kia tatou. Ka tou kau ki te ʼu fono ʼo te kokelekasio, pea ʼe tuputupu ai tatatou ʼatamai mālama ʼo ʼuhiga mo te ʼAtua. ʼE tou ako ai peʼe feafeaʼi he puipui ʼo tatou mai te meʼa ʼaē ʼe kovi, ʼaki tatatou fakaōvi kia Sehova. ʼI tatatou fai te faʼahi ʼaia ʼe fakaloto mālohiʼi ai totatou ʼu ʼatamai.
5 Kae ʼe mole gata ai. ʼI te ʼu fono ʼo te kokelekasio ʼe feala ke tou ‘fakaāva lahi ia tatou.’ (2 Ko. 6:13) Ko tona faka ʼuhiga, ke tou feʼiloʼiʼaki mo niʼihi ʼi te kokelekasio. ʼE tou maʼu ai he fefakaloto mālohiʼaki, ohage ko tona ʼui e te ʼapositolo ko Paulo ʼi tana tohi ki te kau Loma. (Loma 1:11, 12) ʼI tana faitohi ʼaē ki te kau Hepeleo, neʼe ina fai te ʼu fakatokaga mālohi kia nātou ʼaē neʼe ko he agamāhani tanatou līaki te ʼu felogoi faka Kilisitiano.—Hep. 10:24, 25.
6 Ko te maʼuli fakafiafia ʼe pipiki tāfito ki takita tokaga ki te meʼa ʼaē ʼe lelei ki niʼihi. ʼE fakaloto mālohiʼi tatou ke tou kumi he ʼu faʼahiga ʼaluʼaga moʼo lagolago ki te fiafia ʼa niʼihi. Koia, ko tatatou ʼu fono faka Kilisitiano, ʼe fua lelei kia tatou pea mo nātou ʼaē ʼe ko he ʼu fakakaugā lelei kia tatou. Pea ʼe fakamaʼua kia tatou, ke tou kau kiai ʼaki he loto katoa.
7 Neʼe talanoa te ʼapositolo ko Paulo ki te puani ʼaia ʼi tana tokoni kia Timoteo, he neʼe ina tohi fēnei: ‘Ke ke akoako ki te aga faka lotu.’ (1 Tim. 4:7) Tou fai te fehuʼi ʼaenī kia tatou totonu: ‘ ʼE ʼau ako koa? ʼE akoʼi koa ia ʼau ke ʼau maʼu he ʼu fua lelei ʼi te ʼu meʼa ʼaē ʼe ʼau logo kiai ʼi te ʼu fono ʼo te kokelekasio?’ ʼE tou ʼio anai ki te ʼu fehuʼi ʼaia mo kapau ʼe tou tokakaga ʼo fakalogo ʼi te ʼu fono, pea mo faiga ke tou maʼuliʼi te ʼu meʼa ʼaē ʼe tou akoʼi. ʼAki tatatou tui, ʼe tonu ke tou maʼu te sio mamaʼo, ke mole gata ʼaki pe tatatou sio ki te ʼu tēhina ʼaē ʼe nātou fai te ʼu akonaki, kae ke tou sio ʼe ko Sehova te Faiako Lahi ʼo tana hahaʼi.—Isa. 30:20.
8 Te Ako ʼo Te Minisitelio Faka Teokalatike Pea Mo Te Fono Gāue: Neʼe fakatuʼutuʼu te ʼu fono ʼaia e lua moʼo tokoni kia tatou ke tou faiva ʼi te minisitelio faka Kilisitiano. Neʼe fai tāfito te Ako ʼo Te Minisitelio Faka Teokalatike ki te faʼahi ʼaia—ko he ako ʼe kau kiai te kau ako, pea ʼe fai tuʼumaʼu kia nātou he ako pea mo he ʼu tokoni. ʼE koutou maʼu te faigamālie ʼaē ke koutou fakahā takotou tuputupu ʼi takotou ʼu kiʼi akonaki ʼi muʼa ʼo te kaugamālie, pea mo takotou fakaʼaogaʼi te Folafola ʼa te ʼAtua. Kae kapau ʼe tou fia maʼu katoa te ʼu lelei ʼo te ako, pea ʼe tonu ke koutou ʼolo ʼo tohi tokotou higoa ki te ako ʼaia, ke koutou kau kiai, mo lagolago tuʼumaʼu kiai, pea mo fai fakalelei takotou ʼu kiʼi akonaki ʼaē ʼe foaki atu. ʼE koutou tuputupu anai, mo kapau ʼe koutou tali pea mo fakaʼaogaʼi te ʼu tokoni ʼaē ʼe fai atu.
9 ʼE akoʼi mai e te Fono Gāue te maʼuhiga ʼo te minisitelio faka Kilisitiano, pea mo ina fakahā mai peʼe feafeaʼi hatatou kau ki te gāue ʼaē ko te fai ʼo ni ʼu tisipulo. ʼE ʼaoga katoa koa kia koutou pea mo tokotou famili te ʼu tokoni ʼaē ʼe foaki atu ʼi te ʼu fono ʼaia e lua? ʼE ʼui fēnei e te taumatuʼa Kilisitiano: “ ʼI te tahi Fono Gāue, neʼe ma logo ai ʼe tonu ʼi te ʼaho fuli, ke tou lau faka famili te kogaʼi tohi ʼo te ʼaho. Neʼe mole ma fai te faʼahi ʼaia, kae ʼi te temi nei kua ma fai.” Neʼe feafeaʼi tona fua lelei kia nāua? Neʼe nā ʼui fakahagatonu fēnei: “Kua fakafiafia ʼaupito tamā ʼu fai palalau ʼi te temi kai. ʼE mole kei ma fefihiʼaki ʼi te temi kai.” ʼE toe fua lelei koa ki tanā ʼu tamaliki te ʼu fono ʼaia? Ei. ʼE ʼui fēnei e te faʼe ʼaia: “Kua ma fakatokagaʼi ʼe malave ʼaupito kia nātou te ʼu fono. ʼI te tahi ʼaho neʼe ma maʼutokā ʼe gutuloi tamā kiʼi tamasiʼi tagata ʼaē kei taʼu ono. Kae ko te fono ʼo te vāhaʼa tonu ʼaia, neʼe talanoa te ʼuluaki fono ki te loi. Neʼe sioʼi e tamā kiʼi tama tana tāmai, pea neʼe hā ʼi tona fofoga tana mahino ʼaē ʼe kovi te aga ʼaia, pea mo tana ufiufi. Neʼe ko he ako kia ia, heʼe ki muli age neʼe mole toe loi.”
10 ʼE ʼui e te tuagaʼane pionie, ʼe fiafia ki te ʼu tokoni ʼaē ʼe foaki mai ʼi te Fono Gāue moʼo fakatuputupu totatou minisitelio. Koteā tona tupuʼaga? ʼE ina fakamahino fēnei: “Neʼe kua tatau tuʼumaʼu taku faʼahiga fai ʼo taku minisitelio. ʼI ʼihi temi, ʼe ʼau manatu ai ʼe mole kei ʼaoga te ʼu tokoni ʼaē ʼe fai mai ʼi Te Minisitelio ʼo Te Puleʼaga. Kae ʼi te Fono Gāue, ʼi taku logo ʼaē ʼe tonu ke tou ʼahiʼahiʼi ʼi te minisitelio te ʼu tokoni ʼaē ʼe tuku mai, neʼe ʼau loto fiafia ai ke ʼau fakaʼaogaʼi. ʼE liliu ai te minisitelio ko he meʼa fakafiafia!” Hili ʼaia te ʼu vāhaʼa ʼi tana fakaʼaogaʼi te tokoni ʼaē ke ina kamata he ako Tohi-Tapu ʼi te ʼuluaki ʼaʼahi, neʼe ina kamata ai tana ako mo te kiʼi taʼahine neʼe faikole ke tokoni age he tahi kia ia.
11 Kapau ʼe koutou fagono ki he akonaki ʼe fai mai ai he tokoni faka Tohi-Tapu ʼo ʼuhiga mo te ʼu meʼa ʼaē ʼe koutou filifili takitokotahi, pea ʼe koutou logoʼi koa ʼi tokotou loto ʼe ko Sehova ʼaē ʼe palalau fakahagatonu atu kia koutou? Neʼe hoko te meʼa ʼaia ki te tēhina faifekau faka minisitelio. Neʼe ina ʼui fēnei: “Mole heʼeki faʼa fualoa ʼi te tahi fono, neʼe fai e te tēhina te akonaki ʼe ina ʼui ai pe ko te ʼu faʼahiga fakafiafia fea ʼaē ʼe lelei ki te kau Kilisitiano, pea ko te ʼu faʼahiga fakafiafia fea ʼaē ʼe mole lelei. Neʼe ʼau fia sio ki te ʼu fuhu ʼaē ʼe fakahāhā ʼi te televisio. Kae ʼi te hili ʼo te fono ʼaia, neʼe mahino ai kia ʼau, ko te taʼi faigaoʼi ʼaia ʼe kau ki te ʼu fakafiafia ʼaē ʼe mole lelei ki he kau Kilisitiano. Koia ʼi te temi nei ʼe mole kei ʼau sioʼi te taʼi faigaoʼi ʼaia.” Ei, logola ko te tēhina ʼaia neʼe kua fakahaʼuhaʼu ʼo ina leleiʼia te agamālohi ʼaia, kae ʼaki he agavaivai neʼe ina tali te ʼu tokoni ʼa Sehova.—Pes. 11:5.
12 Te Akonaki Ki Te Kaugamālie, Te Ako ʼo Te Tule Leʼo, Pea Mo Te Ako Tohi ʼo Te Kokelekasio: ʼE kehekehe te ʼu puani faka Tohi-Tapu ʼaē ʼe talanoa kiai ʼi te ʼu akonaki ʼaē ʼe fai ʼi te vāhaʼa fuli ki te kaugamālie. Koteā te ʼu lelei ʼaē ʼe koutou maʼu ʼi te ʼu akonaki ʼaia? Neʼe ʼui fēnei e te tagata ʼohoana Kilisitiano ʼo ʼuhiga mo te ʼu lelei ʼaē neʼe ina maʼu ai: “Ko te tahi akonaki neʼe ina fakamahinohino lelei te ʼu fua fuli ʼo te laumālie. Neʼe ʼui e te tēhina, ko te meʼa ʼaē ʼe ina fai, ʼe ina filifili he kalitate e tahi pea mo ina gāueʼi ʼi he vāhaʼa katoa, ke feala hana gāueʼi te ʼu fua kehekehe ʼo te laumālie. ʼI te fakaʼosi vāhaʼa, neʼe ina fakakaukauʼi pe neʼe fakahā feafeaʼi te kalitate ʼaia ʼi tana ʼu gāue ʼo te ʼaho fuli. ʼOsi ʼaia pea neʼe ina gāueʼi te tahi kalitate ʼi te tahi vāhaʼa. Neʼe ʼau leleiʼia te manatu ʼaia pea neʼe ʼau kamata muliʼi te faʼifaʼitaki ʼaia.” ʼE ko he fakaʼaogaʼi lelei ʼo te meʼa ʼaē neʼe ina akoʼi!
13 Ko te Ako ʼo Te Tule Leʼo ʼe ina akoʼi tatou ke tou maʼuliʼi te ʼu pelesepeto faka Tohi-Tapu ʼi te ʼu ʼaluʼaga kehekehe ʼo totatou maʼuli. ʼE tokoni mai ke tou maʼu he ʼatamai pea mo he loto fakatokatoka logola te ʼu fihifihia ʼo te maʼuli. ʼE toe fakahā mai foki e te Ako ʼo Te Tule Leʼo ia te ʼu fakamahinohino māmālie ʼo te moʼoni. Ohage la, neʼe ʼaoga kia tatou te ʼu alatike ako ʼo Te Tule Leʼo ʼo te ʼaho 1 ʼo Maio 1999, koʼeni tona ʼu kupu tāfito: “Heʼe Tonu Ke Hoko Te ʼu Meʼa ʼAia,” “Ke Fakasiosio Lelei Ia Ia ʼAē ʼe Lautohi,” pea “Tou Nofo Tokaga Pea Mo Faʼa Gāue!” Neʼe malave feafeaʼi te ʼu alatike ako ʼaia kia koutou takitokotahi? Neʼe koutou fakahā koa ʼi takotou aga ʼe koutou tokagaʼi katoa te fakatokaga ʼa Sesu ʼo ʼuhiga mo te ka haʼu? ʼE koutou teuteu koa ia koutou ki te ʼu ʼahiʼahi ʼaē ka hoko, ʼi te temi ʼaē ka tou sio ai “ki te meʼa fakalialia ʼaē ʼe ina fakatupu te maumau . . . ʼe tuʼu ʼi he potu tapu”? (Mat. 24:15-22, MN ) ʼE hā ʼaki koa takotou ʼu fakatuʼutuʼu pea mo tokotou maʼuli, ko te meʼa ʼaē ʼe maʼuhiga kia koutou ʼe mole ko te faiga ki te ʼu koloā fakamālama, kae ko te tāpuhā ʼo te huafa ʼo Sehova? ʼI te ʼu alatike Ako ʼo Te Tule Leʼo, ʼe mole koa la tou ako ke fua lelei kia tatou ʼi te temi nei?
14 Koutou fakakaukauʼi age muʼa te ʼu meʼa ʼaē ʼe tou ako ʼi te vāhaʼa fuli ʼi te Ako Tohi. ʼI te temi nei ʼe tou lolotoga ako te tohi Manuʼia Faka Famili. ʼI te ʼu māhina e fā ʼaē neʼe tou ako ai te tohi ʼaia, neʼe mole tou fakatokagaʼi koa la te tuputupu ʼo tatatou tui ʼi te vāhaʼa fuli? ʼI tatatou maʼuliʼi te ʼu tokoni ʼa Sehova, ʼe tou fakamālohiʼi ai tatatou tui ke tou haga faʼa kātaki.
15 ʼE Akoʼi Tatou e Sehova Ke Tou Maʼuli Fiafia: ʼE tou fakamamaʼo ia tatou te lotomamahi mo kapau ʼe tou fakaʼaogaʼi te ʼu fakatotonu ʼa te ʼAtua. Tahi ʼaē meʼa, ʼe mahino kia tatou pe koteā te ʼuhiga ʼo te maʼuli fiafia. Kapau ʼe tou muliʼi te takitaki ʼa Sehova, pea ʼe tou kau anai ki tana gāue, ka mole gata ʼaki pe tatatou logo kiai. Pea ʼe maʼuli fiafia te hahaʼi ʼaē ʼe nātou fai te gāue ʼa te ʼAtua.—1 Ko. 3:9; Skp. 1:25.
16 Koutou fakakaukauʼi fakalelei peʼe feafeaʼi anai hakotou maʼuliʼi te ʼu meʼa ʼaē ʼe koutou logo kiai ʼi te ʼu fono ʼo te kokelekasio. (Soane 13:17) Koutou tauhi fakafiafia ki te ʼAtua, ʼaki tokotou loto katoa. ʼE lahi anai takotou fiafia. ʼE tapuakina anai tokotou maʼuli, pea mo lelei ʼaupito. Ei, ʼe koutou maʼu anai he ʼu fua lelei.