Te Tupu ʼa Sesu—Neʼe Feafeaʼi Pea Neʼe Koteā Tona Tupuʼaga?

“ ʼE MOLE feala ia!” Tokolahi ʼi te hahaʼi ʼe mole ko he kau Kilisitiano ʼe nātou palalau feiā anai ʼi tanatou logo ki te fakamatala ʼo te tupu ʼa Sesu. Kia nātou ʼe mole ʼalutahi mo te poto fakatagata, te tui neʼe feala ki he taʼahine taupoʼou ke faitama pea mo fānauʼi he tama kae neʼe mole hana ʼu felāveʼi fakasino mo he tagata. Koteā takotou manatu?

ʼI te 1984, ko te sulunale The Times ʼi Lonitoni, neʼe ina tā te tohi neʼe vakaʼi ai te faʼahi ʼaia, ʼo ina ʼui fēnei: “ ʼI tona ʼuhiga moʼoni, ʼe mole tonu ke fakaʼaogaʼi te poto fakatagata moʼo tauʼi te ʼu milakulo. Ko te tui ʼaē ko te ʼu milakulo ʼe mole feala ke hoko ʼe hage pe ko takita tui ʼe feala ke hoko.” Neʼe sinie te tohi ʼaia e te ʼu polofesea e toko 14 ʼo te ʼu univelesitē ʼo Grande-Bretagne. Neʼe nātou ʼui fēnei: “ ʼE mātou tali lelei te faitama ʼo te taupoʼou, mo te ʼu milakulo ʼi te ʼu Evaselio, pea mo te fakatuʼuake ʼo Kilisito ko he ʼu meʼa neʼe hoko ʼi te hisitolia.”

Kae ʼe tou mahino mokā punamaʼuli he tahi ʼi tana ʼuluaki logo ki te hisitolia ʼo te fānauʼi e he taupoʼou ia Sesu. Ko te faʼe totonu ʼa Sesu ʼaē neʼe taupoʼou neʼe punamaʼuli ʼi te ʼui fēnei age ʼa te ʼaselo ʼa te ʼAtua: “E ke fuafatu anai, e ke faelei anai he tama, pea e ke fakahigoa anai ia ko Sesu.” Moʼo tali kiai, neʼe fehuʼi fēnei e Malia: “Pe feafeai anai koteuhi e mole au iloi he tagata?” Neʼe fakamahino leva e te ʼaselo neʼe fakahoko e te ʼAtua te milakulo ʼaia ʼaki Tona laumālie maʼoniʼoni, ʼo ina toe ʼui fēnei: “E mole he mea e mole fealagia aki te Atua.” (Luka 1:​31, 34-37) ʼE mahino ia, ko Ia ʼaē neʼe ina fakatupu te meʼa faigataʼa ʼaē ko te fanaunau neʼe feala pe foki ke ina fai ke faitama he taupoʼou pea mo ina fānauʼi Sesu. Kapau neʼe fakatupu e te ʼAtua ia te ʼatulaulau pea mo tona ʼu lao totonu, pea neʼe feala pe ke ina fakaʼaogaʼi te ovule ʼo Malia ke tupu ai tona ʼAlo ko he tagata haohaoa.

Tona Tupuʼaga

Ko te tagata tauhi ki te ʼAtua ko Sosefo neʼe kua fakatahi mo Malia ʼi te temi ʼaē neʼe faitama ai. ʼI te moemisi, neʼe fakamahino e te ʼaselo ʼa te ʼAtua kia Sosefo te tupuʼaga fakaofoofo ʼo te faitama ʼo te taʼahine taupoʼou ʼaē neʼe fakatahi mo ia. Neʼe ʼui fēnei e te ʼaselo: “Aua naa ke tuania tau too Malia, tou ohoana, he ko te mea ae ia te ia, e ʼa te Laumalie-Maonioni. E ina faelei anai he tama, pea e ke fakahigoa anai ko Sesu; he ina fakamauli anai tana hahai mai anatou agahala.” (Mateo 1:​20, 21) ʼI te faka Hepeleo, ko te huafa ʼo Sesu ʼe faka ʼuhiga “Ko Sehova ʼe Ko Te Fakamaʼuli.” ʼE fakamanatuʼi mai kia tatou te ʼaoga ʼaē ke hāofaki tatou mai te agahala pea mo te mate, pea ko te fakatuʼutuʼu ʼa Sehova ʼAtua ke hāofaki te hahaʼi ʼo fakahoko ʼaki ia Sesu.

ʼUhi ʼaē neʼe agahala te ʼuluaki tagata, ia Atama, ko tona hōloga katoa neʼe tutupu agahala, pea mo nātou tautau talagataʼa ki te ʼu lao ʼa te ʼAtua. (Loma 5:​12) ʼE lava hāofaki feafeaʼi te hōloga ʼo Atama mai te agahala pea mo nātou maʼu te ʼuhiga haohaoa? Ko te tahi maʼuli haohaoa, ʼe tatau mo te maʼuli ʼo Atama, neʼe tonu ke foaki ke fakahoko ai te faitotonu. Ko tona tupuʼaga la ʼaia ʼo te fakatupu faka milakulo e te ʼAtua te tagata haohaoa ko Sesu, pea mo te tuku e Sesu ke matehi ia ia e tona ʼu fili. (Soane 10:17, 18; 1 Timoteo 2:​5, 6) Hili te fakatuʼuake pea mo te hake ʼa Sesu ki selo, neʼe feala ke ina ʼui fēnei ʼaki he loto falala: “Nee au mate, pea koeni, e au mauli ki te u sekulo mo te u sekulo, pea e au puke te u kalavi o te mate mo Hatesi [te faitoka].”​—Apokalipesi 1:​18.

ʼAki te ʼu kalavi fakatātā ʼo te mate pea mo te Hatesi, ʼe foaki e Sesu te fealagia ki te hahaʼi agahala ke nātou toe maʼu te meʼa ʼaē neʼe pulihi e Atama. Neʼe fakamahino fēnei e Sesu: “E ko au te Tuuʼake mo te Mauli; ko ae e tui mai kia te au, kapau e mate pea e mauli anai ia; pea ko ae e mauli mo tui mai kia te au e mole mate ia o heegata.” (Soane 11:25, 26) Ko he fakapapau fakatalakitupua! Kae ʼe ʼi ai te tahi tupuʼaga lahi age ʼo te tupu ʼa Sesu.

Te Tupuʼaga Maʼuhiga

Neʼe mole kamata te maʼuli ʼo Sesu ʼi te fatu ʼo Malia. Neʼe ina ʼui fakalelei fēnei: “Neʼe ʼau hifo mai te lagi.” (Soane 6:​38, MN ) Neʼe maʼuli Sesu ia ʼi te ʼu potu fakalaumālie mo tana Tāmai ʼi selo, talu mai te kamata ʼo te fakatupu. ʼI tona fakahagatonu, ʼe ʼui e te Tohi-Tapu ʼo ʼuhiga mo ia ko “te kamataʼaga ʼo te ʼu meʼa ʼaē neʼe fakatupu e te ʼAtua.” (Apokalipesi 3:​14, MN ) Mai lagi, neʼe sio Sesu ki te agatuʼu ʼa te ʼaselo agakovi ʼaē neʼe ina fakamaliu te ʼuluaki taumatuʼa ke nā fakafeagai ki te pule ʼa te ʼAtua. Neʼe maʼu ai e Sesu te tupuʼaga maʼuhiga ke fia tupu ohage ko te ʼAlo haohaoa ʼo te ʼAtua ʼi te kele. Moʼo fakahā tea?

Moʼo fakamoʼoni ʼe tonu ke pule tana Tāmai ʼaē ʼi selo ki te ʼatulaulau. ʼI tana nofo agatonu mai tana tupu ʼo aʼu ki tana mate, neʼe fakahā e Sesu tana lotolelei ʼaē ke fakalogo mo ia ki te puleʼi e Sehova Tana hahaʼi. ʼI muʼa ʼo tona matehi e te ʼu fili ʼo te ʼAtua, neʼe tala fakalelei e Sesu te tupuʼaga ʼo tana lotolelei ke ina foaki tona maʼuli ko he sakilifisio. Neʼe lotolelei ki te faʼahi ʼaia ke ʼiloʼi e te malamanei neʼe ʼofa ki te Tāmai. (Soane 14:31) Kanapaula neʼe maʼu e te ʼuluaki taumatuʼa, ia Atama mo Eva, te taʼi ʼofa ʼaia, kanaʼauala neʼe feala ke nā nonofo agatonu ʼi te ʼahiʼahi faigafua ʼaē neʼe fai kia nāua.​—Senesi 2:​15​-17.

Ko te nofo agatonu ʼa Sesu neʼe ina toe fakahā ai ko Satana, te ʼaselo agakovi ʼe gutuloi. Neʼe fasituʼu ia Satana ki te ʼAtua pea mo te tagata, ʼi tana ʼui fēnei ia muʼa ʼo te kau ʼaselo ʼi selo: “Ko meʼa fuli ʼe maʼu e te tagata, ʼe ina foaki anai ia ki tona maʼuli.” (Sopo 2:​1, 4) Neʼe loi ia Satana ʼi tana ʼui ʼaē ko te hahaʼi fuli pe ʼe nātou talagataʼa anai ki te ʼAtua mokā tuʼutāmaki tonatou maʼuli.

Ko te ʼu fehuʼi ʼaia neʼe nātou fakafihiʼi te pule ʼaē ʼe tonu ke maʼu e te ʼAtua. Moʼo fakatokatoka te ʼu fehuʼi ʼaia, neʼe lotolelei ia Sesu ke tupu ohage ko he tagata pea mo nofo agatonu ʼo aʼu ki te mate.

Koia, ko te tupuʼaga tāfito ʼo te tupu ʼa Sesu ʼi te kele, ohage ko tona ʼui totonu e ia, ke ina “fakamooni ki te mooni.” (Soane 18:37) Neʼe ina fai te faʼahi ʼaia ʼo ina fakahā ʼi tana ʼu palalau pea mo tana ʼu gāue ko te pule ʼa te ʼAtua ʼe faitotonu pea ko te fakalogo kia te ia ʼe iku ki he fiafia heʼegata. Neʼe toe fakamahino e Sesu neʼe haʼu ki te kele ke ina foaki tona maʼuli “moʼo totogi mai o te tokolahi,” ke feala ai ki te hahaʼi agahala ke nātou liliu ʼo haohaoa pea mo maʼu te maʼuli heʼegata. (Maleko 10:45) Ke mahino te hahaʼi ki te ʼu faʼahi maʼuhiga ʼaia, neʼe tonu ke fakamatala te tupu ʼa Sesu. Tahi ʼaē meʼa, ʼe ʼi ai te tahi ʼu ako maʼuhiga ʼe feala ke tou maʼu mai te ʼu meʼa neʼe hoko ʼi te temi ʼaē neʼe tupu ai Sesu, pea ʼe fakahā anai ʼi te alatike ka hoa mai.

[Paki ʼo te pasina 4]

Neʼe lava hāofaki feafeaʼi te hōloga ʼo Atama mai te agahala?