“Koutou Nonofo ʼi Taku Folafola”

“Kapau ʼe koutou nonofo ʼi taku folafola, pea ko koutou ko ʼaku tisipulo moʼoni.”—Soane 8:31, MN.

1. (a) ʼI te temi ʼaē neʼe toe liliu ai Sesu ki te lagi, koteā ʼaē neʼe ina tuku ʼi te kele? (b) Koteā anai te ʼu fehuʼi ka tou vakaʼi?

ʼI TE temi ʼaē neʼe toe liliu ai Sesu Kilisito ki te lagi, ia Ia ʼaē neʼe ina fakatuʼu te Lotu Faka Kilisitiano, neʼe mole ina tuku ʼi te kele he ʼu tohi neʼe ina fai, he ʼu fale neʼe ina laga, peʼe ko he ʼu koloā neʼe ina tānaki. Ko te ʼu tisipulo ʼaē neʼe ina tuku, ʼo feiā pe mo te ʼu fakatotonu ʼaoga maʼa nātou ʼe fia liliu ko ni ʼana tisipulo. ʼIo, ʼi te Evaselio ʼa Soane, ko Sesu ʼe ina fakahā ai te ʼu fakatotonu maʼuhiga e tolu ʼe tonu ke mulimuli ki ai he tahi ʼe fia liliu ko hana tisipulo. Koteā te ʼu fakatotonu ʼaia? Koteā te meʼa ʼaē ʼe tou lava fai ke tou muliʼi te ʼu fakatotonu ʼaia? Pea ʼe tou lava ʼiloʼi feafeaʼi ia ʼaho nei ʼe ko tatou ko ni ʼu tisipulo moʼoni ʼa Kilisito?a

2. Ohage ko tona fakahā ʼi te Evaselio ʼa Soane, koteā te fakatotonu maʼuhiga ke liliu ai he tahi ko he tisipulo?

² Ia māhina e ono ʼi muʼa ʼo tona mate, neʼe hake Sesu ki Selusalemi pea neʼe faka mafola ki te hahaʼi tokolahi neʼe maʼopoʼopo ai ki te toʼotoʼoga ʼo te Lafeti ʼo Te ʼu Fale Lau ʼe fai ʼi te vāhaʼa katoa. Pea ʼi te ʼu ʼaho fakaʼosi ʼo te lafeti “ko te tokolahi ʼi te hahaʼi neʼe nātou tui kia te ia.” Neʼe hoko atu te fai faka mafola ʼa Sesu, koia ʼi te ʼaho fakaʼosi ʼo te lafeti, “neʼe tui te tokolahi kia te ia.” (Soane 7:10, 14, 31, 37, MN; 8:30, MN ) ʼI te temi ʼaia, neʼe palalau tāfito ia Sesu ki te kau tisipulo foʼou pea neʼe ina fakahā age te fakamaʼua maʼuhiga ki te liliu ko he tisipulo, ohage ko tona fakahā e te ʼapositolo ko Soane: “Kapau ʼe koutou nonofo ʼi taku folafola, pea ko koutou ko ʼaku tisipulo moʼoni.”—Soane 8:31, MN.

3. Koteā te kalitate ʼaē neʼe tonu ke maʼu e he tahi moʼo ‘nofo ʼi te folafola ʼa Sesu’?

³ ʼAki te ʼu palalau ʼaia, neʼe mole ʼui e Sesu ko te kau tisipulo foʼou ʼe mole nātou tui. Kae neʼe ina fia fakahā age te fealagia ʼaē ʼe nātou maʼu ke nātou liliu ai ko hana ʼu tisipulo moʼoni—mo kapau ʼe nātou nonofo ʼi tana folafola, pea mo nātou faʼa kātaki. Neʼe nātou tali tana folafola, kae kua tonu leva ke nātou taupau maʼu tana folafola. (Soane 4:34; Hepeleo 3:14) ʼI tana felogoi fakaʼosi mo tana kau ʼapositolo, neʼe fakahā lelei age e Sesu ko te faʼa kātaki ʼe ko he kalitate maʼuhiga kia nātou, ohage ko tona tuʼu ʼi te Evaselio ʼa Soane, neʼe tuʼa lua te fakaloto mālohiʼi ʼo nātou e Sesu: “Haga muli mai ia te ʼau.” (Soane 21:19, 22, MN ) Neʼe lahi te kau ʼuluaki Kilisitiano neʼe nātou fai te faʼahi ʼaia. (2 Soane 4) Koteā ʼaē neʼe tokoni kia nātou ke nātou faʼa kātaki?

4. Koteā ʼaē neʼe feala ai ki te ʼu ʼuluaki Kilisitiano ke nātou faʼa kātaki?

⁴ Ko te ʼapositolo ko Soane, ʼaē ko he tisipulo agatonu ʼa Kilisito ia taʼu e fitugofulu-ma-fitu, neʼe ina fakahā te puani maʼuhiga. Neʼe ina vikiʼi te kau Kilisitiano agatonu, ʼo ʼui maʼana: “ ʼE koutou mālohi pea ko te folafola ʼa te ʼAtua ʼe nofo ia koutou pea neʼe koutou mālo ʼi te agakovi.” Ko te ʼu tisipulo ʼaia ʼa Kilisito, neʼe nātou kātakiʼi pe neʼe nātou nonofo ʼi te folafola ʼa te ʼAtua, koteʼuhi neʼe nātou maʼuliʼi te folafola ʼa te ʼAtua. Neʼe nātou taupau fakalelei te folafola ʼaia. (1 Soane 2:14, 24, MN ) ʼO toe feiā pe ia ʼaho nei, ke feala hatatou ‘faʼa kātaki ʼo aʼu ki te fakaʼosi,’ ʼe tonu ke tou tokaga ʼo maʼuliʼi ia te folafola ʼa te ʼAtua. (Mateo 24:13) ʼE tou lava fai feafeaʼi ia te faʼahi ʼaia? ʼE tou maʼu te tali kiai ʼi te lea fakatātā ʼa Sesu.

“Fagono Ki Te Folafola”

5. (a) Koteā te ʼu faʼahiga kele kehekehe neʼe talanoa kiai Sesu ʼi tana lea fakatātā? (b) Koteā ʼaē ʼe fakatātā kiai te pulapula pea mo te kele ʼi te lea fakatātā ʼa Sesu?

⁵ Neʼe fai e Sesu te lea fakatātā ʼo ʼuhiga mo he tagata tūtū pulapula, pea ʼe fakamatala ʼi te ʼu Evaselio ʼa Mateo, Maleko, pea mo Luka. (Mateo 13:1-9, 18-23; Maleko 4:1-9, 14-20; Luka 8:4-8, 11-15) Kapau ʼe koutou lau te ʼu fakamatala ʼaia, ʼe koutou fakatokagaʼi anai te puani tāfito ʼo te lea fakatātā ʼaia, ʼe ko te pulapula pe e tahi ʼe to ki te ʼu faʼahiga kele kehekehe, pea ʼe mole tatau tanatou hohomo ake. Ko te ʼuluaki kele ʼe fefeka, ko te lua kele ʼe mole loloto, pea ko te tolu kele ʼe homo ai te vao talatala. Ko te fā kele, ʼe mole tatau ia mo te ʼu kele ʼaē e tolu, ʼe kele “lelei” ia. ʼI te fakamatala ʼa Sesu, ko te pulapula ʼe ko te logo ʼo te Puleʼaga ʼaē ʼe tou maʼu ʼi te Folafola ʼa te ʼAtua, pea ʼe fakatātā te kele ki te loto ʼo te hahaʼi kehekehe. Logola ko te hahaʼi ʼaē neʼe fakatātā e te ʼu faʼahiga kele kehekehe ʼe nātou teitei tatau, kae ko nātou ʼaē ʼe fakatātā ki te kele lelei ʼe nātou maʼu te meʼa ʼe mole maʼu e te hahaʼi ʼo te ʼu kele ʼaē.

6. (a) He koʼe ʼi te lea fakatātā ʼa Sesu ʼe mole tatau te fā kele mo te ʼu kele ʼaē ʼe tolu ki muʼa atu, pea koteā tona faka ʼuhiga? (b) Koteā ʼaē ʼe maʼuhiga ki te kau tisipulo ʼa Kilisito moʼo faʼa kātaki?

⁶ ʼE fakahā ʼi te fakamatala ʼo Luka 8:12-15, ko te ʼu faʼifaʼitaki ʼaia e fā, ʼe ko te hahaʼi ʼe nātou ‘fagono ki te folafola.’ Kae ko nātou ʼaē ʼe “loto fiafia pea mo lelei” neʼe nātou “fagono ki te folafola” pea nātou tāʼofi maʼu. Neʼe nātou “tāʼofi maʼu, ʼo nātou fakatupu te fua ʼaki te loto faʼa kātaki.” ʼI te mālū pea mo te loloto ʼo te kele lelei, ʼe feala ki te ʼu aka ʼo te pulapula ke pipiki maʼu ki te kele, pea ʼe homo pea mo fua te pulapula. (Luka 8:8) ʼO feiā pe kia nātou ʼaē ʼe lelei tonatou ʼu loto ʼe nātou mahino, mo leleiʼia, pea mo metitasioʼi te folafola ʼa te ʼAtua. (Loma 10:10; 2 Timoteo 2:7) Ko te folafola ʼa te ʼAtua ʼe nofo ia nātou. Pea ʼaki tanatou faʼa kātaki ʼe nātou fua. ʼE toe maʼuhiga he loto fakafetaʼi ki te Folafola ʼa te ʼAtua ke faʼa kātaki ai te kau tisipulo ʼa Kilisito. (1 Timoteo 4:15) Kae ʼe lava feafeaʼi hatatou maʼu he loto fakafetaʼi feiā ki te Folafola ʼa te ʼAtua?

Ko Te Loto ʼe Lelei Pea Mo Te Metitasio ʼe Maʼuhiga

7. Koteā te gāue ʼaē ʼe fakapipiki kiai he loto ʼe lelei?

⁷ Koutou fakatokagaʼi te gāue ʼaē ʼe fakapipiki tuʼumaʼu e te Tohi-Tapu ki he loto fiafia pea mo lelei. “Ko te loto ʼo ia ʼaē ʼe faitotonu ʼe metitasio ʼi muʼa ʼo tana tali.” (Tāʼaga Lea 15:28) “Ke liliu te ʼu palalau ʼo toku gutu pea mo te metitasio ʼo toku loto ʼo lave lelei ʼi ʼou muʼa, Ê Sehova.” (Pesalemo 19:14) “ ʼE metitasio anai toku loto ki te ʼu meʼa fakapotopoto.”—Pesalemo 49:3.

8. (a) Ka tou lau te Tohi-Tapu, koteā ʼaē ʼe tonu ke tou tokaga kiai pea koteā anai ʼaē ʼe tonu ke tou fai? (b) Koteā te ʼu lelei ʼe tou maʼu mai tatatou metitasioʼi te Folafola ʼa te ʼAtua ʼi te faikole? (Vakaʼi mo te talanoa “Nofo Mālohi ʼi Te Moʼoni.”)

⁸ Ohage pe ko te ʼu tagata faitohi Tohi-Tapu ʼaia, ʼe ʼaoga foki mo tatou ke tou metitasio ʼaki he loto fakafetaʼi ʼi te faikole, ki te Folafola ʼa te ʼAtua pea mo tana ʼu gāue. Ka tou lau te Tohi-Tapu peʼe ko te ʼu tohi faka Tohi-Tapu, ʼe mole tonu anai ke tou hage ko te kau tulisi ʼaē ʼe nātou toho fakavilivili te ʼu paki, ʼo lahi tanatou toho paki kae ʼe mole nātou fakakaukauʼi lelei te ʼu meʼa ʼaia. Kae ka tou ako te Tohi-Tapu, ʼe tou fia tuku he temi lahi moʼo fakakaukauʼi te ʼu meʼa ʼaē ʼe tou ako.b Kapau ʼe tou fakakaukauʼi fakalelei te ʼu meʼa ʼaē ʼe tou lau, ʼe malave anai te folafola ʼa te ʼAtua ki totatou loto. ʼE ina fetogi te ʼu meʼa ʼaē ʼi totatou loto pea mo tatatou fakakaukau. ʼE ina uga tatou ke tou fakahā ki te ʼAtua ʼi te faikole tatatou ʼu manatu moʼoni. Koia, ʼe mālohi ai tatatou pipiki kia Sehova, pea ko totatou ʼofa ki te ʼAtua ʼe ina uga tatou ke tou mulimuli ia Sesu logola totatou ʼu faigataʼaʼia. (Mateo 10:22) ʼE mahino ia, kapau ʼe tou fia nofo agatonu ʼo aʼu ki te fakaʼosi ʼe tonu ke tou metitasioʼi te ʼu meʼa ʼaē ʼe ʼui mai e te ʼAtua.—Luka 21:19.

9. ʼE tou lava ʼiloʼi feafeaʼi ko totatou loto ʼe fakalogo tuʼumaʼu ki te folafola ʼa te ʼAtua?

⁹ ʼE toe fakahā foki e te lea fakatātā ʼa Sesu ʼe ʼi ai te ʼu meʼa ʼe fakatupu kovi ki te tuputupu ʼo te pulapula, te folafola ʼa te ʼAtua. Koia, ke tou nofo tuʼumaʼu ko ni ʼu tisipulo agatonu, ʼe tonu anai (1) ke tou mahino ki te ʼu meʼa kovi ʼaē neʼe fakatā e te ʼu kele kovi ʼi te lea fakatātā pea (2) ke tou fai he ʼu fakatuʼutuʼu moʼo fakatonutonuʼi peʼe moʼo tekeʼi te ʼu meʼa kovi ʼaia. Kapau ʼe tou fai feiā, pea ʼe tou ʼiloʼi ai anai peʼe ko totatou loto ʼe fakalogo tuʼumaʼu ki te Puleʼaga pea mo haga tuputupu.

Ko Nātou ʼAē ʼe Hoha Fau ʼe Nātou Hage Ko Te “Fakaloaloa ʼo Te Ala”

10. Koutou fakamatala te agaaga ʼo te ʼuluaki kele ʼo te lea fakatātā ʼa Sesu, pea koutou fakamahino tona faka ʼuhiga.

¹⁰ Ko te ʼuluaki kele ʼaē ʼe maluku kiai te pulapula ʼe ko te “fakaloaloa ʼo te ala,” pea ʼe “malamalaki” ai te pulapula. (Luka 8:5, MN ) Ko te kele ʼaē ʼe tuʼu ʼi te fakaloaloa ʼo te ala ʼe fakalaka ʼi he gāueʼaga fulumeto, pea ʼe fefeka koteʼuhi ʼe alaʼi tuʼumaʼu. (Maleko 2:23) Ohage pe ko nātou ʼaē ʼe nātou tuku te ʼu ʼaluʼaga ʼo te malamanei ke nātou toʼo tonatou temi pea mo tonatou mālohi, ʼe lagi nātou manatu ʼe nātou maʼumaʼua fau moʼo fakatuputupu ia nātou he loto fakafetaʼi ki te folafola ʼa te ʼAtua. ʼE nātou logo ki te folafola, kae ʼe mole nātou metitasioʼi. Koia ʼe mole hona fua ʼi tonatou loto. ʼI muʼa ʼo hanatou ʼofa ki te folafola ʼe “haʼu te Tevolo ʼo toʼo te folafola ʼi tonatou loto ke ʼaua naʼa nātou tui pea mo hāofaki ai ia nātou.” (Luka 8:12, MN ) E feafeaʼi he tāʼofi ʼo te meʼa ʼaia?

11. Koteā te meʼa ʼe tou lava fai ke mole liliu totatou loto ohage ko he kele ʼe fefeka?

¹¹ ʼE lahi te ʼu meʼa ʼe tou lava fai ke mole liliu totatou loto ohage ko te kele ʼaē ʼe mole fua ʼaē ʼe tuʼu ʼi te fakaloaloa ʼo te ala. Ko te kele ʼaē ʼe molomoloki pea mo fefeka ʼe feala ke liliu ʼo mālū pea mo fua mo kapau ʼe gāueʼi pea mo kapau ʼe mole alaʼi tuʼumaʼu. ʼO toe feiā pe, ʼe feala ke liliu te loto ko he kele lelei, pea mo tuputupu mo kapau ʼe toʼo he temi moʼo ako pea mo metitasioʼi te Folafola ʼa te ʼAtua. Ko te meʼa ʼaē ʼe maʼuhiga, ke ʼaua naʼa tou maʼumaʼua fau ʼi te ʼu meʼa māhani ʼo totatou maʼuli. (Luka 12:13-15) Kae ke tou faigaʼi tāfito ke tou fakaʼaogaʼi te temi ʼaia moʼo fakakaukauʼi “te ʼu meʼa ʼaē ʼe maʼuhiga tāfito” ʼi totatou maʼuli.—Filipe 1:9-11, MN.

“ ʼI Te Fuga Maka”—Ko He Loto Tuʼania

12. He koʼe ʼe moamoa te muko ʼi te lua kele ʼaē neʼe talanoa kiai te lea fakatātā ʼa Sesu?

¹² Ko te pulapula ʼaē neʼe maluku ki te lua kele, ʼe mole hage ko te pulapula ʼaē neʼe maluku ʼi te fakaloaloa ʼo te ala. ʼE tauaka pea mo homo ake. Kae ʼi te temi ʼaē neʼe hopo ake ai te laʼā, neʼe mahunu te muko ʼi te vevela ʼo te laʼā pea moamoa ai. Kae koutou fakatokagaʼi te meʼa maʼuhiga ʼaenī. ʼE mole moamoa te huli ʼaia ʼuhi ko te vevela ʼo te laʼā, heʼe koʼe pe la mo te pulapula ʼaē ʼe homo ake ʼi te kele lelei ʼe laʼaina pe foki la, kae ʼe mole moamoa ia—pea ʼe tuputupu ia. Kae koteā ʼaē ʼe nā kehekehe ai? ʼE ʼui e Sesu, ʼe moamoa te muko ʼaia “he neʼe mole [ina] maʼu he kele ʼe loloto” pea “neʼe mole palapalaʼi.” (Mateo 13:5, 6; Luka 8:6, MN ) Ko he “fuga maka” ʼi te lalo kele ʼe mole ina faka fealagia ki te pulapula ke tauaka, heʼe mole feala ki tona ʼu aka ke tauaka loloto pea ke nātou maʼu honatou moʼi vai pea mo tuʼu maʼu. ʼE moamoa te muko koteʼuhi ʼe mole loloto te kele.

13. E feafeaʼi te faʼahiga hahaʼi ʼaē ʼe hage ko te kele ʼaē ʼe mole loloto, pea he koʼe ʼe nātou feiā?

¹³ Ko te koga ʼaia ʼo te lea fakatātā ʼe faka ʼuhiga ki te hahaʼi ʼaē ʼe nātou “tali te folafola ʼaki te loto fiafia” pea mo mulimuli fakamalotoloto ia Sesu “ ʼi he kiʼi temi nounou” pe. (Luka 8:13, MN ) ʼI te temi ʼaē ʼe nātou tau ai mo te “mamahi pe ko [te] fakataga,” ʼe lahi ai tonatou loto tuʼania ʼo puli ai tonatou fiafia pea mo tonatou mālohi, pea ʼe mole kei nātou mulimuli ia Kilisito. (Mateo 13: 21, MN ) Kae ʼe mole ko te fakafeagai ʼaē ʼe nātou tuʼaniaʼi tāfito, heʼe ʼutakiʼi pe la e te toko lauʼi miliona tisipulo ʼa Kilisito te ʼu faʼahiga mamahi kehekehe, kae ʼe nātou nonofo agatonu aipe. (2 Kolonito 2:4; 7:5) Ko te tupuʼaga moʼoni ʼo te tuʼania pea mo te higa ʼa ʼihi, koteʼuhi ʼe fefeka tonatou ʼu loto, ʼo mole lahi tanatou metitasioʼi ʼo ni ʼu meʼa ʼe fakaloto mālohi pea mo fakalaumālie. Koia ʼe mole lahi tanatou loto fakafetaʼi ʼaē kia Sehova pea mo tana folafola, pea ʼe mole nātou mālohi moʼo tauʼi te fakafeagai. ʼE tou lava tauʼi feafeaʼi te faʼahi ʼaia?

14. Koteā te ʼu fakatuʼutuʼu ʼe tonu anai ke fai e he tahi ke ʼaua naʼa liliu tona loto ohage ko he kele ʼe mole loloto?

¹⁴ ʼE tonu ke vakavakaʼi fakalelei e he tahi peʼe ʼi ai ʼi tona loto ni ʼu fihifihia, ohage la ko te lotomamahi lahi, ko te manatu fakafūfū kia ia totonu, peʼe ko he meʼa ʼe ū ʼi tona loto. Kapau kua ʼi ai he ʼu meʼa feiā ʼi tona loto, ʼe feala ke faigataʼa te gāue ʼa te folafola ʼa te ʼAtua ia ia. (Selemia 23:29; Efeso 4:22; Hepeleo 4:12) Koia ko te metitasio ʼi te faikole ʼe ina uga mālohi anai ‘te folafola ke to’ loloto ʼi te loto ʼo he tahi. (Sakopo 1:21) ʼE maʼu ai anai te mālohi moʼo tauʼi te ʼu temi lotovaivai pea mo te lototoʼa moʼo nofo agatonu logola te ʼu faigataʼaʼia.

“Ki Te Vao Talatala”: Ko He Tahi ʼe Lotolotolua

15. (a) He koʼe ʼe tonu ke tou tokagaʼi tāfito te tolu kele ʼaē neʼe talanoa kiai Sesu? (b) Koteā ʼaē ʼe hoko ʼi te tolu kele, pea koteā tona tupuʼaga?

¹⁵ ʼE tonu ke tou tokagaʼi tāfito te tolu kele ʼaē ʼe homo ai te vao talatala koteʼuhi ʼe teitei tatau mo te kele ʼaē ʼe lelei. Ohage ko te kele lelei, ʼe tuku e te vao talatala ke tauaka te pulapula pea ke homo. ʼUluaki, ʼe homo lelei pe te pulapula foʼou ʼaia ʼi te ʼu faʼahiga kele ʼaia e lua. Kae ʼaki te temi, ʼe ʼi ai te meʼa ʼe homo ake ʼo ina faka malumoea ai te muko. ʼO mole hage ko te kele lelei, ko te kele ʼaia ʼe homo ai te ʼu vao talatala. ʼI te hohomo ake ʼo te ʼu huli ʼi te kele ʼaia, ʼe faigataʼa ‘tana homo fakatahi mo te vao talatala.’ Lolotoga he kiʼi temi ʼe nā efihia heʼe nā kumi fakatahi hana meʼa kai, mo te mālamagia, pea mo te lauʼatea, kae fakamulimuli age kua malumoea pea mo ‘taʼomia’ te muko e te vao talatala.—Luka 8:7.

16. (a) Ko ai te ʼu hahaʼi ʼaē ʼe hage ko te kele ʼe homo ai te vao talatala? (b) ʼO mulimuli ki te ʼu fakamatala ʼo te ʼu Evaselio ʼaē e tolu, koteā ʼaē ʼe ina fakatātā te ʼu vao talatala?—Vakaʼi te kiʼi nota ʼi te lalo pasina.

¹⁶ Ko te faʼahiga hahaʼi feafeaʼi ʼaē ʼe hage ko te kele ʼe homo ai te vao talatala? ʼE fakamahino fēnei e Sesu: “Ko nātou ʼaē neʼe fagono kiai, kaʼe ʼe tohona ia nātou e te ʼu tuʼania, te ʼu koloā, pea mo te ʼu lelei ʼo te maʼuli ʼaenī, ʼo nātou taʼomia ʼosi ai pea ʼe mole nātou lava fai he meʼa ke lelei ʼosi.” (Luka 8:14, MN ) Ohage pe ko te homo fakatahi ʼa te pulapula pea mo te vao talatala, ko ʼihi ʼe nātou faiga ke nātou fakaʼaogaʼi fakatahi te folafola ʼa te ʼAtua pea mo te “ ʼu lelei ʼo te maʼuli ʼaenī.” Neʼe to te moʼoni ʼo te folafola ʼa te ʼAtua ki tonatou ʼu loto, kae ʼe faigataʼa heʼe ʼi ai te tahi ʼu meʼa ʼe nātou tokaga kiai. ʼE nātou lotolotolua. (Luka 9:57-62) ʼO mole nātou maʼu ai he temi moʼo fakakaukauʼi fakalelei ʼi te faikole ia te folafola ʼa te ʼAtua. ʼE mole nātou fakaʼaogaʼi fakalelei te folafola ʼa te ʼAtua pea koia ʼaē ʼe mole nātou maʼu ai he loto fakafetaʼi moʼo faʼa kātaki. ʼAki te temi, kua nātou fakatō laloʼi tanatou ʼu gāue fakalaumālie heʼe kua nātou tokakaga fau ki te ʼu meʼa noa ʼo kaku ai mo tonatou “taʼomia ʼosi.”c ʼE ko he meʼa fakaʼofaʼofa ka hoko kia nātou ʼaē ʼe mole ʼoʼofa kia Sehova mo tonatou loto katoa!—Mateo 6:24; 22:37.

17. Koteā te ʼu meʼa ʼe tonu ke tou fakamuʼamuʼa ʼi totatou maʼuli ke mole tou taʼomia ʼi te ʼu vao talatala ʼaē neʼe talanoa kiai te lea fakatātā ʼa Sesu?

¹⁷ Kapau ʼe tou fakamuʼamuʼa te ʼu meʼa fakalaumālie ʼi te ʼu koloā fakamālama, ʼe mole tou taʼomia anai ʼi he ʼu mamahi pea mo he ʼu fakafiafia ʼo te mālama ʼaenī. (Mateo 6:31-33; Luka 21:34-36) ʼE mole tonu ke tou meʼa noaʼi tatatou lau pea mo te metitasioʼi ʼo te Tohi-Tapu. Kapau ʼe tou faka faigafua totatou maʼuli, ʼe lahi anai totatou temi ke tou tokakaga pea mo metitasio ʼi te faikole. (1 Timoteo 6:6-8) Ko te ʼu kaugana ʼa te ʼAtua ʼaē neʼe nātou fai te faʼahi ʼaia—ʼaē neʼe nātou taʼaki te vao talatala ʼi ʼonatou loto ke feala ai ki te pulapula ke homo lelei, mo mālamagia, pea mo lauʼatea ke feala hana fua—neʼe tapuakinaʼi nātou e Sehova. ʼE ʼui fēnei e Sandra ʼe taʼu 26: “Ka ʼau metitasioʼi toku ʼu tapuakina ʼi te moʼoni, ʼe ʼau ʼiloʼi ai ko te malamanei ʼe mole ina lava foaki mai he meʼa ʼe tatau mo te moʼoni!”—Pesalemo 84:11.

18. ʼE tou lava nonofo feafeaʼi ʼi te folafola ʼa te ʼAtua, pea mo faʼa kātaki ʼi totatou ʼuhiga Kilisitiano?

¹⁸ Koia ʼe mahino ia, ko tatou fuli, tūpulaga pea mo hahaʼi matutuʼa ʼe tou nonofo anai ʼi te folafola ʼa te ʼAtua pea mo faʼa kātaki ʼi totatou ʼuhiga tisipulo ʼa Kilisito, mo kapau ʼe nofo te folafola ʼa te ʼAtua ia tatou. Koia tou tokakaga ki totatou loto ke ʼaua naʼa fefeka, peʼe mole faʼa loloto, peʼe ke ʼaua naʼa homo ai he ʼu vao kovi kae ke mālū pea mo loloto. Ka tou fai te faʼahi ʼaia, ʼe feala anai ke tou fakaʼaogaʼi lelei te folafola ʼa te ʼAtua pea ʼe tou “fakatupu te fua ʼaki te loto faʼa kātaki.”—Luka 8:15, MN.

[Kiʼi nota]

Koteā Takotou ʼu Tali?

• He koʼe ʼe tonu ke tou ‘nonofo ʼi te folafola ʼa Sesu’?

• E tou faka fealagia feafeaʼi ki te folafola ʼa te ʼAtua ke nofo ʼi totatou loto?

• Ko ai te ʼu faʼahiga hahaʼi ʼaē ʼe fakatātā e te ʼu kele e fā ʼaē neʼe talanoa kiai Sesu?

• ʼE koutou lava maʼu feafeaʼi he temi moʼo metitasioʼi te folafola ʼa te ʼAtua?

[Talanoa ʼo te pasina 10]

“NOFO MĀLOHI ʼI TE MOʼONI”

TOKOLAHI te kau tisipulo ʼa Kilisito talu mai fualoa neʼe nātou fakahā ʼi te temi fuli ʼe nātou “nofo mālohi ʼi te moʼoni.” (2 Petelo 1:12, MN ) Koteā ʼaē neʼe tokoni kia nātou ke nātou faʼa kātaki? Tou vakaʼi tanatou ʼu tali kiai.

“ ʼI te ʼaho fuli ʼe ʼau lau te ʼu vaega ʼo te Tohi-Tapu pea ʼe ʼau faikole. ʼOsi ʼaia pea ʼe ʼau fakakaukauʼi te ʼu meʼa ʼaē neʼe ʼau lau.”—Ko Jean, neʼe papitema ʼi te taʼu 1939.

“ ʼI taku metitasioʼi te ʼofa ʼo Sehova kia tatou, logola tona māʼoluga ʼaupito, ʼe ʼau maʼu ai te fīmālie pea mo te mālohi ke ʼau nofo agatonu.”—Patricia, neʼe papitema ʼi te taʼu 1946.

“ ʼI taku taupau maʼu taku ʼu agamāhani ʼaē ko te ako ʼo te Tohi-tapu pea mo te maʼuliʼi ia ‘te ʼu meʼa maʼuhiga ʼa te ʼAtua,’ neʼe feala ai ke ʼau tuputupu.”—1 Kolonito 2:10; Anna, neʼe papitema ʼi te taʼu 1939.

“ ʼE ʼau lau te Tohi-Tapu pea mo te ʼu tohi faka Tohi-Tapu, ʼo sivisivi peʼe feafeaʼi toku loto pea mo te ʼu meʼa ʼaē ʼe ina uga ʼau mokā ʼau fai he meʼa.”—Zelda, neʼe papitema ʼi te taʼu 1943.

“Ko te ʼu temi ʼaē ʼe ʼau leleiʼia, mokā ʼe feala ke ʼau haʼele pea mo palalau kia Sehova ʼi te faikole, pea mo fakahā ki ai te ʼu meʼa ʼaē ʼi toku loto.”—Ralph, neʼe papitema ʼi te taʼu 1947.

“ ʼE ʼau kamata te ʼaho ʼaki te vakaʼi ʼo te koga tohi ʼo te ʼaho, pea mo lau te ʼu vaega ʼi te Tohi-Tapu. ʼE ʼau maʼu ai he manatu ke ʼau metitasioʼi ʼi te ʼaho katoa.”—Marie, neʼe papitema ʼi te taʼu 1935.

“Maʼa ʼaku, ʼe ko he meʼa fakaloto mālohi te ʼu tohi faka Tohi-Tapu ʼaē ʼe fakamatalatala ai te ʼu vaega takitahi.”—Daniel, neʼe papitema ʼi te taʼu 1946.

Ko te temi fea ʼaē ʼe koutou fakakaukauʼi ai ʼi te faikole te folafola ʼa te ʼAtua?—Taniela 6:10b; Maleko 1:35; Gaue 10:9.

[Paki ʼo te pasina 13]

ʼE tou lava “fakatupu te fua ʼaki te loto faʼa kātaki” mo kapau ʼe tou fakamuʼamuʼa te ʼu meʼa fakalaumālie