Te Foaki Kae Faigataʼaʼia

“ ʼE KE lava faka higoaʼi ʼau ko he tahi ʼe kai nono, ʼe mole ʼau ʼita anai. ʼE ʼau kai kolekole maʼa Sesu.” ʼE hā lelei ʼi te ʼu palalau ʼaia neʼe fai e te tagata minisi ʼo te Lotu Polotesita te ʼu faigataʼaʼia ʼe maʼu e te ʼu lotu ʼo ʼuhiga mo te foaki ʼo te falā maʼa te lotu. ʼE hage ʼe fakalogo te haʼele ʼo he lotu mo kapau ʼe lahi tana falā. ʼE ʼaoga he falā moʼo totogi te hahaʼi, moʼo laga pea mo fakafoʼou te ʼu fale lotu, moʼo totogi te faka mafola ʼo te evaselio. ʼE maʼu feafeaʼi te falā moʼo totogi te ʼu faʼahi fuli ʼaia?

ʼE lahi te ʼu lotu ʼe nātou ʼui, ʼe tonu ke totogi he time.a ʼE ʼui fēnei e te tagata fai evaselio ko Norman Robertson: “Ko te totogi ʼo te time ʼe ko he faʼahiga puleʼaki neʼe fai e te ʼAtua moʼo lagolago faka paʼaga ki Tona puleʼaga ʼaē ʼi te kele . . . ʼE ko te faʼahiga fakatuʼutuʼu faka ekonomika ʼa te ʼAtua moʼo faka fealagia ke faka mafola ia te Evaselio.” ʼI tana fakamanatuʼi ki tana kau tisipulo ke mole nātou lotolotolua ʼo ʼuhiga mo tonatou maʼua ʼaē ke nātou foaki he falā, ʼe ina ʼui fakamālohi fēnei: ‘ ʼE mole koutou foaki te time ʼuhi heʼe koutou lavaʼi. ʼE koutou foaki heʼe koutou fakahā ai takotou fakalogo. Kapau ʼe mole koutou totogi te time, ʼe mahino ia ʼe koutou talagataʼa ki te ʼu folafola ʼa te ʼAtua. ʼE ko hakotou kaihaʼa.’—Tithing—God’s Financial Plan.

ʼE lagi ʼe koutou fakamoʼoni ko te foaki ʼe kau ki te tauhi faka Kilisitiano. Kae ʼe koutou sio koa ki he ʼu kole falā fakakinau, ʼe lagi mole lelei? Ko te tagata Pelesile fai teolosia ko Inácio Strieder ʼe ina tukugakoviʼi te ʼu ʼēkelesia ʼi tanatou fakaʼaogaʼi te totogi ʼo te time moʼo “fakatokatoka ʼo tanatou faʼufaʼu” pea ʼe ina faka higoaʼi te ʼu taʼi aga ʼaia “ ʼe kākā, ʼe fefeka pea ʼe ina fulihi kehe te fakatuʼutuʼu faka teolosia.” ʼE ina fakahā, ʼe iku te ʼaluʼaga ʼaia “ki te ʼui e te hahaʼi ʼaē ʼe mole maʼu gāue, mo te kau vitua, mo te hahaʼi ʼe nonofo ʼi te ʼu nofoʼaga fakaʼofaʼofa, pea mo te hahaʼi ʼaē ʼe mole nātou mahino lelei ki te meʼa ʼaia, ko te ʼAtua kua situʼa kia nātou pea ʼe tonu ke lahi age tanatou foaki ki te ‘tagata fai faka mafola’ ʼi tonatou famili totonu logola ʼe maʼuli fakaʼofaʼofa.”

ʼE lagi ʼe koutou feʼekeʼaki anai: ‘Ko te ʼu lotu ʼaē ʼe nātou fakamaʼua ke totogi te time ʼe nātou mulimuli koa ki te Tohi-Tapu? Peʼe fakaʼaogaʼi koa e ʼihi lotu ia te mataku ki te tautea ʼa te ʼAtua moʼo kaihaʼa ai te faga ōvi? ʼI tona fakahagatonu, ʼe fakamaʼua mai koa e te ʼAtua ke tou foaki age logola ʼe tou faigataʼaʼia?’

[Kiʼi nota]