Tou Fakahā “He Agamālu Ki Te Tagata Fuli Pe”
“Haga fakamanatuʼi age kia nātou . . . ke nātou popoto, ʼo nātou fakahā he agamālū ki te tagata fuli pe.”—Tito 3:1, 2, MN.
1. He koʼe ʼe mole faigafua tuʼumaʼu te fakahā ʼo te agamālū?
NEʼE tohi fēnei e te ʼapositolo ko Paulo: “Koutou liliu ko oku faifaitaki, o hage ko au ko te faifaitaki o Kilisito.” (1 Kolonito 11:1) Ko te ʼu kaugana fuli ʼa te ʼAtua ia ʼaho nei ʼe nātou faiga ʼaupito ke nātou mulimuli ki te fakatotonu ʼaia. ʼE moʼoni ʼe mole faigafua, he neʼe tou maʼu mai tatatou ʼu ʼuluaki mātuʼa te ʼu holi ʼo te kakano, pea mo he agaaga ʼe mole ʼalutahi mo te faʼifaʼitaki ʼo Kilisito. (Loma 3:23; 7:21-25) Kae ʼo ʼuhiga mo te fakahā ʼo te agamālū, ʼe feala ke tou fakahā e tatou fuli te kalitate ʼaia mo kapau ʼe tou faiga lahi. Kae ʼe mole tonu pe ke tou falala ki totatou mālohi. Koteā te tahi faʼahi ʼaē ʼe ʼaoga kia tatou?
2. Koteā ʼaē ʼe tonu ke tou fai ke tou fakahā “he agamālū ki te tagata fuli pe”?
2 Ko te agamālū ʼe kau ki te fua ʼo te laumālie maʼoniʼoni. Kapau ʼe lahi takita fakalogo ki te takitaki ʼo te mālohi gāue ʼaia ʼo te ʼAtua, pea ʼe toe lahi anai tona fua ia tatou. Ko te faʼahi pe ʼaia e tahi ʼe tonu ke tou fai ke feala ai hatatou fakahā “he agamālū” ki te hahaʼi fuli pe. (Tito 3:2, MN ) Tou vakaʼi pe feafeaʼi hatatou lava mulimuli ki te faʼifaʼitaki ʼo Sesu, pea ke feala ai kia nātou ʼaē ʼe fakatahi mo tatou ke nātou ‘maʼu he fīmālie.’—Mateo 11:29; Kalate 5:22, 23.
ʼI Te Loto Fale
3. Koteā te ʼaluʼaga ʼi te loto fale ʼe ko te fua ʼaia ʼo te manatu ʼo te mālama?
3 Ko te potu ʼaē ʼe maʼuhiga ke fakahā ai te agamālū ʼe ko te loto fale. Ko te Organisation mondiale de la santé (Kautahi Faka Malamanei ʼo Te Maʼuli Mālōlō), ʼe ina fakafuafua ʼe lahi age te tuʼutāmaki ʼa te hahaʼi fafine ʼi te agamālohi ʼaē ʼe hoko ʼi te loto fale, ʼi hanatou tuʼutāmaki ʼi he fakaʼī pea mo te mahaki. Ohage la, ʼi Lonitoni, ʼi Pilitania, ko te 25 ʼi te teau ʼo te ʼu agamālohi neʼe hoko ʼi te loto fale. ʼE tautau felāveʼi te kau polisi mo te ʼu hahaʼi ʼe nātou ‘kalaga pea mo leakovi.’ Ko te meʼa ʼaē ʼe kovi age, heʼe ko ʼihi taumatuʼa neʼe nātou tuku “te lotokovi fuape” ke fua kovi ki tanatou ʼu felogoi. Ko te ʼu aga fuli ʼaia ʼe ko te ʼu fua ʼo “te manatu ʼo te mālama,” pea ʼe mole tali te ʼu aga ʼaia ʼi te ʼu loto fale ʼo te kau Kilisitiano.—Efeso 4:31; 1 Kolonito 2:12, MN.
4. Koteā te fua ʼo te agamālū ʼi te loto fale?
4 Moʼo tauʼi te ʼu aga ʼaia ʼo te mālama, ʼe ʼaoga kia tatou te laumālie ʼo te ʼAtua. “Ko te faahi e i ai te Laumalie o te Aliki pea e i ai te ateaina.” (2 Kolonito 3:17) Ko te ʼofa, te manavaʼofa, te loto lolomi pea mo te faʼa kātaki ʼe fakamālohi ai te logo tahi ʼa he ʼu taumatuʼa heʼe haohaoa. (Efeso 5:33) Ko te fakahā ʼo te agamālū ʼe fakatupu fiafia, pea ʼe kehe ʼaupito mo te kē pea mo te ʼu fihi ʼaē ʼe fua kovi ki te ʼu famili e tokolahi. ʼE maʼuhiga te ʼu palalau ʼa he tahi, kae ko tona faʼahiga ʼaveʼave ʼo te ʼu palalau ʼaia ka ina fakahā ai te meʼa ʼaē ʼi tona loto. Kapau ʼe tou fakahā ʼaki he agamālū te ʼu meʼa ʼaē ʼe tou hoha kiai, pea ʼe fakasiʼisiʼi ai te fetokakoviʼaki. Neʼe tohi fēnei e te Hau Poto ko Salomone: “Mokā mālū he tali, pea ʼe ina tekeʼi te ʼita, kae ko he palalau fakatupu lotomamahi, ʼe ina fakahake te ʼita.”—Tāʼaga Lea 15:1.
5. ʼE lava tokoni feafeaʼi te agamālū ʼi he loto fale ʼe mole lotu tahi?
5 ʼE maʼuhiga tāfito te agamālū ʼi he loto fale ʼe mole lotu tahi. ʼO hilifaki kiai te agalelei, ʼe feala ke tokoni te agamālū ke ʼōmai kia Sehova te hahaʼi fakafeagai. Neʼe tokoni fēnei ia Petelo ki te ʼu fafine ʼohoana Kilisitiano: “ ʼO toe feiā mo koutou fafine, koutou fakalogo ki ʼokotou ʼohoana totonu, koteʼuhi, kapau ʼe ʼi ai niʼihi ʼe mole fakalogo ki te folafola, ke nātou tafoki mai ʼuhi ko te aga ʼo tonatou ʼu ʼohoana, kae heʼeki fai he palalau, he neʼe nātou sio mata ki takotou aga ʼaē ʼe maʼa ʼo fakatahi mo te fakaʼapaʼapa ʼe lahi ʼaupito. Ko tokotou teu ke ʼaua naʼa ko he teu ʼo tuʼa ʼi he fī ʼo te lauʼulu mo he ʼai ʼo he ʼu meʼa fakateuteu aulo peʼe ko he ʼai ʼo he ʼu kofu tuʼa, kae ko he teu ʼo te ʼuhigaʼi tagata fufū ʼaē ʼo te loto, ʼi te kofu ʼaē ʼe mole feala ke kovi ʼo te loto tokalelei mo mālū, ʼaia ʼe ko he meʼa maʼuhiga ʼaupito kia mata ʼo te ʼAtua.”—1 Petelo 3:1-4, MN.
6. ʼE lava feafeaʼi ʼaki te agamālū ke mālohi te ʼu noʼo ʼa te ʼu mātuʼa pea mo te fānau?
6 ʼE feala ke mole kei felogoi lelei te ʼu mātuʼa pea mo te ʼu fānau, tāfito la mokā mole nātou ʼoʼofa kia Sehova. Kae ʼi te ʼu loto fale ʼa te kau Kilisitiano fuli, ʼe tonu ke maʼu ai te agamālū. Neʼe tokoni fēnei ia Paulo ki te ʼu tāmai: “ ʼU tāmai, ʼaua naʼa koutou fai ke ʼiʼita takotou fānau, kae ke koutou haga akoʼi age kia nātou te akonaki pea mo te manatu ʼa Sehova.” (Efeso 6:4, MN ) Ka maʼu te agamālū ʼi te loto fale, pea ʼe mālohi ai te ʼu felogoi lelei ʼa te ʼu mātuʼa pea mo te ʼu fānau. Ko Dean, neʼe kau ki te fānau e toko nima, pea ʼe ina manatuʼi ʼo ʼuhiga mo tana tāmai: “Ko Papa neʼe agamālū. ʼE mole ʼau manatuʼi he temi neʼe ma fihi ai—māʼiape la mo taku kei tūpulaga. Neʼe agamālū tuʼumaʼu, māʼiape la mo te temi ʼaē neʼe ʼita ai. ʼI ʼihi temi neʼe ina fakatūʼa ʼau ke ʼau nofo ʼi toku kogafale, peʼe ina tapuʼi mai he ʼu meʼa neʼe ʼau leleiʼia, kae neʼe mole he temi neʼe ma fihi ai. Neʼe ko tamatou tāmai, kae neʼe toe hage pe ko homatou kaumeʼa, pea neʼe mole mātou loto ke lotomamahi.” ʼE mahino ia ʼe tokoni te agamālū ke mālohi te ʼu noʼo ʼa te ʼu mātuʼa pea mo te fānau.
ʼI Totatou Minisitelio
7, 8. He koʼe ʼe maʼuhiga ke tou fakahā te agamālū ʼi te minisitelio?
7 Ko te tahi faʼahi ʼaē ʼe maʼuhiga ai te agamālū ʼe ko te minisitelio. ʼI tatatou vaevae te logo lelei ʼo te Puleʼaga ki te hahaʼi, ʼe tou felāveʼi mo te ʼu hahaʼi kehekehe. Ko ʼihi ʼe nātou fakalogo lelei ki te logo ʼo te ʼamanaki ʼaē ʼe tou fakahā age kia nātou. Ko ʼihi, tupu ko he ʼu faʼahi kehekehe, ʼe feala ke nātou tali koviʼi tatou. Mokā hoko te faʼahi ʼaia, ʼe tokoni lahi anai kia tatou te kalitate ʼaē ko te agamālū moʼo fakahoko tatatou fekau ʼaē ke tou liliu ko he ʼu fakamoʼoni ʼo aʼu ki te potu taupotu ʼo te kele.—Gaue 1:8; 2 Timoteo 4:5.
8 Neʼe tohi fēnei e te ʼapositolo ko Petelo: “Koutou tāpuhā ʼi tokotou ʼu loto ia Kilisito ʼaē ko te ʼAliki, koutou nonofo teuteu tuʼumaʼu moʼo tali kia nātou ʼaē ʼe nātou fehuʼi atu te tupuʼaga ʼo takotou falala, kae ke koutou tali ʼaki he agamālū pea mo he fakaʼapaʼapa lahi.” (1 Petelo 3:15, MN ) ʼE tou sioʼi ia Kilisito ohage ko hotatou Faʼifaʼitakiʼaga, koia ʼe tou fakahā lelei ai te agamālū pea mo te fakaʼapaʼapa mokā tou fagonogono kia nātou ʼaē ʼe palalau kovi mai. ʼI te agamāhani, ko te aga ʼaia ʼe ina fakatupu he ʼu fua lelei.
9, 10. Koutou fakamatala te meʼa neʼe hoko ʼe hā ai te maʼuhiga ʼo te agamālū ʼi te minisitelio?
9 ʼI te avahi e tona ʼohoana te matapā kia ia ʼaē neʼe ina fisifisi, neʼe nofo ia Keith ʼi te tahi kogafale. ʼI tana ʼiloʼi ʼaē neʼe ko te Fakamoʼoni ʼa Sehova ʼaē neʼe fisifisi, neʼe ʼita te ʼohoana ʼo Keith ʼo ina lau ko te kau Fakamoʼoni ʼe nātou agakovi ki tanatou fānau. Neʼe mole ʼita te tēhina. ʼAki he agamālū, neʼe ina tali fēnei: “ ʼE ʼau lotomamahi ʼi tau manatu feiā. Fakalelei siʼi ʼou loto, ʼe feala la ke ʼau fakahā atu te meʼa ʼaē ʼe tui kiai te kau Fakamoʼoni ʼa Sehova?” Neʼe fakalogo ia Keith ki te fai palalau pea neʼe haʼu ʼo ina fakagata ai te palalau ʼa te tēhina.
10 Ki muli age, neʼe kamata fakahemala ia te taumatuʼa ʼi tana gaohi koviʼi feiā te tagata. Neʼe malave kia nāua tana agamālū. Neʼe punamaʼuli te taumatuʼa ʼaia, heʼe hili te vāhaʼa neʼe toe liliu age te tēhina, pea neʼe tuku e Keith pea mo tona ʼohoana ke ina fakamahino age ʼaki te Tohi-Tapu te meʼa ʼaē neʼe tui kiai. Neʼe nā ʼui ki muli age: “ ʼI te ʼu taʼu e lua ʼaē neʼe hoa kiai, neʼe ma fakalogo ki te ʼatu ʼu palalau ʼa te kau Fakamoʼoni.” Neʼe nā tali tanā ako Tohi-Tapu, pea ki muli age neʼe nā papitema toko lua moʼo fakahā kua nā foaki tonā maʼuli kia Sehova. Neʼe ko he tapuakina lahi ʼaia maʼa te tēhina ʼaē neʼe ina ʼuluaki maʼu ia Keith pea mo tona ʼohoana. Hili ni ʼu taʼu, neʼe toe felāveʼi te Fakamoʼoni mo te taumatuʼa ʼaia kua nā liliu ʼi te temi nei ko tonā tēhina pea mo tonā tuagaʼane fakalaumālie. Neʼe ʼi ai te ʼu fua lelei ʼo te agamālū.
11. Neʼe lava feafeaʼi ki he tahi ke faigafua tana tali te moʼoni ʼuhi ko te agamālū?
11 ʼI tana kei solia, ʼaki te ʼu meʼa ʼaē neʼe sio kiai ia Harold, neʼe liliu ai ko he tagata ʼitaʼita pea neʼe mole kei tui ʼe maʼuli moʼoni te ʼAtua. ʼO hilifaki ki tona ʼu faigataʼaʼia, neʼe mole kei feala hana haʼele he neʼe feʼīʼaki mo te tagata neʼe konahia. ʼI te ʼolo age ʼa te kau Fakamoʼoni ʼa Sehova ki tona ʼapi, neʼe kole age e Harold kia nātou ke ʼaua naʼa toe ʼolo age kiō ia. Kae ʼi te tahi ʼaho, ko te Fakamoʼoni ʼe higoa ko Bill neʼe ʼalu ʼo fai tana ʼaʼahi neʼe vāhaʼa fale mo Harold. Kae neʼe faihala ia Bill ʼo ina fisifisi te matapā ʼo Harold. ʼI te avahi e Harold te matapā, kae tapiki ki tona ʼu toko, neʼe faifakalelei atu ki ai ia Bill pea mo ina fakamahino age neʼe haʼu ʼo ʼaʼahi tona vāhaʼa fale. Koteā ʼaē neʼe fai e Harold? Neʼe mole ʼiloʼi e Bill, kae neʼe sio ia Harold ʼi te ʼu tala logo ʼi te televisio neʼe fakahā ai te gāue fakatahi ʼa te kau Fakamoʼoni moʼo laga te Fale foʼou ʼo Te Puleʼaga ʼi he temi nounou. Neʼe ōfo ʼaupito ʼi tana sio ki te gāue fakatahi ʼa te toe hahaʼi, pea neʼe fetogi ai tana manatu ʼo ʼuhiga mo te kau Fakamoʼoni. Neʼe malave kia Harold te faifakalelei age ʼa Bill mo tana agalelei pea mo tana agamālū, ʼo ina tali ai ke ʼaʼahi ia ia e te kau Fakamoʼoni. Neʼe ina ako te Tohi-Tapu, mo tuputupu, pea neʼe liliu ko he kaugana ʼa Sehova kua papitema.
ʼI Te Kokelekasio
12. Koteā te ʼu agaaga ʼo te mālama ʼaē ʼe tonu ke tauʼi e te kau Kilisitiano ʼo te kokelekasio?
12 Ko te tolu faʼahi ʼaē ʼe maʼuhiga ai te agamālū ʼe ko te kokelekasio. Ko te fefihiʼaki ʼe ko he meʼa ʼe hoko māhani ʼi te sosiete ʼo te temi nei. Ko te ʼu fefihiʼaki, mo te ʼu kē ʼe ko te ʼu meʼa ʼaia ʼe hoko ia nātou ʼaē ʼe nātou mulimuli ki te kakano. ʼI ʼihi temi, ko te ʼu agaaga ʼaia ʼo te mālama ʼe hū māmālie ki te kokelekasio, pea hoko ai mo he ʼu fetokakoviʼaki pea mo he ʼu fihi ki he ʼu palalau. ʼE lotomamahi te ʼu tēhina takitaki mokā tonu ke nātou fakatonutonuʼi ni ʼu ʼaluʼaga feiā. Kae ko tanatou ʼoʼofa kia Sehova pea mo tonatou ʼu tēhina ʼe ina uga nātou ke nātou faiga ke fakahemala ia ia ʼaē neʼe faihala.—Kalate 5:25, 26.
13, 14. Koteā ʼaē ʼe feala ke hoko mokā tou “akoʼi ʼaki te agamālū ia nātou ʼaē ʼe mole nonofo mo he ʼu fakatuʼutuʼu lelei”?
13 ʼI te ʼuluaki sēkulō, ko Paulo pea mo Timoteo, ʼaē neʼe nā kaugā gāue, neʼe nā felāveʼi mo he ʼu faigataʼa mai ia ʼihi ʼo te loto kokelekasio. Neʼe fakatokaga e Paulo ia Timoteo ki te ʼu tēhina ʼaē neʼe fakatatau ki he ʼu ipu neʼe “fakaʼaogaʼi ki he meʼa ʼe kovi.” Neʼe fakahā e Paulo te manatu ʼaenī: “Ko he kaugana ʼa te ʼAliki ʼe mole tonu ke fekēʼaki mo he tahi, kae ʼe tonu ke agamālū ki te hahaʼi fuli, faiva ʼi te faiakonaki, pea mo lava lolomi ʼo ia ʼi te agakovi, pea mo ina akoʼi ʼaki te agamālū ia nātou ʼaē ʼe mole nonofo mo he ʼu fakatuʼutuʼu lelei.” Ka tou agamālū māʼiape la mokā ʼe fakafifihi mai he tahi kia tatou, pea ʼe ina uga ai ia nātou ʼaē ʼe mole manatu tahi mo tatou ke nātou toe fakakaukauʼi tanatou ʼu palalau. Ki muli age, ʼe feala kia Sehova, ohage ko tona tohi e Paulo ki ʼamuli, ke ina “foaki . . . kia nātou te fakahemala ʼaē ʼe ina taki ki te ʼatamai mālama totonu.” (2 Timoteo 2:20, 21, 24, 25, MN ) Koutou tokagaʼi ʼe fakapipiki e Paulo te loto lolomi pea mo te agamālū.
14 Neʼe maʼuliʼi e Paulo te meʼa ʼaē neʼe ina faka mafola. ʼO ʼuhiga mo te kau “ ʼapositolo lelei ʼaupito” ʼaē neʼe kau ki te kokelekasio ʼo Kolonito, neʼe ina uga fēnei te ʼu tēhina: “Ko ʼau Paulo totonu, ʼe ʼau kole atu kia koutou ʼaki te agamālū mo te lotoʼofa ʼo Kilisito, ia ʼau ʼaē ʼe agavaivai mokā ʼau fakatahi mo koutou, pea mo ʼau lototoʼa ʼo ʼuhiga mo koutou mokā ʼau puli.” (2 Kolonito 10:1; 11:5, MN ) Neʼe faʼifaʼitakiʼi moʼoni e Paulo ia Kilisito. Koutou tokagaʼi neʼe ina fai tana kole ki te ʼu tēhina ʼaia “ ʼaki te agamālū” ʼo Kilisito. Neʼe mole fialahi peʼe aga fefeka. ʼE mahino ia ko tana tokoni ʼaia neʼe malave kia nātou ʼi te kokelekasio ʼaē neʼe lelei tonatou loto. ʼI tana fai te faʼahi ʼaia neʼe faigafua ai te ʼu felogoi, pea mo fakatuʼu ai te tafitoʼaga ki te tokalelei pea mo te logo tahi ʼi te kokelekasio. ʼE feala koa hatatou mulimuli ki te aga ʼaia? ʼE ʼaoga tāfito ki te kau tagata ʼāfea ke nātou faʼifaʼitaki kia Kilisito pea mo Paulo.
15. He koʼe ʼe maʼuhiga te agamālū mokā tou fai tokoni?
15 Ko te maʼua ʼaē ke tokoni ki te hahaʼi ʼe mole gata ʼaki pe mokā kamata hoko he tokakovi pea mo he maveuveu ʼi te kokelekasio. ʼO fualoa ʼi muʼa ʼo te hoko ʼo he ʼu fihifihia, ʼe tonu ke foaki e te ʼu tēhina he tokoni ʼaki te ʼofa. Neʼe uga fēnei e Paulo: “ ʼU tēhina, kapau ʼe ʼi ai he tagata ʼe fai hana lākahala ia muʼa ʼo hana ʼiloʼi, ko koutou ʼaē ʼe koutou maʼu ia te ʼu kalitate fakalaumālie, koutou faigaʼi ʼo fakatonutonuʼi te tagata ʼaia.” ʼO feafeaʼi? “ ʼAki he agamālū, ʼo ke tokaga kia koe totonu, talia naʼa toe fakahalaʼi mo koe.” (Kalate 6:1, MN ) Ko te taupau ʼo te “agamālū” ʼe mole faigafua tuʼumaʼu, tāfito la heʼe ko te kau Kilisitiano fuli, ʼo kau ai mo te kau tagata ʼāfea, ʼi ʼihi temi ʼe tō ki te ʼu holi ʼo te agahala. Kae ko te tokoni agamālū ʼe ina faka faigafua anai kia ia ʼaē neʼe agahala ke ina fakatonutonuʼi tana aga.
16, 17. Koteā ʼaē ʼe feala ke tokoni kia ia ʼaē ʼe fakafeagai ki te tali ʼo te tokoni?
16 ʼI te faka Keleka, ko te kupu ʼaē neʼe fakaliliu ʼaki te kupu “fakatonutonuʼi,” ʼe feala ke faka ʼuhiga ki te fakamatatonu pea mo te toe fakapipiki ʼo he ʼu hui neʼe fasi, pea ʼe mamahi ʼaupito te faʼahi ʼaia. Ko te tōketā ki te ʼu hui, ʼe ina fakahā atu anai te ʼaoga ʼo te faitoʼo ʼaia. Ko tana mole hoha ʼe mole fakatupu tuʼania. Ko tana ʼu palalau ʼe tokoni mai moʼo fakamaʼamaʼa tokita mamahi. ʼO toe feiā pe, ko te fakatonutonuʼi ʼi te faʼahi fakalaumālie ʼe lagi fakaloto mamahi. Kae ko te agamālū ʼe tokoni ki he tahi ke ina tali lelei te tokoni, ke ina toe maʼu ai he ʼu felogoi lelei pea mo tokoni kia ia ʼaē neʼe faihala ke ina fetogi tana aga. Tatau aipe pe neʼe mole ina tali te tokoni ʼi te kamata, kae ko te agamālū ʼa ia ʼaē ʼe ina fai te tokoni ʼe ina fakaliliu ia ia ʼaē neʼe mole ina tali ke mulimuli ki te tokoni faka Tohi-Tapu.—Tāʼaga Lea 25:15.
17 Ka tou tokoni ki ʼihi ke nātou fetogi, ʼe feala pe ke nātou sio ki te tokoni ʼaia ohage ko he valoki. ʼE ʼui fēnei e te tagata faitohi: “Ka tou fakatonutonuʼi ʼihi, pea ʼe tou loto ke tali e te hahaʼi tatatou manatu kae ʼe ʼaoga ʼaupito ke tou agavaivai.” Ko te maʼu ʼo te agamālū ʼaē ʼe tupu mai te agavaivai, ʼe tokoni anai ki te Kilisitiano ʼaē ʼe fai tokoni ke ʼaua naʼa tō ki te tuʼutāmaki ʼaia.
“Ki Te Tagata Fuli Pe”
18, 19. (a) He koʼe ʼe lagi faigataʼa ki he ʼu Kilisitiano tanatou fakahā te agamālū ki te ʼu puleʼaga? (b) Koteā ʼaē ka tokoni anai ki te ʼu Kilisitiano ke nātou fakahā te agamālū kia nātou ʼe pule, pea koteā ʼaē ʼe feala ke hoko?
18 Ko te faʼahi ʼaē ʼe faigataʼa ai ki te tokolahi hanatou fakahā te agamālū ʼe ko tanatou ʼu felogoi mo te ʼu puleʼaga. ʼE moʼoni, ko ʼihi meʼa ʼe fai e te ʼu puleʼaga ʼe fai ʼaki he aga fefeka pea ʼe mole mahino ki te hahaʼi. (Tagata Tānaki 4:1; 8:9) Kae ko totatou ʼofa kia Sehova ʼe tokoni mai anai ke tou fakamoʼoni ki tana pule māʼoluga, pea mo fakalogo ki te ʼu puleʼaga faka tagata, kae ʼe faka tuʼakoi. (Loma 13:1, 4; 1 Timoteo 2:1, 2) Māʼiape la mokā kumi e te ʼu pule takitaki ke nātou faka tuʼakoi tatatou tauhi kia Sehova, ʼe tou fia kumi he ʼu fealagia ke tou foaki he ʼu sakilifisio ʼo te fakavikiviki.—Hepeleo 13:15.
19 ʼE mole he ʼu ʼaluʼaga ʼe tonu ai ke tou agakovi. ʼE tou faiga ke tou aga fakapotopoto ʼo mole tou maumauʼi he pelesepeto faitotonu. ʼI te faʼahi ʼaia, neʼe fua lelei ki totatou ʼu tēhina tanatou hoko atu tonatou minisitelio ia fenua e 234 ʼi te malamanei katoa. ʼE tou manatuʼi te tokoni fēnei ʼa Paulo: “Koutou fakalogo pea mo talagafua ki te ʼu puleʼaga pea mo te kau takitaki ohage ko he ʼu pule, pea koutou nonofo teuteu ki te gāue lelei fuli pe, ke ʼaua naʼa koutou laukovi ki he tahi, ke ʼaua naʼa koutou liliu ko ni ʼu hahaʼi laga kē, ke koutou popoto, ʼo koutou fakahā he agamālū ki te tagata fuli pe.”—Tito 3:1, 2, MN.
20. Koteā te ʼu lelei ka maʼu e nātou ʼaē ʼe agamālū?
20 ʼE lahi te ʼu fua lelei ʼe maʼu e te hahaʼi fuli ʼaē ʼe agamālū. Neʼe tala fēnei e Sesu: “Manuʼia ia nātou ʼaē ʼe agamālū, heʼe nātou maʼu anai te kele.” (Mateo 5:5, MN ) Ki te ʼu tēhina ʼo Kilisito ʼaē neʼe fakanofo ʼaki te laumālie, ko tanatou maʼu te agamālū ʼe feala ai ke nātou taupau tonatou fiafia pea mo tonatou pilivilesio ʼaē ke nātou hau ʼi te Puleʼaga ki te kele. Ki te “hahai kaugamalie” ʼo te “tahi ʼu ōvi,” ʼe nātou haga fakahā te agamālū pea mo nātou fakatalitali ki te maʼuli ʼi te Palatiso ʼi te kele. (Apokalipesi 7:9; Soane 10:16, MN; Pesalemo 37:11) Ko he ʼu meʼa fakatalakitupua ka hoko ʼi te ka haʼu. Koia tou manatuʼi tuʼumaʼu te tokoni ʼaē neʼe foaki e Paulo ki te kau Kilisitiano ʼi Efeso: “Koia, e au kole atu kia koutou, e au, ko te tagata pilisoni i te Aliki, ke tuha tautou mauli mo te paui nee fai kia koutou; aki te agavaivai fuape mo te agamalu.”—Efeso 4:1, 2.
Moʼo Fakamanatu
• Koteā te ʼu lelei ʼe tou maʼu mokā tou fakahā te agamālū
• ʼi te loto fale?
• ʼi te minisitelio?
• ʼi te kokelekasio?
• Koteā te ʼu lelei ʼe fakapapauʼi kia nātou ʼaē ʼe agamālū?
[Paki ʼo te pasina 21]
ʼE maʼuhiga tāfito te agamālū ʼi he loto fale ʼe mole lotu tahi
[Paki ʼo te pasina 21]
Ko te agamālū ʼe ina fakamālohiʼi te ʼu noʼo faka famili
[Paki ʼo te pasina 23]
Koutou tali ʼaki he agamālū pea mo he fakaʼapaʼapa lahi
[Paki ʼo te pasina 24]
Ko he tahi ʼe fai tokoni ʼaki he agamālū ʼe lava tokoni ki he tahi neʼe agahala